السبت، 29 أغسطس، 2009

فى بستان الفلسفه الاسلاميه



كل سنه وانتوا طيبين ,
كنت ناوى اخلى البوست دة بوست خفيف مراعاة لصيام الناس , وبرضه من باب الكف عن الكلكعه والنكد مراعاة للشهر الكريم .
بس انا قلت قبل كدة انى عيل ,
وانى سيد من يرجع فى كلمتى ,
وبناء عليه ,
انا مضطر آسفا انى اخبط بوست من العيار التقيل غرقان بالسكر والشربات والسمن البلدى والزبدة , اللى يقراة يجيله استبحس وتخمه فى مخه علطول وينقلوة اما عالمستشفى يتعمل له غسيل ( مخ ) او عالعباسيه ( وساعتها هتلاقوا العنبر بتاعى هناك , اول واحد على اليمين بعد الخُن بتاع الدفاس التمرجى علطول , هتلاقوا مكتوب عليه عنبر الخطرين او هوبليس كيس بالانجليزى , سمّى واقلع جزمتك عالباب وادخل علطول , ومتخافش عالشوز اينعم هتتسرق طبعا بس مش مهم , لانك اساسا مش هتطلع تانى ..)

ولذلك انا بحذر من الاول اهو

متقراش البوست بعد الفطار علشان غالبا مش هتفهم حاجه .
متقراهوش لو كنت متسربع او مشغول .
لان كل كلمه هنا محتاجه وقفه بجد .

فضى نفسك خاااااااالص , وروق دماغك وظبط كوبايه شاى محترمه , واقرا واحدة واحدة وبراحتك عالاااااخر ,
تاخد فيه ساعه ساعتين عشرة مش مهم , المهم انه يتفهم فى الاخر , البوست بجد دسم ....

طول عمرى بقول على الفلسفه الاسلاميه من اعقد واصعب الفلسفات فى العالم على الاطلاق ومن ارقاها , ان لم تكن ارقاها بالفعل , الفلسفه دى تمثلت فى الاجيال الاولى من مفكرى التصوف ومن اسسوا علم الكلام فى الدوله الاسلاميه , بجد حاجات مختلفه عن ما سبقها ابتداء من الاخ كونفيشيوس الى فلاسفه اليونان ومن تبعهم .

الكلام اللى جاى دة انا قريته لاول مرة من خمس سنين , كنت قاعد فى مكان ما فى الصحرا , وكنا فى الضهر فى عز الصيف , وبجد دماغى كانت هتسيح , مش من الشمس , بل من المضمون اللى قريته , مواتير دماغى سخنت وولعت لدرجه انى محسيتش بسخونه الشمس اللى ضاربه فى نافوخى من صباحيه ربنا ...

الكلام دة من روائع ابن عطاء الله السكندرى , وهو اثبات لزوم وحدانيه الاله بالعقل والمنطق والفلسفه , بعيدا عن اى نصوص دينيه , وميزة دة انه عمل ارضيه مشتركه يتفق عليها الكل , لان كل الناس عندها عقل , بس مش كل الناس بتعترف بالقران , فلو جيت حاورت واحد عابد اصنام مثلا وقلتله قال الله وقال الرسول هيقولك انه مش معترف بيهم اصلا , انما لو حاورته بالعقل والمنطق فاكيد هيكون فيه قواعد عقليه ثابته تتفقوا عليها ( الا اذا كان الاخ عامل عمليه استئصال مخ قبل كدة واليعاذ بالله ) ..

بدون مط ولا تطويل ( :D ) افتحوا ودانكم وعقولكم كويس قوى للى جاى دة :

1- وجود الهين محال فلو فرضنا وجودهما لكان كل واحد منهما قادرا على كل المقدورات , فلو فرضنا ان احدهما اراد تحريك شىء , واراد الاخر تسكينه , فاما ان يقع مرادهما معا , وهو محال لاستحاله الجمع بين الضدين , او لا يقع مرادهما اصلا وهو محال ايضا لان معنى منع ارادة كل واحد منهما معناة حصول ارادة الاخر , اما لو امتنعا معا عن الفعل فيكونا بذلك قد اوجدا الفعل معا , وهذا محال , لانه لما كان كل واحد منهما قادرا على ما لانهايه له , امتنع كون احدهما اقدر من الاخر بل يستويان فى القدرة فيستحيل ان يصير مراد احدهما اولى بالوقوع من الاخر , اذ يلزم ترجيح احد المتساويين من غير مُرَجّح , وهو محال , اما اذا وقع مراد احدهما دون الاخر فالذى يحصل مرادة اله قادر بينما الاخر يكون عاجزا , وطالما كان عاجزا فهو بالضرورة ليس آله .

فان قيل ان كل واحد منهما لابد ان يكون عالما بكل شىء , فسيعلم بان احد الضدين سيقع والاخر لن يقع , وبالتالى سيكون وقوعه ممتنعا , كما انه كل واحد منهما يجب ان يكون حكيما فيكون عالما بالاصلح وغير الاصلح , فيتفقان على ارادة الاصلح , فلا تقع المخالفه بينهما بالتالى ...

والقولان مردود عليهما , فالاول غير وارد لانه معناة ان القدر منفصل عن الاتنين وسابق ليهم فى الوجود ودة طبعا كلام مش معقول لان الاله المفروض انه هو اللى بيخلق القدر ذاته , فبالتالى هيكون الكلام دة غير منطقى وغير وارد ...
اما القول الثانى فالرد عليه انه لو كان العلم بالاصلح موجبا للارادة , لزم ان يكون الاله موجِبا لافعاله لا موجدا لها عن طريق اختيار ....

2- لو فرضنا بوجود الهين , فسيكون كل واحد منهما قادرا على جميع المقدورات , وذلك سيؤدى الى وقوع مقدورين لقادرين مستقل كل منهما عن الاخر وهو محال , فلو اتفقا معا على ايجاد مقدور ما , فاما ان يكون اتخاذة بقدرة احدهما اولى من الاخر , فسيكون احدهما اقدر من الاخر فلا يكون الاخر اله , اما اذا تساويا فى القدرة فسيكون ذلك محال , لانه بذلك سيكون الفعل مستغنى بكل واحد منهما عن كل واحد منهما , فيكون محتاجا اليهما وغنيا عنهما معا , وهو جمع بين نقيضين ولا يجوز , وكمان لو تسوايا فى قدرتهما اللا نهائيه اصبح وجود احدهما غير ضرورى لانه فى الحاله دى هيكون الفعل محتاج لفاعل واحد دون الاخر , فهيكون الاخر لا ضرورة من وجودة اصلا , وساعتها مش هيكون اله , لانه لا حاجه اليه فى احداث الفعل اصلا , فالفعل لا يحتاج الى فاعلين الا اذا كانت قدرة كل واحد منهما محدودة , فساعتها قدرتهما هتتحد معا علشان توجد الفعل اللى مش هيتوجد اساسا الا بقدرتهما معا , يعنى انا مقدرش ازق عربيه لوحدى مثلا , لان قدرتى العضليه محدودة فمحتاج واحد تانى يزق معايا , واحنا الاتنين مع بعض هنزق العربيه , وواحد فينا من غير التانى مش هيزقها , فبالتالى احنا الاتنين عجزة , اما لو كان واحد فينا بس يقدر يزقها فهيكون التانى مالوش لازمه اصلا , اما لو كان كل واحد فينا يقدر يزقها لوحدة يبقى ايه لازمه اننا اتجمعنا احنا الاتنين من الاساس ؟؟!!!!! ....
كما ان وجودالهين اما ان يؤدى لحدوث الاختلاف بينهما وذلك معناة عجز احدهما , واما الا يحدث الاختلاف وهذا يعنى ايضا عجز احدهما لان كل واحد منهم هيكون عاجز عن اظهار مخالفه الاخر , فسيكون الاثنين عاجزين , والعاجز ليس بآله ...

3 - لو فرضنا بوجود الهين , كل واحد منهما واجب الوجود لذاته فسيستلزم ذلك ضرورة التباين بينهما وان يتمايز كل واحد منهما عن الاخر , فاما ان يكون التمايز بصفه كمال او لا , فان كان بصفه كمال فالخالى من هذة الصفه فيهما يكون ناقصا والناقص ليس بآله ,
اما ان تكون ليست صفه كمال , وما ليس بصفات الكمال كان بالضرورة من صفات النقص والناقص لا يكون الها ...

4 - لو فرضنا بوجود الهين , كان لابد للعبد ان يتمكن من التمييز بينهما فى عقله من حيث الزمان والمكان بل والامكان ايضا ( القدرة فى حد ذاتها والوجود فى حد ذاته ) وهذا محال , كما ان الاله لابد ان يحقق الوهيته والوهيته تستوجب العموميه , اما لو كان كل واحدا منهما مختص باشياء معينه , كان الاخر بالضرورة عاجزا عنها ولا تمتد اليها الوهيته ودة غير وارد , كما ان المتخصص مفتقر الى المُخَصص والمفتقر محتاج والمحتاج عاجز والعاجز ليس باله .

5- لو فرضنا بوجود الهين فاما ان يكون احدهما كافيا لتدبير العالم وخلقه واما لا يكون كافيا , فان كان كافيا فلا حاجه للاخر فلا يكون اله , وان كان غير كافيا , فسيكون بالضرورة عاجزا , والعاجز ليس بآله .

6 - ان احد الالهين اما ان يكون قادرا على ستر شىء من افعاله , فيكون المستور عنه جاهل , فيكون الاخر جاهلا والجاهل ليس بآله , واما ان لا يقدر على ستر فعله , فيكون الاول عاجز والعاجز ليس آله ...

7 - الواحد اللى بيوجد من جنسه ونوعه ناقص , لان مجموع اعدادة هو زائد غيرة ( من نفس نوعه ) هيكون ازيد منه , فيكون هو وحدة ناقصا وانقص من غيرة , والناقص ليس آله .

8 - لو فرضنا بوجود الهين , وفرضنا بشىء معدوم الوجود , فان لم يقدر احدهما على ايجادة كان كلاهما عاجزين , وان قدر احدهما ولم يقدر الاخر كان الاخر عاجزا , وان اوجداة بالتعاون بينهما فسيكون كل واحد منهما محتاج للاخر , فيكون كل واحد منهما عاجزا , وان قدر كل واحد منهما على ايجادة مستقلا عن الاخر , فان اوجدة احدهما , فاما ان يكون الاخر قادرا عليه وهذا غير وارد لان ايجاد الموجود بالفعل محال , وان لم يكن قادرا فيكون الاول قد ازال قدرته واظهر عجزة فيكون الثانى عاجزا ومقهورا , والعجز والقهر والنقص غير وارد فى الاله ....

وان قيل ان هذا الثانى قد بعدت قدرته بسبب قدرة الاول وان بعاد القدرة ليس بعجز , فيكون هذا القول مردود عليه بأن الاخر لم تنفذ قدرته ( تنفذ مقصود بيها هنا ان تنتهى الضرورة منها ) بل زالت قدرته وسبب زوالها هو قدرة الاول فيصبح ذلك تعجيزا ...

9 - ان الشراكه فى الملك عيب , والفردانيه والاستقلال بالملك صفه كمال , واذا كان الملوك يكرهون الشركه فى ملكهم الحقير , وكلما كان الملك اعظم كلما كانت كراهيه الشراكه اشد , فما ظنك بملك الله تعالى وملكوته .

