الأربعاء، 30 ديسمبر، 2009

ليله من حياة الزعيم ( المؤمن ) !!



ملحوَظه : برجاء سماع التراك اللى شغال , وبطلوا تنفيض بقى ..


بصوا بقى
انا مكنتش هتكلم عن الموضوع دة
بس الواد المسلمانى العبيط بتاع الطبعه الاولى هو اللى استفزنى
لانى بالصدفه السيئه شفت البرنامج ( التحفه ) بتاعه من كام يوم

ياعاااااااااااااااااااااالم
واحد اليهود سموا ميدان باسمه
يقولك لاااااااااااااااااااااااااا
دى خطه
علشان يكرَهوا الشعب المصرى فيه

ياسلاااااااااااااااااااااااام
ماهو اصلا الناس كانت بتحبه وبتموت فيه
مش كدة
حتى من كتر حبهم فيه كانوا بيطلعوا عليه نكت وقتلوة فى الاخر
مش برضه من الحب ما قتل

ولما دمر متعمدا الجيش المصرى فى 73 بامر غبى مافيش غفير نظامى يصدرة
مكانش قصدة ياجماعه
دا راجل عبقرى

يمكن كان محشش ساعتها ولا حاجه ؟؟
بس الحشيش ميعملش الدماغ الوسخه دى

لا هو المسلمانى عاوز كدة
السادات كويس
وعبناصر كويس
وعبحكيم كويس
ومبارك كويس
وكل الناس كويسين
عدا حكومه نضيف

هوة كدة
تاريخ مصر ابيض وفله

مش عارف ليه لما بشوف حوارات الراجل دة بحس قد ايه مستواة الثقافى ضحل وتفكيرة نمطى ومحدود جدا

روح ياشيييييييييييييخ

الله يخرب بيت اللى عملك مذيع

وبناء عليه
قررنا نحن حُندُق السنطاوى
وكيل اول وزارة ادينى عقلك وامشى حافى
استعراض يوم
يوم واحد من حياة الزعيم ( المؤمن )
ولّع الله ثراة

صاحبنا بعد ما خرج من السجن
قرر يلعب على كل الحبال
- عرض على يوسف رشاد انه ينضم للحرس الحديدى الملكى
وبكدة اخد صف الملك
- وكمان اتصل بالمحور
وادى الالمان كمان
- وعن طريق مراته جيهان صفوت رؤوف وصل للانجليز
ياسلاااااااااام
- ولضم الابرة والخيط مع الاخوان
ياسييييدى

اهو بكدة عمكوا معتقش
المصرى الوحيد اللى كان مع جميع التيارات السياسيه فى نفس الوقت !!!

- دا بالاضافه للظباط الاشرار طبعا
فهم عبناصر انه عن طريق انضمامه للحرس الحديدى هيكون رجل الانقلاب فى القصر وهيجيب لهم الاخبار كلها !!
يالهوىىىىىىىىىىى
بالذمه
فيه حد يعرف يضحك على عبناصر !!!
دا ايه الفُجر دة

ما علينا
النهاردة ياشطار
هنتكلم عن يوم فى حياة الزعيم المؤمن
لما عبناصر قال له على ميعاد الانقلاب اياه
وصاحبنا فلسع وراح السينما

بالذمه
وبالعقل

فيه زعيم انقلاب ينسى يقول لواحد من اعضاء مجلس القيادة على معاد الانقلاب الجديد ؟؟!!!
ومش اى حد
دا عبناصر
بالذمه فيه عقل يقول كدة

لا وايه
لما يروح وميلاقيهوش يسيب له ورقه عند البواب
احييييييييييييييييييييييييييه

فعلا منتهى العقل والمنطق
والقصه ( المنطقيه جدا ) اللى هحكيها دلوقت
تدل على ان السادات فعلاااااااا مكانش يعرف ميعاد الانقلاب

لكن يشاء السميع العليم انه ييجى اللى يفضحه
الاستاذ يوسف الشريف
صحفى معروف وله صداقات متشعبه فى طبقات الادباء والفنانين ورجال الدوله
فى عهد عبناصر
وكمان كان جار جيهان فى المنيل
وشايف الحدوته من اولها
الاستاذ يوسف واخته ( عايدة الشريف ) كانوا فى السينما فى اليوم الموعود
وحصل الاتى :

سينما الروضه كانت بتعرض اياميها 3 افلام
فيلمين اجنبى والتالت عربى
وبما ان الراجل كان ناوى ومبيت النيه انه يروح السينما
يعنى خروجه عاديه جدا ومخططه
فكانت النتيجه انه راح متاخر
ودة طبيعى جدا
مش نتيجه انه عرف قرار الانقلاب فى اللحظات الاخيرة وقرر يهرب على السينما ولا حاجه
العقل والمنطق بيقولوا كدة

دخل والفيلم الاجنبى شغال
وفجاة
الناس سمعت همهمه
قوم اييييييييييييييه
سيادته وصل متاخر هو مراته
وعاوز يوصل للكرسى بتاعه فى منتصف الصف
يقوم يعمل ايه ؟؟
مش يقول للناس لو سمحت , بعد اذنك اعدى
لااااااااااااا
يتخانق مع الصف كله
عادى , دا طبيعى ومنطقى

خلصت والناس لمت الدور
دخل شاب تانى متاخر
وعدى من قدام السادات هو وجى جى
السادات هب فيه :
ماتحاسب يا اخينا , انت اعمى ولا ايه ؟
الشاب ياعينى اتاسف واعتذر , ووصل كرسيه وقعد
يسكت السادات ؟
لا
العقل والمنطق بيقول انه مش لازم يسكت

بعد فترة طويله
هب السادات فجاة زى الوابور البايظ وصرخ :
قله ادب ... معندكمش ذوق بصحيح , يعنى تدوس على رجلين الهانم وبعدين تقول متاسف !!!
سكت الشاب
يسكت السادات ؟؟
لاااااااااا
مش من الطبيعى ولا المنطقى انه يسكت
قام مسك الشاب وعمل خناقه وهاتك ياضرب وشتيمه
الناس تسلك
يسكت السادات
لااااااااااااااااااااااا
اصر انه يروح الادارة
الادارة هدت الموضوع بالعافيه وصالحت الاتنين على بعض
خلص كدة الموضوع
المفروض يعنى

لااااااااااااا
برضه مش من الطبيعى ولا المنطقى انه يخلص
ويخلص ليه
امال سوسو يعمل اللى فى دماغه ازاى ؟

فى الاستراحه اللى بين الافلام
قام السادات مرة واحدة
ومسك الشاب تانى
واصر انه يعمل محضر فى القسم
علشان
الشاب الشرير
اللى داس على رجلين الهانم
وهو معدى قدامهم فى الضلمه علشان يوصل الكرسى بتاعه
قله ادب صحيح
صاحبنا لقى ان موضوع الادارة مش حجه مقنعه
فقرر انه يوثقها بورق رسمى
وبعد ما عمل محضر
رجع السينما تاااااااااااانى وكمل فرجه كأن شيئا لم يكن
اجراء طبيعى ومنطقى جداااااا

فى نفس التوقيت دة
كان البطل يوسف صديق
فى طريقه لوزارة الحربيه بقواته
علشان يستولى على المبنى ويعتقل من فيه

وفيييييييييييييييييييييين
لما السادات اتصدم بنجاح الانقلاب ( ودة كان غير متوقع )
جرى على عبناصر
وقال انا اهووووووووو
انا معااااااااااااااااكوووووووووووووا !!!


طيب
السادات خطيب ومتحدث مفوَة
المفروض انه يذيع اول بيان للانقلاب
وخصوصا ان كل المذيعين خافوا وفلسعوا
يذيع ؟؟
لاااااااااااا
طبعا مش منطقى ان ظابط خطيب من مجلس القيادة هو اللى يذيع بيان الانقلاب

ذاع جلال معوض البيان
وبما ان البيان متسجلش
فقد قرر السادات لاحقا واثناء احتفالات عيد الانقلاب سنه 62 انه يسجل البيان تانى بصوته
والحجه ,,
- علشان يبقى موثق ياباشا
ههههههههههههه

الغريبه ان محدش ولا حتى اى عمل اذاعى قبل رياسه السادات جاب سيرة انه هو اللى ذاع البيان
الا ان الايه اتقلبت بقدرة قادر وفجاة
لاقيناة هو اللى ذاعه
ازاااااااااااى
متعرفشششششششششش

دا طبعا غير انى نسيت اقلكوا
انه كمان مش هو اللى كلم الفريق فى التليفون وضحك عليه
زى الفيلم الاهبل الفاشل ما بيقول

لا

دا ضابط تانى فى مجلس القيادة
مع الاسف مش متذكر اسمه
بس دا كان معروف على مستوى الشارع وموثق باعمال اذاعيه فى الستينات
حتى الفريق اتصل بالوزارة للمرة التانيه
لما عرف انه انضحك عليه
وطلب من الظابط اللى بيكلمه انه يديله امارة
فقاله :
هو بعد العيد ينفتل كحك ياسيادة الفريق ؟!

طيب
نجح الانقلاب
نسى السادات المحضر
والشاب الرخم اللى ارتكب جنايه الدوس على اقدام جى جى هانم
طبعا
اصل الكلام دة معادلوش لازمه
فيه حاجات اهم دلوقت
من هنا ورايح
هنلاقى نفسنا
امام
سخسيه جديده
حربايه بتتلون بكل الالوان

موافق افندى
كما اسماه اعضاء المجلس نفسهم
بيلعب على كل الحبال
ومش بيعارض اى راى
ولا بينضم لاى تيار داخل المجلس
وكل حاجه
موااااااااااااااااااااافق
زى سرور كدة بالظبط

وبكدة
نجح انه يبقى على الرغم من ان كل اعضاء المجلس
اتكنسوا مع الزمن

فعلا
السادات
راجل مؤمن
ووطنى عظيم
وشجاع وبطل
وصااااااااااحب مبادىء

العقل والمنطق بيقولوا كدة
مش العواطف



( الله يخرب بيييييييييييييييييتك يامسلمانى )
ملحوَظه تانيه : الصورة باعلاة واحدة من تجارب السادات , نظرا لشغفه بالتمثيل , حيث انه فشل فى العمل كمونولوجست مع اسماعيل ياسين فقد قرر كتابه قصص سخيفه فى الجرائد قبل ان يجد نفسه ويثبت ذاته فى مهنه التمثيل على شعب باكمله ,,,
القصه السخيفه اسمها ( ليله خسرها الشيطان )
وان كنت شخصيا اقترح ان يتم نشر قصه حياة السادات تحت نفس هذا العنوان مع استبدال كلمه ( خسرها ) بكلمه ( كسبها ) ..

