الجمعة، 4 سبتمبر، 2009

هيا بقت كدة ؟!


( الصورة عبارة عن سيناريو لاحد مسلسلات شهر رمضان القاااادم )
البوست دة هيكون غريب شويه ,
مش هتكلم عن موضوع معين او فكرة واحدة , لا
انا هتكلم كلام مرسل وغير مترابط ( معلش اعتبروها هلوسه صيام )
يعنى فى كام حاجه كدة استفزت اللى جابونى فى الكام يوم اللى فاتوا من رمضان , خصوصا انى كنت مقاطع التليفزيون من زمااااان , لغايه ما اتهرشت فى عقلى اليومين دول وقلت لما ادخل كدة اشوف الدنيا فيها ايه ( وعنيكم ما تشوف الا النور بقى ) ..
المهم ان كل المواقف اللى هتكلم عنها دى بتدفعنى دفعا انى ارد بكلمه واحدة ,
تسمع ولا تكتب ولا تقرأ ,
وسامحونى بجد مش هينفع اقولها علشان الصيام , كما انى قفلت القاموس دة تماما من عشر سنين ( شكلى هرجع افتحه تانى ) ..
اعتقد انكوا عرفتم كويس ايه هو المصطلح اللى عاوز اقوله ..


1- جامع السلطان حسن
جامع السلطان حسن واحد من اعرق واشهر الاثار الاسلاميه فى مصر والعالم العربى كله , واحد من اضخم وافخم المساجد المعروفه , له شهرة كبيرة وساهم فى احداث كتير فى التاريخ .
الجامع دة اتبنى بدم وعرق وفلوس الناس , السلطان حسن الله يكحمه , مكانش بيبنيه من جيب ابوة طبعا , ومسجد بالمواصفات دى ( مئذنه حاجه وتمانين متر وباب يتجاوز التلاتين متر ) كان يعتبر بمقاييس اياميها اعجاز معمارى وكانت مصاريف بنائه فلكيه .
لدرجه ان ناس كتير انتقدت السلطان بسبب بذخه فى الانفاق على المسجد دة واوشك الانتقاد انه ينقلب الى ثورة , وتصادف ان المئذنه انهارت اثناء بنائها فقتلت حوالى 300 مواطن , على حسب ما المؤرخين بيقولوا , وساعتها الناس هاجت عليه وقالت دة من غضب ربنا ( يعنى هو ربنا لما يغضب على الحاكم يموت الشعب ؟؟!! ) .

حصل بعدها طاعون مات فيه ناس كتير لدرجه ان محدش كان موجود يورث اموال اللى ماتوا , فالسلطان هبر الفلوس كلها وكمل بيها بنا الجامع ( ونعم الاخلاق والله ) .

مسجد زى دة من اشهر مساجد مصر , ادخل على كام موقع ( مش فاكرهم مع الاسف ) الاقيهم بيقولوا :
مسجد السلطان حسن هو المسجد الذى زارة الرئيس اوباما !!!!!!!!!!!!!!!!!!!!!!!!!!!!!!!!!!!

يعنى البعيد اللى كتب الكلام دة اختزل تاريخ مسجد عمرة اكتر من 700 سنه فى زيارة وش الغبرة اوباما ؟؟؟؟
طب دا اساسا يعنى المسجد دة موجود من قبل ما تكون فيه اللى اسمها امريكا دى .
ياشيخ حرام عليك ,
كفايه ذل بقى ,

ايه ميتين ام عقدة الخواجه اللى عندك دى ,

بجد بجد ..نفسى آ........ ولا بلاش .


