الأحد، 31 يناير، 2010

لحظه من فضلكوا ياجماعه


اسمعوا التراك وانتوا بتقروا البوست
اللى مش هيسمعه
ميزعلش
همد عالرجلين علطول
واحنا فى الشتا
والضرب على الرجلين بيوجع
انا قلت اهو




انا متضايق جدا
بسبب مواقف بتحصل وبتتكرر كذا مرة
الموضوع النهاردة لاهو سياسى ولا تاريخى
الموضوع من قلبنا احنا
المدونين
وعلشان متفكروش كتير
هجيب من الاخر
الموضوع دة بسبب موقف
الاخت نوران
فى اللقاء الاخير
وبوستها الاخير
اللى هو

( بييييييييييييييييييييض )

على حد وصفها
انا مش بنتقد نوران
ولا بنتقد اشخاص
بقدر ما بنتقد افكار
وقيم ومبادىء
انا شخصيا
شايف انها مغلوطه
بدون اعادة القصه
علشان مطولش اكتر ما انا ناوى اطول
اللى حضر اللقاء
واللى قرا البوست الاخير لنوران
واللى بيتابع مواضيعها
هيفهم اللى هتكلم فيه
نخش فى صلب الموضوع
هل الصراحه المطلقه
شىء مطلوب ؟؟
ولا هل هى شىء جميل يعتز بيه الانسان ؟
انا شخصيا
شايف انه لأ
لان فيه فرق كبيييييييييييير جدا
بين :
- الصراحه المطلقه
- والصراحه ( بدون اطلاق )
- واللباقه والكياسه
- والدبلوماسيه
- والتفاق والتملق

لما اظهر خلاف ما ابطن لشخص معين
بغرض الوصول لمنفعه معينه من وراة
واجى بعد كدة وهو مش موجود
واطعن فيه
ولما اكون انسان جبان
بخاف اطعن حد فى وجودة
وبفضل انى اقوم بالمهمه دى من وراة
ولما اكون متتبع لعورات الناس
وبدور على موضع النقائص فيهم
علشان اظهرها واضخمها
ولو ملقيتش بصنع من عندى وانسبه اليهم
كدة ابقا انسان منافق
ورمه
وزباله

ولما اكون بارع فى التملص من مواضع الزنقات الكلاميه
واقدر اخرج منها ببراعه
بدون ما ازعل حد
وارضى جميع الاطراف
ويكون لسانى حلو
وفيا خصله صغيرة من التملق
كدة ابقا دبلوماسى
ولما اعرف انصح اللى قدامى بدون ما ازعله
واوضحله غلطه بدون ما اجرحه
بينى وبينه
بغرض انه يكون احسن
وبغرض انه له عندى حق النصح
واوضحله عيوب بارزه فيه بشكل مهذب غير جارح
ويكون اسلوبى سلس ومهذب فى الكلام
دى اسمها
لباقه
ولما الاقى قدامى انسان زباله
ورمه وقذر ومتسلط
ولما يكون بيحاول ينال تملق الغير
واجى انا
اقوله انت كذا وكذا وكذا
بدون ما اضخم الموقف
وبدون ما احليه بشويه ورد
لانى وضعت فى موقف كان لازم اتكلم فيه وارد عليه
ومعادش بد من المواجهه
ومافيش قدامى غير انى اما انافقه او اواجهه بعيوبه
واقول اللى فيه النصيب
دى اسمها صراحه
لكن
لما يكون مافيش اى وصلات او بوابات بين عقلى ولسانى
واللى يهفنى الشوق عليه اقوله بدون حتى ما افكر فيه
ولما اجرح ناس بدون اى داعى
دى اسمها صراحه مطلقه
ودى شىء مش كويس
كلنا فينا عيوب
وانا اكتركم
مافيش حد فينا معندوش نقط سودا فى حياته لما بيفتكرها بيبص فى الارض
وانا اول واحد فيكوا
احنا بشر
مش ملايكه
كمان اعتقد مفيناش شياطين
بالمعنى الاصلى للشيطنه
يعنى اكتر الناس وساخه
بتلاقى فيهم ولو مللى خير ونور
قد يخرج احيانا فى ظرف معين
وقد لا يخرج
يبقى ليه نجرح بعض ؟؟

