السبت، 28 مارس 2009

تعالى روق دماغك

_________________


اولا كدة وقبل كل حاجه

حزر فزر

مين الجعر اللى فى الصورة دة ؟؟؟


ثانيا اوعى تقفل الاغنيه اللى شغاله دى
لانها بتكمل البوست
ولو معجبتكش
او طلعت اساسا معندكش فكرة عنها
فغالبا مش هيعجبك البوست هو كمان .....
_______

مش عارف ليه كل مدى بتأكد ان الذاكرة البشريه مبتنساش موقف مرت بيه..
حتى وان اعتقدنا انه اتنسى واتمسح بتكون الحقيقه غير كدة , مجرد انه اترمى فى الريسيكل بن بتاع الذاكرة , بس مبيتعملوش ديليت , وممكن يتعمله ريستور تانى تحت ظروف معينه .
يعنى موجود , بس فى بدروم الذاكرة , او فى الصندرة , عارفينها ؟
اييييييييون الجزء الغامض فى البيت اللى محدش بيحس بيه ..
حاجه كدة مسميها نظريه الثقوب المنزليه السوداء
يعنى هتلاقى فى بيتكم اركان معينه وادراج مثلا متفتحتش من سنين واماكن احنا مش شاعرين بيها خاااالص , كأنها مش موجودة ...
بس ممكن فى لحظه تيجى تاخد بالك ,
ايه دة ؟
الدرج دة انا ناسيه من زماااان قوى , او الركن دة انا عمرى ما وقفت فيه , ياترى لما اقف فيه وابص لباقى الاودة , المنظر هيبقى عامل ازاى ؟؟
او الصندرة دى مطلعتهاش من سنه مش عارف كام ...
بس دة لا يمنع انها موجودة فعلا , بس احنا مش واخدين بالنا منها ...
بالظبط دة اللى بيحصل فى عقلنا , سواء كانت ذكريات سيئه جدا , فبننساها علشان متوجعناش , الا انها فى الحقيقه بتفضل موجودة وبتأثر على تصرفاتنا من غير ما نحس , او مثلا لو كانت ذكريات قديمه قوى , عمرها الافتراضى خلص واتكهنت فى اوضه فى بدروم ذاكرتك معشش عليها عينكبوت كبييييييير ..
ولو عملت ايه بالذى مش هتقدر تفتكرها , ولكن لو حصل حاجه تفكرك بيها او شفت شىء يتعلق بالحاجات دى , هتستفوجأ انها كلها مرسومه فى ذهنك بشكل فوتوغرافى مبهر ولا كأنك نسيت حاجه ( شوفتوا الاستهبال ) ....

علشان كدة احمد سعيد قال ( دا غير هانى نظيم ) ان مشكله الذاكرة البشريه هى مشكله القدرة على استدعاء المعلومات فى الوقت المطلوب , وليست مشكله نسيان على الاطلاق ....
ياما كنت عايز افتكر حاجه واضرب نفسى بالبرطوشه علشان افتكرها , ابدا ولا الهوا , بينما لما اجى انام مثلا الاقيها جت فى دماغى , بعد فوات الاوان طبعا , شوفتوا الغتاته ؟؟؟؟

طيب ايه موناسبه الكلام دة ؟
اقولكم
مين فيكم فاكر طفولته كويس ؟؟
طفولته يعنى قصدى اقدم ذكرياته لغايه اولى ابتدائى مثلا , يعنى ميجيش حد يقولى فاكر يوم ما اخدت الابتدائيه , انا قصدى على الحاجات اللى نسيتها سنين وحسيت انها جت فجأتا فى دماغك بدون سبب او رابط , يرافقها شعور غريب جدا زى شعورك بالظبط لما تلاقى حاجه عزيزة عليك كنت ناسيها فى نفس مكانها بعد عشرين سنه مثلا وتنفض من عليها كيلو تراب , والتراب يدخل فى صدرك وعنيك وهاتك يا عطس....

حد فاهم منى حاجه ؟؟؟

طيب انا هحاول اعمل زغزغه فكريه علشان افكركم ( طبعا بمرافقه زغزغه الاغنيه اللى شغاله دلوقتى , اوعوا تكونوا قفلتوها !!! )

ملحوظه : الكلام اللى جاى دة خاص بالجيل اللى قضى طفولته او مراهقته وشبابه فى التمانينيات او اواخر السبعينيات , يعنى مواليد 88 و 89 فصاعدا مش هيستفيدوا ولا هيفهموا حاجه من اغلب الكلام اللى جاى دة .....

