الأربعاء، 28 أكتوبر، 2009

انتوا اللى ايش عرفكوا !!!

















.. صدمت ليله امس بالحمله الشعواء الموتورة ضد شخص نجل السيد رئيس الجمهوريه , والتى شارك فيها اشخاص مشكوك فى ولائهم وانتنمائهم لمصرنا العزيزة , فضلا عن كون اغلبهم ممن يتلقون اموالا من الخارج ومن جهات مشبوهه ودول معاديه لاهم لها سوى اغراق مصر وتخريب عقول ابناؤها الابرار ...
الغريب فى الامر ان اغلبهم لا يجد غضاضه فى الاعتراف بدعم تلك الجهات له , بل ويفتخر بذلك ايضا !!!!!!
ولا عزاء لمصر والمصريين ....

اخوانى المدونين ,,
لحظه واحدة
لحظه واحدة نفكر فيها معا بعقل ورويه , بعيدا عن التعصب الاعمى المقيت واوهام صراع الطبقات , بدون تحيز لاى طرف , فقط دعونا نفكر بعقولنا قليلا , ولمزيد من الانسيابيه دعونا نتحدث بالعاميه ,
قعدة مصطبه يعنى ,,

ماله جمال مبارك ؟؟
ايه , كلكم مخنوقين منه ليه ؟
عمل فيكم ايه علشان تكرهوة كدة ؟؟
هتقولولى البلد والتخريب ومش عارف ايه , هقولكم وهو ماله ؟ دا حيالله بتاع لجنه سياسات , يعنى بيلم العيله ويقعدوا فى الدوار ويادوب يقدموا اقتراحات وانتقادات , يعنى الراجل غير مسئول عن اى فساد ( وهمى ) تدعونه ....

ولا ابوة كمان له دعوة , اظن لو كان واحد غير ابوة دة كان زمان مصر دخلت خمسين حرب من سنه واحد وتمانين لغايه دلوقت , ولولاة كان زمان مصر محتله ..
بس هو بحكمته وحنكته السياسيه قدر يقود السفينه وسط كل الامواج والعواصف دى .

وبدل ما تقدروا ( جمايل ) الراجل وعمرة اللى افناة فى خدمتكوا ( على الرغم من ان الراجل مكانش محتاج , دا كان نائب رئيس وقائد قوات سابق يعنى معاشاته كبيرة جدا ) الا انه اصر على التضحيه بما تبقى من عمرة فى سبيل مصر وفى سبيل اهل بلدة , يقوم ييجى شويه رعاع وجهله ويقولوا عاوزين نحاكمه !!!!!!
طب ماهو طبيعى الراجل يخاف , ويمسك فى الكرسى , لانه عارف انه لو نزل من عليه هينداس , بدل ما توفروله تقاعد مريح بحيث يقضى اللى تبقى له فى سكينه وهدوء ويقضيه صلا وصوم استعدادا لملاقاة ربه , تقوموا تبهدلوة كدة ؟!!!
الراجل ياعينى بعد لما شاف صورته بتنداس فى المحله , بتنداس بعد 27 سنه خدمه , الراجل طب ساكت وقلبه مستحملش المنظر .
ليه؟
ليه كدة ؟؟
عمل فيكم ايه علشان دة كله ؟؟؟
ازاى الانسان المصرى الشهم طيب القلب بقى فيه كل كميه الجهل والحقد والغل دة ؟؟؟
من امتى؟
وليه ؟

اقلكوا انا
بسبب حفنه من الخونه والموتورين اللى بيدعوا انهم مثقفين , واللى بدورهم زرعوا بذور الفتنه والجهل والتعصب بين ارضنا الطيبه وفى عقول اولادها الطيبين ...

نيجى بقى للواد
عمل فيكم ايه وحش
الواد ياعينى بقاله اربعين سنه محدش سمعله حس
ولا عمر حد سمع انه بيشارك رجال اعمال ولا بيرتشى زى ناس تانيه
لا
دا عصامى بدأ حياته من الصفر موظف فى بنك
وبمجهودة وصل لاكبر من كدة
بعيد عن انه نجل رئيس او اى حاجه من كدة
حتى الواد كان بيغضب لما اى حد يقوله سيادتك او حضرتك
وبيخلى اللى حواليه يقولوله يا استاذ جمال ....
طب بالذمه
لو حد قال الكلمه دى لظابط فى قسم , هيتعمل فيه ايه ؟؟؟؟
بلاش
لو قلت لسواق ميكروباس يا استاذ , اقل واجب هيجيب اللافيه ويخبطك على ام رأسك , دا ان مدبش المطوة القرن فى كرش جنابك ....
يبقى بالذمه فى تواضع كدة ولا اخلاق كدة ؟؟؟؟
جمال محدش اتعامل معاة الا وشكر فيه وفى اخلاقه .
واللى جايين يقولوا دا مولود فى بقه معلقه بلاتين !!!

وايه يعنى
الراجل شبعان
يعنى ابن عز ومش عاوز يسرق
مش احسن من الشحاتين والغجر اللى عبناصر مسكهم البلد وخربوها ونهبوها شبر شبر ؟؟؟؟؟

وبعدين من الاخر
دا حقد
حقد اسود ودفين
ومرارة
علشان نفسكوا تركبوا المرسيدس زيه
وبعدين مش صحيح انه مش شايف الناس
علشان القزاز متفيم يعنى ؟؟؟
بسيطه
ممكن يفتح القزاز , مش شغلانه ..
وبعدين الواد اصلع , يعنى ذهنه متفتح وناصح .
كتر خيرة
كتر خيرة اللى بيضحى بشبابه علشانكم ياشعب غجر

الراجل مقصرش معاكوا فى حاجه
الميه بعد ماكانت سادة
بقت بالمجارى
يعنى بروتين
يعنى اعادة تدوير للمخلفات
يعنى حفاظ على البيئه
يعنى بدل ما الواحد يروح يشترى برطمان امينو بالشىء الفلانى قبل ما يهبق على الجيم , كفايه اوى ياخد بقين ميه من الحنفيه , او ينزل ياخد غطس فى الترنش اللى تحت البيت , مش هتفرق كتير ...

سرطان وحطلكوا فى الاكل
لانكوا شعب عاصى
ولما النعمه جريت فى اديكوا نسيتوا ربنا
والراجل التقى حب يقربكم من ربنا تانى
جابلكم السرطان علشان تدعوا وتصلوا وتصوموا ياشعب فاسق ...

حوادث عربيات والراجل مش مقصر الصراحه
يعنى مافيش اى عبقريه بشريه نفتق ذهنها عن اسلوب احسن من كدة لتنظيم الاسرة .
وبعدين انتوا نسيتوا ياجهله ان اللى بيموت فى حادثه دة شهيد ؟؟
بالذمه فيه احسن ولا اجمل من كدة ؟
يعنى بدل ما تروحوا افغانستان ولا جروزنى , الراجل جابلكم الشهادة لغايه عندكوا ,
فعلا
فى عصر مبارك وجمال , الجنه انفتحت على مصراعيها لابناء مصر ,
بس مين يفهم ومين يقدر

اما الفقر والمرتبات الهزيله
انتوا شعب نمرود
ومخكوا صغير
لو الفلوس جريت فى اديكوا هتتلفوا وهتبوظوا
وهجروا كل يوم تتسرمحوا على البارات والافلام
وادى شعوب الخليج قدامكم اهى
عاجبكم اللى بيجرا عندهم ؟؟؟؟
بصراحه
مافيش احسن من الفقر والمجدعه
ولا انتوا مبتشوفوش افلام عربى ابيض واسود ولا ايه ؟؟

اما بقى المخالفات وظواهر الفساد
فدى حاجات طفيفه ترتكبها قله غير مسئوله ( من عامه الشعب طبعا ) ولا تعبر باى حال من الاحوال عن العنصر الآر....اقصد المصرى الاصيل ..

