الثلاثاء، 17 فبراير، 2009

(تحرشات ليه ), الجزء الثانى : حوار مع متحرش



اصدقائى من الشباب المفاعيص والبنات مقصوفه الرقبه
....ونا مالى , هما اللى بيقولوا كدة

المهم , امبارح حصل معايا موقف غريب , هنقله زى ما حصل بحاله ومحتاله وشتايمه, وقله ادبه
اما بعد,

ليله امبارح مجاليش نوم

ولقيت نفسى كدة مخنوق ومزبرنشق على (رأى ابو لمعه السخيف)
قولت ياواد مبدهاش
قمت طاسس وشى بشويه ميه , ولابس الحته اللى عالحبل ونازل ..

طبعا المشى فى الشوارع بالليل (الشوارع الهاديه) هى احسن طريقه علشان تهدى نفسك لو متنرفز او مكتئب او اى حاجه
كالعادة نزلت اتمشى بدون هدف واضح ,مشيت حوالى نص ساعه وبعدين لقيت نفسى عايز انام,ياساتر عالرخامه ,ماكان من الاول؟؟؟؟؟
دا الوحد عليه حركات يابااااااىىىىى.
ابقى افكرنى الطشنى قلمين لما اروح واهزقنى شويه.....
المهم وصلت تحت البيت وقلت لما اجرش على كبوت عربيه جارنا شويه لحد ما اخلص الكانزايه اللى فى ايدى....
المكان فى وسط الشارع بالظبط(طول الشارع كله حوالى 150 متر),فيه فى اول الشارع حوالى اربع شباب واقفين بيتكلموا وهايصين عالاخر,اعتقد انهم من سكان الشارع (دا على اعتبار انى ماعرفش جيرانا اللى قصاد شقتنا)....
ونا قاعد عمال اخطط واهندس لبكرة اللى غالبا مش هيفرق حاجه عن امبارح واول ,اشوف الاتى
بنت جايه من اول الشارع (من اتجاة الشباب الروش اياة),
لابسه بنطلون جينز كحلى وبلوفر اسود(انا بقول بلوفر لانى مابعرفش اسماء الحاجات الغريبه اللى البنات بتلبسها دى, واى حاجه معرفهاش تبقى بلوفر ),لامه شعرها لورا ,وعمرها حوالى 20 سنه ,ماشيه وباصه فى الارض على طول,
وهى معديه على الشباب طبعا حصل المتوقع والتعليقات اشتغلت,البنت طنشت وفضلت ماشيه ,قام سبع البرمبه وزعيم الشله شااادد وراها,
كلام من الشاب وردود من البنت ,انا مش سامع طبعا,بس الواضح انه عايز ياخد رقم موبايلها وهى بتهزقه,ولما قربوا منى طلع فعلا زى ما توقعت,المهم عدونى وبعد شويه على اخر الشارع كدة تقريبا الموضوع اتطور وقعد يزنق عليها زى عربيه نقل عالطريق السريع,

قلت يا واد يا حكشه مبدهاش(حكشه ده انا لما بكلمنى)

