الجمعة، 31 يوليو، 2009

رفاعى الأفاعى

- السبع سبع وان كلّت مخالبه .... والكلب كلب وان طوقته الذهبا -

قبل كل حاجه انا اسف جدا , لان ناس كتير سالتنى عن صورة الراجل اللى فى الجنب دى واللى مش مكتوب عليها اسم , وانا وعدتهم انى هعمل عنه بوست , الا انى مع الاسف اتاخرت كتير فى البوست دة .
بكرر اسفى مرة تانيه ...

- تانى حاجه احب اطلب منكم انكم تسمعوا التراك اللى شغال دة وانتوا بتقروا البوست , مش عارف ليه جه فى دماغى جامد وانا بكتب والحت عليا رغبه انى انزله مع البوست ..

البطل اللى هتكلم عنه فيه ناس كتير متعرفوش , خصوصا مواليد النص التانى من التمانينيات وما بعدها ( والنص الاولانى برضه اللى انا منهم , منا كنت طفل اياميها ) ..
وبرضه فيه ناس كتير متعرفوش بسبب التعتيم الرهيب اللى اتفرض عليه وعلى قصته , بس دلوقت مفيش حاجه من الحاجات دى تهمه , عارفين ليه ؟؟
علشان هو دلوقت بين ايدين اللى خلقه واكرمه بالبطوله والشهادة , اعتقد واحد بالمواصفات دى مش هيهتم ولا هيبالى بان الناس تعرفه ولا متعرفوش , تشتمه او تمدحه , كل دة كلام كان اساسا مش بيهمه فى حياته فمن باب اولى مش هيهمه بعد انتقاله للرفيق الاعلى ...
بطلنا اسمه محمود نور الدين , اتولد فى الاسكندريه سنه 1940 واشتغل فى السلك الدبلوماسى وبعدين التحق للخدمه بجهاز المخابرات العامه , وكان من مهامه متابعه نشاط الجواسيس الصهاينه فى لندن , وادى دورة ببراعه منقطعه النظير وخصوصا خلال حرب 1973 وحصل على العديد من الاوسمه ..

الا انه تعرض لصدمه شديدة بسبب مفاجأة زيارة السادات للكيان الصهيونى وعقدة لاتفاقيه كامب ديفيد ( معسكر داود ) , طب اى حد مكانه دلوقت يعمل ايه ؟؟
ممكن يزعل شويه ويقول حسبى الله ونعم الوكيل ويكمل شغله عادى ,
ممكن يقول ونا بايدى ايه اعمله زى ما تسعه وتسعين وتسعه من عشرة فى الميه مننا دلوقت ما بيقول ,
ممكن يوجد لنفسه اى مبرر اهبل من بتوعنا ويقول هو انا هافهم اكتر من الريس ؟؟ اكيد هو ليه حكمه فى كدة مش فاهمينها , او يقول انا عبد المأمور , او يقول انا عايز اكل عيش , او مش ذنبى دا ذنبه هو علشان هو اللى عملها ..

محمود نور الدين معملش كدة
محمود نور الدين قدم استقالته ,
ومنين ؟
من جهاز المخابرات العامه
تخيلوا واحد بيخدم فى مكان مرموق زى دة واثبت نفسه وله مكانه كبيرة فى الجهاز , هل ممكن يتخلى عن دة فى سبيل مبدأ ؟؟؟

عمركوا سمعتوا عن ظابط قدم استقالته احتجاجا على سياسات الحكومه ,
او عن قاضى استقال علشان ينأى بنفسه عن فساد القضاء وميطولوش ,

محمود نور الدين عمل كدة
استقال من المخابرات فى عز مجدة وبمحض ارادته وبدون اى ضغوط ,
مش كدة وبس , لا دا كمان ساب البلد وسافر لندن وعمل جريدة هناك بيهاجم فيها شيخ المنصر الاكبر اياميها
وبعد فترة اضطر يقفل الجريدة لاسباب ماديه , ورجع مصر فى عهد السلطان عوكل الثالث سنه 83 , السنه اللى انا اتولدت فيها ..
اظن هو كدة عمل اللى عليه وزيادة , يهدى بقى ويكن ؟؟؟