________________


2- مسجد فى الصعيد ,
الموضوع دة من فترة على فكرة , اثناء صلاة الجمعه , والخطيب ( بتاع الاوقاف اياة ) بيخطب خطبه ذريه لولبيه ناقلها نصا من كتاب ( الخطب السلطانيه للعصور الحجريه ) وطبعا الناس كلها داخله الجامع ولا اللى رايح ياخد حقنه ,
اللى بيبص فى الساعه مستنى الخطبه تخلص ,
اللى بيلعب فى صوابع رجليه ,
اللى بيطلع حاجات من مناخيرة ولا مؤاخذة ويمسحها فى السجادة ,
اللى نااااااايم خخخخخخخخخخ فسسسسسسس ,
اللى بيعد خطه استراتيجية للجلوس فى اقرب مكان من الباب ليكون اول المغادرين ,

مولانا الامام العلامه ( كالعادة ) بيفقع خطبه عصماء عن ضرورة الابتعاد عن تكنولوبيا الغرب الملحد الكافر وانها مجرد فتن القاها علينا الغرب علشان يشوة فطرتنا البيضااااااااااااااااااااااااء .
وموضوع الحلقه ....اقصد الخطبه , كان عن هذا الجهاز الفاسد المفسد اللى ما هو الا احد الاعيب الشيطان اللعين لخراب البيوت ونشر الرذيله , فبيقول لافض فوة :
افيقوا ايها الاباء , يااااااااااامن اشتريتم لبناتكم وبنات المسلمين المحمول , وتركتم لهن الحبل على الغااااااارب , فيختلون فى غرفهم , ومعهم هذا الجهاز اللعين الموبااااايل ( من غير مِحرِم طبعا ) فيتحدثون فيه بالساعات , وانتم لا تعلمون مع من يتحدثون ....
اتدرون من يكلمووووووووووووووووون ؟
يكلمووووووووووووووون الحبييييييييييييييييييب ...
وهنا فاق كل الناس فى المسجد وضجوا قائلين فى نفس واحد :
صلى الله عليه وسلم !!!!!!!!!!!!!!!!!!
:
:
:
مش هعلق علشان عيب.............

_____________


3- ودى موجهه للبنات ,
بقالى حوالى سنتين ملاحظ انه بقى فيه ( يونيفورم ) موحد لكل بنات مصر , اللى هو البدى الابيض ابو كم اياة دة ( معرفش اسمه ايه الصراحه ) والجيب الجينز ......
هو خلاص يعنى مافيش هيئات لبس تانيه ؟

طب مش المفروض ان ( كسوة ) الصيف تختلف عن ( كسوة ) الشتا ؟؟
ولا بتوع محلات الملابس ماتوا ؟
ولا المراة المصريه قررت فجأة تريح دماغها من التفكير فى اللبس , حيث ان الموضوع معدش جايب همُه بقى ؟
ولا الاخ ماو تسى تونج بُعث حيا فى مصر المحروسه وفصَل بدله موحدة زى بتاع الصين بس على حريمى ؟؟؟

انا مش من عادتى ابص على اللى رايح ولا اللى جاى , ولا ابحلق فى البنات , اينعم انتن احرار فى اللى تلبسوة , تلبسوا ستوميك تلبسوا نقاب , تلبسوا سكيرت , دا شىء يخصكوا , بس بجد المنظر بقى خنييييييييق ..

___________________


4- عند ( المزين ) :
امبارح قلت لما اروح للمزين ...قصدى الحلاق ....يووة قصدى الكاوافير الروجالى عدم اللامؤاخذة , وقلت لما اجز الفروة خاااااااااالص علشان اريح دماغى .

تصادف ان الاخ كان فاتح الجهاز اللعين الفتين ( مشتقه من فتنه ) اللى اسمه الريسيفر واليعاذ بالله , الا انه كان فاتح قناة اسلاميه , يثاب المرء بمشاهدتها طبعا , القناة اسمها قناة الرحمه والرز واللحمه , اكيد كلكم عارفينها طبعا .

وغصب عنى اخدت شربه زيت خروع مدتها نص ساعه من الفواصل الاعلانيه السخيفه ( تقريبا مافيش اى مادة اصلا , البرنامج مدته 3 ثوانى بيحشروا وسطه خمس ساعات اعلانات ) دا غير سطحيه المادة المقدمه من الاساس .

طبعا مقدرتش اقوله اقلب القناة , لانه لو قلب ممكن يجيب قناة ( الكباريت فى اخراج العفاريت ) الشهيرة بقناة الحكمه , وانا ساعتها ممكن يجيلى سكته مخيه , وطبعا مش معقول اقوله هات مولودى او ماستيكا , لانى اساسا مبحترمهمش ....

