الأحد، 10 مايو، 2009

( خصخصنى ) فى التيلمانى

























بصراحه انا بقالى فترة متردد ما بين 3 بوستات واجعين دماغى وعايز اكتبهم من ضمنهم بوست بفكر فيه بقالى اكتر من شهر بس كل شويه أأجلهم ....
لانى نفسى اديهم حقهم صح ( من الرغى يعنى )
وفى وسط صداع الافكار دة اتصدمت بخبر غريب جداااااااا ....
تصدقوا ان لسه فيه الى الان ناس في مصر فرحانه ( بالخصخصه ) وشايفه انها مشروع ناجح ونفع البلد !!!!!!!
ايوة ناس عاديين زينا كدة ومش من الحكومه ولا حاجه , يعنى مش اصحاب مصالح .
بصراحه انا بحاول اجيبها يمين شمال مش راكبه خااااااااالص..

طيب ناخد فلاش باك لورا نشوف اصل الحكايه ايه
من كام سنه جه حبيب القلب قال ياجماعه فيه شركات قطاع عام بتخسر جامد ومشكله وعامله عبء على الدوله وان الحل الامثل اننا نبيعها للقطاع الخاص علشان يجدد حيويتها وبكدة القطاع الخاص بتستفيد والمواطن بيستفيد مشاريع ناجحه بتتعمل فى بلدة والحكومه بتقبض فلوس تزود الميزانيه ( المخرومه ) ...

طيب لغايه كدة كويس قوى ..

اياميها الناس انقسمت بين مؤيد ومعارض , افتكر اياميها ابويا فرح وشجع الموضوع بينما العبد لله قال انه شامم ريحه مش ولا بد ( شفتوا , من ايام ابتدائى ونا بشم الريحه الوحشه ) ....

طب نرجع لورا اكتر علشان نعرف ايه سبب المشكله.
ايام عبناصر لما عمل النظام الاشتراكى الفحلقى المصرى كانت الدوله مسيطرة تماما على الاقتصاد وكل المؤسسات , ودة وان كان اضر كثيرا باصحاب رؤس الاموال الا انه نفع العمال والموظفين جداااااا ...

طيب مثلا لما نقول شركه بتبيع اداوت منزليه والشركه دى ملك الحكومه , دة معناة ايه ؟؟؟
معناة ان اللى شغالين فيها موظفين
يعنى التعيين مش على اساس الكفاءة
يعنى الموظف عارف انه كدة كدة هيقبض اول الشهر سواء اشتغل ولا مشتغلش
يعنى الموظف مش خايف من فقدان الوظيفه ( نسبيا )
يعنى روح التنافس والابداع تقريبا قليله , مش هقول منعدمه لان اياميها كان فيه ضمير برضه ..

طب ازاى الشغل يمشى صح بالرغم من كل العيوب دى ؟؟؟
عن طريق الادارة
طول ما فيه ادارة فاهمه شغلها وعندها ضمير , وحازمه , كل العيوب دى هتنقلب مميزات وحوافز تحفز العمال والموظفين على انهم يشتغلوا احسن ...
مين فينا معندوش فى بيته الى الان تلاجه ولا مروحه ولا سخان ولا حتى تلفزيون من انتاج مصانع زمان ولا ماركه تليمصر ولا الحاجات القديمه دى ؟؟؟؟
يعنى الادارة الحاسمه والواعيه هى صمام الامان لنظام زى دة , وبتحلل الادارة دى النظام دة هينهار بالكاااامل ..

جه اونكل سادات وقلب النظام الاقتصادى ميه وتمانين درجه من الاشتراكيه للرقص ماليه , ودة فى حد ذاته غلط
يعنى كونك تغير البوصله الاقتصاديه لبلدك مرة واحدة فدة بيبوظ الدنيا ايا كان اتجاهك ...
فاللى حصل اشبه ببسترة اقتصاديه , بس دى مش بتعقم زى بسترة اللبن , لا دى بتدمر وتهد .
وبعد اكتوبر 73 وكامب نيله اتفرغ السادات للمصريين الاوغاد علشان يربيهم من اول وجديد , وبدات تظهر فى مصر الحيتان الكبيرة والقطط السمان وانقلبت البلد لعزبه تملكها عيله ( كبير الكفر ) وزوجته ( السيدة الاولى ) وعرفنا حاجات زى ان ابن خاله جوز مرات عم الريس يسرق وينهب بدعم من صلته بالريس , واخوة مش عارف يعمل ايه مين فين , يعنى الفساد ظهر فى البلد , كان قبل كدة واخد طابع استبدادى قمعى عسكرى , فساد سياسى يعنى , انما دة كان مستشرى فى القطاعات الاقتصاديه بشكل اوضح ....
وبدأت نظريه ان اهل الثقه اولى من اهل الكفاءة تثبت نفسها على ارض الواقع بشكل اكبر من زمان , فاصبح عادى ان واحد يمسك منصب كبير لمجرد انه موثوق فيه او انه قريب الريس , مع انه معدوم الكفاءة ...