لأ
قرر انه يعمل تنظيم مسلح , ايوة مسلح , داخل مصر , وسماة ثورة مصر وضم اليه مدنيين وعسكريين كمان , وكان فيه اسماء كتير معروفه ومشهورة , وسماة تنظيم ثورة مصر ..
محمود نور الدين كان لاحظ ان مصر اصبحت بعد الاتفاقيه وخصوصا فى بدايات عهد عوكل عبارة عن خليه جواسيس اسرائيليين يعملون فى العلن وتحت ستار السلك الدبلوماسى مستغلين تمتعهم بالحصانه !!
تخيلوا بقى المنظر الجميل دة ( واللى مازال موجود الى الان ) للجواسيس الصهاينه وهما مبرطعين فى البلد ومحدش يقدر يقولهم بم !!

كان هدف محمود الاول هو ( تصفيه ) ايوة تصفيه الكوادر دى والقضاء عليها نهائيا , طبعا بشكل غير رسمى علشان ميحرجش الحكومه المصريه ( المعززة ) , ياسلاااااام , شوفتوا الحنيه , صعبان عليه يحرج الحكومه , والله فيه الخير ...
بس اخدتوا بالكم من كلمه تصفيه ؟؟ الراجل مش بيحب يشتغل نفسه , جاب من الاخر وعرف الحل الصح ونفذة , مراحش وقف ساعتين على سلم النقابه ودمتم , ها , واخدينلى بالكم ؟.....
كان من اساسيات شغله هو عدم الاعتداء على اى مصرى حتى وان كان ( معزز ) وبالفعل كل عملياته مراحش ضحيتها مصرى واحد ولو عن طرق الخطأ !!!

اول عمليه عملها كانت فى شهر يونيو سنه 85 , ودى قتل فيها مسئول الامن فى السفارة الاسرائيليه بالقاهرة , وبعدها اغتالوا مسئول تانى فى السفارة برضه ودة كان ظابط فى الحرب وكان بيتلذذ بتعذيب وقتل المصريين ..
تالت عمليه عملها البطل محمود , كانت احتجاجا على مشاركه اسرائيل فى معرض القاهرة التجارى الدولى وفعلا نفذ عمليه بارعه تمكن فيها انه يهاجم الطقم الاسرائيلى المسئول عن الجناح فى المعرض ودة كان سنه 86 ..

بعد كدة لاحظ التعاون الوثيق بين المخابرات الامريكيه والموساد داخل الاراضى المصريه وتمكن من كشف نشاط تجسسى واسع للامريكان داخل مصر , مقترن بحاله طناش كاااااااااامل من الحكومه المصريه ( المعززة ) , الا صحيح , عمركوا سمعتوا عن جواسيس امريكان اتمسكوا فى مصر ؟؟؟ هل معنى كدة انه مافيش جواسيس امريكان عندنا ؟؟؟

:D

قرر البطل انه يستهدف الجواسيس الامريكان هما كمان , وهاجهم 3 جواسيس يستترون تحت غطاء العمل فى السلك الدبلوماسى بالسفارة الامريكيه , وبكدة اصبح محمود نور الدين مطارد من العديد من الاجهزة الامنيه , اولها الموساد , والسى اى ايه , بالاضافه لكل اجهزة الامن والمخابرات المصريه ( المعززة ) , اللى يسيئها جدا ان حد من حبايبهم وولاد عمهم تتمس شعرة من راسه او يتئذى من الارهابيين الاوغاد ..
الا ان البطل قاد التنظيم ببراعه منقطعه النظير ودوخ الاجهزة الامنيه دى كلها , ونفذ عملياته بدون ما يسيبلهم اى خيط !!!!!