وبما انى انسان سادى اتلذذ بتعذيب الاخرين ( زى نوارة بالظبط ) فمش هتعذب لوحدى , خدوااااااااا ( يارب نوارة تكون بتقرا , اطلع عليها شويه من اللى طلعته عليا على طول تسع شهور ) :

- الكلفتى جروب , تقدم لكم الجهاز العجيب .......اف اس 130
- الجهاز الوحيد القادر على حل مشكلات العمود الفقرى والغضروف والصداع والبرد والام المفاصل وتاكل الاسنان والسعال الديكى والتسمم الاميبى والزحار وحمى الوادى المتصدع .
- جهاز اف اح 130 , عكف على تصميمه كبار علماء جامعه بير الحمص الدوليه للعلوم والتكنوفوبيا .
- ضهرك واجعك ؟؟ ( صورة شحط بيلعب حديد بقاله 30 سنه , حاطط ايدة على ضهرة قال يعنى بيوجعه )
- مش بتعرف تنام ؟( صورة بقف عمال يتقلب على السرير )
- بتقعد قدام الكمبايوتظ كتيييير ؟ ( صورة دهل عامل نفسه بيكتب على الكيبورد بس حاطط راسه تحت ورجليه فوق ) .
- جهاز اوف اح 130 يقدم لكم الحل الامثل لكل هذة المشاكيل , فما عليكم الا ارتداء الجهاز ( صورة نفس الشحط بتاع الحديد الاولانى لابس استك بمبا مسخسخ على وسطه ) والجهاز يقوم بعمل اللازم .
- جهاز اوف اح 130هيدروماتيك , الفئه السابعه يعتمد على نظريه الاشعه الكهرومغطاطيسيه وتفاعلها مع البواسير المستعصيه , حيث يقوم بإبثاث اشعه التروفسيولولونيه زئبقيه فتاكه , تقوم بتعديل فأرات الدهر , واعادتها لمكانها تانى ( صورة واحد عمودة الفقرى كان فى رجليه , فدخل عليه نور ازرق رجع عمودة فى ضهرة تانى ( طبعا الضوء الازرق دة اللى هو الاشعاع العجيب ) مش محتاجه فقاقه يعنى ) .
- الجهاز العجيب يصلح لكل الاوقات ( صورة الجعر بتاع الحديد والبقف اللى كان نايم والواد البِلِط بتاع الكومبيوتر العيرة , كلهم لابسين الاستك العجيب وضبهم مفشوخ من الودن للودن ) .
- الجهاز العجيب , سعر الشحم سابت اينما كنت , اتصل بينا نصلك اينما كنت ( ولو كنت العجل فى بطن امه ) .
- الجهاز العجيب , كل اللى مطلوب منك , انك تكع الفلوس , و ( تلبس ) الجهاز العجيب بعد كدة .
جهاز اوف اح العجييييب ......
ياحنين عالوسط يااستك ..........

بجد بجد يعنى ,
نفسى اقولها
مش قادر اتحكم فى بقى
سقف الحلق عندى هيعمل تمرد ويطلّعها ,
اسكت
اسكت يابقى ...

___________________


4 - منك لله يامحسن
مشلشلات التلفزيون ( من الفعل شلشل َ ) السنادى جايه ( فى مستوى الطالب المتوسط ) ..
بجد مش عارف المخلوقات دى عاوزة توصل بمستوى عقليه الانسان المصرى لغايه فين ؟؟!!!
انا مقاطع التلفزيون من زمان , وكنت بقول على مسلسلات رمضان اياميها انها تافهه ,
انطسيت فى دماغى السنادى وقلت لما اشوف ايه النظام ...
بصراحه ,
مش عارف بيجيبوا التفاهه دى منين ....
بجد بجد , يستحقوا جايزة ( البوكسرالشيفون المخملى ) فى التفاهه والهيافه .
نوارة قامت بالواجب وزيادة فى الموضوع دة .
علشان كدة مش هتكلم كتير .
D:
بس هقول كام نقطه كدة , علشان نحط النقط على الحروف قبل ما نطلع سوا عالروف :

