الأربعاء، 29 أبريل، 2009

كفى نااااااااااااااااااااافسك





كفّى ناااااااااااااااافسك , انا عودت تموعى متمسحهاش الا عونااااااايا
كفى ناااااااااااااااافسك , انا اتعودت اشم صوابع رجليييييييييييييا

المفروض ان دى اغنيه
D:

اة بجد
اركب اى وسيله مواصلات الاقى السواق مشغلها ومعلى الشوند شستم العرة بتاعه على الاخر , يعنى مش كفايه التلوث الفنى اللى هيحصلنا من جاعورة المطنب المفضل بتاع سيادته , لا وكمان تلوث ضوضائى من سماعات وارد وكاله البلح ومكتوب عليها ( بيونيييير ) واوكلايزر من ابو خمسه وتلاتين جنيه !!!!!
وطبعا صاحبنا مستمخ على الاخر ومستكنيص من الاغنيه , ويتحرق الناس اللى معاة !!!!

تعدى من جنب ورشه ولا محل سمكرى ولا ميكانيكى تلاقى برضه نفس الاغنيه شغاله

لا والظاهرة الجديدة فى البلد
كل واحد يمشى فى الشارع ماسك الموبايل ( الصينى ) بتاعه ومشغل اغنيه ومااااشى يعمل دماغ ( اغانى شعبى ) !
فى كل حته نفس ام الاغنيه دى شغاله ولو فكرت تسأل حد عن السبب اللى مخليه يسمع الاغنيه ( الاميبيّه ) دى يبقى انت مش بتفهم وملكش فى ( الفن ) ومش بتعرف تتذوق الكلمات ( هى ( لكمات ) الصراحه ) ....

- طيب , اخوانا بتوع علم الاجتماع اللى بيعملوا ابحاث , اعتقد ان النوعيات دى ممكن يعملوا عليها دراسات هايله وهيطلعوا بنتايج مدهشه ....
هناخد بصه سريعه على الفن فى مصر , مش من باب الفذلكه , انما لاننا علشان ندرك الواقع صح لازم نقارنه باوضاع تانيه , عشان نعرف الفرق والاسباب والنتايج كمان ...
الفن الشعبى فى مصر زماااااااااااااان كان مقتصر على السير الشعبيه اللى بتمجد قيم البطوله والشهامه وهما كانوا على ما اذكر حوالى سته او سبعه تقريبا اشهرهم ابو زيد الهلالى , اما الغناء فكان مقتصر على اغانى تراثيه متداوله من قديم الزمن لايُعرف لها صاحب , زى اغنيه الحنه مثلا , وكنتيجه لبعض الاحداث الاجتماعيه فى مصر , اذكر اغنيه قديمه بتقول : البلبل جانى وقاللى - اسمحلى بوصلك يا دللى , ( يادلّى ) هنا المقصود بها فئه من عساكر الجيش العثمانى اللى كانوا موجودين فى شوارع مصر بكثافه , وواضح طبعا ان اللى عملت الاغنيه عالمه او مومس بقصد امتاع البهوات حمر الوجوة , الا انها استمرت فى الوجدان المصرى حتى اوائل القرن العشرين .
وطبعا كتير كانت الاغانى دى لا تخلوا من تلميحات واسقاطات قبيحه , لا مجال لذكرها الان ...
كمان كان موجود الفن الشعبى فى الاقاليم ودة فضل محافظ على نفسه بشكل اكبر ولا تزال هناك بعض الاغانى التى يرددها اهل القرى وترجع لمئات السنين , وكذلك اهل الصعيد , واهل النوبه كمان ....

- فى بدايه القرن العشرين بدأ الحال يتغير بظهور فئه من المطربين يسمون بالفنانين الشعبيين , طبعا هما موجودين من زمان , ولكن اقصد بالظهور هو خروجهم برة وسطهم ونشر فنهم فى الاوساط الاخرى واكتسابهم لقدر عالى من الاحترام فى المجتمع المصرى , ودة حصل لما ابتدوا فى طباعه الاسطوانات , الرائد فى دة فنان محترم جدا اسمه ( محمد العربى ) اكتسب شهرة واسعه فى العشرينيات كنموذج للفنان الشعبى بجلبابه وعنقه الغليظ وطربوشه الشيك وشنبه اللى يقف عليه الرخ ..

