الاثنين، 30 نوفمبر، 2009

مااااااااااااااااااااااااااااء .....



كل سنه وانتوا طيبين
للى عيد عليا
واللى نسى
واللى ملحقش
واللى نفضولى ومرضيوش واستخسروا فيا الكلمه ...

وان شاء الله السنه اللى جايه تكونوا كلكم بالف خير
وقبل منكم ترجع فى البلد دى حاجه اسمها حق وعدل وخير ...
ويكون ربنا تاب عليا من كل اللى فى بالى ..

بمناسبه العيد
قررت ان البوست دة يكون عن العيد
والعيد يعنى خرفان
والخروف يعنى مااااااااااااااااااء
والمااااااااااااااااااء يعنى قطيع
والقطيع يعنى انسياق
والانسياق يعنى جهل وانعدام تفكير
ودة يرجعنا تاااااااااااااانى لموضوع البوست اللى فات
وبما اننا شوفنا الخروف المصرى ذو القرنين معدوم العقل والصوف والليّه
فمن باب دفع الملل قررت انى افرجكم نمط تانى من الخرفان
خرفان شيك شويه
اينعم هى خرفان
فيها بواقى عقل
لكن برضه لسه خرفان

النوع اللى هنتكلم عنه النهاردة هو الخروف الرومانى الفاخر ذو الصوف طويل التيله
وهو خروف يتغذى على العبيد ويشرب من مياة العنصريه والشوفونيه ,
يولد فى الكوليزيوم وينمو ويترعرع فى مجلس السناتو .
الخروف دة قدمه للعالم العبقرى النابغه ( وليم شكسبير )
ودلوقت هسيب الميك لشكسبير افندى فى تربته علشان يقدملنا اكتشافه المذهل , ادعوله ربنا يبشبش الطوبه اللى تحت راسه ...
الروايه اسمها يوليوس قيصر
ودة المشهد اللى بيتامر فيه اعوان قيصر عليه وبيقتلوة
الا ان الشعب بيحب قيصر
فبالتالى لابد ان ينتقم من القتله
بس ازاى ينتقم القطيع من الراعى ؟؟؟
فطبعا كان من السهل جدا على القتله توجيه عقول الجماهير فى لحظات لاتجاة اخر
وبدل ما يقتلوهم هتفوا ليهم
فاستلم المخلصين لقيصر الدفه وسرعان ما اعادوها للهجوم على القتله
مشهد لا يستغرق ربع ساعه
تغيرت فيه مشاعر الشعب من النقيض الى النقيض عدة مرات !!!!!!

بالذمه فيه خرفان كدة ؟؟
ولا انا بظلم الخرفان ؟
على الاقل الخروف لما بيساق للذبح بيزعق ويرفص
ولو قدر يهرب بيهرب
مش بيهتف ويحيى ؟؟؟
وبعدين ترجعوا تزعلوا لما اقول خرفان
والله الخرفان اللى حقها تزعل لو اتقال عليها بنى ادمين ....

اسمعوا الاخ شكسبير بيقول ايه وركزوا كويس فى الكلام :

يدخل بروتوس وكاسيوس الى المنبر ,,
العامه - اطلعونا على سبب قتل قيصر , نريد ان نعرف السبب .
بروتوس - اتبعونى اذا وانصتوا الى ايها الاصدقاء , اذهب ياكاسيوس الى الشارع الاخر , فسوف نقسم الحاضرين , اولئك الذين يريدون الاستماع الى فليبقوا هنا , واولئك الذين يريدون الاستماع الى كاسيوس فليذهبوا معه , وسنقدم لكم ايها الناس الدوافع وراء مقتل قيصر ....
مواطن1 - ساستمع الى بروتوس.
مواطن2 - ساستمع الى كاسيوس واقارن دوافعهما عندما يقدمها كل منهما على انفراد .

يغادر كاسيوس مع افراد من العامه .