طيب هتقولولى وانت مالك بااواخر السبعينيات يا جعر يامواليد 83 انت ؟؟؟
هقول لحضراتكم ,
لو تفتكروا زمان , مش زمان قوى يعنى , لحد عشرين سنه فاتوا كدة كان ايقاع الحياة بطىء , اقول بطىء وليس ممل , يعنى كان عادى جدا انك تسمع شريط نازل من عشر سنين كأنه لسه نازل النهاردة , والموضه كانت متبته ورخمه وبتقعد سنين علشان تتغير , وكدة يعنى...
يعنى ثقافه التيك اواى الفكرى اللى شغاله دلوقتى دى مكانتش موجودة ايامها ...
ولازم نفتكر شىء مهم , ان اهم واكثر 3حاجات عملوا انقلاب مجتمعى فى مصر ماكانوش موجودين اياميها , وهم الدش والكومبيوتر والموبيل .....
فدا يخلينى اقدر اخد شويه صور عن فترة تسبق طفولتى بشويه , مع انى ماعشتهاش بس اثارها وبقاياها فضلت موجودة وعشتها , ولما كان العبد لله ولله الحمد ذاكرته فوتوغرافيه , فيما يتعلق بالاحداث والاماكن , اما الاشخاص فبتنجانيه تماما , يعنى ممكن لو ابويا مشفتوش سنه وقابلته فى الشارع اقوله انت مين يا جدع انت ,
بجد على فكرة مش ببالغ ...
ومش هراعى الزمن يعنى هطلع من اواخر السبعينيات على التمانينيات فى وشك وانت داخل شمال بعد البنزينه علطول , وممكن يكون فيه لخبطه شويه فى الاحداث , فمش عايز حد غتت ييجى يقولى مش عارف ايه مكانش مش عارف ايه دا كان مش عارف ايه .
فهمتوا حاجه ؟؟
ولا انا

تعالوا شوفوا كدة معايا :
تبدا منين ياواد ياحكشه ؟؟؟؟ , نقول مثلا من اواخر السبعينيات
- انتفاضه الشعب ( مش الحراميه ) لسه ما اتنستش لغايه دلوقتى ولسه الناس فاكراها كأنها كانت حلم .
السادات ماسك البلد كشيخ منصر كبير , وبعد مشاكله مع اسرائيل وامريكا ماخلصت اتفرغ للبلد والشعب الوسخ علشان يعيد تربيته من جديد كشيخ بلد وكبير العيله...
قرارات عشوائيه , بل خياليه تطلع بين يوم وليله , ديكتاتوريه وقمع بس بالحداقه والنصب ( كله بالقانون وبسيادة القانون على رأى البيه ) , نكت كتير بتطلع عليه على شرب كبير العيله الحشيش والافيون , ماحدش عارف اذا كانت احداث حقيقيه ولا نكت بس .
جى جى هانم ممشيه البلد على كيفها تشيل فلان وتعين علان , دوله العلم والايمان فى قمه ازدهارها , موجه من الاسفاف والابتذال والغش طالت كل شىء فى مصر ( من توابع الانفتاح ) انتشرت السينما الاستهلاكيه ومنتجين اصلهم كفتجيه ( زى السوبكى كدة ) ...
شوارع مصر والاقاليم بصفه خاصه اصبحت خاويه على عروشها , شوارع كتير ممكن تلاقى عمارات وبيوت كامله فيها مقفوله , يعنى شارعنا مثلا كان مافيهوش اكتر من عشرين تلاتين اسرة بالكتير , والباقى كله خلع عالخليج , شقق وبلكونات وعينا عليها مقفوله واتصورت فى عقلنا كدة , وكان احساس غريب جدا لما لقيناها بتتفتح وبيتشال من عليها التراب لاول مرة فى فترة التسعينيات ...

اللبس , اةةةةةةةة وما ادراك ما اللبس , البس اللى يعجبك مع مراعاة الاتى :
اولا لازم تكون رجل بنطلونك اوسع من ميدان روكسى , وتكون ياقه القميص متفصله من 10 متر قماش على الاقل , وياسلام لو كانت من قماشه تانيه ولون تانى غير لون القميص ومالوش اى علاقه بيه , ولازم تكون الالوان فاقعه قوى ومتناقضه , يعنى تعمل حفله الوان فى هدومك , طبعا مش هوصيك على المشجر والمخطط , يعنى من الاخر كدة قلد سمير غانم فى افلام اواخر السبعينيات , طبعا كل ماسوالفك كانت اكبر واعرض كل ماكونت واد امور ومز , المثل الاعلى فى الموضوع دة , محمود ياسين طبعا , شعرك لازم يبقى منكوش ومكلكع كانه مقلب زباله بالظبط , اما الشنب فمش هوصيك , طبعا مش هننسى البلوفرات الصوف الكت ( مش عارف اسمها ايه ) ...

