الجمعة، 13 فبراير، 2009

تحرشات, الجزء الاول..(زومبى)



الزومبى
الموتى الاحياء
,طبعا فيه افلام كتير ناقشت الموضوع دة,بالشكل المقزز اياة, طبعا انا والحمد لله مش بحب النوعيه دى من الافلام بس لاحظت ان فيه سمه مشتركه بينها كلها,الناس المتنحه اللى ماشيه ببلادة ولكن باصرار ,فى تجمعات ضخمه تتجه ناحيه الضحيه المزعورة, مادين اديهم لقدام وعمالين يقولو....لحمه ......لحمه.
مش عارف المشهد دة دايما بفتكرة لما بشوف مشاهد التحرش الجنسى فى شوارع القاهرة.
الصورة تكاد تكون متطابقه,نفس البلاهه والفوضويه والقذارة,نفس النظرات التى بلاروح,نفس التناحه,حتى نفس الاشخاص فهؤلاء الشباب موتى احياء(زومبى)بالظبط زى الافلام دى فنحن اول شعب فى التاريخ يتحول افرادة لزومبى...

- ملحوظه : ياريت تقروا البوست كله للاخر بمعننه وروقان قبل ما تفكروا تعلقوا......

التحرش الجنسى....بصراحه انا عايز اكتب عن الموضوع دة من زماااان قوى لانى عندى كلام كتير عايز اقوله,بس كنت متردد لانى عارف ان الموضوع شائك وطويل واللت والعجن فيه كتير,بس امبارح لما دخلت عالمدونه بتاع appy لقيت عندها موضوع ان صحفيه اسمها اسر ياسر تقريبا بتحكى عن موقف سخيف حصل معاها من مجموعه من الشباب وهى نازله من بيتها وقلوا ادبهم معاها واتطور الموضوع وطلبت النجدة وقبضوا بالفعل على واحد من الشباب دى وهو منتظر محكمه وغالبا هياخد حكم سنه سجن, وبعدين اهل الولد حاولوا يضغطوا عليها علشان تتنازل, وانها بتتعرض لضغوط كتير من شخصيات متعدده بحجه مصلحه الولد.

دة الموضوع باختصار, وبصراحه بعد ماقريت الموضوع دة لاقيت نفسى متحمس جدا انى اقول رأيى النهاردة قبل بكرة.
قبل اى كلام يا ريت يا جماعه نفكر شويه بالعقل والمنطق بعيد عن التعصب لأراء معينه,اولجنس معين,او محاوله تأييف الواقع لخدمه مبادىء وأراء سابقه انتم متبنيينها,واقسم بالله انى اكن كل احترام وتقدير لكل من ادلى بدلوة فى الموضوع دة من جميع الاطراف,وكمان كل الشباب اللى عملوا حملات ضد التحرش,اشكر الكل واحطهم على راسى من فوق.
وطبعا بما ان الموضوع مكلكع فاهقول الخطوط العريضه اللى انا شايفها فى البوست وبعدين نتناقش مع بعض على الفرعيات فى الكومنتات.
واحب اقول ان الموضوع دة لو مااتوقفش هيزيد كمان وكله هيدفع التمن ,سواء البنت اللى هتكون ضحيه وهتدمر نفسيا واجتماعيا ,او الشاب اللى هيترمى فى السجن ويتدمر مستقبله وتتشوة نفسيته فى السجن اكتر ماهى متشوهه,الى الاب والام للبنت دى او الولد دة اللى هيتدمروا هم كمان علشان عيالهم طبعا.
يعنى الكل ملطوط , والكل هيدفع التمن, فلو سمحتم عايزين نبص للموضوع من زاويه اوسع شويه علشان نقدر نوقف المهزله دى وننقذ ما يمكن انقاذة قبل فوات الاوان.