حوادث قطورات , بسبب الركاب الجهله اللى بيحملوا العربيات اكتر من طاقتها وبيخربوا الكراسى , والدوله كل يوم تقول معلش , دول برضوا ولادى , ولا يمكن اعلى عليهم تمن التذكرة , وتتغرم وتدفع مليارات ( من حر مالها ) فى اصلاح الكراسى وفى حمله اعلانات , يمكن , يمكن يكون فى حد لسه بيفهم .....
والحمامات اللى بتقع بالستات اللى فيها ويتفرموا تحت القطر ,
اة
ماهو علشان اوزان تقيله
لان الارضيات دى مصنعه من اجود انواع الصلب العالمى وحسب ارقى المواصفات القياسيه الاوروبيه , اللى بتتعامل على اساس انه اكبر وزن للانسان تسعين كيلو ..
مش بالاحجام الفظيعه اللى عندنا دى
يعنى مش ذنب الحمام , الحمام استحمل كتير الصراحه , دا طبعا غير حمض الكبرتيك اللى بيندلق فيه طول النهار .
الذنب ذنبكوا انتوا
واحمدوا ربنا ان الحاكومه مطالتش اقارب الضحايا دول بتعويضات ولا باعادة تركيب الارضيه ,
علشان حاكومه رحيمه وقلبها كبير ....
الراجل الوزير المحترم استقال علشان حادثه القطار بتاع العياط , مع انه مالوش اى ذنب ,
وهو ماله ان جاموسه حمقاء وقفت على الشريط ؟؟؟؟
ذنبه ايه ؟؟؟؟
دا ذنب الجاموسه العبيطه الكافرة اللى رايحه تنتحر , وذنب الفلاح الجاهل الاهوج الارعن اللى دفعها للانتحار ,
ماله هو منصور دبابه ؟؟؟
وبرررضه قال مش ممكن انا هستقيل , بالذمه فى وزير فى دوله عربيه بيستقيل الا فى مصر ؟؟؟؟؟
والراجل ياعينى كان ناوى يوظف كل ثروته وتوكيلاته فى خدمه السكه الحديد ,
مش بقولكوا انكم مش وش نعمه ....

مش مصدقين طبعا كلامى ..
معاكوا حق , لان غسيل المخ اللى عملهولكم الخونه والاوغاد واعداء الشعب , صعب جدا يتمسح بسهوله ,
طيب ,
شوفوا كدة الفيديو دة وبعدين احكموا :

شايفين
افقر ناس واكتر ناس تعبانه فى مصر اهى ,
ضحك ورقص وتنطيط
حد فى مصر كان بيضحك ويرقص كدة زمان ؟؟؟
عايشين فى منتهى السعادة والرضا وسط احضان الطبيعه فى عيشه الزهاد الاوائل , بعيدا عن الدنيا وزخرفها ...
الناس مش طايقه نفسها من كتر السعادة
ونازله هشك بشك , شايفين الستات ؟؟
وبعدين مين بقى اللى كان بيقول المصريين مش لاقيين ياكلوا وهيموتوا من الجوع ؟
ها مين ؟
مين اللى قال كدة بقى ؟؟؟
اهو
الاحجام كومبو والاوزان تتعدى النصف طورناطه , من كتر العز واكل الوز و( الاوزى والبعرور )
ولا ايه ؟؟
حد يقدر ينكر ؟ اهو , الدليل اهو ....

مين اللى قال الشباب مش لاقى يتجوز ؟
ادى , زفه كل دقيقه والعماير مش ملاحقه على اسكان الشباب اللى لسه بيتجوز ,
حتى الشباب اللى لسه متجوزش ,
مش مضيع وقت ,
وبيتدرب فى الاعياد فى وسط البلد وشارع جامعه الدول والكورنيش ,
واللى مش بيعمل كدة اديه بيتجوز على نفسه , هى المجارى طفحت من شويه !!!!

بس تقول ايه فى الطفاسه والشعب النمرود اللى مش بيحس بالنعمه , اهو انتوا عاملين زى بنى اسرائيل لما رفضوا المن والسلوى علشان خاطر الفول والعدس والبصل .....

شوفوا الصراحه , الراجل الوزير بيقول على المعارضه انها ملقتش عيب تقوله فى الحكومه قاموا قايلين يا احمر الخدين ...

يعنى بعمليه حسابيه هندسيه بسيطه :
المعطيات : قال ملقوش عيب فى الحكومه قالوا ياحمر الخدين
المطلوب : هتعرفوة فى الاخر
العمل : مافيش عمل , دا شعوذة وكلام فارغ , وبعدين العمل حرام ...
البرهان : - بما انه ملقيوش عيب قى الحكومه قالوا ياحمر الخدين ..
- وبما انه سيادة الزير قائل هذة العوبارة ينتمى بشخصه الى نفس الحكومه المذكورة ...
- اذن فسيادته احمر الخدين ..
- اذن ياسيادة الزير :
............ حمرا
وهو المطلوب اثباته .
ه . ط . ث

شوفوا الصراحه والتصالح مع النفس , بالذمه فيه كدة ؟؟ الراجل مش مكسوف من نفسه وبيقول الحقيقه بمنتهى الصراحه ,
انها حمرا ,
راجل دوغرى , وصريح , وطبعا الصراحه والحَمار دة كله هينعكس على شغله اكيد ....

بس تقولوا ايه فى النمردة
ياشعب جاهل
ايون جاهل
وفاسق
وزنديق
وهرطيق كمان
علشان مش وش نعمه

دا الدول كلها ( بتاع امريكا الوسطى والكوكايين ) تستمنى ان حاكومه زى دى تروح تحكمهم , علشان ناس واعيه وعارفه من اين تؤكل الكتف , مش زيكم ...

فوقوا بقى
فوقوا حرام عليكم
وكفايه ظلم ونهش فى الراجل الطيب الغلبان وابنه ......
الصور باعلاه :
1- نظرة نحو المستقبل .
2- الزعيم متأملا .
3- اهو , نزل من العربيه اهو , حد له شوق فى حاجه بقى ؟
4- اديه ركب اتوبيس نقل عام , وكمان القزاز مش فيميه , ودة تفنيد لكل الكلام اللى قالوة اعداء الوطن , يعملكوا ايه تانى , عجين الفلاحه !!
5- جماهير الشعب تحتشد لتحيه القائد والزعيم , ها , شايفين الملايين ؟؟ بالروح بالدم نفديك ياجمال ححححححححححح .....

مع تحيات ,,

مجلس البتنجان الوطنى
فرع اعداد الرأى العام
شعبه الحاسبات والمعلومات

بالتعاون مع ,,
فضيله الشيخ ابو الافك الضلالى
كاهن السلطنه

وبدعم فنى وتقنى من ,,
شركه عوكل جولدن ماير .....