- الفن , طبعا كانت قصه شرايط الكاسيت لسه جديدة فى منتصف السبعينيات تقريبا , وكان اصدار شرايط كاسيت لمطرب يعتبر مخاطرة , طبعا عادا البومات فريد وام كلثوم وعبحليم بتاع شركه صوت القاهرة ذات الشعار الغبى , واللى كانت مغرقه البلد ساعتها , طلع عمك محمد منير بشريط , واتسك على قفاة سكه محترمه والشريط فشل , فبلط فى الخط ومظهرش تانى الا بعد فترة ....
بعدها بشويه جه مجموعه شباب وقرروا انهم يخوضوا التحدى , وكانت اسمائهم كالاتى : ايمان يونس ( اول صوت انثوى فى ذاكرة العبد لله ) , تحسين يلمظ , هانى شنودة , عمر جوهر .
وعمر جوهر دة اللى هوة عمر فتحى , المطرب اللى ظهر اياميها والناس حبته , بينما صب عليه النقاد جام غضبهم واتهموة انه بيدعى المرض علشان يقلد عبحليم ويكسب تعاطف الناس , ولكنه بعد فترة بسيطه مات فعلا ( بالقلب على ما اعتقد ) واتكتم الكل ....
الفريق دة اسمه المصريين , طبعا كلكم عارفينه
القدام عارفينه من اغانى الشوارع حواديت وماما ستو وفى يوم 8ديسمبر من عام ( 1977)
والجداد عارفينه برضه من اغنيه ماشيه السنيورة 1985
الشريط الاولانى اللى هو (بحبك لا ) , كسر الدنيا ونجح نجاح هايل , ودى كانت البدايه لغزو عالم شرائط الكاسيت , وطبعا من باب التأمين والضمان كانت الاغلبيه العظمى من المطربين اللى جم بعد كدة بتفضل تكوين فرق كامله بدلا من تجربه البوم المطرب الواحد الفاشله اللى اتلسع منها اونكل منير ...
وظهر فرق زى الاصدقاء وفرقه محمد نوح ( مش فاكر اسمها ) وغيرهم كتير..

طبعا كانت البضاعه اليابانى مغرقه البلد , يابانى على اصله , مش صينى , مكانش فى حاجه اسمها صينى وتايوانى وابصر ايه , عادا اطقم السفرة بس , فاكرين كاسيت الناشيونال الشهير , ابو واجهه بيج وسماعتين سود , اللى كان تقريبا فى كل بيت , حاجه محترمه ومافيهاش حته بلاستيك واحدة عادا الوش ....

- المشروع الاستثمارى الناجح والاشهر هو محلات الالكترونيات , انتشرت انتشار غريب , دايما نفس الهيئه , محل صغير مجهول الملامح , ذو واجهه زجاجيه صغيرة ومتسخه للغايه , مترصص بداخله اكوام من النفايات الالكترونيه التى توحى انها كانت اجهزة فى يوم من الايام , بنك عريض مليان قطع غيار ومفكات وافوميتر ضخم , الصفه الوحيدة ان كل حاجه بتبقى وسخه وعليها تراب ومتعاصه شحم , مش عارف ليه ..
- صاحبنا غالبا بيبقى كفتجى ومقضيها بالدراع والفهلوة ولا بيفهم فى حاجه , وبيتعلم فى حاجات الناس , وتلاقيه لابس نضارة وشايل شنطه وسخه جدا ومربطه بخيط او بحبل , دى اللى هيا شنطه العدة , اما عن الاختصاص فحدث ولا حرج , كاسيتات ورداوى ماشى , تليفزيون شغال , غساله خلاط سخان بوتجاز ينفع برضه , ماهى فهلوة بقى ..

اصل الاجهزة اياميها كانت بسيطه وسهله وحجمها ضخم , وغالبا اول لما بتشوف صاحبنا بتحترم نفسها وتشتغل تلقائيا , بدل الفتح واللعب والبهدله , الطيب احسن .

- الفيديو كان لسه حاجه جديدة لا توجد الا فى بيوت عليه القوم , حاجه كدة بالالافات , جهاز ضخم وتقيل , كله حديد فى حديد , يابانى طبعا , مليان زرارير كتييير , الشريط مش بيدخل فى فتحه زى محنا عارفين , لا دا ليه باب بيتفتح ويتحط فيه الشريط تمام زى شريط الكاسيت , وكان يشغل اوسخها شريط , حتى لو حطيت البكرتين بس من غير علبه , هيشتغل برضه , يابانى بقى , وطبعا برضه الماركه المعتمدة اللى هى ناشونال , ناشونال بس من غير باناسونيك ( قبل الدمج يعنى )..

