الأحد، 15 فبراير، 2009

طبق اليوم (الحوامل ومرضى الحساسيه يمتنعون)



ثيداتى ,انثاتى ,ثادتى,
اهلا وثهلا بيكم فى بلنامكم اليومى ,تبك اليوم,
طبعا اثدكاء وثديكات البلنامج انحوا علينا كتيل كتا عاثان نكتم تبك كتيت ,ونثلا للانحاح الكماهيلى التخم ,كللنا نحن البلبلى اننا نكتم النهالته اكتت الاتباك العالميه,
وهنستتيف معانا اليوم الثيف: موافى قلنى ابو اللوس ,....هتكتملنا ايه النهالته؟؟؟؟؟
حبايبى المفاعيص,وحشتونى موت ,النهاردة هقدم لكم طبق :الاعلاموبيا بالملوخيه الحامضه والبيض الممشش مع مسحوق البطارخ الديموقلاطيه , ممزوجه بشرائح من عصيان الامل المركزى , ومطعمه بفسافس صغيرة من الرأى الاخر..
والمكونات والطريقه هنشوفها سوا دلوقتى مع بعض,
المكونات:
اول حاجه قناع واقى من الغازات الحربيه, ست مراحل,اتنين فلتر,لزوم الطبخ يعنى علشان الريحه ولا مؤاخذة
وهتروحوا ماسبيرو تشترو الاصناف دى:
-مديرات قنوات متسلطات يكونات بنات عائلات محترمات, وتحمل كل منهن مالا يقل عن 45 مرض نفسى وعدد 12 مركب نقص ومراهقه متأخرة, ويشترط ان يكون عمرها لا يقل عن سبعين عاما وتكون قد اجرت مالا يقل عن 50 عمليه تجميل وشد وسمكرة ودوكو.
-مديرين قطاعات محترفى رشوة وفساد وكرشهم يبلع البحر وياكلوا مال النبى.
-مذيعات حاصلات على ثانوى زراعى كحد اقصى,وشهادة فشل معتمده بامضاء اتنين موظفين,وشهادة خبرة من كازينو الهنولولو وبار القط الاسود وخمارة السلسله مختومه بختم الحوض المرصود,كما يجب ان يتمتعن بقدر عالى من الغتاته والسماجه والرذاله ,ويشترط الا يسبق لهن قراءه اى كتاب او حتى جرنال,ويشترط التسلط وحب الظهور والقدرة على القاء عدد 678 سؤال تافه فى الثانيه (دة على الوضع الألى)..
ملحوظه :يفضل ان تتمتع بلدغه فى النطق وان تكون ابنه احد العاملين بالمبنى....
-عدد واحد مذيع هلف يكون صاحب بيزنس كبير واعمال(دستوووور),وان يكون سخيف العقل ويشترط قدرته على جلب اكبر عدد من شيباب الحزء ليعملوا كومبارسات فى برنامجه (حاله زحار) مقابل غدوة وعشرين جنيه.
-عدد واحد مذيع يشترط ان يكون قد سبق له العمل كومبارس ومرمطون فى 20 فيلم على الاقل,يكون ادى دور المعتوة فيمالا يقل عن خمسه منها,ويكون زلنطحى وافاق وبتاع 3 ورقات وارزقى ويستطيع قتل اكبر عدد ممكن من الجمهور بالسكته المخيه بعد مشاهدة 3 دقايق على الاكثر من برنامجه (البيض بيضك)......
---يتم خلط الاصناف السابق ذكرها بعد ارتداء القناع الواقى بشكل محكم , ثم يتم رجها رجا شديدا فى خلاط الاتحاد
ثم تركها لتتعفن 7 ايام بجوار بكابورت مفتوح,(وماتنسيش تشهقى علشان النفس)
اول لما تلاقى ان الخلطه اتظبطت وريحتها بقت اعفن من ريحه شراب عسكرى امن مركزى ماقلعوش ولا استحمى ولا نزل اجازة من 3شهور ,تقومى شايلاها علطول..
طبعا الريحه هتكون جامده جدا ولازم نحط شويه بهارات على الاكل علشان يتظبط ,فهتروحى عند الحاج بهجز العطار تجيبى من عندة الاصناف التاليه:
-عدد واحد مذيعه ,يتخطى عمرها الخمسون عاما وتكون ضاربه الباروكه اللى هى لابساها اكسوجين وصبغه يود كمان,ويشترط انها تكون شلق جدا ولسانها اطول من هوائى ماسبيرو,وان تكون تربيه حوارى وتجيد مصمصه الشفايف والردح ,وان تكون قادرة على ادارة (حوار غتيت جدا جدا)
-عدد واحد مذيع اصلع وزملكاوى يجيد التهريج واستخفاف الدم والشحاته على الابواب ويكون ,
موووووووز موز موز..
-عدد واحد مذيع كومبو ,يشترط ان يكون ابن فنانه قديمه وان يكون سمجا ويستمر لمدة(ساعه ونص استظراف)
-عدد واحد مذيع طويل واهبل وسفسطائى التفكير, يجيد مهاجمه الوزراء فقط دون غيرهم ,ويجيد ايضا الهجوم على القنوات العربيه , وان يكون قادرا على ( اشتغال الجماهير واعاشتهم فى ميه اللفت). ملحوظه :يشترط ان يستطيع تقليد اسلوب بابا شارو ,اثناء مخاطبته للجماهير..
-عدد واحدة مذيعه حلوة وامورة وبنت ناس وزوجه رجل اعمال, ويشترط انها تكون عايشه فى ميه البطيخ ومش داريانه باللى حواليها,كما يشترط ان تتنازل عن كرامتها عندما يتصل بها صاحب القناة تليفونيا ويمسح بكرامتها الارض على الهوا
,وتكمل عادى (ولا كأن فيه حاجه)......
وترشى الاصناف دى بعد ما تخلطيها كويس ,على باقى الطبيخ , وبعدين تحطيها فى فرن ماركه نايل سات اربعه شمعه 380 قناة وتسبيها سنه ضوئيه , وبعدين تخرجيها وتكوريها كور صغيرة وتقدميها للضيوف يوم طهور ابنك الصغير بوعرنجه , وانتى سادة مناخيرك ومغمضه عنيكى وتقوليلهم:
النبى ياست ام احسان ياختى تدوقى الطبيخ بتاااااااااعنا,وبعدين تطلعى تجرى علطول
وبالشفا انشالله
اتمسوا بالعافيه......
.......شالوم.