الجمعة، 6 مارس 2009

البشير وسنينه ( سابقا ) , مصر وسنينها ( حاليا )



كلاكيت عاااااااااشر مرة , ستاند بااااااااى , اكشننننننننننن
( يرحمكم الله )


طبعا حضراتكم شايفين اللى بيحصل فى السودان , بلاش شايفين دى , سامعين , علشان نبقى منطقيين اكتر,
انا مش عهلق على الناس اللى فرحانه بالهبل اللى اسمه محكمه القرع الدوليه , بس هسألكوا كام سؤال اتمنى انكم تفكروا فيهم وتجابوا بموضوعيه...
هى اسئله مش صعبه , بالعكس دى اسهل من السهوله :

- اشمعنى البشير اللى قلبوا عليه , مش هقول محكمه العدل لان دى شرابه خرج , هقول امريكا ؟؟؟؟
- هل مافيش دكتا طور فى الحكام العرب غير البشير؟؟؟؟
- طيب فرضا انه سلم نفسه , مين اللى هييجى مكانه؟؟؟
- وهل البديل دة هييجى بانتخابات وبأرادة الشعب ؟؟؟
- وهل هيبقى ولائه لشعبه , ولا لامريكا وبالتالى اسرائيل؟؟؟
- طيب , موقف مصر ايه من الموضوع دة , هل هتتأثر بيه ولا لا؟؟؟؟
- ولو اتأثرت , ايه مدى التأثير دة , وهيكون بالايجاب ولا بالسلب ؟؟, ولو كان بالسلب , هتقدر مصر تستوعبه؟؟؟
- وهل مصر حاليا عندها القوة وفيها حيل انها تتعامل مع اى ازمه وتحتويها , وان كانت حتى ازمه ضعيفه؟؟؟؟
- طب النيل موقفه ايه؟؟؟
- والسد العالى , ايه ظروفه؟؟؟
- والجيش , ممكن بتدخل , ولو اتدخل هيقدر يتدخل لاى مستوى؟؟؟
- وان حصلت ازمه , هل ممكن الشعب المصرى يقدر يستوعبها , ويتعامل معاها بالعقل ؟؟؟؟
- والحكومه الذكيه موقفها ايه من الاعراب؟؟؟
- هل انتوا عارفين فعلا ايه اللى بيحصل فعليا فى السودان؟؟؟ ولو تعرفوا , عرفتوة منين؟؟؟؟
- ولو حد عرفكوا هل الشخص دة له مصلحه , ولا له مصداقيه اصلا , ولا هو طرف فى الموضوع؟؟؟
- المنظمات والهيئات والمحاكم الدوليه , هل ليها اى لازمه ؟؟؟

طيب , اولا احب انقل تعليق مواطنه سودانيه , بعد اذنك يا نوارة , وبعد اذن صاحبه التعليق نفسها
( افتكر انك قلتى من مدة ان حقوق الطبع غير محفوظه )
عموما التعليق دة من مدونه جبهه التهييس الشعبيه لصاحبتها نوارة نجم , سجل ضريبى رقم (... )

نشوف سوا مع بعض؟؟
- اولا للاسف فعلا مافيش امكانية للحصول على ادلة مادية للي بيحصل في السودان لان زي ما قلتي كل التقارير جاية من مؤسسات ووكالات معينة لها اغراض في السودان وكلهم مش موضوعيين ولا محايدين. لو اتفرجتي على اليوتيوب مش ح تقدري تحددي بالظبط المادة دي اتصورت فين. على سبيل المثال لما تشوفي الفيديو وتلاقي فيه قوات الجنجويد اللي مفروض انها عربية عمرك ما تقدري تعرفي هم ايه بالظبط لان كل الناس شايفين ان السودانيين شبه بعض لكن بقى السودانيين هم اللي يقدروا يميزوا واي حد منهم يقدر يقول لك ان القوات اللي بيتقال عليها جنجويد في الافلام دي فيهم ملامح كتير من القبائل الافريقية اللي في دارفور وغرب السودان. يعني اي حد يقدر يلبس بشكل معين ويقول انا من الجنجويد واللي مش سوداني عمره ما يقدر يعرف الفرق او حتى يشك فيما اذا كان الادعاء ده صحيح ولا لأ.

