الاثنين، 9 فبراير، 2009

الكيف


الكيف اللى هو المزاج زى ما بيسميه اهله

والمخدرات زى ماكل الناس بتسميه

استخدام المواد المخدرة ضارب فى القدم فقد استخدمته بعض الجماعات الدينيه فى بعض الطقوس كوسيله للوصول لحاله روحانيه معينه

كما فى العصر الاسلامى بعض التنظيمات السياسيه ذات الطابع الدينى كالفداويه الذين تواجدو فى مكان ما فى ايران يسمى بقلعه الموت

وفى مثل هذة الحالات اقتصر الاستخدام على الافيون والحشيش


لو جينا نقيم الناس اللى بيتعاطو المخدرات فى زماننا الحالى فلن يخرجو عن التصنيفات الاتيه


استخدام طبى لبعض المواد المخدرة فى شكل عقاقير او لاجراء عمليات جراحيه مشروعه او لمعالجه بعض الاضطرابات النفسيه والعصبيه

وهذه استخدامات مشروعه طبعا


فئه بتسخدمه للوصول لحاله روحانيه معينه ودول قليلين قوى وان كانو منتشرين فى كل مكان فى العالم


فئه تستخدمه لزوم الشغل كبعض السادة العاملين بالمجال الموسيقى والفنى ومهندسى الصوت واصحاب الاعمال التى تحتاج لابداع عقلى


الفئه العظمى وهم من يتعاطون المخدرات لزوم المزاج والقعدات الحلوة والهىء والمىء والشخاليل ودول طبعا اكتر من الهم على القلب


فئه تتعاطى المخدرات لتهرب من واقعها الاليم مع الاسف


ولكن


هل هؤلاء فقط هم اهل الكيف اللى عايزين يهربو من واقعهم

لا مع الاسف لو فكرنا بشكل اعم واشمل من كدة هنلاقى اكبر تجمع لاهل الكيف على مر التاريخ يمتد من الخليج العربى شرقا الى الاطلنطى غربا

وسنجد اكبر بؤرة للكيف على وجه الخصوص يحدها شمالا البحر المتوسط وشرقا البحر الاحمر وغربا الحدود الليبيه وتعرف باسم

مصر

عندنا هنا 80 مليون مدمن وصاحب كيف وصاحب مزاج هتقولولى ازاى اقولكم

صاحب المزاج مش هو الانسان اللى بيلف جوينت ولا بيشم ولا بيبلبع ولا بيضرب حقن


الانسان اللى بيهرب من حياته وواقعه الاليم ومستقبله المظلم ومتاعبه اليوميه فى جنون كرة القدم والتسابق بالالاف للوقوف ساعات فى طوابير طويله امام الاستاد علشان يشجع ابو فانله زرقا اوحمرا اوبيضا ولما الكورة تخش الشبكه يفرح ويزقطط كأن كل مشاكله فى الدنيا والاخرة اتحلت والحياة بقى لونها بمبى وفاكر انه كدة صاحب مبدأ, دة صاحب كيف ومدمن ومختل عقليا.



الانسان اللى بيقضى حياته كلها قدام شاشه التلفزيون يقلب فى قنوات الدش ويعيش حياة عمرة ماشافها ولا عاشها دة غير انها غير واقعيه

ويسيب الدنيا تضرب تقلب حوالين منه دة صاحب مزاج.


الانسان اللى يخش السينما ويفرح ويزقطط من قباحه البطل ومعاكساته لبنات الناس فى الشارع وسفالته بينما المشاهد دة هو هواة اللى لو شاف نفس المظر فى الشارع هيسب ويلعن ويحسبن ويحوقل دة صاحب مزاج ومدمن ومغيب.


الراجل اللى مربى دقنه ومبيفوتش فرض وكل كلامه قال الله وقال الرسول بينما سايب بناته دايرين على حل شعرهم دة راجل صاحب كيف ومدمن ومغيب.


الناس اللى تقعد طول النهار تسب وتلعن فى حاجه اسمها الظباط ودول مرتشين وحراميه ومش بيراعو ربنا وفى نفس الوقت لو اتقدم لبنتهم ظابط بيطيرو من الفرحه وكمان بيحفوا علشان يدخلو عيالهم كليه الشرطه دول مختلين واصحاب مزاج.


الانسان اللى كل همه فى الحياة ياكل ويشرب وينام ويشترى شقه ويتجوز ويخلف عيال ويربيهم علشان يكبرو وياكلو ويشربو وينامو ويتجوزو ويخلفو يعنى زى البهايم كده ولا مؤاخذة بدون اى مبادىء او اهداف ساميه او قضيه يدافع عنها دة انسان مغيب ومختل وصاحب كيف.


البنت اللى تدور على حل شعرها وترخص نفسها علشان تصطاد الدغف اللى هيقع فيها ويتجوزها, والام اللى بتحرض بنتها تلبس لبس مش محترم وتمشى تتقصع فى الشارع علشان تصطاد عرسان وتتجوز بسرعه جوازة سقع دول ناس مرضى ومغيبين واصحاب كيوف.


الانسان اللى بيهين ويزل اهل بلدة وبيخرب البيوت العمرانه ويدافع عن الحراميه واللصوص ويقنع نفسه انه كدة بيخدم الوطن وبيدافع عنه ده انسان مختل ومريض وصاحب كيف.


الانسان اللى شعارة فى الحياة انا اولا ونفسى قبل الجميع وغير كده ميهمنيش ومش عارف ان اللى بيجرا لغيرة لو ما اتوقفش بكرة هيجراله وأننا كلنا فى مركب واحدة هو دة انسان مخلول وصاحب كيف.


الانسان اللى بيبيع اخرته علشان كام سنه يعيشها وهو راكب على رقاب الخلق يسرق ويزل فيهم ومش بيفكر ان الكرسى دة مش هيدومله ومش بيعمل حساب لبكرة دة بنى ادم مختل ومدمن .


الانسان اللى ثقافته متواضعه للغايه ومستواه المعرفى ضحل وربنا كارمه بقرشين وبكام بير بترول يصرف منهم وفاكر نفسه احسن انسان ومعتقد انه من احسن عرق بشرى وكل من دونه اقل منه وبيقول ارفع راسك انتا سعودى غيرك ينقص وانتا تزودى ومش حاسس بالخيبه والوكسه اللى هو فيها ومش عامل حساب يوم فلوسه هتخلص فيه دة انسان غبى ومغيب ومدمن.



شوفتو فيه حوالينا كام مدمن؟؟؟


مابين مدمن الوهم, ومدمن الغباء وتربسه المخ, ومدمن السلطه, ومدمن النفوذ, ومدمن الجبن والسلبيه, ومدمن الماديه, ومدمن التفاهه والسطحيه, ومدمن المال , ومدمن الكرسى والمنصب,


كل دول مدمنين

وادمانهم اخطر من ادمان البانجو والهيروين.


شوفتو بقى احنا فيه فى مجتمعنا كام مدمن وكام صاحب كيف؟؟؟؟