الأربعاء، 8 أبريل، 2009

حدث فى ابريل



بسم الله الرحمن الرحيم

مش عارف حاسس ليه ان البوست دة صعب قوى
مع ان موضوعه واحد الا ان الكلام فيه كتييييييييييير
وانا بصراحه كنت ناوى اعمله سلسله بعد لما اخلص سلسله اليهود اللى فاضل فيها حوالى 3 بوستات
بس وجدت ان الانتظار مش مريح نفسيا
وراسى عماله تودى وتجيب , والافكار شغاله على ودنه
ونا عارف الدماغ دى
لو ممسكتهاش وفرغت اللى فيها فى ساعتها واستنيت
غالبا لما تيجى تحب تكتب عنها بعد كدة
هتلاقى العصفورة طارت
لذلك قلت انه من الافضل انى ابع ( بضم الباء ) دلوقت ....

البوست هيبقى طويل بغباء
فاذا كنت من هواة تصفح السطور الاولى وترك الباقى وتكوين فكرة
فانصحك متكملش البوست
لانك هتوجع دماغك على الفاضى ومش هتفهم حاجه , او هتفهم غلط على احسن تقدير
او هتوجع دماغى انا لو علقت لانك هتتكلم غلط على حاجات انا مقصدهاش ....
اتفقنا ؟؟؟؟

طيب لو انت كملت وقريت ما اكتبه حاليا , يبقى افترض انك مش من النوع دة ,
قبل كل حاجه احب اعتذر مقدما لان الافكار مش هتبقى مترابطه والمواضيع هتخش فى بعضها ,
لانى مافياش دماغ حاليا اجيب ورقه واحدد عناصر مواضيع وارتبها وبعدين اكتب عنها بعد كدة , فمعلش استحملونى وركزوا معايا شويه ...

اضراب 6 ابريل 2009
من الاخر ومن غير زعل وبدون ما نشتغل نفسنا
الاضراب فشل ودة كان متوقع
فيه ناس طبعا كانت شغاله فى هجمه احباط من قبل الاضراب ونازله تثبيط فى الهمم .
كانوا بيقولوا :
مالوش لازمه
الناس هتتبهدل
دى اجندة خارجيه لهدم البلد
لعب عيال
مافيش داعى او حافز زى السنه اللى فاتت
الداخليه اتعلمت ومش هتغلط غلطه المحله
الاحزاب والاخوان هيخلعوا كالعادة
مافيش فايدة , ومبارك قاااعد
طب ما نستناه لما يموت احسن بدل سفك الدم والبهدله
ياعم خلينا ناكل عيش احنا مش قد الداخليه , ازاى شويه بشر هيقاوموا سلاح وقنابل الامن المركزى ....

طيب

اعتقد كدة انى قلت كل الاسباب اللى اتعارض على حسها الاضراب

اوكيشن

باعتبار انى كنت فى المحله السنه اللى فاتت ايام الاضراب وشفت الفيلم الهندى اللى حصل , هحكى السيناريو اللى تم الاول وبعدين اتكلم فى اللى حصل السنادى وأرد على الهرتله اللى فوق دى ...

ابريل 2008
اول ميزة حصلت ان فكرة الاضراب خرجت برة النت
ودة كان اول سبب للنجاح
ليه ؟؟؟
لان اغلب الشعب المصرى مش بيخش على النت
واللى بيخش عليه بيخش علشان السكس او الافلام او الاغانى
باقى فئه قليله , دول اللى بيتعاملوا مع النت لاسباب نافعه
اللى هما فئه المثقفين ( مش شرط قوى يعنى , ممكن نقول اللى مستواهم الثقافى معقول )
وكتير منهم من طلبه الجامعات
طيب

بصراحه كدة
لا دول ولا دول عندهم الكفائه لتغيير النظام
لان المثقفين عادة دورهم التوجيه
وكمان هما قله
ومنتشرين فى كل مكان
وعادة لا درايه لهم باساليب ولا بفلسفه القوى الامنيه
فاقصى حاجه ممكن يعملوها انهم يوجهوا الجماهير
وممكن يتزعموهم , دا ان ماكانوش من اخوانا الكلامنجيه , بتوع بق وبس ( طق حنك يعنى ) ....
وممكن يفرقوهم ويشوشوا عليهم ويقلبوا الحق باطل والباطل حق , لو كانوا من دلاديل فاروق حسنى ولا من خنازير احزاب المعارضه ( اللى بيسموا نفسهم رموز ) وفى الواقع هما احذيه للنظام ...
دول ممكن نطلق عليهم فئه ( علشان ما نعلا ونعلا ونعلا , لازم نطاطى نطاطى نطااااااطى )

جميييييييييييل خالص
نتكلم عن عقليه الفئه الاولى
اللى هما المثقفين المخلصين
دول اما دماغهم بتبقى لاسعه للاسف وتفكيرهم مشوش او خااااطىء , وحتى ان كان صح بيكون غريب جدا وغير مستوعب او مقبول من العقليه المصريه , كما ان تفكيرهم عادة بيكون منفصل تماما عن الواقع , تحس انهم سياح او اجانب او بيتكلموا على شعب تانى , تحس انهم جايين من المريخ , ودة بيفصلهم عن الشارع وبيخسرهم كتيييير جدا , كما ان فئه كبيرة منهم بتنجح امريكا على وجه الخصوص فى استيعابهم وتبنيهم , ودى فى حد ذاتها مش مشكله , بس المشكله فى الاجندة الامريكيه نفسها , ودى هتكلم عنها بعدين ...

الفئه التانيه بتاع المنافقين
دول عادة دماغهم واحدة
وغالبا بتكون حياتهم ماشيه كالاتى
اسرة فقيرة وعلى قد حالها بتنمى فى الاخ عقدة نقص ورغبه فى الصعود للقمه باى وسيله ( طبعا لانه اصلا انسان زباله )
بتبدأ حياته العمليه فى الجامعه
يبدأ فى الاتصال بجهات امنيه وعرض خدماته , او هما بيجندوة متفرقش كتير
وطبعا التقارير فى زمايله الاخوانجيه وغيرهم بتشتغل على ودنه....
الكلام دة من زمااان شغال , من ايام التنظيم الطليعى ( بتاع الجيل الصاااااعد , الى الهاويه يعنى )
طبعا بيرستق نفسه كخادم مطيع للجهاز الامنى اللى هو بيعبر عن النظام , وبيكون المقابل عادة من خلال تسهيلات وظيفيه زى شغلانه كويسه بعد التخرج , او زقه امنيه فى مجال التدريس الجامعى , تمهيدا لان يكون استاذ كلب يعلم تلامذته الجبن والخيانه ويفتن عليهم كمان , ومين عارف ممكن يكون رئيس جامعه , او يلاقى مكان فاضى فى اى تشكيل وزارى فى غفله من الزمن , وبكدة يكون خرج من عنق الزجاجه , وضمن الرفاهيه لثلاثه اجيال من نسله على الاقل ( دا على حسب ظنه )...
والنوعيات دى عادة مفضله جدا للنظام الحالى لتوافر الصفات الاتيه فيه :
- طموحه محدود
- يعنى مش هيتخطى الخطوط الحمراء ويطمع فى الشجرة المحرمه
- جبان
- يعنى يسهل السيطرة عليه ولا خوف منه