10 - انه اما سيكون كل واحد منهما محتاج للاخر وهذا عجز فى كلاهما , واما ان يكون كل واحد منهما مستغنى عن الاخر فلا يكون اى واحد منهما اله لان الاخر مستغنى عنه , فالمنطق يقول ان الاله المستغنى عنه لا يستغنى به , واما ان يحتاج اولهما للثانى او ثانيهما للاول فيكون المحتاج عاجز ......

- هو الكلام اللى الراجل قاله اكتر من كدة بكتير , بس نكتفى بهذا القدر .
- لو مفهمتش من اول مرة اقرا تانى وتالت وعاشر ( دة لو كنت عاوز تفهم )
- انصحك بعد الانتهاء من البوست باخذ دش سااااااقع او على الاقل وضع راسك تحت الحنفيه لمدة لا تقل عن ربع ساعه تبريدا للمواتير ومنعا لضرب الفيوزات من النشاط الزائد ....

ان شاء الله البوستات اللى جايه هتكون اخف من كدة بكتير , مش هتكون دسمه ولا هيكون فيها سمنه خااااااالص , انتظروا بوستات ( حواديت بابا جدو. )
اشوف وشكوا بخير .
سلاموووووووووز

الأحد، 23 أغسطس، 2009

ت فتحه تااااااا ...... توريث





طبعا انا كنت وعدتكم انى مش هتكلم فى السياسه فى رمضان علشان الصداع ووجع الدماغ والغم , لكن طبعا حضراتكم عارفين انى عيل وبرجع فى كلامى , عادى جدا ولا تفرق معايا الصراحه , حيث انى مش صعيدى ولا دماغى ناشفه زى ناس
:D

فعااااااادى جدا انى ارجع فى كلامى بمنتهى السهوله ....

الصراحه انا من اكتر من سنتين بطلت اتابع الجرايد بشكل كامل واكتفيت بمتابعه ثلاث او اربع مواقع اخباريه على النت , بالاضافه لقناة الجزيرة كل كام يوم كدة .

ومن حوالى شهر انقطعت عن العالم الخارجى تماما وبطلت حتى اتابع الاخبار على النت ( حيث انه مكانش فيه تحت ايدى نت اصلا ) بس بصراحه كنت كل شويه اسمع كلمه تستفزنى جدااااااااااا , واللى بيغيظنى اكتر انها بتطلع من ناس ليها وزنها فى الصحافه والاعلام , ودة اللى نططنى زى الفرقع لوز بالظبط من كتر الغيظ .

تقولولى ايه هى ياواد ياحكشه ؟

اقولكم

كل شويه يطلعلنا عبقرى فذ , نادرة زمانه وعصرة ويقولك الجيش المصرى لن يقبل بشخص من خارجه يعتلى سدة الحكم ( بضم السين ) !!!!!!
- وانه خير اللهم اجعله خير الجيش المصرى سيتصدى لعمليه التوريث .
- وانه فيه قلق داخل دوائر ( ما يسمونه بالحرس الجديد ) من تصدى الجيش لعمليه التوريث , لا وايه كمان ,
- قال خير اللهم اجعله خير انه فيه رموز عسكريه داخل الجيش من العيار التقيل لا ترغب ولا توافق على انتقال ملكيه الزريبه من المعلم عوكل ( الراحل قريبا باذن الله ) الى ولدنا حبظلم الشهير بنوفل ....

ياسلاااااااااااااااااااااام

شوف ازاى

اشى خيال يانااااااااااااااااااااس

ونا عمال اكتم فى نفسى واقول اسكت يابُقى , اسكت يابُقى , بس تقولوا ايه بقى فى بُقى قليل الادب اللى مش عاوز يسكت ولا يتلم واللى جايبلى الكافيه طول عمرى !!
راسه والف سيف لازمن وحتما ولابد من كل بد يتكلم , والغازيه لازم تنزل , اة انا بقول اهو .

طيب
اتكلم ياعم
ربنا يكفينا شرك
واسيب الميكروفون مع بُقى , علشان يبع ويدلدق الكلام الى كان عاوز يقوله :

حيث انى رغاى فتعالوا كدة نرجع لايام زمان و نحلل ونشرح الاحداث اللى حصلت فى الجيش من ايام النكسه ,
هنلاقى ان الآمر الناهى هو كان اونكل عبحكيم وكان حاطط اتباع ليه فى كل المراكز القياديه فى الجيش فبالتالى كان الجيش المصرى كله تحت سيطرته المطلقه ,
وعلى الرغم من انه كان فيه قيادات محترمه تملى العين وتملى مركزها وكل شويه تطلع بعثات علميه فى الخارج , الا ان اغلبهم كان من قيادات الصف التانى اما الصف الاول فهم من اتباع عبحكيم المخلصين اللى ميعرفوش الطور من الطحين وكل همهم الخمرة والحشيش والنسوان ( ولا مؤاخذة ) من امثال صدقى الغول وغيرة كتيييييير .

لما جت النكسه كانت الفرصه الذهبيه لعبناصر علشان يتخلص من من عبحكيم وكل اذنابه اللى منتشرين داخل الجيش , والحجه جاهزة , وهى انه بيطهر الجيش من القيادات الوحشه الشريرة اللى تسببت فى النكسه ( وليس الهزيمه ) , وبالفعل تخلص عبناصر من عبحكيم وكل من يدين له بالولاء داخل الجيش , فبالتالى هنلاقى ان المناصب القياديه العظمى للصف الاول كله اصبحت فاضيه , فدة نتج عنه تقدم قيادات الصف التانى بالكامل واحلالها مكان الصف الاول , فهنلاقى جيل كامل مسك بزمام الجيش , الجيل دة جيل محترم ومتربى على العلم والعقليه العسكريه الناضجه ..
علشان كدة المتتبع لاحوال الجيش المصرى هيجد انه عاش عصرة الذهبى فى الفترة مما بعد النكسه الى اواخر حرب 73 ...

طيب , جه السادات بعد كدة وفضل نفس النظام شغال , الا ان السادات كان ضعيف ومالوش ضهر ولا حتى يتمتع باى شعبيه جماهيريه , فبالتالى كان عندة هاجس دااااائم من انقلاب الجيش عليه فى اى وقت وخصوصا ان الجيش نفسه وكل المناصب القياديه فى الدوله مسيطر عليها الناصريين ودة خلاة رئيس معدوم السلطات .

المفروض ان السادات مكنش يتحرك لان الدوله فى حاله حرب واى اخلال فى موازين القوى هيكون فى منتهى الخطر , الا ان السادات الداهيه استغل الموقف دة لصالحه واكتشف انه فى حاله التخلص من الناس دى محدش هيقدر يرد عليه لان الدوله بتحارب واللى ينقلب على الدوله اكيد هيكون مجرد خاين وعميل لليهود .

وبالفعل اتحرك السادات وضرب ضربته وتخلص من كل الناصريين واولهم الفريق محمد فوزى علشان يقمع اى محاوله للتحرك داخل صفوف الجيش ...

هنلاقى عندنا بعد كدة , حوالى سنه 72 , حادثه صغيرة جدا وتافهه وقليل قوى اللى يفتكرها دلوقت , الا انى شايف انها تركت اعظم اثر على السادات .
الحادثه دى تتمثل فى ظابط مدرعات كان ضمن قوات تنفذ مشروع على حدود القاهرة من الخارج , وتفتق ذهنه انه يقوم بانقلاب ويستولى على الحكم وبالفعل حرك عدد من الدبابات ( مش فاكر هما كانوا حوالى اربعتاشر او حاجه وعشرين ) ودول اللى كانوا بيخضعوا لقيادته وامرهم بالتوجه داخل القاهرة !!!
وبما انه فيه نقط شرطه عسكريه على مداخل القاهرة , ونظرا للتحذيرات المتكررة اللى وجهوها للجنود اللى مع الظابط دة , فالعساكر خافت وبالفعل ابتدا عدد الدبابات يتناقص تدريجيا الى ان تقهقرت اغلب الدبابات وتراجعت الى معسكرها ولم يبقى مع الظابط دة الى حوالى اربع او خمس دبابات .
الجميل فى الموضوع ان الظابط دة لو كان دخل القاهرة فعلا كانت فرصه اقتحامه للقصر الجمهورى شبه مضمونه , وحتى وان فشلت فكانت هتسبب خساير ضخمه وملحوظه , ودة كان هيهز سلطان السادات جامد وهيمهد لحركات عسكريه وانقلابات كتير بعد كدة ( والعيار اللى ميصيبش يدوش ) ..
الا ان الظابط دة بمجرد دخوله للقاهرة وتجوله فى شوارعها وسط ذهول واندهاش المواطنين ( ولا حمادة هلال فى اغنيه تصور ) فالراجل اتذهل ومبقاش عارف يعمل ايه ولا يروح فين واستولى عليه الخوف من المصير الاسود اللى فى انتظارة , راح المعلم طالع على فييييييييييييييييين ؟؟؟؟؟

قام طالع على الحسين !

وراكن الدبابات فى ساحه المسجد ونزل ودخل يصلى الضهر جوة !!!

وطبعا انتوا عارفين الباقى , سرعان ما اتعكش من قفاة واتقبض عليه وسين وجيم .
الراجل قال ايه , قال انه كان بيدرب عساكرة وبيعملهم مشروع تدريبى ولما سالوة ليه مبلغتش القيادات بالمشروع دة , رد وقال انه ملقاش حد يبلغه حيث انهم كانوا كلهم مش موجودين , وانه راح الحسين علشان يصلى وعلشان العساكر اللى معاة تستريح شويه !!!!!!
المهز , صاحبنا طبعا اخد شهادة رسميه بانه مجنون ( لانه مش معقول حد عاقل يفكر فى الانقلاب على مولانا السادات ولى الله , العالم الجليل , القائد المجاهد , حبيب الشعب ) .
الموضوع دة ساب نقطه سودة فى نفس السادات وحسسه قد ايه هو ضعيف وان اى انقلاب عسكرى تافه وبسيط كفيل للاطاحه بحكمه .

نرجع ورا تانى فلاش باك للخمسينيات , هنشوف قد ايه انقلاب زى انقلاب يوليو كان ضعيف وفيه عدد قليل جدا من القوات الا انه نجح فى القضاء على النظام السائد ( طبعا لانه كان نظام ليبرالى مدنى فكان هش للغايه , ولو كان دة نظام عسكرى قمعى مكانش انقلاب يوليو شاف النور اصلا ) .
- اثناء القلق اللى حصل سنه 53 و54 , والانقلاب المضاد اللى عمله ضباط المدرعات ضد عبناصر والانقلاب المضاد التانى اللى عمله عبناصر ضدهم بواسطه ضباط المدفعيه , هنلاقى ان فيه وحدات عسكريه ( مقاتله ) كتير كانت منتشرة فى العباسيه بجوار مبنى وزارة الدفاع , وداخل حدود القاهرة , وحيث ان البلد بتدار بواسطه قيادات عسكريه انقلابيه , فبالتالى هيكون مبنى وزارة الدفاع دة هو رياسه الجمهوريه ( الفعليه ) والمتحكم فى زمام البلد .
وبما ان كل الوحدات دى جنبه ولازقه فيه , فمن السهل جدا ان ضباط المدرعات يخرجوا من معسكراتهم ويحاصروا الوزارة ويهددوا بضربها بمدافع الدبابات , بس مجرد انهم هيخرجوا برة الباب ويعدوا الشارع , ولا على ايه , ممكن وهما جوة معسكراتهم بس يوجهوا مدافع دباباتهم ناحيه مبنى الوزارة .....
وطبعا القصه دى اتكررت قبل كدة ( راجع هوجه عرابى ) .
فدة بالنسبه لقيادة عسكريه ديكتاتوريه زى عبناصر ومن حوله , تعتبر شىء مقلق للغايه ووضع غير مرغوب فى استمرارة .
وبالتالى بدات سلسله طويله لنقل وحدات الجيش ( المقاتله ) خارج حدود القاهرة , مع ترك الوحدات ( الاداريه ) بالداخل حيث انه لاخوف منها .