- طبعا المشروع التانى الناجح هوا مشروع نوادى الفيديو , افتح اى كشك تحت بير اى سلم وسميه حكايه مثلا او اى اسم شاعرى او حتى غبى مش مهم ..
مش هوصيك على الافلام الهندى , دى المادة الاساسيه او قل الوحيدة , بجانب المصارعه , ولو انت زبون قديم ومظبط الباشمهندس , مافيش مانع ياخدك ويفتحلك درج كدة مستخبى فى الجنب , ويخبطك شريط من اللى قلبك يحبهم , بتوع سيدة الاقمار السوداء , ولا ذئاب لا تاكل اللحم , ولو انتا سافل قوى يبقى مش خسارة فيك هويدا والرسام ( من كلاسيكيات السينما اللبنانيه ) , وعيش بقى يامعلم , بس خلى بالك لحسن الحاج يقفشك وياخد منك الشريط , اة اصل الشرايط غاليه قوى , وهتدفع عوض مبلغ محترم , دا غير انك هتنكرش ومش هيتعامل معاك تانى , وحلنى بقى على ما تظبط صاحب نادى فيديو جديد ويثق فيك ...

- نيجى بقى على التلفزيون وسنينه , الحاجه الوحيدة اللى كانت بتجمع مصر كلها , طبعا مافيش دش , ولا قنوات اقليميه , اخرك الاولى والتانيه , الاولى شغاله افلام عربى ومسلسلات ونشرات اخبار , والتانيه مقضياها افلام اجنبى ومسلسلات وعالم البحار ( قصدى عالم البخار ).
ناخدها كدة واحدة واحدة , فاكرين مسلسل ميزو ؟
ايون بتاع مييييييييييييييييييييييييييييييييييزوووووو ,
هو دة
- وبرج الحظ بتاع شرارة , ودخلنا بعدها فى موضه مسلسلات حسن عابدين ايام عزة ,
- فاكرين مسلسل ( فيه حاجه غلط ) بتاع الكائنات الفضائيه ..
- وبعدها فاكرين مسلسل عيله الدوغرى ,
- ابو العلا البشرى ,
- وفى المشمش ( هما اللى قالولى ) ,
- احلام الفتى الطاير ( ابراهيم الطاير ) الشهير بعادل امام ,
- ليالى الحلميه الجزء الاول ايام ماكان يحيى الفخرانى وصلاح السعدنى لسه عيال صغيرة بيجروا ورا بعض بالطرابيش فى عزبه الباشا ...

نخش على المسلسلات الاجنبى , نوتس لاندنج , ميردر شيروت ,
ثم المسلسل الاغتت فى التاريخ ذابولد اند ذابيوتيفل ....

واذا ذكرت المسلسلات الاجنبى كان ولا بد ذكر برنامج اخترنا لسيادتك مساء الاربعاء على القناة التانيه , يبدأ بشويه اغانى من بتوع البونى ام والدولى دوتس , فاكرينهم , ايون (البونى ام) مش (الفور ام ), والدولى دوتس شويه البنات الطوال اللى شعرهم اصفر ولابسين لبس دهبى , ربنا مباركلهم عالاخر( مزز مزز الصراحه ) , فاكرين اغنيه ( ليلى ) اللى كانوا عاملينها واللى كانت مسمعه جامد فى مصر , وصاحبنا اياه اللى ادعى انهم سارقين اللحن منه .
بعد كدة يفقعوك فقرة من فقرات الساحر اللوذعى ديفيد كوبر فيلد , اممممممممم ممكن مثلا النهاردة بنط فى فرن صهر حديد او يخترق سور الصين العظيم , او يخفى مكوك فضاء , او يخلى مصر بلد ديموقراطى ,
هههههههه صعبه دى شويه , مش كدة ؟
خلاص فككم من اخر نقطه , بلاها ناديه بلاها سوسو , احسن بعدين يهود خيبر يزعلوا .
ونختم البرنامج مع حلقه من المسلسل الشهير ماجيفر , الواد الكفتجى اللى يخترع ويهندس حاجات غريبه فى الوقت المناسب , بأم القصه اللى نازله على عنيه ,
وطبعا لا ننسى المهمه الصعبه فى اجزائها الاولى , شويه الشباب السيس والبنات المزز والراجل الكبارة ابو شعر ابيض اياة , اللى بيطلعلهم فى الجهاز الصغير اللى بيلاقوة متخبى تحت الترابيزة رقم 56 فى النادى , ويقولهم :
قوقه ابو برقوقه , ديكتاتور فى احدى دول العالم الثالث , استولى على الحكم وقتل الملك بشطورش ورمى ابنه ولى العهد فى سجن تحت الارض فى مكان مجهول فى قارة اسيا , مهمتكم لسع قوقه بالمعلقه السخنه فى منطقه حساسه واطلاق سراح ابن الملك بشطورش واعادة عرشه اليه .
هذا الجهاز سوف يفجر نفسه تلقائيا بعد عشر سنين , تشششششششششششششش , بووووووم .