الخميس، 22 أكتوبر، 2009

صراع الاجيال



اكتر من ربع ساعه قضيتها متنح قدام الكيبورد,
مش عارف ابدأ منين ,
كالعادة,
خلال الاربع ايام اللى فاتوا جه فى ذهنى مواضيع لحوالى اربع بوستات , حاولت اقتنصها من سماء الفكر واحبسها على الورق ,
بس مع الاسف اكتشفت ان قدرتى على الامساك بالقلم تلاشت تماما , وانى اصبحت غير قادر على الكتابه الا امام لوحه المفاتيح اللعينه .
قلت امرى لله
اصبر لغايه لم ارجع لقواعدى سالما والى جهازى المحبوب ( سى حسب الله جوزى )
اللى قعد معايا فى الاربع سنين اللى فاتوا اكتر ما قعدت انا مع نفسى .
لكن بمجرد عودتى امبارح فوجئت بموضوع جديد تماما ظهر على السطح , ووجدت نفسى مضطر اكتبه مرغما , مطوحا باقى المواضيع فى صندوق الريسيكل زباله ( بشكل مؤقت طبعا ) .
اصل الموضوع كان نكشه
اة نكشه
واحد نكشنى
شخص فى سن والدى , اصغر شويه , قامت بينى وبينه مشادة حادة , والسبب معروف طبعا , حب يقول البقين الحمضانين اياهم والاسطوانه المشروخه , المعتادة يعنى .
الاخ , او الوالد , كان قاعد يسمع اغنيه لفريد الاطرش , وفجأة جاتله الشوطه اياها , انتوا جيل بايظ , ومش عارف ايه , و, و .....الخ .
فاضطررت اسفا لسن الرماح طويله المدى وقرع طبول الحرب .
وبما انى بحب احارب فى ارضى , ففضلت بعد انتهاء الجوله الاولى , انى انقل ارض المعركه للارضيه السوداء بتاع عنبرى .
هحاول اتكلم بعيدا عن التعصب وبعيدا عن التحيز لجيلى , دى محاوله ( فاشله بالطبع ) , مش وعد .


طيب
قبل ما اتكلم
هنقسم الناس لشرايح واجيال ازاى ؟
فيه اللى بيقول ان بين كل جيل والتانى 33سنه ونص
بس انا شايفها تقسيمه خربانه
لسبب بسيط
اللى بيحدد جيل وبيشكل فكرة وتوجهاته مش فترات زمنيه محددة وانما احداث ومتغيرات بتتم داخل الفترات الزمنيه دى
بمعنى ,
ممكن خمسين سنه تكون المتغيرات فيها بسيطه جدا فتلاقى مثلا جيل السنه الاولى متقارب للغايه مع جيل السنه الخمسين , وممكن العكس , تلاقى الدنيا اتقلبت فى عشر سنين فتحس بفجوة عميقه بين اتنين المفروض انهم متقاربين سنيّا .
فعلشان كدة مش هلتزم بفترات سنيه معينه , لأ , انا هقيم حسب المتغيرات .


لو جينا لاوائل القرن العشرين , هنلاحظ انه كان فيه انتفاضه شبابيه , عامله زى شغل الهيبز بتاع السبعينات ( كانوا بيسموا نفسهم البوهيميين ) , بس بشكل مختلف طبعا , انتفاضه على تقاليد اباء القرن التاسع عشر وجمودهم الفكرى , مبادىء براقه مثل الحب والحريه وووو, توقعات بقرن جديد ومشرق بعيدا عن اتنكاسات القرن التاسع عشر ( طبعا الكلام دة كان بالنسبه لجيل المثقفين وطبقات الاغنياء فقط ) اما بالنسبه للطبقه المتوسطه والدنيا , فكان الاحتلال لسه سخن , وصدمه هزيمه عرابى وجرحها لم يلتئم بعد , فكان هناك إعراض شبه تام عن السياسه وقرفها وكانت الناس ملهيه ورا اكل عيشها , وبحكم ان الدنيا كانت رايقه والحياة سهله , فلا مانع من ملء هذا الفراغ الناتج ببديل محبب ولا يشكل ضغط عصبى بل العكس , البديل دة هو الفن , وبما ان المسرح كان لسه بيتولد فى مصر , والسينما مكانش لسه حد يعرف عنها حاجه هنا , فمكانش فيه غير الغنا , فظهرت دوله الغناء فى مصر , بتاع المنيلاوى وعبد الحى حلمى وسيد الصفطى والاساطين دول , والناس استغرقت تماما فى العالم دة فكان من الطبيعى انك تلاقى اللى بيشد فى شعرة واللى بيغمى عليه لما يحضر حفله او يسمع اغنيه للناس دى .


جت الحرب العالميه الاولى حطمت كل الامال والاحلام بتاع الجيل دة , بدأ يظهر ان القرن دة منيل بنيله ومهبب , مش وردى زى ماكانوا متوقعين , فحدثت النتيجه الحتميه , اللى هى قاعدة اساسيه فى الشعب المصرى عند الهزائم والانتكاسات , موجه عارمه من الانحلال الخلقى والفنى تجتاح كافه الطبقات , لقينا طبقه الفنانين اياها اختفت وظهرت طبقه جديدة ونمط فنى جديد قائم على الايحائات الجنسيه ( على فكرة , كان اشد الف مرة من اغانى مروة ونجلا وهايفه ) ولم يسلم منه احد حتى ام كلثوم نفسها ( اذكر لها اغنيه على سبيل المثال لا الحصر بتقول فى مطلعها : الخلاعه والدلاعه مذهبى والحب دينى وملّتى ) .


الا ان ثورة 19 اوقفت المد دة وانتجت جيل جديد من الشباب اللى مهتم بقضايا اكبر واهم , الجيل دة هو اللى فضل مستمر فى مصر الى ان قتل ومات تماما سنه 54 , وانا شخصيا شايفه من افضل الاجيال اللى شافتها مصر فى عصرها الحديث , ان لم يكن افضلها , اللى هو جيل اجدادنا ( من مواليد 1900 الى 1930 مثلا ) .


جه بعد كدة وتحديدا فى الخمسينيات , جيل انتقالى يتمتع ببعض مواصفات الجيل السابق والكثير من سلبيات الجيل الاتى , لانها نفسها كانت مرحله انتقاليه بين عهد افضل ( نسبيا ) وعهد سىء .
لما كان الانقلاب لسه لم يُظِهر وجهه البشع لكافه عناصر الشعب المصرى ( وان كانوا الاخوان شافوة بدرى قوى قبل الكل ) .


نيجى بعد كدة بقى اللجيل الاسود والمهبب بستين نيله , اللى هو جيل عبناصر , جيل ابائنا , دة الجيل اللى خرب البلد , دة الجيل التنظيم الطليعى , الجيل الصاعد , الجيل اللى جه منه كل وزير حرامى ومسئول فاشل ورئيس هيئه او مؤسسه معفن وحرامى وعندة مركب نقص بشع , وانتوا شايفينه دلوقت .
دة الجيل اللى بيقول عن نفسه ان هو جيل اكتوبر وجيل الانتصار , طب بالله عليكم , امال مين جيل النكسه ؟
مين اللى عمل الهزيمه ؟
مش انتوا برضه ؟
انتوا محسسينى ان بين الهزيمه واكتوبر ميه سنه مش مجرد ست سنين , كما انكم ناسيين ان اغلب اللى حاربوا فى اكتوبر هما هماهم اللى اتوكسوا فى سبعه وستين !!!!
طبعا انا مش بعمم كلامى على كامل الجيل , كل جيل فيه الكويس والوحش , بس انا بتكلم على شكل عام .
بصراحه , انا شايف ان اى انتكاسه حصلت فى البلد فى عهد مبارك فالجيل دة هو المسئول الاول عنها , دا بعد الاب الروحى طبعا .