وبما ان كل الوحدات دى برة فى الصحرا , فهيكون من رابع المستحيلات انها تعمل انقلاب ناجح الا لما تنجح فى السيطرة على القاهرة , وطبعا مش هيسيطروا على القاهرة الا لما يدخلوها , ومش هيدخلوها الا عن طريق عدة طرق محدودة العدد ومعروفه , وبالتالى اصبح مجرد السيطرة على الطرق دى كفيل بقمع اى محاوله للتمرد .

طيب ياعم انت بتقول الكلام دة ليه ؟ هقولكم ليه بس قدام شويه , دلوقت هرجع اكمل عصر ما بعد 73 .
المتابع لسياسات السادات فى الجيش المصرى بعد حرب 73 هيلاحظ انه تخلص من اغلب القيادات المحترمه والفذة فى الجيش المصرى , سواء بالقاء التهم عليهم واستبعادهم من مناصبهم او عن طريق احالتهم للمعاش بعد الحرب مباشرة او حتى بنقلهم لمناصب عسكريه شرفيه لا اهميه لها .
راجعوا كدة مذكرات سعد الشاذلى , واللى كان له اب او قريب فى الجيش يسأله , وبالمرة اسالوهم عن اللوا عادل سوكه الخمورجى الحشاش بتاع الرقاصات الفااااااااشل اللى السادات مسكه الكليه الحربيه ذات نفسها بعد الحرب مباشرة فى اوائل عام 74 .
طيب ليه السادات عمل كدة ؟؟
اقولكم ليه

اولا السادات كان رمى نفسه فعليا تحت اقدام اليهود والامريكان , وطبيعى جدا انك لما تعمل كدة مش هتكون محتاج للجيش اساسا لانك مش هتحارب , ماهو هتحارب ازاى وانت اصلا مستسلم ؟؟؟؟

ثانيا الجيش بالشكل دة هيشكل عبء على القيادة السياسيه لانه اصبح شوكه فى ضهرها يهدد بقائها فى السلطه ...

ثالثا انتوا عارفين اليهود والامريكان كويس , لايمكن يقبلوا بوجود جيش قوى على حدود اسرائيل , حتى وان كان الجيش دة هو وقيادته السياسيه سمن على عسل معاهم ( هيقولولك طب واحنا ايه يضمن لنا ان الوضع ميتغيرش ) والساسه وخصوصا اليهود منهم بيحبوا الحلول الجذريه وميحبوش يسيبوا ديول لاى خطر , فكان من الضرورى الزام السادات ( بشكل سرى ) بالتخلص من القيادات الناجحه فى الجيش بشكل تدريجى وغير ملحوظ وتخفيض عدد القوات المصريه تحت مسميات عدة .

طيب , فضل المستوى ينزل ينزل ينزل , لغايه لما هنلاقى الوضع اصبح اشبه بوكاله البلح او سوق الخضار , الا ان تولى ابو غزاله للسلطه العسكريه وتمتعه بلباقه وكفاءة وحنكه سياسيه , دة مكنه من انه يمسك العصايه من النص وينجح فى ارضاء الامريكان بينما هو مستمر فى تنفيذ خطط تنمويه داخل صفوف الجيش .
ابو غزاله كان محبوب جدا من القوات , ودة فى حد ذاته كان شىء غير مقبول من القيادات السياسيه , لانه من المتعارف عليه من بعد الحرب هو توليه السلطه لقيادات غير محبوبه وغير قادرة على ملء مراكزها ولا تتمتع بشخصيه قويه على الاطلاق حتى لا تهدد القيادة السياسيه بانقلاب جديد , وبما ان ابو غزاله مكانش كدة , فمن الطبيعى انه يكون مكروة من القيادة السياسيه وغير مرغوب فى بقاؤة , الا ان قوته وحب الجيش له وتمتعه برضا الامريكان كان بيجعل التخلص منه شبه مستحيل .
الى ان فاق الامريكان من الوهم وادركوا مدى قوة ابو غزاله ومدى تقدم الجيش فى عهدة , فاعطوا لعوكل الضوء الاخضر للتخلص منه , وبالفعل تخلص منه بشكل غير مباشر وبدهاء , عن طريق نزعه من قيادة الجيش بحجه توليته لمنصب اكبر وهو مستشار الرئيس , وما هو الا منصب شرفى مبتدع .

وبما ان عوكل كياد وميحبش دة يتكرر تانى , فبدأ فى البحث عن شخصيه عكس ابو غزاله على طول الخط , بمعنى :
- عاوز انسان ضعيف البدن وعجووووز وضعيف الشخصيه , مايعرفش غير كلمه حاضر يافندم وتمام سيادتك .
- يكون مكروة من القوات بشكل كبيييير جدا , حيث انه لو عقله شاورة على الانقلاب فلن يتبعه احد من الاساس .
- لازم يكون غبى وغشيم ونمطى بشكل مستفز بحيث يستأنف عمليه التخريب بشكل اسرع وفى نفس الوقت يكون قمعى ومفترى بحيث يدوخ قواته السبع دوخات ويلهيهم ويشغلهم بفرعيات وتوافه , بحيث ان الظابط ميفكرش الا فى اجازته ( دا ان اخدها اصلا , ومرتبه ) والعسكرى ينام ويحلم باليوم اللى يخرج فيه من الجحيم دة .
- لازم يتمتع بعقليه تخريبيه تفوق العادة بحيث يضع كل شىء فى غير موضوعه ودة لوحدة كفيل بتحويل قواته لمجرد انقاض او خيال مأته .

وبكدة اليهود هينبسطوا
والامريكان هيفرحوا
والقيادة السياسيه هتزبرنشق وهتعرف انه معادش فيه خوف من اى انقلاب بعد كدة .
والشعب المصرى هيتلهى فى اليوم الاسود اللى هيتجند فيه وهيفضل طول شبابه يدعى ربنا انه ياخد اعفا ....

بذمتكم فيه احسن من كدة ؟؟؟؟؟

طيب
جد جديد فى الامور وهو اننا عاوزين نوفل يمسك بعد عوكل , ودة يتطلب ان الخطه التخريبيه تمشى على وتيرة اسرع بكتير , بحيث يكون ولاء الجيش مضمون وسكوته كامل فى اسرع وقت ممكن .
وفعلا تسارع المخطط ابتداء من عام 2000 وهو نفس العام اللى بدأ يظهر فيه نوفل بشكل مكثف هو وباقى طقمه من اللصوص والحراميه .

وتسارع المخطط بشكل اكبر واكبر اعتبار من عام 2004 , 2005 وهو نفس الوقت اللى تولى فيه نوفل سلطات رسميه ونجح فى ( تركيب ) طقمه على قفا البلد فى شكل وزراة ( تكنوقراط ) , فبدات حمله تطهير وتخلص كلى من اى قيادة تتمتع بنفوذ ولو جزئى واى قائد يكون هناك مجرد شك انه يتمتع بجماهيريه فى صفوف القوات .

دلوقت هنلاقيه اصبح شبه مفرغ من اى قيادة ناجحه او محبوبه او عندها شخصيه , طبعا انا بتكلم عن الوحدات المقاتله , اما الوحدات الاداريه فلا خوف منها , وان كانت عمليه التطهير طالت اغلبها فعلا من باب احكام المخطط والتاكد من نجاحه .

وبالتالى فكل القيادات العسكريه الكبرى تجلس الان على كراسيها بدعم من نوفل وحرسه الجديد وبالتالى اصبح لحم كتافهم من خيرة وبقاؤهم يعتمد بشكل كلى على ولائهم المطلق لنوفل واتباعة ( وانتم متعرفوش الكرسى يعنى ايه بالنسبه لشخص عسكرى ) .....

وبالتالى لما ييجى الاوان ويركب نوفل على البردعه هيستفوجأ الشعب الغلبان اللى كان بيتنيم بتقارير وتصريحات كاذبه توهمه ان وقت اللزوم الجيش هيتحرك ويحل كل حاجه , بس انتوا ناموا فى العسل وطرمخوا , هيفاجأ بان العمليه تمت بمنتهى السهوله واليسر وانه ( اى الشعب ) اخد اكبر خازوق فى تاريخه ( وما اكثرها ) وهنلاقى عمكوا عوكل قاعد بيضحك فى تربته ويقول :
هع هع هع هع , قرفتكوا وعكننت عليكم حتى ونا ميت...آآآآآآآآآةةةةةةةة ( الصوت دة من عذاب القبر طبعا ) ....

اما التيارات السياسيه فكلكوا عارفينها كويس , كما انها ساعتها الامن المركزى والداخليه مش هيدلعوها زى ما بيحصل دلوقت , الداخليه ليها فى القمع مستويات , حتى الان اقصى مستوى وصلت اليه هو المستوى التانى ( ايام احداث المحله ) واللى قال فيه سيادة اللوا لظباطه : اى كلب يفتح بقه اضربوة بالنار !!!! وقد كان ....
كما كانت فرصه لتجريب اسلحه محرمه دوليا على نطاق ضيق ( فى المحله اقصد ) وطبعا ولا حد اخد باله منها ....

اما المستوى الاول , ودة اللى لسه محدش شافه الى الان , هيكون بالمرصاد لاى ( كلب تانى يفتح بقه ) ويقول لا للتوريث , اثناء الفترة الحرجه اللى تعقب قفزة نوفل على ضهر البردعه , يعنى متتوقعوش شوم
- مافيش شوم
- مافيش حرزانات
- فيه رصاص حى
- فيه قنابل غاز قاااااتله
- فيه مدبحه

بس انا بقول من دلوقت اهو علشان محدش يتصدم ....

اما بقى كواتنا المسلخه , فلن يكون هناك اى رد فعل يذكر , فرجال نوفل وعوكل ليسوا بهذا القدر من الغباء علشان يهتموا بتمهيد التوريث على الصعيد الشعبى والسياسى بينما يغفلوا اهميه ( تلجيم ) العسكر وتطريم اسنانهم ....

يعنى محدش هيتحرك ولو اتحركوا فدة هيكون لمساندة الداخليه وقمع الشعب النمرود , ودى طبعا فرصه ذهبيه لاثبات الولاء للقيادة الجديدة وضمان البقاء فى المنصب رغم رياح التغييرالقيادى العاتيه اللى هتيجى بعد كدة ....

