الأربعاء، 16 سبتمبر، 2009

عالمااااااشى .....



عالماشى
( ON THE RUN ) يعنى
خخخخخخخخخخخخخخ , بضحّك معااااااااااااااااكووووووووا ,

البوست دة عالماشى , يعنى عالسريع , حيث انى ماشى النهاردة بقى , هعمله باذن الله زى اول بوست كتبته فى رمضان , بمعنى انى هتكلم عن اكتر من موضوع , يعنى دة عبارة عن تجميعه بوستات ,
واللى ما يشترى يتفرج ,,,

- الفطار :

قام اليوم مِفَتّى البتنجان فى جماهيريه الاته المحلوله , فضيله الشيخ كباكه الكفتجى , باظهار احد المنشورات القديمه التى كتبت على جلد الغزال فى صدر الاسلام , وتظهر فيها فتوى تبيح افطار كل من يقوم بمهمه وطنيه عظيمه من اجل وطن وامته واصحابه والمجتمع والناس .
ولما كان منتخبنا الوطنى مقبلا على القيام بعمل بطولى عظييييييم سوف يغير مستكبل الامه , جمعاء , جمعاااااااااء ,جمعااااااااااااااااااااااااااء .
ولما كان ذلك يتطلب منهم مجهودا بطوليا وتسليحا عاليا وتدريبا دمويا فتاكا فى مواجهه اعتى جيوش الكفر والالحاد الرونديه .
فان ذلك يعنى بالدرورة وجووووووووووووب افطار كل اللعيبه فى نهار اليوم الموعود , كما يجوز لهم الافطار فى الايام الاربعه عشر السابقه له والاربعه عشر التاليه لها ( جوازا ) , بينما حذر نيافته من تجاوز تلك المدة المقررة , فهو اثم وجرم عظيييييييييييييييم .

انتهى نص الخبر .......

بصوا ياجماعه ,
- لما اكون انا راجل كفتجى وضلالى واحد اعوان سلطان جائر .
- ولما اكون منيل على عينى وكل يومين اقول كلمه وارجع الحسها تانى .
- ولما اكون جبان وخواف ورعديد , اخشى على الكرسى ولا اخشى عضب الله .
- ولما اكون مجرد طرطور وخيال مأته , وموظف عمومى كل همه مرتب اخر الشهر .

-- يبقى اتنيل على عينى فى الارف اللى انا غرقان فيه ,

-- واتنيل على عينى فى ام نوادى الليونز والروتارى المهببه ( مستودعات خناشير ماما الشهيرة بامنا الغوله ) , اللى انا كل يوم والتانى اتنطط فيها واقول فتاوى هبله وعبيطه زيى , وملهاش اى معنى ,
( بتفكرنى بفتاوى الراجل بتاع ( فيه قولان ) اللى حكيتها فى قصص ابو شادوف ) .

-- يبقى اتلهى واحط عينى فى الارض واتكتم خالص , لان اللى زيى سكوتهم راحه للامه , لغايه لما ربنا يأذن واترمى فى داهيه واتحط فى مزبله التاريخ وييجى الاطفال بعد ميه سنه يدرسوا فى ابتدائى انه كان زمان شيخ مدهول على عينه اسمه فلان , وكلهم يبصوا لصورته بقرف اشمئزاز .

مش اقعد زى شيخ الحارة , وكل يومين تلاته اقوم هابد كرسى فى الكلوب , علشان اخد جرعه التهزيق اللى وحشتنى كتيييييييير كتيير كتير .
ومش اروح افتى فتاوى هبله وخايبه زيى , يعنى ايه جواز افطار اللعيبه فى رمضان ؟
من امتى الكورة بقت واجب وطنى ولا انسانى ؟
ومين اداك الحق تساوى بين لعيب الكورة , والمجاهد اللى على خط النار ؟؟
الله يلعن ابو الكورة اللى كلت عقول الناس ....

يعنى لو انا مش محترم نفسى وسنى الكبير ودقنى البيضا ومنصبى ( ودا اكيد ) يبقى على الاقل احترم ام العمه اللى انا حاططها فوق رج....اقصد راسى .