فاكرين قصه الحسن والحسين لما لقوا راجل عجوز بيتوضا غلط
وعملوا نفسهم بيتوضوا قدامه ولفتوا انتباهه بصنعه لطافه
عارفين ليه
علشان ميجرحوش شعورة
ويتضايق لان اطفال صغيرة بيعلموة
مع انهم صح
وهو غلط
انما دى الاخلاق ( العاليه )
نمط راقى منها قليل قوى اللى يعرفوة ايامنا دى
ودى فوق الاخلاق الكويسه اللى احنا نعرفها

ممكن انا لو متجوز
وعلى فرض انى كنت مقطع السمكه وديلها قبل الجواز
واعرف بدل الواحدة 34454 واحدة
وجيت فى ليله جميله
وانا حاطط راسى فى حجر مراتى اللى بحبها
واحنا فى قمه الحب والرومانسيه
تخيلوا معايا المشهد دة :
- حبيبتى
- ايوة ياحبيبى
- عاوز اقولك على حاجه
- قول
- بصى انا صريح , ومحبش اخبى عليكى حاجه فهقولك ومش عاوزك تزعلى
- قول ياحبيبى ومتخافش
- بصى ياستى,
انا كنت اعرف قبل منك,
فلانه وعلانه وتنتانه
وعملت مع الاولانيه كذا
والتانيه كذا
والتالته كذا
واتجوزت الرابعه عرفى
والخامسه مشيت معاها اربع سنين
وكانت بتجيلى الشقه من ورا اهلها
وووووو......................
شفتى بقى انا صريح ازاى
ومش بخبى عليكى حاجه

هل انتوا شايفين ان مراته بعد ما تسمع الكلام دة هتكون هى نفس الانسانه اللى كانت قبل ما تسمعه ؟؟
-مستحيل
هل ضرر الكتمان هيكون كان هيبقى اشد من الضرر والالم اللى اصاب مراته لما سمعت الكلام دة ؟؟
-لأ .

حبيبتى
امبارح شفت فلانه جارتنا وكانت لابسه طقم ,, انما ايه , وللللللللللعه
بصراحه كانت جامدة موت وكانت عنيا هتطلع عليها , بس بعد ما روحنا زعلت انى خنتك فى خيالى وحبيت اصارحك بالموضوع ...

هل الزوجه هتفرح وتنبسط وتقول ياحلاوتك ياجمالك يازوجوجى ياللى مبتخبيش حاجه عنى ؟
ولا هتزعل وتفقد الثقه بيه بعد كدة وتتابع حركه عينيه طول ما هما ماشيين فى الشارع ..
طبيعى جدا ووارد ان الزوجه فى يوم ونتيجه ظروف معينه تكون مش طايقه نفسها وحاسه بالقرف من كل الناس وعلى وجه الخصوص جوزها
دا طبيعى ودى ظروف بتيجى وبتروح ومش شرط يكون وراها سبب معين من الزوج
تخيلوا الزوجه فى الظروف دى قالت له لما دخلوا يناموا بالليل :
- يافلان ياجوزى
- نعم ياحياتى
- متنامش جنبى فى السرير النهاردة علشان انا قرفانه منك ومش طايقاك
تخيلوا انطباع الزوج هيكون ايه ؟

- فلان ياحبيبى
- ايوة ياروحى
- انت كرشك كبر قوى وبقى منظرك بجد مقرررررررررررررففففف , فلازم تخس
دى اسمها صراحه مطلقه
وهى ان اللى احس بيه اقوله علطول بدون اى فلترة وبدون موقف يحتم عليا ويضطرنى اقوله اصلا ...
ايه رأيكم ؟
كويسه ؟؟؟
اظن اللى عاوز اقوله وضح ومش محتاج تفصيل اكتر من كدة