من الاخر اشبه بكلب الحراسه المطيع , ودة بيوفر على النظام مشااااكل كتير زى اللى وقع فيها عبد الناصر بسبب مراكز القوى اياها....
يعنى النوعيه دى منبع خصب ونموذجى به شخصيات مستنسخه من بعضها , نفس الاسطنبه
هيبقى خط سيرك كاالاتى :
- تحسبها صح اول لما تخش الجامعه
- تقارير فى زمايلك
- عضويه فى الحزب الوطنى
- تظبيط علاقات مع ظباط الامن ( امن الدوله )
- مافيش مانع من التحرش باعداء النظام داخل الجامعه والهبل بتاع اتحاد الطلاب
- تخرج
- وظيفه محترمه او معيد ثم مدرس بالجامعه
- الخدمات شغاله برضه
- ثم تاتى القفزة المرتقبه للوزارة
او على اضعف تقدير ان فاتتك الوزارة فلا باس من منصب عميد كليه او رئيس جامعه او حتى اى منصب محترم فى مؤسسه حكوميه ( من نوعيه المناصب اللى بتصدق عليها امن الدوله ) ....
- او ممكن تكمل فى الحزب الوطنى وتشق طريقك وتلعب على الحبل وتبقى مهرج كبير فى السيرك , وبرضه هتوصل لنفس الهدف ( ماهو كل الطرق تؤدى الى روما ) ....

كدة اتكلمنا عن المثقفين
نحود على الطلبه
دول لا ينقصهم النيه , صافيه وزى الفل والحمد لله , ومصر هى همهم .... نفوس زى اللبن ....( الاغلبيه )...
كويس
ولكن
قيادة مااااافيييييييييش
زمان كان الوفد بيحرك الطلبه وبينغص على الملك عيشته
وكان الطلبه اقوى قوة فى مصر بجانب العمال
ودول اللى صنعوا عمودى القوة لحزب الوفد ( ايام عزة )
اما طلبه الحاضر
مالهمش قيادة تحركهم , لان النخبه السياسيه المعارضه فاسدة وغبيه وجبانه وفيها كل العبر....
فبيكون تحركهم ذاتى
ودة بينتج عنه عشوائيه واخطاء تفوق الحصر
سذاجه فى التعامل مع النظام , تنتج عن قله الخبرة او انعدامها
صراعات داخليه بسبب بعض الاختلافات , قد تكون سهله او عويصه , الا انها فى الاخر مضرة
فبتكون النتيجه فى الاخر شغل شبه مشوش وضعيف جدا , بس يتدعمه النيه الحسنه والعزيمه والشجاعه ....
نيجى لاكبر مشكله , اللى هيا ان فئه الطلاب فئه محدودة
يعنى مقتصرة على الجامعات
ودول مهما عظم نشاطهم
تبقى الحقيقه المرة
انه يظل خلف الاسوار
وان كام عربيه امل مركزى على كام فنطاس مطافى محمل ميه سخنه او ملونه او حتى مجارى
بالاضافه لمجموعه من البلطجيه
وكلاب النظام من الطلبه الزلنطحيه بتوع الفكر الجديد اللى اتكلمنا عليهم قبل كدة
واشاوس امن الدوله
بالاضافه لغلق الابواب وحصارها بجحافل اللحم او الجراد البشرى ابو افرول اسود
كل دول كفيلين بالسيطرة على الموقف
مهما كبر .... طالما انهم لم ينجحوا فى الخروج من اسوار الجامعه او الكليه ....

نرجع مرجوعنا لاضراب السنه اللى فاتت
واللى تبناة شباب الجامعه ودعوا اليه
وتنبه اليه بعض النبهاء من بهوات المعارضه وركبوا الموجه
بينما تنصل منه الاغلبيه بدافع الخوف او بدافع الغرور والتعالى على ( شويه العيال ) ودول الاغلب ....
طول لما كان الموضوع جوة النت , كانت لسه لحظه الصفر لم تبدأ بعد
بدأت لما الموضوع خرج من النت
ووصل للموبايلات
من الاخر وصل للمواطن ورجل الشارع
اللى هو غير كل الفئات اللى اتكلمت عليها قبل كدة....
اللى هو السواق
والارزقى
والفلاح
والعامل
والعاطل
دول هما الجماهير
دول هما القاعدة الشعبيه
دول الوحيدين اللى عندهم القدرة على التغيير ( دا غير الجيش طبعا )
اى دعوة للتغير دون مشاركه جديه من دول , تبقى مازالت فى النطاق الامن وتحت السيطرة ( من وجهه النظر الامنيه )....

بدأ العداد يشتغل لما دول تلقوا الدعوة
وحفزهم على قبولها الجوع
انعدام اساسيات الحياة اللازمه للحيوان ولن اقول للانسان.....
لان المصرى مع الاسف يقبل ان يعيش اقل من الحيوان , بس المهم يعيش....

ملحوظه : لما اقول المصرى او الشعب او الجمهور يبقى اقصد الفئه دى وحدها , وليس الفئات السابقه بتاع المثقفين والطلبه ....
رغيف العيش وقزازة الزيت وكيس السكر ...

دول كانوا لب المشكله
والشرارة المحركه
وليست الحريه والديموقراطيه والتعدديه والهبل دة ( من المنظور الشعبى ) كما يتوهم سكان المريخ اياهم ...

تصادف اتفاق المصالح وهضم حقوق عمال المحله من قبل مشيخه المنصر المسماة مجازا بمجلس ادارة الشركه , لانها تتعمد تدمير الشركه تمهيدا لتفكيكها وبيعها بزعم انقاذها من الخسارة , واللى هيتتبعه طبعا تسريح العمال .....
اةةةةةةةةةةةةةةةة
عمال شركه غزل المحله
وما ادراك ما عمال شركه غزل المحله
لنا مع شخصيه عامل شركه المحله وقفه
احنا بنتكلم عن فئه من ابناء المزارعين الفقراء
تركت مهنه الزراعه منذ زمن فى محاوله للتاقلم مع ظروف المجتمع الجديدة ...
اصبح البديل امامهم الصناعه
وشركه المحله فاتحه بيوت الناس دى
تقريبا فاتحه بيوت فى محافظه الغربيه كلها
دخلهم مثير للضحك
ممكن تلاقى اللى بيقبض اربعين او سبعين جنيه ...
فى احسن الاحوال , دخل افضلهم لن يكفيه عيش حاف
فبالتالى بيضطر لممارسه عدة مهن لكى يطعم اسرته
يطعمهم فقط , لا شىء اكتر من هذا
اما التربيه فالشارع كفيل بالتربيه
اما التعليم فرفاهيه للقادرين عليه
ممكن تلاقى واحد بيخلص ورديته ويطلع يشتغل سباك
وبعدها يشيل المنشار ويشتغل نجار
وبالليل تلاقيه سواق اجرة
يعنى من الاخر اشبه بالبهلوان اللى بيلعب على الحبل علشان يفتح بيته
ودة طبعا بيعمل ضغط نفسى وبدنى بشع عليه
يعنى بيكون غالبا فى اقصى حالات التوتر والارف
بس بيصبر
وبيخليه فى حاله
علشان خاطر ولادة مش اكتر
لما ييجى النظام بغباؤة وقصر نظرة يحاربه فى لقمه عيشه
يبقى معنى كدة ان النظام حط العمال اما ثلاث خيارات لا رابع لهما :
- الاول انه يقعد جنب مراته وعياله ويشوفهم بيموتوا من الجوع امام عينه
ودة طبعا خيار مش وارد اطلاقا