مش كدة برضه ولا ايه ؟؟؟؟؟

________________________________

النغمات ( الاسلاميه ) :

موضه نزلت رمضان بقوة السنادى , قال ايه خير اللهم اجعله خير , ليله وقفه رمضان , الواد كابونجا والواد بوعرنجه وهما قاعدين فى الغرزة قاموا ماسحين كل النغمات اياها بتاع :
- حط النقط على الحروف
- بالراحه لما ...بالراحه قوى
- الصراحه راحع ياعينى وانت مبتعرفش
- كفى ناااااااااااااااااااافسك
- واوا اححححححححححح
- انت كلبك قاسى ... قوى قوىىىى
- انا شارب سوجارة بنى

ونزلوا بدل منها نغمات ( اسلاميه ) تمشيا مع روح الشهر الكريم !!!!!!!!!!!!

الاقى واحد مقابلنى وبيقولى ايه رايك فى النغمه دى , ويقوم مشغل لى دعاء للشيخ الشعراوى الله يرحمه على الخلفيه الموسيقيه لمسلسل المال والبنون !!!!!!!!!!!!!!!!!!!!!!!!!!!!!!!!!!!!!!!!!!

وانغمه تانيه لشويه عيال صوتها مسرسع بتقول كدة :
سلاااااااااااااااااااااااااة الناااااااااااااااابى يانول الناااااااااااااااااااااااااااااابى !!!!!!!!!!!!!!!!!!!!

واحد تانى عمال يزر زميله فى الشغل عند المدير ويقول عنه كلام محصلش , وفجأة تلاقى موبايله بيرن بنغمه عبارة عن دعاء بيقول : اللهم ارزقنا القناعه !!!!!!!!
ياسلااااااااااااااااااااااااااااااام ,,,,
اللهم قوى ايمانك ياشيخ ...

ايه العبط اللى بقينا فيه دة ؟

اللى بيحصل دة مقدرش اطلق عليه غير مصطلحين مالهمش تالت :
- ازدواجيه بشعه ومستفزة .
- ابتزال فاااااااااااااااقع قوى .
قرف
قرف
قرف

يعنى خلاص
معادش فيه ذرة عقل ؟؟!!!!

لما تلاقى انسان بهيم وغبى وفااااااسق , نازل غيبه ونميمه وبهتان فى الناس , وبطنه مش بتبطل اكل سحت ورشاوى , وبعدين تلاقيه ماسك المصحف وبيخلص فى الخاتمه ( السادسه ) ولما يعرف انك لسه مختمتش القرأن يديك موشح فى الاخلاق والتدين والمؤمن ( الحق ) .

..........A7A

بجد يعنى
معلش اصلى مش قادر ما اقولهاش .
جتنا نيله
جتنا ستيييييييييييييين نيله ...
جتها نيله اللى عاوزة خلف على رأى ايمان .

بيفكرنى بحاجه فى علم النفس اسمها ( الحيل الدفاعيه ) بيعملها العقل الباطن لا اراديا لما يكون عليه ضغط بشع , علشان يتخلص من الضغط دة .
من ضمن الحيل الدفاعيه الهبل اللى احنا بنعمله دة ,
احنا مضيعين دينا , وعايشين فى جاهليه حقيقيه لا مجازيه , اسوأ ميه مرة من جاهليه قريش قبل الاسلام .
واحنا عارفين كدة كويس
وبما اننا كسالى
وجبنا وسلبيين
فبالتالى معندناش ( الرغبه ) وانا بقول الرغبه وليس القدرة ,
معندناش الرغبه فى اصلاح ما فسد .
وبما اننا اجدع ناس تستسهل
فبالتالى اخترنا الحل الاسهل
ليه اتعب نفسى ةاقف فى وش الظلم والفساد ؟
ليه اتعب نفسى واكون كويس مع الناس واجى على نفسى علشانهم ؟
ليه اكون موظف محترم ومادخلش بيتى الا الحلال ؟

طب ما اسهل من دة كله :

اصلى الفرض بفرضه فى الجامع
واربى دقنى
واحط نغمات ( دينيه )
امسك سبحه
اكشر وقلب وشى عمال على بطال
بينما الرشوة والفساد والنميمه والبهتان والتخاذل عن الوقوف فى وجه الظلم , بل واحيانا دعمه ومساعدته
كل دة شغال على ودنه ...

