الخميس، 19 فبراير، 2009

مبروك يا عمو ايمن



عمو بوش او الموساد او كلاهما معا فبرك احداث سبتمبر علشان يقوى سلطته ويزود تمويل نظامه وعلشان يفرض القوانين اللى على مزاج اهله ويصفى حساباته مع (المارقين ) و,و,و وكله فى زحمه هيصه محاربه (الارهاب)


عمو بوش ادرك ان سياسه دعم طغيان الحكام البقر مقابل خدمه امريكا اصبحت عمليه فاشله وبتفرخ العنف والفوضى وبتصعد موجه العداء للغرب...


عمو بوش قرر يقلب الترابيزة فى وش كل السادة الابقار ,وطبعا اولهم عوكل,باعتبارة اكبر بقرة حلوب فى المنطقه


عموعوكل عرف من بصاصينه هناك انه المستهدف الاول


ابتدت المساومه,ياعوكل ياأما تبطل طغيان يااما هنحطك فى قفص النسانيس اللى فى حديقه البيت الابيض


عوكل طبعا جبان ومشهور بالجبن من ايام ماكان فى الجيش ,نخ ووعد انه هيعمل انتخابات نزيهه.


عوكل طبعا كياد زى النسوان ويهوى اللعب من تحت الترابيزة,فراح لاااعب فى الدستور ومقيفه....


عوكل جاب شويه بقر ولبسهم لبس مشخصاتيه وقالهم بص ياواد منك له هتطلعوا فى التلفزيون تقولوا انكم مرشحين نفسكم ضدى وكل واحد يقول الكلام اللى هقولكم عليه دة,انت ,تقول انك عايز ترجع الطربوش من تانى,وانت تقول ان البلد معمولها عمل,وانت تقول ان الملوخيه هى الحل
طبعا,علشان الناس تضحك عليكم وتعرف انى الدكر الوحيد فيكى يا بلد,ويااااالا ,كل نطع فيكم هظبطه بقرشين.


عمو ايمن نور مرضيش بالهبل دة ,وقالوا لاااا يا عوكل مش كل الطير, انا هنزل قصادك فارس لفارس,والميدان واسع.....


عمو عوكل اتخنق من عمو ايمن وطوله لسانه , وعمو حبقه العواطلى شيخ الغفر زعل مووووت من التلسين اللى عمو نور بيكتبه عنه فى الجرايد انه حرامى وعنده مراهقه متاخرة وبيحب بنت فى النادى قد ولاد ولادة


عمو عوكل فاز فى الانتخابات طبعا, وفى نفس الوقت لما عمو بوش لعب نفس اللعبه فى فلسطين ,جه عوكل وحرض ابو مازن الهباش انه يسيب الانتخابات تمشى صح ويرفض يخش فى الحكومه بتاع حماس لما تفوز,علشان حماس تحكم فلسطين ويطلعوا افلاس امريكا واسرائيل ويعرفوهم ان الله حق ويحرموا يقولوا عايزين ديموكراسى فى الميدل ايست تانى , وفيييينك يا عوكل يا مظبطنا.....


اتعلم عموا بوش الدرس وقال حقى برقبتى وتوبه لو فتحت بقى معاك تانى يابو العواكل واقتل واحبس والهف براحتك


عمو عوكل ماصدق وقام رااامى عمو ايمن فى السجن وكان عايز يشيعه خالص بس عمو بوش قاله لاااااا اوعى تمس شعرة منه لانه كان عارف ان البلد على كف عفريت والواد نوفل اهبل وبرياله ومش هيعرف يلم الهمج دول وان فيه قلق جامد جاى وعوكل نهايته قربت والبديل بعد منه الاخوان (لان عوكل كان عاملهم الاخوان زى امنا الغوله) فلازم يكون فيه بديل نضيف ومالوش سوابق وسمعته كويسه والناس بتحبه وفى نفس الوقت ليبرالى ومتفتح ومعندهوش عقد ولا مشاكل مع الغرب علشان وقت ما عوكل يتولع فيه يقعدوا دة علطول قبل الاخوان ما تهجم...


