الثلاثاء، 10 فبراير، 2009

حرب المشيخه


اه حرب المشيخه

مش حرب الفراوله ولامؤاخذه

امبارح استضاف الاعلامى وائل الابراشى فى برنامجه الحقيقه اتنين مشايخ عرفت انهم من مشايخ الطرق الصوفيه , كما ان فيه صراع جامد مابينهم على اللى يمسك المشيخه , وبسم الله ماشاء الله , عليهم كدا سكينه ووقار وجو روحانى جامد وهما نازلين سلخ وطحن فى بعض

الشيخ عكروت يقول دا ورثى ونا اكبر واحد فى الشله البيت بيت ابونا والغرب يطردونا ,يرد عليه الشيخ زعبوط يقوله لا يابابا لا, دى شطارة وفهلوة وان بيت ابوك وقع خدلك منه قالب ونا بشطارتى وحداقتى اخدت البيت كله, يرد عليه الشيخ عكروت: الضرب عالوش مافيهوش معلش وانتو استكردتونى وكرتونى على قفايا وحلفتو على المصحف بالانصياع والطاعه وبعدين رجعتو فى كلامكوا.

الشيخ زعبوط:لا بقى لعلمك اساسا وحنا بندفن الشيخ الله يرحمه ماكانش فيه مصاحف وبعدين ايه يا اخى انت مش يتؤمن بتداول السلطه والدماء الجديدة ولا ايه.

الشيخ عكروت: لا دانتو دلاديل لأمن الدوله والنظام , والحكومه هى اللى عايزاكم لانكم وحشين وشريرين زى الحكومه مش طيبين ومحترمين زي حلاتى كدة............


طبعا الحوار اللى دار مش كده , بس انا عقلى سمعه بالشكل اللى حضراتكم شايفينه دة, وطبعا الحاج والحاجه عندى هنا قاعدين فاتحين بقهم ومزبهلين, هم بيعملو كدة ليه, وليه بيتصارعو على المشيخه بالشكل دة؟؟؟؟


طبعا السادة المتابعين للساحه السياسيه والتركيب المعقد للمجتمع المصرى عارفين الاجابه كويس......


من الاول:

الطرق الصوفيه فى مصر تتمتع بشعبيه هائله لدى قطاعات عريضه من الشعب المصرى , دة فضلا عن اندراج الملايين من افراد هذا الشعب لهذة الطرق ابتداء من الحرفيين والمزارعين والعمال, واصحاب الثقافه المحدوده وهم كثر طبعا , الى الكثير من التجار واصحاب الاموال والثروات وامثالهم ممن يتبعون تلك الطرق او على الاقل يمولونها من باب البركه وتوسيع الرزق....

طبعا مما سبق نستنتج ان الطرق الصوفيه فى مصر متغلغله فى اكثر طبقات الشعب اهميه والتى تمثل السواد الاعظم من سكان مصر, دى حاجه تانى حاجه لكم ان تتخيلوا كميه الثروات المتدفقه لهذة الطرق من اموال نذور او تبرعات رجال مال مهمين ,الخ......



تانى حاجه تركيب اى طريقه صوفيه بيعتمد على علاقه اساسيه بيسموها المريد وشيخه, طبعا المريد هنا اللى هو عضو الطريقه اللى اخد العهد رسمى على شيخ الطريقه مش اللى بيروح الحضرة مرة ولا اتنين علشان يتفرج,ومن اساسيات الصوفيه حاليا فى مصر ان المريد لا يمكن ومن رابع المستحيلات ان يصل فى الطريق الى الله بدون اتباع تعليمات وتعاليم شيخه اللى هو شيخ الطريقه الحالى وقبل منه الشيخ المؤسس, يعنى من الاخر كدة لوحدك هتوه وتتبهدل ويطلع ميتينك ومش هتوصل لحاجه لازم تتبع شيخ....