طب لو اتحركت القوات ايه اللى هيحصل ؟؟؟؟
بسيطه جدا
القوات مش هتدخل مصر الا عن طريق :
مصر السويس
مصر الاسماعيليه
اسكندريه الصحراوى وشارع الهرم وباقى مداخل الجيزة .

وطبعا من السهل جدا على طفل صغير ببخاخه ميه انه يوقف جيش كامل طالما مسيطر على طريق ضيق .
يعنى كل الطرق دى تحت السيطرة ومن السهل منع اى قوات مهما بلغت قوتها من المرور فيها , بل ونسف الطريق وتدميرة اذا لزم الامر ...
دة بالنسبه لقوات المدرعات والمشاة .

نيجى للمدفعيه
طالما مقدرتش تخرج من ثكناتها وتوصل الى داخل القاهرة و فبالتالى دورها هيكون معدوم لان اهدافها هتكون خارج مرماها بالتاكيد .
القوات البحريه ودى دورها محدود فى المناطق الساحليه ومن السهل جدا اتقاء شرها , دا ان كان ليها شر اصلا .

اخر حاجه واخطر حاجه الا وهى القوات الجويه , ودى من اكتر الاسلحه اللى بيتم انتخاب قادتها والتاكد من ولائهم المطلق للقيادة السياسيه , كما انها بتعامل بشكل مختلف عن باقى القوات وبحنيه اكتر ( اطعم الفم تستحى العين ) .
وحتى لو الشيطان لعب بعقلهم فموجود قوات الدفاع الجوى , وكان الشغل بيتم على اساس ان قدرات القوتين تكون متقاربه للغايه , ودة يضمن اسقاط اى طائرة ( مصريه طبعا ) تفكر فى المحظور ..

اما قوات الدفاع الجوى فهى ليست قوات مقاتله ولا هجوميه ودورها يتلخص فى تامين مظله جويه بنطاقات محددة ضد الطيران , وبالتالى فلا خوف منها بالاساس ..

دا غير نقل عدد ضخم من طائرات الهليوكوبتر المسلحه فى قواعد داخل القاهرة , ودى مفعولها اكيد فى القضاء على اى قوات مدرعه تنجح فى دخول البلد , دا غير قدرتها الفائقه على قمع اى ثورة شعبيه .
دا غير فصل السلاح عن الذخيرة فى الثكنات , وفصل المعدات ( كالدبابات والعربات ) عن اماكن الامداد بالوقود , فهيكون الوضع بالظبط كانى اديتك مسدس ورميتلك الطلقات فى الجيزة والخزنه فى اسكندريه , واخبط دماغك فى الحيط بقى يامعلم بحته الحديدة اللى معاك ....

من كل اللى سبق نستنتج ايييييييييييييه ؟؟؟

اييييييييييييييوة شطاااااااااااار

نستنتج ان اى تحرك عسكرى لمواجهه السيناريو المخطط له , هو تخريف وهبل واضغاث احلام , وحتى ان تم فهو تحرك فاااااااااشل فااااااشل فااااشل ......

والهرتله دى لن تحدث وان حدثت فستكون اقرب للمعجزة , وانتوا عارفين طبعا ان الانسان اللى بيعيش على انتظار المعجزات هو انسان متخلف ...

فلو حضرتك مثلا فكرت تنط من الدور الخامس , فمن الطبيعى انى اقولك انك انسان ميت ...
جايز حضرتك تنزل سليم وحصلت قبل كدة , انما دى ظاهرة عارضه نادرا ما تحدث .
فلو انا او انت تخيلنا انك هتنزل سليم يبقى اكيد احنا مجانين ...
لان الانسان بيبنى فكرة على القواعد وليس الاستثنائات ...

صح ولا غلط ؟؟؟؟

يعنى الهبل دة مش هيتم الا فى حاله واحدة
:
:
ايييييييييييييييييييييوة
:
:
:
:
فى المشمش

وعلى راى المثل : اتشعبطت الخايبه فى الحبال الدايبه .
ابقوا افتكرونا بقى بالعيش والحلاوة
طبعا انتوا عارفين العنوان كويس
يلا
فتكم بعافيه .......

الثلاثاء، 18 أغسطس، 2009

ألفى بك


اول حاجه احب اشكر كل الناس اللى علقت على البوست اللى فات وحاولت تساعدنى على قد ما تقدر

وان شاء الله تعدى واخرج منها على خير برحمه ربنا وبدعاكم ليا .


انا انشاء الله هغيب عنكم كام يوم كدة لانى مسافر سفر بعيد

وعلشان كدة عملتلكم بوست طوييييييييييييييييييييل علشان تفضلوا تقروا فيه طول منا مسافر

امال اسيبكم فاضيين كدة يعنى ؟؟؟


وبما ان رمضان على الابواب وكل سنه وانتوا طيبين , فانا مش عاوز انكد عليكم فى رمضان وقررت انى الغى جرعه النكد المكثفه الى اتعودتوها فى مدونتى وابطلها مؤقتا لحين انتهاء الشهر الكريم


وعلشان كدة هحاول اكون لذيذ ومرح وفكاهى الشهر دة ( هحاول , دة مش وعد )


وعلشان كدة قررت الحق اديكم اخر جرعه نكد قبل رمضان واخبطكم البوست دة


محدش يسألنى ليه , انا نفسى معرفش بس بجد الراجل دة اللى هتكلم عنه بيزن على دماغى وقصته حاضرة قوى فى ذهنى اليومين دول , مع انى قريتها من اكتر من خمس سنين , بس مش عارف ليه افتكرتها اليومين دول


الشخص دة امير من امراء المماليك اسمه محمد بك الالفى , اغلبكم ميعرفهوش , اللى يعرف هيعرفه من مجرد الاسم الشهير للشارع اللى فى وسط البلد .


بس بجد الراجل دة من اغرب الشخصيات اللى سمعت عنها ولو انطلب منى اعمل دراسه على عصر المماليك هعملها عن الشخص دة اولا وعن اخر اسمه ( اسماعيل ابن ايواظ ) ثانيا ..


طفوا النور وجهزو الشاى وشغلوا التراك اللى انا منزله وفضوا نفسكم خاااالص وطفوا اى حاجه شغاله حواليكم ( عدا المروحه اوالتكييف ) وعيشوا معايا ,,,,,


محمد بك الالفى جه الى مصر بواسطه بعض التجار سنه 1189هجريه ( من حولى 240 سنه ) واشتراة امير من امراء المماليك كان اسمه احمد بك جاويش , وكان يلقب بالمجنون , وبعد ما قضى الالفى كام بوم فى بيته اتخنق واتضايق من السفه والمجون اللى كان فيه احمد جاويش وبيته فطلب انه ينباع لشخص اخر وبالفعل اشتراة امير اسمه سليم اغا الغزاوى الملقب بتيمورلنك وبعد شهور اهداة سليم الغزاوى الى مراد بك الكبير اللى دفع تمنه الف اردب غلّه ومن هنا كانت تسميته بالالفى .
محمد الالفى كان امور ووسيم فقربه مراد بك وخلاه جوخدارة وبعد شويه خلاة كاشف الشرقيه ( تعادل منصب محافظ الان )
وكان الالفى صعب جدا وعصبى خالص ومما يحكى عنه ان احد امراء المماليك قصدة فى يوم وطلب منه طلب معين وبعد ما وافق الالفى وانصرف الراجل رجع الالفى فى كلامه تانى ولما راح الامير يعاتبه اتغاظ الالفى وغضب وامر رجاله فبطحوة وضربوة بالنبابيت الى ان مات بعد يومين ...
ولما وصل الخبرلاستاذة وسيدة مراد بك غضب عليه ونفاة الى كفر الشيخ ( مكنتش لسه اتعملت محافظه ولا دة كان اسمها ) ولما راح هناك افترى على الناس وبقى ياخد منهم الغله والاموال , فالناس اشتكوة كتير لمراد بك , لكن مراد بك كان بينبسط منه ومبيعملوش حاجه .
وفى مرة اتفق امراء المماليك على نفى امير منهم اسمه مصطفى بك الى اسكندريه , فامر مراد محمد الالفى بان يلازم مصطفى بك الى منفاة ثم يعود هو الى القاهرة وبالفعل عاد الالفى الى القاهرة واحتفل بيه المماليك واصبح سنجق ( يعنى اتنصب امير كبير من امراء المماليك ), وكان مفترى وفاجر والناس كلها تخاف منه , وبعد كدة اتولى كشوفيه الشرقيه , والشرقيه اياميها كان كل سكانها قبائل من البدو شغلتهم الوحيدة هى الاغارة على القوافل وسلبها ونهبها واحيانا الاغارة على اطراف القاهرة وضواحيها , ومكانش حد بيقدر عليهم لانهم دايما يضربوا ضربتهم ويهربوا ومحدش يقدر يلاحقهم , فلما راح الالفى للشرقيه هزمهم وعمللهم شراك واكمنه وقبض على زعمائهم وربطهم بالجنازير الحديد ومنعهم من التعدى على الاهالى .

وفى الاثناء دى حصل جه وباء الطاعون مصر وافنى ناس كتير , فسافر الالفى هو واهله الى الصعيد وفضل هناك اربع سنين وفى الفترة دى اتغيرت شخصيته كليا واصبح عاكف على مطالعه كتب الفلك والهندسه والعلوم والتاريخ, وبقى يطلب اى عالم يسمع عنه ويقربه اليه , وفضل الالفى بالشكل دة واعتكف فى دارة ومبقاش يخرج منها واعلن انه هيعتزل الدنيا وعالم المماليك الصاخب اللى كله حرب وضرب ودم وغدر وهيقعد فى دارة ويكتفى بالاقطاعيات اللى تحت ايدة يعيش فيها وينفق على نفسه منها , الا ان زمايله الامراء طمعوا فيه وصغر فى عنيهم وكانوا عاوزين يستولوا على ممتلكاته ويتخلصوا منه , فلجأ الالفى للاكثار من شراء المماليك الى ان اصبح عندة اكثر من الف مملوك ( رقم ضخم جدا بمقاييس ايامها ) واربعين كاشف , يعنى تقريبا كان مسيطر على مصر كلها , وكان بيجوز مماليكه للجوارى اللى عندة ويعتقهم ويجهزهم ويسكنهم وينفق عليهم .
وقلد احد مماليكه كشوفيه الشرقيه وبنى لنفسه قصر كبير فى بلبيس وكسر شوكه العربان وكان بيقعد فى مصر اربع شهور وفى قصورة اللى فى الصحراء اربع شهور.
وعمل الالفى قصر من الخشب , بيتفك ويتركب فى بعضه , وكان بيتفكك لاجزاء صغيرة ويتحمل على ظهور الجمال اللى فى القافله بتاعته ووقت لما يحب يريح تقف القافله وينزلوا الاجزاء من على الجمال فى الصحرا ويركبوا القصر فى وقت بسيط .
وبنى الالفى قصر فخم جدا فى الازبكيه وعمل له اعمدة ضخمه من الرخام الفاخر وشبابيك من الخشب الثمين وزينه بالنجف والتحف اللى كان اهداها له بعض اثرياء اوروبا وعمل فسقيه ضخمه اتصممت من قطعه واحدة من الرخام وفيها كذا نافورة من النحاس وعمل له بستان ضخم حوالين القصر وزينه وفرشه بافخم الاثاث , الا انه بمجرد الانتهاء من بناؤة هجمت الحمله الفرنسيه على مصر وكان الالفى ساعتها فى الشرقيه فلما استولى الفرنسيين على القاهرة اختار نابليون القصر دة علشان يسكن فيه , وكان الالفى مقعدش فيه غير ستاشر يوم بس .
فرجع الالفى وحارب جيش نابليون فى امبابه وابلى بلاء حسن وقتل منهم كتير , وفضل بعد كدة يتنقل من بلد الى بلد من شرق مصر لغربها لشمالها لجنوبها يعمل كمائن للفرنسيين ويصطادهم ويطلع عنيهم .
وكان الفرنسيين منا عنيهم يمسكوة وشغلوا الجواسيس والخونه علشان يقدروا يصطادوة او يعرفوا مكانه الا انه كان بيزوغ منهم ببراعه منقطعه النظير وبعدين يرجع يكبس عليهم وهما نايمين فى معسكراتهم ويقتل منهم ناس كتير ويأسر ناس اكتر .
ونجح انه يدخل القاهرة اثناء حصار الفرنسيين لها لما اندلعت ثورة القاهرة التانيه وكان معاه الوزير العثمانى ذات نفسه وبهدل الالفى الفرنسيين احلى بهدله وعمل احلى شغل .
ونجا من محاوله اغتيال كان اعدها الفرنسيين له ساعتها حيث انهم كان عندهم اخباريه انه فى بيت شخص يدعى احمد اغا شويكار فلغموا البيت ( بيحفروا حفر تحت الجدران ويحطوا فيها كميات ضخمه من البارود وبعدين يوصلوها بفتيل طويييييل ) الا انه نجا من الموت لان واحد من امراؤة اسمه اسماعيل كاشف الملقب بابو قطيه , كان دخل جوا البيت واحتمى فيه اثناء القتال ففجر الفرنسيين البيت وطااااااار اسماعيل كاشف هو واللى معاة فى الهوا .

