الخميس، 9 أبريل 2009

كلاكيت , اخر مرة ............

شوفوا كدة الفيديو دة :

http://www.youtube.com/watch?v=idfbdnZCq3g&feature=related


حزر فزر
الجيش اللى ماشى دة موكب ميييييين ؟؟؟؟؟


لا ياخويا مش زفه قطر الندى
ولا موكب خمارويه ولا احمد ابن طولون


دا موكب الرئيس المصرى
او بمعنى ادق ( ركاب ) بمصطلح اهل التخصص .....


عديتوا كام عربيه ؟؟؟؟
انا عادد حوالى 82
دا غير الموتوسيكلات
وعربيات فان الحرب الالكترونيه
اللى بتسقط شبكه الموبايل ....

عايزكم توسعوا خيالكم معايا شويه
او شويتين


دى لمحه بسيطه من الحياة اللى الانسان دة عايشها من 28 سنه !!!!!
لمحه تعبر عن اقل مايمكن
اة , الهيلمان دة كله ابسط شىء فى حياته
تخيلوا واحد عايش 28 سنه بالشكل دة....!!!


لن اتعجب لو اعلن الالوهيه ....


واحفادة الاطفال محترفين سب وقذف للوائات رئاسه الجمهوريه والحرس , اللى بدورهم طبعا بيتقبلوا الشتيمه بضب مفشوخ من كتر السعادة ( حمادة بيه بيشتمنى ) ....!!!!!!!!!!!!!!!!!!!!!!!


دا غير ضباط الحرس الجمهورى اللى مواراهمش شغلانه غير انهم ينضربوا على ( الاظؤظه ) على رأى خيخه من قبل البهوات ولاد علاء بيه ....


وجدهم يتفرج وهاتك ياضحك , ماهو اعز الولد ولد الولد بقى ...
دول الاحفاد فما بالك بالجد؟؟؟؟


انا لم ار او اسمع او اقرأ فى التاريخ عن هرم طغيان بالضخامه اللى موجودة فى مصر دلوقت ....
دا الصحابى نزل من على بغلته ومرمغ وشه فى التراب وقال : عزت على نفسى فأردت ان اؤدبها !!!!!!
عزت عليه نفسه علشان راكب بغله
امال لو ركب موكب زى دة كان عمل ايه ؟؟؟؟؟؟


لن اتعجب ان حكم هذة البلد عمر ابن الفارض وجاب ابراهيم ابن ادهم رئيس وزرا ...
لن اتعجب ان تحول فى سنوات لفرج ابن برقوق او الحجاج ابن يوسف ....


لا توجد نفس قادرة على مقاومه اغراء بمثل هذة الضخامه , الا ان كان نبى ومعصوم ...
لان محدش بيبص لنص الكوب الفارغ
اللى يبص للسادات فى عزة مش بيشوفه وهو مرمى تحت الكراسى وبينداس بالرجلين .....
وغيرة اللى كان الطريق بينفرش ليه من الشام لمصر بشقائق الحرير
محدش عمرة اعتبر بيه وهو مقتول ومرمى للكلاب ....

لا واللى يغيظ ان الناس واقفه على الجنبين بتهلل وتصفر
بتهللوا على ايه
الله يوكسكوا
الله يوكسكوا كمان مرة ...
طب مش بعيد كدة يصدق
اة لازم يصدق


طب فاروق لما كان فى قصرة فى اسكندريه والناس كانت طالعه تهتف ضدة وتؤيد الانقلاب ( او الحركه كما كان يطلق عليها حينها ) قال لقائد حرسه : شايف , الشعب بيهتفلى !!!!
قائد الحرس طلع عندة ذمه وقال لا يامولانا دة بيهتف ضدك وبيقول كذا كذا ....
طب دة هيلاقى منين قائد حرس يقوله كدة , ولا يجرؤ يقوله حاجه غير كله تمام وانما نحن عبيد احساناتكم !!!!


فعلا
هى المعادله كدة :


- حاكم ظالم ومظلوم
ظلم ارضه
ظلم شعبه
ظلم نفسه
ومظلوم لان شعبه ظلمه
ظلمه بانه شجعه على الظلم
واعانه باسبابه

- شعب ظالم ومظلوم
ظلم نفسه بسكوته على الظلم
ومظلوم من وقوع الظلم عليه


- وارض مظلووووووووومه
ارض غاااااليه قوى
مظلومه بحاكم وشعب لا يستحقها كلاهما ......

حكام ظلمه وشعب الاغلبيه الساحقه منه كغثاء السيل او كزبد البحر ( يذهب جفاء )


ياريت محدش يستغرب بعد كدة ويسأل ليه مصر عايشه وصلات من الظلم من خمستلاف سنه فاتت ....
ليه الظالم بيقعد ستين سنه , والعادل مش بيكمل اكتر من سنتين وبتكون نهايته عادة القتل او النفى او السجن ...


اقولكم ليه:
علشان احنا منستاهلوش
احنا حقنا النوع التانى
النوع التانى بس


- اللى انكوى بنار السادات وترهاته وتخاريفه ميزعلش , لان المواطن دة هوة اللى انسحب من الشارع وساب الانتفاضه علشان يروح يتفرج على مدرسه المشاغبين !!!!!!!


- واللى اتلسع فى سجون عبناصر واللى اتقتلوا زى طابور النمل لما ترش عليه فليت فى سينا , ميشتكيش , لانه هوة اللى شاف نجيب بيتشال من عابدين ويترمى فى فيلا المرج 28 سنه ولا اتحركش علشان يدافع عنه ....


- واللى بيلعن فى فاروق وايامه ميزعلش , لانه مكانش كدة , تخلى الناس عنه فى 42 وتقاعص ابطال الوفد والنحاس اللى ظهر انهم ابطال من ورق كل همهم السلطه , هو دة اللى هدة وغيرة 180 درجه وبقى يعرف اصول اللعبه كويس ويراهن على مين ومين لأ ......


- واللى بيقول فؤاد طاغيه ميزعلش برضه , لانه لما شاف بعينه ابوة بينكرش من مصر واخوة توفيق بيزقه هو وابوة زق فى محطه السكه الحديد علشان يخلص منهم بسرعه ويلحق موكب التنصيب بتاعه , دة اللى خلاة يعرف ان العرش اغلى من الاخ والاب , وان الرهان على الانجليز هو الرهان الصح , وان الشعب دة اخرة يهلل او يبكى ..


فعلا اللى بيحصل فى مصر دة منتهى العدااااله
منتهى العدل


بس اتنين مظلومين
الاقليه الشريفه الشجاعه اللى لسه فى البلد
والارض
دول بس اللى مظاليم


لو الاقليه دة تطلع برة المسرح
والارض تنسحب من تحت الرجول
وبعد كدة يهيص الشعب والحكومه فى بعض ....


البلد دى مش محتاجه حكومه
بجد البلد دى محتاجه شعب
اما اننا نستورد شعب
او عايزين كااااااااااااارثه وبلوة مسيحه
تخلق مننا شعب جديد
وتكنس وساخه ستلاف سنه


تفتكروا ممكن ؟؟؟؟؟؟؟؟؟؟؟؟؟؟؟؟


انا اتخنقت
مش هتكلم فى السياسه تانى
واحتمال كمان اقفل المدونه دى قريب


يلا
اياكش تولع !!!!!!!!!!!!!!!