- الخيار التانى انه ينتحر
ولكن هذا الخيار لن يحل مشكله ولن يضمن الطعام لاطفاله
كما انه مرفوض دينيا

- بقى الخيار الاخير
الصدام المباشر مع النظام
وفى الحاله دى بيكون على اتم الاستعدادا لمد يدة فى فم الاسد بدون اى تردد لاسترداد لقمته ....

يعنى قنبله موقوقته لا قبل للنظام بها
لانه بهذا الشكل اصبح لا يبالى بالموت نفسه...
وطبعا مع العدد الضخم لعمال المحله ( حوالى 27 الف او اكتر ) ....
اظن كدة الصورة وضحت ...

تصادفت فكرة الاضراب مع غضب العمال
ودى تانى شرارة من شرارات النجاح
او تالت شرارة
الاولى انه خرج من النت لرجل الشارع
التانيه الرغيف والزيت والسكر واشاعه الغاء الدعم ( اللى تراجع عنها النظام او اجلها الى حين )
التالته هى العمااااال ...

طيب بديهيا كدة اصبحت البلد على صفيح ساخن واسخن نقطه هى المحله لتوافر عامل لا يوجد فى باقى القطر المصرى , الا وهو عمال الغزل ...
وطبعا الامن كان مدرك النقطه دى كويس ....
نيجى بقى للنظام , كان بيفكر ازاى ...
- النظام معتقد ان الشعب مات من زمان وان المليون ونص عسكرى امن مركزى بالاضافه لاحدث اسلحه القمع وفض الشغب فى العالم وبعض الاسلحه المحرمه دوليا كفيله بالسيطرة على الموقف , كما ان راس النظام بوسوسته المعروفه يخشى تقديم اى استجابه لمطالب الشعب حيث يعتقد انها تنازلات ولوى دراع وهو مش بيحب حد يلوى دراعه ويخاف لو عملها الشعب يسوق فيها ويطلب اكتر , فبيختار العند على طول الخط , يعنى مسئول محبوب , شيلوة , واحد مفسد ومكروة , دة يبقى استمارة نجاح وضمان استمرار ليه , نكايه فى الشعب ....
الخيار التانى امام النظام كان انه يستجيب
ودة اصبح شبه مستحيل
لان الصخرة اخذت فى التدحرج بقوة ناحيه الهاويه , ولن يمكنهم ايقافها ولو ارادوا .
خزينه فاضيه ودوله شبه مفلسه ومرافق مدمرة وديون متلتله وجيش اشبه بالمومياء وفساد حتى النخاع وادارة مخربه وعقيمه ....

يبقى الحل التلقائى لدماغ متخلفه زى دى انهم يرموا الكورة فى ملعب الداخليه ( اللى ملعبها اتملى كور فى الفترة الاخيرة ومبقتش عارفه تشوط ايه ولا ايه ) ويلااااااا , بناقص كورة , واتصرف يا عادلى ...
تماااااااااااااااااااااااااااااام يا افندم ....
طبعا عمك عارف ان دى مسأله حياة او موت بالنسبه ليه , اما انه يخرج من الوزارة بفضيحه ومغضوب عليه , اما انه يضمن استمارة بقاء تااام فى الكرسى حتى النفس الاخير, وهذا هو المطلوب ...
ربنا يكفيكم شر الكرسى وفتنته ....
بالاضافه لانه معاة كارت بلانش باتخاذ ما يلزم من الاجراءات ...!!
وما ادراك ما كلمه ( ما يلزم ) دى
يعنى من الاخر له مطلق الصلاحيه يعمل اى حاجه , اى حاجه , طالما ان الموضوع وصل الى تهديد مباشر لرأس النظام ....
وبالتالى كانت الاوامر اللى وصلت لقوات الامن قبل الموقعه الشهيرة حاااااسمه وقاااسيه ومافيهاش تفاهم , فض الاضراب مقدم على اى شىء , طظ فى الناس وطظ فى اى حاجه ...
اى كلب يفتح بقه اضربوة بالنار ( اتقالت لهم كدة وش ) وطبعا معروف هنا مين هما الكلاب ...

توتر جامد وشحن نفسى فظيع لظباط وجنود الامن , يعنى الموضوع مش زى اى طلعه قبل كدة , واللى زود الطينه بله شخصيه ظابط الامن المركزى , اللى لا يمكن يعصى امر قائدة بالاضافه لانه عندة عيال عايز يربيهم ويخاف موت من السجن والبهدله ومعندوش قناعه بأن الرزق بيد الله , بل انه بيد العادلى ( على حسب ظنه )...

اما عساكر الامن فحدث ولا حرج
نماذج صادمه بالمعنى الحرفى للكلمه
قرى ونجوع لا يعرفها احد , منفصله تماما عن العالم , ناس بعضهم لايزال يجهل ان هناك اختراعا يسمى كهرباء !!!
- ناس فعلا لا تعرف يمناها من يسراها وبدون مبالغه , مناطق حافظ النظام من عهد السادات على فصلها عن العالم كى يضمن ان تظل مورد خصب لا ينفذ لقوات امن اشبه بالربوتات ...
- جندى راسه اشبه بثمرة الجوافه او بورقه بيضاء جاهزة لاستيعاب وقبول اشد الافكار غرابه من اكثر الناس جهلا ( اللى هوة الظابط بتاعه ) ...
- فلما يقوله عن لاجئين المهندسين السودانيين انهم كفار وجايين علشان يحتلوا مصر وبيتعدوا على الستات , يبقى طبيعى تحصل المدبحه اللى حصلت , طبعا حبا فى مصر ودفاعا عن العقيدة , واولا طاعه للقائد الذى لا يجوز عصيانه ...
- لما يتقال له ان الشباب الناشط بتوع كفايه و6 ابريل دول شباب شاذ جنسيا مش ولا بد , وان البنات والستات الناشطات دول ماشيين على حل شعرهم ومحترفات دعارة وعايزين ينشروا الرذيله فى البلد يبقى طبيعى ان الطحن فيهم يشتغل ...
- ولما يتقالهم ان الغزاويه اللى على الحدود دول يهود عايزين يكسروا الباب ويخشوا يحتلوا سينا , وان الضرب اللى شغال فوقهم دة عبارة عن طيران الفلسطينيين بيضرب اليهود وهم عايزين يهربوا منه , يبقى طبيعى ان العسكرى يستقتل على الباب علشان ما ينفتحش ويضربهم بالنار كمان , ماهم يهود بقى , وماحدش هيفهم اكتر من البيه الظابط ..