مواطن3 - لقد صعد النبيل بروتوس الى المنبر فاصمتوا .
بروتوس - اصبروا حتى انهى كلامى ,
ايها الرومان والمواطنون والاحبه , انصتوا الى دوافعى , وكونوا هادئين حتى تتمكنوا من سماعى ,
صدقونى بسبب سمعتى الطيبه , واحترموا شرفى حتى تصدقوا ما ساقول , احكموا على بالرجوع الى حكمتكم , وايقظوا حواسكم حتى تحكموا بشكل افضل ,
اذا كان يوجد بين هذا الجمع اى صديق لقيصر , فله اقول بان حب بروتوس لقيصر لم يكن اقل من حب قيصر له , واذا سال هذا الصديق عن سبب انتفاض بروتوس ضد قيصر فاليه اجابتى :
ان حبى لروما يفوق حبى لقيصر , هل كنتم تفضلون ان يبقى قيصر على قيد الحياة فتموتون جميعا , عبيدا , على ان يموت قيصر فتعيشون جميعا , احرارا ؟؟؟
على قدر ماكان قيصر يحبنى فانا ابكيه , وكلما كان يحرز انتصارا كنت افرح لذلك , ولانه كان شجاعا , فقد كنت احترمه .
ولكن لانه كان طموحا وجشعا , فقد قتلته .
لقد سالت الدموع من اجل حبه , وعم الفرح من اجل نجاحه , وساد الشرف من اجل بسالته , واستحق الموت من اجل طموحه , فمن منكم يكون وضيعا للغايه بحيث يقبل ان يكون عبدا ؟؟ اذا كان بينكم احد كذلك , فاكون انا قد اهنته , فليتكلم .
من من الحاضرين لئيم بحيث لا يقبل ان يكون رومانيا ؟ اذا كان بينكم احد كذلك ,اكون انا قد اهنته , فليتكلم .
من منكم نذل بحيث لا يحب وطنه ؟ اذا كان بينكم احد كذلك , اكون انا قد اهنته , فليتكلم .
ساتوقف الان بانتظار ردكم ....
الجميع - لا احد يابروتوس , لا احد .
بروتوس - لم اهن احدا فاذا , انا لم افعل شيئا لقيصر اكثر مما يجب ان تفعلوة لبروتوس .
اما مساله موته فهى مسجله فى الكابيتول , فامجادة التى لا يستطيع احد ان يقلل من شانها ستكون ذات قيمه , وكذلك سيئاته التى كانت السبب فى موته ..

يدخل مارك انتونى ( صديق قيصر ) حاملا جثته .

بروتوس - ها قد جائت جثته ويندبه الان مارك انتونى , الذى لم يكن له يد فى مقتله , والذى سيستفيد من موته بحصوله على مكانه فى الدوله كما سيحصل كل مواطن منكم على مكانه فيها .
قبل ان اترككم , ساقول لكم انى قتلت اعز الاحبه عندى من اجل خير روما , وانى مازلت امتلك الخنجر نفسه , كى اُقتَل به لو كان فى ذلك ارضاء لبلادى ...
الجميع - فليعش بروتوس , يعيش , يعيش ..
مااااااااااااااااااااااااااااء ( دى من عندى انا )
مواطن1- فلنصحبه باحتفال الى منزله
هوووووووووو هو هو هو ( من عندى برضه )
مواطن2- فلنشيد له تمثالا الى جانب تماثيل اجدادة
باك باك بكبك بكااااااااااااااااااااااك كااااااااااااااك ( من عندى )
مواطن3- ولماذا لا يكون هو قيصر .
مواطن4 - ستكون مزايا قيصر مجسدة به .
مواطن5 - وسنصحبه الى منزله بالصراخ والهتاف .
بروتوس - ياابناء وطنى
مواطن2 - اسكتوا , اهدأوا فبروتوس سيتكلم الان
بروتوس- ايها المواطنون الطيبون , دعونى اذهب وحدى , ومن اجلى , ابقوا هنا مع مارك انتونى , وصلوا على جسد قيصر , وانصتوا الى الخطاب الذى سمحنا الى مارك انتونى ان يلقيه , والذى سيذكر فيه امجاد الراحل .
ارجوكم لا يغادر احد منكم , ماعداى انا , حتى ينهى مارك انطونى كلامه ...

يخرج

مواطن1- ابقوا ولننصت الى مارك انتونى .
مواطن3 - فليصعد الى المنبر العام , حتى نسمعه , اصعد ايها النبيل انطونى .
انطونى - بفضل بروتوس انا اتوجه بالكلام اليكم .
مواطن4 - ماذا يقول عن بروتوس ؟
مواطن3 - انه يقول انه يتوجه الينا جميعا بالكلام بفضل بروتوس .
مواطن4 - من الافضل له الا يتكلم هنا بالسوء عن بروتوس !
مواطن1 - لقد كان قيصر هذا طاغيه .
مواطن3 - هذا مؤكد , نحن سعيدون الان , لان روما تخلصت منه .
مواطن2 - اسكتوا ودعونا نسمع ما سيقوله انتونى .
انتونى - ايها الرومان الكرام
الجميع - اسكتوا ودعونا نستمع اليه .
انتونى - ايها الاصدقاء , والرومان , والمواطنون , اصغوا الى .
لقد قدمت لادفن قيصر , لا لكى امدحه
ان السيئات التى يقوم بها شخص , يتداولها الناس بعد مماته , اما الحسنات , فتدفن مع عظامه .
هذا هو حال قيصر
لقد اخبركم بروتوس بان قيصر كان طموحا , فلو كان هذا صحيحا , لكان خطأ فادحا , ولقد دفع قيصر ثمنه بطريقه مؤلمه .
وانا اقف هنا الان , بعد اخذ الاذن من بروتوس واصدقاؤة ,
فبروتوس رجل شريف
وكذلك الاخرون , جميعهم شرفاء...
حتى انهم تركونى اتكلم فى جنازة قيصر
لقد كان صديقا ومخلصا وعادلا
ولكن بروتوس يقول بانه كان طموحا
وبروتوس رجل شريف وصادق
لقد احضر قيصر العديد من الاسرى الى روما
ملأت فديتهم الخزائن العامه
فهل كان قيصر بذلك طموحا وطامعا ؟
وكلما كان فقير يصرخ , كان قيصر يبكى
فمن كان طموحا وطامعا , فلابد ان يتمتع بقلب قاسى
ومع ذلك , فان بروتوس يقول بانه كان طموحا وطامعا ,
وبروتوس رجل شريف وصادق
فلقد شهدتم جميعا انه يوم عيد اللوبركال
قدمت له التاج ثلاث مرات فرفضه فى كل مرة
فهل كان قيصر بذلك طموحا وطامعا ؟
ومع ذلك فان بروتوس يقول بانه كان طموحا وطامعا
وبروتوس بكل تاكيد رجل شريف وصادق
لست اقول هذا لاغالط بروتوس
ولكن , انا هنا لاتفوة بما اعرفه
لقد احببتم قيصر جميعا فى الماضى وبدون سبب
فماهو السبب الذى يمنعكم اذا من الحداد عليه ؟!
يالهذا الحكم , لقد تحولتم جميعا الى وحوش ضاريه
وفقد الناس عقولهم
ان قلبى قابع هنا , فى التابوت , مع قيصر
ولابد لى ان اتمهل , حتى يعود الى ....