الوصفه الذريه لعمل مسلسلات الجاثوثيه :
1- شخص ( صدِغ ) للقيام بدور ظابط المخابرات المصرى , ( يستحسن ان يكون امين شرطه سابق .)
2- شخص تانى ( تختخ ) للقيام بدور ظابط المخابرات الاسرائيلى , ( يستحسن ان يكون الواد بتاع اعلانات الواد كان عندة حق عَرَفه الجااااااامع , او الواد بتاع اعلان ميلودى ( كاندى شوب ) ) .
3 - سيجارتين مارلبورو اسود متسقيين بزيت حشيش خام ( لزوم الدماغ ) ودول طبعا هيكونوا مع كاتب السيناريو .
4 - واد يجيد تمثيل دور الانسان الكَحول ( بفتح الكاف ) والكروديا ( بضم الكاف ) وكبنش ( بفتح جميع الحروف وتسكين النون والفاء ) , للقيام بدور الشاب المصرى الضحيه .
5 - تتر اسود مليان شخبطه ولااااازم يكون فيها الدواير والصليبه بتاع نشان البندقيه القناصه .
6- ميكروباس بأزاز مفيم سوبر دارك ( يستحسن يكون من غير نمر ) لزوم الركنه والتظبيط على طريق المطار فى ليالى الصيف ( الحااارة قوى ) .
7 - سماعه هيدفون بتاع كومبيوتر لزوم ( شغل التجسس )
8 - جاكيت جلد اسود ونضارة سودا ( اللى هما الزى الرسمى للناث الجواثيث ) .
...

مشلشل ابن الارندلى ( اللى مش ناوى اتابعه اكيد ) ,
ياعم يحيى , مالك ؟
انت راخر بقيت زياط وهياص ؟
طب حمادة عزو وقلنا ظاهرة , جاى تكررها تانى ؟؟؟!!!
ولا يعنى علشان تتر المشلشل عمل جماهيريه عاليه تقوموا جنابكم جايبين نانسى عجرم تت..... فى تتر المسلسل الجديد ؟؟؟
انا اللى اعرفه ان المسلسل هو اللى بيشهر التتر بتاعه .
اول مرة اسمع عن مسلسل بيعتمد على تترة فى تحقيق الجماهيريه !!!!
اسميها ايه دى ؟
هيافه ؟
ولا قصر ديل ؟
ولا خيبه الامل راكبه جمل ( على راى تيته ) ؟؟؟
وبعدين سؤال اخير
نانسى اخدت كام فى التتر دة ؟؟؟؟؟؟
طب فيه كام واحد فى مصر بيبات من غير عشا , وفيه كام واحد بيدور على اكله فى صناديق الزباله ؟؟؟
حسبى الله ونعم الوكيل .....
فعلا يعنى
اذا لم تستحى فافعل ماشئت .......
عرفتوا بقى انا ليه عاوز افتح القاموس واقولها تانى .....

روح ياشيخ

كتك وجع فى تترك ......


- الحاجه الوحيد اللى بقيت اتابعها دلوقت فى رمضان , البرنامج بتاع ( عثرة لثحتك ) بتاع الدكطور ( زكى بيوتك ) اللى بيجى قبل الفطار على القناة التانيه , بصراحه , شايفه اكثر مواد التلفزيون المصرى مصداقيه السنادى .
:D
ومحدش واخد منها حاااجه .
منك لله ياللى فى بالى ....

___________

5- الدعايه الاعلاميه اليوم
اولا وقبل كل حاجه اعتذر عن بذائه محتوى الفقرة دى , بس بجد , انا من خنقتى مش هينفع اقولها الا بالشكل دة .
فعلا اول مرة احس قد ايه الادب قيد تقيل امام سخافه الاسفاف والبجاحه .
علشان كدة , انا نويت اتخلص من القيد دة ( نسبيا ) علشان اخرج جزء من شحنه الغيظ اللى جوايا .
اللى جاى دة مش هسميه الاعلانات فى المستقبل ,
ولا الاعلانات فى الحاضر
لان دا بيحصل فعلا
ولو بشكل متغطى
لكن الاسم بيحصل متغطى
واللى النهاردة بيتعمل فى الدرا بكرة هيتعمل علانيه
وبكرة ليه
ماهو من دلوقتى اهو .....
لما تفتحوا التلفزيون فى يوم وانتوا قاعدين مع اهاليكم واطفالكم وتلاقوا الارف دة فى وشكم ,
متبقوش تتخضوا :

