الخميس، 12 فبراير 2009

عليه العوض



تعالوا اتفقعوا واحرقوا دمكم شويه واقروا الاخبار دى:
1-المصريون اكثر شعوب العالم تدينا
المصريون هم اكثر شعوب العالم تدينا وفقا لاستطلاع اجراة معهد جالوب الامريكى والذى اعطى فيه 100 فى الميه من عينه البحث أهميه كبيرة للدين فى حياتهم وتفوقت نسبه الامريكيين المتدينين على الاوربيين وخصوصا الفرنسيين حيث احتلت فرنسا المرتبه التاسعه فى الدول الاقل ايمانا كما تعادل معهم اليابانيون.
ههههههههه
بصراحه فى كلمه نفسى اقولها بس بلاش....عيب.
بقى المصريون اكثر شعوب العالم تدينا؟؟؟
انا متخيل المنظر دة
يوقفوا راجل فى موقف
اكسكيوزمى
يرد:جود مورجن,ايام دونكى
بليز ايه اهميه الدين فى حياتك؟؟؟
يرد:اوفكوز الدين دة حاجه مهما جدا ,اة طبعا دة اهم حاجه واحنا شعب مؤمن ومتدين وبيحب ربنا, اة والله دنا حتى معلق الصمديه عندى فى المكروباز وحاطط مصحف فى التابلوة كمان.
-ياه, بجد؟ دانتا متدين قوى بقى
يرد:طبعا امال ايه دحنا احسن ناس تعرف ربنا دا حتى المودام ولا مؤاخذة مشغله القران فى البيت طول النهار
-جود ..احنا فعلا عمرنا ما شفنا كدة
يرد: طب اقولكم بقى على حاجه,ايه رأيكم انى فى رمضان بربى دقنى وببطل شرايط الواد حمكشه فى اللموكشه,
وبشغل الشيخ حسان
-ياة
يرد:اة وكمان ببطل اركب رابع ورا علشان حرام
وفى هذة الاثناء بيشوف التباع بتاعه نسى الباب مفتوح
انت ياض يابن ال... ال..... مش قولتلك ب.. ... ماتسيبش دين ام الباب مفتوح
ايوة يا اوستاذ كنت بقول ايه
اة احنا طول عمرنا شعب متدين ونعرف ربونا كويس خالص اة ونعرف كمان نعمل الصح
--تمر واحدة ست شفتشى ولا مؤاخذة..
بعد اذنك بقى يا اوستاذ علشان عندى شغل ولامؤاخذة,والرزق يحب الخفيه,والايد البطاله نجسه
يعدوا بعيدا وهو ينادى:
ايه ياموززززززة مصلحه ولا مروحه, مستنى مين يا جميييييييييل........


2-اسمه محمد وابوة حسنى وجدة مبارك:
مساعد شرطه يقيم فى قريه ببنى سويف اسمه مبارك رزق بحفيد من ابنه حسنى فاصر على ان يسميه محمد وقد وجه نداء الى الرئيس لتلبيه رغبته بنقل ابنه حسنى الذى يعمل فى القاهرة الى بنى سويف ليكون بجوار مولودة.....
جتها نيله اللى عايزة خلف.....

3-نائب رئيس الاتحاد المصرى لكرة القدم يفوز بعضويه اللجنه التنفيذيه بالاتحاد الدولى الفيفا,كما حصل المدرب حسن شحاته على لقب احسن مدرب فى القارة...........
مبروووووووووووك
ربنا ميحرمكم منه.
هيه ...اتفقعتوا ولا لسه؟؟؟؟؟؟؟؟