الثلاثاء، 30 يونيو، 2009

بوبوس



الخلطه المعتادة ( لكفتجيه ) السينما المصريه فى العهد ( السعيد ) :
ابتذال + سخافه + سطحيه + عهر + تكرار = اسفاف ....

وبما ان الزعيم يختلف دائما عن الاخرين ,
فاصبح من الضرورى ان تختلف ( مكونات طبخته ) عمن سواة
فاصبحت ( كفته الزعيم ) على الشكل التالى :
ابتذال + سخافه وتقل دم + سطحيه مبالغ فيها + عهر مستفز + تكرار ممل + ابتزاز جنسى + ابتزاز سياسى + ابتزاز عاطفى لطبقات الشعب المطحونه + جنون عظمه وبارانويا = اسفاف يسمى نفاقا عمل فنى مبدع ونقد هادف وبناء وجراءة لا نظير لها وتجاوز للخطوط الحمراء , بالاضافه لنشوء طبقه من الافاقين والمنافقين والطفيليين يدعون ( نقادا ) لزوم التطبيل والتهليل , شىء لزوم الشىء , حبل وغلق وبرسيم لزوم الخروف , على رأى الريحانى .....

لا ادرى لماذا يصر على الاستمرار بينما نجمه يتهاوى بشكل بشع !

قد يكون السبب انه اقتنع فعلا بانه زعيم واصابه جنون العظمه , فالزعيم دائما خالد مخلد لايعتريه الضعف ويرى مالايراة الاخرون , وكل ماينطق به هو عين الحكمه , ولكن قد لاترقى افهامنا الى ادراكه واستيعابه , من الممكن ان تدركه الاجيال القادمه , على اعتبار ان الزعيم دائما سابق لعصرة !!!

من الواضح انه قد حان الوقت للزعيم ان يتلهى على عينه ويهمد بقى ويعتزل , اذا كان يرغب فى الحفاظ على مابقى من رصيدة وتاريخه , ان كان قد تبقى له منه شىء اصلا ...

والنجمه ذات السبعون ربيعا , اعتقد انه حان الوقت لكى تعتزل الحياة وتنتقل للاقامه باحد دور المسنين , بدلا من داء السخافه والهطل الذى اقنعها انها مازالت ( مغريه ومثيرة )
ياشيخه روحى اتلهى على طقم سنانك
هو انتى لسه فيكى حيل ؟؟!!!!!!!

حلقه اخرى من سلسله ( القىء الفنى ) للمدعو( زعيما ) بدايه من بخيت وعديله , مرورا بالتجربه البتنجانيه , انتهاء ب ( بوبوس ) ..

ادعو الله عز وجل ان تكون اخر حلقه فى هذة السلسله المشئومه ....

الاثنين، 29 يونيو، 2009

بس خلاص.....

تحديث : رابط الاغنيه اهو , http://www.mawaly.com/file/play/19328.html
النهاردة مافيش بوست ,

الاغنيه دى ------->

هى البوست ....

الخميس، 25 يونيو، 2009

يوميات موكووووووووس



الموضوع دة هقسمه على بوستين ,
علشان لو اتعمل فى بوست واحد هيبقى طويل قوى
:D

الفكرة هى عبارة عن يوميات شخصين بنشوفهم فى حياتنا كتير , واحتمال كمان يكون كتير فينا من نفس النوعيه دى .
ومقتيسه من الكوميكس بتاع عنق الزجاجه اللى شوفته عند ليكتر فى المدونه من كام شهر , بس مش عارف ليه معلق فى دماغى لغايه دلوقت !!!
هى الشخصيات اللى هتكلم عنها كتير
بس هتكون البدايه هى الشخصيتين دول بس ولو البليه جريت فى دماغى ممكن اكمل باقى الشخصيات ..
الشخصيتين هما موكوس ومفروس ,
ونبدأ بالاخ الموكوس :
ماما , انا عايز اشترى موتوسيكل......لالا اسف السلوك دخلت فى بعضها , مش دة ,

- بابا , انا رايح المدرسه بكرة .
- ايوة ياحبيبى عايزك تتشطر كدة وتاخد الابتدائيه علشان اجيبلك البسكليته .
- بابا انا اخدت الابتدائيه , فين البسكليته بقى ؟؟
- انت صدقت ياوله !! , دا انا كنت بهزر , وبعدين العَجَل غالى ونا هلاحق على مصاريفكم منين ؟؟ وبعدين انت بتذاكر لنفسك مش ليا انا , انا مش هكسب حاجه لما تنجح وتبقى شاطر , انت الكسبان , ودة مستكبلك انت .....

- بابا انا رايح المدرسه الاعدادى بكرة .
- عايزك بقى تشد حيلك علشان تدخل ثانوى عام , لو مذاكرتش هتدخل صنايع مع الرعاع والحراميه والعيال الوحشين .