بعدهم جة جيل انتقالى , اللى هو جيل السبعينيات , لانه جه فى فترة انتقاليه , بين السىء والاسوأ , فنجح انه يفلسع من عنق الزجاجه قبل ما تترمى فى البحر , جيل لحق حاجه اسمها جواب تعيين , لحق حاجه اسمها سفر برة وشغل بالهبل وابواب هجرة مفتوحه , جيل لحق يتجوز ويعمل بيت قبل الوكسه اللى احنا فيها دلوقت , جيل لحق يخلف قبل الفراخ البيضا والفياجرا اقراص الترامادول والاكل المسرطن .
الجيل دة فلت , الجيل دة محظوظ ( نسبيا ) ..


نيجى بقى لاكتر جيل اتظلم فى تاريخ المحروسه من ايام نعرمر الشهير بمينا الى الان , اللى هو جيلى الفاضل , جيل التمانينيات .
الجيل دة اتولد فى فترة هدوء نسبى ( او سمه ركود ان شئت ) بس اهالينا كان عندهم الفرصه يعلمونا تعليم ( مستقر ) ولن اقول محترم , وان كان جيل المدرسين المحترمين لم ينقرض بعد , جيل لما جه كانت شوارع مصر لسه مدخلهاش القرف اللى اسمه الميكروباص , ولا الهمج اللى كانوا فى العراق ( قبل الحرب ) لسه رجعوا . جيل مترباش على هايفه ولا اخواتها , كان لسه الكليب فن جديد يظهر على استحياء , كان الفن محترم ( نسبيا ) بصرف النظر عن الهبوط البشع فى افلام السينما .


احنا جيل اتربى على الصح , ولكنه لما جه الوقت اللى يخرج فيه من البيضه الى الحياة ويكون ليه دور فعال فيها ( بالتحديد فى الاعوام 1997,1998,1999,2000) لقى كل حاجه فى البلد اتغيرت واتبدلت بشكل بشع ومخيف , احنا جيل اتولدنا على الاتارى كبرنا لاقينا الكومبيوتر والانترنت , سمعنا المصريين كبرنا لقينا هايفه ونجلا , شفنا التلفزيون وسمعنا الراديو كبرنا لاقينا الدش والفضائيات , وعينا على تيار اسلامى صاحب مبادىء , كبرنا لاقينا نفس التيار مرمى فى حضن الحكومه بشكل مقزز .


احنا جيل يعانى من حاله انفصام رهيب بين ما نشأ عليه قديما وما يعاصرة الان , جيل ضايع , مش لاقى نفسه , احنا جيل اخواتنا الكبار كانوا بيشتغلوا بعد التخرج , بينما احنا لما اتخرجنا ملقيناش شغل , هما اللى عاوز يسافر او يهاجر كانت الابواب مفتوحه ليه انما احنا .... امشو برة بلدنا ياعرب ياحيوانات , واللى غاوى بقى , يبقى ينط فى البحر ويديها عوم لايطاليا , وهو وشاطرته , ولو وصل هناك فبرضه هيتاخد من قفاة ويترحل لمصر , حيث الاستقبال الحافل اللى هيلاقيه من اشاوس امن الدوله ( نورت مصر ) ومافيش عندنا اكتر من الكهربا اللى هتخلى كل حته فى جسمك تنور, على صدرك تنور , على بطنك تنور , على مش عارف ايه تنور ....


كل جيل قبلنا جتله الفرصه يستلم الرايه , فيه اللى استلمها حلوة وجديدة , واللى استلمها مقطعه ومهربدة , وفيه اللى اخدها عنوة ...
احنا اساسا مشفناش الرايه دى ولا سمعنا عنها , لانه من الواضح ان فيه اجيال معينه شايفه ان الرايه دى ليها ( استخدامات اخرى ) ....
انا مكانش قصدى لما بدات البوست دة انى اهاجم او ارد هجوم او اتحيز لجيلى , لانى شخصيا من عشر سنين فاتوا كنت بكره جيلى جدا وشايفه جيل تافه ومتخلف , بس لما الظروف اجبرتنى انى اغوص فيه اكتر واتعرف عليه من جوة , حبيته قوى , واحترمت صمودة جدا .
اة صمودة .
لان اى جيل تانى لو شاف ربع اللى الجيل دة شافه وبيشوفه , هينتهى بيه الحال فى 3 اماكن لا رابع لهم :
- السجن
- العباسيه
- الامام الشافعى


وبعدين ياسادة يامحترمين ,
اللى متقبلوهوش على نفسكم متقبلوهوش على حد غيركم , بمعنى :
متجيش تقولى ايه القرف اللى انتوا بتسمعوة دة , لمجرد ان جنابك مش قادر تستوعبه ؟
فلو سيادتك تفتكر زماااااااااان , كان السيد الوالد برضه بيقول لحضرتك ايه القرف اللى انت بتسمعه دة , لما كان بيظبط سعادتك مخبى الترانزستور ( بتاع زمان ) تحت المخدة وعمال تسمع :
نار نار , نار نار, نار نار نار
حبك نااااااااااااااااااااااااااااااار

ويقولك ايه القرف دة , هو فيه زى عبد الوهاب ايام شبابه ولا عبد الغنى السيد , بتاع :
ما اسمك بين الاسامى يافتنتى ياغرامى .
وهو برضه ابوة كان بيقوله على اللى بيسمعه قرف وانه صوت الشيخ سلامه حجازى وهو بيقول ( ياايها القمر السامى بطلعته )لا يُعلى عليه .
منكرش ان المستوى بينحدر وبشدة مع مرور الزمن , فى جميع النواحى , مش الجانب الفنى بس .
ولكن دة ميمنعش ان كل زمن فيه الكويس والوحش
اينعم زمان الكويس كان كتير والوحش قليل .
ودلوقت الوحش كتير والحلو قليل
بس دة ميمنعش انه لسه فيه حلو عندنا , وانه فيه وحش عندكوا .
وان الوردة بتكون اجمل وسط الخرابه او فى الصحرا الجافه , عنها لما تكون وسط البستان .
بتكون واضحه اكتر.
ظاهرة اكتر.
بتثير الاعجاب بصمودها اكتر .


طب ليه بقى تتغاضوا عن كل السواد اللى كان عندكوا وتضخموا ( النقط البيضا ) وبنفس الاسلوب تنسوا اى حاجه كويسه عندنا وتتجاهلوا اى نقطه بيضا مسحتوها انتوا واتغطت سواد بسببكوا ومتشوفوش الا الاسود ( اللى هو برضه بسببكم انتوا ) .
متقولوش احنا جيل الدش
لانكم انتوا اللى دخلتم الدش البيوت مش احنا
وانتوا اللى قطعتم من لحمكم ومن قوت عيالكم علشان تحوشوا المبلغ الضخم اللى هتشتروة بيه ( ايام ما كان غالى ) .
طبعا والحجه جاهزة , علشان العيال نتبسط !!!
لأ
مش علشان العيال نتبسط زى مابتدعى
ولكن علشان جنابك تجيب الاوروبى بعد نص الليل بعد ما عيالك وال(حكومه ) تنام , علشان تعيش مرحله المراهقه المتاخرة اياها .