ولما كان مراد بك اصطلح مع الفرنسيين مقابل انهم يدوله الصعيد , فاعتزله الالفى ورفض يقابله وقاطعه , وخرج الالفى مع جيوش العثمانيين ورجع بعد فترة الى الشرقيه يحارب الفرنسيس ويقتل منهم ناس كتير , واول لما يجهزوا جيوشهم علشان يهجموا عليه يلاقوة فص ملح وداب , وكان ينزل الصعيد ويلف من خلف الجبال ويعدى البر التانى ومحدش يعرفله طريق وبعدين يلف تانى ويطلع على فوق ويرجع على الشام وهكذا ....

ولما خرج الفرنسيين فى مصر فرح المماليك وعملوا احتفالات , الا واحد بس , محمد الالفى !!!!
محمد الالفى كان بعيد النظر وقعد مهموم فى بيته وشاف ببصيرته ان العثمانيين بيدبروا حاجه للماليك للتخلص منهم , بالرغم من ان الوزير العثمانى هو وقائد جيش العثمانيين عاملوا المماليك احسن معامله ومنحوهم الاوسمه والنياشين واحتفلوا بيهم نظرا لادائهم ( الممتاز ) فى قتال الفرنسيين .
فجمع الافى امراء المماليك وقال لهم :
لاتغتروا بذلك فأنما هى حيل ومكايد فانظروا فى امركم وتفطنوا لما عساة يحصل , فان سو الظن من الحزم , وهؤلاء العثمانيين لهم السنين العديدة يتمنون نفاذ احكامهم فى هذا الاقليم ( مصر ) وامرا مصر ( المماليك ) قاهرون لهم وغالبون عليهم وليس لنا معهم الا مجرد الطاعه الظاهرة , وما كنا نفعله معهم من الاهانه ومنع الخزانه وعدم الامتثال لاوامرهم , كل ذلك مكمون فى نفوسهم , وطالما دخلو مصر الان بجيوشهم فلا يهون عليهم ان يتركوها لنا كما كانت ويرجعوا الى بلادهم فدبروا امركم وتيقظوا من غفلتكم ...
ولما سالوة عن الحل قال لهم انهم يعدو لبر النيل الغربى ويعسكروا بقواتهم هناك ويوسطوا الانجليز بينهم وبين العثمانيين وميرجعوش للشرق تانى الا لما الجيش العثمانى يخرج من مصر .
فاعترض بعض الامراء وقالوا :
كيف ننابذهم ولم يظهر لنا منهم خيانه ؟ وكيف نذهب الى الانجليز اعداء الدين فيحكم العلما بردتنا وخيانتنا لدوله الاسلام ؟؟
فرد عليهم الالفى :
اما الاستنكاف من الالتجاء للانجليز فان القوم انفسهم لم يستنكفوا من ذلك والتجأوا اليهم ( يقصد العثمانيين ) ولولا مساعدتهم لما قدروا على اخراج الفرنسيس من مصر , فأن تلك مساعدة حرب , اما نحن فمساعدة وساطه وصلح ومصلحه لا غير .
ولما رفض الامراء رأيه لجأ الالفى للمكر والحيله علشان ينجو بنفسه وتقرب لمحمود افندى كاتب الوزير واوهمه انه يقدر يحصل اموال ضخمه من الصعيد ويجمع ثروات كتير مات اصحابها فى الطاعون ومالهمش ورثه وعرض عليه انها يجمعهاله لو ولوة كشوفيه الصعيد , وسرعان ما وافق الوزير , اولا لتحصيل الاموال وثانيا لتفريق شمل المماليك خصوصا ان الالفى هو اكثرهم قوة ونفوذا فى مصر ..

واتنصب الالفى كاشف للصعيد وخرج من مصر فى عز الضهر قدام الوزير والقواد وهما بيودعوة بالطبل والزمر والمرشات العسكريه , ومعاة كل مماليكه وثرواته وامواله وحريمه , وبعد ما خرج بفترة بسيطه حضر عند الوزير ناس وبستفوة وهزقوة على غباؤة الشديد انه ساب الالفى يخرج من القاهرة بكل قوته وجنودة , وانه لو وصل للصعيد هيتحصن فيها ومحدش هيقدر عليه ( الصعيد طول تاريخ المماليك كان الملجأ الامن , فمن تحصن فيه لا يقدر احد على الوصول اليه , حتى ايام الحمله الفرنسيه نفسها ) .
فبعت الوزير رساله سريعه الى الالفى يطلب فيها منه انه يرجع تانى علشان يقوله على حاجه كان نسى يقوله عليها , وبعت الرساله مع فرسان يسبقوا الريح على اساس انهم يلحقوة قبل ما يوصل الصعيد .
الا انه الالفى بمجرد ما خرج من القاهرة حط ديله فى سنانه وقال يافكيك , وسبق الريح على الصعيد ولم يعثر له على اثر .

وفعلا غدر العثمانيين بالمماليك ودعوا زعماؤهم لاجتماع فى سفينه الوزير وبمجرد ما دخلوها حاصروهم الجند ونزلوا طحن فيهم بالسيوف والبنادق والطبنجات , وفى نفس الوقت هجم العسكر العثمانى على منازل المماليك فى القاهرة وقبضوا عليهم , الا ان جيش الانجليز كان متواجد بالقرب من سفينه الوزير فتدخل لانقاذ المماليك وبالفعل انقذ منهم عدد قليل , ودول بدورهم احتموا بالانجليز وفضلوا معاهم , والباقى منهم هرب الصعيد وانضم الى الالفى ..

نظم الالفى قواته وتقدم بيها الى ان وصل الى الجيزة وعسكر فيها وبعدين تقدم الى البحيرة , وكل دة دون ان يقدر العثمانيين على التصدى له , لدرجه انهم من كتر غلبهم منه طلعوله تجريدة ( حمله ) اثناء ولايه خسرو باشا سماها العامه ( تجريدة الحمير ) , ودة لانهم كانوا جمعوا كل الحمير اللى فى مصر علشان تشيل متاع الجيش المتجه لحرب الالفى لدرجه انهم فرضوا اعداد ضخمه من الحمير والزموا سكان احياء القاهرة باعدادها وكانوا بيهجموا على البيوت فجأة ويخطفوا الحمير , فالناس خافت على حميرها وبقت تخبيها جوة البيوت , فكان العسكرى التركى يطلع فوق سور البيت ويتسلق الجدران ويقول ( زررررر ) فينهق الحمار فيعرفوا مكانه وينزلوا ياخدوة .
D:

وهزم الالفى الجيش شر هزيمه وقتل اغلبه ورجع الباقى الى القاهرة فى اسوأ حال , فغضب عليهم خسرو وطردهم من القاهرة ورفض يعطيهم اجورهم , وكان من ضمن القادة المهزومين والمطرودين شخص اسمه ( محمد على سرششمه ) واراد خسرو انه يقتله فمقدرش لانه كان حذر جدا وما بيمشيش خطوة الا وسط جنودة .
وبعد كدة سافر الالفى مع الجيش الانجليزى الى انجلترا وبصحبته بعض الامراء وترك محله احد امراؤة واسمه ( بشتك بك ) وغاب هناك سنه وشويه .

تخيلوا معايا منظر امير شرقى بزيه الفخم والملفت للنظر وعاداته وتقاليدة الغريبه وسيفه الضخم المخيف فى قصور انجلترا واوسطاها وحفلاتها الارستقراطيه المبالغ فيها !!!!!!!!!!!!!

فى الفترة دى كان فيه ديب كبييييير بيلعب فى الظلام , الديب دة اسمه محمد على ,
محمد على كان شغال من تحت لتحت ,
يحرض الجنود على انهم ينقلبوا على الوالى وبعد ما يمشى الوالى يحرضهم على توليه قائدة المباشر واليا على مصر ثم يحرضهم على طلب اجورهم منه وهو يعلم انه لا يستطيع الدفع , فيهجم عليه الجنود فى قصرة ويذبحوة , ثم يحرض الشعب على الوالى الجديد ويتقرب من العلماء والمشايخ ويظهر اهتمامه بامر البلد وفى نفس الوقت يظهر تقربه لامراء المماليك ( خصوصا الاغبياء منهم ) ويحرضهم ضد الالفى واتباعه ويدس بينهم .
وفضل محمد على ينسج شبكه ضخمه من المؤامرات والدسائس بين الجيش وبين القادة وبين الولاة وبين الشعب وبين المشايخ وبين الامراء المماليك , اللى ان نجح فى ان يصبح باشا مصر , وساعتها بدأ يضرب المماليك ببعضهم الى ان نفاهم الى الصعيد ثم ارسل اليهم من يحرضهم على الهجوم على القاهرة اثناء الاحتفال بعيد وفاء النيل ( كسر الخليج ) خصوصا ان محمد على هو وكل القادة والجنود هيكونوا بيحتفلوا هناك ونايمين على ودانهم , وبالفعل بلع المماليك الطعم وهجموا على القاهرة فحاصرتهم الجنود وزنقوهم فى حوارى القاهرة زنقه حرامى الشباشب فى الجامع , وقتلوهم كلهم وامر محمد على بأنهم يقطعوا رؤوسهم ويسلخوها وبعدين يفضوها من جوة ويحشوها تبن علشان متبوظش بسرعه وبعدين يعلقوها فى الشوارع !!!!

وبعدين سمم بشتك بك فمات وكان فى الصعيد ساعتها .