وبالتالى فطاعه الشيخ امر حتمى واجبارى وليس مجرد اختيار , فعلى هذا الاساس تخيلوا يا سادة طريقه فيها مليون انسان من كافه شرائح المجتمع دة طبعا بالاضافه لاسرهم لان الموضوع دة عائلى فعاده اهل بيت الرجل يتبعون نفس الطريقه

تخيلو العدد الضخم دة منهم العامل والفلاح والطبيب والمهندس ورجل الاعمال ورجل السياسه والنفوذ وفنانين مشهورين, كل هؤلاء يتحكم بهم فرد واحد ان قال يمين يبقى يمين ولو قال شمال يبقى شمال, تخيلو اهميه الراجل دة ايه.

لا دة مش كدة وبس , تخيلو كمان رجل بتحكم فى مشايخ بضع عشرات من هذة الطرق منتشرة فى بر مصر ويسود على ملايين مملينه من ابناء هذا الوطن


طبعا الصورة كدة اصبحت اكثر وضوحا فالشيخ حبيب الكل وسمك لبن تمر هندى مع رجال السياسه ورجال الفن واصحاب المال والنفوذ ورجال الدوله وقيادات الجيش والشرطه, يعنى من الاخر كدة انت حبيب الكل والكل محتاجلك, دا غير العز والنغنغه ونافورة الفلوس اللى من غير حساب.

يعنى:

لو واحد مثلا عايز يحكم البلد والناس مش طايقاه وهو معتوة واهبل وضعيف الشخصيه ممكن يعمل علاقه قويه مع السادة المشايخ دول بالاضافه لمنح بعض المزايا والمنح وبالشكل دة يبقى ضمن فى خبطه واحدة تأييد عشرة ولا خمستاشر مليون مواطن على الاقل , دا ولا احزاب مصر مجمعه مع بعض .

طبعا ساعتها يبقى تاييد سعادة البيه وطاعته من طاعه مولانا الشيخ اللى هى من طاعه ربنا طبعا.....


لما جهاز سىء السمعه تعب وزهق وقرف من القلق ووجع الدماغ والتلطيش مع المعارضه عمال على بطال يلاقى قدامه تنظيم من الناس مالوش دعوة بالسياسه ولا بأى حاجه فى البلد وعايش فى العصور الوسطى ومش دارى باللى حواليه, يبقوا حبايب قلبهم وزى العسل كمان

لما يريحونا من قلق سدس سكان البلد مقابل بعض الخدمات الفارغه والعبيطه زى تعيين فلان او ترقيه علان...



لما قوى دوليه طلعان ميتينهم من حركات المقاومه اللى بتنخر فيهم يوم بعد يوم يلاقوا ناس بالشكل دة ممكن يقدموا تفكيرهم كبديل للتفكير الايجابى والمقاومه ضدهم مع أنتشارهم الواسع دة يبقو حابيب قلبهم ياخواتى بحبهم, طبعا عارفين كلنا ان السفير الامريكى كان بيحرص انه يحضر مولد البدوى سنويا , احب اقول للناس اللى بتستغرب من السلوك دة ان عدد الناس اللى بتحضر مولد البدوى فى طنطا فى سنه واحده اكتر من عدد الحجاج للبيت الحرام فى 3 سنوات.

فهمتم ليه؟؟؟؟؟

طبعا كلكم عارفين ان فيه اقتراحات فى المطبخ السياسى الامريكى بتبنى الفكر الصوفى بمفهومه السلبى المعاصر كبديل للفكر السائد حاليا لدى كل حركات المقاومه الاسلاميه فى العالم , والكلام دة على فكرة اتنشر فى مجلات عالميه وصرح بيه مسؤلين كبار.....

طيب من الاول تانى وعلشان ماحدش يزعل منى وعلشان نحط النقط على الحروف,,

الكلام دة مش من احلامى لأ بل الجزء المتعلق بالفكر الصوفى انا عشته بنفسى لما انضميت فى ايام المراهقه لاحدى الطرق الصوفيه فى مصر , وعلى فكرة دى كانت من اكثر الطرق احتراما وتحفظا فى مصر, واخذت عليهم المأخذ الاتيه , دا طبعا ينطبق على الكل مش دول بس:

اولا : كل اهتمامات السادة الزعماء تنصب فى جمع اكبر عدد ممكن من الاتباع ويا حبذا ان كان منهم اصحاب المال واصحاب النفوذ ويا سلام سلم ان كان منهم رتب كبيرة فى الجيش ولا الشرطه.


