الاثنين، 13 يوليو، 2009

الف نيله ونيله



قبل ما تقروا , اسمعوا التراك اللى فى الجنب دة , بيعمل جو وحاجات كدة يعنى .......
تتر البدايه :
تراراااااااااااااااااا
تراراااااااااااااااااااا
تارارارارارران

حكايات ونوادر ....وطرائف
هأ هأ هأ هأ هأ

فكاهات وعجائب .....ولطائف
امممممممممممممممممم

تُروى بشرائف ....وصحائف

وتُملّى والسهرة تُحلّى
شربات وكنافه وقطائف


--------------

ولما كانت الحلقه الخامسه بعد المئه السابعه
من العام الثامن والعشرون
وفيها الليله التاليه
اتخذ شهريار الملك
مجلس الليله الماضيه
واقبلت شهرزاد
فى نفس الميعاد
فتقدمت اليه
وجلست بين يديه
واخذت تروى له ما وقع
وتصل من الحديث ما انقطع

تاااااراراااااااااراراراااااااااراراراااااااااااراااااااااااااا
تارااااااااااراااااااااااااااارااااراااااااراااارااااااااااااااااااااااااااااااااا
.............

بلغنى ايها الملك السعيد
ذو الرأى الرشيد
والقبضه الحديد
والبطش الشديد
انه بعد القبض على التنظيم الجديد
بتاع تامر المجرم العنيد
تبين انه اسم الله عليه
مصاب بشلل رباعى فى ايديه ورجليه
ودة طبعا من باب التمويه
واستفزاز مشاعرجمهور الشعب العتيه
علشان يقدر يدير التنظيم فى هدوء ومن سكات
ويفجر السفينه بتبات ونبات

وتبين ان ابوة
لا فض فوة
قد امضى ثلاثون عاما من عمرة المديد
فى خدمه الحزق الوطنى السعيد
بعدها كافئوة
بان لفقوا التهمه لابنه وفى السجن رموة
وكما قال الشاعر ابن ابى فلقه
اخرة خدمه الغز علقه

وبعدها بيومين وعلى الجانب الاخر من بحر الظلمات
وقع حادث شابت له رؤوس الاموات
ذلك انه فى حى عين شمس الجوانى
هجم ( مجهولون ) على ريمون جورج النصرانى
اثناء جلوسه فى شادر الخشب المملوك لابيه
حيث كان امام الخشب بيتاجر فيه
فضربوة رصاصه فى صدرة
وارادوا الاستيلاء على ماله واخفاء امرة
الا انه تظاهر بالوفاة
ريثما يرحل الجناة
وبعد ان غادروا محله
جمع شتات امرة
وابلغ السلطات
وذهب للعلاج فى المستشفيات

ومازالت الجهات
تلم الخيوط والفتل والدوبارات
لايجاد صله بين تلك الجنايات
وتنظيم الاخ تامر المحبوس من الاسبوع اللى فات
وحسن نصر الله وياسر عرفات
واحمدى نجاد والمخرج بركات
وفيفى عبدة الشهيرة بعطيات
وابوك السقا مات.......

هووووووووووووو هو هووو هو

هاااااااااااااااااااا اااااةةةةةةةةةةةةة
مولاااااااااااااى
الفجر قد لاح
وكلب الجيران لا يكف عن النباح


وهنا
ادرك شهرزاد الصباح
فسكتت ... عن الكلام المباح
بينما استأنفت مع شهريار ( الكلام الغير متاح )

وصدق الدرويش ابو فرّاج
الدنيا مبتديييييييييش محتااااااااااج

وبهذا ........
تنتهى الحلقه الخامسه
بعد المئه السابعه
من العام الثامن والعشرون
من ليالى الف ليله

يكتبها لكم :
المفتش كورومبو

ويخرجها:
ارسين لوبين
تحديث تانى : بص كمان مرة فى الصورة اللى فوق دى ( والمعنى فى كرش الشاعر )