طب دة علاقته ايه بموضوعنا؟؟؟
علاقته ان بالشكل دة صمام الامان اللى اتكلمت عليه انضرب فى مقتل , فابتدت العيوب اللى قلت عليها تظهر بوضوح اكتر , فبالتالى ابتدا كيرف الانتاج فى المؤسسات الحكوميه ينزل لتحت سنه بسيطه , لان برضه الموضوع دة كان محدود نسبيا ....

راح السادات فى ستين داهيه وجه عووووووكل , الراجل فى اول ايامه مكانش مصدق نفسه وبيبوس ايدة شعر ودقن على الامله اللى بقى فيها , ويبدو كدة والله اعلم انه كان ناوى يصلح , وابتدت تظهر شويه ايجابيات بسيطه وسمعنا عن ناس محترمه فى مناصب كبيرة زى احمد رشدى وحسب الله الكفراوى وغيرهم ....
لكن حصل موقف قلب دماغ الراجل ميه وتمانين درجه ( دا حسب تفسيرى والله اعلم ) الموقف دة هو حادثه تمرد الامن المركزى , ودة وصل لعوكل رساله واضحه من حيتان البلد بيقولوله فيها :
فوق لنفسك , احنا اللى ماسكين البلد مش انت ونقدر نطربقها على دماغ الكل فى ثانيه ...
ابتدينا نلاحظ انتكاسه فى اواخر التمانينيات ادت الى سيطرة مطلقه من الجهاز الامنى على كل كبيرة وصغيرة فى البلد , فبقينا نسمع عن شخص فااااشل ومعتوة يمسك مصنع او شركه ضخمه لمجرد ان تقرير من قمل الدوله شكر فيه , بينما الشخص الكفء يستبعد لانه ( مشكوك فى ولائه )..

كدة بقى الصمام اتشال واتهربد وانحرق بجاز , وبدأ القطاع العام ينهار بشكل فظيع وغير عادى ...
جه الباشمهندس بعد كدة وفقع البقين دول ( اللى قولتهم فى الاول ) , الناس قالت كويس ( ناس طيبين والله ) ...
وابتدا مولد بيع الشركات بتاع القطاع العام وسط خليط من تصريحات من نوعيه ( لا مساس) بالشركات الكبرىىى لان دى امن قومى وبتتحكم فى مقدرات البلد ...

طيب , عظييييييييييم , حاجه حلوة خااالص , ايه بقى اللى حصل بعد كدة ....

فوجئنا بسيل من المستثمرين ( او اللصوص ) الاجانب هجموا على كل حاجه يشتروها بسُعار غريب
اولا الشركات والمؤسسات اتباعت باقل من سعرها بكتييييير جدا ( راجع فضيحه صفقه بيع عمر افندى ) وطبعا الفرق دة على خساب صاخب المخل ( اللى هوة المواطن ) اما البيه البياع ( الحكومه ) والبيه النصاب ( المستثمر ) فشيلنى واشيلك ويابخت من نفع واستنفع .....
كدا عندنا بومبتين الاولى هى غزو اجنبى بيسيطر على البلد تدريجيا ( يعنى رجعنا تااانى لايام الخديوى والامتيازات )
التانيه ان الشركات اتباعت فى صفقات اقل ما يقال عنها انها صفقات خسراااااانه بالثلث والنسخ والرقعه كمان , اتباعت بتراب تراب الفلوس ....

