الأربعاء، 11 فبراير، 2009

شيزوفرنيا



المشهد الاول:
التاريخ يوم الجمعه10فبراير2006
يوميها كنت عند نازل اصلى الجمعه فى امان الله,بعد ماخلصت قلت روح بالمرة احجز تذكرة قطر علشان تشد على مصر علشان عندك شغل بكرة الصبح عالاقل تلحق تبيت فى مصر بدل بهدله سفر الفجر اللى بيخنقك وبيجيبلك اكتئاب دة,وبالمرة اتمشى لحد المحطه اهو تشملك هوا شويه, ونا ماشى قابلت الحاج وهو راجع البيت وعنيه حمراااا,وادياحمد(ابويا بينادينى)هو فى تراب فى الجو ؟؟ قلتله والله مش واخد بالى, المهم ونا فى السكه قابلت عمرو دفعتى وبرضه عنيه حمرا .
احمد,هو فيه مظاهرات ولا حاجه؟؟؟
لا مافيش الدنيا رايقه خالص ونا جاى طول الطريق الشوارع فاضيه.
المهم حجزت التذكرة وونا خارج من المحطه وماشى فى امان الله لقيت الارض بتتهز تحت منى وصوت جاى من ورايا كأن فيه الفين حصان بيجروا من , اضرب بعينى ورا الاقى المنظردة:
حوالى الف شاب بيجروا كلهم فى اتجاة واحد , طبعا جايين عليا, ووراهم مدرعه امن مركزى وخارج من سقف العربيه عسكرى دغف وماسك قاذف قنابل ونازل رزع فى خلق الله.
كان اياميها موضوع رسوم الكاريكاتير بتاع الدنمارك لسه فى عزة ومجموعه من الشباب قررت تخرج بمظاهرة من احد المساجد لتندد بالرسومات دى.
المظاهرة عاديه جدا ومحترمه جدا وكل الكلام اللى اتقال فيها لبيك يا رسول الله وكدة, يعنى ماحدش قال منك لله ياعوكل ربنا يحرقك يا بعيد ولا حد قال يانوفل يااهبل يابو رياله, يعنى بعيد عن السياسه ومع ذلك الامن المركزى اتعامل مع الناس بمنتهى القسوة والعنف لحد مافرق المظاهرة تماما, طب الرجاله خلصوا شغل يروحوا بقى؟؟؟
لا ازاى ودى تيجى مش لازم نوجب مع الناس الاول, العسكرى الجعر اللى فوق العربيه والسواق الجزمه اللى جواها واخدين الشارع رايح جاى وهاتك يا حدف قنابل عمال على بطال مع العلم ان الشارع كان فاضى تماما حتى من العربيات.
راجل كبير فى السن ماشى هوا ومراته يلاقى قنبله نازله فوق نافوخه ومراته تتخنق ياعينى وتقع فى الارض والراجل يشاور لتاكسى علشان يركبه ,ابدا طبعا كل السواقين خايفين يقفوا,المهم سواق ابن حلال وقف علشان يركبهم قام العسكرى الجعر اياه حادفه بقنبله وقعت فوق العربيه بقى المنظر ان السواق مدور العربيه وبيمشى والراجل جوة ومراته لسه مسورقه وواقعه فى الارض وهوة بيجرهاعلشان يدخلها العربيه والعربيه ماشيه.
محل عصير قصب يلاقى قنبله محدوفه جواة, قهوة الناس قاعدين جواها فى امان الله يلاقوا قنبله محدوفه فى وسطيهم, بياعه جرايد قاعدة جوة الكشك بتاعها تلاقى قنبله محدوفه فى حجرها, اة هى كدة العسكرى مش لاقى حاجه يعملها عمال يتسلى.........
المشهد التانى:
فى نفس اليوم الساعه الثامنه مساء, فى محطه مصر,رمسيس
وصلت بسلامه الله وكان المفروض انى اطلع على مصر الجديده علشان الحق اروق الشقه وانام بدرى , طبعا مكنتش اعرف ان فيه ساعتها نهائى كاس افريقيا ومن حظى الاسود انى كنت بعدى على منطقه الاستاد ونا راجع,المهم ونا راجع فى امان الله الاقى الدنيا اتقفلت وناس بتصوت وتصرخ وتجرى, قلت ياواد تكونش الثورة قامت , ايوة اكيد ,انا لسه داعى النهاردة بعد الصلا ودة يوم مفترج, ولسه هوقف سواق التاكس وانزل علشان اهتف,تحيا الثورة....تحيا الثورة..تعيش مصر حرة مستقله,الاقى السواق بيقولى ثورة ايه يابيه فال الله ولافالك, امال ايه الطحن دة,جرى ايه يا باشا انت مش عايش فى الدنيا ولا ايه ,خدنا الكاس.