نقطه تانيه
الانسان المصرى البسيط بطبعه بيبحث عن الزعامه والقيادة
فمن السهل جدا انه ينقاد لاى او لاول شخص يتظاهر امامه بالعلم او يقنعه انه اعلى منه , من الاخر يعنى يكبر فى عينه , وفى الحاله دى بيكون اشبه بالتابع المطيع لسيدة بدافع من الخوف والاحترام والاجلال فى ان واحد , يتبعه كظله وينظر اليه كمثل اعلى , ومن رابع المستحيلات كسر هذا الرابط , ودى عينه العسكرى المصرى البسيط محدود الثقافه ....
ودة عادة بيكون الرابط بين الظابط والجندى فى الجيش او الامن ( طبعا الجنود من الفئه المذكورة مش قصدى باقى الجنود العاديين من متوسطى الثقافه والمثقفين ) ....

كدة الصورة واضحه والفيلم هيبدأ والستارة اترفعت

- مساء خمسه ابريل 2008 :
الشرارة الربعه ( ولا الخامسه ؟؟ )
التصرف الغبى قبل الاخير للداخليه , بيان شديد اللهجه يهدد ويتوعد , نتج عنه الاتى :
دعايه خرافيه للاضراب خلت اللى مش عارف يعرف ...
تخويف الناس فاصبح اللى مش ناوى يشارك يخاف يخرج من البيت تجنبا للمشاكل ( يعنى كدة كدة هيشارك غصب عنه ) ...

- صباح 6 ابريل 2008 :
البلد فاضيه وحركه المرور اقل بكتير كما ان التواجد المكثف والمستفز للامن اخاف الناس اكتر من بيان الداخليه وخلا القله اللى نزلت الشارع تغير رايها وتروح بيوتها ....

- المحله الكبرى :
نفس القصه بالاضافه لروح من التفاؤل عند المواطنين , لانهم متوقعين ان العمال هيعملوا اللى ما يعمل ويجيبولهم حقوقهم ( كالعادة مستنيين غيرهم يجيبلهم حقهم بينما يكتفوا هم بالفرجه والتشجيع )..
المدينه محاصرة بالكامل ومخارجها شبه مغلقه ...
قوات من خمس محافظات متواجدة بالمحله فقط ....
جهابزة امن الدوله توصولوا لانسب حل لفض اضراب الشركه , لان دول اللى يخوفوا اما الناس فى الشارع فمش مهم , قنبلتين غاز على كام عصايه وهيجروا زى الفراخ ( دى نظرة ظابط الامن المركزى للمواطن , بمنتهى الاحتقار , نتيجه عن خبراته السابقه فى مدى جبن المصرى امام العصا )...

الخطوات :
- عناصر من الامن تتواجد بكثافه داخل عنابر المصنع من الليله السابقه
- طبعا العمال مش بييجوا شله واحده , بل بيتسرسبوا ورا بعض واحد ورا التانى
- اللى يدخل المصنع ياخدوة من ايدة ويودوة لحد الماكينه بتاعه , وطبعا مش هيقدر يقول لا , لانه لوحدة
وهكذا .......

تم احباط اضراب العمال قبل ان يبدأ
وطرقع قلم الامن على قفا العمال بشدة
وانتابتهم حاله من السخط واحتقار الذات

- المشهد حاليا الساعه 3 عصر اليوم
طبعا الناس واقفه فى الشارع علشان يتفرجوا على العمال اللى هيجيبوا الديب من ديله
يتفرجوا بس
مش يشاركوا لا سمح الله
يتفرجوا ويصورا بالموبايلات
فرحانين بالتكنولوجيا بقى
طبعا لما عرفوا اللى حصل نالهم نفس الاحباط
اللى تطور الى غيظ شديد
حاسين انهم انضحك عليهم
طيب
كدة كل عوامل الثورة متوفرة
باستثناء حاجه واحدة
ان المدينه متحاصرة
يعنى امل امتداد الاحداث لمدن اخرى غير وارد
طالما امكن التكتم على الحدث فى حينه
فى حينه فقط
مش مهم يتنشر بعد ما يخلص
اهم حاجه ان الناس برة المحله ميعرفوش ايه اللى بيحصل جوا يوم 6 و7
او توصلهم الصورة مشوهه وباهته على افضل تقدير
ودة اللى حصل فعلا
طييييييييييب

قلنا ان عوامل الثورة متوفرة
باقى اهم حاجه
الشرارة اللى هتفجر القنبله
ودى اهم حاجه فى ديناميكيه اى ثورة
ان الشرارة المناسبه تلقى فى الوقت المناسب وفى التوقيت المناسب
مش مهم كبيرة ولا صغيرة
المهم المكان والتوقيت
ممكن عقب سيجارة صغير يصنع حريق عملاق فى مصنع ضخم لو اترمى فى المكان الناسب فى الوقت المناسب
بينما لو فجرت قنبله خطا فى مكان خطأ تكون الاضرار تافهه
اوكيشن ؟؟؟

وهل فيه مكان انسب من المحله ( اسخن بؤرة فى مصر )
وهل هناك توقيت انسب من وقت خروج العمال ( تواجد العمال مع الجماهير فى وقت الذروة بالاضافه لخروج الموظفين والطلبه )
الا ان التدبير هنا كان ربانى بدون تدخل بشرى ,
كأنما اراد الله عز وجل ان ينقلب السحر على الساحر , وان ينقلب مكر دهاة الداخليه على رؤسهم ,
ويمكرون ويمكر الله .....
- ظابط غبى اعتدى على ست مسنه فى اكبر ميدان فى المحله , بالاضافه لانه مكروة فى الاوساط الشعبيه والناس معبيه منه , طبعا ولعت الشرارة والناس عجنته ضرب وأخد علقه موت ..
- الامن المركزى المتوتر اصلا اتشد من الموقف وراح مدور الضرب فى الناس عاطل فى باطل
الناس صبرت شويه ولكن بعد فترة اضطرت ترد
وبدا السيناريو المعروف
على جانبين :
- الاول هو الفقراء من سكان المحله
يعنى حوالى حيين او ثلاثه احياء من المدينه
باقى المدينه كان فى شبه غيبوبه ولا علاقه له بما يحدث
وخصوصا الاماكن الراقيه
نسبه من الشباب والاطفال المشاركين كانوا واخدين الموضوع من باب التسليه والانتقام من ( الحكومه ) والكلمه دى تعنى عندهم قسم الشرطه بظباطه بأمنائه بمخبريه .....
هى دى الحكومه عندهم فقط لا غير , ولا ديموقراطيه ولا صحوة ولا بلا ازرق من بتاع الاخوة المريخيين ...
كلمه التسليه دى تلاقيها واضحه قوى فى طفل صغير بيقترب من جندى امن مركزى , بعد ما الامن هدى اللعب وذخيرته خلصت وابتدا ياخد دور المتفرج بينما نشط رجاله امن الدوله فى الاعتقالات الفرديه ..
الطفل استفزة هدوء العسكرى , راح وقاله بسخريه : ايه , الكنابل اللى عندكم خلصت ولا ايه ؟؟؟
يعنى الموضوع كان محصور فى مدينه المحله , وتسرب لبعض القرى المحيطه بها
حيين او ثلاثه احياء يعنى حوالى نصف المدينه او اقل ...
كل العنف دة كان يعتبر اقل واجب من رجال عشوائيات المحله !!!!
- نقطه الذكاء الوحيدة للامن انه حاول الا يتوسع فى الدخول للحوارى والازقه , لان هناك مينفعش المصفحات اللى بيتحاموا فيها تخش , يعنى لو كانوا عملوها كانوا اتوضبوا احلى توضيب , خصوصا انها اماكن نفوذ معلمين كبار قلبهم ميت ولا يعنيهم حكومه ولا امن دوله ولا دياولو , يعنى كانت هتبقى مدبحه , من طرف واحد طبعا ...
واضح ان الداخليه اتعلمت من درس انتفاضه السادات كويس ...