طيب,هاعرض الاراء اللى اتقالت فى الموضوع دة :
-الست لازم تلبس لبس محترم علشان ماحدش يتطاول عليها واللى بيحصل دة بسبب الانحلال اللى الستات فيه فى لبسهم.
-الموضوع مالوش دعوة بالحجاب ,طب ماهو المنقبات لم يسلموا من التحرش.
-لااازم نعمل قانون رادع يوقف الناس دى عند حدها
-الستات زمان كانت بتلبس لبس مكشوف مكانش حد بيكلمها ليه؟؟
-البنت اللى تلبس لبس مكشوف دى بنت مش محترمه وهى عايزة كده
-دة انحلال امنى بسبب ان الداخليه مش شايفه شغلها
-كل اللى احنا فيه دة بسبب البعد عن الله
-انا حرة البس اللى يعجبنى ودى حريه شخصيه وكونى البس كدة ,دة مايديش الحق لحد انه ينتهك شرفى.
-الانحلال الاخلاقى والتفسخ الاجتماعى هو السبب
دى تقريبا اغلب وجهات النظر اللى اتعرضت فى الموضوع دة على حسب ما اتذكر.....
طيب انا شايف ان الوضوع اتعالج من زوايا ضيقه جدا وبأسلوب مش موضوعى خاااالص,
يعنى:
الاخوة اللى بيقولوا الحجاب حل المشاكل دى ,حبوا يعالجوا القضيه الاساسيه اللى هم متبنيينها , ونظريه ان الاسلام حل كل المشاكل,ولكنهم فرضوا حلول مباشرة جدا ولا تمس صلب الموضوع كما انهم مطرحوش اجندة عمل معينه ,يعنى كلمه اترمت بدون تفصيل او شرح او جدوله او خطوات قابله للتطبيق على ارض الواقع.......
الاخوة اللى بيقولوا الحجاب مالوش دعوة بالموضوع ,وان المنقبات كمان بيتعاكسوا,وليه زمان الستات كانوا بيلبسوا مكشوف ومحدش كان بيعاكسهم, وان فيه ستات كتير اخلاقها مش كويسه وبتلبس نقاب, وان المهم الباطن وجوهر الاحترام مش القشور,وان برة الستات بيمشوا بهدوم خارجه جدا ومحدش بيستجرى يتعرضلهم لان القانون هناك حاسم فى المواضيع دى.

انا شايف برضه ان دة كلام مش موضوعى ,وانه اللى حصل هنا هو مجرد التفاف على الحقائق اللى موجودة على ارض الواقع ,لمنح المرأة مايعتقدوا انه مزيد من الحريه,طبعا كدة احنا بدل مانعالج القضيه سيبناها ,بل استغلينا القضيه علشان نخدم بيها على مواضيع تانيه,طبعا انا عارف انهم مش متعمدين كدة بس ساعات الانسان لما بيتحمس لموضوع معين بتفتقر تصرفاته الى بعض المنطق.
لا يا جماعه ,الحجاب له دعوة بالموضوع او على الاقل اللبس المحترم وان كان يمثل جزء صغير من الحل وليس الحل كله,يعنى اللبس وحدة مش هيقضى على الظاهرة دى.
وبالنسبه لان المنقبات كمان بيتعاكسوا فدة طبيعى ,هضربلكم مثال:
لو شخص جعان شاف طبق شهى قدامه ايه اللى بيحصل؟
طبعا الكل عارف انه ريقه بيجرى والافرازات الهاضمه فى معدته بتزيد واحساسه بالجوع كمان علشان يمد ايدة وياكل ,اهو دة بالظبط اللى بيحصل للشباب بس بشكل تانى,طبعا البنات مش مستوعبين الكلام دة بس اذكركم ان طبيعه الراجل تختلف عن الست,الشباب هيفهمونى كويس.
طيب لو شلت الاكل من قدامه وبعدين جبت له طبق تانى بس متغطى كويس,طبعا هتحصله نفس الاستجابه,لانه عارف ان الطبق دة جواة اكل برضه, ودة كلام علمى على فكرة والناس اللى درسو علم نفس يعرفوة كويس ,دى حاجه اسمها الاستجابه الشرطيه,واتعمل عليها تجارب كتير قبل كدة.