بالذمه فيه اسهل من كدة ؟؟؟؟؟؟

وامعانا فى سبك المخطط , لابد من عمل ( اسقاطات ) على خلق الله عمال على بطال , بالشكل الاتى :
- مثلا واحد مشغل موسيقى او تلفزيون فى رمضان - اتقى الله ياراجل , انت مش مسلم ؟ معندكش دم ؟ حراااااااااااااااام .

- واحد تانى شعرة ابيض من الفانله الجيل , وقد جد جد جدكوا , قاعد عمال يحكى على غرامياته ايام لما كان شباب , وعمل ايه فى البنات اللى عرفها , وناااااازل شرح بالتفصيل الممل , مستعينا بمفردات يعف الشباب نفسه عن ذكرها , وبعد لما يخلص يدى محاضرة دينيه للى حواليه علشان مصلوش الضهر فى المسجد !!!!!!!!!!!!!
وهكذا .
ولاحظ ان ( النصح ) لازم يتم بصوت عااااااااالى , وفى وسط اكبر تجمع بشرى ممكن , يعنى على رؤوس الاشهاد , علشان نفساويتنا تستريح من جوا , ايون , احنا مش وحشين , احنا زى الفل , وكلنا على المحجه البيضاء , هو فلان دة هو اللى وحش وشرير , حتى اهو , شوفوا مش حاطط نغمات اسلاميه ازاى الفاسق الزندييييق ؟؟!!!!!!

طيب

انا ومن هذا المزنق

وتماشيا مع الموجه الايمانيه ( العميقه ) السارحه فى المجتمع المصرى

فقد قررت الاتى
انى اشترى عدة صينى من ام صوت عالى ( اللى بتلتميت جنيه دى )
وانزل عليها الاغنيه بتاع فيلم فجر الاسلام , بتاع :
نحن غرابا عك .........عك .....
يلا بقى
طالما العمليه بقت ماشيه كدة .

_______________________

- فكر جدييييييييييييد :

واضح ان موجه الفكر الجديد للنظام ( الجديد ) امتدت لتصيب الشعب المصرى ,
بمعنى ,
اننا كمان بقى عندنا فكر جديد , زى فكر حكومه المغارة بالظبط ,
حتى اسمعوا كدة القصه دى :
فى احد الاحياء الشعبيه باحد مدن الاقاليم
المنظر : كشك عيش حواليه كثافه عاليه جدا من البشر فى عز الضهر , وضرب وشتيمه وحاجه اخر بتنجان .
واحد مسجل خطر عاوز يجيب عيش
,
بس مش قادر يحشر نفسه وسط الزحمه ,
وكمان محدش هيخاف منه لو طلع مطوة ولا سيف حتى لان اساسا محدش هيشوفه ولا هيسمعه وسط الزحمه دى .

يقوم يعمل ايه جناب البلطجى ؟؟؟؟؟؟

شوفوا بقى الفكر الجديد :
المعلم جاب حجر ضخم , وشالة على كتفه وعافر لغايه لما طلع بيه فوق الكشك , وراح واقف فوق شباك التوزيع , ورفع الحجر لفووووووووووق ,
وقال بعلو صوته :
انا هغمض عينى
واعد لغايه تلاته
وارمى الحجر
وماليش دعوة بقى باللى يحصل
الناس فى الاول طنشوة
- وااااااااااااحد
الناس ابتدت تقلق وتبصله , قالوا دا اكيد بيهرج
- اتنيييييييييييين
الناس ابتدت تخاف وبالفعل اخلى الناس مساحه كبيرة تحت الحجر , العمر مش بعزقه ياعم .
- تلاااااااااااته
وقام رامى الحجر !!!
وبسرعة البرق قام ناطط ورا منه على طول , فبقى هو اول واحد قدام شباك التوزيع !!!!!!!!!