ياجماعه
احنا ليه ربنا خلقنا مش بنشوف افكار بعض زى باقى الحاجات الماديه ؟
اقولكم ليه
علشان كلنا
حتى افضل الناس فينا
جوا عقولنا
ثقوب سودا
وصناديق زباله
رحيتها وحشه
دا فى كل انسان
واحنا بنحاول على قد ما نقدر نزيلها ونقللها
او نكبرها وننميها
وكل ما ننجح فى القضاء على اكبر كم منها
بنكون اطهر وانقى
بس محدش بيقضى عليها ولا بيتخلص منها بشكل كامل
فمن رحمه ربنا
انه ادانا القدرة على اخفاء العورات العقليه والطبائعيه دى
علشان منكونش وحشين ( قوى ) قدام بعض

- من رحمه ربنا انه خلانا منسمعش الا ترددات بسيطه جدا
لا تعادل جزء صغير من الاصوات الموجودة حوالينا
لان لو سمعنا كل حاجه
هننطرش
ونتجنن

- ومن رحمه ربنا برضه
اننا مش بنشوف كل حاجه حوالينا
علشان لو شفنا
هنتعمى
ونتجنن
ونموت من الرعب والفزع من اللى هنشوفه

- ومن رحمه ربنا
انه خلق لالسنتنا باب
علشان وقت اللزوم
يتقفل ويسكتها
ودة لان الانسان الاصل فيه انه صامت
ومش بيتكلم الا عند الضرورة والحاجه
وليس العكس

احنا طبعنا معقد جدا
والمشكله مش فى الصفات الوحشه اللى جوانا
دى امرها سهل
المشكله فى الصفات الكويسه
اللى اساسا بتنحسب من الفضائل
زى:
- الصراحه
- الكبرياء
وغيرهم
لما بيتوضعوا فى غير موضعهم
بيجيبوا لنا مشاكل
وبنخسر كتييييييييييير قوى

انا مثلا
بصفتى ميزانى صرف
والميزانيين هيفهموا كويس اللى اقصدة
انا ليا صديق
بمعنى ادق اعز اصدقائى
مفترقناش عن بعض من سنه 1988
عمل كام حركه نص كم معايا فى الفترة الاخيرة
فكان رد فعلى انى قاطعته
مش لانى كرهته
لأ
لانى مقموص منه
بقول مقموص مش زعلان
وبقاطعه ( مؤقتا )
علشان اشد ودنه
واقوله متعملش كدة تانى
وهو حاول يكلمنى كذا مرة وانا خلعت منه
لغايه لما بطل يتصل بيا
انا شخصيا
هموت ويكلمنى
وكل ساعه ببص فى الموبايل اشوف اتصل ولا لأ
ونفسى اروح اصالحه انا
لانى بصراحه
زودت العيار معاة حبتين
كان نفسى يحسسنى انى غالى عندة
ويستحمل رخامتى
وييجى يصالحنى
بس العيار تقل منى قوى
لغايه لما اتخنق
دلوقت انا اللى عاوز الم الدور
بس كبريائى بيمنعنى من كدة
ودة غلط
لانى غلطت انى متكلمتش معاة من الاول وصارحته بسبب زعلى
جايز يكون مش واخد باله اصلا
وغلطات لانى زودت الموضوع عن حدودة
فى ظرف زى دة
انا على وشك انى اخسر صداقه عمرها 22سنه
واخسر شخص انا اغلى عندة من بيته وعياله بدون مبالغه
تفتكروا صداقه زى دى
فى الزمن دة
تسوى كام
وممكن تتعوض ولا لأ ؟؟؟؟
هل كبريائى يستحق التمن الباهظ دة ؟
وخصوصا انه مش فى محله ؟؟؟
وحطوا تحت كلمه ( مش فى محلّه ) دى عشر خطوط
وصلت ؟