جنون العظمه



الحاكم بامر الله كان واحد من خلفاء الدوله الفاطميه
اللى كانت قبلها الدوله الاخشيديه
واللى قبلها الدوله الطولونيه
واللى قبلها العباسيه
( دا بالنسبه لمصر , انما برة مصر كانت الخلافه العباسيه مستمرة بالاضافه لدول اخرى )

الحاكم بامر الله كان فى بدايه عهدة تمام وميه ميه والناس كانت بتحبه
بس كان عندة مشكله واحدة كبيرة
ان كان له وزير اسمه برجوان ( فيه حارة فى القاهرة تحمل اسمه الى الان )
برجوان دة كان مسيطر على كل حاجه فى البلد وكان هو اللى بيمشى الحاكم ويتحكم فيه وكان الحاكم بيخاف منه جدا
لغايه لما الحاكم مقدرش يستحمل اكتر من كدة
فسلط شخص علشان يقتله

برجوان افندى دخل ياخد دش حاتى ماتى
خارج من الباب لافف البشكير على وسطه وبيغنى
ياخارجه من باب الحماااااااااااااااام وكل خد عليه خووووخه
خوخا خوخا خوخا خوخاااااااا
فجاة
ظهر شخص شايل سيف ضخم وقام نازل بيه على راس برجوان افندى
اىىىىىىىىىىىىىىىىىىىىىىىى

ولما مات برجوان اتهبل الحاكم بامر الله وبغى وتجبر على الناس بشكل لا يصدق
والعينه اهى :

كان ماشى فى شارع وكان فيه حمام ( الحمامات العموميه بتاع زمان )
فسمع الستات اللى بتستحمى جوة صوتها طالع برة
فامر ان باب الحمام يتقفل بحجر ضخم
وبالفعل اتقفل باب الحمام بصخرة ضخمه لغايه ما مات كل اللى كانوا جوة !!!!

منع الناس تبيع الزبيب
تن ترارارن ... تن تن

منع بيع العسل الاسود
تن ترارارن ... تن تن

منع اكل الملوخيه والقرع
ومرة عدى فى الشارع فظبط ناس متلبسين باكل الملوخيه فقطع روسهم عند باب زويله

منع بيع السمك اللى مالوش قشر ومنع بيع البلح ومنع زرع الترمس
تن ترارارن .. تن تن

امر بقتل الكلاب فقتلوا فى يوم واحد فى القاهرة تلاتين الف كلب

كان بيقفل شبابيك القصر بالليل والنهار وينور الشموع ويقعد قى الضلمه
:D

امر الناس انهم يقفلوا الدكاكين بالنهار ويفتحوها ويشتغلوا بالليل وبالفعل فضلت مصر مدة طويله ليلها نهار ونهارها ليل لغايه لما حصلت الحادثه دى :
بسلامته كان معدى بالصدفه فقفش راجل عجوز فاتح دكانه ساعه العصريه
فنهرة الحاكم فرد عليه الراجل وقال:
يا امير المؤمنين ,اما كان الناس يسهرون بالليل ؟ فهذا من جمله السهر ...

هدم كنيسه
بنى مكانها جامع
وبعد ما بناة
هدة
وبنا الكنيسه تانى

كان بيبنى المدارس ويشغل فيها الشيوخ والمعلمين وبعدين يقتلهم كلهم ويهد المدارس تانى

امر الناس فى صلاة الجمعه لما يشوفوا الخطيب طالع المنبر يقوموا كلهم ويقفوا له صفوف وبالفعل كان العالم الاسلامى من المغرب للحجاز بيعمل كدة !!!

كان متقمص دور وزير التموين وبيمشى يفتش على التجار فى السوق
وكان عندة عبد اسود زنجى طويل عريض , ضخم الجثه , عريض المنكبين
العبد دة كان اسمه مسعود
وكان الحاكم لما بيلاقى تاجر بيغش فى البضاعه
بينزل من على فرسه فى الشارع
قدام الناس
ويشاور للعبد مسعود
ويامرة يعمل ( سكباكه ) فى التاجر
هونجا بونجا على راى البت خيخه يعنى ولا مؤاخذة
فى الشارع
قدامه وقدام الناس
لغايه لما بقت الناس تطلع نكت على مسعود
ولما حد يتخنق من حد فى الشارع
يقوله :
هجيبلك مسعووووووووود

منع صلاة التراويح فى دولته لمدة عشر سنين !!!!

كان لما يمشى فى موكبه ويعدى من قدام باب النصر
ينزل من على فرسه
ويختار واحد من اتباعه
وينيمه على الارض
ويشق بطنه
ويطلع مصارينه
ويرميها للكلاب !!!!

كان يحب العلماء وبعدين يقتلهم

قالوا عنه المعاصرين له :
عندة شجاعه واقدام مع جبن وادبار
وكان يحب الكرم ويكثر من البخل
ويفعل الخير ويتبعه بشىء من الشر
ويقيم العدل فى الرعيه ثم يتبعه بالظلم والجور
!!!!!!!!!!!!!!!!!!!!!!!!!!!!

حصلت مجاعه فى عهدة فاجتمع الناس تحت قصرة وكان اسمه قصر الزمرد واستغاثوا بيه
فطلع وقال الاتى :
انا بكرة هروح الجامع الفلانى اللى برة القاهرة
وهرجع بعد صلاة العصر
ونا راجع
هرجع من قلب المدينه
عاوز الارض لغايه قصرى تكون مفروشه بالغلال
لو قدم فرسى فى اى موضع فى القاهرة لمست الارض
هطير راس صاحب البيت اللى هيكون قصاد الموضع دة علطول ....
وبالفعل
اتفرشت مصر كلها غله فى اليوم دة
واختفت المجاعه
وكل واحد كان مخزن حاجه طلعها

كان معين قاضى اسم النطاح
القاضى دة كان بيلبس طرطور عليه قرنين بقر
ولما يجيله خصمين يشتكوا له
يشوف الظالم فيهم
وينطحه بالقرنين دول
ولما الحاكم ساله عن سر الموضوع دة
قاله
يامولاى
لو شفت القرف اللى بشوفه من الناس هتعذرنى
وبالفعل
حضر عندة يوم الخليفه
واستخبى وراقب القاعه من بعيد
شاف خصمين
واحد مديون للتانى بميه دينار ومعترف على نفسه
قاله القاضى تدفعهم
قال مقدرش
قال نقسطهم لك , كل شهر عشر دنانير
مقدرش
طب خمسه
مقدرش
طب وحد
مقدرش
طب خمسين درهم
مقدرش
طب عشرة
طب درهم واحد كل شهر
برضه مقدرش
امال عاوز ايه ؟
اقسطهم على 3 دراهم كل سنه , بشرط ان صاحب الفلوس يتحبس لغايه لما ياخد كل فلوسه علشان اضمن الاقيه وياخد منى فلوسه كل سنه
فمقدرش الحاكم يتمالك نفسه وخرج من خلف الستارة وصرخ وقال :
انطح هذا النجس الشيطان والا فسوف انطحه انا !!

وصل بيه الامر انه ادعى الربوبيه وكانت العوام بتنادى عليه لما يمر فى الشارع ويقولوا يا حى ياقيوم يا محيى يامميت , وكان بيامر الناس اللى يشوفوة فى الشارع انهم يسجدوا له واللى يرفض تطير رقبته !

ادعى علم الغيب وكان بيسلط ناس تدخل بيوت الامراء ويقول لهم تانى يوم :
انت امبارح عملت كذا وكذا
وانت قلت كذا وكذا
جه شخص ناصح رمى عليه بطاقه صغيرة وهو ماشى بموكبه فى احد الشوارع , فتحها الحاكم لقا مكتوب فيها :
بالجور والظلم قد رضينا
وليس بالكفر والحماقه
فإن كنت اوتيت علم غيب
فبين لنا كاتب البطاقه
ومن يومها اتكتم وبطل يدعى علم الغيب

لغايه لما اخته اتخنقت منه ووزت احد امرائه واسمه سيف الدين ابن رواش انه يقتله , فاتنهز فرصه خروجه للتنزة فى حلوان لوحدة على ضهر حمارة اللى كان مسميه ( القمر ) وبعت وراة عشر عبيد سود قتلوة وفضل مرمى فى الارض لغايه لما اكلته الكلاب , ومحدش عرف انه مات غير لما لقوا حمارة ايديه ورجليه مقطوعه وهدومه مرميه جنب الحمار وعليها اثر الطعنات ....
وفى هذة الاثتاء دخل راجل غريب من ابواب القاهرة
كان مغطى وشه وملثم
ومحدش يعرفه
دخل بفرسه
ووقف على قصر الحاكم
وزعق بعلو صوته
وقال :
انا كنت مسافر عند واحد
اسمه احمد سعيد
وكان بيحكيلى عن ظاهرة اسمها جنون العظمه
زى كدة بالظبط
وزعق فيا وقال لى :
شفتوا الحاكم فى مصر بيوصل بجبروته لأيه ؟؟؟

الثلاثاء، 29 ديسمبر، 2009

للعداله وجه واحد ...