ها

ايه رايكم بقى فى الفكر الجدييييييييييييييييييييييييييييييييييد ؟؟؟؟؟؟

__________________________

اعلانات الحاكوووومه :


- سكك حديد مصر :

السكه الحديد دى بتاعتك ,
معموله علشان خدمتك وراحتك
( مشهد قطر درجه تالته متكدس بالركاب بينما يشتبك اثنان من الكمساريه مع بعض الركاب ويضربوهم بالاقلام والشلاليت ) .
اووووووووووعى تفتكر ان السكه الحديد دى معموله علشان تلم فلوس ,
لاااااااااااااااااا , انت غلطان يامعلم .
السكه الحديد دى من السعب والى السعب ,
كل سحتوت بيدخلها بيتصر عليها ,
يعنى اللى جاااااااى .... على قد اللى رايح يامعلم ....
فلما حضرتك تزوغ من دفع التذكرة ( الرخيصه جدا )
طبيعى ان دخل السكه الحديد يقل تمانين فى الميه ,
طبيعى انك متلاقيش خدمات ,
طبيعى انك تلاقى الحمامات قذرة وتقرف الكلب الاعور الحزين ,
طبيعى انك تلاقى القطر من غير شباك ولا باب لاننا معندناش فلوس نجيب شبابيك وبيبان ,
طبيعى انك تلاقى القطر اوسخ من مقلب الزباله لاننا معندناش فلوس ننضفه ,
طبيعى انك تلاقى كسارى المكيف رخم وغتت ولازقلك بغرا , خصوصا لو كان باين عليك العز ولو كنت شايل شنطه كبيرة :
- عنك يابيييييييه
- متشكر
- اشيلهالك يابيه
- ياسييييييدى لأ هشيلها انا

- وطبعا لو رفعهالك بس هتلاقيه جايلك لما توصل بالسلامه وفاتحلك ايدة وبيقولك حمد الله عالسلامه !!!!
ودة طبعا لاننا معندناش فلوس ندفعله مرتب عدل , لان جنابك بتزوغ من دفع التذكرة !

طبيعى انك تلاقى الشبابيك الازاز مش باين من وراها حاجه من كتر التراب اللى لزق فيها , علشان معندناش فلوس نجيب كيس بيريل من ابو نص جنيه وورقه جرنال ننضفها بيه ,
طبيعى انك تلاقى القطر يتاخر عن معادة بالساعه والساعتين , لان مافيش عندنا فلوس نجيب ساعات للسواقين ,
طبيعى ان قطر الصعيد يولع , لانهم كانو بيزوغوا ويسطحوا فمش بنلاقى فلوس نجيب طفايات ,

من الاخر

طبيعى انك تلاقى فى سكك حريق مصر كل حاجه وسخه وقذرة , ودة بس بسببك انت , بسبب انك مواطن مهمل وشرير ومش عاوز تدفع تمن التذكرة , مش بسبب اننا مهملين ولا حراميه لاسمح الله , ولا ان البيه المدير بيقبض مليون جنيه بس ,
لوحدة دة غير الرشاوى هو والطقم اللى حواليه .

انت السبب يامواطن يامعفن
لو عاوز قطر نضيف , يبقى تتنيل على عينك وتدفع تمن التذكرة الاول .
يااما بقى تتنيل تركب ميكروباظ علشان يتقلب بيك فى السكه ويريحنا من قرفك .
جتكوا نيله مليتوا البلد ......

- الضرايب :