- البرنامج الاشهر اوسكار يوم الخميس بالليل , والفيلم الاثرى اللى هيجيبوه لنا النهاردة هوة فيلم كزابلانكا مثلا , او ذهب مع الريح وهيكمل نص الفيلم التانى الحلقه اللى جايه طبعا , او مدافع نافارون , او الهروب الكبير , او احد افلام المبدع هتشكوك , سيكو مثلا او النافذة , يخنق اهلك نص ساعه فى احداث ممله لحد ما يزهقك ويخليك تنام ويقوم خابطك الرعب على حين غرة ...
ما فيش مانع برضه من بعض افلام نورمان ويسدم ( اللى كان بيقلدة ممثل مصرى شهير للغايه ) ..

وعلى اى حال ممكن الفيلم لو مجاش يوم الخميس تشوفوة يوم الجمعه الساعه 3وعشرة العصر على القناة التانيه بعد موجز الانباء اياة ...

- برنامج باروراما فرنسيه بتاع المذيعه الامورة اللى مش فاكر اسمها ( اصلى اياميها عينى كانت زايغه قوى ) والفيلم الفرنساوى السخيف المعتاد ....

- لازم اصحى يوم الجمعه الصبح علشان اشوف سينما الاطفال الساعه عشرة وتلت على القناة التانيه
سينما الاطفال سينما , سينما الاطفال سينما , فيها حقيقه وفيها خياااااااااااااال , سينما الاطفااااااااااااااااال .
واذا ذكر الاطفال ذكر كارتون جرندايزر بتاع يوفو غزاة الفضاء ,
- وحبيب قلبى مازنجر , يطلع ابو الغضب بالعبايه السودا اياها والعصايه الابنوس ويلعن سلسفيل ابو المزدوج الفاشل , ايووة اللى نصه راجل ونصه ست ولابس زعبوط ازرق , وحاضر معاليك انا هنسفلك ماهر دة , يطلع الوحش الجديد وتحت منه كتابه يابانى طبعا مافيش اى حد فاهمها , ويشرح فى مواصفاته من انه بيعوم فى البحر ويحفر بطن الارض ويطير فى السما ويعمل اعاصير وزوابع ويختفى كمان , وكالعادة تبدأ المواجهه ما بينه وبين فاتن وهى راكبه افروديت , الاله المفتكسه اياها اللى بتضرب الصاروخين السيلكون اللى حيلتها وبعدين يمرمط بيها الوحش الارض كالعادة برضه انتظارا لمجىء مازنجر علشان ينقذها ويدمر الوحش ....
حمام السباحه ينفتح وينزل ماهر بالطيارة الحمرا فى راس مازنجر ويبدأ فى التحرك ,
دج , دج , دج , دج , دا صوت رجليه وهو ماشى بيرج الارض , وطبعا بعد خناقه محترمه مع الوحش , يرزعه بالقبضتين المدمرتين وبعدين الاشعه بتاع عينه ويخلص عليه خالص بالاشعه البنفسجيه اللى طالعه من صدرة ..

مازنجر , مازنجر ,
البطل الشجااااااااااع ,
بقواة الجبارة يحارب الاعداااااء ,
مازنجر يحارب فى البر او فى المااااااااااء ,
اطلق الصاروووووووووووووخ ,
لقد حااااااان الوقت , قد بدأ النهااار , تهيأ , تحضر لاطلااااق النااااااااااار ,
مازنجااااااااااار زد .....

طيب , فاكرين دة :
كعبول كعبول الكلب الكسول ,
يدفع عبقرينو المخترع المشغول ,
القط المشاكس القط المشاكس, من يهوى الدسائس , من يضع المقالب ,
معنا باستمرار فى هذة الحلقات , يدعون الصغار فى كل الاوقات ,
هيا يا اصحاب , هيا مع كعبول , نجتاز الصعاب , نتحدى المشاكل ....

اخر مسلسل كارتونى تابعته قبل ما اتفطم كارتونيا واكتفى بتوم وجيرى وقرايه ميكى وسمير , كان مسلسل بابار ,
بابار فيل , خرطومه طويل ..
فاكرينه ؟؟
اللى امه قتلها صياد وهو صغير , وقعد طول عمرة يحكى لاولادة مغامراته مع ملك الخراتيت .

بعدها دخلت موضه مسلسلات الكارتون العاميه , بزعم من واحد معتوة ومتخلف عقليا من رجاله موافى قرن التيس , قال ان مسلسلات الكارتون لما بتكون بالفصحى الاطفال بيتدايقوا منها ومش بيفهموا حاجه !!!!!
وبدأت بكارتون الفواكة وبعدين شاركى الدرفيل .....