ورجعت تانى لبوستات التاريخ اللى بتحبوها
تتااااااااااااااااااااااااااا

ادى اول بوست
خدووواااااااا

طبعا عارفين الملك الصالح نجم الدين ايوب
جوز شجرة الدر
ايون اللى انضربت بالقباقيب واتحدفت من فوق سور القلعه والكلاب اكلتها والحراميه قطعوا ايديها وسرقوا هدومها الداخليه دى ,,

مظبوط كدة
الحكايه اللى هحكيها النهاردة حصلت فى عهد الملك الصالح دة ,
حكايه بسيطه ملهاش دعوة بالسياسه خالص
حدث يومى انكتب فى بعض كتب المؤرخين بشكل عابر
قليل قوى اللى عارفه او قرا عنه دلوقت ,

علشان تكونوا فى الصورة
القاهرة اياميها كانت متحوطه بسور ضخم
له ابواب بتتقفل بالليل
وبرة السور دة كان صحرا وارض خلا
والناس اللى كانت بتخرج من القاهرة فى الخلا دة وتسافر اى مدينه مجاورة
كانت غالبا بتنقتل وتتسرق بواسطه الاعراب والبدو الموجودين برة
نظرا لان التواجد الامنى خارج السور كان شبه معدوم
اياميها كانت فيه عصابه من عشرين نفر مبهدله الدنيا
ومش بتعتق اى حد يهوب برة
علطول يندبح ويتسرق كل اللى معاة , حتى هدومه يقلعوهاله ويسيبوة عريان , جثته اقصد
حتى لو معهوش فلوس برضه لازمن ينقتل
امااااااااااال , هو احنا بنلعب , امال نبقى عصابه ازاى

المهز

والى القاهرة اياميها كان شخص اسمه الامير شهاب الدين ابن يغمور ( الامير دة لقب طبعا مش اسم )
( والى ) دى كلمه تدل على وظيفه تعادل مدير امن المحافظه حاليا
وليس الحاكم كما هو متعارف عليه دلوقت
الامير شهاب كان دايخ علشان يمسك العصابه دى
وكل ما يعمل لهم كماين يفلتوا منها بذكاء نادر
وكل لما يطلع قوة تهاجمهم يلاقوهم فص ملح وداب
وبعد تعب كتير وشطارة اكتر من الامير شهاب
نجح انه يقفش العشرين شخص دول
وطبعا كان المتعارف عليه انهم يتشنقوا فورا فى احد اسواق القاهرة وتفضل جثثهم متعلقه فى الحبال كام يوم علشان يكونوا عبرة لمن يعتبر.
وعلشان محدش من اهلهم ينزل جثه منهم
كان بيقف عليهم غفر يحرسوهم
الناس دى اتشنقت فى عصر احد الايام
والامير مكانش موجود لحظه تنفيذ الحكم
فبلغ الغفر ياخدوا بالهم من الجثث لغايه لما يتمم عليها بنفسه تانى يوم الصبح
ولما نزل الليل وضلمت الدنيا ( اياميها مكانش فيه كهربا طبعا )
كان الغفر بيعدوا الجثث كل فترة علشان يتاكدوا ان مافيش حد فيهم اتخطف وسط الليل المظلم دة
وفى اخر الليل
بيعدوا العشرين جثه لقيوهم تسعتاشر بس

فين الراجل اللى ناقص ؟
يانهار اسود
رحنا فى داهيه
الامير اكيد هيشنقنا معاهم
على الاقل
او هيخوزقنا
او يوسطنا فى سوق الخيل
او يسمرنا على ضهر جمل
وسلومه الاقرع ميعرفش ابوة
والجلاد ايدة طارشه وقلبه ميت
نعمل ايه
نعمل ايه
بسسسسسسسسسسسسسس
احنا نستنى اول واحد يعدى علينا فى الطريق
ونمسكه ونشنقه
ونحط جثته مع الباقيين
وغالبا الامير مش هياخد باله
وياروح ما بعدك روح ...

اهو
خيال راجل كبير معدى هناك اهو
يلا يارجاله
الراجل قرب
مش مدى خوانه
لاحظ نظرات مريبه فى عنين الغفر
ابتدوا يعملوا حلقه حواليه
امسك ياجدع
حلق ياجدع
مسكوة
قاوم بشدة
لكن كانوا اقوى منه
وبسرعه البرق
لقى نفسه متعلق على حبل
ولاول مرة فى حياته
حس برجليه واقفه على الهوا
وروحه بتتسحب منه

من خمس دقايق
كان ماشى مطمئن
بيفكر هيتعشى ايه لما يوصل البيت
وبيحلم بالدفا فى السرير وهو وسط الليل البارد دة
مكانش عندة ادنى شك فى كدة
لكن فجأة
كل حاجه اتغيرت بسرعه مدهشه
وانتهى كل شىء بسرعه اكبر

تانى يوم الصبح
جه معالى الامير
دقت قلوب الغفر من الخوف
فين ياجدع منك له جثث المحكوم عليهم
قالوا بصوت مبحوح
اهم يا سعادة الباشا
عدهم الامير بسرعه
لقاهم واحد وعشرين جثه
الله
ازاى دة
عدهم تانى
برضه واحد وعشرين
علامه استفهام كبيرة اترسمت على وشه
قلوب الغفر وقعت فى رجلهم
قالوا احنا كدة خلاص
مش هنشوف القمر تانى
ومش هيعدى علينا النهار دة
احسن حاجه نعترف
يمكن يحن علينا ويموتنا موته سريعه
وصدق اللى قال
الصدق منجا
وفراوله
وكمترى

سعادة الامير
احنا هنقولك الحقيقه
حصل امبارح كذا كذا
استغرب الامير
وغضب
الا انه قال
ورونى الراجل المسكين اللى قتلتوة ظلم دة ياولاد التيت
شاوروله عليه
اهو يامعالى الباشا
بص الامير
دقق فى ملامح القتيل
الله
الشكل دة مش غريب عليا
شفته فين قبل كدة ياواد ياشهااااااب
شفته فين ياشوشووووووووو
شفته فين ياشاهى
ايون
بس مش معقول
لا
دا هوة
اى والله هو
وطلع الشخص دة كان مجرم وسفاح قديم داخوا كل رجال الامن وراة من زمان ومحدش عرف يجيبه او يوصله خاااالص ..

وابتسم الامير
وخبط كف بكف
وقال صحيح
صدق احمد بيه سعيد
لما قال فى مدونته
سنه الفين وتسعه :
للعداله وجه واحد ...

وتوته توته
خلصت الحدوته

الاثنين، 21 ديسمبر، 2009

خاطر ..




قبل ما اكتب بوست جديد
خطر فى عقلى خاطر
فكرة لمعت فى دماغى
مش لاول مرة
هى جت كتير قبل كدة
بس دى اول مرة افكر اكتب عنها ,,

لما كانت كل بوستاتى سياسيه فى اوقات معينه
لاحظت ان ناس معينه هى اللى بتقرا وتعلق
ولما بدات موجه البوستات التاريخيه ( اللى انتوا بتحبوها جدا دى )
لاحظت انسحاب نسبى من الاخوة السياسيين وظهور تيار تانى ( على استحياء )
ولما بعدت نسبيا عن الاتنين
ودخلت فى سراديب الجانب الانسانى
لاحظت تيار تالت
( دا طبعا غير الناس اللى بتتواجد بشكل مستمر ودائم )
فخمتوا انا عاوز اقول ايه ؟؟؟؟

طيب
نقول كمان

انا بتابع مدونات من الفين وخمسه تقريبا
بس عمرى مافكرت اعمل مدونه
او حتى اعلق
الا على اول السنه دى
اقدر اقول
انه من خلال اربع سنين
ظهر لى بوضوح
ان فيه تيار تدوينى
واخد الجانب السياسى فقط
وتيار تانى
واخد جانب انسانى
وتالت واخد جانب معرفى
ورابع ( يظهر على استحياء ) واخد تيار فلسفى
وخامس واخد جانب رومانسى بحت
وسادس واخد تيار فكاهى ساخر
وسابع واخد تيار ( هرتلى ) مالوش اى معنى او مضمون ممكن تخرج بيه ...

طبعا الموضوع دة مش مستاهل اربع ايام علشان تاخد بالك منه
بس انا قعدت اربع سنين
مش علشان اخد بالى منه
لا
علشان اشوف الصورة كامله
مش مجرد لمحه او لقطه

اللى خلا الفكرة دى تلح عليا اكتر
هى التعليقات اللى جات لى لما عرضت فكرة انى اعمل كذا مدونه
ودة مكانش الغرض منه ( القولبه ) انى اصب مدونه فى قالب جامد
لأ
بس كنت عاوز احقق نوع من الترابط بين المواضيع
خصوصا انها مينفعش تكون متباعدة او بينها فواصل واسعه
بس لاقيت ان كدة احسن ( وكمان كتير فيكوا شافوا نفس الزاويه دى ) ..

السؤال بقى :

احنا ليه ,

كمدونين ,

بنقولب نفسنا
سواء عن فهم وادراك
او حتى من غير مانحس
هو احنا مش بشر ؟!؟
يعنى اللى طول النهار مديها سياسه
هل دة عمرة مابيحب
او بيكرة
او بيفتكر ذكرى جميله فى لحظه ويتنهد
اينعم السياسه بتاثر على كل كبيرة وصغيرة فى حياتنا
ومعادتش مجرد ترف فكرى زى زمان
ولا فرض كفايه ( واخدينلى بالكوا )
اينعم بقت بتوصل لحاجات كتير خاصه وبتأثر عليها وبتأذيها جامد
بس مش بتقتلها
لانها لو ماتت
منبقاش بشر
هو مش فيه حب فى زمن الكوليرا ؟؟؟ ولا ايه ؟؟
D:
------

والاخوة والاخوات
الحالمين والحالمات
بست الحسن والجمال اللى مافيهاش غلطه
والفارس اللى هيجى راكب حصان ابيض شعرة مسبسب ونازل على رقبته ( دا الحصان طبعا ) .
هل الحياة وردى بالشكل دة ؟
هل الحب والجواز مش بيتاثر بالسياسه
وبالتالى الحاله الاقتصاديه
وبالتالى ( المسخنه ) الاجتماعيه اللى بقينا فيها ؟؟
ولا الحب حاجه لوحدها فى عالم سمسم
مادة بلاستيكيه لاتتاثر بالتيار الكهربائى ؟!
معدن غتت لا يتجذب للمغناطيس ؟!
اكيد لأ ,,
ولو بصينا بعمق شويه
هنلاحظ ان الحب معادش زى زمان
معدل الصدمات العاطفيه زاد
والخيانات كترت
والطلاق بقى على ودنه
مش بس كدة
لا وكمان بقى عادى ان الاب ييجى فى لحظه خنقه ويرمى مراته وطفله الرضيع من الدور الخامس

تخيل نفسك عايش فى فيلم ابيض واسود
وماشى فى العتبه
فى يوم صيفى
هواة حلو ومعتدل
والشارع رايق ونضيف
مافيهوش عربيات الا واحدة او اتنين
محدش مبوز ولا مكشر
الكل بيبتسم
وبيسلم على بعضه
محدش خايف من حاجه
وشاويش واقف فى وسط الشارع بشنبات مبرومه زى الاسد
ورحت على الافندى اللى ماشى هناك دة
ايون اللى عاوج الطربوش ومنزله على حاجبه الشمال
وماسك منشه عمال يلفها فى ايدة
وماشى ورا الشابه اللى لابسه ملايه لف هناك دى
وعمال يغنى :
نقِل فؤادك كيف شئت من الهوى
ما الحب الا للحبيب الاوّلى ...

