الاثنين، 28 سبتمبر، 2009

لأ .... احترام لأ ....لاااااااااااااااا



موقفين حصلولى النهاردة ونا راجع من السفر ,
اول موقف كان عند مدخل اسكندريه
من عند الساحل الشمالى كدة
راكب العربيه فى امان الله , الاقى فجأة امين شرطه رمى نفسه قدام العربيه
اووووووووووووووووووووووقااااااااااااااااااااااااااااااففففففففف
انا بصراحه اتخضيت , قلت يكونوش عرفوا بتهريبه المخدرات اللى انا عاملها ؟
بس عرفوا ازاى ؟؟؟؟
اصل مافيش حد يعرف الموضوع دة غير ابو دقشوم والدفاس ....
يكونوش وزوا عليا الحكومه ؟؟؟
مش ممكز
وبعدين انا معنديش مخدرات اصلا
وكمان انا معرفش ناس بالاسماء دى !!!
ايه اللى انا بقوله دة ؟
والاقيلك خمسين صدادة وحاجز اتحطوا فى الطريق فى لمح البصر !
طب ياعم الامين ما كنت تتنيل على عينك وتشاور والسواق هيقف لوحدة
لازم ترمى نفسك قدام العربيه يعنى ؟؟؟
وبعدين يرجعوا يعيطوا ويقولولك مات شهيد الواجب
ايه التخلف دة ؟

سالت جوز العساكر اللى قدامى عن سعادة البيه اللى هيشرفنا بطلعته البهيه .
- قالولى , الكابير
الكبير ؟؟؟؟
طب هو عزت حنفى ايه اللى جابه اسكندريه ؟
- لا لا , الكبير يعنى الراجل الكبير
كبير العزبه .
- قلتلهم اةةةةةةةةةةةةةة
- شيخ الغفر يعنى ؟
لا ياباشا , صاحب العزبه كلها .

اضرب بعينى قدام الاقى جيب زرقا واقفه بعرض الطريق .
قلت ااااااااااااااااة , دخلنا فى اللون الازرق , يبقى اكيد عوكل او حد من اهل بيته .
وجرى الامين على الناحيه التانيه ووقف انتباة فى نص الطريق بالظبط .
واخدين بالكوا , فى نص الطريق التانى , من غير اى اشارات او حواجز او عواكس , ولا حتى حط قدامه قالب طوب , يعنى اى واحد اعمى من حبايبنا الحلوين بتوع الاجرة ولا النقل ممكن يفرمه وهو ماشى فى لحظه تجلى ,
هى لحظه , بيهش فيها دبانه من على وشه او بيهرش فى عينه ولا حتى بيولع سيجارة ..!!!!!

العساكر قالوا للسواق اللى معايا , احنا هنعمل معاك واجب , هنفتح الحواجز فى الخباثه وانت عدى ودوس .
الراجل صدق وكان فعلا عاوز يعدى وياخد حبيب القلب بالحضن ( بالعربيه طبعا ) .

يااااااااااااااااااااااااااااااااااااااااااة
رجالتك بتوع الداخليه بيحبوك قوى ياريس
وشعبك كمان ,,, بيموووووووت فيك .

طبعا انا لما لاقيت الحوار هيقلب جد , قلتله اعععععععععععقل يامجنون , قالى منا ياباشا مرضالهمش الاذيه برضه .
قلتله لا ياسيدى هما مش هيتأذوا , شايف الكركدن اللى واقف انتباة هناك فى نص الطريق دة , وشاورتله على خرتيت لابس افرول غامق وباريه احمر فى ازرق وواقف انتباة فى نص الطريق
قالى ماله ؟
قلتله دة بقى معاة رشاش محترم , حاجه تملى العين كدة , هتخطى انت متر زيادة هيعملك انت ونا والعربيه مصفه , قاموا العساكر ضاحكين وقالوله : واحنا كمان هنقول مالناش دعوة , هو اللى خبط الحواجز ودخل ..
, الاقى 3 عربيات من المرسيدس السود اياهم معديين بعرض الطريق .
واضح انه مش عوكل , علشان عوكل لما بيعدى بياخد وراة 80 عربيه وهليكوبترين وخمس دبابات وقطر اسبانى .