لبوس ( الافيونجى )
المشهد : احد احياء القاهرة فى احدى ليالى الصيف , وتحديدا يوم ( خميس ) .
نور غرفه نوم علويه يضاء ,
زوج بنهض من على السرير ويتصبب عرقا ,
زوجه ترتدى قميص نوم ( شفتشى ) وتبدو عليها ملامح الضجر والغضب .

- الزوج صاحب الكرش الضخم والشعر الكثيف ( على الاكتاف كما الغوريلا ) يجلس على حافه السرير واضعا راسه بين كفيه وتبدوا عليه ملامح الحسرة والانكسار , بينما تنهض الزوجه ( التى تبدوعليها ملامح ( الفروسيه بالقوى ) تقوم متأففه وتشعل سيجارة ( مور ) وتخرج للجلوس فى البلكونه بينما تشغل جهاز الكاسيت على اعلى درجات صوته على اغنيه ( الصراحه راحه ياعينى وانت مبتعرفش ) .
.....

مقدم الاعلان :
- تعبان ؟
- زهقان ؟
- مش عارف تعمل مسمار ؟
- هل انت ولا مؤاخذة راجل ( متنى ) ؟

( تظهر صورة صاحبنا لاوى بوزة ويومىء بالموافقه ) .

- معانا .
- لبوس الافيونجى .
- خلاصه عمل اربعين عاما , بين علماء اكبر الشركات العالميه : شركه ابو خنجر , شركه المسمار , شركه المبرد الحدادى , وشركه الطوربيد .
- لبوس الافيونجى
- الوحيد الذى اثبت صدق نظريات اينشتاين ( لكل (فعل ) رد ( فعل ) مساوى له فى المقدار و( مضاد ) له فى الاتجاة )......
- لبوس الافيونجى
- الوحيد الذى ليس له فترة عمل محددة , فهو يعمل ( طول ما انت لابسه ) .
- لبوس الافيونجى
- يرفع ( رأسك ) ( عاليا )

- لبوس الافيونجى
- متوفر بجميع الاحجام , وكل واحد ومقاسه بقى .
- لبوس الافيونجى
- من النهاردة انت مش ( قشاش )
- انت ( الاكسبريس )
- لبوس الافيونجى
- اكونتين فرقعتين لبوس فلين
- لبوس الافيونجى
- هووووووووة دة
مشهد : نور الغرفه يطفأ مرة ثانيه , بينما يضاء نور احمر فاقع .
المشهد ليل خارجى , صورة الحى باكمله من بعيد وفى المنتصف باب بلكونه شقه صاحبنا اياة .
وفجأة تصرخ الزوجه بصوت جهورى : ايييييييييييييوة كدة يابدييييييييييييع ( بديع دة اسم جوزها ) بينما تضاء جميع غرف الحى بسبب صرخه الزوجه .

تظهر فى النهايه اغنيه محمد عبد الوهاب : ياوابووووووووووووور قلى رايح على فيييييييييييين ........

- لبوس الافيونجى......
- ياوابور قولللللللى ....

_________________

كولدير المشتاقووون الى الجنه :

المشهد الاول : تظهر نتيجه قديمه عليها تاريخ عام 1965 بينما يظهر مكان قذر للغايه ( يبدو انه سجن ) بينما يقبع العديد من السجناء على اجهزة تعذيب بشعه وتسيل منهم الدماء بينما يجلس حمزة البسيونى على سفرة عشاء فاخرة ويضحك ضحكات مجلجله وسط سمفونيات من صراخ المساجين .

المشهد التانى : صورة شاهد قبر مكتوب عليه ( المغفور له ) حمزة البسيونى , مامور السجن الحربى .