ووقفته
وحكيتله قصه من دول
تفتكر هيصدقك ؟؟؟؟؟

كل ازمه
ومشكله
ومصيبه
فى البلد دى
مرجعها الاساسى هو الفساد السياسى
اللى هو اصلا ناتج عن موروث قديم من الخنوع الشعبى والسلبيه الجماهيريه .
القصد
مش من الطبيعى ولا المنطقى
ان لما البيت يتطربق فوق دماغى
واسمع طقطقه الحيطان
وقعقعه السقف
والصوت الرهيب اللى بيطلع من تكسر عمدان المسلح
والارض اللى بتتهز تحت منى
مش طبيعى ابدا
ولا مقبول
انى اخد وضع الجنين
واحط راسى بين رجليا
واغمض عينى
وافتكر ذكرياتى الحلوة !!!!!!

الخوف طبيعه بشريه
الخوف مش الجبن
مش بشريه بس
دى طبيعه اى مخلوق
وليست الشجاعه ان فيه انسان لا يخاف
لان دة وهم
الشجاعه هى القدرة على التغلب على المخاوف
او على الاقل مقاومتها
واشجع الناس
هو اكثرهم خوفا
واقدرهم على التغلب عليه
طيبعى ان فيه ناس مش بتحب تتكلم فى السياسه
علشان المشاكل او وجع الدماغ
او نوع من فقدان الامل او الياس
او حتى من باب تكبير الدماغ
او ترقيع الصورا السودا ببقع بيضا صغيرة
انما مش طبيعى
اننا نعيش من غير ما نشوف اى حاجه غير اللون الابيض دة
وانا معتقدش انه فيه الولد او البنت
اللى عايشين فى دور عزيزة ويونس
عمال على بطال
فى وصله مستمرة من الدماغ العاليه
اللهم الا لو كانوا يتمتعوا بدرجه عاليه جدا ومرحله متقدمه من السذاجه وسطحيه التفكير ( انا احسدهم عليها ) ...
-----

ممكن الواحد يتخنق من كل الهبل اللى حواليه
ويقرر يقلب الترابيزة
ويقول مش لاعب
ويدخل الكهف بتاعه
بعيد عن الدوشه والهيصه
ويسد عليه الباب بحجر ضخم
ماشى
اكيد شعور احسن واجمل
بس تبقى الحقيقه
انك مش هتقدر تفضل جوا الكهف دا طول عمرك
مسيرك تخرج
بارادتك او مضطر
او حتى تتشد من ايديك غصب عنك
وساعتها
هيكون الصخب عالى قوى على ودنك
مش هتستحمله
وهتكون الاضاءة عاليه اوى على عينك
هتتالم كتير
كتير قوى
وفرص نجاتك فى الحاله دى نادرة
اللهم الا لو قررت تقلب الوضع لواقع وليس مجازا
وشلت يؤجتك على كتفك ورحت تعيش فى كهف فى الصحرا
ولو انه برضه متضمنش تلاقى بتوع المرافق جايينلك يطردوك من الكهف لانك ساكن فيه بدون ترخيص
او يبتزوك علشان تدفع النور والكهربا والزباله
او حبايبنا الحلوين يقولولك انت اكيد بتهرب سلاح لغزة عن طريق الكهف دا
او الناس التانيين يقولولك ان الكهف دة له استخدامات عسكريه ولو عاوز تقعد فيه ادفع ( فِردَة ) مليون جنيه ونسيبك فى حالك ....

يعنى باختصار
هتعيش حلم وردى جميل
تصحى منه على دش ميه بتلج وتلت اربع اقلام على خمس ست شلاليت ..
----

الاخوة الفلاسفه
مفهوم
انك تتعب من الدوشه
وتلاقى حاجه فوق بتناديك
تطلع لها
فوووووووووووووووووووووق
فى الروقان
والهدوء
والجمال
وعين الحكمه
اللى بتشوف فيها كل الصور كامله
بس تبقى الحقيقه
انت مش اله
ولا ملاك
ولا الراجل ابو ابيض فى ابيض ودقن طويله وشايل كتاب ضخم تحت دراعه وموجود فى كل العصور
انت بشر
مسيرك تحتاج تنزل تحت
ولو على مضض
علشان تشتغل شغلانه سخيفه انت مش بتحبها ولا مقتنع بيها
علشان تجيب فلوس
تاكل بيها
مسير رغبتك الانسانيه
تناديك
علشان تدور على انسان يشاركك حياتك
مسير غريزتك الاساسيه تخبطك فوق نافوخك
وتقولك نحن هنا .
وتروح بيت
وتخبط عليه
وتركب دقن
وتقول انا مستعار
وبشتغل كذا
وباقبض كذا فى الشهر
وعندى عشه محترمه بمنافعها
وطالب منكم ,,,,
:
:
:
انبوبه البوتجاز علشان اغيرها .....
___

عيشوا على طبيعتكوا
بلاش تلبسوا ماسكات فى مدوناتكم
كفايه اوى الالف وش اللى بنضطر نلبسهم فى الواقع
اعتقد محتاجين للحظه
نقلع كل الوشوش
ونبص فى المرايه
ونقول احنا اهو
دا انا
بدقنى الحلوة
وبقى المسمسم
وشعرى المسبسب
ومناخيرى المكعبرة

بكل حاجه
الحلو
والوحش
لانى انسان
انا انسان
بشر
فيا دة
وفيا دة
مش آله ولا كومبيوتر
تديها معطيات وتخرج لك نتايج

بلاش

العالم اللى برة كئيب بما فيه الكفايه
فمافيش داعى نخلى الكأبه دى تنضح على عالمنا الافتراضى .
اتكلموا فى كل حاجه
وعن كل حاجه
وكل سخس وسخسايه فيكوا
يبعععععععععععععععععع
ويطلع اللى جواة
وميخافش من حاجه
اخرها على اسوا الاحتمالات
شخص متعرفوش شخصيا
هيقولك : والله منا دااااااااااخل هنا تانى
هتقوله : مع السلامه ومتقطعش الجوابات .

بس كدة ...

فيها حاجه دى ؟؟؟؟؟؟؟؟؟

الاثنين، 14 ديسمبر، 2009

انا مين ؟ انا فين ؟ انا ازاى ؟؟



فى احد الليالى الصيفيه اللطيفه ( حينما كان الصيف لطيفا ) , يجلس طفل صغير على كنبه مرتفعه عن الارض , بينما يحرك قدميه يمينا ويسارا .
تليفزيون ضخم , مقعر بشكل مستفز , تنبعث منه اصوات مميزة , لبرامج كانت مميزة ذات يوم , اوسكار , نادى السينما , اخترنا لك , تاكسى السهرة ....تاتراراراررن ,, تااااااااااااااااااااكسى .......

تاكل بطيخ ؟
لأ , مبحبوش
تاكل عنب ؟
لأ مبحبوش
طب تاكل مشمش
لأ مبحبهومش
امال بتحب ايه , ايه الدلع دة ؟؟؟؟
.............
بعد وصله من الصمت , ينطلق الطفل فى هدوء , نحو مكانه المفضل ( البلكونه ) حيث يقضى باقى امسيته حتى طلوع الفجر , بدون ان يتذوق اى نوع من انواع الطعام .

شفت ياحبيبى جايبالك ايه , صندل , يلا تعالى لما اقيسهولك
لاااااااااااااااااااااااااااااااااااااااااااااااااااااااااعاااااااااااااااااااااااااااااااااااااااااااااااااااااااا مبحبش الصنداااااااااااااااال
وكان الطفل الوحيد الذى لم يرتدى صندلا قط , اما حذاء , واما ان يسير حافيا , كم هو متطرف ذلك الطفل ...

