الثلاثاء، 14 أبريل، 2009

التربنوخ التربنووووووخ



بقالى يومين عايز اكتب ومش عارف
اولا لان المواضيع اللى عايز اتكلم فيها كتيييييييييير قوى ..
ثانيا لانى مش عارف اكتب !!
مش من الخنقه والاكتئاب كالعادة , لا من كتر الضحك والتهييس اللى انا فيه .....

بصراحه مش عارف اقول ايه
اولا كدة موضوع اعتزالى
طبيعى جدا ان اى انسان بيمر بمراحل ضيق وخنقه الدنيا بتسود فى وشه ساعتها
ودة مش شرط يكون لسبب معين
هو ممكن يكون تراكمى , بس بتبقى دايما فيه قشه بتقصم ظهر البعير , مش لانها تقيله , طبعا لا ...
بس لانها هى اللى جت بعد الحد الاقصى للاحتمال ...
مش اكتر

وطبيعى برضه ( دا مع الانسان الطبيعى طبعا ) ان الحاله دى تنتهى ونكمل طريقنا
اينعم مش بنبقى مبتسمين وشايفين الدنيا بمبى ( لانها فعلا مش بمبى خاااالص ) بس بنكمل وبيفضل عندنا ايمان بالله وامل فى المستقبل ...
اللى مش طبيعى هو مراجيح المولد اللى حصلت فى كومنتات البوست اللى فات !!!!!

هو انا اجرمت انى بعبر عن رأيى ؟؟
اجرمت انى بتكلم ؟؟؟
مقدرش اتكلم عن موضوع مهم وخطير وابقى عايز اجيب قرارة فى سطر ونص!!!
مش تلغراف هو
( ارجع فورا لاستلام العزبه , جدك الباشا مات )....
الموضوع مش كدة...

لما اتكلم عن موضوع هايف او حتى بسيط ممكن اتكلم عليه فى سطرين تلاته
انما لما اتكلم عن مشكله اجتماعيه او سياسيه اعتقد ان شغل السطرين دة يبقى تهريج
الا لو كان شريط اخر الاخبار الاحمر اللى فى الجزيرة

شغل التيك اواى انا ببغضه جدا
ومش عندى
وبأذن الله مش هيكون
انا مش سطحى ولا تافه
ممكن اكون معقد ومكلكع
ودى وان ضايقت ناس
الا انها تشرفنى واعتز بيها....
التفاهه والعبط ليها مدوناتها
والفكاهه ليها مدونينها
والخواطر والاشعار ليها ناسها
والسياسه ليها برضه مدوناتها

انا ولا واحد من دول
او ممكن اكون كل دول
بكتب اللى يجى فى دماغى , بس مش اكتر
فى اى موضوع وفى اى اتجاة
ولما دماغى تتغير يبقى اسلوبى يتغير تبعا ليها

انما كونى اتغير علشان خاطر حد
او لان ( الزبون عايز كدة ) وغنى ياوحيد !!!
مع احترامى الشديد لكل الناس
ولكل واحد تعب نفسه وضغط الماوس على بلوجى
هذا لن يكون
ولو الدنيا كلها مشيت يمين وانا كنت شايف ان الشمال هو الصح
همشى شمال
ومش اول مرة اعملها , ولا هتكون اخر مرة ....

انا انسان انفعالى
مانكرش
بنفعل كتير وغالبا اسلوبى بيبقى حاد
بس بروق بسرعه ومش بشيل من حد
وباندم على حدتى و اعتذر عنها
مش عيب
وانا اسف لاى حد احتديت عليه فى مرة او هو اعتقد كدة
بس دة طبعى ياجماعه
ممكن احاول اقومه
انما دماغى وتفكيرى
مش هغيرهم علشان خاطر حد .........

__________

وما الدنيا الا مسرح كبييييييييييييييييييير
كلمه اتقالت من زمااااان
يوسف بيه وهبى باين , مش كدة ؟؟؟؟

صراحه , الواقع اللى انا شايفه دلوقت لا تنطبق عليه هذة الجمله مطلقا
ممكن نقول , وما الدنيا الا مرحاض كبير
مقلب زباله كبير

شوفتوا الخليه الارهابيه التنظيميه الرديكاليه الشيعيه البتنجانيه اللى نازلين دش عليها فى الاعلام المصرى ؟؟؟
معلش ياجماعه
الموضوع مش محتاج كلام
ومش محتاج تحليل , هو محتاج هبل , تريقه , انما تحليل ؟؟؟؟
معتقدش لانه اوضح وابسط من كدة ....
انا شخصيا امتنعت تماما عن مطالعه اى نوع من الجرايد او نشرات الاخبار , عدا الجزيرة ودة نادرا يعنى لما بفتحها دلوقت , يمكن متابع وكاله انباء نوارة هانم , الشهيرة بجبهه التهييص الشعبيه ...