ورجع الالفى وحاول يجمع المماليك حواليه ضد خطر محمد على , الا ان محمد على كان لا يكف عن الدس بينهم وقلبهم عليه ويحاول بكل طريقه استقطاب باقى الامراء الى صفه , ونجح فى انه يوهمهم ان الالفى يرغب فى الزعامه عليهم وخلاهم يرفضوا يمدوة باى اموال او جنود .
وكمان رفض قبودان باشا ( الوزير العثمانى ) انه يساعد الالفى , لانه شاف تنافر المماليك وصراعاتهم الداخليه فبعت رساله مع رسول الالفى يقوله :
انت تضحك على ذقنى وذقن وزير الدوله وقد تحركنا على ظن ان الجماعه على قلب رجل واحد ( يقصد المماليك ) وحيث انهم متباغضون ومتنافرون فلا خير فيهم ...
وراح الالفى الى دمنهور وعسكر فيها , فبعت محمد على اليه جيش ضخم حشد فيه كل قواته , الا ان الافى نجح فى هزيمتهم هزيمه منكرة لدرجه ان من تبقى منهم نط فى النيل حرصا على حياته .
ولو كان الالفى تابعهم ومشى وراهم كان دخل القاهرة بدون اى مقاومه لانها مكانش فيها اى قوات وقتها , الا انه من حسن حظ محمد على ( كان حظه حلو قوى فى مواقف كتير على فكرة ) ان الالفى اكتفى بالنصر ولم يتتبع فلول جيش محمد على !!!
وطلب الالفى من الانجليز انهم يمدوة بقوات محدودة تساعدة فى حربه ضد محمد على , خصوصا ان قوات البدو اللى كانت معاة بدات تشتكى من قله المال وبدات تنفض من حواليه تدريجيا .
وعلم محمد على ان الالفى يستعد للعودة الى الصعيد فجمع جيش عظيم وانتظرة فى امبابه , ووقف هو وقواته على ظهور الخيل وعلى اتم الاستعداد لقتال الالفى .
مر الالفى بجيشه الضخم المنظم بهيئه ( تسد الفضا ) على رأى عمنا الجبرتى , وكان نظم قواته على النسق الحديث اللى اتعلمه فى اوروبا اثناء سفرة , وفضل محمد على هو وجيشه متنحين مزبهلين متعجبين , ومحمد على يقول هذا طهماز الزمان ولا ايش يكون ؟؟!!!!
وقعد محمد على يصرخ فى جنودة انهم يحاربوا فلم يجبه احد
فقال لهم تقدموا وحاربوا وانا اعطيكم كذا وكذا من الاموال فرفضوا ايضا .
ومر جيش الالفى بالكامل امام محمد على بدون ان يتجرأ محمد على على حربه , الا ان وصل الالفى الى دهشور وتملك منه القهر والغم من تخلى زملاؤة المماليك عنه , وفى ساعه مغربيه اراد الالفى انه يختلى بنفسه فصعد على ربوة مرتفعه عند شبرامنت ونظر الى القاهرة من بعيد وسرح فى اضوائها وجمالها فى المساء , وقال :
يامصر انظرى الى اولادك وهم حولك مشتتين متباعدين مشردين , وقد استوطنك اجلاف الاتراك واليهود واراذل الارناؤط , وصاروا يقبضون خراجك ويحاربون اولادك ويقاتلون ابطالك ويقاومون فرسانك ويهدمون دورك ويسكنون قصورك ويفسقون بولدانك وحورك , ويطمسون بهجتك ونورك ....
وفضل الالفى يردد الكلام دة الى ان ( تحرك عليه خلط دموى فتقيأ دما ) على حد وصف المراجع التاريخيه اللى كانت بتوصف اى وفاة مجهوله السبب بانها خلط دموى , وهنا قال الالفى :
قُضى الامر وخَلُصَت مصر لمحمد على وجرى حكمه على المماليك المصريه فما اظن ان تقوم لهم رايه بعد اليوم ...
ومات محمد الالفى

وبعدها بكام يوم دخل رجل اعرابى قصر محمد على وطلب البشارة وقال له ان محمد الالفى مات فخلع محمد على سيفه ورقص وهو بالشبشب وقال : الان فقط طاب لى ملك مصر , وما عدت احسب لغيرة حسابا .
وكان محمد على يقول عنه قبل كدة :
مادام هذا الالفى موجودا لا يهنأ لى عيش , فمثلى انا وهو مثل بهلوانين بلعبان على الحبل , لكن هو فى رجليه قبقاب .

وكان الالفى بعد ما اتعدل كويس جدا فى معاملته مع الناس , فمكانش بياخد البضايع سحت من التجار زى باقى الامراء بل كان يترك لهم تثمين البضاعه وكتابه فواتير الاسعار ويمضى عليها بدون ان ينظر فيها , وكان كويس جدا مع مماليكه ومتكفل بكل شىء لهم , الا انه كان عنيف جدا مع المخطىء منهم فاحبه الجميع وهابوة .

وكان الالفى هو الشخص الوحيد فى تاريخ مصر اللى نجح فى اخضاع العربان بشكل تام وكان على درايه كامله بطبعهم وعاداتهم فكان يأمرهم ويصادر اموالهم وجمالهم ويحبسهم ويطلقهم ويقتل منهم ومع ذلك يحبونه ولا ينفرون منه , وتزوج كتير من بناتهم ومات وواحدة منهم فى عصمته , وساعتها اجتمعت كل بنات العرب وفضلو يندبوة بكلام عجيب ويتغنوا بسيرته .

والعجيب انه لما رجع لوحدة من انجلترا وبحث عنه الجميع للقبض عليه سواء محمد على او باقى امراء المماليك , انه استخبى عند الاعراب واخفوة وكتموا سرة بالرغم من المكافآت المهوله اللى كانت معدة لمن يرشد عنه !!!
حتى ان الناس قالت انه كان بيسحرهم ...

وبعد موت محمد على تفرق جيشه وانفض ووصل جيش الانجليز بعد وفاته باربعين يوم ولما عرفوا الخبر صعب عليهم يرجعوا فبعتوا لباقى الامراء وعرضوا عليهم المساعدة الا ان محمد على خدعهم وثبطهم وبعت لهم مشايخ الازهر يحذروهم من طلب مساعدة الانجليز , وفى نفس الوقت هيج الاهالى ضد الجيش الانجليزى المتواضع ( كان عددة متواضع جدا حيث انه كان مجرد امداد عسكرى لجيش الالفى ) .
وخرج اهالى الاسكندريه فى العجمى وراس التين وهجموا على الانجليز واحرقوا سفنهم ومراكبهم وتقدم من بقى منهم الى دمنهور فاراد كاشف البحيرة الهروب , فقال له اعيان البلد ازاى تسيبنا دلوقت ؟؟ لازم تساعدنا زى ما ساعدناكم فى حروبكم ضد الالفى !!!!
اما فى رشيد فتحصن الاهالى داخل البيوت وانتظروا دخول الانجليز ثم هجموا عليهم فالقى الانجليز السلاح وطلبوا الامان فلم يلتفت اليهم احد وقتلوهم واسروا من تبقى منهم ...

وسخّن محمد على الشيخ عمر مكرم , وكان اكبر زعيم فى مصر وقتها , فحرض الناس على الخروج وجهاد الانجليز الكفار , ودخل فى الليله القنصل الفرنساوى ابدى استعدادة لدعم ( الكفاح المصرى ) !!!
واليكم نص الحوار اللى دار بين مشايخ الازهر ( الاجلاء ) وامراء المماليك :
المشايخ : لا يخفاكم ان الانجليز تخاصمت مع سلطان الاسلام واغارت على مماليكه ودخلت الاسكندريه وقصدهم الاستيلاء على الاقليم المصرى كما فعل الفرنساويه .
الامراء : انهم اتوا باستدعاء الالفى لمساعدتنا ونصرتنا .
المشايخ : لا تصدقوا اقوالهم فانهم اذا تملكوا البلد لا يبقوا على احد من المسلمين , وهم ليسوا كالفرنساويه , فالفرنساويه لا يتدينون بدين , ويقولون بالحريه والتسويه ( المساواة ) , اما الانجليز فهم نصارى على دينهم ولا يخفى عليكم العداوة بين الاديان , ولا يصح ولا ينبغى عليكم الانتصار بالكفار على المسلمين ولا الالتجاء اليهم , وانتم وانتم قضيتم اعماركم فى دين الاسلام والصلاة والحج والجهاد , فلا تفسدوا اعمالكم فى اخر الامر وتوادوا من حاد الله ورسوله .

ورفض المماليك مساعدة الانجليز , بل انهم حاربوهم مع محمد على

وانهزمت حمله فريزر

وبعدها بكام سنه انقتل 450 من المماليك فى مدخل باب العزب فى القلعه فى المذبحه الشهيرة وكان اولهم من ناصر محمد على فى حربه ضد الالفى والانجليز .

وبعدها اتنفى عمر مكرم من القاهرة لارياف الدلتا وقضى باقى عمرة هناك وحيدا .

وكان الالفى بيقول لزملائه الامراء :
الانسان الذى يكون له ماشيه يقتات منها هو وعياله ينبغى ان يرفق بها ويزيدها فى العلف حتى تسمن وتدر له اللبن بخلاف اذا ما اجاعها واشقاها .

محمد على كان بيقول : ان المصريين مثل السمسم , لابد ان يعصر حتى يُستخرَج منه الزيت ..

الالفى كان بيقول :
ان اعطانى الله سيادة مصر والامارة على هذا القطر لامنعن الظلم واجرى فيه العدل ليكثر خيرة وتعمر بلادة ويرتاح اهله ويكون احسن بلاد الله , لكن الاقليم المصرى ليس له بخت ولا سعد , ترى اهله مختلفين الاجناس متنافرى الطباع والقلوب ..

محمد على كان بيقول فى رساله سريه بعتها للفرنسيين يعرض عليهم مساعدتهم فى احتلال الجزائر :
قد تقولون ان مواطنيى ( المصريين ) حمير وثيران , وهذة حقيقه اعلمها جيدا ....
.....
المشهد الاخير :
بعد تفرق جيش الالفى , ارسل عثمان بك البرديسى جندا لنهب معسكرة ...
فوضى عارمه ,
الجو مشبع بالتراب ,
اشياء غريبه مدمرة وملقاة بالارض , لا يعرف لها احد اسما او قيمه , منها ( على حد قول الجبرتى ) :
نظارات , منها ما اذا نظر فيها الانسان فى الظلمه يرى الاشياء كما هى فى النور , ومنها المخصوص فى النظر الى الكواكب فيرى الانسان الكوكب الصغير فى حجم هائل وحوله العديد من الكواكب التى لا ترى بالعين المجردة , والات موسيقيه تشبه الصندوق , بداخلها اشكال تدور بحركات ويظهر منها اصوات مطربه على ايقاع الانغام وضروب الالحان وبها علامات لتبديل الانغام على حسب ما يشتهى السامع وغير ذلك الكثير مما استولى عليه العسكر وباعوة فى اسواق البلد واغلبه تكسر وتبدد وتلف !!!!!!! ....