ثانيا : اسلوب غسيل المخ داخل الطريقه اللى بيقوم على انك تلغى مخك ويبقى الكلام كلام الشيخ بس.

ملحوظه : انا اعرف ناس من طبقات محترمه مش بيعملو اى حاجه فى حياتهم الا بعد رأى مولانا يعنى لو شاف عروسه حلوة ومحترمه وبنت ناس وبيحبها وتحبه ومافيهاش غلطه ميتجوزهاش الا بعد موافقه الشيخ ولو قال لأ يبقى لأ.

وكدة برضه فى شغله او اى اختيار فى حياته, بالذمه دة اسمه كلام , يعنى حتى لو فرضنا جدلا ان الراجل دة بركه وصاحب بصيرة ورؤيته نافذه هل يصح انى الغى مخى وتفكيرى قصادة, وهل دة يرضى ربنا؟؟؟ , وهل دة مهما كان شخص معصوم من الخطأ؟؟؟؟, طبعا اخوانا اللى فى الشرقيه عارفين كويس الشيخ صالح المفتكس وبلاويه وعلاقاته ونفوذة وفلوسه وعربياته وعماراته......



ثالثا: التعصب الشديد للطريقه , يعنى كل واحد شايف ان طريقته دى هى الصح واعظم طريقه , دا طبعا بالاضافه لانهم ككل شايفين التيار السلفى مجرد شويه اعداء وجهله, طبعا مش هنخش فى الاتهامات المتبادله بين الطرفين, يعنى الناتج فى النهايه هو تفرقه وتشتيت المسلمين وانهم بدل ما يعرفوا اعدائهم الحقيقيين نازلين تقطيع وبهدله فى بعض.....



من الاخر نجيب الخلاصه:


التيار الصوفى فى بدايات عهده كان صاحب مبادىء وفكر وفلسفه من العيار التقيل واللى ليها وزنها على مر التاريخ زى عمر بن الفارض وابن عربى وابن عبد ربه, طبعا كونهم اخطاوا او اصابوا فى فلسفتهم او كثرت عندهم الشطحات الفكريه من عدمه او كون البعض متفق معهم ام لا دة مش مهم , كونك انك تبنيت فكر معين دى حريتك وانت المسئول امام الله عن افكارك وليس اى حد غيرك , وليك عندى كل احترام طالما انك:

مش بتشتت المجتمع لطوائف يقاتل بعضها بعضا ويكفر بعضها بعضا.

مش بتدعو لافكار هدامه تقوض اسس المجتمع الاسلامى وتنشر فيه السلبيه وقيم الجهل والتخلف.

طالما انك تحترم الغير وتستخدم افكارك لحشد المجتمع ضد اعداؤة ولا تستنكف انك تكون فى خندق واحد مع من يخالفك الراى امام عدوكم المشترك.

طالما انك بنحترم الاخر ولا تفرض رايك عليه

طالما انك لا تقوض الاسس والمبادىء اللى قام عليها المجتمع الاسلامى.

طالما انك ملتزم بدول تبقى على عينى وراسى من فوق انما لو خرجت على واحده فيهم يبقى معلش , لغايه هنا واستوب...



وللى بيهوى التاريخ طبعا عارف ان فيه طرق صوفيه فى روسيا لعبت دور مهم جدا فى مقاومه الاستعمار الروسى لاقاليم اسلاميه ودحرت عظام الاباطرة الروس , وزيها فى افغانستان....


وكمان فيه طرق تبناها الاستعمار الانجليزى وعمل على نشرها واللى بتقوم فى اساسها على السلبيه وان مقاومه الاحتلال الانجليزى حرام.


وعندنا فى العصر العباسى ناس زهاد تركو الدنيا لما كانت تحت رجليهم بس وقت الشده كان كل واحد فيهم بيشيل سيفه ويحارب ولا اجدع اسد......


يعنى يا جماعه فيه كدة وفيه كده...