- بابا , المدرسه فيها عيال كتير وحشه وبيقولوا كلام مش كويس وبيعملوا حاجات وحشه فى الحمامات .
- مالكش دعوة بالوحشين , دول قله مندسه , خليك مع الكويسين .
- بس يابابا دا المدرسه مليانه عيال وحشه والكويسين قليلين قوى .
- كدااااااااب , انت بس بتبالغ , بطل هبل والتفت لمذاكرتك .

- بابا , العيال فى المدرسه بيشتمونى بالفاظ وحشه وبيضربونى .
- هو انت مش راجل ؟؟!! , اللى يشتمك العن ميتين اللى جابوة , واللى يضربك بايدة اقلع جزمتك وارزعه بيها فوق نافوخه ...

- ايه دة ياولد الكتاب اللى بتقراة دة ؟؟
- دا كتاب حلو قوى فى الفلسفه يابابا .
- مش لما تتنيل تفلح فى مذاكرتك الاول ؟؟ انتيل ارمى القرف دة وامسكتلك كتاب رياضه ولا علوم ذاكر فيه .

- بابا الاجازة جت , ممكن بقى العب رياضه واقرى كتب ؟؟
- بلاش كلام فاضى وتضيع وقت , انت داخل على التناويه العامه , ودى مفيهاش هزار ومفيش وقت تضيعه , مستكبلك كله متوكف على المجموع اللى هتجيبه , اما انك تكون انسان محترم واما انك تكون متشرد وصايع , انا حجزتلك عند الاستاذ بُحلُق الصايص امبراطور الفيزيا , عاوزين بقى نستغل الوقت الفاضى بتاع الاجازة دة علشان تكون جاهز ومستعد لما الدراسه تبدأ ..

- بابا , منهج التاريخ عندنا كله تخريف وكدب والكلام اللى فيه محصلش
- انت اهبل ياولد ؟؟!! , يعنى انت هتفهم احسن من اللى حاطين المنهج ياحمار ؟؟!!
- يابابا الناس دى جايبين من كتب مشهورة والكتب المشهورة دى مفيهاش اصلا الكلام اللى هما بيقولوة دة .
- ايه يعنى , بيقولوا ايه ؟
- بيقولوا ان عرابى كان غبى ومتخلف ومتواكل , وصلاح الدين كان جبان وسيس وسايب الصليبيين ينزلوا ضرب فى المسلمين علشان هو كان ( رجل سلام ) , ومحمد نجيب كان طماع وخاين وجاسوس للامريكان !!!!
- مش مهم , احفظ الكلمتين اللى بيقولوهم ورصهم فى الامتحان وخلاص
- يعنى اكتب كدب ؟؟
- كدب كدب , انت هتتفلسفلى ؟ اتنيل اكتب اللى فى المنهج وخلى السنتين دول يعدوا على خير ولما تخلص ابقى اعمل اللى انت عاوزة ....

- اخدت ايه فى المدرسه النهاردة ياحبيبى ؟؟
- ولا حاجه
- نعم ؟
- اة , كل المدرسين واخدين اجازة بدون مرتب علشان يتفرغوا للدروس , مافيش غير بس حصص الزراعه والكومبيوتر , حتى اوضه الكومبيوتر قافلينها ولاغيين حصصها وبيطلعونا بدالها ننضف الحوش من الورق والزباله !!!!
- ازاى الكلام دة ؟؟ اكيد انت بتبالغ .
- بقول يابابا احسن اخدها منازل واستغل السبع ساعات بتوع المدرسه دول فى حاجه مفيدة ..
- اة , علشان تصيع وتمشى على حل شعرك ؟؟؟ يابنى المدرسه دى مش مجرد مؤسسه تعليميه , دى تربويه واجتماعيه , يعنى بتزرع فيك حاجات كتير ( حلوة ) غير المناهج , اسكت اسكت , بكرة لما تكبر هتفهم ..

- بابا , محمود زميلى النهاردة دخل عليه جوة المدرسه عشرين بلطجى وضربوة بالسكاكين وخرجوا ولا حد كلمهم , والمدير بدل ما يطلب الاسعاف خلا الفراشين يرموة برة ونزله فى الدفتر غياب !!!!
- اكيد محمود دة ولد وحش ومشيه بطال والبلطجيه دول كانوا اصحابه , التعليم بقى بيلم .
- لا دا محترم جدا وابن ناس , وبعدين ليه المدير يرميه برة ؟؟
- ايوة علشان لو سابه جوة هيحصل للمدير مشاكل ودة راجل عندة عيال وعايز يربيهم برضه .
- طب هو محمود دة مش زى عياله ؟؟ ولاابنه عيل ومحمود كلب ؟؟!!
- بطل فلسفه فارغه , لو كان محمود دة ملتفت لدروسه وفى حاله مكنش حد كلمه , وبعدين دة اصلا قضاء وقدر .
- قضاء وقدر ؟؟!!!.......طيب .