ومافيش داعى من الاسطوانه المشروخه بتاع الجيل الى معندوش حس فنى دى
هو مين المنتجين والمقاولين اللى بيروجوا للكليبات الهابطه ؟؟
ومين اصحاب القنوات اللى بيشجعوها وبيعرضوها ؟؟
مش من جيلكم برضه ؟


وبعدين لو كان دة مبرر للنقد فاذن من حقى انا كمان انتقدكم بشدة زى اهاليكم بالظبط , بحكم انى راجل سميع قديم وبسمع الشيخ سيد والشيخ سلامه والست منيرة .
مش كدة ولا ايه ؟؟؟؟


فبلاش ....


بلاش تشاورولنا بأى اصبع اتهام , لان ثقوا تماما انه هيرتد اليكم فى النهايه .
ليكم انتم مش لحد تانى .


واعرفوا ان الضغط البشع والرهيب وفرن صهر المعادن اللى احنا فيه دة مش هيدمرنا ,
بل بالعكس,
اللى بيسقط مننا دول , مجرد ترسيبات القاع , والصدا , والناس اللى ملهاش لازمه .
قريب قوى هتخرج من الفرن دة سبيكه الدهب
واللى جاى لينا احنا مش ليكم انتم
وباذن الله التغيير جاى
وهيكون للاحسن
وبادينا مش بأدين غيرنا
وفى الوقت اللى انتوا بتتمختروا فيه على سلم النقابه
احنا كان فينا اللى بيترمى فى المعتقل واللى بيتسحل فى الشوارع واللى بيسافر لغزة
فى نفس الوقت اللى فيه ناس من جيلكم ( عار عليكم ) بيركبوا الموجه ويطلعوا فى الفضائيات تحت ظل العل....قصدى التكييف .


احنا على الرغم من اللى بيحصل لنا
لسه
لسه فينا ناس نضاف
لسه فينا ناس بتقول لأ
لسه فينا ناس بتحلم
لسه فينا ناس هتاخد منكم الرايه بالعافيه وهتستخدمها الاستخدام الاساسى ( بدل الاستخدامات الاخرى اياها )
هنغسلها وهنضفها , وهنرفعها لفوق
فوق البانجو والحشيش والبرشام
فوق هايفه ونجلا والسبكى
فوق الشاذلى وشرور
فوق الافرول الاسود وصاعق الكهربا والعصايه المطاط
فوق كل كداب وغشاش ومنافق
فوق كل وصولى وانتهازى
فوق كل ممثل فاشل وتافه ومتخلف يظن نفسه ( زعيم )
فوق كل كلب , بيقدم على كل جمله سؤال ( بكام ؟!)
باذن الله هنرفعها
هنرفعها
والايام بيننا
وهتشوفوا
_________________


some time it falls upon a generation to be great
you can be that great generation


نيلسون مانديلا ......

الجمعة، 16 أكتوبر، 2009

خارج نطاق الزمن ...



عما اتحدث اليوم ؟
هل احكى لكم مغامراتى فى مجاهل جبال الجلاله البحريه ؟
ام احكى لكم ما حدث لى فى منزل جدى المسكون ؟
ام مغامرات ابركساس فى حوارى الدويقه , ثم سقوطه المروع فى البلاعه المفتوحه ؟
كلا كلا , سوف احدثكم عن اسطورة مشابك الغسيل التى تسير فى الشارع ليلا .

ماذا ؟ قلتها من قبل ؟؟

امممممممم

لا داعى لذكر حكايه الصرصور المشوة , خصوصا وان العديد من زوار المدونه من الفتيات ضعاف القلوب .

اذن
فلنلقى جانبا بروايات الاخ رفعت سيماعين , وكفايه كدة استظراف بقى علشان عاوز اتكلم جد شويه .

الفترة اللى فاتت واللى كنت بعيد فيها عن النت جه فى عقلى كذا بوست كنت عاوز اتكلم عنهم , بس مريت بليله مش قادر امنع نفسى من الكلام عنها , ليله عاديه جدا فى نظر اغلبكم , واغلبكم برضه هيقول فى النهايه انه بوست تافه وسخيف وممل , اوكيه مافيش مشاكل , ممكن اعتبر ان البوست دة معمول ليا انا , ولقليل من اللى هيقروة وهيطلعوا منه بحاجه , اى حاجه ولو بسيطه , فهؤلاء بهم اسعد ولهم قلبى يطرب ( على رأى واحد ) ...
:D

المكان : الساحل الشمالى
الزمان : ليله اكتوبريه رائعه الجمال فى العام 2009
الابطال :
- رمل
- بحر
- لسان وسط الميه
- سما صافيه
- نجوم
- قمر بدر منور
- شجر وزرع وورد كتييير
- قطه
- تجمع ضخم من فراشات صغيرة الحجم
- اربع خنافس !
- واحد مسمى نفسه احمد سعيد ...

على الطريق المظلم توجهت الى ( عشوائيات ) الساحل الشمالى , مارينا البلد , مارينا الجبل , كفر ابو بورتو , عزبه الجولف ,,
دعنا من الكفور والعزب , خلينا فى مارينا , وعلى وجه الخصوص مارينا واحد واتنين .
وللى يعرف وللى يشوف , مارينا الصيف غير مارينا الشتا , دى دنيا ودى دنيا تانيه خااااااااالص .
ولمن لا يعلم اوضح له الصورة فى العبارات التاليه :

مارينا الصيف :
- زحام مرورى وكميات هائله من العربات الفخمه تكفى لسد ديون افريقيا والعالم الثالث باكمله .
- اصوات ضحكات لا تكاد تنقطع من جميع الاتجاهات .
- عربات مكشوفه يعلوها شباب وفتيات وهات ياغنا .
- اطفال فى سن السادسه والسابعه يتحدثون الفرنسيه بطلاقه بل ويتغنون بها ( مش عيب برضه ونا زى الشحط معرفش غير ايام دونكى !! )
- كميات مهوله من الازياء المكشوفه وعبوات هينكل وسقارة وبلاكليبل فارغه على الطريق تطالعك اينما ذهبت .
- رائحتان لا تكادان تفارقان انفك اينما ذهبت , عبق سجائر الحشيش , الادخنه المنبعثه من عربه طرد الناموس التى لاتكاد تتوقف ليلا , حرصا على راحه السادة الملاك من ناموس الساحل الشمالى الشرير المزعج ( الكائن الوحيد القادر على مص دماء من مصوا دماء مصر )
- شباب جاء يحلم باجازة ممتعه وصيف صاخب وفتيات جميلات .
- فنانين ورجال حكم عفا عليهم الزمان واصبحوا طى النسيان , الا انهم تمكنوا من نزع بعض بقايا عزهم من بين انياب الزمن , وبه تمكنوا من التواجد بذلك المكان , كى يقضوا ما تبقى لهم من ايام فى هدوء وسكينه .
- كتائب من لوائات الجيش والشرطه المتقاعدين الذين نجحوا فى الاستيلاء على ( كبشه ) من ( القُفه ) قبل ان يطاح بهم من على كراسيهم .
- مئات من رجال الحكم وسدنه النظام , بعضهم ينتمى بحكم نشأته لهذا المجتمع , واغلبهم زرع نفسه فيه زرعا لا لشىء الا لإشباع مركب النقص الكامن فى نفسه وتعويض ايام الفقر والصعلكه وحيويه الشباب التى شلها تدنى المستوى الاجتماعى وضيق ذات اليد , الى ان من الله عليه فدخل احدى الكليات العسكريه من عشرات السنين فى عهد سمح له بالصعود الى القمه بسرعه الصاروخ , او رجل قانون كان لا يملك من الدنيا شيئا سوى علمه , فظفر بزوجه ( من اهل القمه ) والتى انتشلته بدورها من القاع وجعلته من رجال الصف الاول , فلما لا يعوضون ما فاتهم , فليفعل الان ما عجز عنه فى شبابه , وليشاهد اولادة واحفادة يلهون ( ويهبرون ) شهد الحياة الذى عجز هو عن مجرد تذوقه , فى زمن سحيق مضى .
- جيش مهول من عمال النضافه والزراعه وافراد الامن لتلبيه الاحتياجات المهوله لذلك المجتمع ذو النمط الاستهلاكى المفرط .
- اجيال واجيال من الشباب البائس , الذى جاء حالما بدخل مادى عالى , وماسورة من اوراق النقد تنفتح فوق رؤسهم , ولما لا , فتلك الماسورة لن تنتقص شيئا من بحار ومحيطات بنكنوت السادة البهوات , اذن , فليكن شعارهم : كل سنه وانت طيب يامعالى الباشا , حمدالله عالسلامه ياسعادة البيه , والله انا واخد بالى من فيلا سيادتك من ساعه ما مشيت الصيف اللى فات , مع قدر عالى من التناحه والسداغه وانعدام الكرامه التى تؤهل الشاب انه يلزق بغرا جنب الراجل لغايه لما يضطرة يمد ايدة فى جيبه ويديله اللى فيه القسمه !!!
- انوار وعناوين واسماء ولافتات براقه , صور سريعه ومتتابعه , الوان فاقعه للحياة , زخم هائل لن يتمكن عقلك من استيعابه بسهوله ان حاولت التعمق فيه .