طبعا لقيت الطريق مقفول ومش هوصل فى سنتى قمت نازل من التاكس وقلت اخدها ماشى
الاقى المنظر فى الشارع كالاتى:
-حشود من الاف البشر رجاله وستات وشباب وبنات مش هقول من الرصيف للرصيف لامن الحيطه للحيطه يعنى ولامؤاخذة لو كان فيه قدهم فى ثورة 1919كان زمان مصر رمت الاحتلال فى البحر.
-ست كبارة وشعرها ابيض ماسكه علم وعماله تسرخ:اوليييييييييه اوليه اوليه اوليه
-راجل عندة ييجى اربعين سنه طالع على قمه عمود نور وعمال يصرخ مش عارف بيقول ايه.
-5شباب وبنات واقفين فى جنب وماسكين كبايه قزاز جواها حته حشيش وهاتك يا رزع.
-راجل كبارة عندة ييجى ستين سنه ماشى بالخطوة العسكريه المعتادة ورافع ايدة وماسك فيها كيس,اة نسيت اقول انه كان كما ولدته امه.
-مجموعات من الفتيات بيوقفوا عربيات الشباب اللى هى واقفه اصلا ويقوموا فاتحين الباب وراكبين معاهم ,بالعافيه,واللى تطلع وتقوم قاعدة عالكبوت,
واللى تطلع على سقف العربيه وتتقمصها روح المرحومه تحيه كاريوكا وهاتك يا رقص,خمسه شخلعه,والناس تحت هاتك يا تسقيف,وفيه راجل متحمس قوى وعمال بناديها باسمها,اعتقد انه ابوها,طبعا الراجل فخور ببنته وبروحها الوطنيه.
-دة طبعا غير البمب والصواريخ وعلب الفليت اللى خلصت من الصيدليات فى ثوانى,والاعلام طلعت ومصر....مصر ...هيييييييه,ياعينى عالوطنيه بصراحه الدمعه كانت هتفر من عينى...
المهم وصلت بعون الله الساعه3الفجر طبعا بعد ماضاعت الليله ولا اتنيلت نمت ولا حاجه.

المشهد الثالث:
بعدها بيومين قابلت تامر واحمد,دول اصحابى , ولاد ناس ومبسوطين ماديا واجتماعيا,اكتشفت انهم كانوا بيحضروا ماتشات المنتخب من اولها فى الاستاد مع العلم انهم قبل كدة مكانش لهم اى اهتمامات كرويه, وبعد شويه دردشه حطيت النقط على الحروف وعرفت الاتى:
-فى بدايات الدورى تسائلت بعض الهيئات عن اسباب عدم اقبال الشباب على حضور الماتشات فى الاستاد وبالفعل حصل استطلاعات للراى لمجموعه كبيرة من الشباب كان اغلب هذة العينات من فتيات الطبقه الراقيه,وكانت الاجابه تتلخص فى سوء حاله المدرجات وان فيه ناس مستواها مش كويس بتحضر الماتشات وبيقولو الفاظ وحشه ويتصرفوا تصرفات مش كويسه, باختصار ناس بيئه يعنى.
المهم فجاة اتغير الحال والمدرجات اتروقت وسعر التذكرة غلى علشان نضمن الليفل اللى هيحضر يكون هاى كلاس ونستبعد الناس البيئه الوحشين.
-اجرائات امنيه مشددة على كل الشباب الذكور اللى داخلين سينجل مش كبلز يعنى ممعاهمش بنات او شكلهم مش هاى,فى مقابل دلع وهشتكه واتفضل حضرتك للشباب الهاى وخصوصا اللى معاهم بنات ,اما البنات اصلا ماحدش يقولهم بم
-يوم النهائى تواجدت اعداد كبيرة من الجماهيرامام بوابه الاستاد لاتتسع لهم المدرجات فأغلق رجال الامن الباب فى وجوههم وبعد قليل قاموا بادخال الفتيات فقط...
-حمله اعلاميه ضخمه فى التليفزيون وبرامج الفضائيات وفى شوارع العاصمه والجامعات
طبعا لتنميه الروح الوطنيه للشباب المصرى علشان يروحوا الاستاد يشجعوا منتخبهم ,
منتهى الوطنيه طبعا ,علشان لما نفوز نقدر ناخد مقعد دائم فى مجلس الامن , ويبقى معانا حق الفيتو, ولما ناخد كاس افريقيا طبعا هنقدر نهزم اسرائيل بمنتهى السهوله لاننا معانا كاس افريقيا وهما لا...