- الجانب الاخر , الامن المركزى :
تقريبا اغلب قوات الامن فى الدلتا والاسكندريه والقليوبيه توجهت للمحله لقمع المنطقه الصغنونه دى !
علشان تعرفوا ان الشعب لو اتحرك يقدر يعمل ايه
امال لو كانت المحله كلها
امال لو الحافظه , طب لو مصر بالكامل , كان ايه ممكن يحصل ؟؟؟؟

هييجى سخس يتفذلك ويقولى ممكن يدخلوا الجيش , اقوله برضه ليها حلها , والجيش ساعتها مش هيضيف كتير ومن الممكن استيعاب هجومه وتحييدة تماما بمنتهى السهوله ...

المهم الرجاله ذخيرتهم خلصت , والذخيرة اللى جاتلهم هى كمان خلصت , ومافيش صورة توضح كدة اكتر من منظر واحد بيشتكى فى الموبايل لرؤساؤة ان ذخيرته خلصت واخد ذخيرة زميله وخلصت برضه ومش عارفين يعملوا ايه !!!!!

بدا الاضطراب يظهر فى صفوف الجنود اللى ابتدوا يتسكلنوا فيها ويعملوا نفسهم مغمى عليهم علشان يرجعوهم ورا ويطلعوا من الجحيم دة ..
طبعا مش هنتكلم على الظباط لانهم عمرهم ما بيطلعوا فى الصفوف الاولى من الاساس....

- استراتيجيه الامن المركزى :
الف به فض شغب بتديك كام قاعدة رئيسيه لازم جنابك تتبعهم
اولا: اياك واطباق الحصار على الجماهير
يعنى بتحاصرهم من كل الجهات وبتسيب لهم ناحيه مفتوحه علشان يخرجوا منها بحيث تديهم خيار امن للانسحاب لانك لو قفلتها عليهم مش هيبقى امامهم خيار الا المقاومه ودى بالتاكيد هتكون مقاومه يائس ولن تكون فى صالح الامن باى حال من الاحوال , الفتحه دى لازم تكون ضيقه علشان تشتت الجماهير وتفرقهم , لان خطر الجماهير وهما مجتمعين فى كتل كبيرة اما لو اتفتتوا بيتلاشى خطرهم , يعنى الصراع بين الجماهير والامن اشبه بصراع كتل من اللحم البشرى والنصر بيكون للكتله الاكبر حجما والاكثر تنظيما والاعظم ثباتا , مش بالسلاح .

القاعدة التانيه : هى تجنب استفزاز الجماهير والتدرج فى استخدام القوة
يعنى بتبدأ بالميكرفونات من باب الحرب النفسيه ثم تبدا ترش ميه بالمطافى , اللى بتكون مضغوطه بشكل جامد وبتسبب الم كبير للمتظاهرين , وبعدين تخش العساكر بالعصى والزق لورا , ولو ماجابش نتيجه يبقى القنابل المسيله للدموع ثم يبدا اطلاق الرصاص المطاطى ثم الرش ثم اخيرا الذخيرة الحيه ...

- حبايبنا الحلوين المدربين اعلى تدريب نسيوا فجأة القاعدتين دول , يعنى لما حصل موضوع الست الكبيرة دى قفلوها على الناس مع ان الناس كان عددها كبير جدا وكمان حصل اطلاق لذخيرة حيه من اولها كدة , فدة استفز الناس اكتر وخصوصا ان فيه اكتر من طفل رضيع مات , غباء بقى تقولوا ايه ....

نقطه تانيه احب اوضحها :
بالنسبه للقنابل المسيله للدموع , المفروض ان فيه منها انواع كتير , المستخدم منها بيسبب تهييج للاغشيه المخاطيه يعنى من الاخر تقريبا كدة بيجيلك شبه عمى مؤقت بالاضافه للحرقان الرهيب فى عينك والجهاز التنفسى ...
فيه انواع تانيه بتسبب قىء شديد جدا وهبوط حاد فى الدورة الدمويه ودول بيسببوا الوفاة , ودول محرمين دوليا منذ عام 1956 تقريبا , ولما كانت اصابات كتير بل ووفيات تنطبق عليها مواصفات النوع التانى , لذلك فأغلب الظن ان الداخليه استخدمت النوع الاخير المحرم دوليا , واللى انا متاكد بالطبع انه موجود بكميات ضخمه فى مخازنها .....

بالنسبه للرصاص المطاطى , انا معلوماتى انه بيتكون من كرات صغيرة من المطاط المضغوط وبيكون لونه ابيض , ودة يفرق كتير عن الرش ( مش الرش بتاع العصافير ) لان الرش متقسم لرش خفيف ومتوسط وتقيل على ما اذكر , اختلاف الرش عن المطاطى كبير , الرش عبارة عن كورة فى نفس حجم المطاطى الا انها قلبها من مادة الرصاص مغلفة بطبقه من المطاط من الخارج , يعنى بالظبط اشبه بالبليه بتاع الموس القديم , مع اختلاف الحجم طبعا ...