- بابا باركلى , انا جبت تسعه وتسعين وتسعميه تسعه وتسعين وتسعميه تسعه وتسعين من الف من الف فى الميه .
- حماااااااااااااار وفاااااااااااااااشل , تقدر تقولى الواحد من الف من الف فى الميه دة راح فين ؟ طبعا علشان بتنام ساعتين فى اليوم , دا انا لما كنت قدك كنت بنام ونا فى الطريق الصبح للمدرسه , ايون بستغل الوقت اللى بوصل فيه للمدرسه فى النوم , علشان مضيعش وقتى فى المدرسه والبيت بعد كدة .
- نعم , ازاى يعنى ؟ بتمشى وانت نايم .
- ايوة , بالقصور الذاتى ياحماااااااار , ادعى بس مجموعك يحصل ويدخلك طب زى اختك حنان واخوك عماد وابن خالتك منصور وبنت خالتك تفيدة وابن عمتك متولى وبنت عمتك شفيقه , وتبقى دكتور محترم زى باباك ومامتك وخالتك وخالك وعمتك وعمك وجارك سيد وبرعى ومصطفى وبهجز , و..و..و.........

- بابا , باركلى انا دخلت طب .
- ايوة كدة , انت كدة فرحت قلبى , وهتبقى انسان محترم , دلوقت بس تقدر تعتمد على نفسك واطمن عليك .

- بابا , الاستاذ بيقول اللى مش هيشترى المذكرات بتاعه هيسقط , اروح اشتكيه للعميد ؟؟
- لا طبعا , انت اتجننت !! يابنى مانتاش قد الناس دى , خلى الكام سنه دول يعدوا على خير وبعدين ابقى اعمل اللى انت عايزة .

- بابا , زمايلى عاملين مظاهرة .
- اوووووووووعى تمشى معاهم , دول عيال بايظه , وبعدين هى المظاهرات هى اللى هتصلح البلد ؟؟
- امال ايه اللى هيصلح البلد ؟
- لو كل واحد احترم نفسه وراعى ضميرة البلد هتبقى جنه .
- بس كل واحد لا بيحترم نفسه ولا بيراعى ضميرة .
- مالكش دعوة , خليك فى نفسك , وخليك محترم فى شغلك ومالكش دعوة بالناس الوحشين .
- بس يابابا الكلام دة مش منطقى , ابقى كويس ازاى اذا كان كل اللى حواليا وحشين ومش عايزين حتى يسيبوا المحترم فى حاله ..
ازاى امشى عكس اتجاة الملايين ماشيه فيه ؟؟ اكيد هيجرفونى معاهم , دى بديهيات .
- بس ياحمار , انت متشائم زيادة عن اللزوم , مالكش دعوة بالمظاهرات , ولما تكون عندكم مظاهرة , اوعى تطلع برة , خليك فى القاعه بتاع المحاضرات .
- طب والناس الوحشين ؟
- منهم لله , ربنا ينتقم منهم بعدله , دا احنا غلابه وضعفا ومنقدرش عليهم .

- مالك ياحبيبى , ايه الدم اللى نازل من راسك دة ؟؟
- سمعت نصيحتك يابابا وخلتنى قاعد جوة القاعه , لاقيت البلطجيه داخلين يضربوا الناس اللى جوة كمان .
- ما انت اللى حمار , شفت كدة كنت تروح تستخبى فى الحمام ...

- ( فى المسجد ) يقول الشيخ ( ابو الإفك الضلالى ) :
بص يابنى , انا راجل عالم وافهم عنك , وزى ما انت شايفنى لابس عمه وكاكوله , يعنى متخصص ومعايا شهادات , مش اى كلام يعنى , الدين بيامرنا اننا نسمع كلام الحكومه وحتى لو كانت ظالمه , ودة لحكمه , اللى هى ان الفتن ضررها اشد بكتير من ضرر الظلم على الامه , ومن هنا كان الامر الالهى بطاعه اولى الامر ولو كان ظالما فاسقا كافرا , وبعدين ياابنى لادين فى السياسه ولا بطاطس فى الدين , والفقه لا يكيل بالبتنجان , ولو رحت فى بلد تعبد العجل , حش واديله , وارقص ودندن لكل قرد مادمت فى دوله القرود , واللى يتجوز امى اقوله ياعمى , وكل اللى انت شايفه دة شباب مهووس بعيد عن دينه وانحرف فى طريق الشيطان , ياابنى خليك مع الجماعه , خليك مع القطيع تسلم , فأنما يأكل الذئب من الغنم القاصيه ..