حاجة كمان، كل الفيديوهات اللي مفروض انها بتبين المشاكل في دارفور، مافيش اي صور لجثث الناس اللي اتقتلت، كلها صور لاكواخ مهدودة، مخيمات لاجئين مافيش غير عضام موتى (وبالمناسبة الجثة بتاخد وقت قد ايه عشان تتحول لعظام، لو فاهمة قصدي؟) وبعض شهادات لناس بتقول انها اغتصبت وبيحكوا عن مدابح إلخ. يعني فعليا مافيش صور اتاخدت حية للمدابح زي اللي حصل في غزة.ممكن تسمعي عن هجوم المتمردين في دارفور على مخيم او جماعة من الناس او منظمات في المنطقة لكن عمرك ما بتشوفي الصور دي فيديوهات، يا ترى ليه؟
ثانيا، مين اللي بيعد الضحايا؟ هل اساسا فيه احصاء رسمي لتعداد السكان في المنطقة دي
هل الناس اللي بتعد دي حاطة في حسبانها ان الحدود بين السودان وتشاد مفتوحة تماما وان الناس بتدخل وتطلع بحرية؟في سنة 2003 لما ظهرت مشكلة دارفور على الساحة بالرغم من انها كانت موجودة قبل كده بكتير بسبب تقلص الموارد زي ما قلت قبل كده ابتدت النيويورك تايمز تدي تقارير كتير عن ارقام متضاربة للضحايا، وهي النيويورك تايمز اصلا اللي ابتدت كل حملة "انقذوا دارفور" بالرغم من ان امريكا كانت عاملة حصار على السودان من قبل كده، يعني انا مش عارفة ازاي اي مؤسسة امريكية يبقى عندهم فرصة يعرفوا الارقام دي بشكل مؤكد؟ في الاول كان في حدود متين تلتميت الف وبعدين وصلت لمليون وبعدين رجعت تاني لتلتميت الف.... اصلا مين اللي بيحصي الاعداد دي؟ ولمدة خمس سنين الرقم فضل من متين لتلتميت الف؟ ده معناه ايه؟
انا عايشة في امريكا وحاولت اني اتطوع للعمل مع السودانيين اللاجئين اللي من الجنوب ومن دارفور في منظمة اسمها كير. واكتر حاجة غريبة سمعتها من المنظمة ان كان فيه حالات مزيفة كتير...بمعنى ان كان فيه ناس كتير ادعت انها من دارفور ولما حققوا في الموضوع لقوهم لا من دارفور ولا من السودان اساسا.
هل ده يعني ان الحكومة بريئة تماما من ارتكاب جرائم في دارفور؟ بالطبع لا، لان لما المتمردين ابتدوا الحرب الحكومة حاولت تسيطر عليهم فكان فيه قبائل كتير ادتهم حماية فالحكومة سلحت قبائل تانية عشان تحارب المتمردين...بس ايه اللي حصل؟ القبائل المدعومة من الحكومة قامت بتصفية حساباتها القديمة مع القبائل التانية بسبب نزاعات سابقة على الموارد
امل ان الكلام دة يكون مفهوم؟
مشكلة دارفور ابتدت من زماااااااااااان قبل 2003 بكتير، بس بعد 2003 بقت فجأة مشكلة "ابادة عرقية" غير قابلة للاثبات فحولوها لجرائم حرب. تسحر المنطقة تسبب في نشوب حرب ما بين الفلاحين والقبائل وبعضهم لان كل واحد فيهم عايز يسيطر على الموارد. هل دارفور منطقة مهملة؟ ايوة، بس الحقيقة السودان كله مهمل. ما كانش فيه تنمية لمدة عشرين سنة فاتت في السودان بسبب الفساد الحكومي وحرب الجنوب. ومع ذلك، الحقيقة لازم تتقال، الحكومة دي فيها اكبر عدد من ابناء غرب السودان، يعني فعليا غرب السودان كان بالفعل ممثل في الحكومة دي وصدقي او لا تصدقي بعض قادة التمرد زي خليل ابراهيم كانوا بيشتغلوا مع نفس الحكومة دي اللي هم بيحاربوها. حاجة تانية ماحدش واخد باله منها وهي دور محتمل للترابي في الحركة دي.
كل المصايب حصلت في دارفور على طول بعد ما الترابي اتشال وهو له صلات وثيقة بكتير من قادة التمرد زي خليل. يعني هل فيه احتمال انه هو اللي يكون ورا الحرب دي؟
مافيش حد بيتعلم من تجربة جنوب السودان، التدخل الاجنبي في الجنوب كان واضح جدا، يعني كتير من متمردي الجنوب كانوا متدربين على ايد الموساد ووكالات استخبارات اجنبية تانية. معلومات مضللة كتير كانت بتبث في وسائل الاعلام وماحدش كان بيحاول يدور على الحقيقة ... كان فيه تقارير من كير ومن الامم المتحدة بتؤكد ان معظم اللي بيموتوا في الجنوب مش بيموتوا بسبب الحرب مع الشمال ولكن بسبب الحرب ما بين الجنوب وبعضه، بس طبعا التقارير دي ما كانتش بيتعمل لها دعاية لان كان من الضروري خلق حالة عزلة حوالين الحكومة السودانية , وممكن الواحد يحصل على دعم اكبر واحسن لما يقول ان المسلمين العرب الوحشين بتوع الشمال بيقتلوا المسيحيين الغلابة بتوع الجنوب، ومع ذلك، مش كل الشماليين مسلمين ولا عرب، واغلبية سكان الجنوب مش مسيحيين، الحقيقة نسبة المسلمين والمسيحيين في الجنوب تقريبا متساوية، واغلبية سكان الجنوب بيدينوا بالديانات القديمه ونفس الحكاية بتحصل دلوقت في دارفور، عشان يبقى فيه ضغط كافي على الحكومة السودانية يبقى من الافضل انه يتقال ان القبائل العربية الوحشة بتمارس ابادة عرقية للقبائل الافريقية، مع ان القبائل هناك مختلطة وفيه اسباب كتير تانية للنزاع غير الاسباب العرقية.
اسفة على التعليق الطويل، بس انا زهقت من الاكاذيب وانصاف الحقائق اللي بيتم الترويج ليها في الشأن السوداني، البشير مسئول، بس مش هو المسئول الوحيد عن اللي بيحصل، والكلام الحقيقي اللي مفروض يتقال مش بيتقال عشان هم مش عايزينه يتقال.