يبقى اللى هيحصل ان الشاب دة مش هتفرق معاة منقبه ولا محجبه ولا مش,لان اساسا الصورة موجودة جوة ذهنه من قبل كدة ,والموضوع مش هينحل معاة الا لوقدر يفرغ الطاقه دى سواء باسلوب مباشر اوغير مباشر كالرياضه مثلا,او اننا ننجح فى ازاله الصورة اللى فى عقله من الاساس,انا شخصيا اعرف شباب محترفين معاكسه منقبات ولما بسألهم ليه بيعملوا كدة, يقولولى انهم بيشوفوا عيونهم بس من خلال النقاب وبيكونوا باقى الصورة فى خيالهم ,وطبعا بما انهم خيالهم واسع جدا فبيكونوا صورة اجمل ميت مرة الواقع اللى ممكن يلاقوة فى واحدة لابسه ضيق مثلا.
وبالنسبه لموضوع ان الستات زمان كانوا بيلبسوا مينى وميكرو ومحدش بيتعدى عليهم ,اقولكوا اة.. فعلا كلام مظبوط بس الناس اياميها كانوا غير الناس دلوقتى خالص,والاحتقان اللى موجود فى مجتمعنا دلوقتى ماكانش موجود زمان,كما ان التدين زمان كان عميق وبيهتم بالجوهر ومع الغزو الثقافى والسينما والمسرح الهابط ابتدى الوجدان الدينى دة يتهاجم بشدة ولما ماقدرش يصمد امام الهجوم دة ابتدى ينسحب من الشكل الظاهرى لانه هو الجانب الاضعف بينما ظل متمسكا بالسلوك والجوهر,ومع مرور الزمن وزيادة الهجوم بالاضافه للتدهور الكلى اللى بيزيد اتدمر الوجدان الدينى دة ككل ,وطبعا لما انكشفنا قدام نفسنا وحسينا اننا بقينا عرايا,لقينا ان التدين الشكلى والظاهرى هو ورقه التوت اللى هنستر بيها عورتنا القبيحه,لاننا طبعا ماعندناش القوة ولا الشجاعه اننا نسترد الوجدان دة والعقليه دى بشكل كامل من حيث المظهر وقبل منه الجوهر, فاخترنا الحل السهل المتمثل فى الدقن والجلباب والنقاب والشعائر التعبديه الشخصيه التى لا تمس السلوك مع الاخر, واقنعنا نفسنا اننا كدة ميت فل وعشرة ومش عرايا ولا حاجه ,لأ دحنا مستورين ولابسين ستين توب فوق بعض,وطبعا من الظواهر المصاحبه للوضع دة ,التعصب الشديد جدا ,وما هو الا مجرد محاوله للتخلص من الاحساس بالذنب والقاء التهمه على الاخر,ودى حيله دفاعيه للعقل الباطن الانسان بيستخدمها من غير ما يحس لما يكون تحت ضغط شديد علشان يهرب منه , والناس بتوع علم النفس عارفين الكلام دة كويس,فتبقى الصورة بالشكل دة :لا مش انا لوحدى اللى وحش دول كلهم وحشين ,انا ما اذنبتش فى حقها دى هى اللى وحشه وتستاهل, وكدة يعنى ,وصلت؟؟؟؟
بالنسبه لموضوع ان فيه ستات كتير منقبه ومشيها بطال, دة مع الاسف كلام مظبوط ,وده رد فعل طبيعى متلازم مع حاله التمسك بالقشور اللى قولنا عليها,فيكفى ان الست تكون منقبه علشان تبقى محترمه ومش مهم تصرفاتها طالما فى السر وماحدش بيحس بيها, بس يا جماعه مش معنى كدة ان النقاب او الحجاب عيب ,او ان المنقبات والمحجبات وحشين ,دة كلام يتنافى مع ابسط قواعد المنطق بتاع ارسطو, فما ينطبق على الجزء لا ينطبق بالضرورة على الكل,وزى ماقالوا زمان:
لا تعرف الحق بالرجال ولكن اعرف الحق تعرف الرجال.