اما مارينا فى الشتاء :
- سكون وهدوء لا يقطعه الا صوت اوراق الاشجار تحركها الرياح , شوارع فارغة بديعه المنظر , تدفعك دفعا للاستلقاء عليها والبحلقه فى السماء , جيوش من القطط تتبعك اينما ذهبت , وكيف لا , فقد غادر من كانو يطعمونها بما لذ وطاب , ثعالب وحيوانات غريبه تمرح وسط الحدائق بلا مبالاة وفى هدوء واضح , بحر تشعر انه قد اصبح اكثر سعادة بعد مغادرة ضيوفه الثقلاء على قلبه , ورود وازهار قد سيطر عبقها على كل مكان بدلا من ابخرة الدخان والحشيش والسجائر وسولارعربات طرد الناموس , واصوات طيور مغردة فى ساعه الغروب جائت بدلا من اصوات ( بيز ) صالات الديسكو , فيلات وقصور وشاليهات خاويه على عروشها اصبحت اشبه ببيوت الاشباح فى قصص الرعب العتيقه ...

طبعا انتوا فهمتوا انا حكايتى النهاردة عن اى واحدة فى الاتنين ...

بعد منتصف الليل , قررت اختراق احد المشايات الضيقه والتى يحصرها شاطىء البحر من جانب وصف طويل من الفيلات الفخمه من الجانب الاخر , مدخل المشايه يقع فى شارع عادى جدا , وكان على اولا اجتياز ممر شجرى ضيق يحيط بى من ثلاث جهات ولا يزيد عرضه عن متر ونصف ..
عند اقترابى من نهايه ذلك الممر الشجرى المظلم , فوجئت باشعه فضيه براقه تضىء المكان وتنعكس موجاتها على اوراق الاشجار والزهور , بينما تتراقص عشرات الفراشات الصغيرة فى ذلك الجزء المضىء والاخير من الممر الشجرى , فتنعكس عليها اشعه القمر الفضيه لتجعلها ظاهرة بوضوح شديد للعين , توقفت لمدة لا اعلمها امام ذلك المشهد البديع , الى ان افقت اخيرا وقررت الاستمرار فى جولتى الليليه , انتهى الممر الشجرى لاجد نفسى على اول المشايه الخرسانيه امام بحر هادىء وتحت نور القمر , انا الان على حافه قارة افريقيا , كلما اتقدم كلما اجد نفسى ابطىء السير اكثر , ليس ارهاقا ولكن رغبه داخليه لا اراديه فى عدم انهاء تلك اللحظات , مددت يدى لاشغل بعض الاغانى , فوجئت بوجود ملف كامل عندى لفيروز كنت قد نسيت امرة منذ زمن , فبدات به , وسرعان ما حدث التفاعل الخرافى بينى وبين صوت فيروز السماوى , ونغمات الاخوين رحبانى العبقريه , وضوء القمر , وصفاء الليل والنجوم , وصوت مياة البحر الرقيقه التى لا تكاد تكون امواجا , يسيطر على هذا كله هدوء عجيب وصفاء روحانى وذهنى غير معقول .

- بقطفلك بس ها المرة ,هالمرة وبس مع بكرة ,
مع بكرة بس شى زهرة ,
شى زهرة حمرااااا وبس ....

بدات اتذكر اياما قديمه ولّت , اياما كنت فيها امرح وحدى وسط اشجار الحديقه الضخمه والعتيقه لمدرستى الابتدائيه , اعدو وسط الاشجار , اخاطبها , واتحدث مع الطيور , اخترع احداثا وقصصا واقوم بتمثيلها , معارك وهميه امارسها ( وانتصر فيها بالطبع ) , عالم اخر وطبيعه خلابه اتحد معها فاكون انا وهى كيانا واحدا , لا دخيل عليها ولا متطفل سيرحل سريعا .

- عاهدير البووووووسطه
كانت نااااقلتنا
من ضيعه حملااااايا على ضيعه تنّورين
تذكرتك ياعليا
وتذكرت عيونك
يخرب بيت عيييييونك ياعليا شو حلويييييييييييييييين ....


تلك كانت اسعد واجمل زكرياتى , حينما اكون خارج نطاق الزمن , بل خارج نطاق المكان ايضا , فاكون اشبه بنسيم تجدة فى كل مكان , حينما لا يشغل بالى اى شىء ولا افكر فى حاضر ولا مستقبل , ولا يشغل بالى الغد , حينما افقد الشعور بنفسى , مستبدلا اياة بشعور اخر ارقى واجمل اعجز عن وصف كنهه , تلك اللحظات التى ذهبت وظننت انها قد ولت بلا رجعه , فطواها الزمن وغطت عليها طبقات سميكه من شحوم الاحداث السوداء ..
الا ان تلك الليله اعادت ما ذهب واعادتنى انا عشرون عاما للوراء ....

- نحنا و القمر جيران ..
بيتو خلف تلالنا ..
بيطلع من قبالنا ..
يسمع الألحان ..
نحنا والقمر جيران ..
عارف مواعيدنا ..
و تارك بقرميدنا ..
أجمل الألوان..

يمتد امامى لسان طويل يشق البحر , يكسوة لون فضى محبب الى النفس , قد اضافته عليه اشعه القمر اياها , وجدت نفسى لا اراديا اجتازة لاجد نفسى وسط الماء , مياة شفافه تخترقها الاشعه الفضيه ( اياها ) لتنعكس على ارضيه البحر الضحله تحتها , كاشفه عن جمال رائع وبعض الاسماك التى تشاركنى فى الاستمتاع بتلك الليله الرائعه , وجدت نفسى اهبط بقدمى فى الماء واستلقى بباقى جسدى على الارض ناظرا لنجوم بعيدة عن جسدى , الا اننى اشعر بقدرة شىء غير مادى بداخلى على الوصول اليها والتحليق حولها فى لمح البصر ...