- ندخل على الاعلانات , وانا متوصاش فيها لانها كانت بتتسجل على شرايط وتتذاع بالترتيب , فالمتابعين اللى زيى كدة كانوا بيعرفو ايه الاعلان اللى عليه الدور , دا غير انها كانت اعلانات لذيذة ومرحه , يعنى ممكن تتابعها لوحدها مش ممله وسخيفه زى بتوع 199 جنيه مصاريف شحن واشترى اللبيسه الذكيه اللى تدخل الجزمه فى رجلك لوحدها ....
طيب ركزوا معايا كدة فى اللى جاى دة :
كنت فاكر واحدة قليييييييطه قوى , كانت بتعلن عن مطهر تواليت ومعطر باين مش فاكر , كانت تيجى بكل الاطه وتقول :
- اننننننننننننا , احط ايدى فى التوالييييييييت !!!!!!
وواحد تانيه كنت بحس انها مريضه نفسيا , كانت تيجى تقول :
- تخلللللللللص من حمامك القدييييم , انننننسف , بوووووم , لقد حان الوقت , لجرافيييييينا ...

- الراجل ابو فانله وكرش كبير وشنب اياة بتاع قبنورى
القبنورى المونيوم ,
اطلب منه بالتليفون ,
القبنورى بييجى فى يوم , بقى بالتقسيط , تقسيط تقسيط ,
القبنورى سبع الوان , احمر ازرق فضى كمان ,
بقى بالالوان , الان الوان الان الوان ....

بقولك هيجوزونى
وفيها ايه يعنى
انا برضه هتجووووز ؟؟
انا مش شااااايف بروبليم
واجيب جهازى منييييييييين ؟
ماعندك جهاز العروسين
عبد الرحيم عمرو , اذن احتكم الامر


بودى بودى بودى , بودى بودى ,
بودى بودى بودى , بوووووودى ,
بودى بودى بودى بودى فستانى مالعبوووودى ,
بودى الفستان والطرحه , بوووودى على احدث صيحه ,
بوووودى والكل قالولى اصل اللؤلؤ واللولى ,
حلوةةةةةةةةة , عروسه العبودى....

يام جمال حلو المش عارف ايه , يام الشعر طويل مش عارف ايه , حنى جمالك حنى مش عارف ايه نورك تاجك كاالوراق ( حد فاهم حاجه ؟ ) حنه الشعر خمس خمسات , وتلاقى مشهد واحدة راكبه حصان وشعرها بيجرجر فى الارض ...

نرجع ورا شويه ايام ماكانت شويبس مغرقه الدنيا , قبل ما تقفل وتفتح تانى مؤخرا , اعلانات سر شويبس بتاع حسن عابدين اللى عمر ما حد عرف السر دة ايه :

عمك حسن لابس البدله الحمرا بتاع الحرس الانجليزى وبيقول :
الجماعه دول محرضين عليهم انهم يرمشوا , بس انا هعرف اخليه ينطق , ويقوم مورى اللى جنبه قزازة الشويبس اياها , ويخش صوت المعلق : عجبا , فواكه طبيعيه محتفظه بثراء من البقاليل المنعشه , ويقوم عم حسن يقول , ولما لقيت مافيش فايدة , قلت اقوله نكته من بتوعنا ( ايام لما كنا لسه بنقول نكت ) فيقع الحارس بجوارة على الارض من كتر الضحك ....

فى واحدة تانيه :
عزيزى الدوق
نعامين
انى اشتاق لهذا المشرووووب الذى يحتوى على البقاليل المنعشه
اشربى يا مرجريت واروى عطشكى وخبرينى عما تشعرين به
مارجريت
افصحى لى عن سر شويبس يامرجريت
انى اتوسل اليكى

واحدة تالته :
حسن بيييبى
ياعيون حسن بيييبى
مش هاتقوليلنا على السر بقى يا سوووو؟؟؟
بلاش كدة يا سوووو
علشان خاطرى ياسوووو

الله يرحمه

- اعلانات بطاطين ساراتوجا فى الشتا ( ايام لما كانت الدنيا بتشتى فى الشتا ) واعلانات الواد كان عنده حق , عارافه الجاااااااااااااااااامع .....

افتكرت كمان اغنيه ابريق الشاى
انا انا انا , ابريق الشااااى , ايدى كدة بوزى كدة اصب الشاى , وارجع كدة , واعرف برضه ياكتاكيت احكى حوادييييييييت ...

وفيه برضه اغنيه حافظها من ساعتها , طبعا حافظها غلط , بس انا كنت بسمعها اياميها كدة ( ومازلت ) :
بولا بولا باروم بله , ادينى سفايه وارمى الفله , بولا بولاااااااااااااااا , باروم بله ..
بيتك ياعصفورة وييييييييين , مابشوفك غير بتطيرى , ما عندك غير جناحيييين حاكى له كلمه صغيرة , لو سئلونا بتقيله , ما حكتنا العصفورة , طيرى طيرىىىىىىىىىىىىى , يا عصفورة .