عموا عوكل كظم غيظه وفضل حابسه وعمو بوش مستخدمه ورقه ضغط على عوكل لو ماسمعش الكلام هيقلشوة ويجيبوا عمو نور ,وطبعا كل الكلاب بتوع التيارات المعارضه نفضوا لعموا نور علشان جناب العمدة غضبان عليه,والناس جعحعت شويه وبعدييين كنت ونامت ,فمبقاش قدامه غير ماما امريكا تحميه من عوكل مصاص الدماء
(وهو لا يلام فى ذلك)


عمو بوش رشح نفسه تانى وعمو عوكل قرى الكف والفنجان فعرف ان عمو بوش مش هيكسب , فقالك اهو كدة ماشى لما العنله سلسفيل ابوة....


عمو بوش كسب, فعمو عوكل شخ فى لباسه, واتكبس كبسه منيله ومبقاش عارف يعمل ايه


عمو عوكل راح يلحس رجلين عمو بوش فعمو بوش قاله لااااااااااا كان زمان وجبر ما شفش وشك فى الاستيتس تانى, ولو جيت تبقى زيارة غير رسميه وابعتلك الواد جو السفرجى يقابلك, اذهب عليك اللعنه.....


عمو عوكل رجع قفاة يقمر عيش , بينما عمنا ايمن طبعا محبوس للابد....


عمو بوش غار فى ستين الف داهيه وجه عمو اوباما شيخ الزلنطحيه , فقالوله الواد عوكل دة ديب وخبيث وميه من تحت تبن فلازم توريله العين الحمرا وتدبحله القطه من اولها علشان يعرف انك مش بروطه زى بوش..


عمو اوباما سمع الكلام , ولما عمو عوكل اتصل بيه علشان يهنيه ويقدم فروض الولاء والطاعه , نفض له ومرضيش يرد عليه وقالهم قولوله مش فاضى, بيعمل بى بى......


عموعوكل جاب الوان ,وقال طب وبعدين , ايامى خلاص قربت وهروح اصيف فى الدرك الاسفل من النار , وعايز اظبط الواد نوفل ابنى علشان يرضوا عنه ويسيبوة يمسك الزريبه من بعدى.....


ابوس رجلك يا اوباما بيه اسمحلى اجى علشان اظبط للوله وعلشان اخزء عين العدو واقولهم ان سعادتك مش غضبان عليا ولا حاجه لحسن طمعوا فيا اوىىىىى....


ولاد الحلال قالوله يا عوكل لو عايز اونكل اوباما يرضى يقابلك طلع عمو ايمن من السجن وسقط الاحكام اللى دلاديلك فبركوها ضد سعد الدين ابراهيم....


عمو عوكل سمع الكلام وادى اوامر لكبير الطرابيش انه يطلع عمو نور افراج صحى , وهذا ما قد كان....


عمو عوكل مبسوط كتير كتير علشان هيروح بلاد الفرنجه والواد نوفل ابنه مش مصدق نفسه فى الفرحه وقعد يتنطط على راسه جوة الزريبه ويلغوص فى كومه الجله وبعدين رما المركوب وشلح لباسه وراح ناطط فى الترعه


عمو مجدى احمد حسين لسه مرمى فى السجن ولا حد معبرة علشان راجل بتاع ربنا , وامريكا مش بتحبه علشان وحش وحش وحش موووووووت


كل دة والبهايم اللى فى الزريبه نايمه فى العسل ومش حاسه بحاجه وكل همها تاكل برسيم وتعشر وتكيح على القش وتسرحلها شويه فى الغيط...


ودى يا حبيبنا الحلوين , كانت قصتنا النهاردة , ونتعلم من كدة , ان اللى ميسمعش كلام ماما امريكا يبقى وحش وكلبوته , ونلسعه كلنا بالمعلقه السخنه فى حته وحشه......


بس خلاص...


..........بابا شارو................



تتر النهايه.....................