بدأ المستثمرين فى طرد العماله القديمه بدعوى اقتصاد النفقات , يعنى دخلنا فى خراب البيوت وزيادة نسبه البطاله , دا غير الحقد والكرة للبلد اللى هيتولد فى نفوس قطاع كبير جدا من العمال والموظفين ( اظن واضح )....

فوجئنا بان تصريح ( لا مساس ) مدهون بزبدة , وابتدينا نلاقى شركات ضخمه تشكل صلب الامن القومى المصرى بتنباع برضه ( راجع شركات الاسمنت وغيرها ) ...
يعنى البلد اتسلمت تشطيب سوبر وعالمفتاح للمستثمر الحرامى وكمان قالوله ادى رقبه مصر اهى اطبق فى زمارتها براحتك .....

طيب قطاع زى الكهربا , مش اتخصخص باين ؟؟؟؟
يعنى بقى قطاع خاص
طب دلوقتى فيه جهاز امنى اسمه شرطه الكهرباااااء , دة كان تابع للهيئه لما كانت حكوميه , طب الوضع دلوقتى ايه ؟؟؟؟
اصبح عندنا قوات نظاميه من الداخليه بتخدم رسميا وبتتبع قطاع خاص مملوك لفرد او هيئه غير حكوميه , ودى مصيبه ..

وفى الطريق كمان سكك حديد مصر , وبدأ بالفعل نظام مستتر للخصخصه التدريجيه فيها من خلال الكافيتريات كبدايه , وبدانا نسمع دلوقتى عن خصخصه القطار الفاخر , والبقيه تاتى ...

طب فاضل ايه تانى , اظن ما فيش حاجه بعد كدة ( لسه باقى المؤسسات ونختم بقى ببيع الهرم وابو الهول بدعوى ان المستثمر هيعرف يرممه كويس ) , دا كمان بدات خطه تخريب متعمد لاضخم مؤسسات الدوله لاستخدام ذلك فيما بعد كحجه لخصخصتها ( راجع فضايح شركه غزل المحله ومجلس المنصر .. اقصد مجلس الادارة , اللى له حد شغال فيها يسأله )....

- طب انت كدة بعت حاجات مينفعش اساسا انها تتباع , يعنى ممكن البيه ييجى بكرا يقولك كيلووات الكهربا بعشرة جنيه لو مش عاجبك هقطع النور عنك واخبط دماغك فى الحيط ....
- من بكرا شيكارة الاسمنت بالف جنيه واللى مش عاجبه ميشتريش , وقف الانتاج يااااض وعطل المكن , من النهاردة مافيش بنا , مزاج اهلى كدا ...
- وتذكرة القطر بميه جنيه ولو مش عاجبك اركب مواصلات , وشوفوا بقى كام مليون لما يهجموا على مواصلات الاجرة وهل قطاع النقل الخربان اساسا فى بلدنا هيستوعبهم ولا لأ , ولا بقى كل واحد يشتريله حمار ولا جحش ولا ناقه يركبها على اول الزراعى ويشلخخخخخخخخخخخخ .
- ايه دة ؟ الاف العمال دول بيعملوا ايه فى شركه غزل المحله ؟, احنا ناقصين قرف , برررررررررة خرسيس ادب سيس , ويبقى عندنا شبه محافظه كامله من العواطليه , دا غير ان سيادك لازم تلاحظ ان الجيش والداخليه بيعتمدوا كليا على شركه المحله فى انتاج مستلزمات المهمات , يعنى من بكرة هنشوف الدُفعه ماشى بلبوص .....

نيجى بقى لحصيله البيع , فين الفلوس ياحلوييييييييييين ؟؟؟؟
- منييييييييييييييييييييييييييييييييييييييين
- والله ما فيه ولا نكله , اصلكوا مساعير احنا هنلاحق على ايه ولا ايه كتكم مصيبه شعب مفجوع !!!!!
ونبدأ نسمع وصلات من المهازل , يقوم زفت الطين فى مجلس الشعب ويقول احنا بعنا شركات بسبعتاشر مليار , فيقوم وحل البرك التانى يقول انا موصلنيش الا عشرة بس !!!!
يالهوى
يالهوىىىىىىىىىى
يالهوىىىىىىىىىىىىىىى
امال باقى المليارات دى راحت فين الهى يخرب بيوتكوا ؟؟؟
وقعت فى السكه ؟؟
ولا سرقتها الحدايه ؟؟؟
يعنى بعتوا البلد بملاليم وحشيتوا جيوبكم وحتى اللى بعتوا بيه مستخسرين تسيبوة وراسكم والف سيف لتسرقوة برضه !!!!
ويجى واحد فى الموازنه يحطلك فى بند السهو والخطأ عشرة مليار !!!!
هههههههههههههه
سهو وخطأ عشرة مليار ؟؟؟
ياحلوللى , ياحلوللى
انا الارقام دى مش متاكد منها بس هيا عموما بالمليارات , مهندس مصرى عندة الارقام الصح .....
وبعدين يجوا يقولوا خير اللهم اجعله خير البلد فى ازمه ومافيش كاشات واحسبها صح تعيشها صح !!!