كثيرا ما كان يبهرة مشهد الصقور وهى تنتخب اعلى الاماكن كى تحط عليها فى كبرياء , وشموخ , جميل هو ذلك الانفصال , البعد عن التدنى , والصخب والضجيج , التلوث , ضيق النظر , انغلاق الرؤيه ...
ولكن هناك ,,,, هدوء , نقاء , سكينه , تفرد
كثيرا ماكان يغلق عينيه , ليتامل المشهد الذى يراة هذا الصقر , هناك , بالاعلى , نعم فها هو يرى الشارع الخلفى بالكامل ويرى الاحياء المجاورة ايضا , ويرى حدود المدينه بسهوله , ذلك الطريق البعيد الممتد هناك , نقاط صغيرة مختلفه الالوان , تسمى بشرا , تتخللها اشكال هندسيه مربعه مختلفه الالوان ايضا , تسمى سيارات ( لم تكن حرب الخليج قد اندلعت بعد , لم يكن زمن الميكروباص قد بدأ ) انها هى , عين الحكمه , كما كان يطلق عليها فى الاساطير القديمه فى مكتبه عمه العتيقه ,جميله هى تلك النظرة , النظرة الكليه , المجمعه , الشامله , تربط كل العناصر ببعضها فى ان واحد , جميل ان يحيط بصرك بحدود الصورة , لا ان تحيط الصورة بمجال ابصارك وتتجاوزة ...
وبما انه لا يستطيع الطيران , ولم يتمتع بالقدر الكافى من الخيال الطفولى الذى يؤهله للقفز من فوق السطوح على انه مستر فرافيرو او سوبر مان ,
كان يكتفى بانتخاب اعلى نقاط المنزل , ذلك الدولاب القديم الذى يكاد يلامس السقف , يتسلقه الى ان يستقر فوقه
ينظر تلك النظرة المميزة , نعم هاهو المطبخ من بعيد , ها هو سريرى الضخم , يبدو صغيرا من الاعلى , ها هو ابى وامى , للمرة الاولى اخفض راسى لاسفل عندما اود النظر اليهما , لا ارفعها لاعلى كالمعتاد ...
يجد صعوبه بالغه فى الهبوط مرة اخرى , لم يكن يدرك بعد تلك القاعدة العجيبه المنافيه للمنطق والقائله بان الهبوط اصعب من الصعود , لا يود استدعاء احد الكبار لينزل به من اعلى , فان ذلك يجرح كبريائه كثيرا , يثابر لساعات , الى ان يتمكن من الهبوط بسلام , يكافىء نفسه على الانتصار العظيم بكوب من المياة المثلجه ....

لم يكن يحب العرائس ولا الصور المرسومه , كان يمقتها , يكرهها بشدة , لا يعلم السبب الى الان , يكفى القول بان مجرد وجودها امامه كان يصيبه بحاله رعب بشعه لا ينساها الى الان لفرط قسوتها ,,, من شدة بشاعتها اصابته بالجرأة ,
نعم تلك الجرأة التى جعلتنى اقدم على مخاطرة القيام ليلا من سريرى الامن , واقتحام مجاهل الشقه فى ظلام الثانيه بعد منتصف الليل , مغامرا بما قد اواجهه من عفاريت بشعه الخلقه , وكائنات لا هم لها سوى الامساك بى , ومعرضا نفسى لذلك اللص الضخم الذى لا يمل من تسلق الماسورة الضخمه بجوار شباك المطبخ حتى يتمكن من التسلل لغرفتى ويكمن فى ذلك الركن المظلم فى غرفتى ....
وقبل كل ذلك معرضا نفسى لمخاطر علقه ساخنه ساواجهها وحدى من حزام ابى العتيق الضخم عندما يعلم انى ارتكبت جريمه الاستيقاظ فى غير الوقت المحدد !!!!
نعم , خاطرت بذلك كله لانفذ خطتى المعدة سلفا , توجهت اولا الى المطبخ , انتزعت سكين حاد , توجهت بها الى غرفه الجلوس , تلك الغرفه التى لا تكاد تفتح مرة كل شهرين , توجهت للمنضدة فى منتصف الغرفه , ها هى قابعه على المنضدة , فى هدوء مستفز , تتصنع الملائكيه والطيبه , لكى تخدعنى , لكن لا , لست انا بذلك الطفل الساذج , اولا سانظر اليها , بعمق , نعم , لابد ان اكسر هذة الرهبه , هاهى الصورة تتبدى امامى بوضوح لاول مرة , شاب فارع الطول يبدو كأحد جنود الحمله الفرنسيه , يحتضن فتاة مبالغ فيها بكافه الصور , مبالغ فيها شكلا وهيئه , ترتدى باروكه ضخمه صفراء اللون , ترتدى فستان وردى اللون من طراز ذلك العهد , حين كانت الاوربيات يلجئن لحيله حتى يبدو الصدر اكبر من حجمه , حيث يتم تضييق الفستان لاقصى درجه حتى يضغط بشدة على الصدر فيدفع الجزء الاعلى منه للبروز موحيا بحجم ضخم مخالف للحقيقه ...........
ابدأ فى خدش تلك الصورة
نعم اظنكم عرفتموها
الصورة الموضوعه على غطاء علبه الحلويات الالمونيوم القديمه والتى كانت منتشرة ذلك الوقت , كحتّها بشدة حتى استعاد الغطاء لونه الفضى اللامع المحبب , وزالت اثار تلك الصورة اللعينه تماما ...
لا اعلم الى الان , لماذا كانت تستفزنى الصور والماثيل والعرائس , قد كنت اعتقد انها كيانات شيطانيه , نتظر لى فى اصرار وتحدى , لم اكن ارتاح لها مطلقا ...
كان يكفى بعض من تلك الجولات الليليه لمحو باقى الصور والقاء العرائس فى الشارع , بالطبع لن يعرف احد مصيرها حيث انها لن تظل فى الشارع كثيرا ....

خيال وانتقام :
مازال يذكر ذلك اليوم , حين دخلت عليه امه بزوجان من الحمام الوديع , احبهما كثيرا , كان يقضى اغلب اليوم بجوارهما , كثيرا ما تسلل من فراشه ليلا كى يطعمهم ويغلق باب الشباك المجاور ليمنع عنهم ذلك الهواء البارد .
الى ان جاء اليوم الموعود , امه تحمل السكين , وفى عينيها نظرة ذات مغزى معروف , تتوجه الى المطبخ ,يتعلق بها , يتوسل اليها الا تقتلهم , لكن هيهات , تزجرة بعنف , فهذا دلع ( بنات ) لا يليق بالرجال , وامعانا فى ذلك اصرت على ان يمسك راسهم بنفسه حتى تتمكن هى من اتمام عمليه الذبح .
ارتجفت يدة وترك الحمامه بمجرد ان راى ذلك الرشاش الرفيع للغايه من الدم يندفع من رقبتها , عطل ذلك عمليه الذبح , بالتاكيد زاد من الم الضحيه المسكينه التى ظلت ما يقارب الدقيقه برقبه نصف مذبوحه حتى تمكنت الام من اعادة السيطرة عليها واكمال عمليه الذبح .
طبعا انتهى الامر بعلقه كالعادة مرصعه بفسيفساء من الالفاظ المنتقاة على طراز : انت مش راجل , ياكلب , يا جزمه , ووووو .....
الا انه اصر على الرغبه فى الانتقام
كان يعلم ايمان والديه الشديد بالمشعوذين , فكثيرا ماكانا يجلباهما للمنزل كى يكشفوا عن مكان العمل الفلانى , متخيلين ان ذلك الطفل الصغير على قدر كافى من الجهل يعيقه عن فهم ما يحدث , الا ان ذلك لم يكن صحيحا ..
انتظر انشغال امه ( بسلق ) الضحيه , واستولى على قدر من الريش ....
مر الان حوالى شهران على تلك الحادثه , الان لا احد يذكر اى شىء , والان فقط استطيع تنفيذ خطتى ...
ريشه تحت الكنبه , ريشه تحت السفرة , ريشه تحت سرير السيد الوالد ....
يتصنع فى بلاهه وجه طفولى وهو يقول : ماما , ايه دة ؟ شفتى انا لاقيت ايه ؟؟؟
علامات استغراب وعدم فهم , سرعات ما ستنقلب الى دهشه مع استمرار مشاهدة الريش فى جميع انحاء الشقه على مدار ايام تاليه , انقلبت الى رعب عندما بدأ سيناريو الموسيقى التصويريه لخبط ورزع ما بعد منتصف الليل ...
الان فقط انتقمت لحمامتى المسكينه , الان فقط يمكنها ان ترقد فى سلام , فى بطنى طبعا , فانا اينعم تالمت بشدة لمقتلها , الا ان ذلك لم يمنعنى من التهامها خصوصا بعد مشاهدتها وهى معدة للاكل , فانا انسان ضعيف , الا ان ذلك لم يمنعنى بالطبع من الانتقام ....
بعدها صارحت امى بالحقيقه , من شدة الاندهاش لم يتبين على وجهها اى نوع من انواع الانفعال مع الموقف , الا انى لم امهلها كثيرا , فقلت لها , تانى مرة عاوزة تجيبى حمام , ابقى ادبحيه برة , متجبيهوش وتدبحيه هنا ......

الى الان لا ازال امقت العرائس , وتخلو غرفتى من اى صورة او حتى مرآة , الى الان اتالم لمشاهدة طائر يذبح , على الرغم من مشاهدتى لقتلى واشلاء وضحايا حوادث , الا انى لم اتالم منهم , بينما اتالم من مشهد طائر يموت !!

كانت المساطر البيلاستيكيه المرنه لا تزال حديثه العهد , وكانت مصدر فخر لمن يقتنيها من التلاميذ ودلاله على علو مركز اسرته الاجتماعى , فاى اسرة تستطيع توفير 25 قرش لشراء مسطرة فاخرة كتلك لطفلها , لابد انها عائله غنيه ( هكذا كان تفكيرنا حينها ) , محمد صديقى العزيز , انسان ناجح حاليا ويمتلك معرض سيارات مرشيدس عقبالكوا جميعا , يجلس بجانبى متباهيا بتلك المسطرة , طلبت منه ان استعيرها لدقائق , كم هى عجيبه تلك المسطرة , كم هى مرنه , كيف تقاوم الثنى الى تلك الدرجه ؟ انها فعلا رائ......ترررررررراك .....
انكسرت المسطرة
سرعان ما علم محمد وبدأ فى وصله بكاء مستمرة ستنتهى بالطبع بابلاغ الابله , التى ستسارع بكل سرور وهمه لضربى بعصا ضخمه تبلغ ضعف طولى , كيف اخرج من هذا المأزق ؟؟؟؟؟
- محمد ؟
- انا عاوز مسترتى عاااااااااااااااااااااااااااا
- طب بص هقولك على حاجه حلوة .
- ايه ؟
- لما تروح هات لزق امير والزق الحافه المكسورة للمسطرة وبعدين الحم القطعتين فى بعض وبعدين حطها فى الفريزر علشان تلزق بسرعه
- بس ؟؟
- لااااااااااا , لسه , اسمع , بعد كدة هتطلعها , طبعا هتلاقى زيادات لزق خارجه من الحواف , تقوم تعمل اييييييييييييييه ؟؟؟؟
- اييييييييييه ؟
- تعدى عليها المكوة بسرعه علشان تشيل الزيادات دى , هتلاقى المسطرة بقت جديدة لانج , تاتااااااااااااااا