ودة تعليق اخ سودانى تانى عند نوارة برضه ( بعد اذنها طبعا )

الاخ غريب بيقول:

الحاجة الي تزعل ان الاعلام الغربي و الامريكي نجح انه ينقل صورة ليست صحيحة بالمرة عن البشيرو السودان و دارفورو هوا في حد من الي بيطالبوا بمحاكمة البشير زار السودان و لا تكلم معا ضحايا البشير؟؟ اشك ..
وهو مين الي جاب الافلام و الوثائق الي بتدين البشير و انتوا شوفتوا المجازر دي فين غير من الاعلام الغربي يعني كل ارائكم الكريمة و الحقائق الي بتصموا عليها اتبنت فقط من خلال الاعلام و كدا الامريكان نجحوا نجاح باهر..
كسوداني و مصري في نفس الوقت و والدي كان يوم من الايام من رموز المعارضة و لكن ما فيش سوداني واحد اصلا معارضة و غير معارضة مقتنع بلهليلة المعمولة لتشويه صورة البشير و الكل عارف انها زريعة للتدخل في حكم السودان الي زيارة واحدة ليها يعرف ان البلد فعلا بتتطور و ان البلد اصبحت مصدر رزق للكثيرين عرب و غير عرب ..
فى زيارتي للسودان منذ عامين اتكلمت مع بعض اهل دارفوار و انا ليا اهل منهم , مافيش المبالغات الي الاعلام الغربي بيوصفها ابدااااا..
في تجوزات صحيح مش بالصورة دي بس هو مين ورا الجنجويد دول اصلا غير الغرب و اصحاب المصالح ان السودان ما يشوفش استقرار و دول بالمناسبة زي جون جرنج الي طلع ان عندوا اكبر محلات الذهب بعد كدا في نيويورك و زي حركة العدل و المساوة الي عايشين زي الملوك هنا في كندا و امريكا , و فاكر ان من حوالي 3 سنين قابلت 4شباب كانوا بيدرسوا العسكرية من جنوب السودان في كوبا هوا مين بيوديهم هناك اصلا يا ناسسس فوقوا شوية هو دا بالظبط الي بشوفوا هنا في التلفزيون و الي بالضبط الي عايزنكم تصدقوه والذ ما في الموضوع ان انا شفت تعليقات بتقول ان البشير دكتاتور و بيقول انه استخدم الدين لحسابهم دا مش فاهم حاجة اصلا و دا بالضبط النموذج الي الامريكان عايزين يعملوه دين ايه وهوا انتوا عارفين ان اهل دارفور مسلمين و انهم من اكتر الناس المتدينة في ربوع السودان كلها؟؟و بعدين انتوا شفوتوا خطبة واحدة للبشير ؟؟
لو شفتوا حتعرفوا ان ما فيش لا استعدادات بالشهور و لاقناصة و لا الدنيا بتقف زي مصر لو وزير معدي بالعكس دا في وسط الناس علي طول , اتحدي لو في حاكم عربي يعمل كدا الا كان مات ضربا بالجزمه وكل حاكم عربي ليه مساؤي و مميزات بس اكتر حاكم عربي محبوب من شعبه صراحة ....
نفس الي اتعمل مع صدام و ديكتاتور و تور من غير ديك و اسلحة دمار شامل و كلام فارغ و النهاية ان الشعب العراقي في معاناة لا يعلم بيها الا الله و ان كنت ضد سياسة صدام حسين بس نفس الفلم بيتعمل تاني بس المرة دي لو السودان بقت زي العراق مصر و دول عربية كتير حتتبهدل , بجد امريكا عايزانا زي القرود بالضبط نردد الي هيا عايزاه و من غير تحليل عميق للموقف عشان كدا امريكا حتفل امريكا للاسف , يا ناس فوقوا شوية.....