مواطن1 - يخيل الى انه يوجد منطق فى كلامه
مواطن2 - اذا نظرت الى المسأله بشكل سليم , لوجدت ان قيصر قد ظُلِم كثيرا .
مواطن3 - اليس ذلك صحيحا ايها السادة , اخشى ان من سيخلفه سيكون اسوأ منه .
مواطن4 - هل انتبهتم الى كلامه ؟ يقول بان قيصر كان قد رفض التاج , وبالتالى , فمن المؤكد انه لم يكن طموحا ولا طامعا .
مواطن1 - اذا ثبت هذا الكلام فان القتله سيدفعون الثمن .
مواطن3- ياللمسكين انتونى , انظروا الى عينه , ان عيناة متقدتان كالنار من شدة البكاء .
مواطن2 - مامن رجل فى روما انبل من مارك انتونى .
مواطن4 - انصتوا اليه , فقد عاود الكلام .
انتونى - كانت البارحه كلمه قيصر تهز العالم , اما الان فهو يتمدد , هناك , وما من احد يتواضع ويبجله .
ايها السادة لو كنت مخولا ان اُحرض قلوبكم وعقولكم على التمرد والثورة ,
لكنت بهذا قد اسأت الى بروتوس وكاسيوس
وكما تعرفان , هما رجلان شريفان
لن اسىء اليهما ,
افضل ان اسىء الى قيصر الميت
والى نفسى
والى انفسكم
على ان اسىء الى شرفاء من امثالهم
اليكم الان ببرشمان عليه ختم قيصر
لقد وجدته فى خزانته , انها وصيته .
فليسمع العامه هذة الوصيه التى .... اعذرونى ,لا اقصد قراءتها , اذ انكم لو سمعتموها فستذهبون لتقبيل جراح قيصر الميت , وستغسلون مناديلكم فى دماؤة المقدسه .
ليس هذا فحسب بل سترجون الحصول على شعرة منه , للذكرى , وقبل مماتكم ستذكرونها فى وصاياكم وتورثونها الى احفادكم , على انها ارث ثمين .

مواطن4 - سنستمع الى الوصيه , اقرأها يامارك انتونى .
الجميع - الوصيه الوصيه , سنستمع الى وصيه قيصر .

انتونى - اصبروا يااصدقائى , لا يجب ان اقرأها ,
لا يجب ان تعرفوا مقدار حب قيصر لكم
لستم خشبا ولستم حجارة , بل انتم رجال
وبما انكم رجال , فان سماع وصيه قيصر سيثير غضبكم
من الافضل الا تعلموا بانكم ورثته
لانكم اذا اصريتم على سماعها , فيالِما سيحدث من جرّاء ذلك .

مواطن4 - ستقرأ لان الوصيه , وصيه قيصر .
انتونى - لقد تجاوزت حدودى بابلاغكم عنها , واخشى انى قد اسأت الى الرجال الشرفاء , الذين طعنوا قيصر بخناجرهم .
مواطن4 - انهم خونه , كيف يمكن لهم ان يكونوا شرفاء !!
الجميع - الوصيه , الوصيه .
مواطن2 - انهم انذال وقتله , اقرأ الوصيه
انتونى - سوف تجبروننى اذا على قراءة الوصيه , شكلوا حلقه حول جثه قيصر , هل انزل ؟ هل تسمحون لى بالنزول ؟
الجميع - انزل
مواطن2 - انزل
مواطن3 - يمكنك ان تنزل
مواطن4 - شكلوا حلقه حول الجثه
مواطن2 - افسحوا المجال للنبيل انتونى