طب ايه الخطر؟؟؟

الخطر ان فيه قاعدة فى علم المقذوفات بتقول ان كل ماكان المقذوف كثافته اعلى كل ما كان اختراقه اشد .
ودة السبب ان مقذوفات الذخيرة بتكون رصاص , ودة اللى خلا اليهود يعملوا اليورانيوم المستنفذ مقذوف للسلاح ( دمدم ) لانه بالطبع اتقل من الرصاص فبيعمل فجوات واسعه جدا فى اجسام الضحايا ...
يعنى الرش مش تهريج , دا رصاص بس عبارة عن بلى صغير ...
- اول حاجه لفتت نظرى ان المقذوفات اللى عثرت عليها فى اماكن الضرب كان لونها بنى , ودى اتقل واعلى درجات الرش ( اسوأها يعنى ) بينما ما شوفتش طلقات حمرا ( الاقل خطرا ) وماشفتش خااااالص طلقات بيضا ( اللى هيا المطاطى ) !!!
يعنى الامن ريح دماغه وجاب من الاخر ....
نقطه كمان , هى ان الرش دة له اسلوب معين فى اطلاقه , لانه مش بينضرب فردى , لا دا بيكون فى هيئه خرطوش وما ادراك ما الخرطوش , يعنى طلقه خرطوش فيها عدد كبير من البلى دة , وشوف انت بقى ...
لما بتنضرب مش بتنضرب على الناس , المفروض سيادتك تضربها فى الارض امام اول صف من الجماهير لسببين الاول انك تخفف من قوة الطلقه شويه علشان الاذيه تقل , والتانى انك تخلى الاصابات كلها فى سيقان المتظاهرين وتتجنب اصابه اى عضو حيوى لان البلى دة استخراجه صعب جدااا ....
- اللى حصل اننا شفنا العشرات عيونهم اتصفت واتصابوا فى وشوشهم , ودة يدل ان البهوات اطلقوا الخرطوش على المتظاهرين مباشرة ودى مخالفه كبيرة وغير مصرح بها فى اى جهاز امنى فى العالم ( عدا مصر طبعا ) ....

دا غير ان السادة الظباط كانوا بيضربوا ذخيرة حيه على المتظاهرين النشطين , فى الخباثه كدة ومن بين الصفوف ..

يعنى اوامر البيه اللى قال اى كلب يفتح بقه اضربوة بالنار , اتنفذت حرفيا ...

طبعا الكلام دة ولا حد يعرفه واندفن مع الاحداث وسلملى على الاعلام المصرى المحترم .....

وانتهى الاضراب بسبب زهق الجماهير ولانهم مكانوش عارفين ايه الخطوة اللى يتخذوها بعد كدة , يعنى عدم وجود قيادة , بعد نكوص المهدى عاكف انسحابه , الوضع المرتبك دة فتت الناس واصابهم بالارتباك وخصوصا بعد دخول مخبرى الامن فى وسطهم , اذكر ان واحد منهم تقدم الصفوف لما الالاف حاصروا قسم اول المحله علشان يطلعوا الاسرى اللى اتمسكوا , ضحك على الناس وخلاهم يقعدوا على الارض ويكتفوا بالصراخ : طلعووووهم , طلعووووهم , وكانت النتيجه ان الامن المركزى والمطافى نجحوا فى فضهم بالتدريج ثم تم ترحيل المعتقلين الى برج العرب فى الثالثه فجرا ...
مع انهم كانوا يقدروا يكسروا القسم كله ويخرجوا المعتقلين فى حينها , وكانوا هيناموا كلهم فى بيوتهم ( دا لو ماكانوش سلموا بطايقهم طبعا ) بس تقول ايه فى الغباء , شوفتوا نفر واحد عمل ايه ؟؟؟؟
متصورة كليب دى على فكرة ...
____________________________

دة اضراب السنه اللى فاتت
نيجى لاضراب السنه دى
- اولا مافيش سبب يحرك الجماهير فعليا
الرغيف والسكر والزيت , اينعم نادرين بس موجودين ( ما اتفقنا ان مطالب المصرى انه يعيش بالحد الادنى من المتطلبات الحيوانيه وليس الادميه )
طبعا موضوع الحريه والديموقراطيه قلنا فككم منه لان الناس دى ماتعرفش الكلام دة , ولو عرفته فهو ميلزمهاش او بمعنى ادق معندهاش استعداد تضحى علشانه , وكذلك السرقه والفساد ...
يعنى باختصار لا يجد مبرر للتحرك طالما انه هناك لقمه تدخل بقه , بس كدة ...
طبعا دة مكانش متوفر السنه دى
اينعم اللقمه فاسدة ومستوردة من اوكرانيا وغير صالحه للاستهلاك الحيوانى , بس اسمها لقمه ..

- الانتشار لم يتحقق لان الموضوع لم يخرج عن النت , طبعا مجهودات الشباب اللى لزقوا مطبوعات ورشوا اسبراى فى الشوارع يشكروا عليه الا انه فى النهايه لم يحقق الانتشار المطلوب وخصوصا ان الداخليه لم ترتكب خطأ البيان الغبى اللى عملته السنه اللى فاتت ...

- واهم حاجه ان الفئه اللازمه لتفجير الاوضاع اللى هما العمال والفلاحين والعواطليه والسواقين والارزقيه , دول مادخلوش فى الليله فاصبح الموضوع اشبه بفتيل مشتعل بدون قنبله , طبعا ولا يعمل حاجه ...

- اخر حاجه ان خنازير المعارضه الوهميه صعب عليهم يفوتهم موجه السنه اللى فاتت فحبوا يركبوا موجه السنه دى املا فى حدوث نصر مماثل ينسب اليهم بالطبع , ودة من الغباء , ودول افقدوا الحركه الكثير من المصداقيه لدى رجل الشارع ( دا اذا كان عارف الموضوع اصلا ) , بالاضافه لان الراجل البسيط بتاع الشارع دة , عارف ان البهايم دول ليسوا فوق مستوى الشبهات ...

لذلك اقدر اقول ان اضراب 2009 فشل قبل ان يبدأ بينما نجح اضراب 2008 قبل ان يبدأ

دا اذا استثنينا طبعا نشاط طلبه الجامعه فى القاهرة واسيوط ( كما سمعت ) بذلوا مجهود يشكروا عليه وان كان لم يحرك الوضع او يغيرة , للمشكل بتاع الطلبه اللى اتكلمت عليه اول البوست ...
____________________

طيب , نفعص شويه فى الوضع الحالى :
ايه اللى هيحصل دلوقت
1- اولا موجه تهكم من النظام والمعارضه المشوهه على شباب سته ابريل من باب تعويض وكسه العام الماضى وسترها ....

2- محاولات من النظام لاستيعاب واحتواء شباب 6 ابريل فكريا , وان لم ينجح فسيسلط عليهم كلاب المعارضه محاولين احتوائهم لكى يمسخوهم فكريا ( يخلوهم زيهم يعنى ) ...

3 - نفخه كدابه من النظام حيث سيصور له غرورة وغباؤة انه فاز وانه الاقوى مما سيدفعه لاتخاذ تصرف قمه فى الغباء فى الفترة المقبله كالعادة , سينتج عنه تفجر جديد لن يكون فى صالح النظام بالتأكيد ....