- وجه بعد منه سيد درويش الطنطاوى ( اللى كان بيغنى فى فيلم رصيف نمرة خمسه ) وجه بعدة كمان المطرب اللى كل الناس تعرفه ( محمد طه ) ودول مشوا على نفس الاسلوب من كلمات تعالج قيم الوفاء والشهامه وكمان الحكم والامثال والارتجال والتلاعب اللفظى من خلال المواويل ...

الاسلوب دة كان انعكاس لشخصيه الطبقات الدنيا فى المجتمع المصرى اياميها من حيث انتشار قيم الوفاء والشهامه والنخوة ( اللى اختفت حاليا ) يعنى فن كان بيعبر عن الناس ...

- ولن اعزف على وتر ان زمان مكانش فيه اسفاف ولا ابتزال , لا طبعا كل عصر وله اسفافه وابتزاله , انما الميزة زمان ان الفساد الفنى كان محصور فى وسط معين وله نطاق محدد لا يخرج عنه , يعنى كان عارف حدودة , ودة اللى مش موجود دلوقت ...
بمعنى :
زى مافيه دلوقت هايفه ونجلا , زمان برضه كان فيه نبويه شخلع وستوته عزت , الا ان اخر اتنين دول كانوا فى حيز ضيق جدا لم يخرجوا عنه بعكس ( طنط ) هايفه , وباقى اللسته ...

يعنى المشكله مش فى الاسفاف , لان الاسفاف لااااازم يكون موجود عشان المعادله تنظبط , المشكله فى خروج هذا الاسفاف عن حدودة وطغيانه على الباقى بحيث يكون هو القاعدة وغيرة استثناء ( ودة اللى حصل دلوقت ) وان زمان الاسفاف كان يقتصر على الكلمات واسلوب الالقاء ( الموحى ) ولم يمتد الى اللحن او الفرقه الموسيقيه , بعكس الوضع الحالى برضه ....

نيجى للمصيبه الكبرى , فاكرين لما قلت ان الفن الشعبى انعكاس لفئه معينه فى المجتمع وان الفن زمان كان يمجد الرجوله والشهامه اللى كانت موجودة فعلا , كان مجرد محاوله تحرش فى الشارع كفيله بهبد صاحبها علقه موت تخليه يكيح فى المستشفى كام شهر وقد يخرج منها على الترب مباشرة ....

دلوقت الفن الشعبى ( مجازا يعنى واعزرونى فى الكلمه ) بيتكلم عن ايه ؟
- بيتكلم عن النفاق والانتهازيه , واللى بيمجدها بدورة وبيسميها فهلوة وشطارة !!!
- احتقار المرأة والحط منها واختصارها فى مجرد جسد , وان فكر فى منافشه عقلها فلا يتم الحديث عنه الا بكونه عقل ( لمومس ).....
- الانعرة والنفخه الكدابه , وانا انا الواد الصايع الشبّيح اللى محدش يقدر عليا ( راجع اغنيه المدعو سعيد الهوا كنموذج ( بتاع عملت واحد امباليه ادانى اتنين فرقعه فى الشكمان ورا ) )...
- البانجو والحشيش والكُلّه هما الاصل ولااازمن كلنا نصطبح ونوستكيف , ودة مش عيب , بل انه هو الاساس والقاعدة , واللى مش بيعمل كدة هما الناس المكلكعين الوحشين ..
- كل ما كانت جاعورتك اعلى وصوتك محشرج كل ماكانت شهرتك اكبر , لذلك فيجب عليك كمطرب شعبى ان يكون دمك مستودع لاكبر كميه من المخدرات والبرشام وكذلك صدرك لكى تصل للمستوى المطلوب من الحشرجه الصوتيه ( اتباعا لقاعدة التسليك قبل الفتح )
- ماتخافش , كل ما تتمسك فى كمين بحرز مخدرات كل ما هتنشهر اكتر والناس تحبك .....
- تجنب اى غنا فرايحى , خليك فى الحزن والكأبه والنكد والنواح ( الناس عايزة كدة ) ....
- البس لبس غبى وغير متناسق بالوان فاقعه وسخيفه وبكرة هتطلع موضه عند الطبقه المذكورة ...
- الغنا فى افراح الحظ هو السلم اللى هيوصلك الى الشهرة , طبعا اللى حضرالنوعيه دى من الافراح عارف كويس بيحصل فيها ايه !!!
- لما تيجى تتكلم عن الجنس فاخبط الكلام علطول وبشكل سخيف ومافيش داعى للتلميح او التلاعب اللفظى زى الناس زمان ماكانت بتعمل , يااعم احنا فينا عقل ولا دماغ نلمح , ولا احنا عندنا قدرة استخدام للغه اصلا ؟؟؟
___