كل قرش انت بتدفعه فى الضرايب تانى بيرجعلك فى صورة خدمات
مشهد مجارى طافحه فى الشوارع وميه مقطوعه وناس شايلين جراكن يملوها من الترعه .
طبعا هتسئل امال المنظر دة بيحصل ليه ؟
اقولك ليه ,
علشان صغار الممولين الاوساخ اللى زيك بيتهربوا من الضرايب , وبيقدموا تقارير مضروبه .
طبعا البهوات كبار الممولين ملتزمين وبيدفعوا ضاريبهم اول باول , وعلى راسهم طبعا رجل البر والاحسان احمد بيه عزو بزو .
وبعدين يااخى انت مش عاوز تدفع ليه ؟
دول كلهم عشرين فى الميه بس !!
يعنى ربع دخلك فقط لا غير !!
وكمان انت لا هتدفع كهربا بالشىء الفلانى ( تجارى بقى ) ولا اجور للعمال , ولا صيانه ولا اى حاجه تانيه ,
يعنى فلوسك فى جيبك يابخييييييل يااييييييييييحه .....
يبقى تبطل بخل وتدفع فلوس الحاكومه بدل وا نحطوا السيخ المحمى فى صرصور ودنك ,
احنا بنقولك اهو ,
وبعدين احنا يااخى ايبينلك مطلق الحريه فى الدفتر بتاعك ,
تعمله اخضر وباستك , تعمله احمر وبوردة , تعمله ميتاليك , مافيش اى مشكله ,
شفت بقى ياجعر احنا مدلعينكوا ازاى ؟
علشان تعرفوا بس ان المعامله الحلوة متنفعش مع الاشكال اللى زيكوا ...
مشهد : مجموعه من صغار الممولين يقفون صفا واحد فيقول احدهم :
- انا باخد في المصلحه
يقول الاخر
- ونا كمان باخد فيها
فيقول الجميع :
- كلنا بنااااااااااااااخد فيها .....
تنزل الكلمه النهائيه فى الاعلان :
الضرااااااااااائب
( مصلحتك ) اولا ..........


- الاعلان العبقرى :

مشهد شخص يلبس ثيابا باليه ويجلس على حصيرة امام تلفزيون متهالك مستندا الى زير مياة قديم .
اعلان يقول :
انشااااااء كوبرى جديييييييييييد .
فيصيح الرجل قائلا : يوووووووووووووووة
كباااااااااااااااارى كباااااااااااااااارى , هتعمل لنا ايه الكبارى ؟؟؟
فيرد المذيع عليه قائلا :
- الكوبرى هيشغل اخوك احمد العواطلى فى بناؤة ,
- وهيطفح الكوته طول اليوم وبعدين ياخد ملاليم فى الاخر ,
- وكمان الكوبرى دة هو اللى سيادتك هتختصر الطريق من عليه بالتاكسى بتاعك فى عز الضهر علشان تنجز الوقت ,
- وهو برضه نفس الكوبرى اللى هنقفله وانت محبوس فى نصه بالظبط فى عز الضهر علشان موكب سعادة الباشا معدى ,
- وكمان هو دة الكوبرى اللى هتمشى عليه عربيات القمل المركزى علشان تروح لكم المنطقه اللى انتوا ساكنين فيها وتديكم فوق نافوخكم بالجزمه القديمه ,
- وكمااااااان هو دة الكوبرى اللى هتعدى من عليه نفس عربيه الامن المركزى بعد ما تكون قبضت عليك وانت ماشى فى وسط المظاهرة بالصدفه ورايح شغلك ,
- كماااااان هو دة بررررررررررضه الكوبرى اللى سيادتك هتقع من فوقه بعربيتك وتنزل ميه حته بسبب التصميم العبقرى للكوبرى , وبكدة هنكون مت شهيييييييييد ,
شفت بقى الكوبرى بيعمل ايه ؟؟؟؟؟

مشهد الرجل المشاهد جالسا فوق السحاب وله اجنحه بيضاء ويومىء براسه مبتسما فى رضا ....


- احسبها صح :