4- ودى اهم نقطه واللى عايز الشباب دول يستوعبوها , امريكا ليها اجندة فى مصر , يعنى امريكا لن تقبل خروج الوضع فى مصر عن سيطرتها باى حال , وبما ان انهيار النظام الحالى شىء مؤكد للجميع واصبح مسأله وقت لا اكثر , فقد رأى الساسه الامريكان ان الحل الامثل هو ابتزاز النظام المصرى واستهلاكه لاقصى درجه ممكنه قبل ان ينهار , بينما تدعم التيار الليبرالى فى مصر , تدعمه مش تقويه , يعنى تحافظ على التوازن بينه وبين النظام بحيث الا تطلق يد النظام عليه , علشان لما ينهار النظام يكون التيار الليبرالى بديل وطنى جاهز للركوب , ليضيع الفرصه على التيار الاسلامى اللى هوة اكثر جماهيريه بالطبع .....
اى انهم صمام امان , بحيث لما الوضع ينفجر يكون البديل جاهز , والبديل اللى هما عايزينه , اللى يقدر يرضى المواطن فى داخل مصر ويضحك عليه وفى نفس الوقت يحافظ على نفس السياسه الخارجيه المشبوهه اياها ....
وبما ان نجم شباب 6 ابريل بزغ وواضح انهم ابتدوا يحجزوا مكانهم بقوة على الساحه , بل ازاحوا تيارات الليبراليين , فاصبح لابد للامريكان من انهم يدخلوهم تحت عبائتهم مع باقى زمايلهم من الجماعه اياهم , فى القفص الامريكى الذهبى , علشان كله يبقى تحت سيطرة العم سام ....
اظن كدة الصورة واضحه
______________________

ايه الصورة حاليا ؟؟؟؟؟
- الصورة ان الشعب المصرى فيه خلل ازلى رهيب , وهو انه بيعتقد ان المشكله من الحكام مع ان المشكله منه بالاساس , يعنى اواخر ايام فؤاد الناس اعتقدت ان مجىء فاروق هيكون طالع سعد , وقد كان فعلا الا ان الصورة اتغيرت بعد عام 1945 , اواخر ايام فاروق اعتقدت الناس انه لما يغور هتروق وتحلى , وغار فاروق , بس ماراقتش دى اتعكرت اكتر , وكذلك ظن كارهى عبناصر الا ان الوضع اصبح اسوأ من بعدة , ولما جه الممثل الاكبر وانقتل غير مأسوف عليه اعتقدت الناس ان زمن الفراعنه انتهى ولم يحدث , ونفس الحال دلوقت ....
الناس فاكرة ان لما مبارك يمشى البلد حالها هيتصلح , ليه ؟؟؟
طب ايش عرفكم ان اللى جاى مش هيبقى زى اللى سبقوة ؟؟؟
لما بلد بقالها خمستلاف سنه موعودة بكل انواع الظلم والطغيان من قبل مئات الحكام والاف القادة ...
بالله عليكم يبقى العيب من القادة دول ؟؟؟
ولا يبقى من العنصر الوحيد الثابت والمشترك ؟؟؟
اللى هو الشعب ....

- لو اعدل ملوك الارض حكم مصر فسيتحول طاغيه فى بضع سنوات , لان الكرسى له بريق ولو لم يجد الحاكم من يدفعه عن طريق الباطل فسيسقط فيه بكل تأكيد ....

دا ان كان اساسا انسان كويس , فما بالك لما يكون من اسوأ عناصر الشعب ؟؟؟

اربع حاجات قولى انهم تلاشوا من شخصيه المصرى وساعتها لن ابالى بمن يحكم وان كان ستالين ذاته :

- السلبيه وفقدان الامل فى التغيير وكلمه ونا مالى والحركه اللى اختفت من زمان فاصبحت مصر اشبه بمستنقع من المياة الراكدة , ( مع مراعاه بعض البشائر اللى ظهرت حديثا )

- الجبن نفسى يختفى من جوانا ...

- الجهل والسطحيه والتفاهه والسعار المادى والجنسى , يعنى نفسى اشوف مصر اشبه بمدينه الفلاسفه او الحكماء او المتدينين ( التدين العميق وليس الظاهرى ) ايهم , بس المهم ان الروح تاخد حقها ...

- قصر النظر الشديد , يعنى المصرى لا يهتم بالمشكله الا لما تدخل عليه بيته , مش عارف , بس ممكن اتكلم فى النقطه دى كتير , بس علشان اقصر , هقولكم , كان فيه كليب نازل على الموبايلات بيظهر فيه جزار فى السلخانه بيدبح عشرات الجمال فى وقت واحد , محاصرهم فى غرفه واسعه ومعاة سكينه صغيرة جدا ( خنصر ) , واقف فى ناحيه بينما عشرات الجمال فى الجانب الاخر , يقرب من واحد يغزة ويندفع الجمل للجانب الاخر خلف الجزار بينما يتقدم الجمل اللى عليه الدور , منظر مستفز ومستغرب وخصوصا مع علمى ان الجمل حيوان عندة كرامه عاليه جدا بالاضافه لقوة رهيبه , يعنى جمل واحد من دول قادر على قتله فى لحظات , طب ازاى دة حصل ؟؟؟؟
مش عارف , بس دة اكتر مثل اوضح بيه حال الشعب المصرى فى النقطه بتاع قصر النظر دى ..
لو دول انتهوا فوالله لا ابالى بامريكا ولا بالف امريكا ولا اسرائيل ولا قنبله نوويه , ولا عادلى ولا غيرة , لان كدة اصبح الاساس سليم , والافكار والمبادىء السليمه لا تحارب بالقوة كما قال هتلر , بل تحارب بمثلها ...

مشكلتنا اكبر بكتير من مشكله حاكم ظالم , مشكلنا مشكله شعب عايز تربيه واعادة تأهيل من اول وجديد ....

ودة هيتم بشىء من اتنين , الاول هو صدمه شديدة جدا وعنيفه تصحيه من نومه وتفوقه لنفسه , ودى على قد ما هتضرة وتوجعه بس هتشفيه وتفوقه , التانى هو انسان فلته , مبعوث من العنايه الالهيه يلتف الشعب حوله ويقوم هو باعادة ايقاظه من اول وجديد , بس امثال هذا الرجل اندر من الذهب , ولذلك فالاحتمال الاخير صعب جدا , وان كنت لا استكثرة على الله , الا ان الجلوس لانتظارة خطأ طبعا لانه مش مضمون .....
_______________

هرد على الاتهامات اللى كانت متوجهه للاضراب فى اول البوست :

- مالوش لازمه...
- امال ايه اللى ليه لازمه , اينعم الاضراب مش حل الا لو كان شامل ودة محتاج درجه عاليه من الوعى والتنظيم احنا كمصريين لسه مع الاسف موصلنالهاش , بس دة ميمنعش انه خطوة كويسه , وان فشل النهاردة فبكرة ينجح فبلاش نبقى كالاب الاحمق اللى ودا ابنه المدرسه لاول يوم ولما رجع سأله : تقدر تحل اللوغاريتمات دى , ولما اجاب الطفل بالنفى قاله : يبقى تقعد فى البيت بلا علام بلا نيله طالما مش جايب فايدة اهو !!!!!
رجاء بطلوا هبل , ولو مكنتوش بتستهبلوا يبقى بطلوا استعباط ,
اظن واضح ....