المشهد الثالث : اصوات صراخ بشع وصورة السنه نيران ممتدة فى الخلفيه بينما يقول مقدم الاعلان :
- ليك واحد عزيز عليك ومات , كان مفترى وابن ستين كلب ؟
- هل انت من اعضاء الحزق الوطنى حاليا او الاتحاد الاشتراكى سابقا ؟
- هل انت عضو مجلس شعب ؟
- خايف على اخرتك ؟
- قلقان من السواد اللى مستنيك لما نفسك الخبيثه تروح للاخرة ؟
- هل انت شيطان يمشى على قدمين ؟
- هل انت رئيس تحرير جريدة ( قوميه ) ؟
يظهر رجل يرتدى بدله ايطاليه فاخرة وينزل من سيارة مرسيدس سوداء واضعا فى فمه سيجار كوبى ( من اللى بيتلف على وراك العذارى ) , مرتديا نضارة سوداء ضخمه ويومىء برأسه مظهرا علامات الاسف .

مقدم الاعلان :
- متقلقش .
- معانا هتوصل للجنه بدون مقاطعه .
- اشترى كولدير المشتاقووووووووون الى الجنه .
- اسرق
- انهب
- اقتل القتيل وامشى فى جنازته
- اعمل اللى يعجبك , فما انت الا عبد المأمور
- وسييييييييييب الباقى علينا .
- اشترى كولدير المشتاقون الى الجنه
- وحطه على باب فيلتك
- اسقى المسافر والعطشان
- تدخل الجنه حدفا بالمنجنيق
- اصلك متعرفش
- مش الراجل الكافر دخل الجنه علشان سقى كلب
- شوف انت بقى لما تسقى كل يوم ميه ولا متين ( كلب )
- كولدير سبيل المشتاقووون الى الجنه

الفئات :
- اذا كنت عضوا بالمجلس المحلى فعليك بكولدير بحنفيه واحدة
- اذا كنت عضوا بمجلس الشعب فعليك بكولدير فئه ثلاث حنفيات
- اما اذا كنت وزيرا او رجل اعمال ( من اياهم ) فننصحك بعمل محطه مياة كامله .
- اما لو كنت من العيله المالكه,
فطلبك مش عندنا ....

- كولدير المشتاقوووون الى الجنه ,
- كولديييييييييييييييرررررررررررر ,
- يأخذك الى الجنه . ..........


المشهد الاخير : صورة فيلا فخمه يقع خارجها كولدير ضخم يشرب منه عدد كبير من المواطنين مهلهلى الثياب .
يظهر صاحبنا السابق ( ابو بدله ايطالى ) لابسا ابيض فى ابيض وجالسا وسط حديقه غناء , المياة تنصب من العديد من النافورات الضخمه , بينما يجلس على كرسى فخم وتحيط به العديد من الفتيات باهرات الجمال .....


__________________



سبارتكوس عصرة واوانه :

فوجئت بحبيب قلبى , البطل القومى المناضل الاخ ( مجدى النطاط ) رئيس تخرير جريدة العميل اليوم , فوجئت بيه فى برنامج رمضانى ( سخيف ) من اياهم .
صاحبنا نازل مدح فى نفسه , وانه شخص عصامى , ومالوش حل , ومتواضع , وعقلانى , وكبير عيله ( زى واحد ) ومش عارف ايه , بينما الاخت المذيعه فاشخه ضبها عن ابتسامه بلهاء ملهاش اى معنى , وسيباة يكمل وصله النفاق الذاتى بتاعته على اقل من مهله , بل وبتجاريه فى كلامه كمان كمان .


دا فيش وتشبيه ايه دة ياخواتى ؟!!!!!!!!!!!!!

امال لو كان محضر تحرى كانوا عملوا ايه ؟


علشان محرقش دمى كتير
الاخ بيقول انه بيصحى كل يوم ويبص لنفسه فى المرايه ويقولها :


انت ولا حاجه ....


طب وعلى ايه يامعلم ,
ريح نفسك انت ,
انا اقولهالك :


- يامجدى يانطاط
يجيبوك من على الحيط
:
:
:
بشبشب ...


- يامجدى يانطاط

:

:

:
انت ولا حاجه ....




بس
كفايه كدة ...