الاثنين، 18 مايو، 2009

هلوسه صيفيه



تيييييييييييييييييييييييييييييييييييت .......... تيييييييييييييييييييييييييييييييييييييت
- الو
- سلامو عليكوا , ايوة ياعمو مصطفى , اكلم احمد والنبى ؟
- لا الرقم غلط
- انا مجدى اة , قوله مجدى ..
- الرقم غلطططط ...
- اة الرقم غلط , انا اسف جدا , اسف للازعاج , حضرتك مش احمد ؟؟؟
- لا , الرقم غلط
- طب اول ما احمد يجى تقوله ان مجدى كلمه , ممكن ؟؟
_________________

تيييييييييييييييييييييييييييت .......... تييييييييييييييييييييييييييييييت
- الو
- ايوة ياهبه بقولك ايه , قولى لسوسن عادل عملها على روحه خلاص , عيان قوى وعامل اسهال طول النهار .
- مين معايا ؟
- انا عادل .
- لا , النمرة غلط يااستاذ عادل .
- طب هو احمد اتاخر ولا ايه ؟؟
- النمرة غلط
- طب هيرجع الساعه كام ؟
- النمرة غلط
- طب هوا مصطفى متاخر ؟
- النمرة غلط
- اة هى اصلا النمرة غلط ؟
- اة
- انا اسف معلش , طب هو مصطفى هييجى امتى ؟
- النمرة غلط
- اة هى النمرة دى كام ؟ مش دى سته تمانيه حضرتك ؟
- ........
- اة طب هى سعاد لسه مجاتش ؟؟
- ........
- احمد مجاش , هه ؟
__________________

طبعا انتوا قريتوا البوست اللى فات , انا افترض كدا يعنى ...
طيب
فهمتوا اكيد انا قصدى ايه , صح ؟

ما داهيه لاتكونوا مفهمتوش .
لا لا , اكيد فخمتوا , امال انا بلت واعجن وارغى فى ايه
وبكرر الفكرة واعيد فيها مرة واتنين وعشرة , واعرضها بكذا اسلوب علشان ايه ؟؟
ماهو اكيد علشان محدش يفهمنى غلط ...
اصلى موتى وسمى اللى يفهمنى غلط
ميفهمنيش خالص , احسن له واحسن لى ...

طيب , كويث خاااااااااالث ماااااااااالث
يعنى مش من المنطقى ولا من المبربر خاااااااالص انى الاقى ( بونى ادم ) بيعلق على هذوها البوست بهذوها الاسلوب وبتلك التريكه :

غير معرف يقول...
قال الامام علي : لا تقيسوا الحق بالرجال، ولكن قيسوا الرجال بالحق
كما قال : اعرف الحق تعرف اهله
واذا كانت قولة ماركس الشهيرة : الدين افيون الشعوب ....... فانا اتسال عن الماركسية ذاتها الم تكن افيونا للشعوب ايضا بكل اطروحاتها الواهية الساذجة القائمة علي تقليب الطبقات ودغدغة احلام الفقراء والشباب الثائر عن جهل .... والتبشير بواحة الشيوعية البدائية وتلاشي السلطة المركزية واندثار الملكية الخاصة....... الخ.
اما مظاهر التشدد او الاعتدال والعقلانية او الغيبية فهو حال البشر في كل الملل والنحل وليست حكرا لا علي المسلمين ولا علي العرب ....... واذا كنت تستنكر بعض اقوال المجتهدين العرب ... فلتلقي نظرة بسيطة علي المذاهب العبثية والميتافزيقية التي يغرق فيها الغرب حتي اذانه... ولكن كل ميزتها انها غير خارجة من رحم الدين الذي يروق للكثرين مهاجمته بسبب وبدون سبب ...... ويحب كثيرا من الجاهلين عن قصد او بدون قصد ان يخلطوا بين الحركات السياسية التي تستخدم الدين كوسيلة وبين جوهر الدين ذاته
وشكراااااااااااااا
____

حد فاهم حاجه ؟؟
طب يابنى ونا انكرت ؟؟
طب هو انا بدافع عن الماركسيه ؟؟؟
اكونش شيوعى ونا مش واخد بالى ؟؟
طب هو انا هاجمت الدين ؟؟؟
وبعدين ( مجتهدين ) مين دول اللى انا استنكرت اقوالهم ؟؟؟

بصراحه انا دماغى لفّت , خصوصا ان التعليق دة جالى فى وقت قاتل , يعنى الواحد كان بيسقّط وبيستعد انه يخش يتخمد ...
بس قلت لااااااا , اعقل ياواد , لحسن يبلفك زى ما بلف الشعب .
وعنها و( تداركت ) نفسى , حلوة تداركت دى , وقولت ياواد ياحكشه شمر عن ساقيك واستعد لنوبه التشليت والرفص المفاجىء اللى جايه .