وبالنسبه لموضوع ان المهم الباطن والجوهر مش القشور,لا.. الاتنين مهمين الظاهر والباطن مع بعض وبعدين افتكر انكوا مش عايشين فى المجتمع لوحدكوا وان اللى حواليكم دول مش فلاسفه ومفكرين علشان يدركوا ان تحت القشور دى جوهر بيناقضها,او مايخدوش بالسطحيات والانطباع الاول, ويمعنوا النظر فيما وراء السطور,طبعا دى حاجه كويسه ونفسى كل الناس يبقوا كده ,بس مع الاسف النوعيه دى نادرة الوجود فى اى مجتمع لان دول هم الصفوة والصفوة طول عمرها قليله,فما بالكم بقى فى مجتمع زى مجتمعنا نموذج الانسان الجاهل السطحى المتعصب الغبى الانانى هو النموذج الشائع والمتفشى فيه حاليا...

بالنسبه لموضوع ان الستات برة بيلبسوا لبس خارج وماحدش بيتعدى عليهم دة لان تركيبه الانسان الغربى والظروف اللى عايش فيها تختلف تماما عن الانسان المصرى,واللى بتقولوة دة مش بسبب القانون القاسى هناك بل بسبب التركيبه الاجتماعيه والفكريه للغربى من الاساس.
طيب انا شايف ان اللبس المحترم وحدة مش هيحل الموضوع وان كنت اعتقد انه جزء مهم من العلاج
القانون لن يحل الموضوع اطلاقا واتحدى انه حتى لو وصل الموضوع لاعدام المتحرش فى ميدان عام فلن يؤثر على الظاهرة,يا سادة انتوا فاهمين دور القانون غلط, القانون دة فى اساسه مجرد هامش بيتحط على حدود المجتمع واللى بيخلى الانسان يلتزم بالصح هو تركيبته الاجتماعيه والدينيه والاخلاقيه والمبادىء بتاعه والناس من حواليه فى المجتمع ,بينما القانون معمول لتقويم الفئه القليله جدا اللى انحرفت ولم تفلح كل تلك الخطوط فى تقويمها,فساعتها لن يكون هناك بد من ان يقوم القانون بدورة كحل نهائى بعد فشل كل تلك الحواجز,والفئه دى المفروض انها نادرة جدا فى اى مجتمع صحى,لان دول بيبقوا ناس مرضى اساسا.
اما هنا فى مصر اى حاجه يقولك عايزين نعمل قانون ,فى كل كبيرة وصغيرة قانون,كاننا هناكل قانون ونشرب قانون,طبعا طالما ان الخطوط دى كلها تلاشت فى مجتمعنا فلن يستطيع القانون وحدة مهما بلغت شدته فى صد تلك الموجه,وبعدين ما قانون المرور اهو ,منتهى القسوة المفرطه والغير موضوعيه ,يعنى مين يعقل ان اللى يمشى عكس الاتجاة يتبهدل ويترمى فى السجن,دى مابتحصلش الا فى مصر,وادينا اهو ,مشكله المرور اتحلت؟؟؟
البلد راقت؟؟؟؟
ولااااا اى حاجه الوضع كما كان, ودة نفسه اللى هيحصل فى موضوعنا,لاننا بنوظف القانون غلط ,بدليل ان مافيش دوله فى العالم عندها ترسانه قوانين بالكثافه والتعقيد اللى فى مصر وبالرغم من كدة احنا اكثر الدول فوضويه وفساد(بطلو غتاته ومحدش يقولى الكونغو وبوركينافاسو وامريكا الجنوبيه)
