السبت، 28 مارس، 2009

تعالى روق دماغك

_________________


اولا كدة وقبل كل حاجه

حزر فزر

مين الجعر اللى فى الصورة دة ؟؟؟


ثانيا اوعى تقفل الاغنيه اللى شغاله دى
لانها بتكمل البوست
ولو معجبتكش
او طلعت اساسا معندكش فكرة عنها
فغالبا مش هيعجبك البوست هو كمان .....
_______

مش عارف ليه كل مدى بتأكد ان الذاكرة البشريه مبتنساش موقف مرت بيه..
حتى وان اعتقدنا انه اتنسى واتمسح بتكون الحقيقه غير كدة , مجرد انه اترمى فى الريسيكل بن بتاع الذاكرة , بس مبيتعملوش ديليت , وممكن يتعمله ريستور تانى تحت ظروف معينه .
يعنى موجود , بس فى بدروم الذاكرة , او فى الصندرة , عارفينها ؟
اييييييييون الجزء الغامض فى البيت اللى محدش بيحس بيه ..
حاجه كدة مسميها نظريه الثقوب المنزليه السوداء
يعنى هتلاقى فى بيتكم اركان معينه وادراج مثلا متفتحتش من سنين واماكن احنا مش شاعرين بيها خاااالص , كأنها مش موجودة ...
بس ممكن فى لحظه تيجى تاخد بالك ,
ايه دة ؟
الدرج دة انا ناسيه من زماااان قوى , او الركن دة انا عمرى ما وقفت فيه , ياترى لما اقف فيه وابص لباقى الاودة , المنظر هيبقى عامل ازاى ؟؟
او الصندرة دى مطلعتهاش من سنه مش عارف كام ...
بس دة لا يمنع انها موجودة فعلا , بس احنا مش واخدين بالنا منها ...
بالظبط دة اللى بيحصل فى عقلنا , سواء كانت ذكريات سيئه جدا , فبننساها علشان متوجعناش , الا انها فى الحقيقه بتفضل موجودة وبتأثر على تصرفاتنا من غير ما نحس , او مثلا لو كانت ذكريات قديمه قوى , عمرها الافتراضى خلص واتكهنت فى اوضه فى بدروم ذاكرتك معشش عليها عينكبوت كبييييييير ..
ولو عملت ايه بالذى مش هتقدر تفتكرها , ولكن لو حصل حاجه تفكرك بيها او شفت شىء يتعلق بالحاجات دى , هتستفوجأ انها كلها مرسومه فى ذهنك بشكل فوتوغرافى مبهر ولا كأنك نسيت حاجه ( شوفتوا الاستهبال ) ....

علشان كدة احمد سعيد قال ( دا غير هانى نظيم ) ان مشكله الذاكرة البشريه هى مشكله القدرة على استدعاء المعلومات فى الوقت المطلوب , وليست مشكله نسيان على الاطلاق ....
ياما كنت عايز افتكر حاجه واضرب نفسى بالبرطوشه علشان افتكرها , ابدا ولا الهوا , بينما لما اجى انام مثلا الاقيها جت فى دماغى , بعد فوات الاوان طبعا , شوفتوا الغتاته ؟؟؟؟

طيب ايه موناسبه الكلام دة ؟
اقولكم
مين فيكم فاكر طفولته كويس ؟؟
طفولته يعنى قصدى اقدم ذكرياته لغايه اولى ابتدائى مثلا , يعنى ميجيش حد يقولى فاكر يوم ما اخدت الابتدائيه , انا قصدى على الحاجات اللى نسيتها سنين وحسيت انها جت فجأتا فى دماغك بدون سبب او رابط , يرافقها شعور غريب جدا زى شعورك بالظبط لما تلاقى حاجه عزيزة عليك كنت ناسيها فى نفس مكانها بعد عشرين سنه مثلا وتنفض من عليها كيلو تراب , والتراب يدخل فى صدرك وعنيك وهاتك يا عطس....

حد فاهم منى حاجه ؟؟؟

طيب انا هحاول اعمل زغزغه فكريه علشان افكركم ( طبعا بمرافقه زغزغه الاغنيه اللى شغاله دلوقتى , اوعوا تكونوا قفلتوها !!! )

ملحوظه : الكلام اللى جاى دة خاص بالجيل اللى قضى طفولته او مراهقته وشبابه فى التمانينيات او اواخر السبعينيات , يعنى مواليد 88 و 89 فصاعدا مش هيستفيدوا ولا هيفهموا حاجه من اغلب الكلام اللى جاى دة .....

طيب هتقولولى وانت مالك بااواخر السبعينيات يا جعر يامواليد 83 انت ؟؟؟
هقول لحضراتكم ,
لو تفتكروا زمان , مش زمان قوى يعنى , لحد عشرين سنه فاتوا كدة كان ايقاع الحياة بطىء , اقول بطىء وليس ممل , يعنى كان عادى جدا انك تسمع شريط نازل من عشر سنين كأنه لسه نازل النهاردة , والموضه كانت متبته ورخمه وبتقعد سنين علشان تتغير , وكدة يعنى...
يعنى ثقافه التيك اواى الفكرى اللى شغاله دلوقتى دى مكانتش موجودة ايامها ...
ولازم نفتكر شىء مهم , ان اهم واكثر 3حاجات عملوا انقلاب مجتمعى فى مصر ماكانوش موجودين اياميها , وهم الدش والكومبيوتر والموبيل .....
فدا يخلينى اقدر اخد شويه صور عن فترة تسبق طفولتى بشويه , مع انى ماعشتهاش بس اثارها وبقاياها فضلت موجودة وعشتها , ولما كان العبد لله ولله الحمد ذاكرته فوتوغرافيه , فيما يتعلق بالاحداث والاماكن , اما الاشخاص فبتنجانيه تماما , يعنى ممكن لو ابويا مشفتوش سنه وقابلته فى الشارع اقوله انت مين يا جدع انت ,
بجد على فكرة مش ببالغ ...
ومش هراعى الزمن يعنى هطلع من اواخر السبعينيات على التمانينيات فى وشك وانت داخل شمال بعد البنزينه علطول , وممكن يكون فيه لخبطه شويه فى الاحداث , فمش عايز حد غتت ييجى يقولى مش عارف ايه مكانش مش عارف ايه دا كان مش عارف ايه .
فهمتوا حاجه ؟؟
ولا انا

تعالوا شوفوا كدة معايا :
تبدا منين ياواد ياحكشه ؟؟؟؟ , نقول مثلا من اواخر السبعينيات
- انتفاضه الشعب ( مش الحراميه ) لسه ما اتنستش لغايه دلوقتى ولسه الناس فاكراها كأنها كانت حلم .
السادات ماسك البلد كشيخ منصر كبير , وبعد مشاكله مع اسرائيل وامريكا ماخلصت اتفرغ للبلد والشعب الوسخ علشان يعيد تربيته من جديد كشيخ بلد وكبير العيله...
قرارات عشوائيه , بل خياليه تطلع بين يوم وليله , ديكتاتوريه وقمع بس بالحداقه والنصب ( كله بالقانون وبسيادة القانون على رأى البيه ) , نكت كتير بتطلع عليه على شرب كبير العيله الحشيش والافيون , ماحدش عارف اذا كانت احداث حقيقيه ولا نكت بس .
جى جى هانم ممشيه البلد على كيفها تشيل فلان وتعين علان , دوله العلم والايمان فى قمه ازدهارها , موجه من الاسفاف والابتذال والغش طالت كل شىء فى مصر ( من توابع الانفتاح ) انتشرت السينما الاستهلاكيه ومنتجين اصلهم كفتجيه ( زى السوبكى كدة ) ...
شوارع مصر والاقاليم بصفه خاصه اصبحت خاويه على عروشها , شوارع كتير ممكن تلاقى عمارات وبيوت كامله فيها مقفوله , يعنى شارعنا مثلا كان مافيهوش اكتر من عشرين تلاتين اسرة بالكتير , والباقى كله خلع عالخليج , شقق وبلكونات وعينا عليها مقفوله واتصورت فى عقلنا كدة , وكان احساس غريب جدا لما لقيناها بتتفتح وبيتشال من عليها التراب لاول مرة فى فترة التسعينيات ...

اللبس , اةةةةةةةة وما ادراك ما اللبس , البس اللى يعجبك مع مراعاة الاتى :
اولا لازم تكون رجل بنطلونك اوسع من ميدان روكسى , وتكون ياقه القميص متفصله من 10 متر قماش على الاقل , وياسلام لو كانت من قماشه تانيه ولون تانى غير لون القميص ومالوش اى علاقه بيه , ولازم تكون الالوان فاقعه قوى ومتناقضه , يعنى تعمل حفله الوان فى هدومك , طبعا مش هوصيك على المشجر والمخطط , يعنى من الاخر كدة قلد سمير غانم فى افلام اواخر السبعينيات , طبعا كل ماسوالفك كانت اكبر واعرض كل ماكونت واد امور ومز , المثل الاعلى فى الموضوع دة , محمود ياسين طبعا , شعرك لازم يبقى منكوش ومكلكع كانه مقلب زباله بالظبط , اما الشنب فمش هوصيك , طبعا مش هننسى البلوفرات الصوف الكت ( مش عارف اسمها ايه ) ...

- الفن , طبعا كانت قصه شرايط الكاسيت لسه جديدة فى منتصف السبعينيات تقريبا , وكان اصدار شرايط كاسيت لمطرب يعتبر مخاطرة , طبعا عادا البومات فريد وام كلثوم وعبحليم بتاع شركه صوت القاهرة ذات الشعار الغبى , واللى كانت مغرقه البلد ساعتها , طلع عمك محمد منير بشريط , واتسك على قفاة سكه محترمه والشريط فشل , فبلط فى الخط ومظهرش تانى الا بعد فترة ....
بعدها بشويه جه مجموعه شباب وقرروا انهم يخوضوا التحدى , وكانت اسمائهم كالاتى : ايمان يونس ( اول صوت انثوى فى ذاكرة العبد لله ) , تحسين يلمظ , هانى شنودة , عمر جوهر .
وعمر جوهر دة اللى هوة عمر فتحى , المطرب اللى ظهر اياميها والناس حبته , بينما صب عليه النقاد جام غضبهم واتهموة انه بيدعى المرض علشان يقلد عبحليم ويكسب تعاطف الناس , ولكنه بعد فترة بسيطه مات فعلا ( بالقلب على ما اعتقد ) واتكتم الكل ....
الفريق دة اسمه المصريين , طبعا كلكم عارفينه
القدام عارفينه من اغانى الشوارع حواديت وماما ستو وفى يوم 8ديسمبر من عام ( 1977)
والجداد عارفينه برضه من اغنيه ماشيه السنيورة 1985
الشريط الاولانى اللى هو (بحبك لا ) , كسر الدنيا ونجح نجاح هايل , ودى كانت البدايه لغزو عالم شرائط الكاسيت , وطبعا من باب التأمين والضمان كانت الاغلبيه العظمى من المطربين اللى جم بعد كدة بتفضل تكوين فرق كامله بدلا من تجربه البوم المطرب الواحد الفاشله اللى اتلسع منها اونكل منير ...
وظهر فرق زى الاصدقاء وفرقه محمد نوح ( مش فاكر اسمها ) وغيرهم كتير..

طبعا كانت البضاعه اليابانى مغرقه البلد , يابانى على اصله , مش صينى , مكانش فى حاجه اسمها صينى وتايوانى وابصر ايه , عادا اطقم السفرة بس , فاكرين كاسيت الناشيونال الشهير , ابو واجهه بيج وسماعتين سود , اللى كان تقريبا فى كل بيت , حاجه محترمه ومافيهاش حته بلاستيك واحدة عادا الوش ....

- المشروع الاستثمارى الناجح والاشهر هو محلات الالكترونيات , انتشرت انتشار غريب , دايما نفس الهيئه , محل صغير مجهول الملامح , ذو واجهه زجاجيه صغيرة ومتسخه للغايه , مترصص بداخله اكوام من النفايات الالكترونيه التى توحى انها كانت اجهزة فى يوم من الايام , بنك عريض مليان قطع غيار ومفكات وافوميتر ضخم , الصفه الوحيدة ان كل حاجه بتبقى وسخه وعليها تراب ومتعاصه شحم , مش عارف ليه ..
- صاحبنا غالبا بيبقى كفتجى ومقضيها بالدراع والفهلوة ولا بيفهم فى حاجه , وبيتعلم فى حاجات الناس , وتلاقيه لابس نضارة وشايل شنطه وسخه جدا ومربطه بخيط او بحبل , دى اللى هيا شنطه العدة , اما عن الاختصاص فحدث ولا حرج , كاسيتات ورداوى ماشى , تليفزيون شغال , غساله خلاط سخان بوتجاز ينفع برضه , ماهى فهلوة بقى ..

اصل الاجهزة اياميها كانت بسيطه وسهله وحجمها ضخم , وغالبا اول لما بتشوف صاحبنا بتحترم نفسها وتشتغل تلقائيا , بدل الفتح واللعب والبهدله , الطيب احسن .

- الفيديو كان لسه حاجه جديدة لا توجد الا فى بيوت عليه القوم , حاجه كدة بالالافات , جهاز ضخم وتقيل , كله حديد فى حديد , يابانى طبعا , مليان زرارير كتييير , الشريط مش بيدخل فى فتحه زى محنا عارفين , لا دا ليه باب بيتفتح ويتحط فيه الشريط تمام زى شريط الكاسيت , وكان يشغل اوسخها شريط , حتى لو حطيت البكرتين بس من غير علبه , هيشتغل برضه , يابانى بقى , وطبعا برضه الماركه المعتمدة اللى هى ناشونال , ناشونال بس من غير باناسونيك ( قبل الدمج يعنى )..

- طبعا المشروع التانى الناجح هوا مشروع نوادى الفيديو , افتح اى كشك تحت بير اى سلم وسميه حكايه مثلا او اى اسم شاعرى او حتى غبى مش مهم ..
مش هوصيك على الافلام الهندى , دى المادة الاساسيه او قل الوحيدة , بجانب المصارعه , ولو انت زبون قديم ومظبط الباشمهندس , مافيش مانع ياخدك ويفتحلك درج كدة مستخبى فى الجنب , ويخبطك شريط من اللى قلبك يحبهم , بتوع سيدة الاقمار السوداء , ولا ذئاب لا تاكل اللحم , ولو انتا سافل قوى يبقى مش خسارة فيك هويدا والرسام ( من كلاسيكيات السينما اللبنانيه ) , وعيش بقى يامعلم , بس خلى بالك لحسن الحاج يقفشك وياخد منك الشريط , اة اصل الشرايط غاليه قوى , وهتدفع عوض مبلغ محترم , دا غير انك هتنكرش ومش هيتعامل معاك تانى , وحلنى بقى على ما تظبط صاحب نادى فيديو جديد ويثق فيك ...

- نيجى بقى على التلفزيون وسنينه , الحاجه الوحيدة اللى كانت بتجمع مصر كلها , طبعا مافيش دش , ولا قنوات اقليميه , اخرك الاولى والتانيه , الاولى شغاله افلام عربى ومسلسلات ونشرات اخبار , والتانيه مقضياها افلام اجنبى ومسلسلات وعالم البحار ( قصدى عالم البخار ).
ناخدها كدة واحدة واحدة , فاكرين مسلسل ميزو ؟
ايون بتاع مييييييييييييييييييييييييييييييييييزوووووو ,
هو دة
- وبرج الحظ بتاع شرارة , ودخلنا بعدها فى موضه مسلسلات حسن عابدين ايام عزة ,
- فاكرين مسلسل ( فيه حاجه غلط ) بتاع الكائنات الفضائيه ..
- وبعدها فاكرين مسلسل عيله الدوغرى ,
- ابو العلا البشرى ,
- وفى المشمش ( هما اللى قالولى ) ,
- احلام الفتى الطاير ( ابراهيم الطاير ) الشهير بعادل امام ,
- ليالى الحلميه الجزء الاول ايام ماكان يحيى الفخرانى وصلاح السعدنى لسه عيال صغيرة بيجروا ورا بعض بالطرابيش فى عزبه الباشا ...

نخش على المسلسلات الاجنبى , نوتس لاندنج , ميردر شيروت ,
ثم المسلسل الاغتت فى التاريخ ذابولد اند ذابيوتيفل ....