- الناس هتتبهدل
- اكيد لازم تبهدل لان حريتك مش هتيجى على طبق من فضه ولو تمنها النهاردة نقطتين دم وحضرتك استكترتهم بكرة هيكونوا عشرة , لان الظلم دايما فى تضخم مستمر طالما مش لاقى اللى يوقفه , فبراحتك , بس لو استكترت التضحيه يبقى تحط لسانك فى بقك وماتشتكيش بعد كدة خاااااالص , ان الله لا يغير ما بقوم حتى يغيروا ما بانفسهم .....

- اجندة خارجيه لتدمير مصر
- اظن ان البلد ليست فى حاجه لاجندة خارجيه لتدميرها لان اللى جوة قايمين بالواجب وزيادة وحققوا اللى ماكانتش تتمناة اعظمها اجندة , كل الكلام العبيط اللى بييجى فى جرايد المعارضه حول المؤامرة الاسرائيليه والامريكيه لتدمير مصر , كل دة هبل , لان اللى جوة هما اكبر مؤامرة لصالح اليهود .....

- لعب عيال
- اظن دة كلام رموز المعارضه الغير محترمين , ياريت اللى بيته من قزاز ميحدفش طوب , والمعيله والنفاق انتم ادرى بيهم والشباب دول يكفيهم انهم اشرف منكم الف مرة , وغوروا من هنا علشان هنرش ميه وسخه ...

- مافيش داعى او حافز
- الدواعى كتير جدا , بس المشكله زى ما قولنا ان الحافز المطلوب لازم يكون اللقمه لان دى الحاجه الوحيدة اللى تحرك المواطن المصرى العبيط والغلبان فى ان واحد .....

- الداخليه اتعلمت ومش هتغلط غلطه السنه اللى فاتت
- اينعم هما اتعلموا بس ماتنسوش ان جينات الغباء الامنى مازالت موجودة , وان الله دائما يوقع المجرمين فى اشر اعمالهم وسرعان ما يحيق بهم مكرهم ويرتد اليهم , بس اعتب على الشباب انهم كانوا لازم يغيروا استراتيجيتهم السنه دى ....

- الاخوان والاحزاب خلعوا
- بالنسبه للاخوان كونهم قبلوا يدخلوا تحت عبائه النظام من ايام السادات فدة خسرهم كتير , ونظام عقد الصفقات مع النظام الحالى اضعفهم جدا وافقدهم كتير من مصداقيتهم فى الشارع , ودة يرجع مع الاسف لسوء تخطيط من قيادات الجماعه وليس لباقى الاعضاء اللى اكن لهم الاحترام والتقدير ...
اما الاحزاب فدول اساسا برة اللعبه والمسنود عليهم مسنود على حيطه مايله , دا ان جاز نقول حيطه اصلا .
يعنى ممكن تعتبروهم مش موجودين من الاساس !
يلا
مصر مافيهاش احزاب ياولاد
عدا الحزب الوطنى طبعا .....

- مافيش فايدة ومبارك قاعد
- اظن اتكلمت على دى فى نقطه العيوب
طب طالما مافيش فايدة , ماتروح تدورلك على تربه تدفن نفسك فيها احسن , مش كدة برضه ؟؟؟

- نستناة لما يموت
- كلنا هنموت , وبعدين ايش عرفك انه هيموت دلوقت , طب ما ممكن يعمر ويكسر الميه سنه , عادى يعنى انتوا جبنا ومستنيين اخرته وربنا رد عليكم بانه طول عمرة كمان وكمان , وبعدين لما مبارك ينزل , طب ما هييجى كتير غيرة يركبوا , طالما الحمار لسه مستسلم , والحمير قليله , وصف الركاب اللى مسنيين دورهم فى الركوب طوييييييييييييل قوى ......
على رأى المثل
اللى يشوف حمار ولا يركبوش , يبقى احمر منه ... مش كدة برضه ؟؟؟؟

- ياعم خلينا ناكل عيش
- طب ماانت كدة مين اللى قالك انك هتلاقى العيش ؟؟؟؟

- محناش قد الداخليه
- اظن ان شرح موقف المحله السنه اللى فاتت وضح خطأ الرأى دة ...
____________________________________

الاعلام المصرى
حد يقولى ايه رايك فى الاعلام المصرى
طيب انا كنت ناوى اتكلم عنه كصحافه وتلفزيون وسينما وغيرة بس صراحه الكلام كدة هيكتر فاحب اعمله بوست لوحدة , هو والموقف الحالى للنظام المصرى على الساحه .....
ابقوا فكرونى
__________________________

كلمه لشباب 6 ابريل :
- بجد انتوا متعرفوش انا فرحان بيكم قد ايه , حسستونى ان لسه فيه شعله امل , اياكم تخافوا , اياكم تصدقوا او تنخدعوا باوهام كلب يدعى العلم والخبرة , واياكم والانضواء تحت عبائات الاحزاب او التيارات او الامريكان , ولا يهمكوا تريقه الهبل والمعاتيه , معلش لازم تتعبوا كدة فى الاول , بس صدقونى هتحصدوا خير فى النهايه ..

الاخ اللى صورته منورة البوست فوق , انت ماتعرفش قد ايه فرحت بالصورة دى , ربنا يبارك فيكم , اخيرا فيه شباب خرجوا سالمين من معصرة المخدرات والسكس والهيافه اللى النظام بيحاول يغرق شباب مصر فيها ...

فعلا مصر ولادة والامل لسه موجود...

الامل فى شباب نضيف زيكم , اينعم اكيد فيكم شباب نص كم , بس انا باتكلم على الوضع العام , انتم والقيادات الشريفه زى اخويا الكبير مجدى احمد حسين ربنا يفك سجنه , هو وامثاله من شرفاء مصر اللى عمرهم ما يحيدوا عن الحق .....

شباب

اتعلموا من اخطائكم , وخلوا الفشل قوة تدفعكم للامام , وغيروا اساليبكم , وصححوا الغلط منها , وشغلوا دماغكم واديكم كويس ينكتب لكم النجاح بأذن الله ...

ياريت اى حد يعرف واحد من الشباب دول يوصله الرساله دى .....
__________________

ملحوظه هااااامه : انا قعدت اكتب البوست دة اربع ساعات , وايديا ورمت , فياريت زى انا ما استخسرتش فيك اربع ساعات من وقتى ووجع ايدى وعصر دماغى , ماتستخسرش انت فيا ربع ساعه قرايه .....

ومتقولش عليا رغاى

لانى اتحدى ان البوست دة اضافلك على الاقل حاجه واحدة ماكنتش تعرفها

اظن كلامى منطقى ؟؟؟؟؟؟

يلا
اسييكم بقى واروح انقع ايديا فى ميه ......

سلااااااااااموووووووووووووززززز