انا كنت ناوى اخلى الكلام دة عبر الايميل
بس السبب اللى خلانى اكتبه على الملأ
ان دة مش تصرف فردى
لأ
دا فيه تيار داخل الوسط التدوينى متبنى المبدأ دة
هسميه ( تيار الصراحه راحه ياعينى )
او( حزب الصراحه الوحدوى) ,
او الجناح العسكرى للحزب المسمى ( انا عاوزك تصارحنى حتى ولو تجرحنى )
علشان كدة فضلت ان بوستى يكون على الملأ
وارجو انه ميزعلش حد
وخصوصا نوران
لانى بجد مقصدش ان حد يزعل منى
وكنت براجع كل كلمه بقولها وغيرت كلام كتير علشان ميطلعش البوست بشكل جارح
فلو خانتنى بعض الالفاظ
فانا اعتذر عنها لان مقدرتى اللغويه مقدرتش تستبدلها بالفاظ احسن
ودة عيب من عندى انا .

نقطه قبل اخيرة
معروف ان الوسط التدوينى فى الفترة الاخيرة لَمْ
بسبب انتشار النت دخل قطاعات كبيرة من المصريين
انا مش بهاجم فئه معينه
ولا بتعامل مع الموضوع بطبقيه
لأ
اقصد ان زيادة العدد
جه معاها بشكل منطقى زيادة فى الناس الوحشه
زى ما الناس الحلوة زادت
وبما ان الحلو قليل
والوحش اكتر
فطبيعى ان الوحشين يظهروا بشكل كبير
احنا كلنا
او اغلبنا
بنحاول نعرف ناس قريبين من تفكيرنا
ونكون صداقات
انا شخصيا كدة
والا مكنتش عملت المدونه دى
كنت كتبتها فى كشكول وسجلته فى الشهر العقارى ودمتم .
واظن محدش ينكر انه كون صداقات رائعه من التدوين
وعرف ناس كان عمرة ما هيعرفهم لو مكانش دون
وانا شخصيا كدة
وبعترف
الفايدة كبيرة جدا
وتستاهل
اننا نخاطر
بصدام مع ناس وحشه
وباننا نتخدع فى ناس مش كويسه كنا معتقدين فيها الخير
لان العائد مغرى
والموضوع يستاهل
وشىء طبيعى اننا قصاد كل انسان كويس نعرفه هنتخدع فى عشرين واحد مش كويس
دا طبيعى
المهم نستحمل
ونكمل
ونقدر نفهم الناس كويس
ونلحق نفسنا قبل ما نندب فوق دماغنا
وادينا بنتعلم

نقطه تانيه
لو حد قالنا عن انسان انه مش كويس
يارايت مناخدش الكلام دة على انه مُصدق
لان الشخص اللى اتكلم عنه ممكن يكون هو اللى مش كويس
او ممكن يكون كويس بس مبيفهمش فى معادن البشر
او ممكن يكون بيفهم بس فلتت منه المرة دى
احنا بشر
ولينا مشاعر
ومشاعرنا بتأثر على تصنيفاتنا للناس
دا شىء طبيعى
يبقى انا بدورى
اخد الكلام
اوزنه
واحطه فى اعتبارى وانا بتعامل مع الشخص دة
بس مكونش مكون رأى مسبق عنه
يعنى احرص
ولا اخونش
اما اتاكد من صدق الكلام
او اعرف انه مش فى محله
دا موضوع بديهى