مش كل بنت بتلبس ضيق ,مش محترمه او قليله الادب,فيه نسبه عاليه منهم فى قمه الاحترام والثقافه كمان بس هما مقتنعين ان دى حريه شخصيه وانهم مش بيعملوا حاجه غلط كما ان الشرائح الاجتماعيه اللى هما جايين منها بتبص لموضوع اللبس دة بشكل تانى هما متعودين عليه فلما بيحتكوا بشريحه تانيه فى المجتمع وتكون الشريحه دى ادنى منهم بيحصل كلاش او سوء تفسير من الطرفين, لانها بتفاجأ انهم بيفسروا الموضوع بشكل هى مااعتادتوش قبل كدة ,كما انهم هما كمان مش فاهمين عقليتها هى اونمط تفكير الشريحه بتاعتها بالكامل ومش مستوعيبنها من الاساس(انا بصف واقع بصرف النظر عن الاراء الشخصيه)فتكون النتيجه انهم يبصولها على انها اخلاقها وحشه فابالتالى يبتدوا يوجدوا لنفسهم المبررات اللى قولتها قبل كدة علشان يقدروا يدوا لنفسهم الضوء الاخضر فى التعدى عليها,بينما هى مش بتستوعب الكلام دة كله ,بالنسبه لابناء الطبقه الراقيه من معتادى التحرش فدة موضوع تانى

لان دول اسباب الحاله اللى وصلولها دى معقدة جدا ومتراكبه سواء من فقر عقائدى او عدم مسؤليه بسبب التربيه طبعا ,وخلل فى الموازين بسبب اعلامنا المحترم,وانقلاب قيمى هما شايفينه قدامهم على ارض الواقع فى البلد كلها
ومركبات نقص وانسداد واحتقان سياسى,وعقليه سطحيه ومتخلفه نتيجه انعدام الجانب الثقافى,وتفوق وسيادة مبادىء متخلفه تعظم من دورالرجل وتحط من دور المرأة وتلغى كينونتها وتختصرها فى وجهه نظر الرجل الى مجرد جسد للمتعه,وكمان حاله الشقلبه فى كل حاجه اللى لو اتكلمت عنها بالتفصيل مش هنخلص,وبالنسبه للشباب من الشرائح الادنى, نزود كمان الفقر ومركبات النقص والتفسخ الاخلاقى المصاحب لتدهور المستوى المعيشى,والفراغ والضياع,والمستقبل الاسود اللى منتظرهم وشايفينه,والدور السىء والقبيح للناس اللى المفروض انهم قدوة لكنهم مع الاسف ادوا دورهم بالعكس, ووووو........الخ
طيب بالنسبه للسجن,انا هسأل سؤال اتمنى انكم تجاوبوا عليه بمنتهى المنطق:
بعيد عن موضوعنا,عموما يعنى,هل السجن فى مصر يقوم بدورة كمؤسسه اصلاحيه؟
بمعنى ,
الانسان اللى بيخش السجن دلوقتى فى مصر,بيخرج انسان صالح قابل للالتحام فى المجتمع ولا بيخرج اسوأمما دخل بمراحل, بالاضافه للتشوة النفسى الفظيع , وكرهه للمجتمع, دة غير ان المجتمع بيلفظه من الاساس؟
اظن الاجابه معروفه ولو واحد منكم مر بالتجربه القاسيه دى قبل كدة هيفهم معنى كلامى كويس,وبالنسبه للى ممرش ,مش هشرح لانه الكلام دة مش هينفع يتقال ,بس هقربلكم الصورة,فاكرين فيلم سوق المتعه؟
,شوفتوا محمود عبد العزيز؟
,احب اقولكم ان دة اقل القليل,وان دى كمان صورة ورديه لان اللى بيدخل السجن بيخرج منه انسان ميت, بل أسوأ من الميت.