سي ماعين عامل على قد حاله , مرتبه سته وسبعين جنيه فى الشهر , كويس , مش وحش , وبعدين الطمع اخرته وحشه والكناعه كنظ لا يفنىىىىىىىىى ,,,
- سى ماعين بطل يلبس غيارات داخليه وبقى بيلبس هدومه على اللحم علشان يوفر تمن الغيارات , وبكدة قدر يوفر ملاليم اكتر .
- سى ماعين بطل يشترى اكل وبقى بيدور على اكله فى صناديق الزباله هو وعياله , وبكدة قدر يوفر فلوس الاكل كمان .
- سى ماعين بقى بيخرج من شغله كل يوم بدرى ساعتين ويقف قدام السيدة يشحت علشان يلم فلوس مواصلاته وبكدة قدر يوفر من مرتبه فلوس المواصلااااااااات .
- سى ماعين لغى الكهربا والميه فى بيته وركب مكانهم شموع ومشاعل ودق طلمبه فى ترنش الجيران ....
- سى ماعين استفوجأ بانه داخل عليه كذا موسم فى نفس الوقت , رمضان , العيد , العام الدراسى الجديد , سى ماعين انتهز فرصه نوم عياله بالليل ومراته وشنق نفسه فى سقف الحمام , وبكدة وفر مصاريفه خالص وضمن دخل المعاش صافى لاولادة , وكمان علمهم الاعتماد على النفس لانهم كلهم خرجوا من المدارس واشتغلوا فى ورش وبكرة هيكونوا اسطوات قد الدنيا ويلعبوا بالفلوس لعب , كما انه قلل البلد واحد ودة بيخف من الازمه السكانيه , كما ان سى ماعين كدة وفر مرتبه كله وكتبه فى وصيته علشان يسدد بيه ( ديون مصر ) .
ايييييييييييييييييييوة كدة ياسمعه
احسبها صح ................ تعيشها صححححححححححححح .


- ( قافله ) :

حصل شورت فى الوصلات باتحاد الاذاعه والفلفسيون , فخرج اعلان غريب بالشكل التالى :
عبد ربه موظف على قد حاله ,
بيزوغ من شغله بعد ما يمضى على دفترة ,
ويعطل مصالح الناس ,
ويروح يشتغل على تاكسى علشان يجيب فلوس ,
وبالليل بيفتح محل بقاله علشان يتهرب من الضرايب وميدفعهاش ,
وبكدة قدر يوفر فلوس اكتر
وكمان حاصل على شهادة دكتوراة من صفط اللبن فى استراتيجيه التزويغ من كمساريه القطر ,
وعضو فخرى بالجمعيه العامه لمكافحه التطويق ,
وبكدة وفر تمن تذكرة القطر ,
وكمان بيقطع الكراسى الجلد انتقاما من الحراميه اللى ماسكين الهيئه وبالعين فلوسها كلها فى كرشهم ,
وبكدة عبد ربه مواطن مصرى ممتاز وموفر , زى لمبه الكهربا الجديدة بالظبط ...

ايييييييييييييييييوة كدة ياعبد ربه
احسبها صح ..... تعيشها صح .

ياسااااتر ياساااااااااااااتر ..... من هرتله اعلانات الحكووووووووومه ..... ياعبد القوىىىىىىىىىىى .

__________________________

كلمه اخيرة :
بالنسبه لموضوع البوست اللى فات
وتعليقات ( انسان ) و ( انسانه ) عليه
انا لسه قارى التعليقات امبارح
ومرضيتش ارد
فضلت ان ردى يكون فى البوست الجديد نفسه
اولا وقبل كل حاجه انا نفسى غير راضى عن البوست اللى فات
وقلتها فى البوست
يعنى هو بوجه عام مش عاجبنى اصلا
تانى حاجه
وياريت ياجماعه تسمعونى كلكم
انا اساسا دخلت عالم التدوين ليه ؟
كنت عاوز اعمل حاجه اسمها :
تفاهم
تقارب
لانى لاحظت ان ناس كتييييييييير قوى اهدفها واحدة , الا انهم نازلين خبط فى بعض بسبب اختلاف وجهات النظر والاساليب .
دى حاجه استفزتنى كتير
كمان احنا مع الاسف معندناش حاجه اسمها احترام وجهه نظر الاخر
علشان كدة كنت عاوز اخلى المدونه دى ميدان تدريب عملى للموضوع دة
ليا اولا ( على اعتبار انى انسان متعصب وخلقى ضيق )
وليكوا ثانيا .