النقطه الاخيرة
بالنسبه للاجتماعات التدوينيه
انا حضرت منها واحد بس
بتاع اسكندريه
بصراحه انا كنت واخد فكرة
لقيتها عكس اللى شفته تماما
يعنى كنت فاكر ان الناس كلها بتتكلم مع بعضها وكدة
لقيت العكس
نظام الشلل
كل اتنين تلاته يعرفوا بعض واخدين جنب وهاتك ياكلام
واللى جاى
بس علشان يشوف فلان وفلانه اللى يعرفهم
طيب
اللى ميعرفش حد
يعمل ايه ؟؟
هل دا ذوق
هل دى اخلاق ؟
انا شخصيا على حظى مكنتش اعرف حد من الحضور
باستثناء بدرواى
اللى كتير كان ساكت
ولا حتى دخلت فى مدونات حد منهم ولا اعرفها
على لاقل كان هيبقى عندى خلفيه عن الشخصيه اللى بتعامل معاها
لقيت انى على نص اللقاء وقاعد زى الطربوش
قلت لأ
مبدهاش
وبدات احشر نفسى مع اى حد
واتكلم
والحمد لله
عرفت ناس كويسين
الرك والباقى على ناس تانيه
خجوله
قعدت من الصبح لغايه بعد العشا ساكته ومنكمشه
لانهم ميقدروش يتواصلوا مع حد بدون تشجيع من الحد دة
انا واثق
ان الناس دى كل مدى كانت بتتخنق اكتر وتزعل .
من فضلكوا
راعوا بعض
مش هقول ان دى قله ذوق
لا
بس احنا بنتكلم على مستوى راقى من الذوق
بيكون الذوق العادى قصادة قله ذوق
الناس اللى بتقول ان لقاء المدونين وحش
بسبب الشلل
معاهم حق
ودة مش لان الناس وحشه
انما لان النظام هو اللى غلط
الغريب ان الناس دى نفسها اول من يطبق النظام دة
وبعدين بترجع تشتكى منه
انا شخصيا اتضايقت من النقطه دى فى لقاء اسكندريه
مش لنفسى بقدر ما اتضايقت لناس تانيه كانت موجودة وفضلوا مع نفسهم طول اللقاء
مع العلم ان العدد كان صغير نسبيا
والظاهرة دى مكانتش واضحه قوى
فمن باب اولى المشكله هتكون اكبر مع عدد ضخم زى اللقاء اللى فات

الرسول عليه الصلاة والسلام
نهى عن ان اتنين يوشوشوا بعض فى حضور شخص تالت
لان دة بيضايقه
لازم نحترم بعض اكتر من كدة

اللى عاوز يقابل اصدقاء التدوين القدامى
يقابلهم منفرد
اكيد معاة ارقامهم وعارفهم كويس
كلموا بعض
وانزلوا اتقابلوا فى اى حته

انما اللقاء
ارجو انه يكون عام
ويكون النقاش فيه عام
بدون تحزب وشلل
علشان تدوا الناس ( الدخلاء ) اللى زيي
الفرصه انهم يتعرفوا على ناس كويسين زيكوا .....

امبارح

البوست دة استدراك للبوست اللى فات
مكنتش ناوى اكتبه
بس لازم اوضح كام نقطه كدة
علشان الناس متفهمش صورة غلط
وفى نفس الوقت بدون ذكر تفاصيل ملهاش لازمه

اللقاء بتاع امبارح دة مالوش اى دعوة باللى بعمله
وهو فى الاصل متعلق بمشكله كبيرة فى شغلى انتهت ولله الحمد من فترة
بس انفتح موضوعها تانى امبارح وعلشان كدة انطلبت للقاء دة

اللقاء ذات نفسه مكانش هيضرنى فى حاجه بالعكس , كان ممكن يفيدنى كمان
بس المشكله
انه قبل اللقاء دة وبسببه اتعمل تحفير كبير ورايا علشان تنحط تقارير كامله عنى قدام هذا الشخص
وبكدة دخل موضوع المدونه , وكمان تفاصيل الكلام اللى بكتبه فى التقارير دى
وانا عرفت كدة قبل ما اروح
وبكدة كانت طبيعه اللقاء ممكن تتغير تماما
وتنقلب للعكس
لان التقريردة
اهم من الموضوع اللى هروحله اصلا
وبكدة كان احتمال الضرر وارد بشدة
لذلك قلت لكم احتمال مرجعش البيت

الشخص دة مهم جدا
واقدر اقولكم انه فعلا فوق القانون
ومحدش فى مصر من طولها لعرضها بيقدر يفتح بقه بنص كلمه عليه
ولا معارضه ولا دياولو