واذا ذكرت المسلسلات الاجنبى كان ولا بد ذكر برنامج اخترنا لسيادتك مساء الاربعاء على القناة التانيه , يبدأ بشويه اغانى من بتوع البونى ام والدولى دوتس , فاكرينهم , ايون (البونى ام) مش (الفور ام ), والدولى دوتس شويه البنات الطوال اللى شعرهم اصفر ولابسين لبس دهبى , ربنا مباركلهم عالاخر( مزز مزز الصراحه ) , فاكرين اغنيه ( ليلى ) اللى كانوا عاملينها واللى كانت مسمعه جامد فى مصر , وصاحبنا اياه اللى ادعى انهم سارقين اللحن منه .
بعد كدة يفقعوك فقرة من فقرات الساحر اللوذعى ديفيد كوبر فيلد , اممممممممم ممكن مثلا النهاردة بنط فى فرن صهر حديد او يخترق سور الصين العظيم , او يخفى مكوك فضاء , او يخلى مصر بلد ديموقراطى ,
هههههههه صعبه دى شويه , مش كدة ؟
خلاص فككم من اخر نقطه , بلاها ناديه بلاها سوسو , احسن بعدين يهود خيبر يزعلوا .
ونختم البرنامج مع حلقه من المسلسل الشهير ماجيفر , الواد الكفتجى اللى يخترع ويهندس حاجات غريبه فى الوقت المناسب , بأم القصه اللى نازله على عنيه ,
وطبعا لا ننسى المهمه الصعبه فى اجزائها الاولى , شويه الشباب السيس والبنات المزز والراجل الكبارة ابو شعر ابيض اياة , اللى بيطلعلهم فى الجهاز الصغير اللى بيلاقوة متخبى تحت الترابيزة رقم 56 فى النادى , ويقولهم :
قوقه ابو برقوقه , ديكتاتور فى احدى دول العالم الثالث , استولى على الحكم وقتل الملك بشطورش ورمى ابنه ولى العهد فى سجن تحت الارض فى مكان مجهول فى قارة اسيا , مهمتكم لسع قوقه بالمعلقه السخنه فى منطقه حساسه واطلاق سراح ابن الملك بشطورش واعادة عرشه اليه .
هذا الجهاز سوف يفجر نفسه تلقائيا بعد عشر سنين , تشششششششششششششش , بووووووم .

- البرنامج الاشهر اوسكار يوم الخميس بالليل , والفيلم الاثرى اللى هيجيبوه لنا النهاردة هوة فيلم كزابلانكا مثلا , او ذهب مع الريح وهيكمل نص الفيلم التانى الحلقه اللى جايه طبعا , او مدافع نافارون , او الهروب الكبير , او احد افلام المبدع هتشكوك , سيكو مثلا او النافذة , يخنق اهلك نص ساعه فى احداث ممله لحد ما يزهقك ويخليك تنام ويقوم خابطك الرعب على حين غرة ...
ما فيش مانع برضه من بعض افلام نورمان ويسدم ( اللى كان بيقلدة ممثل مصرى شهير للغايه ) ..

وعلى اى حال ممكن الفيلم لو مجاش يوم الخميس تشوفوة يوم الجمعه الساعه 3وعشرة العصر على القناة التانيه بعد موجز الانباء اياة ...

- برنامج باروراما فرنسيه بتاع المذيعه الامورة اللى مش فاكر اسمها ( اصلى اياميها عينى كانت زايغه قوى ) والفيلم الفرنساوى السخيف المعتاد ....

- لازم اصحى يوم الجمعه الصبح علشان اشوف سينما الاطفال الساعه عشرة وتلت على القناة التانيه
سينما الاطفال سينما , سينما الاطفال سينما , فيها حقيقه وفيها خياااااااااااااال , سينما الاطفااااااااااااااااال .
واذا ذكر الاطفال ذكر كارتون جرندايزر بتاع يوفو غزاة الفضاء ,
- وحبيب قلبى مازنجر , يطلع ابو الغضب بالعبايه السودا اياها والعصايه الابنوس ويلعن سلسفيل ابو المزدوج الفاشل , ايووة اللى نصه راجل ونصه ست ولابس زعبوط ازرق , وحاضر معاليك انا هنسفلك ماهر دة , يطلع الوحش الجديد وتحت منه كتابه يابانى طبعا مافيش اى حد فاهمها , ويشرح فى مواصفاته من انه بيعوم فى البحر ويحفر بطن الارض ويطير فى السما ويعمل اعاصير وزوابع ويختفى كمان , وكالعادة تبدأ المواجهه ما بينه وبين فاتن وهى راكبه افروديت , الاله المفتكسه اياها اللى بتضرب الصاروخين السيلكون اللى حيلتها وبعدين يمرمط بيها الوحش الارض كالعادة برضه انتظارا لمجىء مازنجر علشان ينقذها ويدمر الوحش ....
حمام السباحه ينفتح وينزل ماهر بالطيارة الحمرا فى راس مازنجر ويبدأ فى التحرك ,
دج , دج , دج , دج , دا صوت رجليه وهو ماشى بيرج الارض , وطبعا بعد خناقه محترمه مع الوحش , يرزعه بالقبضتين المدمرتين وبعدين الاشعه بتاع عينه ويخلص عليه خالص بالاشعه البنفسجيه اللى طالعه من صدرة ..

مازنجر , مازنجر ,
البطل الشجااااااااااع ,
بقواة الجبارة يحارب الاعداااااء ,
مازنجر يحارب فى البر او فى المااااااااااء ,
اطلق الصاروووووووووووووخ ,
لقد حااااااان الوقت , قد بدأ النهااار , تهيأ , تحضر لاطلااااق النااااااااااار ,
مازنجااااااااااار زد .....

طيب , فاكرين دة :
كعبول كعبول الكلب الكسول ,
يدفع عبقرينو المخترع المشغول ,
القط المشاكس القط المشاكس, من يهوى الدسائس , من يضع المقالب ,
معنا باستمرار فى هذة الحلقات , يدعون الصغار فى كل الاوقات ,
هيا يا اصحاب , هيا مع كعبول , نجتاز الصعاب , نتحدى المشاكل ....

اخر مسلسل كارتونى تابعته قبل ما اتفطم كارتونيا واكتفى بتوم وجيرى وقرايه ميكى وسمير , كان مسلسل بابار ,
بابار فيل , خرطومه طويل ..
فاكرينه ؟؟
اللى امه قتلها صياد وهو صغير , وقعد طول عمرة يحكى لاولادة مغامراته مع ملك الخراتيت .

بعدها دخلت موضه مسلسلات الكارتون العاميه , بزعم من واحد معتوة ومتخلف عقليا من رجاله موافى قرن التيس , قال ان مسلسلات الكارتون لما بتكون بالفصحى الاطفال بيتدايقوا منها ومش بيفهموا حاجه !!!!!
وبدأت بكارتون الفواكة وبعدين شاركى الدرفيل .....

- ندخل على الاعلانات , وانا متوصاش فيها لانها كانت بتتسجل على شرايط وتتذاع بالترتيب , فالمتابعين اللى زيى كدة كانوا بيعرفو ايه الاعلان اللى عليه الدور , دا غير انها كانت اعلانات لذيذة ومرحه , يعنى ممكن تتابعها لوحدها مش ممله وسخيفه زى بتوع 199 جنيه مصاريف شحن واشترى اللبيسه الذكيه اللى تدخل الجزمه فى رجلك لوحدها ....
طيب ركزوا معايا كدة فى اللى جاى دة :
كنت فاكر واحدة قليييييييطه قوى , كانت بتعلن عن مطهر تواليت ومعطر باين مش فاكر , كانت تيجى بكل الاطه وتقول :
- اننننننننننننا , احط ايدى فى التوالييييييييت !!!!!!
وواحد تانيه كنت بحس انها مريضه نفسيا , كانت تيجى تقول :
- تخلللللللللص من حمامك القدييييم , انننننسف , بوووووم , لقد حان الوقت , لجرافيييييينا ...

- الراجل ابو فانله وكرش كبير وشنب اياة بتاع قبنورى
القبنورى المونيوم ,
اطلب منه بالتليفون ,
القبنورى بييجى فى يوم , بقى بالتقسيط , تقسيط تقسيط ,
القبنورى سبع الوان , احمر ازرق فضى كمان ,
بقى بالالوان , الان الوان الان الوان ....

بقولك هيجوزونى
وفيها ايه يعنى
انا برضه هتجووووز ؟؟
انا مش شااااايف بروبليم
واجيب جهازى منييييييييين ؟
ماعندك جهاز العروسين
عبد الرحيم عمرو , اذن احتكم الامر


بودى بودى بودى , بودى بودى ,
بودى بودى بودى , بوووووودى ,
بودى بودى بودى بودى فستانى مالعبوووودى ,
بودى الفستان والطرحه , بوووودى على احدث صيحه ,
بوووودى والكل قالولى اصل اللؤلؤ واللولى ,
حلوةةةةةةةةة , عروسه العبودى....

يام جمال حلو المش عارف ايه , يام الشعر طويل مش عارف ايه , حنى جمالك حنى مش عارف ايه نورك تاجك كاالوراق ( حد فاهم حاجه ؟ ) حنه الشعر خمس خمسات , وتلاقى مشهد واحدة راكبه حصان وشعرها بيجرجر فى الارض ...

نرجع ورا شويه ايام ماكانت شويبس مغرقه الدنيا , قبل ما تقفل وتفتح تانى مؤخرا , اعلانات سر شويبس بتاع حسن عابدين اللى عمر ما حد عرف السر دة ايه :

عمك حسن لابس البدله الحمرا بتاع الحرس الانجليزى وبيقول :
الجماعه دول محرضين عليهم انهم يرمشوا , بس انا هعرف اخليه ينطق , ويقوم مورى اللى جنبه قزازة الشويبس اياها , ويخش صوت المعلق : عجبا , فواكه طبيعيه محتفظه بثراء من البقاليل المنعشه , ويقوم عم حسن يقول , ولما لقيت مافيش فايدة , قلت اقوله نكته من بتوعنا ( ايام لما كنا لسه بنقول نكت ) فيقع الحارس بجوارة على الارض من كتر الضحك ....

فى واحدة تانيه :
عزيزى الدوق
نعامين
انى اشتاق لهذا المشرووووب الذى يحتوى على البقاليل المنعشه
اشربى يا مرجريت واروى عطشكى وخبرينى عما تشعرين به
مارجريت
افصحى لى عن سر شويبس يامرجريت
انى اتوسل اليكى

واحدة تالته :
حسن بيييبى
ياعيون حسن بيييبى
مش هاتقوليلنا على السر بقى يا سوووو؟؟؟
بلاش كدة يا سوووو
علشان خاطرى ياسوووو

الله يرحمه

- اعلانات بطاطين ساراتوجا فى الشتا ( ايام لما كانت الدنيا بتشتى فى الشتا ) واعلانات الواد كان عنده حق , عارافه الجاااااااااااااااااامع .....

افتكرت كمان اغنيه ابريق الشاى
انا انا انا , ابريق الشااااى , ايدى كدة بوزى كدة اصب الشاى , وارجع كدة , واعرف برضه ياكتاكيت احكى حوادييييييييت ...

وفيه برضه اغنيه حافظها من ساعتها , طبعا حافظها غلط , بس انا كنت بسمعها اياميها كدة ( ومازلت ) :
بولا بولا باروم بله , ادينى سفايه وارمى الفله , بولا بولاااااااااااااااا , باروم بله ..
بيتك ياعصفورة وييييييييين , مابشوفك غير بتطيرى , ما عندك غير جناحيييين حاكى له كلمه صغيرة , لو سئلونا بتقيله , ما حكتنا العصفورة , طيرى طيرىىىىىىىىىىىىى , يا عصفورة .

- شرايط الاطفال بتاع عفاف راضى , سوسه سوسه , ويلا بينا ياله ياله يلاااااا يلا بينا , كنت بحب الاغانى دى قوى بس كنت بخاف من البوستر اللى على الشريط , كنت بترعب وبعيط كمان , مش عارف ليه كنت بخاف من اى صورة مرسومه وبعيط , ابويا صحى فى يوم لقى الشريط وملقاش العلبه , وطبعا ماحدش يعرف مصير العلبه بعد ربنا غيرى , ههههههههههههههه ....

- فاكر عمو عوكل ايام ماكان لسه بيلبس بدل صيفى غزل المحله ( بتاع التمانينيات ) قبل ما ينضف ويلبس بدل , وفاكرين طبعا اللبس الفلح اللى مراته كانت بتلبسه ( ومازالت ) , وقلق الامن المركزى , وحزء التجول , بس بصراحه انا كنت فرحان قوى ان الشوارع فاضيه ......
طبعا مصر كانت حاجه تانيه ...
كفايه انه فكرة الكبارى كانت فكرة جديدة والميكروباصات كمان مكانلهاش وجود , بس التاكسى المهكع واتوبيس النقل العام الازرق .
تخيل مصر بدون كبارى او مترو انفاق او ميكروباصات , ولاحظ ان مش اى حد يبقى صاحب عربيه ملاكى , لان الناس اللى كانوا فى الخليج مكانوش لسه رجعوا , يعنى علشان يبقى عنك عربيه كان لازم تبقى ابن باشا او اقطاعى قديم .....
يعنى البلد كانت روقااااااااااااااااااااااااان ( نسبيا طبعا )...

امشى فى اى حته فى الشارع تسمع سمير الاسكندرانى ( العميل المزدوج ) بيجعر فى كل قهوة وعند كل حلاق , مش عارف ليه صراحه , بفرقته العجيبه ذات العبايات البيضا , بيفكرونى ببتوع الزار , وهو الصراحه كان مميز , كان بيميز نفسه بالعبايه البنى والسكسوكه السودا اللى فيها خط ابيض بالطول من النص ....

الرياضه المميزة كانت لعب البلى (الطزازيظ ) والكورة , الطيارات كانت فيلم وفن معقد للغايه ولها قواعد واصول , ان شاء الله هبقى اعملها بوست لوحدها ( على اعتبار انى كنت طيار قديم وفخم ( بكسر الفاء والخاء) ونفسى ارجع تانى , بس خايف الناس تضحك عليا وتقول العبيط اهو ) .
- لعبه الاتارى مشروع ناجح برضه , تروح عند الواد زيكه الفاشل فى الكشك اللى هو عامله وناصب قدامه معدات الاتارى الضخمه اياها والدراع الاسود الكبير اللى دايما يبوظ , وانت وشطارتك , تلعب القلعه ولا طيارات ولا علاء الدين ...

افتكر ان الحاج سخنت فى دماغه مرة وجاب لنا كومبيوتر
حاجه كدة ملهاش علاقه ببتاع دلوقتى
كومبيوتر اسمه صخر!!!
الجهاز عبارة عن كيبورد بس ,
الشاشه ملهاش وجود لان انت بتوصله بالتلفزيون ,
اما الالعاب بتبقى متسجله على شريط كاسيت , اة كاسيت حتى ساعات كنا بنمسحها ونسجل عليها اغانى من اذاعه البرنامج الموسيقى , او البرنامج الاوروبى .
وفيه جهاز زى الكاسيت بالظبط بنحط الشريط فيه ونوصله بالكبيبورد وندخل المعلومات ونستناة نص ساعه يحمل
وبعدين اللعبه تشتغل , قمه التكنولوجيا ....

كنت برضه افتكر برنامج اسمه تكنولوجيا كان بييجى بتاع واحد مهندس مش فاكرة , وحيث انى كانت ميولى علميه قبل ما اتصدم بمنهج الكميا والاحياء والفسيا بعد ما كبرت واقلب ادبى , فكنت من متابعين البرنامج دة , اذكر انه اتكلم على كوابل الالياف الضوئيه ( الفيبر ) قبل ما تدخل مصر باكتر من عشر سنين ,
عمار يا مصر!!!! ....

المصايف , طبعا مافيش حاجه اسمها البحر الاحمر ولا شرم ,
الغردقه ممكن , بس دى بتاع السياح المعفنين بس
احنا بنروح عروس البحر الابيض
ايه ؟؟
اسكندريه ؟؟؟
لأ طبعا
راس البر, وما ادراك ما راس البر, بتاع عليه القوم , ممكن تروحوا بلطيم او جمصه , بس اسكندريه مش قد كدة
راس البر كانت امله
تروح تحجزلك عشة او بيت دور واحد , اعلى بيت كان دورين وبسلم خارجى ...
ولو قعدت على بعد عشرة كيلو من البحر برضه هتشوفه قدامك .
البلد فاضيه وكلها رمل ومافيهاش غير شارع متسفلت واحد , اللى هو الشارع الرئيسى .
وراااايقه ( ماكانوش السواقين لسه عرفوا مكانها ) وكانوا سواقين الميكروباص لسه مدخلوش حيز الوجود علشان ياخدو الوليه والعيال والتباع ووابور الجاز وفردة الكاوتش القديمه بتاع الميكروباص ويروحو بالميكروباص يوقفوة على البحر ويتصوروا جنبه وبعدين يعلقوا الصورة على ضهر مسند الراس بتاع الكرسى السواق ...
هما مرتين بس رحتها , مصيفتش بعدها نوهائى , مرة سنه 86 ومرة سنه 88 , ودى تهت فيها ولاقونى بمعجزة ..
ودى كانت اخر مرة اشوف فيها حاجه اسمها بحر
( طبعا باستثناء سفرى اسكندريه , شغل مش مصيف , بعدى من جنبه كدة ) ....