تقريبا ممكن يكون نوفل او علوة , او حتى ماما , وممكن تكون العربيه اساسا فاضيه , رايحه تمون مثلا ولا حاجه , الله اعلم .
احلى حاجه ان القصه دى ماخدتش اكتر من ربع ساعه ,
اة ,
ربع ساعه بس ....

والحمد لله انهم كانوا بس معديين بعرض الطريق , قاطعينه يعنى , علشان لو كانوا واخدين الطريق بالطول , كان زمانى بايت هناك لدلوقتى ,
اة هفرش مرتبه وانزل انام على اى دبشه جنب القطط والكلاب .
الحمد لله , قدر ولطف .......
_________________

تانى موقف كان ونا راكب عربيه اجرة وكانت فى محافظه البحيرة .
لجنه مروريه فيها عميد و3 مقدمين ورتب تانيه صغيرة , دا غير الامنا والعساكر .
وقفوا العربيه .
رخصتك ( دا الظابط بيقول للسواق )
- هههههههههه معلش ياباشا , الظاهر انى نسيتها فى البيت !!!!
طب رخصه العربيه
- هههههههههه معلش ياباشا , الظاهر انى نسيتها فى جيب البنطلون !!!
طب بطاقتك طيب
- هههههههههههه معلش ياباشا , الظاهر انى نسيتها فى جيب الجاكته !!!!
طب اى حاجه .
- ههههههههههع هع هع هع , معلش ياباشا , الظاهر انى نسيت المحفسه فى البيت , اعدى بس ونا راجع اجيبهوملك معايا !!!!!!!!!!!!

طبعا بعد الردود اللذيذة ( للشخص ) اللى كان سايق العربيه , منا هقول عليه شخص لانى اساسا معرفش ان كان سواق ولا ايه بالظبط , اخدوا العربيه ونزلوا الركاب , ونا منهم طبعا .
قلت بسسسسسسسسسسس , هيقبحوا فى الكلام , وهنشتغل بقى فى شغل بطاقتك يااااض وجاى منين ورايح فين ومقاس جزمتك كام والهبل دة .
قمت حاطط ايدى على زناد الحته العوزى اللى مكمرها فى الشنطه , واخدت وضع الاستعداد لاطلاق النار فورا وبدون اى تمردد .
بس ملاقيتش اى حاجه من اللى فى دماغى خالص !!!!
الناس كانوا فى منتهى الذوق ,
اتفضلوا ياحضرات اقعدوا جوة لغايه لما نوقفلكوا عربيه تكملوا فيها ( دا هما اللى بيقولوا ) .
والاقيلكوا واحد من الركاب اللى كانوا معانا ( شكله متواضع خالص يعنى مش بيه ولا مهم ولا حاجه ) الاقيلكوا دة عمال يزعق :
مخلاص ياباشا , فيها ايه يعنى , ما الراجل قالكوا هيجيبلكوا الرخص وهو رااااجع , الله بقى , ايه الشغل دة ؟؟
- معلش يااستاذ , يعنى واحد زى دة لما نسيبه امال يبقى لازمه اللجنه ايه بقى ؟ ( دا العميد بيقول )
مالناش حنا دعوة , هو ذنبنا ايه نترمى الرميه دى يعنى ؟
- رميه ايه ياجماعه , احنا معاكوا اهو ومش هنسيبكم الا لما نركبكم مواصله تانيه .
قام صاحبنا لما لقى الناس ذوق ومحترمين , قام سايق فيها اكتر وهاجم على العميد :
انت مسئول توفرلنا مواصله تانيه , انت اللى رامينا هنا , والراجل السواق غلبان وعلى باب الله , وانتوا بتبهدلونا , وانت ملزم بمش عارف ايه , واحملك مسئوليه مش عارف ايه !!!
الراجل الصراحه كان مستفز جدا جدا جدا , وانا استغربت من احترام العميد واسلوب ردة الكويس على الراجل , انا بصراحه لو مطرحه , كنت هديله باللى فى رجلى . ( اقل واجب الصراحه ) .
المشهد بقى اشبه بمشهد مسرحيه الهمجى , لما جه لمحمد صبحى الراجل القصير بتاع ( متقدرششششششش ) ...

