الأربعاء، 29 يوليو، 2009

غربه...



ليه زمان لما كنت مسافر لرحله بسهر طول الليل فرحان ومزقطط ومش عارف انام والصبح كنت بتمنى الاتوبيس يتأخر فى السكه قوى , علشان اعرف اتفرج من الشباك ( متعه الرحله بالنسبه ليا مكانتش فى المكان اللى هنروحه انما فى السفر بحد ذاته ) ...
بينما دلوقت انا بسهر برضه طول الليل , بس بسهر علشان اعرف اتخمد وانام فى المواصلات وارحم نفسى من ملل وزهق الطريق والسفر ( قمه المتعه حاليا انى اركب المواصله وانام قبل ما تتحرك ويصحونى يقولولى حمدالله عالسلامه ) ؟؟!!!!

ليه كنت مش بشوف الا الخضرة والغيطان والشبورة الجميله بتاع الصبح اللى عامله زى القطن , والترع والميه , بينما دلوقت مش بشوف الا الشبورة الوحشه اللى بتسبب حوادث واللى بنعرف منها ان الجو هيكون حر وزى الزفت ؟؟!!

ليه زمان كانت الدنيا واسعه عليا قوى , لدرجه انى لما كنت بروح الشارع اللى ورانا بحس انى مسااااافر بعييييييييد ومشيت كتير قوى , بينما دلوقت حاسس دايما انى مخنوق والبلد كلها مش بتساعنى على الرغم من سفرى المستمر فى اركانها الاربعه ؟؟؟؟ !!!

ليه زمان كنت بستنى الصيف بفارغ الصبر وكنت بشوف فيه الاجازة واللعب والانطلاق والمصيف , الصيف يعنى هتحرر من اللبس الغلس التقيل اللى بيكتفنى وهلبس لبس خفيف بنص كم , الصيف يعنى جرى ولعب , الصيف يعنى طيارات ورق نتعب نفسنا فيها ايام مقابل متعه لا تقارن فى اطلاقها , الصيف يعنى خروج وفسح وسينيمات , عمرى ما كنت بهتم بالحر ولا باخد بالى منه , ولا بتضايق من العرق ولا بحس بيه , ولا عمرى كرهت الشمس , بل كانت متعتى دايما انى اطلع العب فوق السطوح ابتداء من 3 العصر لغايه المغرب وعمرى ما اتضايقت من الشمس الضاربه فى وشى طول الساعات دى .
بينما دلوقت بقيت بكرة الصيف وبستنا الشتا بفارغ الصبر , لانى بس هقدر انام براحتى من غير حر ورطوبه تقلق منامى , الشتا يعنى هدوء وسكينه وشاعريه , يعنى لبس تقيل يحمينى ويخبينى , الشتا يعنى مافيش عرق يخنقنى طول اليوم , ولا فيه الشمس اللى بقيت بكرهها ومش بطيق اقف فيها دقيقه ؟؟؟!!!

ليه زمان كنت بحس فى حاجات بسيطه جدا بمتعه مهوله قوى مش قادر احقق واحد على مليون من المتعه دى من اى حاجه انا اقدر عليها دلوقت ؟؟؟؟

ليه معدتش قادر افرح ومبقاش فيه اى حاجه قادرة تحفزنى او تلفت انتباهى مهما كانت ؟؟؟

ليه الحياة كانت زمان ايام طفولتى بالالوان ودلوقت بقى ابيض واسود , بل ورسم بالقلم الرصاص كمان ؟؟؟

هل هى حاجه كانت فيا وفقدتها ؟؟ هل بسبب البراءة ؟؟
هل هى حاجه مكانتش موجودة فيا زمان واكتسبتها دلوقت ؟؟ هل بسبب الخبرة والممارسه ؟؟

فى البدايه كنت بقول ان الدنيا كانت حلوة ودلوقت بقت وحشه , يعنى الدنيا هى اللى اتغيرت
وبعدها بشويه قلت لا , دا انا اللى اتغيرت
ودلوقت بقول اننا احنا الاتنين اتغيرنا , للاسوأ مع الاسف ..

زمان ونا طفل كنت معتقد ان معنى انك تاخد حاجه جديدة او تكتسب شىء مكانش عندك , فدة معناة بالضرورة انك كسبان لانك بتزيد مش بتنقص ,
بس بعد كدة فهمت ان فيه حاجات لما بتكتسبها بتنقصك مش بتزودك !!

ليه كل صورة مبقلهاش لون ؟

وكل اكل مبقالوش طعم ؟

ليه لما بقف فجأة بعد ما اكون مشيت مسافة طويله فى حياتى من غير ما ابص لورا , بشوف نفسى انى بقيت اشبه بالروبوت ؟

ليه كل يوم بيمر عليا بحس انى بكون اقرب للانسان الميت من الحى ؟

ليه حاسس بالغربه وانى عايش على ارض مش ارضى , ومع ناس مش ناسى , حتى بقيت بحس بالغربه مع نفسى ؟!!

ليه بحن لايام كنا كلنا فيها واحد لما نتلم حوالين مازنجر ولا جريندايزر ولا بوجى وطمطم , بعدها اللى بقى ظابط امن دوله واللى بقى معتقل سياسى , اللى بقى حرامى واللى بقى شحات , اللى دكتور واللى معاة ابتدائيه , وكل واحد راح لسكه؟؟ !!!

ليه بحس انه كان فيه حاجات زمان ( بتتشم ) اة بتتشم , بس مش بالانف , بتتشم بحاسه تانيه انا معرفهاش , بس دة معادش موجود دلوقت , هل لانه معادش فيه ريحه ؟ ولا لان الحاسه دى باظت خلاص ؟؟

فجاءة اخدت بالى ان مش الحواس هى اللى بتتعامل مع العالم الخارجى بشكل مباشر , لا , دا فيه حاجه تانيه بينهم هى اللى بتحدد للحواس دى الطريقه اللى تشوف وتحس وتترجم بيها اللى قدامها .

انا عاوز الحاجه دى , عايز اصلحها , او ابدلها بزميلتها القديمه اللى من التمانينيات , اعتقد انها هتكون يابانى مش صينى زى بتاع دلوقت .....

اسمعو التراك اللى شغال دة , نفحه من الايام اللى كنت بتكلم عليها , لو حرك حاجه جواكم هتفهموا قصدى ...