الاغانى يامعلم :
- عمرو دياب لسه جعر وشعرة منكوش ولبسه زباله , قبل ما ينضف , بس كانت اغانيه جامدة برضه , وسميرة سعيد مطربه الاجيال مبترحمش من يومها , ونجم الشباب على حميدة باغنيته اللولبيه اللى كسرت الدنيا وخلت المنتج يتجنن ويخش السرايا من كتر الارباح , دة كان على حميدة قبل الفضيحه اياها , من الاخر فى اى حته هتسمع الاغانى دى :
- لولاااااااااااكى لولا لولا لولا

- ارجوك اوعا تغير , دنا حواليه كتيييير

عمنا حميد الشاعرى مكسر الدنيا :
- انا قلبى طاير فى سماااكى اة ياليلى ياعيييين

- طبعا غريب , غرييييب غريييب , ومحيرنى , ليلى ونهارى مسهرنى .
وطبعا طنط منى عبد الغنى :
- مش حلو خصامك ولا كتر سلامك , ماتحن شويه , دا الهوا حنيه .
اونكل منير كان حفظ مكانه واترستق من فترة ...

والواد الرخم بتاع ططش ططش وود , دا جمالك فرى فرى جود ..
-انا بحبك وغيرك انتا نو بدى , تهجرنى ليه وتحب بعدى سم بدى .
ببدلته الصفرا الشهيرة
المطرب ابو دقن الشهير ب ( حسام حسنى )
مش عارف بيفكرنى بالحلاق اللى كان بيجزلى الفروة زمان ....

الراديو بقى حبيب قلبى
برنامج قطوف الادب من نوادر العرب بموسيقاة المميزة
برنامج ابله فضيله , ياولاد ياولااااااد , تيت تيت تيييييت , تعالوا تعالوا
مسلسل عجبى بتاع حسن عابدين
قااااااااال الفليسوف ( اة الفليسوف حد عندة اعتراض؟ )

برنامج 150150 مش عارف كام اذاعه
بتاع الفزورة
حلها تكسب جايزة ماديه ضخمممممه
قدرها ,
خمسووووووون جنيها
ياترى مين اللى سرق خزنه الشركه ؟؟؟
عم عبدة الفراش؟؟
ولا الاستاذ متولى الصراف ؟
ولا الباشمهندس حمقه صاحب الشركه علشان ياخد التأمين ؟؟؟
وفى النهايه تكتشف ان المخرج هو اللى سرق الخزنه !!!!

- وحيث انى كنت بحب الفضايح , قبل ما ربنا يتوب عليا
واذا ذكرت الفضايح
ذكر برنامج اعترافاااااااات ليليه
البنت تحكى قصه الواد اللى غرغر بيها
وابوها يطلع بالصدفه بيسمع الراديو فى الاودة اللى جنبها
ويكتشف ان اللى بتتكلم دى بنته
يجرى على المطبخ يجيب السكينه
ويروح علشان يدبح بنته وهى بتتكلم فى التليفون على الهوا
والام من ناحيه والمذيعه من الناحيه التانيه يسلكوا من عندهم
والمستمعين يبرقوا ويزبهلوا
لغايه ما امام مسجد اتصل بالمحطه ومسح بيهم الارض على الهوا
وقالهم ان دة حرام وفيه جهر بالسوء
واتلغى البرنامج من يوميها
بلا اسامه منير بلا نيله
البرنامج دة كان التوب ....

اممممممممممممممم

انا حاسس انى طولت قوى

معلش اصلى كنت فى حاله شلل كتابى بقالى فترة
واول لما ربنا فرجها نسيت نفسى فى الكتابه

بالظبط زى البهيمه كدا لما تحبسها فى الزريبه وبعدين تطلقها تطلع تجرى وتبرطع
( دا البهيمه يعنى )..

كفايه كدا بقى

فيه كمان لو عايزين على فكرة .......

الجمعة، 27 مارس، 2009

كرسى فى الكلوب


صراحتا يعنى

انا كنت متعود انهم يعملوا فوتوشوب لصور عوكل قبل ماتطلع فى الاهرام

شويه لعب وتقييف يخلوة ولا فى تالته تجارة

يعنى الصورة بتطلع اخر غندرة لشاب فى ربيعه العشرون

وشوفوا انتم بقى الشايب لما يتغندر

( احضرينا ياابى اللى يكرمك )

دا لو مريحوش نفسهم وجابوله صورة من سنه 82

اييييييييييييييييييون

هى دى

الصورة اللى اتصورها بعد اول عمليه زرع فسايل

قصدى زرع شعر

فرحان بقى بالقصه والبدله الجديدة بعد ما ربنا تاب عليه من البدل الصيفى بتاع غزل المحله


طيب ماشى


ولما يطلعوا امنا الغوله

بدل مرضعه الاشرف قايتباى


تنقلب بقدرة قادر غادة هيفاء

ذات الثمانيه عشر ربيعا

دا غير الباروكه و...........

وحاجات تانيه



ماشى برضه



وكمان يطلعولنا صورة اونكل موافى قرن التيس فى عز شبابه

ويرجعوة لايام الشقاوة وكاميرات التصوير وكابريهات بعد نص الليل ايام الستينات


ماااااااااااشى برضه



انما حصلت كمان العدوى تمتد لكرسى عطا الله

حتى انت يا كرسى ؟؟؟!!!!

ناشرين له صورة النهاردة فى الاهرام انما ايه

موووووووووز مووووووز موز

قمر ياخواتى

شوفوا البرائه

والابتسامه العريضه

تبان من تحتها السنان اللولى

لا والشعر الحرير
اسوووووووود

فحمه

وساااااايح

ونااااااايح


وعاوجلك راسه كدة ربع عوجه
بمنتهى الرقه والدلال

وبيبتسم فى خباثه ومياصه

كانه بيقول

موووووووتوا بغيظكم ( على رأى واحد صاحبنا )

انكل عوووكل راضى عنى

وهفضل قاعد على قرابيزكم ( جمع اربوز )

لا وبدله ايطاااااااااااااااالى

وكارافيته

كارافييييته جنان الصراحه

( حلوه كارافيته دى )




الا اى صحفى يقولنا يا اخوانا



هما بيستخدموا الفوتو شوب فى الحركات دى برضه

ولا بيريحوا نفسهم ويجيبوا نقاش بدل الماكير

ولا بيستخدموا برامج اكثر تطورا من الفوتو شوب ؟؟؟

على اساس تلائم الباب العالى

وتحوق ولامؤاخذة


ماهو على راى المثل


ايش تعمل الماشطه فى الوش العكر



اكيد برنامج تانى اقوى واشد


علشان سحنتهم تبقى فوتوجونيك





واذا كان رب البيت بالصورة لاعبا


فشيمه اهل البيت كلهموا الفوتو

الخميس، 26 مارس، 2009

حبايبى مشايخ الطرق والكبارى

عمبيجولم النهاردة فى الجورنال قال ايه :
ان مشايخ الطرق الصوفيه فى مصر بيعلنوا عن رفضهم للاضراب يوم 6 ابريل وان تلبيته فيها خروج عن الشرعيه المهلبيه , وناشدوا الاخوة ( المريدين ) انهم يتصدوا للاضراب ويجهضوة , وان الداعين للاضراب خوارج وزارعوا فته , قصدى فتنه بين الشعب والحاكم ....

طيب


برضه علشان مكونش ظالم

انا مش متأكد انكم قولتوا الكلام دة

لانى مسمعتوش منكم بودانى

قريته بس

لو كنتم مقلتوش كدة , يبقى اسحب الكلام اللى هيتقال تحت دة


اما لو كنتم قلتم كدة


فاحب اقولكم


بكل صراحه


وبكل وضوح


وبكل ود


وبكل احترام

:
:
:
:
:
:
:
:
ينعل ابوكوا

ينعل ابوا اللى يحترمكم

ينعل ابو اللى يمشى وراكم

____________

شكرا......

السبت، 21 مارس، 2009

فلحسه فلسفيه



لا اعرف لماذا اعانى حاله من الخواء النفسى هذة منذ عدة ايام , ولا ادرى ايضا سر هذا النفور المفاجىء من الكيبورد ( باعتبارها بديل عصرى عن الورقه والقلم ) , انا واثق ان السبب ليس الشح الفكرى او النضوب العقلى والحمد لله .
قد يكون شيئا من اليأس؟؟؟
ربما فهو لا بد ان ينال منا احيانا ولا مفر من لدغاته المؤلمه , تماما كالبرد , لابد من ان تمر به يوما , ياتى بدون سبب ويذهب ايضا بدون سبب , بصرف النظر عن كل سفسطات التعرض للتيارات الهوائيه او ادويه البرد التى لا تسمن ولا تغنى من جوع , ولكن يبقى علينا مقاومه هذا اليأس الى ان يذهب بعيدا عنا مؤقتا , استعدادا للجوله القادمه .....

لذلك سأحاول ان اتعامل مع تلك اللوحه , لن ارتب افكارا معينه لمناقشتها , ولن احدد عناصر مرتبه للنقاش , كما افعل دائما , وكما اسير حياتى ايضا بذلك النظام المطلق الدقيق للغايه ( والذى اعتبرة قد وصل الى مستوى المرض ) , فقط سأكتب , ابدأ بشد طرف خيط من تلك الكتله الضخمه من الخيوط المتشابكه فى عقلى , انا وحظى , قد يكون الخيط قصيرا فلا يزيد البوست عن عدة سطور , وقد يكون طويلا فيتسع مجال النقاش ....

ينساب صوت ( محمد سالم العجوز ) الى اذنى , ذلك الرجل الذى له من اسمه نصيب وافر , فقد شهد بأم عينيه محمد على بشحمه ولحمه , الى ان توفى فى اوائل القرن العشرين , تلك الاسطوانه بذلك الصوت المميز ( للخشخشه ) والذى يدركه جيدا السميعه المحترفين ويستمتعون به ايما استمتاع ( لست منهم فأناهاوى فقط ) ...

ليكن كلامى عن .................. عن القضيه الكبرى , اتدرى ما هى ؟؟؟؟
نعم؟؟؟
كلا يا سيدى ليست قضيه ممدوح اسماعيل
ولا قضيه الظاهرة الفريدة المتمثله فى الشعب المصرى وحكومته الفذة
ولا قضيه فلسطين
كل هذة عبارة عن فرعيات وقصاصات صغيرة فى ملف القضيه الاساسيه ...
قضيه ادم وبنيه ( اللى هم احنا واللى جم قبلنا واللى لسه فى علم الله )...

-- لماذا خلق الله الانسان ؟؟؟؟
يجيبنى صوت قائلا , بالله عليك , اقرأ القرأن اخى , اما سمعت قول الله عز وجل ( وما خلقت الجن والأنس الا ليعبدون )؟؟؟؟؟
- نعم اخى سمعته جيدا وقرأته , ولكن لأكون اكثر ايضاحا , لماذا استخلف الله الانسان على الارض , وما هو جوهر الخلافه ؟؟؟؟
- بالطبع ليست العبادة هى الاساس , اينعم هى من الاسباب والتكاليف , ولكنها ليست الاساس بالتأكيد , وألا لكان الله عز وجل استخلف الملائكه , فهم اكثر طاعه من بنى ادم , او حتى اى شىء اخر , فالجماد والحيوان والنبات يذكر الله اكثر من ابن ادم , ولا يوجد من يفوق بعنته وعصيانه ابن ادم الا ابليس وزمرته , بل حتى هؤلاء تفوق بعض البشر عليهم فى الشر والدنائه ....
لنكن اكثر وضوحا , ما معنى كلمه استخلف فى اللغه , عندما اقول لك يا فلان انى استخلفتك مثلا على سيارتى او ارضى الى حين ان اعود واستردها منك فى الوقت الفلانى؟؟؟؟؟
فى المعنى مغزى كبير لكلمه امانه , فاستخلافى لك لا يعنى منحى اياك ما لا تملك , بل تكليفك بحمل عبء رعايه وصيانه ما استخلفتك عليه وحمايته ايضا , لحين استرداده , فالموضوع فى حد ذاته عبء ومسئوليه وتكليف , ليس لهوا ولا لعب ولا هزل..
نعم , هذا هو المعنى الواضح جدا والبديهى لتلك الكلمه , فكر قليلا وستصل لنفس النقطه , اتذكر عندما قال الله عز وجل لملائكته انه سوف يستخلف من خلقه على الارض , وكان هذا الاستخلاف من نصيب ادم وذريته , الا ان المستخلف هنا هو الله عز وجل , والشىء المستخلف ليس ارضا او عقارا , انه كونا بأكمله , بما فوقه وما تحته , بأحيائه وجماداته , بتاريخه وزمانه , فما اصعب هذا العبء , وما اجهل من رضى بحمل تلك الامانه الثقيله ..

اذن اصبح الان على ادم وذريته من بعدة ادارة هذة المؤسسه الضخمه كممثل وخليفه عن ربه جل شأنه وهو ليس بالغائب بطبيعه الحال ...

اصبح عليه بالاساس ان يقيم ميزان العداله , فالعدل اساس الملك وهو الاصل فى اى نظام , وما اصعبه من ميزان, وما اعقدة من اختبار ...
وبطبيعه الحال لن تكون هناك مساحه للغش والتدليس فى ورقه الاجابه , حاشا لله , ولذلك لن يكون الانسان بتلك الطبيعه الصافيه النقيه , والا اصبح الموضوع كله عبثى , فلينقسم بنى ادم الى فئتين , متضادتين بطبيعه الحال , وليكن الامر اصعب من ذلك ايضا , لينقسم الانسان نفسه الى شقين فيكون فيه عناصر الخير والشر معا ....

وبهذا يكون قد توفر فى الاختبار كل عناصر الدقه والنزاهه , بل ان اسئلته ايضا لن تخلو من صعوبه بالغه ....
نعم فليكن الاختبار غايه فى الصعوبه ..
الم يعتقد الملائكه ان كائنا بهذة المواصفات لا امل له فى مجرد اكمال اجابه اول سؤال , نعم فهذا بديهى...
الم يتحدى عزازيل ربه متوعدا بافشال ابن ادم فى الاختبار , فمن يكون هذا المخلوق الطينى نتن الرائحه لينال شرف النجاح فى هذا الاختبار المعقد , بينما يقبع هو بخبرته اللا متناهيه وماديته الناريه المتقدة الحارقه , وذهنه بالغ الثراء خارج اللجنه , يشاهد فقط ؟؟!!!
- كلا , لن يكون احسن منى , فهو اردأ منى بطبيعه جسمه وماديته , وذهنه الساذج الغرير , لا يعدل قطرة فى بحر ذكائى وخبرتى الضاربه فى القدم ..
يرى ابليس ان ربه قد اساء الاختيار عندما فضل عليه ادم , حيث كان ينبغى اختيارة هو بطبيعه الحال فمن اذكى واعلم واعبد منه ؟؟؟
بينما اغفل انه بعصيانه لاوامر خالقه قد كسر ما لا يجبرة الدهر , واستوجب العقاب وفقد اى حجه او منطق يؤيد مبدأة , فأدم على الاقل لم يعصى ربه ويتحداة , ومن ثم فقد ايد ابليس ادم بينما دمر اى اساس لقضيته بمنتهى الغباء.
- اذن يا ربى , لن اتركه , اعطنى عمرا كى اثبت انه لا يليق ولا يستحق تلك الخلافه والتكريم , لقد قلت انك قد ظلمتنى واهدرت حقى , وانت الحكم العدل , فاعطنى الفرصه حتى اجلب دفاعى ومسندات اثباتى , كى اثبت صحه نظريتى...
ولما كان الله احكم الحاكمين وعدله هو قمه العدل بطبيعه الحال , فقد اعطاه اكثر مما كان يتمنى , اذهب , اعطيتك الفرصه حتى اخر لحظه فى الاخنبار , لن اقول لك امهلتك ساعه او ساعتين , او يوم او سنه , كلا , بل امهلك حتى تنتزع ورقه الاجابه من يدة , الى ان ترفع الغشاوة من على عينيه فيرى ويدرك مالم يراة من قبل , بل ايضا ساحجبه عن ملكوتى , فلا يرى جنه ولا نار ولا نعيم ولا عذاب , بل لن يرانى ولن يسمعنى , سيدخل اللجنه مغيبا تماما , كأضعف ما يكون , فى اشد حالات الجهل والنسيان والغفله , والضعف والفتور , حتى اذا فاز فى النهايه , تكون حجتك قد اجهضت بالكامل , فقد اعطيتك كل عناصر القوة , تراة ولا يراك , تدرك مالا يدركه , تفعل ما لا يستطيع فعله وتصل الى حيث لا يستطيع , تدرك كل كبيرة وصغيرة فى نفس وعقل وشخصيه كل فرد منهم من لحظته الاولى الى حين مماته , من اول ابيهم ادم الى اخرهم , بينما لا يدركون عنك الا اقل القليل ...

فقط سأعطيهم اشياء صغيرة , شيئا يسمى ايمانا , مجرد حبل يصله بملكوتى , يمدة بالزاد فى ظلمات بحرة اللجى , يعطيه السلاح ليدفع عن نفسه الوحوش الضاريه , وشيئا اخر يسمى عقلا , شىء محدود للغايه , لا يعدو شيئا امام ذهنك الجبار , الا انه حساس بدرجه كافيه لكى يرى او يحس على اقل تقدير بدفء شمس الحقيقه الساطعه ....
وسيكون بمقدورك التغلغل فى نفسه بل سيكون فيه ايضا نوازع الشر.....

فاذا انتصر , فلا حجه لك بعد ذلك ...