انتونى - لاتلتصقوا بى وقفوا بعيدا
اذا كان فى اعينكم دموع فلتستعدوا لذرفها الان , جميعكم يعرف هذا الرداء , المرة الاولى التى ارتداة قيصرفيها كانت يوم هزم شعب نرفى
انظروا , ان هذا الجرح قد احدثه خنجر كاسيوس
وارايتم الشق الذى احدثه كاسكا الحسود
وهنا , طعنه المحبوب بروتوس
وعند سحبه لخنجرة اللعين
سالت دماء قيصر من الجرح
كمت لو انها تستعجل الخروج من الباب
لتتاكد ما اذا كان بروتوس قد قرع ام لا
فكما تعلمون , لقد كان بروتوس بمثابه ملاك قيصر
اشهدى ايتها الالهه
كم كان قيصر يحبه
لقد كانت طعنته افظع الطعنات على الاطلاق
فلما راى قيصر بروتوس يطعنه
هزمه الجحود الذى كان اصعب من طعنات الخونه , ثم حطم قلبه
وسقط قيصر العظيم اسفل تمثال بومباى
فيالها من سقطه ياابناء وطنى
ومن ثم سقطنا , انا والجميع
بينما كانت الخيانه المدماة تحوم حولنا
انتم الان تبكون , وانا ادرك انكم تشعرون بالشفقه , تلك دموع رؤوفه .
هاهو هنا وقد طعنه الخونه كما ترون.

مواطن1 - ياللمشهد المؤثر
مواطن2 - يالقيصر النبيل
مواطن3 - يالهذا اليوم الحزين
مواطن4 - ياللخونه وياللاوغاد
مواطن2 - سوف نثأر له , الثأر
مواطن1- ابحثوا عن الخونه , احرقوا , واقتلوا , واذبحوا
مواطن3- لاتتركوا ايا منهم على قيد الحياة
انتونى - اهدأوا ايها المواطنون
مواطن1- اسكتوا واسمعوا النبيل انتونى
مواطن2- سنسمعه , ونتبعه , ونموت معه

انتونى - لا تدعونى ايها الاصدقاء المحبون والمواطنون المخلصون اثير غضبكم الى حد القيام بثورة مفاجئه ,
ان اولئك الذين قاموا بهذا العمل هم شرفاء
انا اجهل , وللاسف , دوافعهم الخاصه , والتى دفعتهم لارتكاب مثل هذا العمل ,
هم عقلاء وشرفاء , وبالتاكيد سيقدمون لكم الاسباب الحقيقيه .
انا لست هنا ايها الاصدقاء لكى اسيطر على قلوبكم
ولست خطيبا بارعا على غرار بروتوس
انما انا , وكما تعلمون جميعا , رجل بسيط وفظ
واحب قيصر صديقى , كما يعرف الجميع عنى ذلك
انا لا املك الخطاب المكتوب ولا القيمه ولا الكلمات ولا ملكه الكلام ولا القدرة على الخطابه , حتى اثير دم الناس
انا لا اقول فقط سوى ما هو صحيح , واخبركم عما تعرفونه بانفسكم , واريكم جروح قيصر .
ياللافواة الخرساء المسكينه , التى ارجوها ان تنطق لاجلى ,
انما لو كنت انا بروتوس
وكان بروتوس انتونى
لكان انتونى قد سيطر بكلامه على مشاعركم , ولجعل من كل جرح فى جسد قيصر ينطق ويطالب حجارة روما بالتحرك, وبالثورة , والتمرد

الجميع - سوف نتمرد
مواطن1 - سوف نحرق منزل بروتوس
مواطن2 - فلنتحرك ونبحث عن المتامرين
مواطن3 - سوف نثار لموتك ياقيصر النبيل
مواطن1 - سوف نحرق جثته فى المعبد المقدس
مواطن4 - وسنستخدم الجمر لاحراق منازل الخونه
مواطن2 - ارفعوا الجثه , اشعلوا النار
مواطن3 - اقتلعوا المقاعد
مواطن1- انزعوا المقاعد الخشبيه , والنوافذ , وكل ما يشتعل
انتونى - فلتشتعل النار الان , ولتقم الثورة , ولتقضى على ماتشاء ...

الجميع - ماااااااااااااااااااااااااااااااااااااااااااااااااااااااااااااااااااااااااااااااااااااااااااااااء ( من عندى )

وكل سنه وانتوا طيبين ......

السبت، 21 نوفمبر، 2009

موقعه ام درمان



لم ينجح الفاير وول الاعلامى الذى كنت قد احطت نفسى به منذ اكثر من سته اشهر فى التصدى للاسهال الاعلامى الطافح فى بكابورت الاذاعه والتلفزيون وترنشات الفضائيات فى الفترة الاخيرة ..

لوهربت منه , تجرى ورايا الريحه , وان سديت مناخيرى , يؤذى عنيا بمنظرة القذر .....

لازم اغير الفروول وانزل انيفيرس كمان , او نخليها انتي اعلاميك , والا فسوف اضطر اسفا لتعطيل حواسى الخمسه , او على اضعف الاحوال , الاستعانه بخمسين طائرة ايرباص A 380 لنسف مبنى الاذاعه والتلفزيون , ومقار جميع الفضائيات باكتوبر والقاهرة والجيزة , او ابوس ايد اونكل اوماما علشان يسلفنى شويه مما تبقى من تكنولوجيا مشروع حرب النجوم الفاشل اياة بتاع التمانينيات , علشان ننسف النايل سات فى الفضاء الخارجى ونجيب من الاخر ونخلص ....