- كانت زمان وكان في دكانة بالفي
وبنيات وصبيان يجي نلعب عالمي
يبقى حنا السِكران قاعد خلف الدكان يغني وتحزن بنت الجيران
لا لااا لالاااااااا
لا لااا لا لااااااا
لالااا لالالااااا لالالالااالااااااا
اوعى تنسيني اوعى تنسيني واتذكري حنا السِكراااااان

نحن والعصافير كنا بالحي ندور
صوب الدكان نطير حاملين غمار زهور
يبقى حنا السِكران بيلهو على الحيطان عم بيصور بنت الجيران
لا لااا لالاااااااا
لا لااا لا لااااااا
لالااا لالالااااا لالالالااالااااااا
اوعى تنسيني اوعى تنسيني واتذكري حنا السِكراااان

حلوة بنية الجيران راحت في ليلة عيد
وانهدت الدكان واتعمر بيت جديد
بعدو حنا السِكران على حيطان النسيان عم بيصور بنت الجيراااااان

لم اشعر بالمدة التى قضيتها فى ذلك الوضع , كل ما كنت اريدة هو الا تنتهى هذة الليله والا تشرق الشمس ابدا , دفعت نفسى دفعا للقيام والخروج من اللسان العجيب عائدا لشاطىء البحر مرة اخرى , على الرمال الفضيه اجد زوجان من الخنافس الصحراويه , يشتركان معى ايضا فى تلك الليله , فيداعب كل ذكر انثاة برقه , فتفر هى من امامه فى دلال واضح وبطء ملموس ممكنه اياة من اللحاق بها مرة اخرى كى يبدأ فى وصله غزل جديدة .
يقبع امامى قط ممددا جسدة على الرمال فى استرخاء واضح , بعينين نصف مغلقه ينظر فى الفراغ , فيم يفكر ؟؟ لا اعتقد انه يفكر فى اى شىء على الاطلاق , فليس هذا وقت التفكير , تنبعث فى هدوء نغمات اغانى ( DIDO ) والتى طالما اغرمت بصوتها القادم من عالم اخر , والتوزيع الموسيقى الرائع لاغانيها .
if my life is for rent
and I don't lean to buy
Well I deserve nothing more than I get
Cos nothing I have is truly mine

حانت منى التفاته الى الوراء , نحو تلك الفيلات والقصور الضخمه , وحدائق مفروشه بعشب اخضر كثيف وناعم يبهج النظر , تذكرت بعض ما قرات قديما عن المتصوفه والزهاد الاوائل , حين كانوا يشبهون الدنيا بكرة الحديد الضخمه المعلقه فى القدم , والتى كلما زاد ثقلها كلما منعت صاحبها من السمو والتحليق فى الملكوت وحذبتة بقوة لاسفل كلما حاول الصعود , تلك الكرة التى تتضخم وتزداد حجما كلما زاد تعلقنا بالدنيا وما بها , فحينما استبدل الكوخ بالقصر فلابد ان انشغالى به سيكون اكثر , ومتطلباته ستزيد عن متطلبات الكوخ , وتعلقى به وخوفى من فقدانه سيكون اكبر بالطبع , تلك الاحاسيس التى تشكل جدرانا متتابعه تاخذ بخناق الانسان تدريجيا الى ان تكتم انفاسه وتمنعه عن تلك الجنه الارضيه المبهرة , انا حر , نعم انا حر , فقيدى صغير وخفيف , فانا لا املك هذا القصر , اذن فلن انشغل به , ولن اخاف ان افقدة يوما , واذا فقدته فلن احزن عليه , لانى لن افقدة اصلا فهو ليس ملكى من الاساس ..

هذة الرمال ملكى انقل اقدامى اينما شئت فيها , هذا البحر ايضا , ملكى , فانا اخترقه بجسدى اينما ومتى شئت , هذا القمر البديع , ملكى , لا يملك احد حجبه عنى , انا حر , وانا غنى ايضا , لست ثريا , ولكنى غنى , غنى عن الناس , اى مستغنى عنهم ولا شان لى بهم , يمكننى الان بمجهود بسيط ان ارفع قيدى الخفيف معى , لاتمكن من التحليق بعيدا فى السماء , بعيدا جدا ......

فقط فى تلك الليله ادركت انه مازال هناك شىء بداخلى لم يمت بعد ........

يقترب النهار الكئيب على الظهور , فاجد نفسى اجر قدمى جرا للخروج من هذة الجنه بعد ليله كامله مرت على كلحظه واحدة , اعود من الشاطىء للمشايه الخرسانيه الضيقه , اصل مرة اخرى للممر الشجرى سالف الذكر , لاجد صديقاتى الفراشات مازلن منهمكات فى رقصاتهم القمريه , ادخل وسطهم فى رفق , امكث حوالى ربع ساعه فى محاوله اخيرة لنيل المزيد من الصفاء النفسى , ثم ابدأ فى استئناف المسير وسط الاشجار , تختفى الاضاءة القمريه تدريجيا لتتبدل بظلام دامس , الى ان اجد نفسى خارجا من ذلك الممر الى الشارع الاسفلتى الكئيب , واجد الانعكاس الفضى المحبب والساحر لضوء القمر قد تبدل بضوء اصفر باهر وكئيب لاعمدة الاضاءة ينعكس على الشارع الطويل وكل ما فيه ..........

بس خلاص

-- اخر نكته : واحد زميلى تبع احد الطرق الصوفيه ( المعاصرة ) بكلمه عن اللى بيحصل فى المسجد الاقصى فرد عليا وقال للبيت رب يحميه !!!!!!
وبما انى مش بحب الفضايح فمش هقول انه تبع الطريقه البرهاميه , ايون , ربنا امر بالستر .....

-- اخر ( خطبه ) : النهاردة الخطيب ( بتاع الاوقاف مش بتاع الكورة ) بيخطب عن ايه تخيلو ....
بيخطب عن النضافه الشخصيه , وانفلوسا الحلاليف !!!!!!
طب كويس بقى انى محضرتش الخطبه اللى قبل الدراسه فى الجامع دة , لانه مش بعيد يكون خطب ساعتها على جدول الحصص وتحضير الشنط واسعار الاقلام والكراريس والاساتيك .....,,, بجد بجد , نفسى اقول :

................... ,,,
ولا عيب
بلاش احسن ..

السبت، 3 أكتوبر، 2009

هبل فى الجبل

تحديث هام :
الكلام دة خاص بالاخوة اللى بيقفلوا التراك اول ما يدخلوا المدونه,
تحسبا لاى هجوم غير متوقع من الاغانى القديمه اياها اللى بتحفهم بيها من حين لاخر,
ياريت متقفلوش التراك المرة دى,
اسمعوة وانتوا بتقروا البوست,
ومتخافوش,
عموما تانى مرة لما اجى احط اغنيه قديمه او مخروشه من اياهم هبقى اكتب تحذير واحط جمجمه وعضمتين وودن عليها صاعقه حمراء .