مش عارف ليه جه فى دماغى ساعتها مشهد نجيب الريحانى فى الفيلم لما قابل الباشا سليمان نجيب علشان يدرس لليلى مراد بنته , ومكانش يعرف انه الباشا وافتكرة الجناينى ..
محدش يسألنى ليه
هو المشهد جه فى راسى كدة .

وبالتالى فقد كان الرد على البيه المعلق كما يلى :
ههههههههههه
- حضرتك بتفهم عربى ؟؟؟؟؟؟؟
يعنى بتعرف تقرا لغه عربيه ؟؟؟
ضليع فى قواعد اللغه العربيه ؟؟؟

قووووووووووووووم الباشا مكدبش خبر وقام رااااادد تانى فى ( التو واللحظه ) وقال :
غير معرف يقول...
اذا كان هذا ردك فهذا ايضا ردي
حضرتك بتفهم عربى ؟؟؟؟؟؟؟
يعنى بتعرف تقرا لغه عربيه ؟؟؟
ضليع فى قواعد اللغه العربيه ؟؟؟
هههههههههههههههههههههههههههههههههههه

الجميل ان الاستاذ متعبش نفسه فى الرد ونقل الرد بتاعى كوبى بيست تاااااااااااانى .
لا , بس الشهادة لله , هو طوّل ال ( ههههههههه ) شويه , يعنى , ممكن امعانا فى السخريه من شخصى الغير محترم .

اقوم انا اسكت ؟؟؟؟
لااااااااااااااااااااااااااااا , وعنها وقمت فااااقع الرد دة :
- ماهو طالما سيادتك متعبتش نفسك تكمل قرايه البوست او حتى تحاول تفهمه ..
فبالتالى انا مش هتعب نفسى فى مناقشتك او حتى الرد عليك ...

قااااااااااااااااااااااااام رادد فى عدد واحد كومنت عرضحال دمغه , وماضى عليه اتنين موظفين درجه سادسه , ومختوم بختم المصلحه وش وقفا .... قصدى وش وضهر :
لقد تمت قراءته .......
واساسا منطلق البوست ذاته اساسا خاطئ ....ان تخلط مابين الحركة السياسية للدولة الاسلامية ... وما بين دور الدين في ارتفاع او انحسار تلك الدولة ..... لاغيا كل الظروف الاخري ...... كمن يربط بين سلطة الكنيسة في الغرب ودورها في تردي احوال اوروبا في عصور الظلام ... وكان الدين هو وحده فقط المسئول عن التقدم او التاخر .......
ان تخلط بين ثبات الامام احمد كفقيه علي مايراه صحيحا في مسالة فقهيه وهي مسالة القران ...... وبين انه من الثائرين وله موقف سياسي هذا ما رايته في كلامك .... واذا لم يعجبك رايي فلتلقي به في البحر
واذا كان الامام الشافعي قد قال : انا لم اري صوفيا عاقلا فانا بدوري اقول : انا لم اري مدونا هادئا
وشكرااااااااااااا

وكان ناقص يقولى تم اعلام المذكور اعلاة , وان لم يتم دفع الكمبيالات فى ظرف اتنين وتلاتين ساعه , فسوف يتم الحجز على مدونه الخنزئور الخرسيس المذكور اوطاة ...

اقوم انا اسكت ؟؟؟
لاااااااااااااااااا , ودى تيجى برضه , دا انا مخى مافيش اصغر منه غير راس الدبوس .