وسيكون اهلا لمزيد من التكريم المكافأة على معاناته وصبرة , فينال ما لم يناله احدا من خلقى , جنتى ونعيمى , بل اكثر من ذلك , سيبصر مالا يبصر ويسبح فى بحر انوارى اللا متناهى , اما انت فستكون اهلا لكل نقمتى ولعنتى حتى انك لن تستطيع طلب الرحمه مع شدة عذابك , فقد اعزرت , ونلت كل ما طلبته واكثر , فبأى وجه تطلب الرحمه؟؟!!!!

اما انتم يا ملائكتى , سترون كيف يتمكن ذلك الضعيف الجهول من اجتياز ذلك الاختبار العنيف القاسى , فرب العزة لا يعبث ولا يضع شيئا فى غير موضوعه ....

- فلتهبط اذن يا ادم الى الارض , اهبط الى الشقاء , الى البرد والجوع والظلام , الى وحوش ضاريه لا قبل لجسدك الواهن بها , نعم , تلك الارض المظلمه الكئيبه , هى اختبارك , وهى ورقه اسئلتك , وهى حربك وصراعك , هيا , ارى الجميع كيف تحارب اعدائك المدججين بيديك العاريتين , ليكون نصرك مظفرا بعد ذلك , سلحتك بما هو افضل , ذلك الخيط النورانى المبهر , حافظ عليه , اياك والتفريط فيه والا ضعت وسقطت فى تلك الهاويه المظلمه السحيقه للابد بينما تتناوشك انياب تلك الوحوش الضاريه .....

هاهو ادم اصبحت له ذريه وابناء وعشيرة , وامعانا فى صعوبه الامتحان , فلتنقسم تلك العشيرة لقسمين , ينضم قسم منها لجحافل ابليس واعوانه , يستغلهم فى ضرب بنى جلدتهم ويستعين بهم عليهم , فأى صعوبه بعد ذلك , حينما تأتيك الضربات المؤلمه من ظهرك , من ابناء عمومتك واصحاب قضيتك , يالها من صعوبه , ولكنك برغم ذلك , ستنتصر فى النهايه , ولتكن تلك البدايه , فليقتل الاخ اخاة , مسجلا بذلك اول انتصار لحزب الشيطان , وصانعا اول خلل تاريخى فى ميزان الوجود , ولكن العبرة بالخواتيم ...

نعم , سيدور التاريخ كله من الان فصاعدا , فى تلك الحلقه البسيطه المفرغة , الصراع بين الخير والشر , الحق والباطل , اينعم يختلف الابطال والزمان والمكان دوما , الا ان الاحداث بالاصل واحدة , والحرب سجال , ينتصر الحق حينا , بينما ينتصر الباطل احيانا , يقوم العدل ساعه , بينما يدوم الظلم الف ساعه ....

- نعم؟؟؟
ماذا تقول؟؟؟
ولماذا لا يحدث العكس؟؟؟
- الاجابه بسيطه سيدى , فهذة اسمها الدنيا , تامل فى الاسم قليلا , انه من الدنو , ليس بمعنى القرب , ولكن بمعنى الدنائه , فالاسم هنا صيغه مبالغه , تعبيرا عن وصولها لقمه الدنائه والقذارة , اقصد القاع طبعا .....
فمن الطبيعى اذن ان يكون الاصل فيها الظلم واختلال الميزان , ويكون هو الغالب على طبعها باستثناء ومضات سريعه يشرق فيها نور الحق بينما يخفت بعد لحظات..
وليكن هذا ايضا امعانا فى صعوبه الامتحان , فهل ينجح الطالب بالرغم من ذلك؟؟؟
وهل يستمر الجندى فى الاستبسال فى المعركه على الرغم من مشاهدته لجيشه وقد تحول اغلبه الى فلول تولى هاربه من امام تلك الجحافل الجبارة ؟؟؟؟
لا شك انه ان فعل , وصمد , لا شك اذن فى كونه جندى مثالى , بل بطل مغوار ايضا يستحق كل احتفاء وتكريم ..

لتدور رحى المعركه الازليه الكبرى , وليبحر البحارة بقواربهم الصغيرة بين امواج البحر الهائله وعواصفه الثائرة فى ظلام الليل الدامس , وليحمل كلا منهم معه ذلك المصباح , ايمانه , خافت اينعم , الا انه دائم الاشتعال فى ثقه , وليحمل مجدافه , عقله , يقودة الى بر الامان .

اقبل يابن ادم الى ساحه المعركه , انزل من رحم امك الى الدنيا , ابك ما شئت , فكلكم تبكون فى بدايه الامر وتصرخون , شفقه من هول المعركه وصعوبه الاختبار , الا انه لن يغير من الامر شيئا , فلتبك لساعات بعد ولادتك , او ايام , كيفما تشاء , الا انك فى النهايه لن تجد بدا من حمل سلاحك والولوج لساحات القتال , لابد ان تحمل مصباحك ومجدافك , وتبحر فى هذا السواد المخيف , فالاسئله هنا اجباريه وليست اختياريه ....

لا تحزن فمعك القادر جل جلاله , لن يتركك , اسئله يعطيك , اطلب منه الرشاد يرشدك , ولسوف يبعث اليك دوما من يذكرك بعد نسيانك , ويقيمك على الطريق المسقيم بعد انحرافك , واكثر من هذا سيغفر لك ويسامحك , مهما فعلت , فلن تكن اخطاؤك مهما كانت وانت ذلك المخلوق الضئيل الضعيف اكبر ولا اوسع من رحمه ربك , فقط اطلب , ليس باللسان , فتلك اللغه غير متعارف عليها هنا , لنا لغه اخرى , لغه القلوب , تكلم بحقيقتك وسرك , اطلب بكيانك يعطيك , وادع يستجب لك , اما ما لم يجاوز لسانك , فلن يسمعه احد ولن يصل اعلى من قامتك ..

- هانحن وقد مضى اغلب الوقت واوشك الاختبار على الانتهاء , وشارفت المعركه على ان تضع اوزارها , بينما اعيا الضرب والطعان كلا الفريقين , من المذكر والمرشد الان؟؟؟؟؟
من ؟؟ موسى؟؟؟
ولمن جاء؟؟
الى بنى اسرائيل ؟؟؟
نعم لقد اختارهم رب العزة ليكونوا رأس الحربه ومقدمه جيش الحق , الا انهم سرعان ما سيثبتون عدم استحقاقهم لتلك الكرامه , بل سرعان ما سينضمون لجيش الباطل , ولتكن تلك عليهم لعنه , ولتكن ايضا ضربه قاصمه فى ظهر انصار الحق الى يوم القيامه , فلن يسلموا من اذاهم لقرون تاليه ....

- مضت لحظات , البعض يعتبرونها دقائق , ترونها انتم قرونا , الا ان الحقيقه الثابته ان الوقت يمضى , المرشد والمذكر الان عيسى ابن مريم , فليأت عيسى لهؤلاء القوم قساة القلوب , فقد امتلأت نفوسهم شرا وظلاما وفسادا وافساد , نعم فلتتحطم صخور الظلام امام معول النور الباهر وذلك الحق المطلق والخير المطلق , نعم كل شىء هنا مطلق ...
ماذا تقول ؟؟
ضعف ؟؟
لن يصمد؟؟؟
كلا سيدى , سترى ما تفعله شعله النور وكيف تبدد اضعاف اضعاف حجمها من مساحات الظلام
فليرتبكوا وليتخبط بعضهم فى بعض , لا يدرون ما يفعلونه ليمنعوا ذلك النور من التسرب من بين ايديهم واقدامهم ليضىء ما حولهم رغما عنهم ...

ولكن عفوا... نحن لسنا فى الجنه , ولم تاتى الديمومه بعد , فكيف بهذة المثاليه المطلقه فى تلك الدنيا الرديئه , وكيف بالزهرة تزرع فى القذارة , وكيف تلقى الدرر الى الخنزير ...
مهلا فليس هذا الوقت ولا المكان المناسب , فلتذهب الان يا عيسى , تكفيهم ذكرى ذلك الضوء الباهر وافاعيله العجيبه , نعم اذهب , فمملكتك ليست على هذة الارض , ليس الان .....

- لحظات اخرى تضع الخطوط النهائيه فى كراس الاجابه , وتحدد الفريق المنتصر فى المعركه , الان ياتى محمد بن عبد الله , ليضع الخطه النهائيه للمعركه الاخيرة والحاسمه , خطه واقعيه قابله للتنفيذ , فلتضع بأذن ربك الخطوط الاخيرة وتعلم كلا منهم ماله وماعليه , ففى هذا ما يكفيهم لدخول المعركه الاخيرة والحاسمه , ويالها من معركه .....

- نعم ففى هذا المنهاج الكفايه لاقامه الميزان المائل من قديم الزمن , فليتزن الميزان لوهله , ولكن كلا , مازال هناك فترة قصيرة حتى تحين النهايه , ان الدنيا اردء من ان يستقيم ميزانها تلك الفترة باكملها , سيختل الميزان سريعا بعد رحيله , ستحارب عقيدته وسيدخل عليها ما ليس فيها , وسيذهب اولئك القوم الذين حملوا راياتها فى البدايه , سيذهبون سريعا , ويأتى مكانهم من يقلب الحق باطلا والباطل حقا , ويبنى لنفسه ملكا استبداديا مستغلا ذلك الدين , فليأت بنى اميه بطغيانهم واستبدادهم , وليأتى ايضا من ينافقهم , ولتذهب الخلافه الراشدة , وليختل الميزان للمرة الاخيرة ....
وليات الحجاج وسفسطته وترهاته وطغيانه , ولياتى من بعدهم بنى العباس ومن بعدهم ومن بعدهم , ولكن لن يخلو هذا الظلام من ومضات النور , سريعه هى , لكنها كثيرة ومبهرة , تكفيك لتتبين طريقك , وليكن ميل الميزان قليلا ....

فليسير الحق والباطل جنبا بجنب.....

والان
وبعد تلك اللحظات , هاهو الميزان يشتد اختلاله , وهاهى ومضات النور تخفت , وهاهو الظلام يسود , وهاهى الدنيا تملأ اظلاما وظلما وجورا ....
ولتدخل المعركه فى اشد مراحلها عنفا , فليسود الباطل ما شاء , فهذة هى الاخيرة
والاشياء كما نعلم , وهذة هى سنه كونيه , ان وصلت لذروتها لا تلبث الا ان تهوى وتنهار , كذلك الباطل , لانه فى اخرة فلابد ان يكون بمنتهى العنف والسيادة , تماما كما يبلغ الليل اشد درجاته سوادا قبل طلوع الفجر ....

ولكن سؤال , اتنتهى الدنيا على هذا الحال ؟؟؟
كلا
مستحيل
ان انتهت الدنيا والميزان مائل , والباطل هو السيد , فابليس اذا يكون قد صدق عندما عارض ربه , ويكون الله قد اخطأ ووضع الشىء فى غير موقعه , الم يتعجب الملائكه من استخلاف الانسان ويتوقعوا افسادة وسفكه للدماء مسبقا فيقول لهم الله عز وجل ( انى اعلم مالا تعلمون )
اذا انتهى الوضع على هذا الحال فيكون الموضوع كله عبثى من البدايه ولا جدوى منه ,
ايكون هذا ؟؟؟!!!
حاشا لله , لا يكون هذا ابدا وربى هو احكم الحاكمين وهو الخلاق العليم ....

- لا بد اذن ان يستقيم الميزان كأكمل ما يكون وليسطع النور الباهر قبل ان تحين النهايه ولو بلحظات , حتى يتحقق وعد الله ويخيب ظن الشيطان وتفسد حجته , وينجح ابن ادم فى اقامه ميزان العداله فيثبت اهليته للخلافه واستحقاقه لتكريم ربه , فاختيار الله لابد ان يكون صائبا ....
- فلياتى اليوم الذى تشرق فيه شمسا غير الشمس , وتظل الارض سماء اخرى اكثر زرقه وصفاء , لا عهد لنا بها من قبل , وليندحر الباطل الى الابد , ولتمحى كلمات الشر والباطل والظلم والكرة والحقد من قاموس الوجود ومن نفوس البشر , فلتثمر الارض كما لم تثمر من قبل , وليسود كل الخلائق خيرا وعدلا لا عهد لهم به , وليلهوا الاطفال بالافاعى ليلعبوا مع الوحوش الضاريه , فكلمه اذى لم يعد لها وجود....
- كلامى هذا ليس مجرد اقتباسات من احاديث نبويه قد يشكك البعض فى صحتها بقدر ماهو شعور ذاتى وومضات اراها لا بعينى , واشعر بها تستولى على نفسى , فأنا لم اشك يوما فى قدوم ذلك العهد , حتى فى اسوأ لحظات اليأس كما لم اشك فى اننى سأموت يوما ....
فهل يرى غيرى مااراة ؟؟...اعتقد ذلك , بل هناك من يراة شيئا ليس بالغريب , كانه كان مسافرا فى رحله بعيدة ثم عاد لموطنه...
نعم فهذا هو موطنه ....

لا ابالى كم يدوم هذا العهد , اياما ام بضع سنين , المهم انه ات بأذن الله , لابد ان يستقيم الميزان استقامه مطلقه ولو للحظات قبل ان يبدأ كل شىء فى التدهور بسرعه عجيبه ومطلقه , الى ان ينخلع الميزان ويتحطم , ويسود الظلام الدامس , فهذا هو الوقت الجدير باعلان النهايه وسحب الاوراق....
ولا يهم هذا الظلام , فالعبرة باستقامه الميزان وتمكن الانسان منها بمعونه خالقه ولو للحظات , فالزمن هنا غير مهم , اليست الدنيا فانيه بالاساس , فماذا يهم ان دام يوما او سبع سنين او الف عام , العبرة انه لا بد من انتهاؤة بالكليه ....
العبرة فى انه قد حدث بالفعل وتمكن منه ابن ادم اخيرا....

ما اسعد اولئك القوم اصحاب تلك المعركه الاخيرة , وما اعظم تكريم ربهم لهم , فهم من تم على ايديهم النصر النهائى , فما اعظمهم وما اسعدهم .....
ادعو الله ان اكون منهم
وان تكونوا منهم
اتمنى ان ارى ذلك العهد السعيد بعينى ولو لساعه واحدة , ساعه واحدة تكفينى لاذوب فيها بكاءا وسعادة , ساعه واحدة ارى فيها كلمه الله قد تمت ونصرة قد تحقق وميزان الدنيا قد استقام ......

- اللهم لا تحرمنى منها
بكرمك ربى لا بعملى فأنا اعلم انى لا استحق ,
الا اننى اعلم ايضا انك انت اكرم الاكرمين ...

سبحانك يا اكرم الاكرمين
سبحانك يا مجيب السائلين
سبحانك يامن تعلم ما فى نفسى اكثر من نفسى
سبحانك يامن اقرب الى من القرب
سبحانك ولا حول ولا قوة الا بك يا الله

الثلاثاء، 17 مارس، 2009

12- حدث فى فلسطين !!!!

بلفور





اللنبى





هربرت صموئيل



جابوتنسكى , الزعيم المؤسس للعصابات الصهيونيه




جابوتنسكى فى وسط تلامذته وافراد عصابته



لا تعليق



احد منشورات عصابات الصهاينه
----------------------------------------------


احداث 1920 والجنرال بولز ( ولا مؤاخذة فى الكلمه ):
-- الجنرال اللنبى كان قائد الجيش الانجليزى فى القدس ونجح فى احتلال المدينه , وبعد فترة اتعين مندوب سامى فى مصر مع ابقاؤة قائد عسكرى لفلسطين وسوريا ولبنان , فحاول كسب ولاء اليهود المهاجرين حديثا لفلسطين , فنقل الحاكم العسكرى السابق ( مونى ) وعين مكانه الجنرال بولز على امل ان علاقاته كويسه باليهود وهيعرف يكسبهم ويتفاهم معاهم كويس ..

الجنرال بولز النولز كونولز دة بعت اول ما استلم شغله رساله اخر مسخرة للنبى فى مصر , مشهورة باسم رساله العسل واللبن , هنقلهالكم هنا بالنص , عاوزين نوضحك شويه :

سيدى الجنرال :
انى مرسل هذا مع الدكتور ويزمن , وهو اقام هنا نحو شهرين وقام بأعمال طيبه تتعلق بقضايا وشئون مختلفه , باسلوبه الهادىء وغير المتحيز ( احييييه ) , وانى ارى ان النشاط المعادى للصهيونيه ( قصدة اعداء الساميه ) قد خفت حدته , والفضل فى هذا يعود الى النشاط الذى قام به ويزمن , وانى كحاكم عسكرى لم يمضى على فى منصبى هذا اكثر من شهر ( ولما انت لسه جعر جديد بتفتى ليه ؟ ) اعتقد انه لن تكون هناك صعوبات كبيرة فى ادخال عدد كبير من اليهود الى البلاد ( وااااااااطى ) , شرط ان يتم هذا دون ان يرافقه ضوضاء او ضجيج , نعم يوجد هنا نفر من المحرضين على مناهضه اليهود ( اة العرب الشريرين الوحشين ) وستستمر دعوتهم الى سوريا الكبرى دون توقف ( يقصد المؤتمر العربى المنعقد فى دمشق والرافض للصهيونيه والداعى لانشاء دوله عربيه كبرى تنضم لها فلسطين وباقى الشام )...