كاااااااابتن (دا انا) قام باصصلى , فاشاورتله بايدى(تعالى), المهم الواد اتخض وقام سايب البنت وجااااى عليا
(تقريبا افتكرنى مخبر).......
-ايوة
-ايه اللى بتعمله دة؟؟؟؟
- ايه؟؟؟
-ليه كدة يعنى؟؟؟؟
-عادى؟؟؟؟
-يعنى ترضى حد يعمل مع اختك كدة؟؟؟؟
-انا معنديش اخوات يمشوا فى الشارع لوحدهم متأخر كدة......
(طقت فى راسى اعمل مع الواد حوار غتيت جدا جدا زى بتاع طنط منى, وقولت فرصه ادعبس فى مخه شويه)...
-وافرض يا اخى , انت تعرف ظروفها ايه؟؟؟
-ايه يعنى راجعه من الدرس,هههههههه؟؟؟
-افرض مثلا شغاله ممرضه وراجعه من ورديه باليل
-ممرضه اة ,هههههههه
-اسمك ايه الاول؟
-انا هشام
-ماشى يا عم هشام انا احمد,انت ساكن فى الشارع هنا؟؟؟؟
-اة انا ابن الاستاذ فلان,(راجل قمه فى الادب والاحترام)
-بص يا عم هشام ,انت شكلك كدة فى الجامحه, اقصد الجامعه ,امممممم فى تالته كليه صح؟؟؟؟
-صح
-طيب اكيد الكليه عندك مليانه بنات.
-اة
-واكيد مصاحب
-اة
-وبعدين يا عم هشام البنات الصيع اكتر من الهم عالقلب,صح؟؟؟
-صح
-يعنى فيه ستين واحدة ,لو طلبت نمرتها , ولا حتى لو جيت تشقطها فى عربيتك مش هتقول لا , (حقيقه) ,صح؟؟؟؟؟
-تمام
-طيب ليه بقى وجع الدماغ , انت راجل مش محروم يعنى , ليه تتعرض لدول؟؟؟؟
- لا , منا اقولك على حاجه , بص , انت مش كنت فى كليه؟؟؟؟
-اة
-يعنى , اتعاملت مع البنات فى الكليه....
- لا والله, مع الاسف انا كليتى رجالى بس....
- اة , علشان كدة
-هو ايه؟؟؟؟
- انا افهمك ,بص يا باشا, البنات دول اصلا شراميط , مايغركش اللبس المحترم ,دول بس بيحبوا يداروا على نفسهم بس..
- يا سلام؟؟؟؟
- اة صدقنى بجد ,انا عارف الاشكال دى
- يعنى مصر ماعدش فيها بنات محترمه؟؟؟
-فيه بس قليلين قوى, دول بقى بنحس بيهم كدة...
- خبرة يعنى؟؟؟
- اييييييوةةةة ,خبرة
-يعنى المحجبات والمنقبات دول ,مش ولا بد يعنى؟؟؟
- مش كلهم ,فيهم المحترمين , اقولك, امبارح لسه شاقطين البت...... فى شقه.......,عارفها؟؟؟
-اة عارفها,
- اهو عندك دى مثلا , لابسه علطول اسدال , ومصاحبه نص شباب المنطقه...
- شوف ازاى
- ايوة , اصلك على نياتك , ومش بتنزل المنطقه كتير , معلش اسألنى انا فى الحاجات دى...
-تصدق اول مرة اعرف المواضيع دى.
- يلا , اى خدمه..
-ههههههههه , ماشى يا عم هشام , بس برضه طالما واحده رافضاك يعنى, بتغتت عليها ليه, ما عندك التانيين اللى قلت عليهم دول.
- ههههههه , رافضه مين , دى بس بترسم, كلهم بيعملوا كدة فى الاول , بيعيشوا دور الاحترام يعنى..
-.........
-اة بجد, اصل بص , مافيش شرموطه بتيجى تقول انا شرموطه , كل واحدة بترسم دور الشريفه, بس لما تحس ان اللى قدمها دة ناصح وفاقسها بتسلم علطول...
- دا ايه اللؤم دة يا اخى؟؟
- يااااااااااة , هو انت شفت حاجه , اصلا الحريم بيحبوا يحوروا , وحوراتهم كلها فاكسانه.
- طب بص يا عم هشام , انت مش عارف ان المواضيع دى عليها قلق جامد اليومين دول؟؟؟
-عارف
- وعارف ان الموضوع دة بيدخل السجن؟
-عارف
- وطبعا عارف كمان ان القسم ما بينا وبينه 200 متر بس , وكل شويه الشارع دة بالذات معدى فيه مخبر او امين.
- صح
- وعارف كمان ان القسم بتاعنا سمعته زى الفل , اللى بيدخله ساعه بيخرج منه على نقاله (حقيقه)...
-عارف.
- طيب دلوقتى البنت دى لو رقعت بالصوت , هتلاقى نفسك فى دقيقتين مشرف فى القسم وفى خمس دقايق هيتعملك محضر و هيتسجل فى الدفتر , وكل دة مش هياخد ربع ساعه, ولما المحضر يتسجل , هتكون حضرتك لسه بتكلم اهلك علشان يلحقوك, طالما المحضر اتسجل ,لو جابولك وزير الداخليه نفسه مش هيعرف يعملك حاجه.
- اة , عارف
- يعنى هتلبسها هتلبسها , صح؟؟؟
- صح
- طب ليه بقى وجع الدماغ؟؟؟؟
- ماتسودهاش قوى كدة , وبعدين انا باخد بالى كويس, ونا كمان مش بعاكس واحدة الا لما اتاكد الاول انها شرشر.
-يا سيييدى
- اة , شفت مثلا البت دى؟؟؟؟ اهى كانت مبسوطه ونا بعاكسها, يعنى لو كانت متدايقه مثلا كانت صرخت ولا حاجه.
- لا , وجهه نظر برضه..
- شفت بقى
- طب ما ممكن مثلا تكون خايفه
- ..............
- وبعدين اللبس الضيق مش مرادف لعدم الاحترام, ان عن نفسى بتخنق منه , وبتدايق من اللى لابسه ضيق , بس مش معنى كدة انى اقول عليها زى مانت قولت.
- ازاى يعنى؟؟؟
- بص يا عم هشام , مش شرط تكون شرشرعلشان لابسه كده , ما فيه بنات كتير دماغهم ضاربه , ومقتنعين ان دى حريه شخصيه ليهم, بجانب ان سلوكياتهم محترمه يعنى.., بعدين اللبس اللى انت شايفه هنا مش محترم ,الناس بيشوفوه فى منطقه تانيه او فى حى تانى لبس محافظ , صوابعك مش زى بعضها, مش كدة ولا ايه؟؟؟؟
-...............
- معلش ان مادخلتش كليه مليانه حريم زى حلاتك, بس انا سافرت كتير(دا جوه مصر) وشفت اوساط كتير, يعنى عارف بقول ايه...
- يمكن.
- لا هى كدة , انت حر مع الحريم بتوعك طالما هم عاجبهم الحال على كدة , ومتكيفين منه, بس ماتحكمش على اى بنت من لبسها وتصنفها على مزاجك., الكلام دة ينطبق على كل الناس على فكرة , ماتاخدش بالمظاهر لانها خداعه.
-وجهه نظر برضه
-وصلت يا معلم هشام؟؟؟
-وصلت..
- صح كدة...
- بس انا مش بشوفك فى النادى ليه ( نادى ايه ابن العبيطه دة , انا بتاع نوادى برضه؟)
- معلش يا عم هشام, ظروف بقى.
- طب ابقى خلينا نشوفك بقى , ممكن نتقابل هناك
- اة وماله , ان شاء الله ( عند ام ترتر)
-اوكيه , سلام يا برنس
- سلام ( يابن الهبله)

بس كدة

بوكيرتوف عليكوا
اتصبحوا بالخير