باقى القصه لم اعلمه الا منذ ايام , عندما شاهدت صديقى هذا ذكرنى بتلك القصه المؤلمه ( له طبعا ) حيث عاد لمنزله وسارع فى تنفيذ وصيتى , بالطبع لاحظت امه انه يصنع شىء غير مفهوم , راقبته فى هدوء , الطفل يضع المسطرة فى الفريزر !!!!!!
الطفل يخرجها من الفريزر ثم يضعها تحت المكواة !!!!!!!!!!!!!
تشششششششششششششششششششششششششششششششششششش
سرعان ما انصهرت المسطرة تماما والتصقت بالكواة , وكانت هذة اشارة البدء للعلقه الساخنه التى انهالت عليه من والديه ....
- روح ياشيخ منك لله ( دا هو بيقولى دلوقت )

لماضه :
فى حصه العلوم , سؤال عن ايهما اثقل كجم حديد ام كجم قطن ؟؟؟
بهدوء اجبت بان الاثنان متساويان لان كلاهما كيلوجرام
- حمااااااااااااااااااااااااااار ( دا المدرس بيقول ) ازااااااااااااااى يعنى , بيقولك كيلو قطن وكيلو حدييييييييييد , قطن وحديد انت مبتفهمش ؟؟؟
استاذ استاذ الحديد يااستاذ ( يجيب احد التلاميذ ) شاااااااااااااااااااااااطر
الحديد يااستاذ ( شااااااااااااطر )
الحديد الحديد
شطااااااااااااار , كلكم شطار ما عدا احمد سعيد !!!!!!!!!!!!!!!!!!!!!

فى حصه اخرى :
استاذ استاذ ؟
نعم يا سى احمد
هو ليه المغناطيس بيلزق فى بعضه ؟؟؟
- ( لا رد ) قليل الادب , افتح ايدك , طااااااااااااااااااااااااااخ

فى حصه العربى :
يا اولاد , جحا دة قصه وهميه من خيال الادباء
( انا مقاطعا ) لا يا استاذ , جحا شخصيه حقيقيه , وكان فيه كذا جحا كمان , بس جحا الاصلى اسمه ابا الغصن ابن دجين ابن ثابت ...
- اقعد انت متتكلمش خالص , متبوظش المعلومات اللى عند زمايلك .

فى حصه اخرى للعلوم
استاذ استاذ ؟
نعم ياسيدى
هو احنا اخدنا ان المادة عبارة عن صلب وسائل وغاز , صح ؟
صح
طب امال النار دى عبارة عن ايه ؟؟
( لم اكن اسال لمجرد التعجيز , فكثيرا ما جذب ضوء الشمعه انتباهى فى الليالى المظلمه ومكثت انظر اليه بالساعات سائلا نفسى عن ماهيه تلك الزهرة الصفراء العجيبه )
- طبعا لم اجد رد من استاذى العزيز
لاحقا علمت ان مادتى الغريبه ما هى الا مجرد جزيئات الكربون الملتهبه المتصاعدة من المادة المشتعله , وان النار فى حد ذاتها لا لون لها ....

- حصه اخرى ,
وطبعا قلنا يا اولاد ان اصغر حاجه هى الذرة ..
- لا يا استاذ فيه الكترون , انا شفت الدكتور مصطفى محمود فى العلم والايمان بيقول كدة .
طيب افتح ايدك بقى علشان تبطل تتكلم , لما منهج الوزارة يقول ذرة , تبقى ذرة , طاااااااااااااااااااااااخ .
فى حصه الدين :
- استاذ ؟
- نعم ياحمد
- هو مش الاسرائيليين دول احتلوا فلسطين ؟
- اة ليه
- طب ازاى الريس بيعمل معاهم معاهدات ؟؟
- .................

- فى حصه العربى :
- ابله ابله , انا قريت صفحات من كتاب قديم لقيته عندى فى البيت اسمه ( ارشاد الخواص فى التشريح الخاص )
- شاطر ياحبيبى
- ابله
- نعم
- ممكن اسال سؤال ؟
- اسال
- طب يعنى ايه حيوانات منويه ؟؟؟
- .................... , اقعد ومتسالش فى الكلام دة تانى , عيب ....., قوم اقرا يافلان النشيد يلا ,
قطتى صغيييييييييييييييييييييرة
واسمها نمييييييييييييييييييييييرة
شعرها يسللللللللللللللللللللللللى
وهى لى كظللللللللللللللللللللللى
عندها المهااااااااااااااااااااااارة
كى تصيد فااااااااااااااااااارة


من عادات الاطفال المعروفه , ابتزاز الاباء بالبكاء , حتى يخضعوا لرغبات اطفالهم , الا ان العبد لله كان احرص على اخفاء دموعه , فكلما غالبته نفسه بالبكاء , اغلق عليه غرفته وبكى بصوت مكتوم ثم جفف دموعه بحرص شديد وخرج يرسم الابتسامه على وجهه .
كثيرا ما استفز ذلك الاجراء مدرسيه , مما دفعهم لاغلاظ الضرب عليه , فقد استفزهم هذا الطفل المبتسم , واضعف هيبتهم امام باقى التلاميذ , المفروض ان يبكى , يصرخ , يتوسل طالبا الرحمه , يتلوى على الارض , ينفخ فى يديه ( اجراء معتاد عند التلاميذ ) الا ان شيئا من ذلك لم يكن يحدث ....

- مشهد :
سيادة اللِوز بيقولى :
انت انسان غير سوى .....
- فعلا , انا غير سوى , بس دة يتوقف على مفهوم كلمه ( سوى ) عند سيادتك ....

سؤال :
- ليه مطلوب منى اكل حاجه مش بحبها بينما اللى بحبه موجود ؟؟؟

- ليه مطلوب البس شىء بكرهه لمجرد ان الاخرين عاوزينى البسه ؟؟؟

- هل من الطبيعى ان يكون الانسان متحجر القلب والمشاعر , وهل الاحساس بالاخرين يعد بعد عن الرجوله ؟؟؟

- لماذا يصر الجميع على وضع الطفل فى قالب المتخلف عقليا ظنا منهم ان تلك التفاهات هى ما يناسب عقله , قاتلين بداخله اى بذرة نبوغ او ثقافه مبكرة ؟؟ هل هذا هو التعليم ؟؟؟

- لماذا يظن البعض ان ضرب الاطفال اجراء روتينى لابد منه ؟؟؟ سواء بسبب او بدون , اللهم الا اذا كان هذا اعداد تربويا سابقا لاوانه , لتمكين رجال الغد من تحمل ضربات كركدنات الامن المركزى لاحقا .....

- يعنى ايه انسان سوى , وهل كلمه سوى , كلمه مطلقه ؟؟؟ ام نسبيه ؟؟؟ يعنى هل السوى بالامس يعد مختلا اليوم والعكس ؟؟؟؟ وان كان الامر كذلك , فمن السيد المحترم المتحكم فى قوائم تصنيفات الاسوياء والمختلين والتى تصدر هديه على اعداد ميكى جيب اول كل شهر ؟؟؟

- سؤال قبل اخير
لو سيادتك دخلت بلد كل اللى فيها بيمشوا على اديهم , اكيد طبعا هتشوف انت كل شىء مقلوب , بينما هما هيكونوا شايفين كل شىء عدل , طيب , هل انت مطالب بالمشى على يديك حتى ترى العالم معدول ؟؟؟ الا يعد ذلك نوع من انواع الوهم لان العالم اساسا فى تلك الوضعيه مقلوب ؟؟؟؟ ام هل تصر على المشى على قدميك كما خلقك الله ؟؟
- هل المبادىء والقيم والمعايير , بمعنى ادق , هل الفطرة , تلك الصفحه البيضاء التى خلقنا عليها الله , هل هى نسبيه ؟؟؟؟ وكيف تكون كذلك ؟؟ هل اللون الابيض نسبى ام مطلق ؟؟؟؟؟؟ اليس الابيض بالابيض , ام انه قد يكون احمر احيانا , او بترتر احيانا , وقد يكون سمبوكسات فى احيان اخرى ؟؟؟
هذا ما سوف نعرفه فىىىىىىىىىىىىىىى ,
الاتجااااااااااااااااااااة المعااااااااااااااااااااااااكسسسسسس
سؤال اخير
- ماذا يفيدك لو انك ربحت العالم كله , وخسرت نفسك فى النهايه ؟

الأربعاء، 9 ديسمبر، 2009

ليل ..