والبلاد بحاجه الى التنميه العمرانيه بسرعه ( ياحنين ) وفى هذا نيل رضا الاهالى , وعندما يقرر الانتداب , ينبغى الحصول على قرض كبير يساهم الاهالى فيه الى حد ما ( بركاتك يا وزير الماليه ) واريد ان يكون عندى السير هربرت صموئيل ( المندوب السامى لاحقا ) للمشاورة معه فى هذا الامر , فاذا حصلنا على قرض فى حدود عشرة ملايين او عشرين مليونا , فانى واثق انى استطيع تحسين احوال البلاد , تحسينا يكون فيه دخل للخزانه ( اةةةة, قول كدة , تصدق فهمتك غلط ) ...

اما السكان فعددهم اليوم 600000 وسيزيدون الى مليونين ونصف المليون , وهذا له متسع كاف ( فين بتوع الزيادة السكانيه هى السبب فى اعاقه التنميه ؟؟ ) فوادى الشريعه ينبغى ان يسكنه مليون نفس بدلا من الالف نفس المبعثرين فيه اليوم , لذلك فرجائى :
1- ان يعود ويزمن باسرع وقت ممكن ( اصلى بلوص من غيرة )..
2- ان ترسلوا الى السير هربرت صموئيل للزيارة ...
3- ان تمدونى بموظف مالى عالى الطراز...
4- ان تفكروا بمسأله القرض

فأذا تم هذا , فبوسعى ان اعد ان احول البلاد الى بلاد تفيض لبنا وعسلا فى مدى عشر سنوات , وستكفون مؤونه الصعاب المقاومه للصهيونيه ......
المخلص
ل0 ج 0 بولز

(ههههههههههههههههه , اما راجل بولز صحيح ) ..........

__________________________

احداث عيد النبى موسى 1920 :
عيد النبى موسى , هو عيد ابتدعه المماليك بعد الحروب الصليبيه , ويتوافق مع قدوم الحجاج الاوربيين لبيت المقدس , خوفا من استغلال التجمعات الكثيفه فى اثارة اى نوع من الاعتداء او الشغب , فابتدعوا هذا العيد حيث صنعوا مزارا على بعد 36كيلو متر من القدس يخرج فيه الناس وقوات الجيش فى احتفالات تشبه الاستعراضات العسكريه بغرض احداث نوع من التوازن واجهاض اى محاوله لاستغلال الوضع والهجوم على فلسطين بحرا, الا ان العيد استمر عبر الزمن وحافظ عليه العثمانيون كتقليد متعارف عليه .....

وفى عام 1920 واثناء سير المواكب والاعلام خرج احد اليهود من بين صفوف المتفرجين وتلفظ بالفاظ بذيئه وبصق على الاعلام فتناولته ايدى الفلسطينيين الموجودين فى المكان وهاتك يا ضرب , فطبعا تدخل اليهود الموجودين لانقاذ الخنزير زميلهم ووسعت الدايرة واتقلب الموضوع لاحداث عنف جامدة......

طبعا اونكل جابوتنسكى سخن وراح جمع اليهود وخرج السلاح اللى كان مخبيه فى المخازن ووزعه عليهم وهاتك ياضرب فى الفلسطينيين , مع ان الانجليز كانوا بيحرصوا كل الحرص على نزع سلاح العرب بزعم اقرار الامن , فطبعا العرب لما لقوا السلاح فى ايد اليهود زى الرز ثاروا ووسعت دايرة العنف , ودارت معركه بين اليهود بالسلاح النارى وبين الفلسطينيين بالعصى والسلاح الابيض مع التفوق العددى الفلسطينى طبعا .....
واستمرت عدة ايام الى ان نجحت البنادق الانجليزيه فى انهاء الموقف.....
وانتهت الاحداث عن عدد كبير من القتلى والجرحى من الطرفين , وقدمت السلطات الانجليزيه بعض من المشاركين فى الاحداث لمحاكمه عسكريه من جانب الفلسطينيين , بالاضافه لجابوتنسكى من جانب اليهود , والبيه قل ادبه على القضاة وتفاخر بأنه طلعلهم وثائق سريه المفروض انها تكون موجودة فى خزانه رئيس اركان الجيش الانجليزى شخصيا ومفتاحها متعلق باستمرار حول رقبته , وقال لهيئه المحكمه ( اصدروا على اى حكم تريدون , فهذا الحكم سوف يلغى حتما ) , وحكم عليه بخمسه عشر عاما اشغال شاقه تم تخفيفها الى سنتين ثم افرج عنه بسرعه بمجرد تولى هربرت صموئيل اليهودى لمنصب المندوب السامى فى فلسطين .........
________________________

طيب , فاكرين الاخ بولز اللى بعت الجواب بتاع اللبن والعسل من 103يوم بالظبط , بعد الاحداث دى اليهود بعتوله انذار حاد اللهجه بانه لو محماهمش ( دول اليهود ) فهم مش مسؤلين عن اللى هيحصل , هههههههه , وبعد مشاكل عديدة بعت الاخ بولز لعمو اللنبى فى مصر يقوله انا حطيت ايدى فى الشق من اليهود , ....... تعالوا نشوف مع بعض :

سيدى الجنرال :
لا استطيع ان اقرر على اى فريق من فريقى السكان تقع المسؤليه , حتى ولا استطيع تعيين افراد منهم , مادامت القضيه , قضيه فلسطين لم يبت فيها بعد , ولكنى استطيع ان اثبت بكل توكيد انه لما وضعت الامور على المحك , راحت اللجنه الصهيونيه تتمرد على سلطه الحكومه , واتخذت من بدايه الامر موقفا كله منابذة , ونقد جارح وسفاهه , وباستثناء قله قليله من رجالها فكلهم يرفضون التصديق بحسن نيتنا البريطانيه (هههه)
واخذنا بالعداله والسويه ( بيفكرنى بنجيب الريحانى فى المشهد بتاع , الامانه ....الشششششششرف )..
فهم لا يرتضون هذة العداله من المحتل العسكرى , بل يريدون ان تكون الحكومه العسكريه ملبيه لرغباتهم فى كل قضيه يكون فيها احد الفريقين يهوديا , وفى القدس , وهنا هم اكثريه , لا يرضيهم ما يرضى غيرهم من السكان , بأن يكونوا فى ظل الحكومه وتحت رعايتها , بل يريدون ان يمارسوا السلطه بأنفسهم , واما فى الاماكن الاخرى حيث هم اقليه , فيستصرخون السلطه طالبين حمايتها , ولا حاجه فى الاسهاب فى شرح الصعاب التى لابد للحكومه ان تلاقيها فى المستقبل , وانا اليوم اذا احتجت الى التعامل مع ممثل الطائفه اليهوديه , فيهددنى بسطوة الرعاع , ويرفض ماتفرضه الانظمه الرسميه المقررة الجاريه الاحكام....

فيتضح مما تقدم ان سلطتى الخاصه كحاكم عسكرى وسلطه اى دائرة من دوائر الحكومه , هما عرضه للتنزى عليهما من قبل اللجنه الصهيونيه , وانى متأكد انه من المتعذر استمرار هذا الوضع دون ان يسبب ضررا ويوقع الامن العام فى معضلات تعم البلاد فتجر الحكومه الى مأزق حرجه .....

ولا يجدينا نفعا فى هذة الحاله ان نقول للسكان المسلمين والمسيحيين اننا فى السير بأداراتنا الحكوميه انما نحن محافظون على العهد الذى اعلناة لهم لما دخلنا القدس , بينما شواهد الحال تكذبنا فى ذلك , فمن جعل اللغه العبريه لغه رسميه , الى انشاء جهاز قضائى يهودى , الى امتلاء اجهزة الحكومه بالموظفين اليهود الذين ولائهم للجنه الصهيونيه , الى منح اعضاء اللجنه الصهيونيه امتيازات خاصه فى اسفارهم وتنقلاتهم , كل هذا وامثاله يراه منا السكان غير اليهود خروجا على العهد المقطوع لهم , ومحاباة وتمييزا وايثارا , هذا من جهه, ومن جهه اخرى فأن اللجنه الصهيونيه تتهمنى وتتهم موظفيي الحكومه بأننا معادون للصهيونيه ( الله اكبر , اهو, طول عمرهم كدة )

فهذة حاله لا تطاق , ومن الانصاف لى وللموظفين الذين فى ادارتى ان تزول هذة الحاله , ولابد من القول ان هذة الحكومه التى فى عهدتى , قد نفذت بأخلاص رغبات حكومه جلالته , ونجحت , لانها سارت وفق قوانين الادارة الاحتلاليه العسكريه بدقه , غير ان هذا لا يرضى الصهيونيين الذين يزدادون غطرسه فى محاولتهم حمل الحكومه العسكريه المؤقته على ان تمنحهم التفضيل على سواهم قبل ان يقرر الانتداب , وانه لمن المستحيل ان تستطيع ان ترضى قوما ينادون بألسنتهم نريد وطنا قوميا , بينما هم فى خططهم العمليه لا يطمعون في ما هو اقل من الدوله اليهوديه بكل معانيها السياسيه ( ههههه , اسم الله عليك , انتا لسه واخد بالك دلوقتى ؟؟؟ ).....
فلذلك ومن اجل مصلحه الامن العام , ومصلحه الصهيونيين انفسهم التمس الغاء اللجنه الصهيونيه ....

المخلص
ل0ج0سامسونج
اسف,
ل0ج0بولز

طبعا الخطابين بتوع بولز يغنوا عن حاجات كتير , بيدوا صورة عامه للاوضاع فى فلسطين بين الحرب العالميه الاولى الى حرب 48 , وعلى لسان مين , الشخص المفترض انه حليف لليهود وبيساعدهم على تنفيذ مخططهم , مش مثلا العرب ولا الفلسطينيين , يعنى شهد شاهد من اهلها , علشان كدة مش هتكلم عن باقى الاحداث لانها محتاجه لوقت كبير وبوستات اكبر , ولذلك اللى عايز يعرف تفاصيل اكتر ممكن يراجع الموضوع فى الكتب , بالاضافه لان مدونه الاخ ( مهندس مصرى ) فيها تكمله للمواضيع دى , ولذلك فلن اكرر , بس فيه نقطتين صغيرين عايز اذكرهم قبل ما انهى البوست دة ,
_______________________

- فى قصه تبع الاخ بولز برضه , احب احكيها , والراجل دة اثار انتباهى بتصرفاته , اسمعوا ,
- لما وصل هربرت صموئيل ليمارس وظيفته كأول مندوب سامى لفلسطين وذهب لاستلام مقاليد الحكومه من مقر الاخ بولز , وبعد ان انتهى التسليم وقبل مغادرة بولز للمكتب , قال لهربرت : والان اريد منك ان توقع لى وصلا بالاستلام ...
فساله هربرت : وصلا لاستلام ماذا ...
فاجابه بولز : فلسطين...
فقال هربرت : لا استطيع ذلك , ولعلك لا تعنى هذا من قبيل الجد ؟؟؟ ( بتهزر يعنى )
فقال بولز : اعنى هذا بكل تأكيد , وهذا هو الوصل مهيأ ومطبوع , وناوله قصاصه ورق صغيره مكتوب فيها :
- استلمت من الميجور جنرال - جنرال سير لويس ج 0 بولز 0k c b , فلسطينا واحدة بالتمام والكمال ...
ثم التاريخ , ومساحه للتوقيع ....
فتردد صموئيل , فأصر بولز , فوقع هربرت صموئيل فى النهايه بعد ان اضاف عبارة : ما عدا السهو والغلط , كعادة الوصولات التجاريه .....................
بصراحه مش عارف اعلق اقول ايه على القصه دى ...........

- موقف اخر يتعلق بهربرت صموئيل , هو ان حصل اكتر من محاوله لاغتيال هربرت صموئيل , كانت الاولى فى شمال فلسطين ونجا منها بمعجزة , اما الثانيه فحدثت فى بيسان , فأحاط به كوكبه من الفرسان فى محاوله لحمايته , ولما تكاثف عليهم الضرب انهار هربرت وصرخ مناديا ( ربحى مراد ) الحاكم الوطنى للمدينه , قائلا له : انقذنى بحرمه العرب , فنجح مراد فى انقاذة بمعجزة واخرجه بأمان من المدينه , فكان اول ما فعله هربرت عندما وصل للقدس , ان اصدر امرا بعزله !!!!!!!!
- نو كومنت .......
__________________

طبعا فيه ناس كتير انا اغفلت ذكرهم فى الفترة دة وكان ليهم دور كبير جدا فى تدعيم الكيان القذر اللى اسمه اسرائيل , ودة لان اللعب فى الفترة دى كان عالمكشوف مش متغطى زى ما شوفنا زمان , ففضلت انى امر مرور سريع على بعض النقط اللى اعتقد ان فيه كتير مسمعوش عنها قبل كدة , وتاريخ الفترة دى معروف ومشهور بما لا يدع مجال لاعادة ذكرة ....

كدة بأذن الله انتهيت من الجزئيه دى وان شاء الله البوست الجاى هادخل فى ملابسات وقصه اكتشاف برتوكولات حكماء صهيون اللى جبت سيرتها لما اتكلمت عن ( احد ها عام ) , وهاذكر قصه وسبب صدور اشاعه بأنها مزيفه , واسبابها , وطبعا مش هخش فى نصوص البرتوكولات ذاتها , لانها متوفره فى اى مكتبه حاليا......

لو كنت غلطت فى حاجه , فايريت اللى يعرف يصححلى معلومتى ويكسب فيا ثواب وله كل احترام وشكر....


عيرفتوف عليكوا ........................

الأحد، 15 مارس، 2009

النظريه الفابيوسيه



طبعا مش هقولكوا على حالتى المعدنيه الكام يوم اللى فاتوا
ما فيش بعد كدة
حاجه جامدة جدااااا
زى الزفت

3 اخبار انما ايه , موووووووز مووووز موز , على رأى المذيع الثقيل اياة .....

الاخبر الاولانى بتاع اقاله الدكتور ابو زيد وزير الميه , طبعا حاجه منتظرة , انا اساسا استغربت لانى كنت فاكر انه اتغير من زمان , ولما سمعت الخبر قولت ياخراااااااشى !!!!! لهوة لسه موجود فى الوظارة لغايه دلوقتى؟؟!!
ايه , زاغت عنه الابصار الكام سنه دول ؟؟؟ ولا كان لابس طاقيه الاخفا ؟؟!!!

عمى ابو زيد باشا , احب اقولك الف الف مبروك , على خروجك بالسلامه , لانك مايشرفكش انك تكون عضو فى مشيخه المنصر دى , واحمد ربنا عشرتلاف مرة واعمل عمرتين وعقيقه ان ربنا تاب عليك , وانضم لباقى اللسته بتاعه حسب الله الكفراوى واللى قبله واللى قبله , لحد احمد رشدى ( فاكرينه ؟؟ ) .....

يلا , الف مبروك ....
_____________________________

الخير التانى بتاع الحكم اللولبى الحلزونى للقاضى المطأطأ المخربش اللى ماسك قضيه الخنزير ممدوح اسماعيل .
سبع سنين حبسسسسسسسسسسسسسس
ياااااااااااااااااااااااااكربنطس...
على رأى نوارة , يبقى كدة الجته واقفه عليه بيومين الا ربع
ياااااااااااااااسلام سلم الكنكه بتتكلم
على كدة بقى مجدى احمد حسين اللى اخد سنتين , كأنه قتل تلتميت نفر وشويه !!!!!!!
بجد بجد , يابلاش
لا وقال ايه باعتين للانتر بووووووول , علشان يقبض عليه
ههههههههههههههههههههههه
لا وايه راحوا يقبضوا على باقى المتهمين ملقيوش ولا واحد فيهم
واحد راحوله بتوع تنفيذ الاحكام فى شقته اللى فى مصر الجديدة لقيوها خاويه على عروشها
والتانى اللى فى اكتوبر شرحه
الوحيد اللى اتمسك كان الراجل اللى انطس ست اشهر

طب يا عم كنت شغل الطاسه انت كمان , كان زمانك خارج من صاله كبار الاشرار ...

فعلا , انا كل يوم بتأكد من نظريه تبنيتها من زمان
ان البلد دى مافيهاش حاجه اسمها قانون ولا يحزنون , وكل اللى كان فاكر ان القانون هيجيبله حقه يبقى حماااااارون كبيييييرون واهبلون

ملحوظه : القانون اله وتريه ظهرت فى العصر العباسى وتتكون من 78 وتر لكل ثلاث اوتار منها درجه صوتيه واحدة .....

فياريت الجماعه بتوع ماكنه القوانين اللى عايزين يعملوا قانون لاى حاجه فى كل حاجه , وفاكرين ان كل مشكله فى البلد علاجها قانون جديد , يااااار يت يهمدوا ويكنوا ويركنوا فى حته ناشفه ....