طيب الناس اللى حدانا دلوقيت مين فى دول؟؟؟

طيب نسال سؤال هل الصوفيه فى مصر دلوقتى زهد وتورع عن المال والمناصب ولا سبوبه واكل عيش؟؟؟؟؟


هل الصوفيه فى مصر دلوقتى فيها اى حراك فكرى او فلسفى جديد ولا مجرد ورد الصباح والمساء بتاع سيدى فلان بالاضافه الى الحضرة الاسبوعيه بتاع يارجال الحديقه مدد, يا اهل الطريقه مدد؟؟؟؟


هل الصوفيه فى مصر دلوقتى بتتبنى اى تيار ايجابى لمواجهه فساد الحكومه مثلا او دعم فلسطين فكريا وماديا , ان مش بتكلم على الفلوس والبطاطين اللى بقت حجه البليد دلوقتى , هل شايفين حاجه من دة ؟ او حتى اى محاوله صد للنفوذ الامريكى داخل التيار الصوفى فى مصر؟؟؟



طب سؤال اخير شفنا ايه من الطرق الصوفيه فى مصر من ايام الفتح العثمانى والى الان فى مواجهه الاستعمار والاستبداد السياسى او حتى الفساد والتفسخ الاخلاقى والاجتماعى؟؟؟؟

شفنا ايه غير رفع الاعلام والاشاير واستحضار الاوليا ايام الغارات المتكرره على الاسكندريه وسواحل مصر ايام المماليك , ونفس السلوك ايام نابليون؟؟؟؟؟


السادة اعضاء الطرق الصوفيه , دقيقه واحدة , دقيقه واحدة فكر فيها بعقلك اللى ربنا اعطاة ليك امانه وامرك انك تستخدمه وكرر عليك فى القران مرات ومرات افلا تعقلون......


دقيقه واحده صحح فيها موقفك واعرف الصح من الغلط ولا تسلم نفسك لحفنه من الارزقيه والمدعين يستخدموك سلعه لكسب بعض المميزات والمناصب....


دقيقه واحد اعرف انك فيها انسان عايش فى البلد دى واللى هيجرا عليهم هيجرى عليك وانكم كلكم فى مركب واحدة.....

دقيقه اعرف فيها مين عدوك ومين حبيبك ومين اللى بيستغلك.....


وكلمه كمان للسادة السلفيه:

الاسلام ليس حكرا على احد وليس من حقك انك تكفر فلان او تحكم ان فلان فى النار فانت بهذا الشكل تحجر على ربك والعياذ بالله , افتكر ان الشتيمه والتكفير والعدوان عمال على بطال مش هيجيب نتيجه , وافتكر سلوك الاوائل كان عامل ازاى , وادع الى سبيل ربك بالحكمه والموعظه الحسنه , واعرف ان كل حاجه بالعقل والتفاهم.

ومن الاخر كلكم فى خندق واحد وعدوكم واحد فلا داعى لهذا الاختلاف على الفرعيات وما لم يحل خلال الف عام وفى عهود الرخاء والعز لن يحل الان فى ايامنا السودة دى.

احترموا بعضكم واتلموا على بعض واعرفوا ان الفرقه هى اللى قسمت ظهر الامه دى مش حاجه تانيه..

واحب ارفع القبعه , مع انى مش لابس قبعه ولا حاجه , لكل اصحاب الفكر من كافه التيارات الاسلاميه اللى تبنوا مد جسور الحوار بين الكل من باب لم الشمل , وكان ليا الشرف انى اتعاملت مع ناس فيهم , ربنا يوفقكوا يا اااااارب , ويتلم شملنا ....

واخيرا اتوجه بكلمه حرقانى قوى للسادة البهوات المشايخ اياهم , اتقوا الله واعلموا ان المال والنفوذ مش هيدوملكم واعلموا انه من اشد الناس عذابا يوم القيامه المتاجر بدينه , فوقوا لنفسكم لان خيبتكم دى مش هتسيب لكم فى الاخر غير الوكسه وشماتته الاعداء والرمى فى مزبله التاريخ دا طبعا غير اللى مستنيكم فى الاخرة........


بس خلاص