اما الانشاد الدينى , كان عندنا زماااان فن للانشاد يتزعمه عمالقه من امثال الشيخ اسماعيل سكر وابراهيم الفران وعلى محمود واخرهم الشيخ رفعت وبعدة النقشبندى ..
اغانى الموالد وتواشيح الصوفيه ( برغم بعض المأخذ ) الا انها كانت ذات مضمون جدير بالاستماع وايقاعات والحان تأخذك لعالم اخر ...

دلوقت احنا فى زمن ( المولد ) اللى ظهر موضه فى سنه 2003 , ولما انشهر اصبح عندنا طوفان شرايط يبدأ اسمها بكلمه ( المولد ) ومش مشكله مولد سيدى ابو صباع ولا مولد كفر الشنشلمون ولا العربى فرحان , ايقاع واحد ثااابت يدل على فقر فنى كبيييير , ونشر لقيم السلبيه والدروشه الفارغه والمطوحه يمين وشمال مع ترديد الفاظ جوفاء ليس لها اى معنى او مدلول ( راجع اغانى المدعو محمود الليثى )!!!
____

اللى يدقق كويس فى النقط اللى فاتت دى يلاحظ انها فعلا مرايه لأوضاع المجتمع المصرى بوجه عام والطبقات الدنيا بوجه خاص , بتعكس التغيرات السلبيه فيها بمنتهى الوضوح , كما ان طغيان هذا النوع وزحفه على اوساط اجتماعيه اكثر رقيا يعكس بوضوح اتساع الطبقه الدنيا فى المجتمع وتمددها على حساب الطبقه الوسطى .
وان الصوت العالى دايما فى الاغانى دى وكمان فى اللى بيشغلها ( لاحظ ان اى سواق ولا سمكرى لما يشغل دول لاااااازم يعلى الصوت على الاخر ) ودة ما هوا الا محاوله لاثبات الذات , احنا اهو , احنا قادمين , تجاهلونا زى ما انتوا عايزين , بس احنا هنثبت نفسنا بالحل الاسهل , اللى هوا الصوت العالى وهنفرض نفسنا عليكوا بالصوت العالى , المستقبل لينا , دوله عماد بعرور وسعيد الهوا قااااادمه غصب عنكوا .....

الموضوع محتاج اكتر من بوست الصراحه ,
عشان كدة انا ناوى اعمل اكتر من بوست عن الموضوع دة وهاذكر نماذج من الاغانى دى , طبعا لن اجرؤ على عرض الاغنيه ولكن هذكر النص بس , وهحكى كمان عن تجربتى مع كذا فرح من افراح الحظ ....
_______

ملحوظه اولى : ونا بكتب دلوقت لسه معدى توك توك فى الشارع مشغل اغنيه ( كفى نفسك ) المذكورة , وطبعا معلى الصوت على الاخر ...:D

ملحوظه تانيه : الصورة الاولى للمطرب الشعبى القديم محمد العربى , اما التانيه فدى لسخس منزّل ( البون ) من انتاج شركه ( جحش فون ) والصورة جايبها من اعلان منشور على النت ومكتوب تحته انه ( البون ) جااااااااامد ( كيك ) !!!!

ملحوظه تالته : الاغنيه اللى شغاله دى لنموذج من الاسفاف الفنى فى اغانى زمان ( العشرينيات ) اتمنى انكوا متكونوش قفلتوها ....

ملحوظه اخيرة : ............ سلاموووووووووووووزززززززز