قووووووووووووووووووووووووووووم ااااااااااااااااااااااااااااااااااااانى اييييييييييييييييييييييييييييييييييه ؟؟؟
قمت رادد تااااااااانى :
- هو انت شويه تتكلم فى الشرق وشويه تتكلم فى الغرب ؟؟؟؟
وهو طالما موضوع خلق القران كان موضوع فقهى خالص , امال الامام احمد اتحبس واتجلد بسببه ليه ؟؟؟؟
يعنى مش كفايه ان الخليفه بنفسه يتبنى مبدأ معين ويفرضه على الناس , وبعدين تيجى تقولى مبدأ فقهى بحت ؟؟؟!!!!!!
وبعدين انت مستغرب انى بربط بين عصور الظلام فى اوروبا وسلطه الكنيسه ؟؟؟
امال مين كان السبب فى التخلف دة , ذبابه الفاكهه ؟؟؟؟؟؟؟
وبعدين مين بقى العلماء ( المجتهدين ) اللى حضرتك زعلان قوى ومتنحرر انى بهاجمهم ؟؟؟؟؟؟؟؟؟

وكمان رد :
- وبعدين انت بتتكلم عن الماركسيه ليه اصلا ؟؟؟؟؟؟؟؟؟
هو انت شايف من كلامى انى بدافع عنها ؟؟؟؟

امااااااااااااااااااال , هو احنا بنولعب ؟؟؟

قام هو كمان قايل :
غير معرف يقول...
خليني معاك ان الكنيسة سبب تاخر اوروبا في العصور المظلمة ......
مين بقي كان سبب انهيار الامبراطورية الرومانية ..... الانبا توما صاحب مذهب السيفين .... ولا المذهب الجريجوري .
واضح انك لا تحسن الظن بالناس .... وفاكرني متشدد دينيا ومحسوب علي تيار معين وداخل ادافع عنه .... ودا مش صحيح ..... ورايك ياعم علي عيني وراسي .... وانا فعلا ما بفهمش عربي
احب اقولك معلومة ..... اني دخلت علي مدونتك صدفة لاني كنت بدور علي حاجة بنفس الاسم ... عنبر العقلاء ... وطلعتلي مدونتك حضرتك ...... والمدونه بنفس الاسم برضه ..... مع اختلاف شاسع في المضمون ........ عموما اعتبرني من سكان عنبر الخطرين ...... واسفين علي الازعاج ....... دوس يا معلم وماحدش ها يقولك لا ........ لا صوفي ولا حتي خروفي اما كلامي عن الماركسية .... كنت اقصد ان الشعوب هيا اللي طالبه معاه دايما انها تتسطل .... بس كل عصر وله دماغه ..... ياعني لا بدافع عن الرفيق انجلز .... ولا بهاجم سماحة السيد خرشوف
و شكرااااااااااااا

قمت انا رادد :
- العفو ياسيدى
احسنت عرض وجهه نظرك
ونورت المحكمه
_________

لا ونا مش خانقنى حاجه , قد كلمه ( وشكراااااااااااا ) اللى فى اخر كل كومنت دى
اعتقد ان كلمه ( مرسل للعلم , وبرجاء اتخاذ اللازم ) كانت هتبقى الذ , الذذذ , الذذذذذذذذ .....

الموضوع دة مش اول مرة على فكرة
وبيحصل لمدونين كتييييير جدا
طب هل دة مثلا مرض ؟؟
ولا انخفاض مستوى فكرى ؟؟؟
بصراحه انا معتقدش , ليييييييييه , قولولى ليه ؟
اقولكم ليه , لان اغلب ان لم يكن كل الناس اللى بتعمل الحركات دى بيكونوا انونيموس !!!!!
مش غريبه شويه ؟؟؟
ماهو اصل اكيد يعنى ربنا ماداش العقل للمدونين فقط وحرم منه الانونيموسين والانونيموسات ..
وبعدين اصل كلنا كنا انونيموس لفترة من الوقت ,
يعنى الواحد متولدش مدون
انا المدونه دى فاتحها يادوب من 3 شهور عُمى ....

الله
يعنى الموضوع قصد بقى
اصلى من عشاق نظريه المنورة ..قصدى المؤامرة , زى نوارة كدة , تقريبا شميت منها ..

اة هو كدة
الناس دى بتستقصدنا علشان تحرق دمنا وتخلينا نبطل تموين....قصدى تدوين ..
ومش بعيد يكونوا عايزين يشلونا او ينقطونا , علشان يجيلنا ( الفالج ) ومنعرفش نكتب على الكيبورد تانى ...