موضوع الخليه دة بصراحه ههههههههههههههههههه , حاجه مسخرة , مش قادر ابطل ضوحك من كام يوم , بس لما بحس ان قلبى هيقف اغمض عينى واسد ودانى , ولما اخد نفسى واحب اضحك تانى اشوف اخر الاخبار ..

موافى شغااااااااال طحن ودش
ولا زكى رستم فى زمانه
ياعينى عليك يامعلمه , تربيه صلاح نصر صحيح , والله العلام جاب نتيجه ياولاد , وبارات وسط البلد طلعت اساتذة ....
دا زكى رستم يتعلم منك ياراجل
تخيلوا كدة موافى واقف فى فيلم ابيض واسود على سلم القصر وبيصرخ ويقول :
مررررررررراتى انا , الطاهرة العفيفه , بعد ستين سنه جوااااز , يغوووويها الشيطان , وتهههههههرب مع عشيقها ........
نفس النظام :
مصصصصصصصصصر صخرة تتحطم عليييييها مطامع الطامعييييين , ومكااااائد الكائدين , ومفاسد الفاسدين ...

هييييييييييييييييييييييييييه , عظمه على عظمه ياست
اعد ....

من الاخر انا شايف ان الموضوع دة لن يزيد حزب الله الا شعبيه
لان مصر دلوقت نوعين من الناس
الاولانى اللى لابس دماغه فى رجله ( اللى هو من نوعيه الصورة اللى فوق دى )
بتوع : الريس بتاعنا لابدلهم فى الدرة ومستنيلهم على غلطه , واذا تكلمت مصر فلابد ان تنصت اسرائيل , ان اولمرت مش بيخاف الا من مبارك ...
دا على اعتبار انه مش بيتكشف على رجاله ( اخاف واكش من دا الوش ) .....
بف بف بف ......يافضحتى ... راااااااااجل !!!!!!!!!
وانهم موقفوش الحرب على غزة الا لما هددناهم اننا هنوقف دخول المبيدات المسرطنه لمصر , فالراجل يعينى بنطلونه اتبل من الرعب ..

طبعا دول لن يزدادوا الا عتها على عته , ودول لا اعتبار ليهم اساسا لانهم مفقود فيهم الامل .....
__

والنوع التانى اللى شايف وحاسس بالوكسه اللى احنا فيها
والمس خرة اللى بتحصل فى سينا , كتكرار لسيناريو الفيلم الشهير :
- صباااااااح الخييييييييييير يا أمييييييييينه .
- يوة , صباح الخير ياسى السيد .
- مااااااااالك يا أمينه , مش على بعضك النهاردة ...
- ولا حاجه ياسى السيد , اصلى واخدة شويه برد ...
- لاااااااااااااا يا اميييييييييييييينه , انننننننننتى بتكدبى عليااااااااا , اوعى يكون فيه سلاح دخل من على الحدوووووووود يا امييييييييييينه ؟؟؟
- يوة , سلاح مين ياخوووويا , فشر , امال انا قاعدة بلعب ..
- أمال ماااااااال رجلك متجبسه ليييييييييييه ؟؟
- دنا اتزحلقت من على السللللللللللم قامت رجلى منتنيه تحت منى , اة , انتنت تحت منى ...
- اهااااااااا , يعنى مافيش سلاح دخل من على الحدووووود يا اميييييييييينه ؟؟؟
- ابدا ياخوووويا , دا اللى بيهوب هناك بقطع رجله , سلاح ؟؟ , قال سلاح قاااال ...
- ولا اكل يا اميييييييينه ؟؟
- ولا اكل ياخوووووويا ,, دنا حتى ببيع الخرفان اللى بمسكها فى المزاد , اكل ؟ , قال اكل قال , وحياتك عندى ياسى السيد دا انا بموووووتهم من الجوع ....
- هااااااااااااا , بس جاتلى اخبار من اهل الحته ان فيه ناس بيضحكوا عليييييييكى يا امييينه ويدخلوا اكللللل من وراااااكى ....
- ناس مين ياخوووويا دول ؟ قطع لسان اللى يقول كدة , دنا بعت وزارة الاندر كلها هناك ياخووويا , ووحياتك عندى , الا ما فيه نمله بتخش , امااااال , غليوم وطايح فييييييهم ...
- انننننننتى بتكدبى عليييييا يا امييييينه , قوووومى امشى انجرى لمى هدومك وروحى على بيت اهلك , وورقتك هتوصلك هنااااااااك ..
- ابوس رجلك ياسى السيد , انا فى عرضك ياسى السيد , دا انا جاريتك يا سى الس.....
- قلللللللللت امشى اطلعى برررررة , البيت دة معادلكيش عيييييش فيه بعد كدة ...

