الخميس، 7 مايو 2009

ياعينى على الصياعه



مين اللى بيفرقع بمب ؟؟؟!!!!

ايوة بجد مين اللى بيفرقع بمب دة ؟

كفايه كدة , اعتقد ان الموضوع بوخ قوى وريحته طلعت خااااااالث ....

قال ايه خير اللهم اجعله خير ناس ولاد حلال مطلعين اوشاعه ان مصر بتعمل نووى , او بمعنى ادق مسربين معلومات عن موقف سخيف وعبيط حصل من سنتين ومش كدة وبس , لأ دول كمان محورينه ومضخمينه بشكل لافت للنظر ....

طب واحدة واحدة كدة وبالعقل والمنطق
مين له مصلحه فى فقع ال*** دة ؟؟؟؟؟؟؟
اسرائيل ؟؟؟
اكيد لا , لانها مصلحتها مع النظام المصرى وهما حاليا زى الاسهال على الخرة والصهاينه نفسهم ماكانوش يحلموا ان العلاقه بينهم وبين النظام بتاعنا تتطور من بوس واحضان الى علاقه كامله , لا واوضاع بتتصور بالصوت والصورة كمان ..

نقول امريكا ؟؟؟؟
اكيد لا لان اوباما معتقدش انه بيفكر يتدخل عسكريا تانى فى اى دوله على الاقل حاليا , الراجل كل همه يخرج من الوكسه اللى الولد الخنزئور بوش وقع امريكا فيها هو وحبايبه اليهود اصحاب البنوك ....
وحتى لو فرضنا ان امريكا حبت تتدخل عسكريا فى مصر مستقبلا يعنى , اعتقد ان تلكيكه النووى دى عبيطه جدا وغير منطقيه وخصوصا لما نتكلم عن نظام منبطح ومنجعص زى النظام المصرى , ممكن مثلا يتلككوا بحقوق الانسان والاتتهاك والشيطرة والطرطرة والقمع الامنى , كدا تبقى مبلوعه شويه .....

يعنى لا امريكا ولا اسرائيل ليهم مصلحه لانهم حتى مش محتاجين يبتزوا النظام المصرى لانه مبتز جاهز , وبما ان كل باقى مراكز القوى فى العالم لا تخرج عن ارادة الدولتين دول يبقى مافيش حد من برة له يد فى الموضوع دة ....
يعنى مش انت اللى عطست يا ابو سريع
ولا انت
ولا انت
بيقى اكييييييييييييييييد فيه حد غريييييييييييييب

يبقى نيجى على مصر , هل النظام المصرى له مصلحه فى فقع الاوشاعه دى ؟؟؟؟
طببببببببببببععععععععععاااااااااااااااااااا
لما يسرب خبر زى دة , يقوم البهايم اللى من نوعيه ( التعلب بتاعنا لابدلهم فى الدرة ) هيقولوا هييييييييييه , التعلب بتاعنا بيعمل نووى فى السر علشان يضرب اسرائيل ويخوف امريكا , عمااااااااار ياعوووووكل , فليخسأ الخاسئون وليتفنيخ المتفنيخون ....

صح , اظن كدة تركب , وكمان مافيش داعى بقى حد ينتقد الحكومه ولا يتكلم عن الفساد ولا يعيب فى يهود خيبر , والا يبقى خاين وعميييييييييييييل , ايون عميل للدول اللى سربت الخبر السرىىىىىىىى بتاع النووى , ايه مش مكفيك انك هيبقى عندك نووى ؟؟؟؟
اتكتم بقى واتسجن واتسرق واتسحل وانت ساكت لغااااااايه لما نعمل النووى , ههع هع هععععععععععع .....

وتكمله للمسلسل السخيف يطلع لنا مسئول وينفى نفيا قااااااااااطعا حادا باردا الكلام دة , طبعا يعملوها ويخيلوا , التعلب بتاعنا بيعمل نووى فى السر , وساعه لما حد يتكلم يعمل ميعرفش حاجه , اة يالئيييييييييييم , تعلب وناصح بقى ......

