الخميس، 21 مايو 2009

كرومبووووو يتحدى الملل !!!!

المفتش كورومبو فى لحظه تجلى



اللى بالى بالك


تارااان تارااارران تاران تن
كرومبو
كرومبو
كوروووومبوووووووووو

انا بحب اشجع اللعبه الحلوة
ايوة بجد
مع ان حكومتنا دى تتعاطى منقوع الغباء بشكل يومى مما ينضح على ادائها العام , بس برضه ليهم حركات انما ايه , ااااااااخر حرفنه ....

شفتوا هشام طلعت مصطفى ؟؟؟
اخد اعدام هو والسكرى ( بيبى فيس ) !!!!!!!
طب اعدام السكرى كان شىء متوقع طبعا
انما الغريب هو اعدام هشام طلعت مصطفى
مش علشان رجل اعمال ولا من الشله
عموما يعنى بالنظر فى القضيه
مش شايفين ان حكم الاعدام على هشام مبالغ فيه شويه ؟؟؟

يعنى المعتاد فى النوعيه دى من الجرائم ان الفاعل بياخد اعدام والمشارك بياخد تأبيدة او اقل شويه ..
خصوصا لما يكون محرض بس , ومش مشارك فعليا فى الجريمه ...
هو اى نعم شريك ومتضامن مع المجرم , بس برضه مش هنجيب اللى قتل ودبح زى اللى حرض وقعد مستنى التليفون ...

انا مش متضامن مع هشام لاسمح الله , هما الاتنين يستاهلوا الحرق بجاز , بس انا بتكلم على المعتاد فى المحاكم المصريه ( المحترمه جدا ) بتاعتنا , وقضائنا ( الغير مُسيس على الاطلاق ) , وقضاتنا ( المحترمين قوى واللى عمرهم ما بيتقفشوا فى قضايا رشوة ولا حتى بيتمسكوا فى الامارات متلبسين بدعارة ورشوة جنسيه ولا حاجه من دى خاااالص ) ...

يعنى الحكم مريب ومش مريح ....

طيب نفصص الموضوع من الاول , وباختصار شدييييد جدا :
1- اونكل هشام بعد القصه اياها حب ينتقم من البنيه وبعت ( السفاح ) يقتلها ..

2- السفاح اتعكش من قفاة فى الامارات والموضوع اتعرف ..

3- الاعلام ( الشبه معارض ) فى مصر ابتدى يتكلم عن الموضوع , قام النظام اضافه للمنطقه فيما وراء ( الخط الاحمر ) وصدرت تعليمات حازمه حاسمه من ( حاجب الحجاب ) باوامر من اسيادة بحظر النشر , وكمان اتصادرت النسخ اللى نشرت ...

4 - يعنى نفهم من كدة ان الاتجاة الاول كان للتعتيم على الموضوع وتلبيس ( العمه ) للسكرى ويشيل هو الليله ويبقى مواطن ( متفوتر ) على حبل المشنقه ...

5- الامارات قالت لاااااااااااا , شغل الوساخه بتاعكم دة ميلزمناش وطالما ان الجريمه حصلت على ارضنا فلزمن وحتمن ولابد من كل بد تسلموا لينا المتهماااااااااااااااان , علشان نحط السيخ المحمى فى صرصور ودنهم ...

6- الحكومه اتحايلت على الامارات يلموا الموضوع وهما ابداااااااااا , طبعا كلنا عرفين ان السادة مشايخ الامارات قد ايه اديهم ( سخيه ومبحبحه ) قوى على النظام المصرى ( المتسول ) ولاسيما منظمات وجمعيات ( الست ) ...
- يعنى من الاخر كلمتهم لا ترد , والمثل بيقول اطعم الفم تستحى العين ...

7- حظك وحش ياطلعت ومعلش بقى , مش بادينا والله , احنا حاولنا نسلكك منها بس انت اللى وش فقر , سورى ياطلعوطه , بيزنس از بيزنس , ارفع حظر النشر ياجدع , واللى عايز ينشر ينشر , وطبعا لازمن تأكدوا على النظام المصرى ( النزيه المحترم ) والقضاء ( العادل ) فلا احد فوق القانون وان كان احد اعمدة النظام , من اخطأ يحاااااااااااسب , وادى الدليل قدامكم اهو , طلعت مصطفى , والدليل قالوله , واحسن مش الشرف مافيش , ورقصنى ياجدع ,
ترااا تراا تااااااارن ترراتا تاااااااارن تارارارراراررن تااااااااااااااااارن تاتو تاتى ترابتاتاتاتى ..

8 - فى يوم من الايام وهشام قاعد فى الزنزانه السوبر لوكس بتاعه بيفكر وبيعمل فلاش باك على حياته وبيلعن ابو اليوم اللى حط ايدة فى ايد ( الاوغاد ) فلم يرقب فيهم ألاً ولا ذمه , جه المتحدث الرسمى باسم يهود بنى النضير, اونكل عزو بزو , وطلب يقعد قعدة ( على انفراد ) مع هشام , وواضح انه كان بيفاوضه على حاجه ( نيابه عن النظام طبعا ) والموجودين سمعوا هشام بيزعق ويقول لأ لأ ابدا , وكان عصبى جداااااااا ....

9- واضح جدا ان عز مكانش بيتكلم بلسانه بل انه جه كمندوب عن ( يهود بنى النضير ) يعرض صفقه على هشام , وواضح انها كانت مستفزة جدا ومجحفه لدرجه ان هشام ثار وقعد يزعق ...

10- طيب بديهيا كدة , ايه الصفقه اللى ممكن تتعرض على واحد فى وضع هشام طلعت مصطفى ؟؟؟

11- اكيد فيها جانب بتضمن تسليكه من القضيه كالشعرة من العجين بحيله معينه بحيث بهوات الامارات ميزعلوش , او اضعف الايمان انه ياخد حكم مخفف , ومش بعيد يطلع من السجن على بيتهم او على بلاد برة , مع انه لسه مخلصش المدة , ومازال اسمه مقيد بدفتر احوال السجن , انه ( موجود ) زى ما حصل مع ناس تانيه !!!!!!!

12- طب المقابل اييييه ؟ اكيد انه يتنازل عن شىء معين , بس واضح انه شىء كبير واستفز هشام جداااااا ...

13- هشام فضل مزرجن , طييييييييييييييب , يامسرور ؟؟ هات السيف والنطع , قام القاضى ( المحترم ) هابد هشام حكم الاعدام , من باب الهت والتخويف , علشان ينخ ويسمع الكلام ...

14- غالبا فى الايام الجايه , هشام هيراجع نفسه وهيعقل وهيلطع الكريمه كمان وهينخ ويسمع كلام ( عمو ) , هو العمر بعزقه ياعم ؟؟؟؟

15- باقى السيناريو معروف , استئناف للحكم , وبعدين الحكم يتلغى وتتعاد المحاكمه , وياخد براءة , او حكم مخفف , ويخلع على برة مع خالو ممدوح اسماعين قرصان البحر الاحمر الشهير ب ( ذو اللحيه الحمراء ) .....


عرفتوا مين الجانى ؟؟؟

ياترى حمبوزوا لاوى بوزوا ولا سنيه شخلله ولا المعلم هوهو الكلابجى ؟؟؟؟؟

وسلملى على القضاء العادل ومخلل الكرنب ومحشى الكوسه والبتنجان ..

وهز ياوز هز ياوز هز ياوزززززززززززززززززززز ........