طيب , دى اراء مواطنين سودانيين , اكيد هما عارفين التركيبه السكانيه للسودان اكتر منى ومنكوا , هييجى حد يوقولى ايه عرفك ان كلامهم صح , وبعدين دول اتنين بس , من ضمن شعب بالملايين....

طيب , هفترض جدلا ان كلامهم غير موضوعى ويعبر عن اراء شخصيه , بس فيه حاجه , الرأى المقابل رأى مين ؟؟
المنظمات الدوليه ودى اعتقد انكوا عارفين كويس مين اللى بيحركها , او الصحف والاعلام الامريكى , وطبعا بتتحرك ورا منه علطول الديول الاوروبيه فى اى اتجاة يمشى فيه ......
هل دول ليهم مصداقيه , او اراء نزيهه بعيدة عن التحيز؟؟؟
اظن السؤال اجابته سهله وانتوا عارفينها كويس , ومجربينهم كتير قبل كدة , صح ولا؟؟؟؟
يعنى ليسوا فوق مستوى الشبهات , دول تحتها بكتيييييييييير قوى , اظن مافيش خلاف على كدة .....
يعنى مصداقيه الاراءاللى ذكرتها فوق دى اكبر بكتير من كلام الغثاء اللى اسمه منظمات دة ......

ماااااااعلينا , نرجع مرجوعنا تانى للاسئله اللى فوق , نمسكها ونفصصها فص فص , قصدى سؤال سؤال :

1- طبعا واضح جدا ان امريكا قلبت على البشير علشان مش على مزاجها , والا ليه سابت باقى البقر , وكلهم العن من البشير ؟؟؟؟؟ , وفيه قاعدة قديييمه قوى بتقول ان الحاكم اللى الغرب عامه وامريكا على وجه الخصوص ترضى عنه لاااازم يبقى ابن كلب مكروة من شعبه , وبيعمل بكل جد على تدمير بلدة , لحد ما يجيب درفها , صح ؟؟؟؟
وطبعا مش بالضرورة ان العكس يكون صحيح ...

2- هل باقى الحكام العرب عدلين ؟
لاطبعا كل الحكام العرب دكتاتوريين , لواتحاكم اى حد منهم , القاضى هيقعد يقرى فى الاتهامات الموجهه ليه ستين سنه قدام , ولو اتكتبت على سور الصين العظيم هيخلص قبل ما تخلص هى , ولو اتحكم عليه بمليون سنه ضوئيه اشغال شاقه مش هتكون كفايه .....

3- لو البشير استسلم , وانا اشك فى الموضوع دة , لانه مالى ايده من باقى البقر ومتعشم فيهم قوى , لو سلم نفسه اكييييد اللى هيمسك من بعدة هيكون اراجوز لامريكا ولاسرائيل طبعا , من عينه حامد (برزاى) قصدى قرضاى اللى ماسك توكيل المخدرات والافيون فى كوكب الارض ....
وفككوا بقى من الهبل بتاع انتخابات حرة , مانتوا عارفين اللى فيها ومجربين العينات دى .........

4- طبعا الموضوع فى الاساس مقصود بيه مصر , موضوع الموارد واليورانيوم دول مش قد كدة , اينعم ممكن يكونوا اسباب ولكنهم اسباب فرعيه , الهدف الاساسى هو مسك مصر من رقبتها عن طريق التحكم فى منابع النيل
ودى حاجه انتوا مش متخيلين معناها ايه ,
والله العظيم اليهود عنيهم على مصر
وبيجهزوا لها
انتوا مش مصدقين ليه؟؟؟؟
بجد مش هتبرد الا لما ياخدوها....
طب بتوع الخليج عندهم فلوس يعملوا محطات تكرير ويشتروا ميه معدنيه مستوردة ويستوردوا الاكل وميزرعوش , الرك والباقى علينا , اللى بنرش الشوارع بخراطيم الميه علشان تطرى على قلوبنا فى الصيف ,
دى حاجه , تانى حاجه انتوا عارفين الصواريخ الاسرائيليه المعموله فى اثيوبيا ومتوجهه على مصر , وحكومتنا وجيشنا الموقر منفضين للموضوع خااااالص , كأنه ميخصهمش ,
طيب , تخيلوا بقى قواعد عسكريه فى السودان , وصواريخ امريكيه واسرائيليه جاهزة تنزل على قفا مصر فى اى وقت , يعنى الوضع بالظبط اشبه بصرصار تحت جزمه مرفوعه , وفى اى وقت تحبه , كل اللى مطلوب منك تدوس , تدوس بس , وهو هيبقى استيكر على الارض ,
انا اسف فى التشبيه , بس مع الاسف مش لاقى حاجه اشبه بيها اوضح من كدة...