ان قفلت الريسيفر مخلصش من الكلام والّك فى الشغل , وان فلسعت من الشغل فالشارع والمواصلات موجودة , اركب السماعات فى ودانى واسمع اى حاجه تانيه , اروح لقرفص المزي....قصدى الحلا....لامؤاخذة , الكاوافير الروجالى يعنى , الاقيه نازل زن فى ودانى , زنننننننننننننن زززززززززززززززززززننننننن
ززززززززززززززززززززززززززززززززز....

ابو الاهلى على ابو الزمالك على ابو المنتخب على ابو شحاته وزاهر على ابو شوبير ومنصور ( الثنائى الشهير بحمص وحلاوة ) على ابو الكورة وابو اللى بيلعبوها والكل كليله ...

ابويا سرعنى امبارح وفتح عليا باب الاودة من غير مايخبط حتى ,
خير ياحاج , ماما جرالها حاجه ؟؟ البيت ولع ؟ زلزال ؟
- لأ
فيه حاجه بتوجعك طيب ؟؟
- لأ , شفت , شفت , شفت , مش عمال تقولى هيافه وسخافه واعلام سطحى , اهو , اهو , واحد سعودى بيتصل بالبرنامج فى التلفزيون وبيقولهم ان رئيس الاركان الجزائرى يهودى ودى مؤامرة ووووووو...............زززززززززززززززز .
انا : ..........................
---- طيب ------

الله , هى السعوديه كمان دخلت , نخلص من مشايخ عاصفه الصحراء يطلعلنا مشايخ السى اى ايه !!!!!!!!!!!!!
مخابرات وجيش واللى يقولك شفت بنفسى طيارات مكتوب عليها الجيريان ايرفورس !!!!!!

جيش وقوات خاصه ويهود , مبقاش فاضل الا اننا نعمل جزء عاشر للمسلسل اياة بيحكى عن بطولات رفعت الجمال بعد ما اتوفى , لما روحه الطاهرة اندست وسط الجمهور الجزائرى الفاشى فى الاستاد وامدت جهاز المخابرات المصرى بمعلومات قيمه عن انتشار القوات الجزائريه وطبيعه تشكيلها وخطط عملياتها داخل المدرج , تلاة عمليه اختراق ناجحه للبطل محمد نسيم تلاها تفجير للحفا...قصدى للمدرج الجزائرى , ثم اختراق خلف خطوط العدو لمجموعه الشهيد ابراهيم الرفاعى للقضاء على من تبقى من فلول العدو الجزائرى بالسلاح الابيض !!!!!!!!!!!!!!!

بجد انا لاشفت , ولا سمعت , ولا قريت , عن شعب فى تاريخ الكون وكواكب مجموعات مجرة درب التبانه , بهيافه وسطحيه وغباء وتفاهه وعبط وسخافه الشعبين المبجلين ( المصرى والجزائرى ) ...
وبعدين مين المذيعه المعزة اللى كل شويه عماله تقول : لما كنا فى الجبهه , وحصل فى الجبهه , ومش عارف ايه فى الجبهه ...
جبهه !
جبهه!!!!
احاااااااااااااااااا
جبهه ايه يام جبهه
جبهه ايه ياروح امك
دول صدقوا نفسهم بجد ...
حتى سعد الصغير , صغير الاسم والجسم والعقل , بيقول احنا المفروض نبعتلهم بلطجيه من شبرا ( اصل البعيد شبرواى ) !!!!
مش هتكلم عن الاشكال الوسخه اللى شفتها علشان مقبحش اكتر من كدة ..

يافنانين مصر
يااعلاميين مصر
بجد
بجد
انتوا شويه حثاله
فعلا انتوا كناسه الوطن
بغبائكوا وضحاله تفكيركم وغروركم ووصوليتكم وانعدام اى ذرة مسؤليه عندكوا
هقول اغلبكم علشان معممش
يعنى تسعه وتسعين وتسعه من عشرة فى الميه , بالظبط زى الانتخابات كدة ...
فاكرين الولد الصغير اللى فى فيلم الارهاب والكباب :
لقيت معاهم ايه فوق ياحبيبى ؟
- معاهم دبدابات وطيارات وسواريخ ومدافع وكنابل كمان ...
وكل واحد فيهم راجع من المطار على الكاميرا والميكروفون وناااااااااااااااااااال زن
ونفخ فى النار , الله يلعن ابو الفتنه على ابو اللى بيعملها على ابو اللى كان السبب فيها على ابوكوا انتوا كمان ....
فاكرين البوست اللى اتكلمت فيه عن تفاهه الاعلام المصرى وانعدام المسؤليه عندة وانه ماعندوش اى هدف ولا تخطيط وكله شغل فرقعه ؟؟؟