الا انه كان له اخ بايظ وتلفان ومدمن مخدرات , هددة فى يوم انه يكشف عن التنظيم لو مادالوش فلوس يشترى بيها المخدرات , فما كان من محمود نور الدين الا انه ضربه بالرصاص فى رجله كانذار ....
بس الكلب ديله عمرة ما يتعدل , وبالفعل راح اخوة السفارة الامريكيه وعرض عليهم انه يقدم لهم تعليمات كامله عن التنظيم مقابل نص مليون دولار ومنحه الجنسيه الامريكيه , وبعد ما وعدة السفير بتلبيه طلباته وعرف منه اعضاء التنظيم , استندل معاة وسلمه للامن المصرى وانضم على باقى المتهمين ( حيث انه كان عضوا فى التنظيم ) وادى اخرة اللى يصدق الامريكان ..

واتحكم على البطل بخمسه وعشرين سنه , وطبعا قامت الصحافه المصريه ( المحترمه ) بدورها المعتاد بتصوير اعضاء التنظيم كحفنه من المدمنين والمجرمين , الا انها لم تستطيع ايقاف تيار الشعبيه الجارفه اللى حظى بيها البطل دة ...

- ( اعتقد انه لو كان عايش دلوقت كان زمانه دخلوة فى قرار الاتهام بتاع تنظيم حزب الله ) ....

واتبهدل البطل فى السجن احلى بهدله لحد ما مات سنه 98 داخل السجن بسبب اصابته بالحمى وان النظام ( المعزز ) رفض يعالجه وسابه لغايه لما مات , بينما كان الكلب عزام عايش باشا ولو كح يجيله طقم دكاترة فورا ( دا قبل ما يخلع طبعا ) , واتوفى بطلنا واستريح من القرف وراح للكريم فى دار الحق والعداله ...

- محمو نور الدين انا معرفتوش الا فى اليوم اللى مات فيه , وكان عن طريق مقال فى جريدة الشعب , اللى كانت من الجرائد القليله ان لم تكن الوحيدة اللى جابت سيرة البطل وفكرت الناس بيه تانى ..
معرفتوش وهو حى , عرفته اول لما مات , فعلا , الفكرة هى اللى بتعيشنا مش احنا اللى بنعيش الفكرة , الله يرحمه سيد قطب لما قال ان افكارنا كالعرائس الجامدة اللى اول لما نموت فى سبيلها تدب فيها الحياة ...

- محمود نور الدين لفت نظرى واعجابى الشديد , مش لانه بطل , الابطال فى تاريخنا كتير , بس لانه بطل ناصح وناجح , ودول صفتين نادرتين مع الاسف فى ابطالنا اللى اعتادنا منهم الوكسه والفشل وان كان لا ينقصهم الايمان والعزيمه ..
اللى عاجبنى فيه انه نجح , وحقق اللى هو عاوزة , ولولا خيانه اخوة مكانش حد وصل له , لانه عمل اللى عليه وشغل دماغه واخذ بالاسباب , اما خيانه اخوة فدى حاجه خارجه عن مسؤليته ولا يلام عليها , لانه عمل اللى عليه , بعكس باقى ابطالنا اللى كتير منهم بيقع فى اول جوله وبيعتمد على دراعه اكتر من دماغه , بالاضافه لنشوفيه الدماغ ونوبات الغباء اللى بتصيبهم كتير مع الاسف ...

- محمود نور الدين جه فى زمن مش للابطال , جه فى زمن الخونه والمعززين , علشان كدة كان صورة واضحه وملفته للنظر , زى ما سيدنا عمر بن عبد العزيز لفت نظر الناس بكونه امام وحاكم عادل جه فى زمن الملوك الاوغاد .
الوردة متلفتش النظر فى البستان , انما تلفت النظر لما تنبت فى الصحرا او الارض البور ......

للاسباب التلاته دى كان اعجابى الشديد بالبطل محمود نور الدين وقرارى انى احط صورته على راس مدونتى ..
وياريت اللى يعرف عنه اى حاجه اضافيه يقولها فى الكومنتات ..

الله يرحمه ويثيبه ويلحقنا بيه على درب البطوله والشهادة ,
اميييييييييييييييييييين ........