سؤال بسيط
ليه انبرى الشعب المصرى للتصدى للكام الف اللى جم يساعدوا الالفى واللى كانوا لا يقدروا باى حال من الاحوال على احتلال مصر ولم يكونوا مجهزين بذلك , ولم يكن لديهم سوى رغبه فى دعم نفوذ الالفى تصديا لنفوذ محمد على ذو الميول الفرنسيه ؟؟؟

ليه البطوله والشجاعه دى كلها مشفناهاش فى دخول الفرنسيين للاسكندريه ولا حتى للقاهرة اللى دخلوها فى عز النهار ومشيوا فى الاسواق وسط الناس ومحدش حتى قال بم ؟؟؟

اينعم دور المقاومه بعد كدة فى ثورة القاهرة الاولى والتانيه والثورات المستمرة فى قرى الدلتا والثورات بالغه العنف فى الصعيد واللى محدش يعرف عنها اى حاجه مع الاسف , كل دول مكانهم محفوظ طبعا , بس انا بتكلم فى نقطه معينه , المدن الكبيرة زى القاهرة والاسكندريه , ليه مشفناش البطوله دى مع الفرنساويين ليله ما دخلوا ومن اللحظه الاولى ؟؟؟

وايه رايكم فى دور مشايخ الازهر اللى يوكس , زى الشيخ الشرقاوى ( الجعر ) اللى حبسهم الفرنسيين رهينه فى احدى غرف القلعه ومنعوهم من الصلاة او دخول الحمام الى ان تسلقوا الشباك وعملوا منه ( بى بى ) !!!

طبعا كان فيه رموز كفاح بس كلها كانت من مشايخ الصف التانى ( ومنهم عمر مكرم وقتها ) بينما اغلبيه مشايخ الازهر وكل مشايخ الصف الاول كانوا بالشكل الوسخ دة , احسنهم لزم الحياد وقفل عليه باب بيته !!!!!

ايه رايكم فى ( استموات ) الشعب المصرى فى انه يحكّم محمد على فيه , وعصيانه لاوامر السلطان لاول مرة وتحديه للماليك لاول مرة ووقوفه فى صدام مسلح منذ اللحظه الاولى ضد قوى اجنبيه متواضعه العدد والعتاد ؟؟؟؟

عرفتوا ليه بقى كاتب تحت صورة محمد على انه اول واحد كشف لى ان الشعب دة اهبل وعبيط ......

الأحد، 16 أغسطس، 2009

آسف



آسف
انا اسف
ايوة انا اسف
اسف لكل انسان كنت السبب فى انه يزعل او يشيل الهم يوم .
اسف لكل مخلوق , كنت السبب فى اذيته , سواء بقصد او بدون قصد .
اسف لكل اللى كان مجرد وجودى سبب فى عكننتهم .
اسف لكل صديق خذلته فى يوم ومكنتش على قدر المسؤليه معاة .

اسف قوى لناس جرحتهم وهدمت آمال كبيرة كانوا بنوها عليا , ومطلعتش بالصورة اللى كانوا متخيلينى بيها , واعتقد انهم بيقروا البوست دة دلوقت ..

اسف لاهلى , اللى بدل ما اكون فرحتهم بقيت وكستهم وخيبه املهم على اخر عمرهم ..
اسف لبلدى اللى مقدرتش ادافع عنها مرة , مش بسبب العجز , انما بسبب السلبيه والتخاذل ليس الا .

اسف لكل القيم والمبادىء اللى اعتقدت فى يوم انى حامل ليها , واكتشفت فى الاخر انى بس بتمحك فيها وارمى بلايا عليها علشان اكون انسان كويس قدام نفسى , بينما انا اخر واحد يتكلم عنها ..

اسف لكل حاجه حلوة اتخليت عنها فى يوم بسبب الغباء والسلبيه ليس الا .
اسف لكل فرصه جميله مبتتكررش وجاتلى فى يوم وانا ضيعتها .
اسف لكل حاجه حوليا , صبغتها بالسواد والكآبه بمجرد مرورى عليها او وجودى بالقرب منها .
اسف لكل واحد جرحته فى البلوج او رديت عليه رد سخيف ضايقه وزعله .

اسف لمهندس حر انى مرديتش عليه ومعلقتش على البوست بتاعه اللى طلب راييى فيه واسف كمان لكل الناس اللى مرديتش عليها فى البوست اللى فات ( بس انا كنت فعلا معزول تماما عن النت ال8 ايام اللى فاتوا ومكانش فيه اى امكانيه انى اتصل بالنت او ادخل عليه ).

اسف لنفسى , لانى مبقيتش الانسان اللى كنت عايزة او بتمناة فى يوم .

اسف لكل دول , ولكل اللى قلتهم ولكل اللى مقلتهمش , واسف ان البوست دة جه متأخر , لانه كان المفروض ييجى بدرى عن كدة بكتييييييييييييييييير .

انا مش هقول اسباب او مبررات لاخطائى , لانى مش جاى ابرر ولا ادافع عن نفسى , انا جاى اعتذر وبس , وبطلب من الكل انهم يسامحونى , لانى بجد بجد مكانش قصدى .....

مشكله كبيرة جدا انه يبقى فيه اختلاف كبييييير بين اللى جواك وبين اللى بيطلع منك , او انك تكون بتقصد حاجه ومتقدرش توصلها للناس صح , فيفهموا حاجه تانيه خالص غير اللى انت قاصدها ..

صعب قوى انك تكون بتحب انسان وتتصرف معاة وحش وتكرهه فيك , حتى من غير ما تكون حاسس بنفسك او باللى بتعمله معاة .
..
زمان ونا طفل كنت بتمنى انى اكون فى حياتى زى نسمه الهوا الباردة فى ليله صيف , تيجى بسرعه , وتمشى بسرعه , لا تؤذى حد , ولا تتعب حد , ماتسيبش وراها غير لحظات راحه وسعادة , بس مع الاسف مطلعتش كدة .

على اى حال مازال عندى اعتقاد ان الموضوع دة مش هيطول , وان الريح الجافه العاصفه دى هتمشى بسرعه وهتريح الكل منها .....

انا اسف ...

بجد اسف .....

ادعولى ياجماعه ..

( على فكرة , انا مش اسمى احمد سعيد.... )

الخميس، 6 أغسطس، 2009

عصابه حمادة وتوتو


تحديث : ياريت بعد ما تخلصوا البوست , تقروا تعليقاتى فى صفحه التعليقات
لانها فعلا تعتبر تكمله مهمه للبوست

تحديث تانى : انا غيرت التراك اللى فى الجنب لان القديم مكانش شغال
فياريت اللى بيقرا البوست يسمع التراك الجديد وهو بيقرا
اعتقد ان كدة الصورة هتكون اوضح

الاحداث الاتيه ليست سيناريو مسلسل ( خنيق ) يعد لاتحاف الجمهور به فى شهر رمضان القادم ,
بل هى احداث حقيقيه ,
حدثت ومازالت تحدث بيننا كل عدة ايام ,
منكم من سيكون على علم بها او شاهدها فى قريب او جار او صديق ,
ومنكم من سيسمعها لاول مرة
...
حمادة وتوتو دول شباب ,
زي اغلبنا كدة ,
يمكن صغيرين شويه,
بس من جيلنا برضه ,
طلبه فى كليات مرموقه ,
وولاد ناس محترمين ,
ومستواهم المادى كويس قوى ,
يعنى عندهم كل مقومات التربيه المظبوطه والصح ( دا المفروض يعنى ) ..

بس يمكن اتدلعوا شويه ,
لان بابا وماما موصلوش للمستوى دة بسهوله ,
دول كانوا اغلب من الغلب ,
اتعلموا وكافحوا علشان ياخدوا شهادة ,
وسافروا برة فى هوجه السبعينيات والتمانينيات ,
وعملوا فلوس كتير ورجعوا مصر مترستقين ماديا واشتغلوا فى مناصب كبيرة فى شركات مرموقه بمرتبات ضخمه ,
هما لما ابتدوا يحسوا بطعم الحياة المريحه ,
كان الاوان فات ,
وكان شعرهم ابيض ,
فحبوا يشوفوا ثمرة تعبهم ,
فى عيالهم ,
ويحسوا فيهم ,
باللى مقدروش يلحقوة هما فى شبابهم ,
يبقى لازم الولد يلبس احسن لبس , اللى مكنتش انا ابوة ونا فى سنه بقدر على تمنه ,
ولازم البنت تركب احسن عربيه ,
اللى محطيتش رجلى فيها الا بعد سن الخمسين ,
لازم يعيشوا عمرهم , اللى انا وامهم مقدرناش نعيشه فى يوم من الايام ,
لازم نشوف شبابنا اللى اتحرمنا منه فيهم ....

بابا ,
عايز الفين جنيه .
- ليه ياحبيبى ؟
هاطلع انا وصحابى حفله تياستو اللى فى شرم .
- اتفضل ياحبيبى
بابا , عاوز كمان مفاتيح العربيه .
- خد اهى , بس خلى بالك من السكه
حاضر يابابا , مع السلامه ...

ماما
- نعم ياحبيبتى
عاوزة مفتاح العربيه .
- ليه ؟
فلان صاحبى جاى من اسكندريه وعاوزة استناة فى المحطه علشان اوصله .
- فلان الفلانى ؟؟
اة , منا حكيتلك عليه قبل كدة .
- طب خدى اهى بس متتاخريش عن اتناشر بالليل علشان بابا بيزعل
حاضر .

حمادة وتوتو اصحاب من زمان وساكنين فى نفس الحى الراقى ,
وبالطبع كل شباب الحى عارفين بعض ومافيش حاجه بتستخبى لانهم عبارة عن مجتمع مغلق على ذاته ,
حمادة وتوتو بيسكوروا ( بيشتروا مخدرات يعنى ) ,

بس فيه مشكله

ان الحى الراقى دة مؤمن كويس والداخليه مفتحه عينها عليه , فقط لان ساكن فيه ناس من عليه القوم ,
فتجارة المخدرات فى الحى دة نادرة جدا بعكس المناطق الشعبيه اللى البياع فيها بيحط ترابيزة على راس الحارة ويرص عليها البضاعه ولا اجدع بقال , ومافيش دكر فى الداخليه بيهوب ناحيته ..

نتج عن كدة مجموعه من المستغلين والحاقدين ,
الشاب فلان ابن البواب بتاع العمارة الفلانيه ,
عاوز يلم قرشين ,
فتفتق ذهنه العبقرى عن انه ينزل منطقه ما , ويشترى منها كميه من الحشيش ( المضروب ) وبعدين يلعب فى وزنه وينقصه , وبعدين يبيعه للشباب دول باسعار خرافيه مستغلا جهلهم وتفكيرهم الساذج وفلوسهم الكتير .

وبالطبع الموضوع دة مبيدومش كتير ,
لان البيه بيقفش بعد شهر على الاكثر وبيلبس قضيه ,

بيع فى المناطق الشعبيه براحتك ,
محدش هيكلمك ,
لان دول ناس زباله ,
وميهموش الداخليه فى حاجه ,
ويولعوا بجاز وسخ ,
كانهم مش من البلد دى اصلا ,
انما ولاد الناس ,
لااااااااااااااااااااا
دول اللى على الحجر ,
وموراناش غيرهم ,
نحميهم من شرور الاوغاد اللى زيك ,
وعلشان كدة انت غير مرحب بيك فى الحى الراقى ,
مش لانك تاجر مخدرات ,
لا
لانك بتبيع فى الحى الراقى دة ...