فضلت منتظرة برة المكتب من سبعه الصبح لسبعه مساء
فى البدايه عمل دربكه وحراسه وعربيات ووىىىىىىىىىىىواااااااااااااااااااااااااااااوىىىىىىىىىواااااااااااااا
ايه دة ياجماعه ؟
دا الباشا رايح يصلى الضهر
!!!!!!!!!!!!!!!!!!!
يالهوى
هو من امتى بيصلى ؟؟!
وجماعه كمان !
لا لا لا لا

مش بقولكم البلد دى بتحصل فيها حاجات غريبه
ايه الهدى والتقى دة كله

ولما جيت ادخل قبل المغرب كدة
جاله تليفون طويييييييييييييييييل
ولايت الدربكه اشتغلت تاااااااانى
قال الباشا بيعتذر
علشان راح يعزى

اولا
هو من امتى بيعتذر
ايه الاحترام الشنيييييع دة
وكمان رايح يعزى
مش بعادة اصلا
وعلى كدة بقى هيقعد ويسمع قرآن
لا
لا
لا
بقولكم البلد دى بيحصل فيها حاجات مش طبيعيه

مش بعيد الاقيه بكرة اطلق لحيته

عموما
اللقاء اتاجل لاجل غير مسمى

بس اللى عاوز اوضحه
ان اللى حصل دة
مش بسبب انى شوجاع ولا ناشط ولا اى حاجه من الكلام دة
انا شخص عادى
عمرى ما مشيت فى مظاهرة
ولا ناوى مستقبلا
ونشاطى منحصر فى العالم الافتراضى دة
يعنى انا مش بطل ولا انا ناشط ولا بتاع
علشان محدش ينفخ فيا عالفاضى
ولا يفتكرنى حاجه كبيرة
ولا حد تانى يقول دا بيعمل بروبجندا
ولا دعايه
ولا بيلفت الانتباة

على اى حال زى ماقلت
اللقاء اتاجل
لمعاد غير معروف
والمدونه بسبب الموضوع دة
اتحطت تحت المنظار
من جهه معينه
ومستقبلا
هتنضم لهذة الجهه
جهات اخرى


انا قلت اللى عندى خلاص

السبت، 30 يناير، 2010

قاعد على قلبكوا ..

خير ياجماعه ان شاء الله
انا لسه واصل البيت
بعد يوم متعب جدااااااااااااااااااااااااااااااااااااااااااا
وانتظار 12 ساعه قدام المكتب
معلش
مش هقدر اتكلم دلوقت
علشان تعباااااااااااااااااااااان
بس حبيت اطمنكوا
بصراحه
انا مبسوط قوى
مش علشان الموضوع العبيط دة
لأ
علشان اكتشفت ان فيه ناس بتعزنى
:)

الخميس، 28 يناير، 2010

لوياثان



بلاش تقروا البوست من الريدر واقروة من المدونه
اسمعوا التراك
واتفرجوا عالصور
واقروا الكلام
وعيشوا احلى مافى اللحظه ...


واتتنى فكرة فى بدايه هذا العام ومازالت تتملك عقلى حتى صارت اشبه الى اليقين.
حياتى تتميز بالتغيرات العنيفه والانحناءات بالغه الحدة,

هذة حقيقه استوعبتها مبكرا..

حياتى عبارة عن طريق رتيب وممل تتخلله انحناءات عنيفه بشكل شبه منتظم.
بقدر ما هو مؤلم هذا الوضع,
الا انى اعتقد ان هذه التغيرات من اهم عوامل تشكيل وقولبه شخصيتى
فانا مؤمن بان التغيرات فى حياة الشخص هى التى تكسبه الخبرة , والالم ياتى بالحكمه والمعرفه , والحكمه والمعرفه بدورها تجلب الالم , وتلك التغيرات ( العنيفه ) تختصر الطريق امام ذلك كله .
فالعمر قصير للغايه
ومازال امامى الكثير لاتعلمه
فمرحبا بالسرعه القصوى
فقط انا اعلم شىء واحد
اننى بعد كل واحد منها , لا اعود نفس الشخص الذى كان قبلها
بل يزداد عقلى اتساعا وروحى انبساطا .

