الأحد، 16 أغسطس، 2009

آسف



آسف
انا اسف
ايوة انا اسف
اسف لكل انسان كنت السبب فى انه يزعل او يشيل الهم يوم .
اسف لكل مخلوق , كنت السبب فى اذيته , سواء بقصد او بدون قصد .
اسف لكل اللى كان مجرد وجودى سبب فى عكننتهم .
اسف لكل صديق خذلته فى يوم ومكنتش على قدر المسؤليه معاة .

اسف قوى لناس جرحتهم وهدمت آمال كبيرة كانوا بنوها عليا , ومطلعتش بالصورة اللى كانوا متخيلينى بيها , واعتقد انهم بيقروا البوست دة دلوقت ..

اسف لاهلى , اللى بدل ما اكون فرحتهم بقيت وكستهم وخيبه املهم على اخر عمرهم ..
اسف لبلدى اللى مقدرتش ادافع عنها مرة , مش بسبب العجز , انما بسبب السلبيه والتخاذل ليس الا .

اسف لكل القيم والمبادىء اللى اعتقدت فى يوم انى حامل ليها , واكتشفت فى الاخر انى بس بتمحك فيها وارمى بلايا عليها علشان اكون انسان كويس قدام نفسى , بينما انا اخر واحد يتكلم عنها ..

اسف لكل حاجه حلوة اتخليت عنها فى يوم بسبب الغباء والسلبيه ليس الا .
اسف لكل فرصه جميله مبتتكررش وجاتلى فى يوم وانا ضيعتها .
اسف لكل حاجه حوليا , صبغتها بالسواد والكآبه بمجرد مرورى عليها او وجودى بالقرب منها .
اسف لكل واحد جرحته فى البلوج او رديت عليه رد سخيف ضايقه وزعله .

اسف لمهندس حر انى مرديتش عليه ومعلقتش على البوست بتاعه اللى طلب راييى فيه واسف كمان لكل الناس اللى مرديتش عليها فى البوست اللى فات ( بس انا كنت فعلا معزول تماما عن النت ال8 ايام اللى فاتوا ومكانش فيه اى امكانيه انى اتصل بالنت او ادخل عليه ).

اسف لنفسى , لانى مبقيتش الانسان اللى كنت عايزة او بتمناة فى يوم .

اسف لكل دول , ولكل اللى قلتهم ولكل اللى مقلتهمش , واسف ان البوست دة جه متأخر , لانه كان المفروض ييجى بدرى عن كدة بكتييييييييييييييييير .

انا مش هقول اسباب او مبررات لاخطائى , لانى مش جاى ابرر ولا ادافع عن نفسى , انا جاى اعتذر وبس , وبطلب من الكل انهم يسامحونى , لانى بجد بجد مكانش قصدى .....

مشكله كبيرة جدا انه يبقى فيه اختلاف كبييييير بين اللى جواك وبين اللى بيطلع منك , او انك تكون بتقصد حاجه ومتقدرش توصلها للناس صح , فيفهموا حاجه تانيه خالص غير اللى انت قاصدها ..

صعب قوى انك تكون بتحب انسان وتتصرف معاة وحش وتكرهه فيك , حتى من غير ما تكون حاسس بنفسك او باللى بتعمله معاة .
..
زمان ونا طفل كنت بتمنى انى اكون فى حياتى زى نسمه الهوا الباردة فى ليله صيف , تيجى بسرعه , وتمشى بسرعه , لا تؤذى حد , ولا تتعب حد , ماتسيبش وراها غير لحظات راحه وسعادة , بس مع الاسف مطلعتش كدة .

على اى حال مازال عندى اعتقاد ان الموضوع دة مش هيطول , وان الريح الجافه العاصفه دى هتمشى بسرعه وهتريح الكل منها .....

انا اسف ...

بجد اسف .....

ادعولى ياجماعه ..

( على فكرة , انا مش اسمى احمد سعيد.... )