من الاخر
اتنين حكام طواغيت بيسوقوا شعبهم بالحديد والنار وبيسرقوهم ويجوعوهم , جم الزبانيه بتوعهم قالولهم يابشوات احنا مش هنقدر نحوش غضب الناس دى اكتر من كدة والحل اننا لازم نسيبهم ينفسوا عن غضبهم بعيد عننا فى اى حاجه تافهه , اهم بالمرة يتلهوا فيها ويبطلوا كلام فى السياسه ووجع الدماغ , وكان الحل السحرى الا وهو الكورة , وتمت عمليه غسيل المخ بسلام وتم محو السوفت ويرالقديم بالكليه وملء مستودعات النافوخ باتنين كيلو خرا خلاط , واديكم شايفين الجزائريين بقم عاملين زى بتوع قبائل المايا ساعه تقديم القرابين لكوكولكان فوق الهرم , واحنا بسم الله ماشاء الله , عاملين زى الراجل المجنون ابو هدوم مقطعه اللى بيمشى يكلم الدبان فى طلعت حرب ..

عوكل ابو العواكيل فهم الفوله دى سنه الفين وسته , طبعا مفهمهاش لوحدة , اكيد اونكل زفلط هو اللى رساة على الدور , امااااااااال ماهو راجل اعلامى قديم ومعتق , ومن ساعتها بدأت الهوجه اياها بتاع الاعلام والكورة , وبقى الماتش هو اكبر قضيه وطنيه فى مصر , واجرى ياجدع نضف الاستاد وارفع اسعار التذاكر علشان الشباب البيئه يبطل ييجى , فبالتالى البنات المزز القمامير ييجوا يشجعوا هما كمان لما يلاقوا الاستاد نضف , فيقوم الشباب اللذيذ يجرى على الاستاد علشان ...... علشان يشجع ..

ودة ظهر بوضوح فى كاس افريقيا الفين وسته , وكان ( النيوتى داى ) اياة اللى عمله الشعب المبجل برعايه ومباركه وزارة الداخليه والاعلام , طبعا انا منساش يوم زى دة لان على حظى الاسود كنت مسافر ووصلت رمسيس الساعة تمانيه مساء وعلى ما وصلت مصر الجديدة كانت الساعه تلاته ونص الفجر , طبعا اللى كان فى الشارع اليومين دول وخصوصا سكان مصر الجديدة ومدينه نصر فاهمين كويس ايه اللى حصل يوميها ....

وباضتلك فى القفص يابو العواكل , ادى الناس فرحت وزقططت وانبسطت وعربدت وطلعت كل الشحنات اللى جواها فى طبل ورقص وهز وسط , وبعدها خلاص , فسسسسسسسسس .

تمت عمليه التفريغ بنجاح ...يرجى من الحكومه المبجله استئناف السرقه والنصب واعادة شحن الغل , هذة رساله مسجله !!!
ولما المؤشر يجيب سبع شرط تانى من كتر الغضب , اخبطهم ماتش كورة , واطلقهم فى الشوارع زى الغنم , وبعدها , فسسسسسسسسسسس , وابدأ من تانى يامعلم !!!!

س- عرف الشعب المصرى ؟
ج- هو الشعب الذى يشتغل نفسه
تمانيه من عشرة

ج- هو الشعب الذى يجيد اشتغال نفسه
تسعه من عشرة

ج- مجموعه من البشر تتقن فن اشتغال الذات
عشرة من عشرة ونجمه كمان ...

- عليا النعمه احنا شعب زى العسل , واعتقد انهم هيدرسونا فى المستقبل مع انسان بكين والماموث وحفريات امنا الغوله , بالذمه عمركوا سمعتوا عن شعب فى تاريخ كوكب الارض بينضحك عليه بالسهوله دى ؟؟؟؟

ولما كان اونكل عوكل غشيم ومخه تخين , قام ساق فيها وبقى يلحس العسل كله , وتقل عيار السرقه ومعاه عيار الكورة , قامت الطبخه باظت منه والزيت المغلى اندلق عليه وعمله واوا فى ايدة ...

نسى انه وش فقر ونحس , وبقا يحضر الماتشات , طبعا علشان يركب الموجه ويبقى راعى الشباب والرياضه ويشارك شعبه الودود اللطيف المهااااااااااااود...... فى فرحته .

بس لما يخسر الفريق الماتش مرة واتنين , وتبتدى الناس تاخد بالها وتقول عليه وش فقر , وتقارير سواقين التاكسى اياهم توصله الكلام دة , بقى يتهرب من حضور الماتشات , بس المرة دى الطعم كان مغرى ومكانش يقدر يفوت الفرصه , فقال ياواد ياعوكل ياابو النصاحه والمفهوميه امسك العصايه من النص وروح سلم على شويه المفاعيص وهما بيرمحوا فى الزريب...قصدى فى الاستاد ( بيتدربوا يعنى ) وهات الواد حدقه بتاع الاعلام وصور ياجدع راعى الرياضه واتفرج ياشعب , ولو كسبوا ادينى ركبت الموجه وهجرى على الاستاد اسلمهم الكاس الصفيح اياة ونا فاشخ ضبى من الودن اليمين للودن الشمال ( زى لافاش كيرى كدة) , ولو خسروا اكفى على الخبر ماجور ولا كأنى اعرفهم , دا انا حتى محضرتش الماتش كمان , هههع هع هع , ياعينى عليا وعلى نصاحتى ,

ياعوكل ياجاااااااااااااااااااااااااامد ...