5- طبعا مصر مافيهاش حيل تتعامل مع اى ازمه مهما كانت تافهه , وانتوا عارفين وشايفين , بل ان الحقيقه والله العظيم والله العظيم اكثر سوادا وكابوسيه مما تعرفونه بمراااااحل , فما بالك بفيلم هندى زى دة ؟؟؟؟؟

6- نيجى للنيل , طبعا انا كنت درست فى الثانويه العامه فى منهج الجيولوجيا ان الانهار زى البشر ليها اعمار , بتتولد وتمر بمرحله طفوله ثم شباب ثم شيخوخه وبعدين بتختفى وتموت , وكل مرحله من دول بيبقى ليها شكل معين للنهر بيتغير من مرحله للتانيه ....
نهر النيل طبقا للنظريه دى , فى مرحله الشيخوخه , يعنى فى اخرايامه , طبعا كلمه زى دى ممكن تستغرق الاف السنين , بس التغيرات المناخيه وابحاث العلماء بتقول غير كدة ....
والله انا ما بهرج , النيل كان بيتحرك فعلا ومن فترة بسيطه كانت فيه مناطق كتير فى الجيزة شرق النيل مش غربه
وايام الخديوى اسماعيل كان النيل ماشى مكان شارع23يوليو على ما اتذكر , يعنى لما تمشى فى الشارع دة اعرف انك ماشى على سطح النيل من 140سنه , بس طبعا الحركه دى هديت بعد خزان اسوان والسد العالى ...
- يعنى من الاخر
احتمالات نقصان نسبه مياة النيل تمهيدا لجفافه احتمالات واردة جدا بل منتظرة , مش كلام اهبل زى ما الناس الهبله فاكرة , دا غير طبعا النظريه بتاع اغراق مياه البحر الابيض لتلت اراضى الدلتا ,
يعنى ممكن كمان كام سنه تبقى المنوفيه مصيف , وشبين الكوم تبقى عروس البحر الابيض المتوسط ........
غير ان العالم داخل على ازمه موارد مائيه وكل دوله بتامن مواردها المائيه من دلوقتى , والابحاث بتقول انه هييجى وقت تكون فيه الميه اغلى من البترول ,
طيب احنا ممكن نعيش من غير بترول , بس مستحيل نعيش من غير ميه , ونهر النيل مش شويه , بس احنا اللى مش حاسين بقيمته , لاننا مجربناش نعيش من غيرة , ولا حتى فكرنا فى كدة , اللى راح اوروبا يلاقيهم هناك اى نهر مفعوص يعملوا عليه هيصه مافيش بعد كدة , يعنى لامؤخذة لو عيل وقف جنب الحيط وعملها ممكن يسموة نهر , ودى كلها ماتجيش حاجه جنب النيل , النيل نهر ضخم وعظيم فعلا..

7- نيجى للبلوة المسيحه , السد العالى , ونا اسف انى بقول الكلام دة بس مبدهاش بقى ,
السد العالى لما اتبنى اتبنى على اساس انه يتحمل هجوم بقنبله ذريه افتراضيه من اسرائيل , نظرا لحاله العداء اللى كان بين مصر واسرائيل ايامها , طبعا الافتراض دة كان فى الستينيات , يعنى عامل حسابه على قنبله فى حجم قنبله هيروشيما , بينما اقل قنبله فى اجعص ترسانه نوويه دلوقتى اكبر منها بمرااااحل , دا غير حاجه تانيه ,
مين قالكوا ان اسرائيل او اى دوله تانيه لو ضربت هتضرب قنبله واحدة , ايه يمنعها اتنين وتلاته وعشرة , محنا معندناش نووى نرد بيه , يعنى ما فيش ردع , يعنى الظاظا ولا مؤاخذة مكشوفه ومتاحه للراغبين من كل الاعمار,
هتقولولى تصميم السد كان على نظام ركامى , يعنى اى ضرب هيردم مش هيعمل انهيار ,
طيب فيه حاجه بسيطه , فرضنا جدلا ان السد لم ينهار , وحصل فيه انهيار بسيط قرب قمته , دا مش هيمنع الميه , لان منسوب الميه حاليا اكتر من زمان بكتير , دا غير الضغط الخرافى اللى عاملاة بحيرة ناصر الضخمه جداااا , ودة طبعا مكانش موجود ايام بناء السد , اى نعم المفترض انه معمول حسابه , بس مش بالشكل دة , دا غير ان منسوب مفيض توشكى اعلى من السد , يعنى لو حصل شرخ صغنون مافيش نقطه ميه هتروح ناحيه المفيض , لان البهيم اللى عمله نسى او تناسى انه عااالى , فالميه هتنزل على الواطى , اللى هو الصعيد والدلتا , وفيه ابحاث كتيييير جدا اتعملت عن الموضوع دة ( دا برة مصر طبعا ) يعنى فى ناس بتفكر جديا فى الاساليب دى , الابحاث دى بتقول انه لو حصل الكلام دة , فالاستفتاح , اول حاجه يعنى , الف ب :
هى ان تلت سكان مصر هيتكنسو بالمعنى الحرفى للكلمه , يعنى النهاردة هنكون 80 مليون , بكرة نبقى حاجه وخمسين , دا طبعا غير الزلازل , واثار القنبله النوويه اللى احنا متكلمناش عنها , وغير الميه المشعه اللى هتغرقنا
غير المجاعه , وغير وغير وغير ......كفايه كدا....
طبعا مش هتكلم على موضوع الخبرا الاجانب اللى معاهم خرايط بتشرح ادق التفاصيل فى نقط ضعف جسم السد...