فى البدايه كنت اشفق على بعض عناصر بداخلى من ان تنكسر او افقدها من جرّاء ذلك
الا اننى اكتشفت قريبا ( بعد ان اعتقدت العكس لفترة طويله ) انها اشياء لاتموت ولا تنكسر , فقط تتوارى فى الظلال لفترة ثم تخرج لتفرض نفسها على ارض الواقع بنفس قوتها السابقه وبسرعه عجيبه .

الشىء المهم ,
انى طالما اعتقدت ( ومازلت ) بوجود الله بقربى , وبرعايته لى .
ولذلك
فانا افوض امرى اليه
فهو يدبر , وانا لا احسن التدبير ( كعادتى دائما )
هو رحيم , بينما انا فظ وقاسى فى كثير من الاحيان ( حتى على نفسى )
ببساطه ,, هو الله , وانا العبد
------
نفس الاحساس شعرت به منذ حوالى 11 سنه , قبلها بعدة اشهر , حاسه غريبه , تشبه حاسه الشم , الا انها غير ماديه , ولا تتم بواسطه الانف , انما بشىء خفى بداخلى لا اعلمه , ليس معنى هذا انى ادركت صورة ما هو قادم , فقط شعرت به , احسه , واحس بمدى قربه منى , واحس بمضمونه
وقد كان , وتغيرت حياتى بشكل لم اكن اتوقعه فى احلامى , وتغيرت معها شخصيتى بشكل اذهل المحيطين بى ..
ولم يخب احساسى
----
بعدها بعدة سنوات , تكرر نفس الموقف
---
بعدها بسنوات اخرى
حدث نفس الموضوع
الا اننى فى هذة المرة عرفته بكل تفاصيله
حتى اننى كتبته قبلها بحوالى اربعه اشهر
حتى اعود اليه عندما يحدث كى اتاكد انا مابى ليس مس من الجنون .
وقد كان
المفترض ان التغيير هنا كان مؤلم
وعنيف
وقاسى لاقصى درجه
وكفيل بقصم اشد الرجال
وانا لا احسب نفسى منهم على اى حال
الغريب فى الموضوع انه مر على كنسيم عابر
كم هو ملفت للنظر منظر النبته الصغيرة وهى تتمايل امام ضربات الريح فى مرونه بينما تتهاوى الاشجار ويتساقط النخيل من حولها
بالتاكيد السر كامن فى مرونه تلك النبته
ولكنى فى الاساس عنيد لاقصى درجه وابعد ما اكون عن المرونه .
كنت حينها اشعر بذلك الغلاف الالهى الذى احاطنى به ربى
وتلك الصفه التى صبها وافرغها على افراغا
وهى التى اعلم علم اليقين بانى لا املك منها مثقال حبه من خردل
الا وهى الصبر ...