ونبعت كمان الواد نوفل ( ولدنا حبظلم ) يشجع علشان نلمعه , والوادحدقه بتاع وزارة الاعلام يحتكر تصوير الماتش , لان لما يحتكرة هتبقى الكاميرا كاميرتنا والمصور من رجالتنا , واياك ياواد تصور كورة او لعيبه , اخبط الكاميرا علطول على وش الواد نوفل , جه جون , هات نوفل وهو بيهتف , جه اوت , هاته بيخبط كف بكف , جه فينا جون , هاته حاطط ايدة على خدة وزعلان , وهات كام قرد من بتوع شباب جبلايه الحزق الوثنى يتنططوا حواليه , قال يعنى بيشجعوا , وقال يعنى الواد قاعد وسط عامه الشعب بدون حراسه ولا تحفظ ...
ولما نكسب بقى مسمر الكاميرا على وشه , جتك ستين خيبه , حتى التمثيل مش عارف تمثله , مش عارف تمثل انك فرحان , طب دا حتى السيد الوالد كان مشخصاتى قديم , اعمل فيك ايه طيب ؟؟ فاشل كدة فى كل حاجه حتى التشخيص ! مش عارف تعمل فرحان !!!
الواد واقف فاتح بقه ومشضض ايديه زى اللى بياخد حقنه فى العضل , ودمه اوففففف , يلطش القرد الاجرب ....

طب سؤال بقى , سؤال برىء وانتوا عارفين اسئلتى كلها بريئه :
- اشمعنى الفنانين والاعلاميين اللى خدوا بعضهم بربطه المعلم وراحوا الماتش فى السودان ؟؟
يعنى كانوا قاعدين كدة فى قهوة البرلمان بيشربوا معسل البرج وقرفه باللبن , قالوا يالا ياعيال نطلع الماتش ؟؟؟
كلام مش منطقى طبعا ..

المنطقى انه صدرت اوامر عليا من الباب العالى بالاتى ذكرة بعد :
على جميع مهرجى البلاط الملكى وبهاليل السلطان التوجه باقصى سرعه للسودان لممارسه فنون التهريج والبهلله , وتحيا مصر ياعم الامور منك له ...

ولما كانت القاعدة بتقول : ويمكرون ويمكر الله والله خير الماكرين , بالظبط زى ما حصل فى المحله فى الفين وسته واتقلبت الدنيا على دماغهم , حصل برضه فى السودان ...

لما البيه بعت الاخت توتى والاخ نوتى علشان يشجعوا , وبعتت الجزائر بنو نمنم اياهم ونزلوا طحن فى البهوات بتوعنا فشر طحن المنجد فى زكيبه القطن , وكمان ربنا استجاب لدعايا واتغلبنا ولله الحمد , ورجعوا الرجاله قفاهم يقمر عيش ومتعلم عليهم بختم ( ( nike اياة قامت شحنه الغضب زادت بدل ما تقل زى ماكان متوقع , حب الواد نوفل يركب الموجه برضه وطلع يهلفط واحناهنعمل ونسوى , خلاص ماهو بقى هو اللى بيتكلم دلوقت وركب ودلدل رجليه وحنا فى الطراوة , بس الموجه كانت اكبر منه , وصاحبنا ابو العواكل اتزنق زنقه منيله واتحط فى موقف حرج واصبح لا خيار امامه سوى اتخاذ موقف صارم , وبما انه مش من هواة المواقف الصارمه خااالث مالث , ومش بيحب يزعل حد منه , وقف وبلم وهلفط بكلمتين واستدعاء السفير وابصر ايه , واديه قاعد على الكرسى البامبو فى الجونينه بتاعه البالاس بتاعه ينشف عرقه , ولامم حواليه يهود خيبر وبنو النضير , واعمل ايه , دبرونى ياولاد .....
...
يابشر
يابنى ادمين
ياللى ربنا كرمكم بالعقل والادراك
معلش
طاوعونى دقيقه واحدة وامسحو السوفت وير المهبب اللى عوكل وزفلط حطوة فى دماغكم ,
ونبدا تانى مع بعض
واحد واحدة ومن الصفر
فرضنا جدلا انكم فزتم بكاس العالم ( وان كان دة مش هيحصل طول ما ال عوكل على قلبكم )

- هل الكاس دة هياكل عيالكم اللى بطنهم بتتلوى بالليل من الجوع ؟
- الكاس هيغطيكم وانتوا باردنين فى العشوائيات فى عز الشتا ؟
- هيرفع عنكم تجبر وتغول بهوات الدخليه اللى بيدوكوا بالجزمه رايح جاى ؟
- هيجوز عيالكم اللى بتبيعوا دم قلبكم علشان تجوزوهم ؟
- هيصلح التعليم اللى باظ ؟
- هيرجع ملياراتكم اللى اتسرقت من البنوك وخلعت على برة ؟
- هيصلح دماغكم اللى ضربت من كتر الضغط والغم ؟
- هيشفيكم من الاتهاب الكبدى والسرطان والفشل الكلوى والانميا ؟
- هيخليك تمشى جوة بلدك مرفوع الراس ومطمن ان محدش هييجى جنبك طول ماانت ماشى صح ؟
- هيخليك ديك البرابر وانت فى بلاد برة وعارف انهم عاملين لسفارتك وسفيرك ( الدكر ) الف حساب ؟