اللى زى الخنزير ممدوح اسماعيل دة حله وعلاجه فى حاجه واحدة بس
انا عايز اسأل سؤال , هو مش اغلب الناس اللى ماتت دى اهاليها صعايدة ؟؟؟؟؟
مش عندكو حاجه اسمها تار باين؟؟؟؟؟
طيب , بسيطه , حلها واحد يطلعله لندن ويحش رقبته هناك , بس كدة
وانا اعرف ان فى ناس كتير شافته هناك يعنى الوصول اليه سهل
ولا حرام ؟؟!!!

ولا شاطرين نقعد نقتل فى بعض عشرين سنه بسبب بهيمه بتاعه عليوة اكلت من البرسيم بتاع هريدى ؟؟؟؟

ولا المصرى بس فالح يقتل اخوة علشان عشرين جنيه بدم بارد , ولما حد من اعضاء ( المغارة ) يقتل عيلته كلها يقعد يولول زى النسوان ؟؟؟!!!!!!!!!!!!!!!!!!!!!!!!!!!!!!!!!!

اسد على وعلى النظام نعامة
مش كدة برضه ؟؟؟؟
وياريت بقى البهوات بتوع الصحافه اللى طلعوا يجعروا المرة اللى فاتت لما اهالى الضحايا قالوا انهم هيقتلوة
البهوات اللى قعدوا يقولوا فوضى وعنف وارهاب وتخلف ومش عارف ايه
طب يا بهوات يا محترمين ( يا شرفاء ) ليه مسمعناش حس كلب فيكم لما راجل غلبان بتقتل على يد انسان كافر ميعرفش ربنا اسمه ظابط شرطه , بتسكتوا كلكم ساعتها ليه ؟؟؟؟؟
يا جماعه
يا اهالى الضحايا
طالما اولى الامر شالوا اديهم من الموضوع , ووقفوا فى صف الظالم , يبقى ملهاش غير حل واحد
اقتلوا ممدوح اسماعيل , ربنا يباركلكم ويثيبكم كمان , ولكم فى القصاص حياة يا اولى الالباب....
اقتلوة علشان باقى اللصوص امثاله اللى معتقدين انهم هيسرقوا البلد ويتنعموا بالغنيمه فى لندن وكندا وسويسرا , يعرفوا انهم مش هيتسابوا....

وسيبكم بقى من شغل منه لله وحسبنا الله ونعم الوكيل
الكلام دة تقوله مراتتكم وهن قاعدين فى البيت
ان الله لا يغير ما بقوم حتى يغيروا ما بأنفسهم ...
يا اما كدة
يا اما تسكتوا خالص وتستنوا دوركم فى المفرمه , او اقعدوا دوروا فى ساقيه الوهم بتاع القانون والمحامين والنقض والاستئناف , وابقوا تعالوا تفوا على قبرى ....

بجد بجد , دمى اتحرق لما شفتكم قاعدين تزغرطوا وتهللوا من الفرحه لما الحكم اتنطق
المنظر دة عبرت عنه الاستاذة نجلاء بدير فى مقالها كأحسن ما يمكن ....
بجد فعلا , الشعب المصرى دة ظاهرة غريبه
المواطن المصرى كائن انوى اخطبوطى نادر الوجود ....
هوة اللى بيحصل فينا دة من شويه
فعلا والله , ربنا مش بيظلم حد , ومن اعمالكم سلط عليكم

وكله كوم , والمذيع الغتيت اللى اسمه وائل الابراشى دة كوم , بجد اغتت كائن حى شفته فى حياتى
يخرب بيت برودك يا اخى , ويخرب بيت ابو اللى عملك مذيع
جاى النهاردة يقولك قال ايه , اللى ارتكبوا الجريمه بتاع العبارة دى المفروض يبكوا من الندم ويحطوا نفسهم فى القفص ويقولوا حاكمونى
ياااااااااااااااااااااااااسلام
انت حمان ياحمان
يخرب بيت ابو استفزازك يا جدع
انت بتكلم مين يا جدع انت ؟؟؟!!!!!!
دول ؟؟؟
يبكوا ؟؟؟؟
ليه
بامارة ايه
هو حضرتك طالع من فيلم ابيض واسود , من افلام حسين صدقى القديمه ؟؟؟؟؟
اووووووووووووووففففففففففففففففففففففففففف


الخلاصه
على رأى المثل القبيح :
اللى يعرى .... ميشتكيش من كتر ........
_________________________________

الخبر التالت والالذ , ان عمارة اثريه فى وسط البلد اتحرقت , والناس قاعدة تتفرج على ماتش الزمالك!!!!!!
عمارة عملها الخديوى اسماعيل من 150 سنه , بتتحرق بسبب مجموعه حراميه عايزين يهدوا عمارات وسط البلد القديمه ويبنوا مكانها ابراج , والناس ولا هيه هنا

الله يلعن ابو الكورة
واللى بيصرف على الكورة
وابو اتحاد الزفت الكورة
.... هو انتوا هتاكلوا كورة؟؟؟
هتلبسوا كورة ؟؟؟؟
هتصرفوا وتعيشوا وتسكنوا كورة ؟؟؟؟؟؟
هتدرسوا بدل التاريخ كورة ؟؟؟؟؟؟؟
طيب , يا اساتذة فيه شيخ منصر محترم عايز يشترى عمارات وسط البلد القديمه برخص التراب من ملاكها , وبعدين يطبخ قانون جديد يطرد على اساسه السكان منها , وبعدين يطربقها ويبنى مكانها ابراج وفنادق...
وطبعا الكلام دة هيسرى على باقى سكان الايجارات القديمه

ها , انبستطوا ؟؟؟؟؟؟
بكرة الهرم يتحرق بماس كهربائى
ومحطه مصر بعقب سيجارة
والله ما بعيدة

وابقوا حطوا مكانها كور صغيرة
علشان تكبر وتخلف استاد كبييييييير
يلعن ابو البني ادم اللى عقله تحت رجليه ..............

الأربعاء، 11 مارس، 2009

هنا الميرغنى

-- تنبيه هام : القصه التاليه من نسج الخيال وليس لها ايه علاقه بالواقع , ونحن غير مسئولين عن اي تشابه بين احداث القصه وبين اى احداث على ارض الواقع ...


المشهد الاول :

- نهار خارجى , شارع مزدحم بالسيارات , زوم ان بالكاميرا على واجهه احد المقاهى القديمه فى الجانب الاخر من الشارع , تقترب الكاميرا تدريجيا الى ان تدخل المقهى , سحب كثيفه من دخان الشيشه , ضوضاء عاليه يتخللها بعض السباب البذىء , شاب صغير يقوم بتغيير حجارة القص والزغلول , بينما يبرز من بين الضوضاء صوت انثوى مميز , تقترب الكاميرا تدريجيا الى شاشه تلفزيون ضخمه , بينما يعلو الصوت :
( كلُن بدُن ناااااااانااااااااا )
تزداد الكاميرا قربا من الشاشه , فتظهر معزة سمينه بيضاء اللون , تتلوى فى حركات هستيريه , بينما يتصارع عليها عدد من الجديان , فى لقطات سريعه تصيب المتفرج بالدوار , بينما يظهر اسفل الشاشه شريط متحرك مكتوب عليه ( بحبك ياثوثن ) ..

- يصيح احد الرواد قائلا : ماتغير يابنى القناة , هوة دة وقته ؟؟؟ , الكلام دة بالليل مش دلوقتى , شغلنا حاجه كدة تجيب البركه عالصبح . يظهر فى الشاشه رجل ضخم وتظهر خلفه عدة صفوف متراصه لشيش على رف مثبت على الحائط , بتناول الرجل ريموت ملوث ويضغط على الازرار , تتجه الكاميرا مرة اخرى الى شاشه التلفاز فيظهر الشعار المميز للفضائيه المصريه ( صرم ) , وتظهر عجوز شمطاء فى الخامسه والتسعين من عمرها , تظهر فى عنقها تجاعيد واضحه وعميقه شبيهه بأخاديد هضبه التبت , ويظهر على جانب الشاشه اسم :( تفيدة العامشه ) , وتقول:
- سيداتى انساتى ستاتى اسعد الله سباحكم , واليكم الان اهم الانباء , فى حادث مؤسف اليوم سقطت من اعلى كوبرى مب........عفوا , كوبرى اكتوبر سيارتين , وقد اسفر الحادث عن مصرع عدد من الركاب , وعلى الفور توجه الى موكع الحادث السيد شيخ الغفر حبقه العواطلى ومعه كبار مساعديه لضمان السيوله المروريه وسرعه لم الجتت وترويق الليله , وقد سرح مسدر مسئول ان الحادث نتج عن استغلال قائد السيارة لنعومه كوبرى اكتوبر وخط سيرة المستقيم دائما , مما دفعه الى زيادة السرعه فنجم عنها هذا الحادث الاليم .....
- وعلى جانب اخر حاول مجموعه من المختلين عقليا مساء امس اقتحام قسم شرطه 15مايو , الا ان محاولاتهم قد بائت بالفشل حيث تمكنت قوات الامن من السيطرة على الموقف والقاء القبض على المختلين عقليا مثيرى الشغب , ويتم حاليا التحقيق معهم بواسطه يهود خيبر , وقد افادت التحقيقات الاوليه ان المتهمين هاربون من العباسيه ويشتبه فى تورطهم فى تفجيرات الحسين , وطعن البيه الامريكانى ........
- صوت ضحكات مجلجله فى القهوة تختلط بالكثير من البصاق على الارض , يتخللها بعض السباب البذىء , يصيح احد الرواد : ياعم هاتلنا الجزيرة خلينا نعرف ايه اللى بيحصل فى البلد ...
- تتجه الكاميرا لنفس الرجل الضخم حيث يتناول الريموت المتسخ ويضغط على بعض الازرار , تتجه الكاميرا الى الشاشه فيظهر الشعار المميز لقناة الجزيرة , بينما يعلو صوت التلفاز تدريجيا :
تااااتاتااتاتاتاااااااااااااا........تررم ترررررم ترررم............تررم ترررم .
- يظهر رجل كبير السن و ابيض الشعر , جالسا بزاويه حادة مع الشاشه , يرتدى بذله رماديه اللون , تبدوا عليه ملامح الهيبه والوقار والاشمئناط والقرف ايضا .....
- اصعد الله صباحكمممممم اليكم اهم الانباء من قناة الجظيرة فى خطر, وافتنا الانباء من القاهرة باقطحام مجموعه من طلبه القليه الحربيه المصريه لقصم شرطه الخامس عشر من مايوووووووو , بعد مصادمات عنيفه , مع انباء باحتجاز عضض من الظباط من بينهم مقموص القسم شخصيا , معنا من القاهرة مراسلنا هناك مائل النحنوح :
- ااااااااانحنوح , ماذا يجرى عندك الان ؟
- تنقسم الشاشه لنصفين ويظهر فى النصف الثانى رجل يرتدى خوذة زرقاء مكتوب عليها press وسترة واقيه من الرصاص مكتوب عليها نفس الكلمه , يقف فى حديقه ممسكا الميكروفون , وبعد فترة طويله يرد :
- حقيقه ليست لدينا اى انباء حتى الان عن وقوع خسائر فى اى من الطرفين , ومع الاسف لم نتمكن من تصوير اى من الاحداث , لان السلطات المصريه قامت بمنع طاقم الجزيرة من الاقتراب من موقع الحادث , وكما ترى الان نحن نقوم باذاعه تقريرنا الاخبارى من اقرب منطقه من الحادث سمحت لنا السلطات بالتواجد فيها وهى كوبرى بنها , وكما نسمع من هنا دوى طلقات الرصاص مما يدل على ان الاشتباك بالاسلحه الناريه مازال مستمرا , ونشاهد ايضا تصاعد اعمدة الدخان من موقع الحادث , ونرى الان تواجدا مكثفا للطيران الحربى المصرى فوق موقع الحادث على ارتفاعات منخفضه , ونرى ايض...........( ينقطع الصوت بينما يظهر المراسل محركا شفتيه )
- المذيع : الاخ نحنوح ؟
- نحنوح ؟؟؟
- يبدو ان الاتصال قد انقطع بالاخ مائل النحنوح , وسوف نمدكم بأهم الانباء حين تمكننا من اعادة الاتصال بمراسلنا فى القاهرة , دمتم وطاب صباحكم وااااااااالى اللقاء..
تااااتاتااتاتاتاااااااااااااا........تررم ترررررم ترررم............تررم ترررم .


- فلاش باك بالكاميرا , تظهر على الخلفيه نتيجه ضخمه معلقه على الجدار بينما تنقلب ورقاتها للخلف سريعا...



- المشهد الثانى :

ليل خارجى , مجموعه من الشباب يسيرون فى الشارع , يظهر من خلفهم بوكس ازرق , يقترب منهم ببطء , ثم يتوقف ويهبط منه رجل ضخم الجثه يرتدى قميص مشجر وبنطلون قماش بنى بكسر يهبط بشدة من الامام تحت تأثير الكرش الضخم , يكاد يمسك به حزام جلدى اسود اللون , بينما يظهر مسدس عتيق كبير الحجم معلق فى جانب الحزام من الداخل , وينزل خلف هذا الرجل عدة رجال ضخام الجثه , بعضهم يرتدى الجلاليب والبعض الاخر يرتدى بدله صيفى نصف كم ( غزل المحله ) , وتظهر عليهم علامات البلاهه الشديدة , يقترب الرجل ذو القميص المشجر من الشباب فيقول:
- ايه اللى ممشيك ياض منك له فى الشارع ؟
- فيجيبه شاب اسمر اللون حليق الرأس قائلا : هو المشى فى الشارع ممنوع ولا ايه ؟؟
- يصدر الرجل صوتا شبيه بصوت الغفير النائم , وكمان بتبجح يا .....امك , بطاقتك ياض يابن ال.....
- ال.....دى تبقى امك .
- يصرخ الجميع : بتشتم سعادة الباشا رئيس المباحث؟؟؟!!!!!!
- وفى لمح البصر يهجم الرجال على الشاب وينهالوا عليه ضربا , بينما يحاول الشاب ان يتكلم بلا جدوى :
- انا.....بوم طاخ ......انا طال.......دج بوووم ......انا طالب فى الكل......طاخ تك تك تك تك ( اقلام ) .
يسقط الشاب على الارض من الاعياء بينما يحمله الرجال ثم يلقون به داخل البوكس وهو فى حاله اغماء...
- ينطلق احد اصدقاؤة الى منزله , تظهر على الشاشه صورة جرس واصبع يمتد اليه , تن ...تننننن.
- يفتح الباب رجل طاعن فى السن , تبدوا عليه ملامح الطيبه والوقار ,
- خير يا ابنى ؟؟!!
- يصرخ الفتى , الحق ياعمو ابنك انضرب واخدوة فى القسم
- ياساتر يارب , يا ساتر يارب
ينطلق الرجل فزعا ليغير ملابسه بسرعه بينما لسانه يحسبن ويحوقل ...
- فوكس بالكاميرا على واجهه القسم , يدخل الرجل مرتبكا ثم يسأل عن غرفه ( سعادة البيه رئيس المباحث ) , يرشدة اليها احد المخبرين , يطرق الباب دون جدوى , ثم ينطلق صوت غريب من الداخل يشبه شخير النائم :
- ماقولنا ادخل ب...امك
يفتح الرجل الباب بيد مرتعشه , يدخل الى ان يقف امام مكتب سعادة البيه
- نعم , خير , منا موراييش غيركوا بميتين ابوكوا
- العفو ياباشا , ابنى بس , انتوا مسكتوة غلط , دا ابنى دة طيب و.......
- يقاطعه الباشا : ابنك ؟؟ بقى انتا بقى ابو الع... دة ؟؟؟
ثم ينهال على الرجل ضربا وهو يقول :
-علشان تبقى تعرف تربى ابنك كويس
- ثم يصرخ مناديا : صدام , دحروج خدوا ال... دة ارموة جنب ابنه فى التلاجه ووضبوهم كويس ...
ينقض الرجلان على الشيخ ويحملانه من على الارض الى خارج المكتب....