بمعنى

كان نفسى اتكلم مع كل الاراء واتحاور مع كل الافكار مهما كان اختلافى معاها ( طالما انى شايف ان الغايه النهائيه واحدة )
اتحاور بغرض التفاهم والتقارب وايجاد ارضيات مشتركه , وليس بغرض الجدال واثبات خطأ الغير .
دى كانت اهدافى
ومازالت
اينعم احيانا انا بحيد عنها وبتعصب
وكل او اغلب المدونين كدة
بس دة ان عاد فانه بعود فى النهايه الى ضغوط الحياة والخنقه الرهيبه من الحاله اللى وصلت لها البلد
علشان كدة كلنا روحنا فى مناخيرنا ومش طايقين بعض
الا اننا ( انا عن نفسى ) بعد وقت بسيط بنكون هدينا ونلم الدور تانى .
فياريت نستحمل بعض شويه ....

بالنسبه لشكوى انسانه
انتى اولا افترضتى انى رديت رد معين , وبعدين بنيتى على الافتراض دة نتايج , وتعاملتى معاها كانها امر واقع !!!

طب بالذمه ينفع كدة ؟؟؟؟؟

مين قالك انى كنت هقول دى مدونتى ونا حر فيها ؟؟؟
وبعدين انتى بتقولى من خلال خبرتك باسلوبى توقعتى انى ارد بالشكل دة !!!
واضح انك معندكيش اى خبرة باسلوبى يا انسانه
لانى بكل بساطه
مكنتش هقول كدة
والله ما كنت هقول كدة
لانى مش حر فى مدونتى
طالما بتذاع على الملأ
والا بقى كان من حقى انى اتصور ونا بستحمى وانزل صورى فى بوستات !!!!
ودة مينفعش طبعا
بس فيه نقطه
لما الضغط بيكون عالى جدا , والخلل بيكون اكثر من ان يذكر
فى الحاله دى بيكون الالتزام بمعايير اخلاقيه , بيشكل فى حد ذاته قيد تقيل على الفكرة و بيقلل من قوتها .
فلازم نتحرر من القيد دة ( بشكل جزئى بسيط وليس كلى ) ولفترة محددة , علشان نقدر نوصل اللى عاوزين نقوله .
ولو تلاحظى ان عرضى للمواضيع دى مش بيكون بشكل صريح او مكشوف , بل بالعكس , بيكون بشكل متغطى ومستتر , يعنى الشخص اللى يتخاف عليه فعلا انه يقرا كلام زى دة , لو قراة مش هيفهم حاجه , بينما اللى هيفهم ما بين السطور اعتقد ان حياؤة هيكون اغلظ من ان يخدشه كلام زى دة ..., والنوعيه الاخيرة دى تشكل اغلب الشباب والبنات فى جيلنا .

يعنى انا بلجأ للاسلوب دة مضطر , مش بغرض الاستفزاز او الابتذال زى ناس تانيه ما بتعمل , وكمان بعرضه باسلوب معقول ( على قد ما اقدر ) كما انه مش كل بوستاتى بتكون كدة , وبرضه انا فى الغالب بنبه فى اول البوست على الموضوع دة لو تلاحظى .
دى فكرتى ( باختصار شديد ) علشان مطولش البوست اكتر من كدة ....
:D

قد اكون صح وقد اكون غلط
الا انى فى النهايه مش عاوز الا الصح والخير .
تحياتى ليكى

الاخ انسان
ولو انك بتدافع عنى
بس فيه نقطه عاوز اقولهالك
واتمنى انك تتقبلها منى بصدر رحب
ومن غير زعل
اسلوبك فى الرد
كان شويه حاد
معلش ,
لو كنت خففت منه شويه كان هيكون احسن
وبرضه كنت هتوصل نفس الفكرة اللى فى دماغك
ماشى يامعلم ؟
تحياتى ليك
______________

ان شاء الله انا نويت الاعتكاف فى صومعتى الصحراويه اعتكافا اراديا فى العيد بكامله , لانى محتاج اقعد مع نفسى شويه .
دا غير انى بكرة العيد بزحمته وخنقته .
يعنى صرفت نظر عن النزول فى العيد
وبكدة مش هشوفكم تانى الا يوم 8 شوال وعليكم بخير
علشان كدة تعمدت انى اطول البوست دة قوى
علشات تفضلوا تقروا فيه طول الايام دى
نياااااااااااااهاههاهااااااااااة .

عيد سعيد ياجماعه
وكل سنه وانتوا طيبين وبالف خير وسلامه
تحياتى للجميع ...............