- ( على الدش )على قناة : ( ارفع رأسك انت سعودى , غيرك ينقص وانت تزودى ) يقول فضيله الشيخ شنكل ابن شناكل :
اخوتى المسلمون , اخواتى المسلمات , انا النهاردة هكلمكم فى موضوع مهم جدا , يؤسفنى ان بعض الاخوة الدعاة يضيعون الوقت فى الحديث عن الفرعيات والتوافه ويتركون صلب الدين ولبه وعصيرة كمان ,
يعنى ييجى اخ محترم يتحدث عن ضرب غزة وابصر ايه , بينما يغض الطرف عن الفساد اللى اجتاح امتنا , والذى لولاة لما حدث ما حدث , انظروا حولكم , تروا الفتاة المسلمه تمشى مكشوفه الوجه واليعاذ بالله , والشباب المسلم عماد الامه يمنع سنه المصطفى عليه الصلاة والسلام ويحلق لحيته ويرتدى الجينز تشبها بالفسقه والكفار ولله الامر من قبل ومن بعد .
ووالله
وبالله
وتالله
لو تمسكنا بلُب سنه الحبيب وارتدينا الجلباب واطلقنا لحانا وارتضينا بجلاله الملك المنتفخ المتنفخ , خاقان البرين والبحرين , وصاحب الجلاله الهميونيه , وخادم الحرمين , سليل اسرة ال سعود المباركه اميرا للمؤمنين وخليفه لرسول الله , واتبعتم انتم معشر العوام والجهله اسيادكم من علماء ال سعود كالأمعات , فولله لينصرنا الله على كل الامم ويخسف الارض من تحت اقدام اليهود ويغرق الامريكان الملاعين فى البحر , بينما احنا قاعدين زى خيبتها ندعى ونعيط ونولول فى التروايح فى رمضان , الرجاله تعيط فى صحن المسجد تحت , والنسوان تولول فى الصندرة فوق , فلا تستقلوا بالدعاء فانه نصرة المظلوم ,
اتهزأ بالدعاء وتزدريه --- وما تدرى ما فعل الدعاء
سهام الليل لا تخطىء ولكن --- لها امد وللامد انقضاء
فلنجلس جميعا فى بيوتنا ولنطلق لِحانا ونقوم الليل كله , نطلق سهام الليل على الامريكان واليهود واعداء الامه
فلنطلق جميعا السهام
نطلق ونطلق
ونستمر فى الاطلاق
الا ان نصر الله قريب..

( فى الحضرة )
اخوانى ابناء الطريقه القُرفصائيه :
من اقوال سيدى المقرفص ابن السكران رضى الله عنه وارضاة , وقدس الله سرة وجهرة انه رضوان الله عليه قال فى كتابه ( الطبقات القرفصائيه واللمحات النورانيه ) :
انى قد تناولت خابورا ذات ليله من عُشب الجنه , فاطلق العنان لنفسى فانفصلت عن جسدى و اطلقت نفسى العنان لروحى واطلقت روحى العنان لسرى فانطلقت بسرى وخيشومى اَسْبَح فى الملكوت واُسَبّح مع الملأ الاعلى , وانطلقت ارقب اهل الجنه فى نعيمهم واهل النار فى جحيمهم , ونال منى التعب فانطلقت للقصر الذهبى الذى اعطانيه الله فى الجنه , وجلست فى بستانه لاستريح قليلا فوجدت رجلا ابيض الوجه حسن الملامح كانه القمر , وقال لى يا مقرفص قل لامتى ان يحذروا الفتنه ويعتصموا بالحبل المتين وعليهم بالسمع والطاعه لجيمى ابن بركه , فقلت له ومن جيمى ابن بركه ؟؟, فقال لى رجل من عترتى , ياتى من بعدى ليوحد الامه , لا يخرج عنه الا فاجر فاسق كافر منافق معلوم النفاق , فانتخبوة جميعا والا حلت عليكم اللعنات , وحاق بكم المسخ والخسف والعذاب , واعلم يامقرفص ان الامه تنقسم لبضع وسبعون قسما , كلهم فى النار الا واحدة , ولما سئلته عن تلك الفئه , اجابنى قائلا : اتباعك يامقرفص وابناء طريقتك , هم على الحق الى يوم القيامه , وكلهم فى الجنه , واعلموا ان الموالد حلال , والغباء والتخريف والتواكل هو صلب العقيدة , فلتنساقوا جميعا مثل الغنم الى الهاويه , بارك الله فيكم وعليكم وتحتيكم وفوقيكم .
ثم استيقظت فجأة لاجد نفسى ملقى على قارعه الطريق فى احد شوارع بغداد امام ( الاُبُلّه ) , حانتى المفضله ...
ومن كراماته رضوان الله عليه , انه كان يحرر الاسرى المسلمين فى سجون الصليبيين فيما وراء بحر الظلمات وهو جالس فى بيته , مستخدما احدى كرماته الشهيرة , الا وهى ( البلوتوث ) ...
وروى عنه قدس الله سرة انه كان لا يحضر صلاة الجماعه ولم يشهد الجمعه قط فى حياته , فقد وصل لمرحله الكشف والتوحد فارتفع عنه التكليف , وكان رضوان الله عليه لا يستبرىء من بوله , فقد غشيه النور فعمته الطهارة , فصار بوله طاهرا مطهرا طهورا , رضوان الله عليه , حتى روى انه كان يجلس كل يوم على سطح منزله ليتبول على الناس فى الشارع بالاسفل , فيجتمع منهم الخلق الكثير عسى ان تنالهم قطرة من بوله الشريف فتنفحهم البركه ويعمهم الخير الوفير .
وكان من اهل الباطن , يدرك الرموز واسرار الحروف ويتحدث بها عندما تنتابه حالات الصر..... اقصد التجلى والكشف , فيتحدث بما لا يفهمه الجُهّال , فياخذون الكلام عليه ويحسبوة مجنونا من جهلهم وسخافه عقلهم , ومما قاله رضوان الله عليه وهو خارج من احدى حانات بغداد , فقد كان يصلى فى الحانات حيث كان يقول ان الشيطان لا يدخل الحانه لانها مليئه بالشر بينما بتواجد فى المسجد ليضل المصلين , ولهذا كانت الحانات اولى بالصلاة من المساجد , فانشد رضوان الله عليه قائلا :
الايد ايدٌ والدراع دراعُ ---- وانا حصلّى من البتاع دة صداعُ
وقد فسر هذا البيت مولانا الامام عتاهيوس ابن شكلّمه فى سته وعشرون مجلدا , بل انه شرح فى النقطتين تحت الياء فى كلمه ( الايد ) فى الف وخمسمائه صفحه مفسرا اياها على سبعه وسبعون وجها .
وقال رضوان الله عليه لو تعلمون ما فى الهمزة لسقطت نساؤكم وحمل رجالكم وشاخ اطفالكم ونونوت كلابكم , وهوهوت فئرانكم , وجفت بحاركم وتخللت انهاركم وامتلأت بالطرشى , ولاكل الغزال الاسد وافترس العصفور الصقر .....
ندعوا الله جميعا انا يقرفصنا مع مولانا الامام فى رياض الجنه ويكشف علينا من لطائف عوارف شطائف محابس بركاته , حتى نسبح فى النور بالنور كالنور , وقوموا الى الحضرة بارك الله فيكم .....