نيجى بقى لاخر الكلام
ومن كل اللى قلناة فوق دة
الخصخصه نفعت البلد دى ولا لأ ؟؟؟؟؟
اعتقد ان الاجابه مش محتاجه كلام
لولا انى معنديش ارقام مظبوطه او بيانات صح كنت ذكرت امثله اكتر من كدة بكتير , ياريت اللى عندة حاجه او احصائيه يقولها ..
وماحدش يجى يقولى لا ياعم دا الشركات نضفت وعندك عمر افندى بعد ما كان عامل زى القبر اتنضف واتمنجه واتردت فيه الروح ...
طب وبعدين
نضف واندهن وبقى بيلم زباين
يافرحتى
تقدر تقولى احنا مستفيدين ايه من كدا ؟؟؟
طالما العامل اللى شغال جوة بيقبض ملاليم ومحروم من ادنى حقوقه , والمستثمر حرامى وشيخ منصر وغالبا اجنبى , كما ان المحل مش بيبيع الحاجه بالتقسيط يعنى ولا بينزل البضاعه على بطاقه التموين , يعنى الناس الغلابه بالعكس , يمكن لو كانوا بيروحوا يشتروا منه زمان , فهما دلوقتى لن يجرؤوا على دخوله ...
مصر مليانه ملاعب جولف وحمامات سباحه ومولات ( بالمليارات ) وقرى سياحيه تشرخ القلب الحزين ...
وبعدين
هل تعتقدوا ان دة افاد البلد فى حاجه ؟؟؟؟

- ياسادة احنا عايزين شركات ملابس عالميه تغطى الاحتياجات المحليه وتصدر للخارج وتجيب عمله صعبه وتشغل الناس الغلابه وتحسسهم بالامان والاستقرار...
- عايزين هيئه كهربا حكوميه محترمه يكون هدفها الاول خدمه المواطن ومد شبكه الكهربا لكل مكان وتجديدها مش شويه حراميه كل همهم انهم يبتكروا اساليب شيطانيه جهنميه ( لتقليب ) جيوب الناس ...
- عايزين هيئه اتصالات على مستوى عالى وخدمات نضيفه مش ناس كل همها تنزل كل شهر بنود اضافيه على الفاتورة ....

اة الناس كانت مش بتشتغل فى القطاع العام والشركات كانت بتخسر , بس مش معنى كدة انى ابيعها , طب صلحها يا اخى , جرب تصلحها الاول ..
تخيل مثلا بنطلونك اتقطع فوديته لواحد ترزى يخيطه قام مولع فيه !!!!!