8- الجيييييش , قلتولى الجيش , اولا وتكمله لموضوع السد , الجيش مسئول مسئوليه تامه عنه , لان الدفاع الجوى هو المسئول الاول عن اجهاض اى هجوم من النوع دة ....
طيب , فيه مشكله بسيطه فى تكنيك عمل الدفاع الجوى , انت فى اى سلاح تانى ممكن تدبر نفسك , وتختار بدائل , وتستفيد بسلاح نص كم , وتعمل تباديل وتوافيق , يعنى ممكن تلعب براحتك , ودة اللى استغليناة احسن استغلال فى حرب اكتوبر , الدفاع الجوى مشكلته انه مينفعش فيه الكلام دة , الدفاع الجوى فيه خيارين مالهمش تالت اما انك عندك دفاع جوى قوى , قادر , مسيطر , ميعديش هابوشه ,
اما انك معندكش , مافيش وسط ,
زى بالظبط سلك الناموس بتاع البلكونات , اما سليم , اما مخروم , ولو مخروم مش هتفرق خرم ضغير ولا كبير لان اى فتحه صغنونه هيخش منها الناموس ويملالك البيت ,
دى مشكله الدفاع الجوى , اما انه ميعديش النمله , واما انه يكون فااااشل , لان طيارة واحدة تعدى , يخلص الموضوع كله ويتم المراد , والدفاع الجوى مينفعش فيه التباديل والتوافيق لانه كله منظومه متكامله بتشتغل مع بعض كشبكه ضخمه , وانت معندكش التكنولوجيا انك تلعب فيها او تغير وتهندس , انت بس بتشتريها وبتتعلم ازاى تشغلها , زى البروسيسور كدة , لو حاجه فيه باظت بترميه وبتجيب غيرة ...

طيب كام سؤال عالماشى كدة :
هل مصر عندها نظام دفاع جوى قادر على ردع اسرائيل وامريكا بصواريخها البالستيه وقاذفات القنابل اللى بتطير على ارتفاعات شاهقه ؟ ولو عندها جابته منين ومين اداهولها ؟؟
وازاى امريكا واسرائيل تسمح بحاجه زى كدة ؟؟
لو كانوا دخلو مصر من وراهم , هل الامريكان واليهود اللى بيكتبوا يوميا تقارير عن الجيش المصرى نايمين على ودانهم ؟؟!!
وهل هما على قدر من الغباء انهم يخططوا المخطط دة كله وينسوا حاجه مهمه جدا زى كدة ؟؟؟
وجه منين اساسا اذا كانت مصربتعتمد اعتماد كلى فى التسليح على المعونه الامريكيه اللى اغلبها بيبقى صواميل ومفكات وشواكيش ومفاتيح انجليزى , ولو ادوك سلاح بيدهولك منزوع الدسم !!!!!!!

مش هجاوب , لان السؤال مجاوب نفسه , وانتوا كلكو عارفين , واللى مايشوفش من الغربال يبقى اعمى ....

9- طبعا لو الجيش ارغم انه يتدخل فى السودان , هل الجيش المصرى عندة القدرة والكفائه يقف فى وش امريكا ودلاديلها فى السودان ؟؟
لانه لو اتدخل مش هيواجه قبائل , دا هيواجه اللى ورا القبائل والمتمردين ,
والحكومه اللى مشفناش منها اى مرجله فى قضايا تمس اهم قواعد الامن القومى المصرى قبل كدة , اشمعنى هتسترجل فى دى ؟؟؟
هل ميليشيات البشمرجه ...اسف اقصد الجيش المصرى عندة التسليح الكافى والتدريب والاستعداد انه يخش حرب ؟؟؟
( طبعا مش هتكلم على انه يخش كحليف لامريكا زى حرب الخليج كدة ) لان دى وصفه سهله , وصفه هايله ,
طبعا لا لا لا لا ,
وانتوا عارفين كدة واللى يقول غير كدة يبقى بيكدب على نفسه ,
واللى فى الجيش عارف اكتر واكتر ( دا ان كان مقلعش مخه على باب الوحدة ) , وفى الاخر الحقيقه اكتر واكتر واكتر من كدة بكتيييييييييييييييييييييييييييييييييير.....................