( فى النت ) يقول الدكتور ( بصاص النمس ) احد رموز المعارضه فى مصر :
ولابد للبروليتاريا من ان تتمرد على فساد واستغلال الطبقه البرجوازيه المتعفنه ويجب على رجل الشارع الجاهل العبيط الاهْتَم اللى داقق عصافير , وطائر الرُخْ كمان , ان يدرك هذا جيدا , فلن تقوم قائمه للوطن بدون الثورة , نعم الثورة الفحلقيه التركوازيه , على طغيان الفساد والبيروقراطيه , حتى ننعم جميعا بمجتمع مثالى يتأرجح فى خفه بين مدينه افلاطون الفاضله ويوتوبيا توماس مور , لابد للاقليات الاثنيه ان تتحرك لتسد الطريق على التعفن الرأسمالى , محققه فى ذلك كل نظريات هيجل وكارل ماركس وتومازو كامبانيلا واللورد ايتون وهايفه وهبى وسمير زاهر والمرحوم رمضان البرنس , فالثورة هى الخطوة الاولى نحو شمس الحقيقه , حتى ننعم جميعنا بالجلاسنوست والشفافيه الحكوميه , فيرى احدنا لباس الاخر , لابد اذن من البروسترويكا , نعم , تخلص من حمامك القديم , فقد حان الوقت لجرافينا ...
حد فاهم منكم حاجه ؟؟
طبعا لأ .
هتفهموا ازاى , ما انتم بهايم يابهايم .
بس ربنا بعتنى ليكم كمبعوث للعنايه الالهيه علشان انتشلكم من ظلمات الجهل انا وابنائى وزملائى من النخبه المثقفه , فلتتبعونا جميعا , ومش مهم تفهموا ..
ما انتم بهايم اصلا يعنى .
انتوا بس تتسحلوا فى الشوارع ويتمسح بكرامه اهاليكم الارض علشان انا اتلمع واتأمع واظهر على الفضائيات واعوم على وش الفته وابقى واحد من اقطاب المعارضه.
ومين عارف , مش بعيد ربنا يكرمنى بحزب اقلّب من وراة كام مليون , دا غير العلاقات والوسايط , والله وباضت لك فى القفص ياواد ياحدُقه .
يابهاااااااااااااايم ........
فلتنسحلوا جميعا , فالنخبه المثقفه تحرك الجماهير فقط وتؤزّهم ازّا ,
فنحن نفقع المهموز ,
وانتم تتخوزقون فى التحتوس ..
احنا مثقفين ,
يعنى نسخّن الناس بس ,
مش دورنا اننا ننزل الشارع ونتبهدل ,
البهدله دى للحوش الغجر اللى زيكم .....
خرسيس ادب سيس يروم لعنات اطوز يوقمان .
ياكلااااااااااب ....
جدو الباشا كان بيقول كدة ....

- بابا انا اتخرجت بتقدير جيد علشان معنديش كوسه وفرافيرو زميلى اخد امتياز علشان ابوة عميد الكليه ..
- لا , انت اخدت جيد علشام مش بتذاكر وبليد , بلاش تظلم زميلك المجتهد , بطلوا حقد بقى , يلا , المهم انك اتخرجت , بكرة تتعين وتبقى دكتور محترم .