1-
فى يوم تمانيه ديسمبر
من عام
الفين وتسعه
المكان
صحرا واسعه
راكب عربيه كبيرة
بلون الارض اللى ماشى عليها
الله اعلم كان بيفكر فى ايه ساعتها
كان بيقول امتى انزل اجازة اشوف امى
وحشتنى الغيطان الخضرا
والناس الطيبين
بدل الصحرا الكئيبه دى
والناس الوحشين
يمكن كان بيفكر
المكان اللى هروحه
هبات فين
وهجيب اكل ازاى
يمكن كان بيفكر
انا كبرت
ولازم اتجوز بقى
انا زهقت من الوحدة دى
يمكن كان بيفكر
لما انزل اجازة هعمل ايه
وهخرج مع مين من اصحابى
يمكن
يمكن كان سرحان فى لا شىء
وعنيه مبحلقه فى الفراغ اللا متناهى اللى قدامه
يمكن كان بيتكلم مع السواق فى اى موضوع
مصر والجزائر مثلا
او الناس اللى معاهم
او عن الطريق
جايز كان بيقوله هدى السرعه شويه
العربيه كحيانه ومتهالكه
جايز....
لكن فى لحظه
كل دة انقطع
على صوت فرمله مخيف
الله
ايه اللى بيحصل
الله
ليه الارض قربت كدا
الله
انا ايه اللى خرجنى برة العربيه
والسواق ماله سكت ليه ؟
ايه اللى بيحصل
مالى مبلول كدة ليه
ايه السائل الغريب دة , والريحه النفاذة دى ؟؟؟
اكيد حاجه من اللى فى العربيه اندلقت عليا
لازم اقوم اشوف ايه اللى حصل
الله
انا ليه مش قادر اتحرك
وايه البرد الغريب دة
مع انى فى صحرا
والشمس طالعه
وايه الناس اللى بتزعق وجايه من بعيد دى
ايه اللى بيحصل ؟؟؟
انا خايف
خايف قوى
ومش فاهم حاجه
انا مالى ؟
بترعش ليه ؟
وايه النفق الابيض الغريب اللى ظهر قدامى فجأة دة ؟؟
انا ليه مش حاسس بالارض حواليا ؟؟
ليه بقيت خفيف قوى كدة ؟
يافلان
ياعلان
انا اهو
انتوا مش بتكلمونى ليه
مش معبرينى ليه
هزعق
هزعق عليكوا بعلو حسى
برضه محدش سامعنى ؟؟
مالكم ملمومين كدة
ملمومين حوالين ايه
اما اروح اشوف
الله
مين دة ؟
دا انا
وايه الدم اللى مغرقنى دة ؟
انا ايه بيحصلى
مش فاهم حاجه
انا ببعد ليه
ليه بطلع لفوق
وكل حاجه بتصغر تحت منى
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

2 -
لسه نازل اجازتى
الوقت بعد صلاة العصر
دخلت الصومعه بتاعتى
فتحت المفتاح الرئيسى
فتحت الاستبلايزر
فتحت مفاتيح الكهربا
فتحت الجهاز
السماعات
الشاشه
دخلت المدونه اتابع اللى فاتنى من كام يوم
جرس التليفون بيرن
مين دة ؟
دا محمد
انتيمى واقرب الناس ليا
صاحبى من سنه 88
وزميلى فى كل مراحل الدراسه سابقا
وفى الشغل لاحقا
- الو
- ايوة يا احمد يا سعيد
- مالك يامحمد , صوتك متغير ليه ؟؟
- البقاء لله , احمد الحفناوى اتوفى النهاردة .
- ......................
- هتيجى الجنازة ؟؟
- انت فين دلوقت يامحمد ؟
- انا فى الاسماعيليه ونازل اهو
- طيب , اول ماتوصل كلمنى البس وانزل معاك نعزى
- سلام يااحمد
- سلام يامحمد

3 -
الوقت بعد العشا
نايم انا على الكنبه
مش نوم بالظبط
حاجه بين النوم واليقظه
بفكر فى لاشىء
صوت محمد عبد الوهاب يتهادى من سماعات الجهاز .
انا من ضيع فى الاوهااااااااااااااااااااااااااااااااااااااااااااااااام , عمرة
نسى التاااااااااااااااااريخ او اُنسى ذكرة
جرس التليفون بيقومنى مفزوع
- ايوة يااحمد
انا دقيقتين اكون تحت البيت , الاقيك لابس , انزل بسرعه علشان نلحق الدفنه ..
انط فى هدومى والبس فى دقيقه , مع انه العادى بتاعى نص ساعه ,
ادخل الحمام ,
اخبط وشى بشويه ميه ,
انزل جرى على السلم
حاسس انى هتكعور واقع فوق دماغى دلوقت
الحمد لله
جت سليمه
وصلت الشارع باامان
مش شايف باب العربيه
عنيا لسه مقفله
محمد يفتحلى الباب
اركب بسرعه
الجنازة هتتحرك
- هو فين الدفنه ؟
فى القريه الفلانيه , بلد احمد , يلا بس , انا هطلع على الطريق واشد شويه علشان نلحق نوصل بلدة قبل الدفنه .
انوار ووشوش بتمر من قدامى بسرعه
اصوات كلاكسات
اصوات شتيمه
اسفلت لا متناهى
الطريق يزداد وعورة كل مدى
الاضاءة بتاع اعمدة النور بتخفت شويه بشويه
اصوات الشتيمه والكلاكسات بتضمحل تدريجيا
وانا
بفكر فى ايه ؟؟؟؟
مش عارف .


4 -
قريه هاديه
زى اغلب قرى الريف المصرى
تحس فيها بالدفا
ولو فى عز الشتا
البيوت لازقه فى بعضها
الناس كلها تعرف بعض
طرق ضيقه وملتفه كالمتاهات
فضلات البهايم لا يكاد يخلو منها طريق
هنا هنوقف العربيه
مش هنقدر ندخل جوا البلد بيها
على المدخل
ناس كتير واقفه
وجوة متجهمه
ننزل ونتحرك على رجلينا
مش عارفين رايحين فين
بس ماشيين وسط الركب
ظلام تام
لا صوت سوى دق نعال المشيعين على الارض
مختلط باصوات نباح كلاب صادر من حقول بعيدة
فجأة سكنت الرياح
زادت برودة الجو
اضأت كشاف الموبيل علشان انور تحت رجلى , احسن اقع فى حفرة
الا انى بعد فترة
قررت اطفيه
وامشى فى الضلمه
وما ابصش تحت رجلى
ابص قدامى
وابص حواليا
نور مبهر من بعيد
دا مسجد القريه
دخلت
رحت اتوضا
الامام مستعجل
وعاوز يقيم صلاة الجنازة
بينما اغلب المشيعين لسه بيتوضوا برة
راجل كبير فى السن
زعق فيه
اصبر
مستعجل على ايه
دا ميت
والمشيعين لسه برة
الامام يتصنع انه مش سامع
الا انه يطيل الكلام عن فضل صلاة الجنازة انتظارا لوصول باقى المشيعين
امام حنفيات الوضوء
شاب يرتدى بدله سوداء
ينهار فى الارض
يبكى بحرقة
زمايله يقوموة
الا انهم مش قادرين
لان رجليه مش شايلاة
شالوة من دراعه
دخلوة الجامع
ناس واقفه على الباب برة
بتتكلم فى الموبايلات
ناس تانيه
مدخلتش اصلا
صلينا عليه
مش عارف احساسى
مقدرش اقول ان كنت منهار ولا متمالك نفسى
بس لما ابوة دخل علشان يصلى امام بالناس
وسمعت صوته المخنوق
المبحوح
وهو بيقول
اى حد
له دين عند احمد
فى اى مكان
يقولى
وانا هسددة
ارجوكم
اى حد احمد غلط فى حقه
ارجوكم
سامحوة
سامحوة ياجماعه
علشان خاطرى سامحوة
الله اكبر ......
ونا فى الصلا
حسيت بالدموع نازله من عينى
خلصنا
شفته فى الصندوق
محمول على الاكتاف
بيخرجوة من باب المسجد بصعوبه
الباب ضيق
والمشيعين كتير
والصندوق بيتهز جامد قى اديهم
مجموعه من زملاؤة واقفين فى اركان بعيدة فى المسجد
بيبكوا بحرقه
وحاطين مناديل على وشوشهم
فاكرين محدش شايفهم
فاكرين ان ناس زيهم عيب يبكوا
مع انه مش عيب
مش عيب خالص
على باب المسجد
امه
بتبكى
بتبكى قوى
ومعاها ستات كتير
بيبكوا كلهم
احمد دلوقت
طاير فوق مننا
قد يكون استوعب الوضع
وقد يكون لسه مرتبك ومش فاهم ايه اللى بيحصل
بس اكيد
بكا احبابه
كان بيتعبه نفسيا
والطاقه النفسيه الهائله
اللى كانت فى المكان
كانت بتربكه وتخضه
ليه بتبكى يا امى
انا اهو
قدامك اهو
كلمينى
الا ان امه مبتردش عليه
وبتستمر فى البكاء
تبتعد الجنازة تدريجيا عن انوار المسجد
وتخترق اجواء الظلام مرة اخرى
ونعود للصمت المطبق
الا من نعال المشيعين
التى تدق اذنى بشدة
اصوات الكلاب تتعالى تدريجيا
وتقترب
ندخل وسط حقول مظلمه
وارض رخوة
اضواء باهته تظهر من بعيد
انها المقابر
ندخل وسط طريق ضيق
تحيط به اشباح لشواهد قبور
البعض يضىء الهاتف
ويسلطه على بعض تلك الشواهد
الحاج فلان
توفى
12 / 4 / 1964
يااااااااااااااااااااااااااااااااااااااااااااااة
بقاله خمسه واربعين سنه
فى التراب
فى الظلام
فى الوحشه
ولسه
الله اعلم قدامه كام
فجأة يتوقف الركب
تضاء انوار باهته
اصوات منخفضه لحفر
تتعالى اصوات بكاء
شخص ملتحى
يصر على افساد اللحظه
معتقدا فى صواب وجهه نظرة
يبدأ فى خطبه
ووعظ
عن الموت
الا يعلم
اخى العزيز , الا تعلم
ان هناك لحظات فى الحياة
يكون الصمت فيها ابلغ من الكلام ؟؟؟
مهما كانت فصاحه وبلاغه المتحدث ..
احمد اهو
بينزل تحت
تحت
عارفين انه مخضوض
سابوة شويه
مرضيوش يقفلوا قبرة بسرعه
استنوا يونسوة
الا انى عارف انه ادرك الحقيقه المؤلمه
انهم مهما طال انتظارهم جنبه
الا انهم
مسيرهم
هيسيبوة
لوحدة
فى البرد
والظلام
والوحدة
اتقفلت التربه
انطفا النور
اعطاة الناس ضهرهم
اللى يعرفهم واللى ميعرفهمش
حبايبه
اهله
اخواته
الكل اعطاة ضهرة ومشى

اتاخرت شويه
لغايه ما غادرت الاغلبيه
والجو راق
وبقينا شبه لوحدنا
قربت من قبرة
معلش يااحمد
متخافش
اعرف حاجه واحدة
ايا كان اللى عملته فى دنيتك
سواء كان حلو او وحش
الا انى عاوزك تعرف حاجه واحدة
ان اللى انت رايح له
ارحم بكتييييير قوى من اللى كنت فى وسطهم
واعدل بكتير قوى من اللى كنت معاهم
العالم اللى انت فيه
اهدا
احسن
اروق
انضف
مش هساله غير حاجه واحدة
بس
انه يرحمك
عارف ليه ؟
علشان اسمه ارحم الراحمين