من الاخر كدة
الكاس هيخليك بنى ادم ؟؟
هل انت اصلا بنى ادم ؟؟
هتقولى ما انا بنى ادم اهو...
لا
اثبتلك ؟؟
اوكيه ,
مش الحمار حيوان ؟
تعالا على اى حمار فى الشارع وكب عليه ميا او اضربه بافترا
عارف هيعمل ايه ؟
هيرفصك
دا الحمار
- بيرفص لما يتئذى
كان لسه فيه واحد كتبوا عنه فى الجورنال كان بيضرب حمارة جامد قام الحمار خلاة راكبه وماشى جنب الترعه ونط بيه فى الترعة وغرقه ولما اتاكد انه مات وغرق طلع هوا سليم من الترعه ....
دا الحمار
- بينتقم
كان فيه جمل مسك واحد وشرّكه وخلاة مينفعش ببصله , عارف ليه ؟
علشان كان بياكل الخيل قبل ما ياكله
دا الجمل
- بيغير وعندة كرامه
شفتوا كليب الفيل اللى فعص مدربه فى السيرك وهرب وبهدل الشوارع برة ؟
دا الفيل
مفرحش بالناس الهبله اللى عماله تسقفله وترميله اكل ,
متخدعش ونسى حقيقه وضعه ,
منسيش وسط كل الهيصه دى انه اسير..
ذليل....
- عندة احساس
- عندة كرامه
- عندة دم
- مش طايق الذل
- مش طايق حبس
- مش طايق السلاسل
- عاوز حريه

دة الحيوان

فهل ترقى انت بوضعك الحالى , لن اقول فوق ولكن ساقول الى مستوى الحيوان ؟؟؟

جاوب على نفسك ...................
_______

من الف وخمسميت سنه كان فيه واحدة اسمها البسوس فى شبه جزيرة العرب
البسوس دى كان عندها جمل
والجمل دة دخل سهوا واكل من ارض واحد اسمه كليب
العيال طلعوا يجروا عليه
ياعم الحاج كليب , ياحاج كليب , الحق , الناقه بتاعه ست ام البسوس بتاكل النجيله بتاعتك
قام عمك الحاج كليب غلى الدم فى عروقه وراح يدافع عن شرفه المغدور وراح قتل الناقه .
ست ام البسوس قعدت تولول , يالهوىىىىىىىىىىى
ياللى ملكيش غيرى , ياللى اتخدتى غدر , ياللى الجمال كانوا بيجروا وراكى , ياللى اتكفنتى بفستان فرحك ياختى ...
شافها اونكل جساس قريبها , مالك ياوليه ؟
البعيد كليب قتل الناقه بتاعتى ,
قام جساس شرف العروبه غلى فى دمه وراح قاتل كليب
دول كانوا من قبيله اسمها بكر ودوكهما من قبيله اسمها تغلب , وقامت حرب ضروس بين بكر وتغلب فضلت مستمرة لمدة اربعين سنه , حرب البسوس !!!!!!!!!!!...

القصه دى اتكتبت فى كل كتب الادب العربى والتاريخ , وفضل كل من يقراها يضحك على سخافه وعبط العرب ايام زمان , بس اعتقد ان مؤلفى وكتاب كتب الادب والتاريخ فاتهم نص عمرهم لانهم لو كانوا عايشين دلوقتى كانوا مسحوا حرب البسوس دى من كتبهم وكتبوا مكانها ..... :
حرب ام درمان .....
______________

الف شكر لعوكل وبوتفليقه
الف شكر بجد
الف شكر ليكم انكوا رجعتونا الف وخمسميت سنه لورا
ميرسى بجد
ميرسى كتير
ميرسى بترتر ....

رساله اخيرة اوجهها لاونكل عوكل :
- حلّق يسعدك ..

رساله اوجهها لشعبى الجميل الصبور المهاود :
- نعيما
- بالشفا انشالله

كلمه اقولها بينى وبين نفسى :

بسم الله الرحمن الرحيم
( ان فرعون علا فى الارض وجعل اهلها شيعا يستضعف طائفه منهم يذبح ابنائهم ويستحى نسائهم انه كان من المفسدين , ونريد ان نمن على الذين استضعفوا فى الارض ونجعلهم ائمه ونجعلهم الوارثين , ونمكن لهم فى الارض ونرى فرعون وهامان وجنودهما منهم ماكانوا يحذرون )
( فاستخف قومه فاطاعوة , انهم كانوا قوما فاسقين
)
صدق الله العظيم

--- انا خلصت اللى عندى ---