- بابا انا اتجندت ودخلت ظابط 3 سنين علشان معنديش كوسه , واحمد زميلى اخد عسكرى سنه واحدة علشان معاة واسطه , وفرقع لوز صاحبى خاله لوا فى التجنيد انهاله خدمته وسلم مخلته بعد يوم واحد قضاة فى الجيش !!!
- دول عيال متدلعه , انت رايح تخدم وطنك , دا انا لما كنت قدك قعدت فى الجيش 8 سنين وعيطت ونا خارج كمان , انت مش مقدر الشرف اللى انت فيه , ياابنى انت بتخدم وطنك , المفروض تكون فرحان .

- بابا , دول ودونى فى مزرعه خيار وكوسه علشان اشرف على العساكر اللى بتزرع !!!
- وماله ياحبيبى , اصلنا فى زمن السلم , والايد البطاله نجسه , بدل قعدتكم فى الكتايب اديكم بتعملوا حاجه تنفع البلد , كتر خير السيد الوزير اللى بيعلمكم صنعه تنفعكوا فى الايام السودا دى .

- بابا , شفت زميلى عمل ايه ؟؟؟ , دخل السجن وأخد 3 شهور حبس !!!!
- ليه , عمل ايه المنيل , سرق سلاح ولا اشتغل جاسوس ؟؟؟ انطق ؟؟ اتكلم ؟؟
- ولا دة ولا دة , بس قائد الجيش كان معدى فى الموكب بتاعه , فكل الظباط والعساكر اللى على الطريق جريت , اللى استخبى ورا الرمل واللى رقد فى الارض , واللى نط وسط الشجر .
- اكيد طبعا لازم كانوا لابسين غلط او عاملين مخالفات ؟
- لا يابابا اصل عندنا الظباط والصف والجنود بيعتبروا عورة , اللوا لما بيشوفهم بتجيله ارتيكاريا وشلل رعاش وسعال ديكى , فالمفروض ان اللوا يقضى التسعين سنه خدمه بتوعه ميشوفش فيهم وش عكر لظابط او عسكرى فلاح حيوان خرسيس .
- وهو عمل ايه ؟
- فضل واقف الحمار !! , بيقول انه مش بيعمل حاجه غلط , وانه نازل اجازة ومستنى المواصلات ..
- وبعدين ؟
- وقف الموكب واللوا بعت الشرطه السمكريه جابوة من قفاة لغايه عندة وبص له بقرف وقاله بتعمل ايه هنا ياحيوان ؟ فرد عليه وقال مستنى مواصلات اروح , فقاله وكمان بتركب مواصلات مدنيه ؟ انت مش عارف انه ممنوع , امال احنا بنصرف كل سنه ميه مليار يوروعلى جهاز النقل العام بتاع الجيش ليه ؟ مش علشانكوا يابهايم ؟ وبرضه بتسيبوة وبتروحوا تبهدلوا نفسكوا وتبهدلوا المظهر العظيم للكوات المشلّحه .
- ماهو ياافندم الاوتوبيسات اللى بتقول عليها دى بتيجى مرة وعشرين لأ .
- مش بتشتكى ليه ياحمار؟؟
- اشتكيت كذا مرة وفى الاخر اخدت جزا .
- كدااااااااااااااااااب , لو كنت اشتكيت كنت عرفت فورا , هو انا نايم على ودانى ؟ انت اللى مخطىء وبتحاول تبربر خطأك وتلقيه على عاتق غيرك .
- خلاص يا افندم , انا هروح مشى .
- كماااااااااااااااااان , انت مش عارف ان المشى مترجلا جريمه .
- طيب يعنى اعمل ايه يا افندم ؟؟
- تعالى هنا ياحاظابط بابهيم انت , انت ازاى واقف بتكلمنى كدة ؟ ايه ؟ مبتعرقش ولا بتترعش ليه ؟ ازاى ركبك مش بتخبط فى بعضها ؟ ازاى لسانك مش بيتلجلج ؟ انت مش خايف ومرعوب منى ليه ؟
- انا مش بخاف الا من اللى خلقنى يا افندم ...
- اخخخخخخخخخخرررررررررررس , وكمان بترد عليا ياحيوان .... فين رئيس فرع القضاء السمكرى ؟؟
( يظهر رجل بكرش ضخم ورأس اصلع كبير )
تومااااااااااااااااااااام يا افندم .
- ياسيادة العمود , الجريمه اللى الظابط دة ارتكبها عقوبتها ايه ؟
- الاعدام رميا بالبُلغ با افندم .
- سامع ياحمار , اعدام ؟ قدها انت دى ؟؟ بس انا هكون حونين عليك وحرصا على مستقبلك هاكتفى بحبسك 3 شهور وحرمانك من المناصب القياديه طول عمرك , ياسيادة العمود , اقبضوا على الحيوان دة وارموة فى المحكمه وبلغ رئيس المحكمه يعمل اللازم .
- تمام يا افندم .....
( يهتف جميع من فى الموكب : طول عمرك اب حنون يا افندم )
.......
- بس يابابا ودة اللى حصل
- طب ليه مرضيش يستخبى معاكوا ؟
- بيقول انه مش جبان , وازاى بيطالبوة يخاف ويترعب من جزا , وبعد كدة فى الحرب مايخافش من الموت !!
تيجى ازاى دى ؟؟!!
- ياابنى دى نقرة ودى نقرة , وزميلك دة ولد غبى ومش عارف مصلحته , وبعدين برضه هو اتكلم وحش مع الراجل , الناس مقامات ياابنى
- يعنى كان المفروض يعمل ايه يابابا ؟
- يعنى كان يقوله شلوت سعادتك دفعه للامام , واحلام وهلاوس نيافه جناب معالى سيادتك تخطيط لمستقبل قواتنا , وفياجرا النبوغ والتخطيط العسكرى لمعاليك تمكننا من ( اختراق ) ( مؤخرة ) جيش العدو , ومافيش مانع ينزل يلحس البيادة الامريكانى او الجزمه ( الباتس ) اللى سيادته جابها معاة من البعثه ....
ايون ياابنى , بالظبط زى ماكنت انا بعمل مع اللوا شوكت الارناؤطى الله يرحمه , اماااااااال , هو احنا انتصرنا فى 67 من شويه !!!!!!!!
ياابنى محدش يقدر يعند مع الجيش , قضى ايامك انت بس , وعديها على خير ولما تخلص ابقى اعمل اللى انت عايزة .
بس مقلتليش صحيح , انت عملت ايه ؟؟؟
- ودة اسمه كلام يابابا , طبعا حفرت حفرة فى الرمل ودفنت نفسى فيها ......