وتلم امينه هدومها وهى باصه فى الارض وبتعيط , بينما بيشاهد الموقف فى فزع مجموعه اخرى خارج الباب
يفتح سى السيد الباب فجاءة , فيجرى الجميع فى فزع

- واقفيييييين بتعملوا اييييييييه هنااااااااا ؟؟ اممممممممممشوا غوروا من وشىىىىىىىىىىى, اصلى مخلفتش رجااااااااله , مخلفتش رجااااااله يا امييييييييييييينه ...

وبعد كدة يروح سى السيد علشان يروق مزاجه المتعكر فى عوامه ناديه لطفى ....

اظن واضح مين امينه
ومين سى السيد
ومين ولادة اللى واقفين عالباب
ومين ناديه لطفى اللى بتروق مزاجه (هز ياوز ) ....
__

لمصلحه مين الهبل اللى بيحصل فى سينا ؟؟؟
يعنى انتوا لسه متعلمتوش
المشكله ان الحكومه هما اكتر ناس عارفين ان البدو مش بييجوا بلوى الدراع
اذا كان الجيش مش بيقدر عليهم وبيحاول يراضيهم
يبقى امل الدوله هو الحل ؟؟؟
طب , ماااااشى
خليكوا ولعوها كمان وكمان
واحفروا قبوركم بأديكم
وولعها ولعها , شعللها شعللها
انا بصراحه مشفتش غباء بالشكل دة
يلا
ياريت حكومتنا الموقرة تسد للاخر ومتزعلش من اللى هيحصل , لأن المشهد بقى كدة :
عنتر.. عنتر , اوعى يجيلك عنننننننتر هو المجدع هو السنتر عنتر ..عنتر
- الله الله الله , مييييييييين عنتر ؟
- نعم نعم حدلتك جاى تهزأنى ؟
- ايه ياخويا , الصوت دة جاى منين ؟؟؟ انت صوتك ماله ياعنتر ؟
- دا من يوم العلقه
- عللللقه !!! ولسه جاى قدامى , بقى انت عنتر انت ؟؟
- ايوة انا عنتر
- ونا كمان عنتر , ولافيش عنتر احسن من عنتر
- فتح يابنى فتح , شوف مين بيكلمك , دنا عنتر المفتح بصباعى اخرشمك , انتا تزقنى ؟
- فشر
- انت تهمنى ؟
- فشر
- طبعا فشر وميت فشر , مين زييى غامق فى البشر , وادى عبلتى محبوبتى ستريه جوليه ستريه قمر ...

طبعا معروف مين عنتر ومين عبلته محبوبته ....

او ممكن يطلعلنا عاطف السكرى بالمشهد دة :
- اخلصوا ناولونى الولااااعه , عايز اولع رووووما بحالها , انا مستعجل , عندى اذااااعه , خوطبه عاظيييمه لااازم اقولهاااااا ...
- هتقول ايه يانيرون سمعنا , متعنا بخطبك متعنا ..
- هزززعق زى الغوووووووووووول
- وهجعععععععععععر وهقووووووول
- تعاليلى يابطه
- ونا مالى هه
- وشيليلى الشنطه
- ونا مالى هه
- ونروحوا على طنطا ( او مجلس القمل )
- ونا مالى هه
- بزززززيادة أونطه
- ونا مالى هه

ولا نلاقى شيخ الغفر فى تصريح امنى خطيييييير وطالع يقول :
شفت الارنب ويا القطه راكبين تاكسى وبيقولوا هو ...
هوا يقولها حطه يابطه وهى تقوله نونونو ....

حسبى الله ونعم الوكيل
انا لو لسعت ( دا لو كنت لسه سليم )
ذنبى فى رقبه دول ....

بصراحه اعتذر عن الصورة اللى فوق
بس دى اكتر صورة لقيتها تعبر عن الواقع الصراحه

يلا
جتها نيله اللى عايزة خلف....... اشكال من النوعيه دى