تانى ,
وتالت ,
وعاشر ,
ايه موضه الاعلانات العبيطه اللى بيجيبوها فى التلفزيون دى ؟؟!!
وايه يعنى الغرض منها بالظبط ؟
انا مبحبش الكورة ,
تقدروا تقولوا كمان انى بكرهها ,
وبتمنى الهزيمه من اعماق قلبى لاى فريق مصرى يلاعب فريق اجنبى ,
وان كان الفريقين مصريين فبتمنى الهزيمه للفريق الاكثر شعبيه ,
لا لشىء , بس لمجرد انى كنت بعتقد ( كان دة فعل ماضى , متسيبه فى حاله ) ان بكدة الناس هتفوق وتقولك بلا حرق دم وقرف .
بس مع الاسف ,
كنت غلطان ,
فيه دلوقت بطوله كدة معرفش بطوله كاس ام ترتر ولا مش عارف مين ,
والناس بتتشنج قدام التلفزيون وترفص فى الارض وتشلت زى الجحش المسعور !!!!!
طيب ,

سؤال لكل واحد عندة عقل
يعنى اللى عندة عقل بس يرد عليا
اللى شايف انه معندوش فبلاش يرد احسن
فرضا اننا اخدنا كاس العالم
( دا فرضا يعنى , ولو انها مش هتحصل باذن الله )
كسبنا ايه ؟
الراجل الجعان اللى مش لاقى ياكل ولادة , هياكلهم الكورة ؟
الراجل اللى بيموت فى تربه جماعيه ومسمينها مستشفى حكومى , لا لشىء , بس علشان ممعاهوش تمن العلاج , هتدوله حقن ماركه ابو تريكه ؟؟؟
اليهود لما يدخلوا مصر تانى ( ودة هيحصل قريب جدا باذن الله ) هتحاربوهم بأيه ؟
هتحدفوهم بالكور ؟؟؟؟؟

ادونى منفعه واحدة للعبه المهببه دى

طبعا هتقولولى بتبسط الناس وبتخرجهم من النكد اللى هما فيه
طب دى مش ميزة , دى مصيبه
تقدر تقولى ايه الفرق بينها وبين المخدرات ؟
المخدرات بتدمر صحتك
الكورة بتدمر اعصابك
المخدرات بتحسسك بسعادة وقتيه ترجع بعدها للنكد والمشاكل تانى والكورة نفس القصه
المخدرات مش هتحل مشاكلك ولا الكورة برضه

يعنى من الاخر الكورة فى مصر حاليا ما هى الا تغييب متعمد للشعب المصرى وصرفه عن همومه ومشاكله الحقيقيه وتفريغ لطاقته فى هبل وتُرهات وكلام فارغ ...

بدل ما تطلع طاقتك فى مظاهرة ولا اضراب .
روح طلعها قدام الاستاد انت واصحابك ( ومتنسوش تجيبوا معاكوا صاحباتكوا ) !!!!!
اشتغل نفسك لما تكسب ماتش واوهم نفسك انك حررت الجولان مثلا او فتحت عكا .

عرفتوا ليه بقى الحكومه المصريه بتشجع الناس انهم يبقوا ( كرويين ) والكلام دة ظهر بوضوح فى كاس افريقيا 2006
( يوم النيوتى داى المصرى اللى حصل بعد الماتش النهائى , فاكرينه ؟)

هما عاوزين كدة
علشان كدة بيرموا فلوسكم وضرايبكم فى الاعلانات الهبله دى ...

وبناء عليه ,,,
قررنا نحن الكوتش اميجو بينور وكيل اول نيابه كوبرى المطار , بالتعاون مع شبح المرحوم نجيب المستكاوى , الرد بهذا الاعلان المفتكس :

شوفتوا الاعلان بتاع : علشان تعرفوهم روحوا شجعوهم ؟؟؟
اهو دة على نفس النظام , يلا , خدووووا :

مشهد : عربه مرسيدس سوداء نمر جيزة ( العربيات اياها ) تقف فى مدخل احد الحوارى الشعبيه , ينزل منها رجال كركدنات مدجدجين بالسلاح الالى والابيض والاسود والاحمر , يرتدون بدل سوداء وارد سوق وكاله البلح , ونظارات شمس ماركه كوبرى اللمون .
- الكل يهبط من السيارات , وينظرون حولهم فى توتر شديد ,
زووووووووم ان على شخص منهم يمد يدة فى جيبه ويخرج ( كوز صفيح ) متصل بسلك ويتحدث فيه بصوت غير مسموع , بينما تيار من الهواء يزيح بدله اخر للخلف , فيظهر بوضوح حامل جلد اسود معلق على كتفه فوق القميص من الداخل يتدلى منه سنجه وسكينه خنصر ومطوة قرن غزال ...
وفجأة تسيطر على الجميع حاله من الصمتى الرهيبى , وتقترب الكاميرا من احد العربات الفارهه لتستقر على اسفل الباب الخلفى ,
- الباب الخلفى ينفتح ,
تظهر قدم تهبط الى الارض فى هدوء , قدم رفيعه بدون شعر ويظهر فى اسفلها ( صندل اخضر بوردة ) وفى اعلاها شورت احمر وفيه قلوب سودا .
- ترتفع الكاميرا الى اعلى فى هدوء لتظهر ملامح صاحب هذة القدم ...
واذا به نوفل ابن عوكله المنوفى , شاب فى الاربعينات من العمر , تبدو عليه ملامح البله الشديد , فمه مفتوح باستمرار بينما تتدلى منه ( رياله ) بشكل مستمر فشر الكلب البلدوج , ويمسك بكلتا يديه ( كسروله ) معدنيه صغيرة وفارغه ....
الشاب يتقدم وحدة فى خوف ووجل مقتربا من احد العربات الكارو والتى تستقر فوقها قدرة فول ضخمه وقد انشغل صاحبها بالبيع للزحام الشديد من البشر حوله .
يحاول الشاب نوفل تخطى الصفوف فى يأس , محاولات متكركرة تنتهى كلها بالفشل , وفى النهايه يضربه البائع بالشلوت ثم يصيح فيه قائلا :
لو عاوز تطفح فوووووول , يبقى تستنى الرجاله لما تخلص الاول , ياطعم , يانايتى , سمعت يا ننوس ....
ينسحب نوفل فى حزن خافضا رأسه فى الارض بينما تنحدر من عينيه دمعتان , ثم يرفع راسه وينظر للشاشه بحزن واستعطاف ....

- تعود الكاميرا لتستقر على شاشه تلفزيون بجوار البائع تعرض مؤتمر الحزق الوثنى العاشر , فى قاعه فخمه , بينما ينهض كل الجالسون فى المؤتمر فجأة , ويصيح المذيع (كل دا فى التلفزيون اللى عند البياع ) :
السيد نوفل عوكل طوكر , امين عام الشياشات فى القهو....قصدى فى الحزق , فينخرط جميع حاضرى المؤتمر فى وصله من التصفيق الحاد.....

صوت المذيع ( فى الاعلان بتاعنا احنا ):
- علشان تعرفوهم ....... روحوا انتخبوهم ...
- الحمله القوميه لترشيح نوفل زعيم الامه للانتخابات الرياشيه 2011
مع تحيات :
الحزق الوثنتى النهبقراطى ........

_______________

ملحوظه صغنطوطه : اكتشفت مؤخرا انه مش اهبل ولا عبيط زى ما كلنا متخيلين , لااااااااا , دا ناوى فعلا على نظام جديد الاونطه فيه هتنضاف على بطاقه التموين , ونجح فى كل اللى هوة عاوزة حتى الان وببراعه , دة ليا معاة بوست قادم باذن الله , هشرحلكم فيه وجهه نظرى الجديدة عن الاخ دة بالتفصيل , ( يعنى البوست دة مجرد فكاهه واخراج شحنه غيظ مش اكتر ) ....

بس خلاص
منا مش هيتحرق دمى كل يوم على الفاضى .

يلا بقى
اشوفكو بكرة

جودنيوز....قصدى جودباى .