- بابا انا خلصت الجيش .
- مبروووووك ياحبيبى , دلوقت بس تقدر تبدأ حياتك العمليه وتكوم نفسك .

- بابا , انا اتعينت فى حباطه وعايش فى خيمه ومرتبى ميه جنيه .
- وماله يابنى , طالما حلال يبقى ربنا هيباركلك فيهم , انت بس بطل بعزقه وهى تمشى معاك .
- طب اشمعنى غبايوس ابن طنط عطيات الفاشل ابو ستين فى الميه فى ثانوى دخل شرطه اربع سنين وشغال دلوقتى فى ( جهاز حساس ) وبيقبض خمستلاف جنيه , ونا اللى جايب تسعه وتسعين وبعد بهدله ست سبع سنين فى الكليه و3 فى الجيش اخد ميه جنيه بس ؟؟
- ياابنى انت جاوبت على نفسك , دا راجل شغال فى ( جهاز حساس ) , وانت طبعا دكطور وعارف اهميه (الاجهزة الحساسه ) فى (جسم ) النظام , يابنى انت عارف عمليه البواسير بقت بكام دلوقت ؟؟؟!!!!!!!

- بابا , هوة مش ختان الاناث دة حلال ؟
- اة ليه ؟
- اصل المفتى بيقول حرام ؟
- خلاص يبقى حرام .
- ازاى بقى ؟؟
- يعنى انت هتفهم اكتر من الشيخ ياحمار ؟؟!!

- بابا , سنيه خطيبتى سابتنى علشان معاييش فلوس ..
- سيبك منها دى بت ماديه , بكرة تاخد ستها .

- بابا العشرين بنت اللى عرفتهم سابونى واتجوزا ناس معاها فلوس وشغالين فى الخليج .
- دول كلهم انتهازيين وماديين متعفنين ؟؟
- بابا , هو ليه بنات كتير فى مصر بقو ماديين ونكديين وعصبيين وانانيين قوى كدة ؟؟؟
- ................................................

- انا اتشردت يابابا .
- ايه اللى حصل يابنى ؟؟
- امبارح كانت فيه مظاهرة فى الشارع اللى بعدى منه على شغلى فى المحله يوم سته ابريل , ولاقيتهم شايلنى هيلا بيلا وبيرمونى فى الترحيلات!!!
- وبعدين ياابنى ليه مقلتلهمش انك مالكش دعوة بالناس والوحشه دى ؟؟
- قلتلهم , قاموا مقلعينى هدومى وحبسونى فى زنزانه متر فى مترين وكهربونى لغايه ما خلونى امضى على اعتراف انى عضو فى تنظيم ( قاعدة الكنيف ) وبعمل مخطط لكلب نظام الحكم ..
- وبعدين ؟
- اخدت تأبيدة يابابا , وحبسونى فى معتقل المغول مع انور وجدى وحسين رياض , وانفصلت من شغلى ومراتى طلبت الطلاق , وعيالى اتبروا منى وقالوا عليا ( مختل عقليا ) ...
- معلش ياابنى , دا ابتلاء من ربنا علشان انت انسان كويس , بس خليك محترم فى السجن واسمع الكلام وان شاء الله ربنا يفرجها عليك .
- طب واللى ظلمونى ؟؟؟؟
- سيبك منهم , ميبقاش قلبك اسود , منهم لله , وانا من بكرة هروح الحس فرد كاوتش المرشيدس بتاع معالى الباشا علشان يعفو عنك , انا عارفه اب حنون ولطيف وحونين عالوسط يااستك ولاممكن يرضى بكدة ..