- شرايط الاطفال بتاع عفاف راضى , سوسه سوسه , ويلا بينا ياله ياله يلاااااا يلا بينا , كنت بحب الاغانى دى قوى بس كنت بخاف من البوستر اللى على الشريط , كنت بترعب وبعيط كمان , مش عارف ليه كنت بخاف من اى صورة مرسومه وبعيط , ابويا صحى فى يوم لقى الشريط وملقاش العلبه , وطبعا ماحدش يعرف مصير العلبه بعد ربنا غيرى , ههههههههههههههه ....

- فاكر عمو عوكل ايام ماكان لسه بيلبس بدل صيفى غزل المحله ( بتاع التمانينيات ) قبل ما ينضف ويلبس بدل , وفاكرين طبعا اللبس الفلح اللى مراته كانت بتلبسه ( ومازالت ) , وقلق الامن المركزى , وحزء التجول , بس بصراحه انا كنت فرحان قوى ان الشوارع فاضيه ......
طبعا مصر كانت حاجه تانيه ...
كفايه انه فكرة الكبارى كانت فكرة جديدة والميكروباصات كمان مكانلهاش وجود , بس التاكسى المهكع واتوبيس النقل العام الازرق .
تخيل مصر بدون كبارى او مترو انفاق او ميكروباصات , ولاحظ ان مش اى حد يبقى صاحب عربيه ملاكى , لان الناس اللى كانوا فى الخليج مكانوش لسه رجعوا , يعنى علشان يبقى عنك عربيه كان لازم تبقى ابن باشا او اقطاعى قديم .....
يعنى البلد كانت روقااااااااااااااااااااااااان ( نسبيا طبعا )...

امشى فى اى حته فى الشارع تسمع سمير الاسكندرانى ( العميل المزدوج ) بيجعر فى كل قهوة وعند كل حلاق , مش عارف ليه صراحه , بفرقته العجيبه ذات العبايات البيضا , بيفكرونى ببتوع الزار , وهو الصراحه كان مميز , كان بيميز نفسه بالعبايه البنى والسكسوكه السودا اللى فيها خط ابيض بالطول من النص ....

الرياضه المميزة كانت لعب البلى (الطزازيظ ) والكورة , الطيارات كانت فيلم وفن معقد للغايه ولها قواعد واصول , ان شاء الله هبقى اعملها بوست لوحدها ( على اعتبار انى كنت طيار قديم وفخم ( بكسر الفاء والخاء) ونفسى ارجع تانى , بس خايف الناس تضحك عليا وتقول العبيط اهو ) .
- لعبه الاتارى مشروع ناجح برضه , تروح عند الواد زيكه الفاشل فى الكشك اللى هو عامله وناصب قدامه معدات الاتارى الضخمه اياها والدراع الاسود الكبير اللى دايما يبوظ , وانت وشطارتك , تلعب القلعه ولا طيارات ولا علاء الدين ...

افتكر ان الحاج سخنت فى دماغه مرة وجاب لنا كومبيوتر
حاجه كدة ملهاش علاقه ببتاع دلوقتى
كومبيوتر اسمه صخر!!!
الجهاز عبارة عن كيبورد بس ,
الشاشه ملهاش وجود لان انت بتوصله بالتلفزيون ,
اما الالعاب بتبقى متسجله على شريط كاسيت , اة كاسيت حتى ساعات كنا بنمسحها ونسجل عليها اغانى من اذاعه البرنامج الموسيقى , او البرنامج الاوروبى .
وفيه جهاز زى الكاسيت بالظبط بنحط الشريط فيه ونوصله بالكبيبورد وندخل المعلومات ونستناة نص ساعه يحمل
وبعدين اللعبه تشتغل , قمه التكنولوجيا ....

كنت برضه افتكر برنامج اسمه تكنولوجيا كان بييجى بتاع واحد مهندس مش فاكرة , وحيث انى كانت ميولى علميه قبل ما اتصدم بمنهج الكميا والاحياء والفسيا بعد ما كبرت واقلب ادبى , فكنت من متابعين البرنامج دة , اذكر انه اتكلم على كوابل الالياف الضوئيه ( الفيبر ) قبل ما تدخل مصر باكتر من عشر سنين ,
عمار يا مصر!!!! ....