يعنى انتا ضد ان المتحرش يتسجن؟
لا انا مش ضد كدة بس الكلام دة لما السجن يقوم بدورة الاصلاحى الطبيعى
مش يخليلنا ناتج المعادله فى الاخر,امرأة محطمه نفسيا, وفتى مجرم بلا مستقبل, ملفوظ من المجتمع حاصل على اعلى الدورات الاجراميه,مريض نفسيا,كما انه لم يندم على فعلته طبعا,
يبقى احنا كدة بنضحك على نفسنا
الاستاذة اسر, انا شخصيا نفسى الشاب دة يتعاقب باى عقاب ,الا السجن ,انشالله يتجلد فى ميدان رمسيس,ولكن بما ان الخيارات دى غير متاحه حاليا مع الاسف فلا يوجد اى عقاب غير السجن (اياة),وبما انك مشيتى فى الموضوع فعلا وماينفعش انك تتراجعى لانك لو تراجعتى الشاب دة هياخد ثقه فى نفسه ويعتقد انه فوق القانون وهيتمادى فى فعله بعد كدة اكتر واكتر,
بصراحه الخياران كلاهما سىء لمجتمعنا.....

طيب ...ايه الحل؟
لما المرض يكون شديد بيبقى علاجه متعدد يعنى مثلا اقراص وشرب وحقن وممكن لبوس,كل دول مع بعضهم علاج, وبدون واحد منهم يصبح الباقون بلا جدوى,دة طبعا بالاضافه اننا لازم نمنع اسباب المرض نفسه
يعنى الموضوع ملخفن عالاخر, وما هو الا ديل من ديول الانهيار الرهيب اللى مصر بتعانيه.
حبوا يلهو الشباب فى الكورة فكانت النتيجه انهم بقوا بيولعوا فى بعض
حبو يلهو الشباب بالخلاعه والاسفاف والابتزال والابتزازالجنسى فكانت النتيجه موقعه وسط البلد وشارع جامعه الدول.
الحل اثقل من ان يحمله فرد او منظمه او هيئه ,الحل يحتاج ل80مليون انسان
اولا اس الفساد ,الفساد السياسى اللى هو اساس كل بلوة فى البلد.
زمان كان دور الحكومه محدود, يتلخص فى الدفاع عن البلد وحفظ الامن والنظام فى الشوارع ومراقبه السلوكيات الاخلاقيه فى الطرقات ,فلما اصيبت هذة الحكومات بالفساد لم يتطرق هذا الفساد لاغلب نواحى المجتمع واقتصر على جزئيات محدودة.
انما لما يكون دور الحكومه متفرع ومتشعب فى كل جوانب الحياة كالوحش الضخم الاسطورى ذو الاذرع الكثيرة اللى الفيلسوف توماس هوبز ذكرة فى كتاب التنين ورمز بيه لسلطه الدوله المتشعبه وقبضتها الحديديه.
لما تكون الدوله كدة وتفسد ,
فلا شك ان الفساد ده هينعكس على كل جوانب الحياة كبيرها وصغيرها.
يبقى اول خطوة هى الاصلاح السياسى
بعدين ييجى الاصلاح الاقتصادى ورفع مستوى المعيشه
وطبعا لازم نعيد زرع الجانب العقائدى (العقائدى الايجابى ) اللى يخدم المجتمع مش التهريج اللى احنا عايشين فيه.
الثقافه والتنميه الفكريه طبعا لها دور مهم جداااا فى الموضوع دة.
التعليم الصح والاسلوب التربوى السليم ,ودا كله منظومه لايقتصر دورها على المدرسه ,بل تشمل البيت والشارع والمسجد والكنيسه.
لازم يبقى فيه فى مجتمعنا رموز,ورموز صح ,بتفكر وتخطط, وتكون فى اول الصفوف كمان ,بدل شويه الزباله اللى موجودين دلوقتى, وكل يوم بيكشفوا نفسهم اكتر, وينشروا غسيلهم الوسخ فوق دماغنا, ويكسروا نفس شباب كانوا فى يوم متخذينهم قدوة ومثل اعلى..