فاكر ايام زمان
والسنين اللى كنا فيها سوا
ناكل سوا
نشرب سوا
نضحك سوا
ونعيط سوا
فاكر
لما كنا نبقى بنتكتك فى عز البرد كلنا
الساعه خمسه ونص الفجر
عز الشتا
والهوا
فاكر لما كنا بنواجه مخاوفنا سوا
ونشجع بعض
ونزق بعضنا لقدام
واللى يقع مننا نشيله
فاكر لما كنت بموت من العطش فى احلك ايام حياتى
وجيت انت
اديتنى الميه اللى كانت معاك
وفضلت اشرب
اشرب
بقله ذوق
نسيت انك كمان عاوز تشرب
مفكرتش الا فى نفسى بس
فاكر
الصور اللى اتصورناها مع بعض فى الايام دى
فى اماكن نادر ان حد يجرؤ على دخولها
فاكر فى ليالى زى دى
لما كنا بنمشى وسط الحقول
فى الايام اياها
شايلين شيله تقيله على ضهرنا
والناس
بتقرب مننا وتسقف
وتكبر
وتدينا نشرب
فاكر
لما كنت تزنقنى فى العربيه جنب الشباك وحنا مروحين
واتكسف اقولك وسع شويه
الكرسى ضيق
وانت رخم
تبص لى وتضحك
فاكر ؟

ومرت الايام دى
ونسينا بعض
وكل واحد راح فى حاله
وفضلنا سنين منشوفش بعض
ولا حتى سمعنا اسم بعض
كل واحد راح فى سكه
زى ما كلنا اتفرقنا
وكل واحد مشى فى دنيته
الدنيا دى طرق
كل واحد ماشى فى طريق
ممكن الطرق تتقابل لفترة
وتفضل مجموعه ماشيه مع بعض
تتونس ببعض
تشجع بعض على الاستمرار
الا انه
لازم يوصلوا للمفترق
وترجع الطرق تبعد عن بعضها تانى
ممكن
ممكن بعد فترة
ترجع الطرق تتقابل
زى ماحصل
بس مع الاسف
الطرق اتقابلت امبارح بس
لما سمعت خبر وفاتك
وافتكرتك بعد ماكنت نسيتك
وادينا اهو
فى اليوم اللى اتقابلنا فيه
كان فى المقابر
كنت تتخيل كدة ؟؟؟
وادينا هنفترق تانى
علشان انا ماشى دلوقت

انت عارف
زمان كنت معتقد انكم كلكم هتمشوا فى جنازتى
بس الواقع كان مختلف
كل فترة
اسمع خبر وفاة واحد فيكم
واروح
اعزى فيه
اللى خبطته عربيه
واللى حادثه
واللى وقع من البلكونه
واللى جاله غيبوبه سكر مفاجأة
واللى
واللى
غريبه قوى الدنيا دى

عارف
كنت بفكر اقضى الليله دى جنبك
اونسك
بس بصراحه
الجو برد
انا مش خايف من المكان
لان دة اكتر مكان بستريح نفسيا فيه
بس البرد
ومحمد هيمشى بالعربيه
ومش هعرف ارجع بيتى مواصلات الا الصبح
ندل ؟؟
اة
انا عارف
بس دى الحقيقه
الكل فى اللحظه دى هيتخلى عنك يا احمد
حتى اهلك
وحتى انا
مش هيكون جنبك الا اللى خلقك
بس
سيبك منى انا
ومن اهلك
والتفت له
كلمه
ابكي له
اساله يرحمك
قوله انك كنت طيب
ومحدش شاف منك اذى
دى كبيرة قوى على فكرة
كبيرة فى الزمان دة
لان قليل قوى
قوى
اللى بيكون كدة

خلاص يا احمد
حياتك كلها اختصرت فى كلمه
( احمد الحفناوى )
1983- 2009
مجرد كلمه
كلمه على لوح رخام بارد
وصلب
وخيال
وذكرى
فى نفوس ناس حبتك
وهتنساك
ممكن تيجى عليها لحظات
طيفك يعدى عليها
يفتكروك
ويبتسموا ابتسامه حزينه
ويقولوا
الله يرحمك
يا احمد
مجرد طيف
طيف ....
سلام يا احمد
وهنتقابل تانى
قريب
انا وانت
كلنا
واهلك كمان
واللى مشيوا فى جنازتك
واللى بيقروا البوست دة
كلنا
كلنا هنتقابل فى يوم

ابتعد عن المقبرة
اخرج الى الحقول
تخطر ببالى كلمات
كانت قد كتبت على قبر مجهول الهويه :
يازائرين قبورنا
لا تعجبوا من امرنا
بالامس كنا مثلكم
وغدا تصيروا مثلنا ....

يدق عقلى بشدة بيت شهير
كثيرا ما يفرض نفسه على
اراة من احكم ما قراته فى حياتى
يقول :
لى فى فناء الخلق اكبر عبرة
لمن كان فى بحر الحقيقه راقى
شخوص واشكال , تمر وتنقضى
تفنى جميعا , والمهيمن باقى

ياااااااااااااااااااااااااااااااااااااة
هى كدة
كل الهيصه دى
والدوشه دى
كلها
بس
مجرد
شخوص
واشكال
رسومات
واشكال هندسيه
واشباح باهته
بتيجى
وتروح
وتفضى الساحه لغيرها ......

اخيرا .....

يااااااااااااااااااااااااااااااااااااااااااااااااااااااااااااااااااااااااااااااااااااة
الوحيد اللى فهمنى وجاب اللى فى دماغى بالظبط هو مهندس مصرى
وقال اللى كنت عاوز اقوله
معلش
يمكن انا كلامى بين للناس شىء معين بينما اقصد شىء مختلف شويه
بس اعذرونى
اعمل ايه
ميزان بقى .....
اشكرك يا مهندس بجد على كلامك
واشكر فاتيما على كلامها اللى خفف كتييييييييييير قوى
وبالنسبه للون المدونه
انا مضطر اسفا
انى اغيرة
استجابه لرغباتكم
وان كنت شايفه مناسب اكتر لروح المدونه
وان كنت ناوى احتفظ باللون دة لغايه يوم معين انا منتظرة
هبدله بعدها للابيض الناصع
بس نعمل ايه بقى
حكم القوى
بس ادونى فرصه
لان التغيير دة محتاج يوم رايق
ومزاج راااااايق
اصبروا عليا لغايه اليوم دة
:D
بالنسبه لمواضيع المدونه
انا كنت ناوى اعمل تغيير نوعى فيها
يعنى
اخف الكلام عن حبايب قلبى شويه
لانى بصراحه بتخنق واتعب نفسيا من مجرد ذكر اسمائهم
( دا من كتر الحب طبعا )
هكتب بأذن الله بوستات شويه مختلفه
ذات طابع انسانى نسبيا
هعمل حاجه كنت واخد قرار معملهاش
هقتبس حاجات عجبتنى كنت قريتها
وهنشرها كما هى
ناوى باذن الله ارجع لمكتبتى الصغنونه تانى
لانى بقالى كتييييييييييييير قوى كنت بعدت عنها
كنت ناوى اعمل كذا مدونه اضافيه
واحدة كنت هعملها موسيقيه
يعنى شويتين نقد على قدى كدة
والتانيه كنت عاوز اعملها فنيه
للافلام
زى بحب السيما كدة
والتالته كنت عاوز اعملها عن الصور
يعنى صورة
وانطباع
بس انطباع عميق شويتين تلاته
والرابعه كنت عاوز عاملها فلسفيه بحته
والخامسه عن حاجات قريتها وعجبتنى

( بالظبط زى مهندس حر ماقال )

بس نظرا لضيق الوقت
والظروف
وانى اصلا مش ملاحق على وقت للمدونه دى لوحدها
هأجل الحلم دة شويه
تحياتى ليكم كلكم
واشكركم على مجاملاتكم الرقيقه اللى مستحقهاش
..............................................

الخميس، 3 ديسمبر، 2009

دقيقه تانيه من فضلكم

امبارح رجعت البيت متاخر بالليل
ملقتش حاجه اعملها ( ودى لحظه نادرة اليومين دول )
قلت ادخل مدونتى
اقراها مع نفسى
كانى زائر داخل عادى جدا لاول مرة
الحقيقه اتصدمت
ومستوى المدونه معجبنيش
احساس غريب جالى مرة واحدة كدة
مش عارف
بس لقيت نفسى مخنوق منها
ممكن منها نفسها
ممكن من المواضيع اللى بتكلم عنها
ممكن من الاسلوب
مش عارف
بس حاسس بحاجه غلط
مش عارف ايه هيا
دى مش نوبه من نوبات اعتزال التدوين
لا الموضوع دة انا قفلته من زمان
ومش عاوز حد يقولى الكلام المعتاد اللى بيتقال لما ح يقول هنشطب
لانى مش ناوى اشطب
بس حاسس بخنقه
وحاسس بضيق
( دا فى المدونه بس )
لو سمحتوا
اللى شايف سبب لكدة يقولى
بالمنطق وبموضوعيه شديدة
واللى بيدخل يتفرج ويطلع ياريت يوضحلى رايه
لان رايه يهمنى ...
السؤال :
هو فيه ايه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الثلاثاء، 1 ديسمبر، 2009

لحظه من فضلكم

البوست الجاى هتكلم عن صورة
مجرد صورة
او بمعنى ادق هتكلم حواليها , مش عنها
لانها هى اقدر منى بالكلام عن نفسها
بتقول كتيركتير قوى
هتفكركوا بشىءشىء انتوا مجربتهوش قبل كدة
محسيتوش بيه
جايز
بس على الرغم من كدة هتفتكروة
كذكرى قديمه
مرت عليكم قبل كدة
:)
انتظروا البوست الجاى
او الصورة الجايه
بكرة ان شاء الله