-طبعا دا غير المسخرة اللى كانت جوة الاستاد وان معظم الشباب مش رايحين علشان الماتش بل رايحين علشان يعلقوا بنات ,دة على حد تعبيرهم, دة طبعا غير البنات اللى عاملين كورال غنائى وهاتك يا تريقه على كورال الشباب اللى جنبهم , لا يا ميدو لا...لا مالكش حق,الا هو مين ميدو دة؟؟؟؟؟؟
وبينما المليطه دى شغاله يجى جون يقوم الناس ياخدو بالهم ان فيه جون جه,الله ...ايه دة؟..دة جون ....طيب...هييييييييييييييييه
دول 3 مشاهد كان من نصيبى انى امر بيهم فى يومين
وضحت الصورة كدة؟؟؟؟
اظن انها بقت واضحه قوى
الحكومه مش عاجبها ان الشباب بيفكر فى مستقبله وفى حال بلدة ومن باب ان النفس البشريه لازم تتملى بحاجه, طيب نعمل ايييييه؟ نملاها هيافه وعبط , وطالما ان الافلام النص كم بتاع السبكى افندى والكليبات المعيزى اياها مش كفايه يبقى نملى دماغم بالكورة ,يفطروا كورة ويتغدوا كورة ويتعشوا كورة , ويبطلوا بقى كلام فى السياسه, بلا خوته دماغ.
وبالفعل نجحت الخطه والناس والشباب اللى ماكانوش يعرفوا الاوفسيد من الجون(انا شخصيا معرفهمش) بقى مالهمش سيرة الا اجوان ابو تريكه والزعيم الوطنى حسن شحاته,
وافتكاسات مرتضى افندى منصور ,والعب.......يا حضرىىىىىىى.
وطبعا لازم تصدر التوجيهات لسيادة اللوا قرنى علشان يفكها شويه على الشباب ويخليه لارج, خلى الشباب ينبسط ويعيش حياته سواء فى الاستاد ولا فى كورنيش المقطم ولا على كوبرى المطار .....
يابنى انتى وهوا , يا بنتى يا اختى يا اخويا ياوالدى.....ممكن تفوقوا شويه ,ممكن تفتحوا عنيكم وتشوفوا ايه اللى بيحصلكم وبلاش شغل القطيع ده....
هوا انتوا لما التعليم يبوظ هتعلموا عيالكم كورا؟
لما فلوسكم تتسرق,هتصرفوا كور؟؟؟
لما تتسرطنوا وتتنيلوا هتتعالجو بالكورة؟؟؟
هتتجوزوا وتعيشوا فى كورة بدل الشقه؟؟
ولادكم .هتاكلوهم كورة؟
اسرائيل لما تيجى تحاربكم ,هتحدفوهم بالكور؟؟؟
هى الكورة ولا الكاس هما اللى هيعملوا لمصر قيمه؟؟
لما تموت وتقف امام ربك هيدخلك الجنه علشان جبت جون؟؟؟
اهلك لما يجى الوقت علشان تدافع عنهم هتدافع عنهم بالكورة؟؟
هنسلح جيشنا بالكور؟؟؟
الكورة والرياضه حاجه جميله ,ماقلناش حاجه,بس لما تطغى على حياتنا كلها بالشكل دة وميبقلناش سيرة غيرها,بالرغم من الوكسه اللى احنا فيها يبقى نسمى دة ايه؟؟؟
ينفع بيقى بيتكوا بيقع فوق دماغك وانت مش عايز تهرب علشان الفيلم اللى بتتفرج عليه لسه ماخلصش؟؟؟
ايه الازدواجيه دى وايه الخلل والشقلبه دى؟ وازاى انسان المفروض انه عنده عقل يوصل للمستوى دة؟
طبعا مش هتكلم على موضه الكورة اللى طايحه فى الكل دلوقتى والجرايد اللى اغلب صفحاتها بقت عالكورة ,واخبار الحضرى اللى غطت على اخبار فلسطين.
النظام اللى نزل طحن فى الناس بالنهار علشان بيقولوا لبيك يا رسول الله , هوة نفسه اللى حط رجل على رجل وقعد يتفرج على المسخرة اللى حصلت بالليل وتعطيل المرور والعطله والسفاله والانحلال زى مانكون فى حانه فى امستردام.
طبعا لان دة هوة المطلوب

طبعا المشاهد دى مازالت مستمرة للان.
يارب نكون فهمنا حاجه....
وملعون ابو دة كاس
فى صحتكوا........الابوطر