اصلاح جهاز الاعلام بحيث يقوم بدورة البناء ويكون ليه خطه مدروسه واهداف واضحه, بدل سياسه التدمير النفسى اللى بيمارسها معانا دلوقتى,وموضه السخافه والسطحيه بتاع المفتش كرومبو ونفيسه الخبيثه, والمسابقات الوهميه, وبرامج الهشك بشك ,ومسلسلات هلاوس بعد منتصف الليل اللى بيتصرف عليها ملايين.
لازم يكون فيه متابعه للاعلام الحر زى افلام السينما والمسرح وبلاش الكلام الاهبل بتاع اللى مش عاجبه ميتفرجش.
انا مش ضد حريه الابداع ,بالعكس,بس احنا مجتمعنا مش مؤهل للتعامل مع المستويات العاليه منه,احنا مش امريكا ولا اوروبا,
ماشى بدع براحتك,بس يكون بهدف بناء,يخدم البلد,مش مجرد شغل استهلاكى نص كم زى بتاع الاسطى السبكى الله يحرقه.
يعنى مثلا فيلم حين ميسرة ,انا احترمت خالد يوسف جدا,وشفت انه كشف المجتمع قدام نفسه ,بعد ماكان دافن راسه فى الرمل, وانه بدل مانهاجم الراجل على النماذج السيئه اللى كشفها(مع انها حقيقيه ,بل الحقيقيه اكثرسوادا)مع العلم ان النماذج دى منتشره بشدة,كان اولى اننا نعالج الواقع ونصلحه بدل شغل الردح اياه دة اللى لا يودى ولا يجيب.
ياريت شويه احترام فى اللبس والتعامل اكتر من كدة (لان صوابعك مش زى بعضيها),وكلامى دة موجه للجنسين,وياريت الرجاله كمان يفهموا الست بنظرة اوسع من النظرة الضيقه اللى هم شايفينها دلوقتى....
الجواز ,لازم مشاكل الشباب فى الجواز والشغل وتكوين المستقبل تنحل...
نيجى لدور الامن ,لازم يبقى الامن الاجتماعى هو الاساس ,بدل سياسه الطناش,والاهتمام بالامن السياسى فقط,
دة غير اصلاحات كتير محتجاها وزارة الداخليه مش وقت الكلام فيها دلوقت.
هيتبقى بعد كدة الاعلام المفتوح اللى منقدرش نتدخل فيه من نت ودش وخلافه,مش مشكله ,طالما الفرد اتأسس صح ,هيقدر يصد هجمات زى دى,لانه اصبح معاة التطعيم خلاص....
نيجى بقى لاخر حاجه ,وهو القانون الحازم والحاسم والسريع والعاااادل,اللى ايدة بتطول الكل ,مافيش فرق بين شخص واخر,القانون العقلانى اللى الكل بيحترمه, وبيطبقه, دة بقى هو اللى هيقوم القله القليله اللى هتتجاوز كل الخطوط اللى فوق ويتولى اعادة اصلاحها ليعيدها مرة اخرى عناصر فعاله قابله للاندماج فى المجتمع....

هى دى الحلول اللى انا شايفها ولو تجاهلنا حل واحد منها مش هيبقى ليها تاثير ,لانها كلها منظومه متكامله..
غير كدة نبقى بنلعب ونهرج ونهيس,ولا هنروح ولا هنيجى , وفى الاخر الطوفان هيعم عالكل,وهتطربق على دماغنا كلنا.وطبعا كل واحد هينوبه من الحظ جانب.....
بجد وضعنا اصبح اسوأ من اسوأالكوابيس,بقينا فعلا شعب من الزومبى.
يا ترى هنلحق نفسنا ,ولا هنقعد ناكل بعض؟؟؟؟
--انا مستعد لاى نقاش بناء مع كامل احترامى وتقديرى لكل الاراء والاطراف....