..... بعد خمسه وعشرون سنه مات الاب وخرج الابن ووضع تحت المراقبه وانشأ له الاب المحافظ الحنون كشك سجاير يلقط بيه عيشه بعد ان اصابه ميه وخمسين مرض مزمن داخل السجن اقلها السرطان والالتهاب الكبدى ..

- يلا بقى , حياتى كلها ابتلاء , اكيد انا ليا الجنه ,
يلا ,
ضاعت الدنيا ,
مش مهم ,
نركز فى الاخرة احسن


المشهد الاخير ( زحام شديد وشمس حارقه )
ياتى مَلَك يحمل معه اسماء اهل الجنه واهل النار
- متعوس ابن خايب الرجا
- ايوة انا
- قدامى على الفرن
- ليه دا انا كنت راجل مكافح وربيت ولادى بالحلال !!

- علشان كنت عارف الحق وعلمتهم الباطل
علمتهم الجبن والسلبيه والذل والخوف
علمتهم الغباء والتخلف
ضيعتهم وضيعت نفسك وضيعتوا امتكم
اللى زيك من الجيل الفاشل دة ميستحقوش الرحمه , انزل تحت مع اخواتك ..

- موكوس ابن متعوس ابن خايب الرجا
- افنننننننننننننننننننننندم , انا جاهز , ومش هقبل باقل من خمسين زوجه من الحور العين
- نعم ؟؟؟!! بتهزر حضرتك
امشى انجر قدامى , مراتك الجديدة الحيزبون مستنياك عشان تناموا سوا على سرير الشوك فى وادى سَقَرْ
- نعم , اكيد مش انا , دا انا غلبان وطول عمرى مظلوم

- انت اللى ظلمت نفسك بسكوتك على الظلم , وظلمت غيرك واللى جه من بعدك بتخاذلك اللى خلاة كبر وتوحش , خفت وجبنت , واديك برضه فى الاخر نالك منه الاذى واتبهدلت برضه , ضيعت دنيتك واخرتك , انزل الله يلعنك .

- ايوة بس دة مش ذنبى , دا بابا اللى ربانى على كدة , وبعدين انا اتعلمت مش شيخ الجامع وشيخ الفضائيات وشيخ الطريقه وتتلمذت على يد الاستاذ الوطنى الكبير , يعنى ماسيبتش حاجه .

- كل دول غلط , شايف الناس اللى بتتقلب فى اسياخ حديد تحت دى ؟؟
- اة
- اهم هما دول
- بس انا مكنتش اعرف ان دول غلط

- ليه ؟ مش ربنا اداك عقل
مفكرتش بيه ليه ؟؟؟
ليه رميته فى الزباله وسبت غيرك يفكرلك ؟؟؟
ليه عشت زى الحيوان ومت زى الحيوان وانت اللى المفروض ان ربنا كرمك ؟؟؟
مش ربنا اداك دراع ؟
مقاومتش بيه ليه ؟
محاربتش الظلم ليه ؟
مش اداك لسان ؟
مقلتش لأ ليه ؟

- مكنتش اقدر
كنت ضعيف
كنت خايف
كنت هتهزم

- مش شغلتك
النصر والهزيمه
والنجاح والفشل مش بتوعك
دول بتوع ربنا
انت تعمل اللى عليك وبس
انزل يلا

- مين ؟؟؟ بابا !!!! انت هنا ؟؟
- ايوة ياابنى تعالى اقعد جنبى على فوهه البركان دى , وخد اشرب كوبايه الحمم المنصهرة دى , طرّى على قلبك , دا الدنيا حر.
- ومين دة كمان ؟؟ مش معقول !!! جدو!!!!؟؟
- ايوة ياولد ياخنزئور , تعالى كسر الصخور الملتهبه دى بضوافرك يلا , علشان انا تعبان وعاوزك تخفف عنى شويه .
- طب ياجدو دا انت كنت راجل وطنى ونشيط , دا حتى انت حكيتلنا على العساكر الانجليز اللى قتلتهم فى ثورة تسعتاشر ..
- عساكر مين ياعبيط ؟ دا انا كنت بزوغ من المدرسه لما كانت بتقفل على حس المظاهرات واروح اتفرج على كشكش بيه واقضى باقى اليوم عند ليلى صديقه الطلبه ..............
:
:
:
:
- والى هنا تنتهى مذكرات موكوس ابن متعوس ابن خايب الرجا , حيث لم يتمكن من اكمالها , لضيق الوقت , نظرا لانشغاله بشرب الحميم والغساق وتناول فاكهه الزقوم , واللعب مع الحيات والعقارب فى وديان جهنم ......

الثلاثاء، 23 يونيو، 2009