المصايف , طبعا مافيش حاجه اسمها البحر الاحمر ولا شرم ,
الغردقه ممكن , بس دى بتاع السياح المعفنين بس
احنا بنروح عروس البحر الابيض
ايه ؟؟
اسكندريه ؟؟؟
لأ طبعا
راس البر, وما ادراك ما راس البر, بتاع عليه القوم , ممكن تروحوا بلطيم او جمصه , بس اسكندريه مش قد كدة
راس البر كانت امله
تروح تحجزلك عشة او بيت دور واحد , اعلى بيت كان دورين وبسلم خارجى ...
ولو قعدت على بعد عشرة كيلو من البحر برضه هتشوفه قدامك .
البلد فاضيه وكلها رمل ومافيهاش غير شارع متسفلت واحد , اللى هو الشارع الرئيسى .
وراااايقه ( ماكانوش السواقين لسه عرفوا مكانها ) وكانوا سواقين الميكروباص لسه مدخلوش حيز الوجود علشان ياخدو الوليه والعيال والتباع ووابور الجاز وفردة الكاوتش القديمه بتاع الميكروباص ويروحو بالميكروباص يوقفوة على البحر ويتصوروا جنبه وبعدين يعلقوا الصورة على ضهر مسند الراس بتاع الكرسى السواق ...
هما مرتين بس رحتها , مصيفتش بعدها نوهائى , مرة سنه 86 ومرة سنه 88 , ودى تهت فيها ولاقونى بمعجزة ..
ودى كانت اخر مرة اشوف فيها حاجه اسمها بحر
( طبعا باستثناء سفرى اسكندريه , شغل مش مصيف , بعدى من جنبه كدة ) ....

الاغانى يامعلم :
- عمرو دياب لسه جعر وشعرة منكوش ولبسه زباله , قبل ما ينضف , بس كانت اغانيه جامدة برضه , وسميرة سعيد مطربه الاجيال مبترحمش من يومها , ونجم الشباب على حميدة باغنيته اللولبيه اللى كسرت الدنيا وخلت المنتج يتجنن ويخش السرايا من كتر الارباح , دة كان على حميدة قبل الفضيحه اياها , من الاخر فى اى حته هتسمع الاغانى دى :
- لولاااااااااااكى لولا لولا لولا

- ارجوك اوعا تغير , دنا حواليه كتيييير

عمنا حميد الشاعرى مكسر الدنيا :
- انا قلبى طاير فى سماااكى اة ياليلى ياعيييين

- طبعا غريب , غرييييب غريييب , ومحيرنى , ليلى ونهارى مسهرنى .
وطبعا طنط منى عبد الغنى :
- مش حلو خصامك ولا كتر سلامك , ماتحن شويه , دا الهوا حنيه .
اونكل منير كان حفظ مكانه واترستق من فترة ...

والواد الرخم بتاع ططش ططش وود , دا جمالك فرى فرى جود ..
-انا بحبك وغيرك انتا نو بدى , تهجرنى ليه وتحب بعدى سم بدى .
ببدلته الصفرا الشهيرة
المطرب ابو دقن الشهير ب ( حسام حسنى )
مش عارف بيفكرنى بالحلاق اللى كان بيجزلى الفروة زمان ....

الراديو بقى حبيب قلبى
برنامج قطوف الادب من نوادر العرب بموسيقاة المميزة
برنامج ابله فضيله , ياولاد ياولااااااد , تيت تيت تيييييت , تعالوا تعالوا
مسلسل عجبى بتاع حسن عابدين
قااااااااال الفليسوف ( اة الفليسوف حد عندة اعتراض؟ )

برنامج 150150 مش عارف كام اذاعه
بتاع الفزورة
حلها تكسب جايزة ماديه ضخمممممه
قدرها ,
خمسووووووون جنيها
ياترى مين اللى سرق خزنه الشركه ؟؟؟
عم عبدة الفراش؟؟
ولا الاستاذ متولى الصراف ؟
ولا الباشمهندس حمقه صاحب الشركه علشان ياخد التأمين ؟؟؟
وفى النهايه تكتشف ان المخرج هو اللى سرق الخزنه !!!!

- وحيث انى كنت بحب الفضايح , قبل ما ربنا يتوب عليا
واذا ذكرت الفضايح
ذكر برنامج اعترافاااااااات ليليه
البنت تحكى قصه الواد اللى غرغر بيها
وابوها يطلع بالصدفه بيسمع الراديو فى الاودة اللى جنبها
ويكتشف ان اللى بتتكلم دى بنته
يجرى على المطبخ يجيب السكينه
ويروح علشان يدبح بنته وهى بتتكلم فى التليفون على الهوا
والام من ناحيه والمذيعه من الناحيه التانيه يسلكوا من عندهم
والمستمعين يبرقوا ويزبهلوا
لغايه ما امام مسجد اتصل بالمحطه ومسح بيهم الارض على الهوا
وقالهم ان دة حرام وفيه جهر بالسوء
واتلغى البرنامج من يوميها
بلا اسامه منير بلا نيله
البرنامج دة كان التوب ....

اممممممممممممممم

انا حاسس انى طولت قوى

معلش اصلى كنت فى حاله شلل كتابى بقالى فترة
واول لما ربنا فرجها نسيت نفسى فى الكتابه

بالظبط زى البهيمه كدا لما تحبسها فى الزريبه وبعدين تطلقها تطلع تجرى وتبرطع
( دا البهيمه يعنى )..

كفايه كدا بقى

فيه كمان لو عايزين على فكرة .......