10- طبعا الحكومه الذكيه , لو حصل اى حاجه , من غير كلام هيقولولك الموقف تحت السيطرة , والازمه لن تؤثر علينا , بعدها بساعه , هتلاقيهم كلهم متكومين فى مطار الماظه حسب الخطه الموضوعه , ومطار القاهرة ان امكن , وبسبوراتهم جاهزة والجنسيات الاجنبيه جاهزة وحسابات بنوك برة مستنياهم ......
طبعا الاعوان والكلاب والدلاديل اللى مش هيقدروا يسافروا , هيقلعوا اللبس الميرى ويندسوا فى وسط الجماهير ...
وفجاتا هتلاقوا الكل اختفى , فاكرين اللى حصل مع صدام , فيه كتاب اسمه ( لماذا يكرهوننا ) بيوصف الايام الاخيرة قبل دخول الامريكان بغداد وصف بديع ,
اقروة كويس , لان السيناريو دة شكله هيتكركر قريب ....

11- المنظمات الدوليه اللولبيه , انا عايز حد يعرف ربنا كدة يقولى الامم المنتحدة ومجلس القمل ومشكحه العلق الدوليه وغيرهم ,
يقولى دووووووولم عملوا ايه عدل من يوم ما اتعملوا ؟؟؟؟؟؟
اساسا المنظومه العبيطه دى عملتها الدول المنتصرة فى الحرب العالميه التانيه , علشان تحاكم هتلر واعوانه وتجزر رقابيهم بشكل حضارى شويه , وعلشان تقفلها على الغلابه اللى زينا , بدون اللجوء لحرب ولا يحزنون , وعلشان تديهم غطاء لكل الممارسات القذرة بتاعهم وتديهم شرعيه فى حروبهم ,
يعنى من الاخر مشيخه منصر على كبير قوى , كفايه عليهم الكلمتين دول , لان الموضوع اوضح من انه يتشرح ............

اخيرا بقى , فكروا زى مانتوا عايزين , بس اتحملوا نتيجه قرارتكم , انا عارف طبعا ان القرار مش بايدنا وان كل دة مجرد كلام , بس على الاقل نبقى عارفين ايه اللى بيحصل حوالينا , وعلشان منتاخدش على خوانه , احنا اة هنتاخد هنتاخد , بس يبقى على الاقل مش على خوانه , نبقى مستعدين ومجهزين المزفلطات .....

مشكله الشعب المصرى انه مر برتابه غير عاديه خلال التلاتين سنه اللى فاتوا , فدة خلاة مش قادر يتخيل ان الوضع ممكن يتقلب كليه مابين ليله والتانيه , مش قادر يستوعب دة , متخيل ان اى تغيير بسيط لازم يحصل فى عشرة عشرين سنه , انا مثلا واثق ان فيه ناس ضحكت واتهكمت على موضوع جفاف النيل والسد العالى واغراق البحر للدلتا , بس لو صحيوا فى يوم لقوا دة حصل فعلا , هيضحكوا برضه ؟؟؟؟
الشعب المصرى متدلع , اينعم الفقر واكله , ومبهدله , بس دى مش النقطه اللى اقصدها .........

شعب مثلا زى العراق وفلسطين , واخدين على الضرب والبهدله من سنين , تلاقى الصواريخ شغاله , والناس ماشيه فى الشارع ولا هيه هنا ,
احنا مش كدة ,
احنا مش متعودين على الكلام دة ....
دا لو دانه مدفع معفنه انضربت فى مصر الجديدة , سكان الزمالك هيعملوها على نفسهم ,
احنا مجربناش يعنى ايه ضرب ,
صوت المدفع اللى بتسمعوة فى التلفزيون دة مش صوته الحقيقى ,
انت متخيل يعنى ايه مدفع ينضرب على بعد كذا كيلو عن بيتك , تقوم موجه الضغط بتاعه , موجه الضغط بس , البيز يعنى , يكسر ازاز بيتك!!!! , طب دة الازاز امال ودانك هيحصل فيها ايه ؟؟؟؟
امال لو كنت جنب المدفع هتعمل ايه ؟؟
امال لو كان بيضربك انتا هيبقى ايه موقفك ؟؟

انتوا عارفين الفريق عبد المنعم رياض؟؟
هو مش مات من دانه مدفع ؟؟؟
الحقيقه انها مجتش فيه اساسا
دى جات بعيد عنه بمسافه
اللى موته هو موجه الضغط
الضغط بس فجر الرئتين بتوعه , خلاهم مهلبيه ......
دا مدفع , فما بالك بقذيفه , او صاروخ , او قنبله ارتجاجيه ؟؟؟؟