طب دا ممكن كمان يكون جهاز املى هو اللى مسلطهم علينا
اة
انا بقالى فترة بلاقى ناس غريبه واقفه تحت البيت
اة , هو كدة , امبارح كان فيه واحد واقف تحت البلكونه ولابس جلابيه وفوقيها بالطو اصفر وحاطط تحت باطه عصايه خرزان وماسك جرنال ( المقطم ) وعامل نفسه بيقرا ...
واول لما نزلت قرب منى وقال لى : تسسسسسسسسمح تولعلى صوبااااع كوفته ؟؟؟
وحيث انى مش مدخن خااااالص ( بشم كُله بس ) فخبطت صباعى فى ايدى الشمال وولعتله فى ديل الجلابيه ...

طب وبعدين ؟؟

ماهو اونكل حسين رياض مش هيفضل مخبينى فى بيته كدا للابد , وبعدين الواد رشدى اباظه رخم ودمه تقيل وكل شويه يطب على غفله , ونا سايب المطبعه اللى بطبع عليها البوستات فى بدروم البيت القديم , ولازمن اروح اخبيها قبل ما القلم السياسى يعمل كبسه على البيت , اة , محمود المليجى شرانى وتعلب كبير , والبت بنته صايعه ودايرة على حل شعرها ...

طب وبعدين ؟؟؟

اروح انفذ عمليه فى ( الكنال ) واخلص ؟؟؟؟
والناس تمشى ورايا ويقولوا : عاشور الناجى اسم الله عليه , اسم الله عليه اسم الله عليه ....
ولا ارش بودرة على حرف المدونه من فوق ؟؟؟
طب هو النمل بيدخل منين بالظبط ؟؟؟؟
ولا هو صحيح ان ريتشارد قلب الاسد بيتعشى خروفين ويبلّع بعشر بيضات نعام ؟؟
ولا فيرجينيا فخر الدين صحيح وقع عليها عمود نور وهى رايحه لخيمه القائد ؟؟؟
اصلهم بيقولوا ان البلديه كانت شغاله فى معسكر الصليبيين ..
ولا نجمه ابراهيم خطفتها هى واختها وسرقوا سيغتها وقتلوها وعبد العال راح دفنها فى ترب الغفير ؟؟؟
وبعدين هوا حنظله ريحته راحت ليه ؟؟؟؟
اكيد فى اِن ..
وبعدين ولدنا حبظلم كان مسافر امريكا ليه ؟
وهو صحيح سنقر الكلبى مسك على الزيبق اللى ولع فى عمارة وسط البلد ومجلس الانس ؟؟؟
بيقولو انه كان عضو فى خليه حزب الله .
بل يقولون انهو من اتباع الديّن الجدييييييد ....
من الاخر كدة
انا عايز فلوس العمليه ,
وحق اللانش....
وبعدين انا امبارح شفت حلم غريب قوى
خير اللهم اجعله خير
صحيت من النوم على جرس الباب
فتحت لقيت محصل الكهربا
اخدت منه الفاتورة لقيت الاتى :
10 جنيه استهلاك
8 جنيه زباله
20 جنيه رسوم
30 جنيه صاعقه ومظلات ودعم للمجهود الحربى
120 جنيه دعم للمشروع النووى السلمى المصرى !!!!!

فيه حاجه فى الجو ؟؟؟
اكييييييييييييييد فى حاجه فى الجو
دى مؤامرة
مؤاااااااااااااااااامرة
خوووووووووووووووننننننننننننننننااااااااااااااااااااااااااااة
اندهولى الدباغ فوراً
قولوله يلم العيال دى باقصى سرعه
ويرميهم فى حفرة
ويردم عليهم بالجير الحى
والميت كمان
علشان يموتوا بسررررعه
ويعملوا تسسسسسسسسسسسسس
وفششششششششششش

وارموا معاهم ممدوح عبد العليم
والبت ليلى مقصوفه الرقبه
بتوع انا حمص حمص وحلاوة
علشان سرقوا اللحن القومى العظيم
بتاع الفنان الوطنى حسن كامى
انا وطنى وطنى وبطنطن

ومتنسوش ترمو معاهم الراجل الاخرس اللى اسمه شارلى
بتاع البيانولا
علشان نخفى اى اثار للجريمه

يلا

بلا قله ادب