المشهد الثالث :
منظر داخلى , غرفه فخمه , يوجد فى اعلى الحائط جهاز تكييف ضخم بنى اللون , يبدو عليه القدم كما يبدو انه لا يعمل ايضا , يجلس على المكتب مقموص القسم ورئيص المباحث يدخنان سيجارة بانجو , بينما يدفع الباب احد المخبرين بسرعه ويدخل فى فزع صائحا :
- الواد اللى مسكناة يابيه
- رئيس المباحث : ماله , مات؟؟؟
- ياريت يابيه , دا طلع طالب فى الكليه الحربيه ....
ينتفض المقموص من على مكتبه كمن لدغته عقربه ويصيح:
- ايه ؟ مين ؟ بتقول طالب فين ؟ مسكتوة امتى دة ؟ ومين ابن ال... اللى مسكه ؟؟؟؟
يحتقن وجه الظابط بسرعه ولكنه يتمالك نفسه ويقول بصوت مبحوح
- انا ياباشا ...
- انت , الله يخرب بيت اهلك , انت عايز تودينا فى داهيه ؟؟؟ يعنى خلاص , انطسيت فى نظر اهلك ؟؟؟
- ونا اعرف منين ياباشا , اصله مقاليش
- نعم ؟ تعرف منين ؟ امال ظابط مباحث ازاى ؟ مش قلتلك ميت مرة بيبقوا حالقين راسهم ولونهم اسمر والباريه بيعمللهم حز , خلاص , البعيد اعمى ؟ الله يخرب بيتك هتودينا فى داهيه , ربنا يستر ونعرف نلم الموضوع .....
يصرخ المأمور قائلا :
- ياحزقيل ؟
يدخل شخص ضخم الجثه ذو كرش هائل
- روحوا هاتولى الراجل الكبير اللى فى التلاجه
- حاضر يابيه
- اسمع , هاته لوحدة متجيبش الواد الصغير معاة
- اوامرك ياباشا
يدخل الرجل العجوز مترنحا , يبتسم له المقموص قائلا:
- اتفضل ياوالدى , اتفضل اقعد , روح ياض هات كوبايه شاى للحاج , انا مكنتش اعرف باللى حصل واول ما عرفت هزقت الظابط واديتله جزا , وانا اسف بجد يا حاج على اللى حصل , وانا هوصلك انت والمحروس ابنك بالعربيه بتاعى لحد البيت , اة بس بقولك ايه , اوعى ابنك يحكى حاجه من اللى حصلت دى لما يرجع الكليه لحسن بعدين ممكن يترفد فيها
- ايه؟ يترفد ليه ؟
-ايوة ياحاج ابنك اصلا مد ايدة على الظابط وقل ادبه وكان عايز يخطف السلاح الميرى بتاعه ودى ممكن تطلعه مجلس كليه ويتفصل فيها .
- كتر خيرك ياباشا
- بص ياحاج انا علشان اامن ابنك عالاخر هعمل محضر صلح دلوقتى علشان يبقى موقفه قانونى ..
- الله يكرمك يابيه
يصيح المقموص قائلا:
- انتوا يابهايم ياللى برة , هاتولى الباشا من التلاجه .........



المشهد الرابع :

ليل داخلى , مصنع الرجال , فرق مذاكرة الطلبه ( الفترة المسائيه ) , مجموعه من طلبه القسم النهائى يدخلون لكل فرقه محرضين اياها :
- بقى بصوا يا جماعه , امبارح زميلكم اتضرب واتبهدل فى القسم وانتوا عارفين لو اشتكى لادارة الكليه هيطلعوة هوة اللى غلطان , وهياخد جزا , واظن برضه محدش منكم يرضيه اللى حصل , ومش شويه البهايم دول اللى هييجوا يعلموا علينا على اخر الزمن , الدفعات اللى قبلنا كانوا رجاله واخدوا حقهم بدراعهم , فاكرين ؟ فاكرين حادثه السراج مول , وطلعت حرب , وغيرة , هما مش اجدع مننا , احنا هنظبط معاكم دلوقتى الاجازة الجايه نروح نطربق القسم على دماغهم , والناس اللى من الاقاليم هنظبط لكل واحد فيهم واحد زميله فى القاهرة علشان يبات عندة , وهنتفق على مكان التجمع بعدين ......
- معايا يارجاله ؟
- فيجيبه الجميع : معاك يافندمممم
- رجاله يارجاله ؟
- رجاله يافندمممممم
ويستولى الحماس على الجميع فينشد الطلبه قائلين :
دخلت حربيه برجليا , دخلت ولا سموا عليا , خرجت منها بعد سنييييين , ظابط بنجمه ذهبيه هييييييييه ,
دخلت شرطه برجليا , دخلت ولا سموا عليا , وخرجت منها بعد سنييييين , مخبر ولابس جلابيه هييييييه ,
لاى لاى لاى لالالالالالاااااا , لاى لاى لالا لالا لا ..........................
وتبتعد الكاميرا تدريجيا , بينما يخفت صوت الاناشيد الحماسيه الى ان يتلاشى ......



المشهد الخامس :
ليل خارجى , يظهر فى الشاشه واجهه القسم بينما تقترب مجموعات الطلبه منه حامله جميع انواع السلاح الابيض والمفاتيح والعصى الكهربائيه , يظهر فى الكادر احد الطلاب قائلا :
- هو دة القسم قبل ما يتكسر ....
ثم يبدأ الجميع فى قذف القسم بالحجارة بينما يهرب من كان واقفا من المخبرين والامناء بالخارج لداخل القسم مغلقين الابواب الرئيسيه خلفهم ...
ينال الخوف من بعض الطلبه من القسم المتوسط والاعدادى فيصيح فيهم الطلبه الاقدم :
- بتجرى ليه يا مهزق منك له , خايفين من ايه ؟؟؟؟
وتبدأ سلسله من الاهازيج الحماسيه :
- ايييييييييييه حاربيه , اووووووووووة حاربيه ........
فتشتعل الحماسه من جديد وينهال الجميع على القسم , بينما يقبع المقموص فى مكتبه يشاهد سيارته وهى تدك دون ان يستطيع الدفاع عنها , يجرى سريعا الى الهاتف حيث تدور المكالمات الاتيه :
- الو , ادينى السيد مدير الامل
- الحقنى يا افندم , طلبه الكليه الحربيه بيكسروا القسم
- ايه ؟؟ بيكسروة ليه , وانت مالك ومالهم ؟؟!!
- اصل ياافندم فى طالب عمل مشكله مع ظابط المباحث , فلما رجع الكليه لم زمايله وجم على القسم ..
- طيب , استنى لما ابلغ سيادة الزير.... قصدى شيخ الغفر....


يرن الهاتف على مكتب فخم يجلس عليه ظابط شاب ووسيم ابيض اللون مسبسب الشعر
- الو, ايوة يامعالى الباشا , لا داهوة مش فاضى دلوقتى , ايه , مين ، طيب خليك معايا
يضغط احد الازرار فى السيستم امامه
- ايوة ياافندم مدير الامل عايز حضرتك بيقول طلبه حربيه بيكسروا قسم 15مايو
- طيب حولهولى بسرعه
يضغط السكرتير بعض الازرار
- ايوة ياجعر , مشقولنالكوا مليون مرة مالكمش دعوة بطلبه الكليات العسكريه , انا هلاحق على ايه ولا ايه , على بتوع الكليبات ولا على بلاوى مقاميص الاقسام , غور فى داهيه لما اكلم سعادة الباشا ابن العلقمى , يمكن نلحق نلم الموضوع , وبالنسبه للطلبه دى , بلغ المقموص الجعر يضرب نار فى الهوا لحد مانشوف اخرتها ايه ....



المشهد السادس :
ليل خارجى , ارض الملعب بنادى الجلاء , شخص رياضى برتبه ظابط , يعدو بسرعه حول تراك الملعب , بينما يحمل على كتفيه شخص نحيل اسمر اللون , تبدو على ملامحه الاعياء الشديد , كما يبدو عليه ايضا انه قد تجاوز الخامسه والسبعين وانه يحمل على الاقل دسته من الامراض المزمنه ....
- يااااااانب اكمن المتييييين نفه , اجرى ياجعر , ودينى ان ماكملت المتين , لكون منزلك اومباشا
تزيد سرعه الظابط بينما تبدو عليه ملامح الاعياء الشديد ..
يقترب من الشخص النحيل احد الافراد يحمل هاتف :
- تليفون ياافندم
- مين ؟؟
- حبقه بيه
- الووووووووووو , حبقه باشا , ازيك يا اكسلنس
- علاقيمو حبيب قلبى , بقولك , مش وقت سلامات , شوفت الطلبه بتوعك عملوا ايه ؟؟؟؟ بيكسروا الاقسام !!!!
- نونونونو يااكسلنس , اكييييد حضرتك غلطان , الطلبه بتوعى انا مربيهم عالغالى , ينضربوا عالوش ويقولوا معلش , مستحيل يفتحوا بقهم ولا يقولوا بم , امال احنا بنلعب ياراجل !!!!!
- ياباشا هم الطلبه بتوعك , وحياة راسك هما
- ايييييييه انت بتتكلم جد ؟؟ ازاى ؟ هى لسه فيها رجاله ؟, امال انا مقعد فلافيلو هناك بقاله خمس سنين بيعمل ايه ؟؟؟؟
طيب اقفل دلوقتى يا اكسلنس ونا هتصرف ....
- يامومبيه الحق الموضوع بسرعه , الخبر لو وصل لدوار العمدة هتعلق من رجليا , وسى ماعين ابو شعر , منمر على الكرسى , وهيشمت فيا ...
- لالالا متبقاش متشائم يا اكسلنس , اللى زينا عمرهم ما يمشوا الا على التربه , هو عوكل بيه هيلاقى زينا فين دلوقتى ؟؟؟؟!!!
- الكلام دة عليك انت ماشى , انت لابد فى الدُرة بقالك تسعتاشر سنه , انا غلبان , يادوب بتعلم منك , وبعدين انا الجعرات اللى عندى عنيهم جامدة ومنمرين عالكرسى , انما انت كل اللى عندك غلابه , ومحدش بيستجرى يرفع عينه فيك , بليز يا مونشير , خلص الموضوع دة ..
- اوكيه اكسلنس , متقلقش خاااالص , كن مطمئن واعتبر الموضوع منتهى
يغلق الهاتف .....


مكتب منوب ادارة السلطه العشكريه بالخنيفه المأمون , هاتف على المكتب يرن طويلا بدون ان يرد احد , وبعد فترة طويله يدخل المكتب احد الجنود ويرفع السماعه ويرد :
- جالووووو
- سنه يابهيم علشان ترد ؟ انت مين؟ , فين الجعر اللى عندك؟؟
- فى الحمام ياافاندم
- وقعتك سودة منك له , اجرى اندهله خليه يسيب اللى فى ايدة ويجى بسرعه
- نجوله مين ؟؟
- تجوله مين ؟ انا البيه الكبير يابهيم ....
ترتجف اصابع الجندى وتسقط السماعه من يدة ويجرى باتجاة احد الاستراحات , يدخل على شخص جالس يشاهد احد قنوات الهوت بيرد
-الحج ياافاندم , البيه الكبير عايزك عالتلافون
- ايه , يانهار اسود , وقولتله فين يابهيم ؟؟؟ ,
- جولتله بيظرب
- طيب كويس
ينطلق يجرى ناحيه المكتب ويتناول السماعه بيد مرتجفه , ويقول:
- تمام ياافندم ؟؟
- اول حاجه كدة تدينى تمام النهاردة من شلايب وحلاتيم انت اتنقلت , سمعت ؟؟؟
- تمام ياافندم
- تانى حاجه فين مدير الادارة ؟؟؟
- دا روح ياافندم من ساعتين
- ايه ؟, روح ازاى ؟ انا مش قلت قبل كدة كل واحد يبات فى ادارته ؟ طيب غور انت دلوقتى , وابقى اتصل بمكتبى النهاردة وأدى تمام من حلايب زى ما قولتلك .....


فيلا فخمه يقف على ابوابها عدد كبير من الجنود يرتدون باريهات حمراء اللون , مع عدد كبير من عربات الجيب الحربى والكلاب البوليسيه , تدخل الكاميرا لداخل الفيلا , شخص سمين ابيض اللون , ذو رأس ضخم للغايه , يرتدى ترنج ازرق , يعدو اليه احد الافراد ممسكا هاتف صغير :
- سعادة الباشا الكبير ياافندم
يخطف منه السماعه , ثم يرد بصوت مرتجف
- ايوة يا افندم , اصل الميه فى الادارة كانت مقطوعه ونا كونت مزنوق قوى فروحت البي..........
يقاطعه الباشا الكبير قائلا:
- مش وقته دلوقتى الكلام دة , هنبقى نتحاسب بعدين , طلع رجالتك على قسم 15 مايو دلوقتى حالاااا , هتلاقوا شويه طلبه بايظين اوساخ هناك بيعملوا شغب , تلموهم كلهم وترموهم فى سين 28 والقضاء يحقق معاهم بكرة الصبح , فهمت ياطور؟؟؟؟
- اوامر ياافندم , ماحدش منهم هيبات فى بيته النهاردة ..

يقترب عدد ضخم من عربات الجيب والعربات النيفا من موقع الحادث , الشارع خالى تماما بينما تبدوا الاثار المدمرة على مبنى القسم وعدد من السيارات المدمرة بجواره .....
تنزل احد الرتب الكبيرة وتستوقف احد المارة
- انت ياراجل انت , فين الطلبه اللى كانوا هنا؟؟؟؟
- ياااااباشا دول خلصوا ومشيوا من ساعتين ........


الباشا الكبير يتجه الى مكتبه فى موكب ضخم , يدخل المبنى , يدخل المكتب , وسرعان ما يرن هاتف مكتبه , يرد:
- ايوة ؟؟
- معالى الباشا دوار العمدة مع حضرتك
- الو أأمر سيادتك ياعوكل بيه
- ايييييه يا علقمى ؟؟؟, انت مش شايف شغلك ولا ايه , لسه فيه ناس عندك عندها كرامه ؟؟؟!!! , طب النهاردة القسم , مش بعيد بكرة الاقيهم جايين يكسروا الدوار !!
- سيادتك دا موضوع هايف ودول شويه عيال مش عارفين حاجه , ونا هخليهم عبرة وفتله للكل , ميكونش عند سيادتك اى قلق يا افندم ........


يظهر فى الكادر بداخل مصنع الرجال , مكتب فخم جالس عليه شخص ابيض اللون سمين الجسم ذو لغد ضخم ورأس اضخم , خلفه على الحائط شعار ضخم , يتصبب وجهه بالعرق , يرن الهاتف :
- الو , العيال دى انا هفصلها ياافندم واخليها عبرة لباقى الطلبه و........
يقاطعه علاقيمو على الجانب الاخر من الخط
- واضح انك مش عارف تشوف شغلك يافلافيلو , جهز نفسك تسيب الكليه فى سبعه الجاى , عوكل باشا خلاص , مش هيجددلك تانى . يغلق السماعه .....



المشهد السابع :
ليل خارجى , مساء اليوم التالى واثناء عودة الطلبه ودخولهم من البوابه , تجمع لعدد كبير من ظباط الكليه
- اقف ثابت الطلبه , كل مجموعه تشكل قطار فردى وتقف للتفتيش قدام احد السادة الظباط , كل الطلبه تقلع سترة البدله والقميص .
ينفذ الطلبه بينما يبدوا على ملامحهم التوتر الشديد , وفى الخلفيه يتجمع عدد من سكان العمارات المجاورة فى البلكونات , ويحملون كاميرات فيديو يصورون بها الاحداث ...
يصيح احد الطلبه :
- دول بيصورونا يا افندم
- امنع الكلام يا طالب , دا انتوا سنتكم سودا
يتفحص كتف احد الطلاب الذى تبدو عليه علامه حمراء صغيرة
- ايه دا يا طالب ؟؟؟
- دى حساسيه يا افندم
- اهااااا , حساسيه ولا من خناقه امبارح ؟؟؟؟
يدفعه بكلتا يديه الى احد الظباط الجالسين على كرسى بلاستيك امامه منضدة بلاستيكيه عليها كشوفات خاليه وعدد من الاقلام .
- ياحالصاغ فلان ....... استلم , ادى اول واحد
يعتدل فى جلسته بينما يمسك بالقلم استعدادا لكتابه بيانات الطالب..
بعدها بساعتين , يظهر فى الكادر مكتب احد ظباط الكليه , يدخل اليه احد الطلبه ( العصافير ) وتبدو عليه ملامح التوتر يخاطبه الظابط قائلا :
- ها يا فلان جبتلى اسماء الطلبه ؟؟؟
- مش كلهم يا افندم
- نععععععم , مش كلهم ازاى ؟ , لو ماملتنيش الاسماء بالكامل , وحياتك لا البسك انت التهمه , اصلك مش عارف الطلبه دى هيحصل فيها ايه ....
ترتعد فرائص الطالب بينما يناوله الظابط ورقه وقلما , ويبدأ فى كتابه الاسماء .......


نهار خارجى , ارض الطابور , تجمع لكل طلبه الكليه , اللون الزيتى يشغل اكثر المساحات , الشمس حارقه , يقف الطلبه كأن على رؤسهم الطير , يبدو تكهرب الجو بوضوح , يدخل ارض الطابور عدد كبير من الظباط وكل منهم يحمل ورقه وقلم , ويتفرقون فى وسط الطلبه .
- انت يا طالب , شعرك طويل ليه ؟؟ اسمك , خمس ايام حجز ..
- الطالب اللى واقف يتهز , بياناتك , مكتب قائد اللوا , عدم احترام ارض الطابور ...
- اللى بيعدل البنطلون , بياناتك , خميس وجمعه ...
- الطالب اللى مش شادد ايدة مظبوط , بياناتك , مكتب السيد المدير ....
- الطالب اللى بيادته عليها حبايه تراب , مش ملمع بيادتك ليه , عشر ايام
يرد الطالب مستعطفا:
- والله ملمعها يا افندم ,
- وكمان عشر ايام , الاولانيين علشان البيادة , والتانيين علشان الحلفان ...
- الطالب اللى بيتنفس , مش قولنا ممنوع النفس فى ارض الطابور , بياناتك , دور على السجن .....