هو دة تفكيرالوزارة المحترمه بتاعتنا !!!

نرجع تانى لحمادة وتوتو ,
حمادة وتوتو وباقى شباب الحى ( اللى اغلبهم بيشرب حشيش ) حسوا انهم فى ضيقه
ومافيش اى ويييييييييييييييييييد
ومش هنعرف نعمل دمااااااااااااغ
ومنعرفش حد نسكور منه
حمادة وتوتو تفتق ذهنهم عن فكرة ( عبقريه ) ,
طب ما احنا ممكن نروح نجيب من المصدر الرئيسى
الساحل الشمالى مليان تجار جمله ودول اللى مغرقين مصر حشيش , واسعارهم اقل بكتيييييييير .
ليه منروحش نجيب منهم ؟؟
بس فيه مشكله ,
مش هينفع نروح علشان نشترى منهم قرش او قرشين ( القرش حوالى 8 جرام ) ,
لازم نشترى كميات
طيب
نسال كل شباب الحى
واللى عاوز نجيب له معانا ...

وبالفعل
لموا حوالى 6000 او 7000 جنيه من معظم شباب الحى
اللى عاوز قرش واللى عاوز وقيه واللى عاوز فرش كامل
وقيدوا الاسماء فى كشف و كل واحد دافع قد ايه وله نصيب قد ايه
وطلعوا فى عربيتهم للساحل
وفعلا قابلوا فلان الفلانى ( احد الاعراب ) وهو من كبار التجار المشهورين فى صحراء الساحل الشمالى ,
حمادة وتوتو اشتروا منه كميه كبيرة من الحشيش ( عدة كيلو جرامات ) , ورصوها وخبوها كويس فى العربيه وانطلقوا عائدين الى القاهرة بعد نجاح المهمه ..

انما التاجر كان له كلام تانى ,
الاخ دة كان على صله بجهاز مكافحه المخدرات , كاغلب تجار المخدرات فى مصر ..
وفيه صفقه غير معلنه وان كانت تمثل قاعدة متعارف عليها بين تجار المخدرات وجهاز المكافحه ,
وهى ان الجهاز ملزم انه كل سنه يعمل قواضى اكتر من السنه اللى قبلها , ومينفعش يعمل عدد اقل ,
والا يبقى الجهاز مش شايف شغله ,
ودى قاعدة غبيه مستخدمه فى اغلب اجهزة وزارة الداخليه ,

طيب

دلوقت ظباط المكافحه عارفين ان فلان تاجر مخدرات ,
انما لو مسكوة هيعملوا قضيه واحدة ,
فالذكاء النووى لظباط الداخليه اشتغل ,
طب ما احنا ممكن نسيب التاجر يشتغل ويسترزق ,
مقابل انه كل كام يوم يبعت لنا قضيه ,
وبدل ما نعمل قضيه واحدة للتاجر ونقعد ننش الدبان بعد كدة ,
ممكن نسيبه ,
فى مقابل انه يهادينا كل كام يوم بقضيه ,
وبكدة يبقى عندنا موارد لا تنفذ للقضايا والشغل ,
ونبقى شايفين شغلنا ,
واحصائياتنا كل سنه تكون اكتر من اللى قبلها ,
والقيادات ( الناصحه قوى ) تنبسط مننا !!!

وبالفعل
فتح التاجر البدوى موبايله
وطلب نمرة فلان باشا من جهاز المكافحه
الو
ايوة ياباشا
جايلك دلوقت عربيه لونها كذا
ماركه كذا
من على الطريق الفلانى
ورقمها كذا
وفيها الكميه المتفق عليها .....

انطلق الظابط الهمام ونصب الكمين المحترم على مدخل الطريق ,
وجاب معاة افراد الظبطيه ومافيش مانع كمان من وكيل نيابه ونستف كل حاجه علشان القضيه تبقى نموذجيه وتلبس صح .
ويفاجأ الاولاد وهما داخلين بجيش واقف مستنيهم ....
وقفوا العربيه
نزلوهم
طلعوا المخدرات
سحبوا منهم الموبايلات علشان محدش يكلم اهله ,
اكيد فيه فى عيلتهم ناس واصله وممكن يسلكوهم من القضيه ,
يبقى نمنع عنهم اى اتصال لغايه ما نظبط القضيه ونمضيهم على الاعترافات ونطلع الاحراز والورق للنيابه ,
اخد منها السادة الظباط حوالى نص الكميه المضبوطه ,
لزوم الكيف الشخصى ليهم وعلشان يوزعوها على حبايبهم واصدقائهم ,
اما باقى الكميه فمش مشكله ,
لان سته كيلو زى اتناشر كيلو زى عشرين ,
اى كميه فيهم كفيله انها تعمل قضيه اتجار ,
يبقى نقلب احنا ( معشر الظباط ) عيشنا ,
والباقى نحطه حرز

وفعلا
حمادة وتوتو لقيوا نفسهم لابسين قضيه اتجاااااااااار فى المخدرات
واتحولوا محكمه
واتهبدوا حكم محترم
سبع سنين او خمستاشر سنه
ممكن لو اتدلعوا قوى ياخدوا 3 سنين بس
علشان احنا بقى معشر القضاة قلبنا حنين قوى
وداييييما نحكم بالعدل
علشان كدة
مش هنديهم تابيدة ولا اعدام
لانهم لسه شباب طايش وحرصا مننا على مستقبلهم !!!

واتنشر فى الجرايد مانشيت كبييييير فى صفحه الحوادث
القبض على اثنان من كبار تجار المخدرات
ومكتوب تحته :
فى اطار توجيهات السيد الوزير بضرب بؤر الاتجار فى المخدرات والقضاء عليها ..
تمكن جهاز مكافحه المخدرات فرع كذا
تحت قيادة سيادة العميد العتويل فلان الفلانى
والمقدم البطل الهمام علان العلانى
وفى عمليه حاسمه
كانت ثمرة بحث مضنى للجهاز استمر لمدة اربعه اشهر
وجمع معلومات شامله استغل الجهاز فيها احدث التقنيات العلميه والاجهزة التكنولوجيه الحديثه ,
تمكن الجهاز فى عمليه فريدة من نوعها
فى القضاء على اكبر رؤوس الاتجار فى المخدرات فى المنطقه الفلانيه
حرصا من سيادة الوزير على شباب مصر
وايمانا من رجال يعملون دائما فى صمت
متحملون كل المشاق والصعاب
فى سبيل حمايه مصر من خطر المخدرات !!!!!
- وفى الجنب ,
صورة السيد الوزير مبتسما ابتسامه صفراء
وتحت منه صورة السيد اللواء مساعد الوزير ومدير الجهاز برأس ضخم ويتدلى من ذقنه لُغد اضخم ..
وتحتهم صورة سيادة العميد البطل والمقدم الهمام ......

حمادة وتوتو دخلوا السجن
واتحلق لهم زيرو
وانضربوا على قفاهم لما تضخم وتيبس من كتر الضرب
وطبعا لما دخلوا السجن
لقيو جوة فلان البلطجى وفلان القاتل وعلان الهجام
ناس كبيرة فى السن وعريقه فى الاجرام , وطبعا مشلفطين ووشهم شوارع
تخيلوا منظر ناس زى دى
مافيهاش ذرة ادميه
ولا شفقه وكلهم عبارة عن عصارة اجرام
منهم اللى مسجون بقاله عشرة وخمستاشر سنه
ولسه هيكمل
مافيش حاجه اسمها جنس ناعم
مافيش ستات
مافيش اى طريقه لتفريغ الكبت الجنسى الا حل واحد بس
الشذوذ
ودة شىء متعارف عليه ومنتشر بشكل بشع داخل السجون المصريه
وان لم يتم بالتراضى فسيتم بالغصب
تخيلوا منظر ناس زى دى
لما تلاقى داخل عليهم فى العنبر حمادة وتوتو
شباب لا يزيد سنهم عن واحد وعشرين اتنين وعشرين سنه
شكلهم نضيف ومحدش فيهم دقنه طالعه ولا واخد بشله فى وشه
تخيلوا بقى هيتعمل فيهم ايه ...........

حمادة مامته ماتت من الحسرة وهو مسجون
وتوتو باباة اعتزل الدنيا وساب الشغل واصبح حطام انسان

خرج حمادة وتوتو بعد سنين
خرجوا اة
بس مخرجوش حمادة وتوتو
خرجوا كائنات تانيه
حمادة ادمن الشذوذ الجنسى واصبح من اساسيات حياته
وتوتو اصيب بدسته امراض نفسيه وبدنيه واصبح شكله يقارب عجوز فى الستين من عمرة ....
حمادة وتوتو بالطبع مستقبلهم الدراسى اتدمر
واكيد محدش هيرضى يشغل عندة رد سجون
حمادة وتوتو قعدوا فى البيت
من غير لا شغله ولا مشغله
وبعد ماكانوا بيشربوا حشيش بس ( من باب اننا كبار وبنحشش اهو )
اتعلموا ضرب الحقن والاقراص وشم الهيروين والبيسه
واحترفوا الاعتداء على مامتهم وسرقه دهبها وفلوسها
علشان يجيبوا تمن تذاكر الهيروين وشرايط البرشام

حمادة انضرب بالنار اثناء محاولته الاعتداء على صاحب صيدليه والاستيلاء على كميه من العقاقير المهلوسه ..

توتو اتخانق مع امه مرة وهو بيحاول ياخد منها فلوس وكان تحت تاثير المخدر
ومحسش بنفسه الا وامه جثه هامدة بين ايدة
وقضى باقى ايامه فى السجن
وهى ماكانتش كتير اصلا
لانه سرعان ما اتوفى تحت تاثير الكم المهول من الامراض اللى كان بيعانى منها ..

فيه ناس بتقول انه انتحر
مش مهم
المهم انه مات خلاص

مات حمادة ومات توتو
بعد حياة مشرفه وسيرة حافله
وتاريخ اسود ومنيل
وعيلتين اتشوهوا واتوصموا بالعار
واسرتين اتهدموا تماما
وبنتين عنسوا
لان بالطبع محدش هيوافق يرتبط ببنت اخوها بالتاريخ المنيل دة
والبركه فى وزارة الداخليه
اللى سابت التاجر
ومسكت الضحيه
وعاملته باسلوب كانوا المفروض يعاملوا بيه ناس تانيه
بس علشان يضمنوا ترقيه
او كلمه شكر من السيد الوزير ......

وخلصت الحكايه ,
الحكايه دى بس ,
لأن السيناريو مخلصش ,
دة بيتكرر كل يوم ,
مع اختلاف الاسماء ...

كنت ناوى اعلق على الموضوع
بس لاقيت انه مافيش داعى
لان اللى منكم يعرف ناس مرت بالتجربه دى
هيفهم اللى انا عاوز اقوله
وهيطلع بنفس الانطباع اللى عندى

اما اللى مشافش وميعرفش
هيقول طب وماله
دول شباب بايظ وتلفان ويستاهلوا اللى يجرالهم
واهلهم يستاهلوا لانهم دلعوهم ومعرفوش يربوهم
النوع التانى دة انا مش هرد عليه
لانى مهما رديت عليه مش هيفهم
لان مش كل حاجه يقدر يعبر عنها الكلام ...
فيه حاجات لازم تتعاش علشان تتفهم ..

بس خلاص ...............