المشكله ان العميد دة لو كان قليل الادب من الاول ورزع الاخ دة واحد عباسى محترم على قفاة ( والعميد دة بسم الله ما شاء الله , حيطه ), كان احترم نفسه من الاول وضربله تعظيم سلام .

والله العظيم شعب نمرود وواخد على المعامله الوسخه ..........

فضينا المولد دة بصعوبه , والراجل وقفلنا اتوبيس مكيف وركبنا الحمد لله , بس انا مهانش عليا اركب الا لما اخد بخاطر الناس واشكرهم على اسلوبهم الكويس ووقفتهم فى الطريق فى الحر والجو المقرف دة ( كنا عز الضهر ) .
الناس استغربت من شكرى ليهم ومردوش عليا غير برد واحد :
على ايه ياباشا , دا شغلنا ....

دا مش مشهد فى فيلم عربى من الافلام اياها , دى حاجه انا شفتها بعينى فعلا , ودة بيورينا وجه اخر لوزارة الداخليه , مع الاسف كتير مننا , او كلنا منعرفوش , بسبب الاشكال الوسخه اللى بتظهر فى الصورة علطول فى الوزارة , وبتدينا فكرة وحشه وبتشوشر على القله المحترمه دى .
فكرنى بامناء شرطه اتعاملت معاهم وكانوا فى منتهى منتهى الادب والاخلاق ( مع الناس كلها مش معايا انا بس ) .
فاكر لغايه دلوقت مشهد امين شرطه قاعد على كرسى فى منشيه البكرى ( عند حبيب قلبنا كلنا ) وكان حاطط رجل على رجل , وكل ما حد يعدى من قدامه يقوم منزل رجله , بقول حد مش قصدى ظابط ولا دياولو , لا اى مواطن عادى , حاجه بسيطه وممكن كتير ميلاحظوهاش , بس بجد بتسيب تاثير كبير ومعنى اكبر .

طبعا انا مش هقول على اسم العميد ولا على مكان اللجنه , علشان انا متاكد انى لو قلت عليهم , هياخدوا جزا
D:

فيه ناس لسه محترمه فى الداخليه , فيه ناس يادوب مستورة ومرتبها بيقضيها بالعافيه وعايشه بالحلال .
الحمد لله
لسه فيه خير فى مصر

وبما انى شخص متشائم دايما فى المدونه ومتعهد توريد سلبيات واستاذ متفرغ فى فن الانتقاد ,
لاقيت من الواجب ومن حق الناس دى عليا انى اتكلم عنهم واشكرهم , بالظبط زى ما بهاجم الناس الوحشه وبنتقدهم .

شكرا يارجاله
ومعلش انا عارف انكوا تعبانين وطافحين الكوته فى الوزارة دى , وغيركم واكلها والعه وهو اللى بيظهر فى الصورة ,
بس معلش
صبرا جميلا والله المستعان
مسيرها تروق وتحلى
بس انتوا اصبروا واثبتوا

اثبتوا يارجاله

بس خلاص ........


ملحوسه اولى : اسمها لجنه وليس كمين ....

ملحوسه تانيه : الصورة اللى فوق دى ليا ونا كبير , طبعا لابس طرحه زى اغلبيه الشعب المصرى دلوقت , اما الصورة اللى فى البروفايل دى فليا وانا صغير ( قبل ما اتوب واتحجب والبس الطرحه ) ....