تخيل نفسك عندك عربيه قديمه ومهكعه بس ناشفه واصيله بتروح بيها كل يوم لشغلك البعييييييد جدا ,
وانت مش مراعى عربيتك دى ومهملها مما ادى لظهور اعطال متكررة فيها ( بس اعطال ممكن علاجها ) ..
واحد ميكانيكى جه فى يوم وقام ضاربلك فرد الكاوتش من غير ماتاخد بالك وجرى قعد فى دكانه ,
سيداتك بتدور على ميكانيكى ولا ورشه لاقيت البيه فى وشك
اى خدمه يابيه ؟
- ممكن تصلح فرد الكاوتش دى
عونيا استنانى ثوانى
ياباشا الفِرَد دى خسارة فيها التصليح
- دى قديمه وماركه محترمه واصيله
ياباشا اسمع كلامى وبيعها وانا عندى الزبون
- امرى لله
ياباشا الفرد جابت ربع جنيه !!!
- ايه ؟ ربع جنيه بس ؟
يعنى هو انا هسرقك الفرد دى ملهاش زبون وانا اتحايلت على الراجل لحد لما وافق يشتريها
- طب هات الربع جنيه
لاااااااااااا ما انت هتدينى الفرد الاول وبعدين اروح اجيبلك الفلوس من الراجل ..
- طب امرى لله ..
جه تانى يوم قام مدغدغلك العربيه كلها
رحتله تاااانى , والنبى تصلحلى العربيه دى
ياباشا دى متنفعش بنكله بيعها احسن
- طب واورح الشغل ازاى
اركب مواصلات , مانت هتاخدلك قرشين حلوين برضه ..
وبعت العربيه بتراب الفلوس وجيت تركب المواصله الوحيدة اللى توديك شغلك ففوجئت بالراجل اللى اشترى العربيه بتراب الفلوس مصلحها وشاددها شدة عسل ومشغلها اجرة ومستغل ان مفيش حد غيرة على الخط دة ورافع الاجرة عشر اضعاف واللى مش عاجبه ميركبش !!!
- ازاااااااى دة , دا غلط ومينفعش ( دا انت )
المستثمر ( او المالك الجديد ): انت يااااااض , شكلك مش عاجبنى , يلا غور فى داهيه مانتاش راكب !!!

طب لو حضرتك من الاول شغلت مخك وعرفت ان الميكانيكى دة ضلالى ونصاب ولو كنت اخدت العربيه دى سقطت لها موتور جديد وشديتها صح وظبطتها , اينعم كانت هتتعبك شويه , بس مش كان زمانك دلوقت راكب عربيه اصيله وفى نفس الوقت جامدة وسريعه وزى الفل , والاهم مكنتش هتُذَل وتنهان للاشكال الوسخه اللى زى ( المالك الجديد ) دة ؟؟؟؟؟؟؟؟؟؟؟؟؟؟

صح ولا انا غلطان ؟؟؟؟

النظام الاشتراكى اينعم له مساوئه
الا انه ممكن ببعض الاساليب اننا نعمل منه نظام ناجح وان كان دة صعب بعض الشىء فى الوقت الحالى ..
الا انه لا شك ان النظام الرقص مالى مساوئه اكتر بكتييير جدا من النظام الاشتراكى , خصوصا الرقص ماليه الجديدة فى ثوبها الجديد ( الاستوميك الامريكانى ).....

- وبعدين ليه التطرف يعنى ؟؟ يااما نلغى القطاع الخاص وندبح الناس اللى معاها فلوس , يا اما نبيع البلد بالقطاعى ونفتحها على البحرى وتبقى كلمه صاحب المال اقوى من كلمه الدوله ؟؟؟؟!!!!!

- اما الست تتحبس فى بيتها لغايه لما تموت واما تروح تشتغل فى بيت دعارة ؟؟؟

يعنى مافيش خيارات فى النص؟؟؟
اكيد فيه
ليه مناخدش مميزات كل نظام ونعمل منها نظام جديد؟؟؟
هو كارل ماركس ولا انجلز اشطر مننا فى ايه ؟؟
ولا معندناش اختراع كدة اسمه الاقتصاد الاسلامى ؟؟
ولا احنا معندناش مخ نعمل نظام يتلائم معانا ؟؟؟
لا عندنا مخ
والله عندنا مخ

بس ازاى
نزعل ماما امريكا مننا
واونكل بنك دولى يغضب علينا
ياااااااااااااااااااااااااااااااى

ميصحش طبعا
وحنا قد زعلهم برضه ؟؟!!
تقولوا ايه بس ؟؟
ما هو اصل فعلا , ديل الكلب عمرة ما يتعدل ........

النهار طلع ومش هعرف انام
منها لله اللى كانت السبب
يلا مش مهم
اخد معايا مخدة واروح اكمل نوم على المكتب
ماهو اصله قطاع عام بقى
هع هع هع

خخخخخخ فسسسسسسسس هخخخخخخخخخخ فسسسسسسسسسس هخخخخخخخخخخخخخخخخخخخخخخخخخخخخخخخ
تحديث :
استكمالا لموضوع البوست , ياريت تقروا تعليق مهندس مصرى على الموضوع