وبعد ان تستمر المذبحه حوالى ساعتين , يصعد شخص اسمر ضخم الجثه ذو شارب عظيم على قاعدة العلم ( الجندارى ) , يأخذ التمام من اقدم طالب , ثم يتناول الميكروفون :
- طبعا اللى حصل امبارح دة , منظر سىء لطلبه الكليه , وكان خطأ بكل المقاييس , الطالب اللى يسمع اسمه يجمع عندى هنا , يخرج كشف ضخم ويبدا فى قراءة اسماء , يتجمع عدد كبير من الطلبه امامه بينما يهجم عليهم عدد كبير من الظباط يصيحون بشكل عصبى .....
يكمل الشخص ممسك الميكروفون :
- الطلبه اللى انتوا شايفينهم دول , مستقبلهم اتدمر خلاص , اتدمر تماما , الموضوع دة صعد الى اعلى المستويات , والطلبه دى هتتحاكم عسكريا , عارفين عقوبه التجمهر ايه ؟؟؟؟ , اعدام رميا بالرصاص , واقل حاجه هتتسجنوا اربع سنين , وهتترموا فى السجن الحربى وسط المجرمين , وطبعا هتتفصلوا من الكليه ......
ينهار اغلب الطلبه وتجهش وجوههم بالبكاء , بينما يدوى صوت فى كل ميكروفونات الكليه , يعرفه الجميع , فيصمت الشخص اياه , وينزل يديه بجانبه , يصيح وهو ينظر لاحد المبانى فى اخر المصنع , تمام ياافندم المصنع , يدوى الصوت الجهورى قائلا:
- طبعا اللى حصل امبارح دة , منظر سىىىىىىىىىىىىىىىىىء , وعار علينااااااا , وعلى كل طلبه المصنع , الطلبه دى مش رجااااااااااله , دول عيااااال , ونسوااااااان , من بكرة هنوزع عليهم طرح وحلقاااااااااان , الدفعه دى مش متربييييييييييه , من هنا ورايحححح , المعامله هتتغير تماااااااما , ينادى , رئيص الاركان
- تماااااام يا افندم
- الطلبه دى من هنا ورااااااااايح , تعامل بالعنف والشدة , اى طالب يرتكب اى مخاااااااالفه , من هنا وراااااايح , ولو بسييييييييييييطه , يتدورلى مكتب , ونا هقصرة سنتييييييييييين , انا عايز اسماء عشرة طلبه على مكتبى النهاردة علشان افصلللللللهم , اما الطلبه اللى عملوا الشغب امباااااااااارح , يتحركوا دلوقتى على القضاء السمكرى , خلااااااص , الموضوع خرج برة الكلييييييييه , وهتشوفوا الطلبه دى هيحصل فيها ايييييييييييييييه .
ينغلق خط الاذاعه الداخليه , بينما يؤدى الشخص الواقف على الجندارى التحيه العسكريه , ويتناول الميكروفون مرة اخرى ويستأنف وصله الردح ........



المشهد الثامن :
مكتب ضخم , يتواجد به عدد كبير من الظباط رفيعى الرتبه , فى مشهد يشبه مشهد التحقيق مع ( رامى قشوع ) فى الفيلم الشهير , ويتواجد فى الجانب الاخر الطلبه المتهمين , يصيح احد القادة بصوت جهورى مبهوق :
-الطالب فلان وفلان وفلان يجولى على جنب
فيخرج من بين الصفوف عدد من الطلبه تبدو عليهم علامات العز والنغنغه , يصيح القائد ثانيه :
- الطلبه اللى اتندهت اسمائها , اقدم واحد فيهم يدور على الاوضه اللى فى الجنب دى
يدخل المذكورون الغرفه ثم يتبعهم احد القادة , ويغلق الباب خلفه , بينما يبدأ التحقيق مع الباقون ..

تتحرك الكاميرا ببطء الى ان تنفذ عبر حائط الغرفة المجاورة , الطلبه جالسون على احد الانتريهات الفخمه , بينما يخاطبهم القائد المذكور بكل ود :
- جرا ايه ياولاد , حد برضه يعمل كدة ؟؟؟ , طب دول طلبه صيع وبيئه , ايه اللى يدخلكم فى وسطيهم , وانت يا فوفو , باباك دفعتى , ونا اعرف ان مخك كبير , ليه تعمل كدة , املصلك ودانك دلوقتى ؟؟؟؟
يجيب الطالب :
- والله ماحنا يا اونكل , دا انا كنت معدى فى الشارع بالصدفه علشان اروح اغير بطاريات الصاعق بتاعى , يقاطعه الرجل الكبير قائلا :
- وموضوع الصواعق دى , احنا مش قولنا قبل كدة الصواعق دى متطلعش علشان فى قلق عليها اليومين دول ؟؟؟؟ , طيب عموما احنا هنقفل الموضوع بس لو اتكررت تانى , بجد بجد , هملص ودانكم , واحطكم فى اودة الفيران , يلا يا فوفو ويا توتو ويا ميمى وياسوسو , انصراف على عنابركم , براءة ياض منك له ....
يخرج الطلبه من باب اخر خارجى وتبدوا عليهم علامات الفرح , بينما يبتسم القائد الكبير ابتسامه خفيفه , ويتنهد تنهيدة طوييييله , كمن يسترجع ايام شبابه مرة اخرى ........



المشهد التاسع :
ارض الطابور , اصطفت فى مقدمتها فرقه الموسيقى على غير العادة , تبدو ملامح اجرائات جديدة , بينما يصطف باقى الطلبه المتهمون ( باستثناء السابق ذكرهم طبعا ) امام العلم , يصعد الرجل الاسمر على قاعدة العلم الرخاميه الضخمه , ممسكا بيدة مجموعه من الاوراق , يعزف مارش عسكرى ينتهى بضربه طبله ضخمه يدوى صوتها فى كل ارجاء الكليه , يمسك بالميكرفون ويبدأ فى قراءة الاوراق بشكل سريع وألى :
- اجرئات مجلس الكوليه , المنعقد سعت كذا بتاريخ كذا بشأن كلا من ( ويبدأ فى قراءة اسماء الطلبه ) , حال كونهم من طلبه الكوليه , واثناء نزولهم الاجازة الرسميه بتاريخ كذا, توجهوا متجمعين بعد ان بيتوا القصد والنيه , الى قسم شرطه 15 مايو , وقاموا بتحطيم واجهات المبنى , وبعض السيارات , ( ويبدأ فى ذكر تفاصيل الحادث والخسائربالتفصيل الممل ) ......

- مواد الاتهام : المادة كذا وكذا ( ويبدأ فى تلاوة عدد ضخم من الارقام ) المختصه بحظر التجمهر على افراد القوات المسلخه , والمادة كذا وكذا والمختصه بتجريم تدمير المنشأت العامه , والمادة كذا وكذا والمختصه بمحاوله قلب نظام الحكم .......

- القرار : يدوى مارش عسكرى كالمارش السابق
قرر مجلس الانس باجماع الاراء , فصل كل الطلبه المتهمين , واحالتهم للمحاكمه السمكريه العليااااااا , حيث قرقرت المحكمه ,
اولا : اعدام كلا من المتهمين من الاول للعاشر ......
ثانيا : السجن المؤبد لباقى المتهمين ....
يسقط عدد من الطلبه مغشيا عليه , بينما يخيم الصمت المطبق على انحاء الكليه , وبعد قليل يستأنف الرجل الاسمر الكلام فيقول :
- وبعرض الاوراق على السيد ابن العلقمى , حامى حما الديار , وباش سنجق دار البرين والبحرين , قرر سيادته بالغاء العقوبه الاولى , والاكتفاء بفصل المتهمين , والغاء العقوبه الثانيه والاكتفاء بنزول المتهمين من العاشر الى الاخير , دورتين دراسيتين كاملتين , لينضموا الى الدفعه 105 بدلا من الدفعه 103 ........ , نفذ
يتحرك عدد من الظباط بسرعه , ويقوموا بخلع كتافات الطلبه المفصولين , بينما يقوم اخرون باستبدال كتافات الطلبه المقصرون ذات الشرائط الاربعه , باخرى ذات شريطتين , بينما يهتف باقى طلبه الكليه :
- هيييييييييه هييييييييييييه يحيا العدل , يحيا العدل .........!!!!!!!!!!!


المشهد العاشر :
تظهر فى الكاميرا صورة بالابيض والاسود لاحد المطابع القديمه , ذات الصوت العالى , بينما تخرج منها اعداد ضخمه من الجرائد , تقف الصورة , زوم على احدى الاعداد , فتظهر عناوين المقالات الرئيسيه بالتتالى كما يلى :
- مقال اسامه زرايا : ملالى ايران ومخطط تدمير مصر عن طريق تحطيم الاقسام ....
- مقال احمد موشى : عناصر من الاخوان تحاول اقتحام احد الاقسام تمهيدا للسيطرة على وزارة الداخليه ..
- وفى بوز اليوسف : المحظورة تدبر انقلابا عسكريا ....
- وفى مقال موس طفى بكرى : سعد الدين ابراهيم الخائن العميل يدير منظمه مشبوهه لاثارة الفوضى بدعم من امريكا واسرائيل , الحق ولادك يا ريس ......
- مقال اكسلنت كات : مين غيرك يحمينا من فوضى المختلين عقليا ؟؟؟؟
- جبهه انقاذ مصر : الجيش انتفض اخيرا ضد الطاغيه ....
- العاشرة مساء : هنلتقى النهاردة مع الدكتور ششم الديك علشان يكلمنا عن اضرار الاشعه التلفزيونيه على العيون وكيفيه الوقايه منها ....
- الطبخه الاولى : النهاردة هنكمل حكايه مقتل سميرة موسى , وبعدها هقولكوا على اخر اخبار كرسى عطالله المخرب الفاسد , وبعدين هنحتفل بمناسبه مرور الف ومتين سنه على ثورة الزنج ......
- المريخ اليوم : برضه وللمرة المليون , مختلين عقليا بيكسروا قسم الشرطه , حاجه موووووز مووووز موز ...

المشهد الحادى عشر :
تقترب الكاميرا من واجهه القسم حيث يبدوا عمال عسكريون يقومون بأعادة توضيب الواجهه على نفقه القوات المسلخه , zoom in على باب القسم , يظهر المقموص وهو خارج من الباب , حاملا شنطه ضخمه , بينما يرتدى جلابيه كستور بيضاء مخططه بازرق , ويلبس على رأسه طاقيه من نفس القماش , ويمسك فى يدة سبحه , بينما تبدوا عليه امارات القرف والخقه , ويقول :
- الله يخرب بيت الكليات العسكريه , الله يخرب بيت الامل العام , كان مالها مباحث التموين ؟؟, كنت فيها زى الباشا , ولا كان ماله دبلون الصنايع؟ , كان زمانى اسطى قد الدنيا , حسبى الله ونعم الوكيل , حسبى الله ونعم الوكيل .........

يستبدل المشهد بأخر , تظهر فيه عشه متهالكه , مبنيه بالطين , وفى وسطها مكتب معدنى متهالك , خلفه كرسى خشب مكسور , جالس عليه نفس الشخص ذو القميص المشجر اياة , وقد استبدله بجلابيه بارتى , واضعا كلتا يديه على خدة , بينما يوجد امامه على المكتب عدة تليفون سوداء عتيقه بمنافلًه , وبجوارة كوب من الماء الساخن المعد لعمل الشاى وقد وضع فيه ملعقتان موصولتان بسلك كهربائى يصل لفتحه فى الجدار يتدلى منها سلك اخر , تبدو اصوات عاليه لبهائم , بينما يظهر فى الشباك الحديدى خلفه , احدى الفتيات تطارد مجموعات من البط والفراخ على شط الترعه بجوار غيطان الذرة .......
--- دى منى انا بقى :

..... رساله للاخ وائل عباس : اولا يا اخ وائل مافيش ولا ظابط كان مشارك فى الموضوع دة , مش زى حضرتك ما بتقول , بل على العكس لو كان اى ظابط عرف كان بلغ عنهم فورا , لان ظباط المصنع بيتنقوا على الفرازة , ومن اهم الشروط انه يكون جبان ورعديد , علشان يعلم الطلبه الجبن , فظباط المصنع اخر من يفعل ذلك , اما ما استشهدت بيه من بعض من كانوا يصدرون الاوامر ويسبون باقى الطلبه , فدول هم طلبه القسم النهائى , يمارسون سيطرتهم المطلقه على الطلبه الاحدث كالمعتاد , وكون البعض ينادى بالظابط فلان , فهذا متعارف ومتداول بين اوساط طلبه الكليات العسكريه بالكامل , من باب التفاؤل , وباعتبار ما سيكون .....
اى ان الحركه حركه طلابيه خالصه ........

....... رساله لكل من اثارت الواقعه استياؤة , يا حضرات بدل ماتقولوا ايه الهمج دول , والكلام الفارغ دة , المفروض تفرحوا , لان لسه فيه فى بلدكوا ظباط عندها كرامه لم تنتزع بعد , والمفروض تدعوا عقبال باقى التمانين مليون , وعقبال قسم الخليفه والعمرانيه والدرب الاحمر والازبكيه والمطريه وعين شمس , وقسم اول المنصورة واول المحله , وقسم باب شرق الاسكندريه .......

..... رساله الى فلافيلوا افندى وعلاقيموا بيه : لو كونتوا قادة دكورة , بتعرفوا تجيبوا لولادكم حقهم , ولو كانوا الطلبه دول حاسيين ان ليهم ضهر يجيبلهم حقوقهم ويحافظ على كرامتهم , قصاد توحش بهايم ميليشيات الجنجويد بتاعتنا , مش يهينهم ويطلعهم الغلطانين فى النهايه , ويعاقبهم كمان بدل ما يجيب لهم حقهم بالشكل القانونى , لو كونتوا كدة , مكانش دة حصل , وكانت الطلبه دى راحتلكوا من الاول , بدل البهدله وشغل البلطجه , لكن مع الاسف , انتوا مش كدة , والطلبه عارفه كدة كويس , وعارفين ان حقهم مش هيرجع الا بالدراع , ودى مش اول مرة , لو تفتكروا حادثه السراج مول , وحادثه مول طلعت حرب , وقسم الازبكيه , وقسم اول المحله , وغيرها كتير , و كتير غيرها لسه جاي فى السكه ....
من الاخر , مهما دبحتوا الطلبه وخوفتوهم , طالما انكم مش بتجيبولهم حقوقهم , فالفيلم الهندى دة هيتكرر كل سنه كالعادة ..........

...... رساله الى حبايب قلبى واحفادى 103 , 104 , 105 , انا كونت فاكرها سوَست وماعدتش بتطلع رجاله , وقولت اخر مرة زرتها فيها , انها راحت عليها خلاص ومن هنا ورايح مش هاتخرج غير جاكى وسوسن , ومصنع الرجال خلاص هيتقلب مصنع جبنه رومى , بس الحمد لله ظنى مطلعش فى محله , لسه فيه رجاله , اينعم الشغل مش عاجبنى , وفيه جبن وتخاذل , بس كويس برضه انكم لسه فيكم النفس , معلش ياولاد للى هيشيل الليله منكوا , بس هى دى ضريبه الرجوله , وانتوا مش اول ناس تعملها ولا اخر ناس ........

..... رساله الى ميليشيات الجنجويد ( بتاعنا ) , قلنالكم مييييت مرة ملكمش دعوة بطلبه مصنع الرجال , مافيش فايدة فيكم ؟ مش عايزين تتعلموا ابدا , لازم الخازوق بتاع كل سنه ؟ طبعا مانتوا متعودين تلطشوا فى الكل من غير ما حد يقول بم , بس على فكرة , بغبائكم , وغشوميتكم , الوضع دة هيتغير تدريجيا , مش هقول من الطلبه دول لان دة اساسى طبعا , لكن هقولكوا من اللى انتوا فاكرين انهم ماتوا ومش هينطقوا ابدا .....
يلا كل قسم وانتم طيبين .........


المشهد الاخير :
احمد سعيد جالس على سطح منزله , فى ظل شجرة الورد البلدى الضخمه بتاعته , يرتدى فانله بحمالات وبنطلون كستور , صوت الفونوغراف ينبعث منه تغريد مطربه المفضل ( سيد الصفتى ) بينما يمسك فى يدة اليمنى عدد قديم من مجلته المفضله ( سوبر ميكى ) وفى يدة الاخرى سيجارة حشيش ضخمه ..
وفجأة يحيط به مجموعه من الرجال تبدوا عليهم ملامح الشراسه , ويصيح زعيمهم :
- انت مقبوض عليك , تعالى معانا
يسأل احمد بينما تبدو على وجهه ملامح الذهول :
- ليه , بتهمه ايه ؟
- بتهمه التحريض على قلب نظام الملك ياروح امك ..
- مش من حقك , انا ال........
يصيح الزعيم :
- شيلوة
فينهال الجميع عليه ضربا بينما يحملونه لاسفل , وفى نفس الوقت يهجم احد الافراد على جهاز الكمبيوتر وينتزعه من مكانه , بينما يبعثر الباقون كل محتويات الشقه ........

- شعار البوست : الموت علينا حق

............. انتهى ................