وكمان ممكن بالمرة ندخل فى الليله كام حمار ينهقوا ويقولوا ان ايران هى اللى وزت على مصر علشان بتغير من المشروع النووى الانوى الضخم العملاق بتاعنا ومش عايزة حد فى العرب يبقى عندة نووى غيرها , وبالمرة بقى ندخل كمان حماس وحزب الله ونقول ان سامى شهاب كان بيخطط لعمليه تستهدف نسف مفاعل انشاص الخطير الرهيب العجيب !!!!!!!!!

دا مفاعل انشاص دة مفاعل عقييييييييييييييييييييييييييم جدااااااااااا , ومن عاشر المستحيلات انه يعمل نووى , دا اخرة يطلع شويه كهربا !!!!

انا الخبر مش غايظنى , لانى متعود من المعاتيه بتوعنا على الاخبار الفاكسه العبيطه دى , اللى غايظنى ان لسه فيه ناس عبيطه هتصدق وهتفرح وهتقع فى الخيّه ....

انا شامم ريحه موافى وعمر سلمووووز , ايه ؟؟؟؟ واضح ان البهوات بتوع فرع اعداد الرأى العام شغالين وللللللللعه , كل كام يوم بمبه علشان الناس تتلهى فيها , والصحافه طبعا صحافه بمب تفرقع البمبه وتنساها وتانى يوم تدور على بمبه تانيه ....
طيب
ايه اخر اخبار حادثه بنى مزار , عرفتوا الجانى ولا لسه ؟؟؟
وممدوح اسماعيل , دورتوا عليه وجبتوة ولا لسه ؟؟؟؟
والولد اللى لبس تهمه قتل نادين , اللى انطس اعدام , اخبارة ايه ؟؟؟؟
والسكرى وطلعت مصطفى , مالهم الكل سكت عنهم مرة واحدة لييييييييييييه ؟؟؟؟

وغيرهم وغيرهم وغيرهم كتييييييييييييييييييييييييييييييييييييييييييييييييييييييييييير
افتكروا كدة مع نفسكم وانتوا تكتشفوا حاجات كتير لبست طاقيه الاخفا مرة واحدة واتنست ,
علشان تعرفوا ان الاعلام والصحافه بتاعنا تخصص بمب وبيتحركوا بالريموت كنترول كمااااااااااان
وسلملى على جرايد المعارضه وبرامج الرأى ( الحر ) بتاع دريم والمحور ......


فاكرين قصه صاروخ قاهر والظافر اللى عبناصر دوش الناس بيهم وخلا اسرائيل تعمل بىبى فى الاندر بتاعها خوفا من الصاروخين الفظاع الشناع اللى هيخسفوا الارض بتل ابيب , ودوشونا بيهم فى الاخبار والاهرام كل يوم يفقعونا مانشيت طويل عريض عن الصاروخ الهلامى , وبعدين لما فكروا يستخدموهم فى حرب اكتوبر اكتشفوا انهم حته حديد .....

الفكرة واحدة انما الاسلوب اتغير واصبح اكثر خبثا , زمان مكانش فيه غير الراديو والتلفزيون والجورنال , والحكومه مسيطرة على التلاته , فمن السهل انك تعمل كدبه باسلوب مباشر لان الناس , اغلب الناس مش بتسمع حد غيرك , انما دلوقت فيه حاجات خارج السيطرة ولو جزئيا زى الفضائيات ( الغير مصريه طبعا ) والنت , فمعادش ينفع نكدب كدب مباشر ( ولو انهم لسه بيعملوها ساعات ) , انما ممكن نغير الاسلوب , نفقع اشاعات زى النسوان البطاله , هو دة اللى هما شاطرين فيه , جتهم ستين خيبه على خيبتهم ......

الله يخرب بيتك ياللى فى بالى