طبعا الرجاله بتوع مش عايزين حرب هيهيصوا , ويقولوا مش قلنالكوا من زمان الكلام بتاع (ويلات الحروب وابصر ايه ),
بس فيه نقطه , افرض الحرب اتفرضت عليك فى يوم ؟
افرض انت انضربت فى يوم ,
اة انضربت كدة ,
غتاته ,
افترا ,
بلطجه,
تلاكيك ,
ايه عمرها ما حصلت قبل كدة ؟؟؟؟؟
مش بتعملوا حساب نقطه زى دى ليييييه ؟؟؟؟

السلام مش خيار استراتيجى
ولا اته ولاجزر

سلام بدون قوة يبقى تهريييج ولعب عيال , تعقبه بالضرورة مصيبه وبلوة مسيحه ....
دى معادله ازليه ...

- الجبهه الداخليه ضعيفه جدااااا , اللى هى اهم حاجه فى الحرب , وانا واثق ان البلد دى لو انضربت بمضرب دبان , والناس جربت يعنى ايه موت ودم واشلاء وضرب صوته اقوى من الرعد مش بيبطل ليل ولا نهار , وازاى تعيش وانت مش عارف كمان دقيقه هتبقى حى ولا ميت , ويعنى ايه يعيشوا من غير ميه ولا كهربا ولا غاز ,
كوووول الناس اللى كانوا طالعين ينادوا (اصبح عندى الان بندقيه) , وبتوع التصريحات من فصيله ( قواتنا قادرة على مش عارف ايه ) , هيقولوا لف وارجع تانى , ايه البواخه دى , وهتلاقى مظاهرات بتنادى بالاستسلام التام او الموت الزؤام , احنا مش مستحملين البهدله دى , عايزين ناكل عيش ونتفرج عالمسلسل ......
الا من رحم ربك طبعا
احنا معدناش زى زمان , زى ايام عبد الناصر وايام اكتوبر ( ولو انى بكرة عبناصر والسادات )
احنا اتغيرنا قوى
اتعودنا عالذل والبهدله ونغمسها بالتراب , مش مهم , بس من غير مشاكل ....
اة احنا متعودين عليه من زمان
بس مش كدة
مش بالشكل دة
كنا متعودين عليه جوا البلد
دلوقتى بقى برة وجوا
مع الاسف لو الجبهه الخارجيه اتدمرت قيراط , فالجبهه الداخليه اتنيلت اربعه وعشرين .....

احنا استعدينا ليوم زى دة بأيه , ( ودة جاى على فكرة , مش بمزاجنا ) ,
استعدينا برنات الموبايل وشرايط المولد , والحشيش والبانجو , والترامدول والابتريل ؟؟؟؟
وبالشقق المفروشه والديسكوتك والركنه على المقطم وطريق المطار ؟؟؟؟

والله اهالى غزة دول جبال ,
لكم الله يا اهل غزة
لكم الله يا اهل غزة

والسياسيين الاشاوس بتوعنا , لسه واخدين بالهم من الخطر دلوقتى؟؟؟؟
كانوا فين من زمان؟؟؟ ما اللعب فى السودان بقاله سنين ....
ومضربوش البشير من الاول ووقفوة عند حدة وقالوله كدا كخ ليييييه ؟ مع انهم كانوا قادرين على كدة ....
جايين بعد ما تخرب؟؟؟
وبعدين هيقدروا على ايه اكتر من التضامن والشجب ؟؟؟؟!!!
هيخشوا بجيوشهم؟؟؟
ولا هيمنعوا البترول؟؟
ما احنا قولنا اللى فيها
وبعدين هيجيلهم عين يرفعوها فى اولياء نعمتهم؟؟؟
اللى مقعدينهم على كراسيهم
واجعص ظابط مخابرات فى السى اى ايه , قادر انه يقلش التخين فيهم فى يومين

بأمارة ايه طيب؟؟؟؟
حد يقولى...

من الاخر ,
البشير يتحاكم اة ,
وياخد بالبرطوشه كمان اةةةة ,
بس من شعبه ,
او منا كعرب على اقصى تقدير ....
انما من امريكا
لا
لا
لا

انا عارف انى اتكلمت عن مصر اكتر من السودان , بس دة لانى مش خبير فى الشئون السودانيه , فمش هفتى فى اللى معرفوش , واكتفيت بذكر اراء اهل السودان نفسها وبعدين قلت وجهه نظرى فى تاثير الاحداث على مصر اللى هى بلدى وحاسس باللى بيجرا فيها.....


عموما كل واحد يجهز خزانات الميه من دلوقتى ......

انا اسف عن كميه السواد اللى طرحتها فى البوست دة , بس بجد الصورة سودا قوى , وسياسه دفن الراس فى الرمل متنفعش ,
متنفعش خالص .....

انا اسف مرة تانيه