يقولون ان الضربه التى لاتقتلك تقويك
وان الازمات تزيل الخبث والشوائب عن المعادن وتكسبها النقاء .
لا اعرف ما حدث بالظبط
الا اننى شعرت انى مخلوق تتم صياغته من جديد ...
وحين اراد الله ان يمن على بكشف الازمه
امعانا فى الرحمه
وغايه فى الفضل
اعاننى عليها ثم نسب الى فضيله الصبر , الهمنى ان اطلب منه الرحمه كى يمن على بكشفها
لازلت اذكر صبيحه ذلك اليوم
يوم الجمعه
اخر اغسطس
2007
لا اعرف لماذا صحوت مبكرا , شعرت بشىء غامض يعترينى , رغبه صارخه فى مناجاة ربى , ذلك الاحساس اعرفه
نعم , تلك النفحات الرحموتيه , اشعر بها واتنفسها , فيقال لى بداخلى , هاهو الباب قد انفتح فلا تفلت الفرصه
والغريب انى بدلا من ان اجعلها مناجاة شفويه كما هو متبع
وجدت نفسى ادونها كتابه
على الرغم من كرهى للامساك بالقلم
الا انى كتبت
كتبت ما اعلم انه لم يكن ليخرج منى
فانا اعلم من اين جاء الكلام
وجاء الرد سريعا
خمسه ايام بالتمام والكمال
وفى نفس توقيت الكتابه
جاء الفرج
وخرجت من بين فكى وحش لا يرحم
وسط تعجب وذهول البعض
وحقد البعض الاخر
وابتسامه منى ( اعرف مغزاها جيدا )
واسرعت لنفس الصفحه التى شهدت مناجاتى ودونت فيها ما حدث
------
التغير القادم سيكون فاصلا
هكذا اظن والله اعلم
سيكون عنيفا كما احسب
الا انه يختلف عن سابقيه
بانه مستتر
لا اعلم كنهه
ولا ادرك اتجاهه
فقط احس بعنفه
فهل تدور العجله مرة اخرى
وهل يصعد للقمه من كان فى القاع؟
ويخر الى القاع من تربع على القمه؟
فتلك هى الحياة
وهذة هى هندسه الدوائر
فاى عجله تحترم نفسها ولا تكف عن الدوران
لابد وان تصير تلك النقطه التى كانت تلامس الارض فى قمه العجله بينما تهبط قمتها لتلامس الارض بدورها ,
طالما ان العجله تدور
وبما ان الحياة مستمرة
فلابد من تغيير الاوضاع
ودوام الحال من المحال
(وتلك الايام نداولها بين الناس )..

نداولها ؟؟؟

كم هى معبرة هذة الكلمه

-----

فوجئت مساء امس بدعوتى للقاء احد ( الاجنحه ) الرئيسيه من اصحاب ( تلك الايام ) التى يداولها ربى بين الناس .
بمعنى ادق هو استدعاء وليس دعوة .
فجأة تكدر يومى الهادىء الرتيب
وعلى خط الهاتف اللعين الذى كففت عن العمل به منذ سنوات
انهالت على مكالمات من كل حدب وصوب
فى ساعه واحدة تلقيت قدر من المكالمات اكبر عددا من مجموع ما تلقيته من مكالمات خلال العامين المنصرمين .

:D

ها انا مرة اخرى
اجد نفسى داخلا جحر الافعى
مجبر اخاك لابطل
قد اصعد للاعلى بسرعه الصاروخ
وقد اهوى الى القاع كقالب طوب
لا ادرى

الا اننى اعلم شيئان :
- الاول اننى لن اكون وحدى
كما لم اكن وحدى من قبل
ولن اكون بعد باذن الله

- والثانى
ان الرافع
والخافض
هو الله
وما افاعى وسباع ذلك الزمان
الذين ترتعد مهم فرائس الخراف
ماهم الا دمى ماريونيت
ضعيفه عاجزة عن الحركه
بدون الخيوط الرفيعه الواهيه
التى تتحكم بها دمى اخرى اكبر منهم
وفى النهايه
تتحكم القبضه الالهيه فى الجميع ....

فلماذا اذن اختار الطرق المتعرجه
ولماذا لا اصل للمصدر
وللمحرك
بمعنى ادق
( المهيمن )
طالما ان الكل ملك يمينه
ودعنى اذن من تلك الخيالات واشباح الوحوش
التى عبر عنا المتصوف البارع والقائل فى احكم ما قرات من ابيات :

شخوص واشكال , تمر وتنقضى
تفنى جميعا والمهيمن باقى

وكما هدانى ربى منذ زمن للغوص فى بحار التاريخ
حتى اكتشف بقلبى معنى هذا الكلام
وارى بوضوح
مئات
والاف
الدمى
وماكيتات الوحوش والسباع
فى كل عصر وكل ارض وبكل لسان
كم كانت مفزعه
ومخيفه
ويصم زئيرها الاذان ويشقق القلوب من الهلع
ذهبت كحفنه تراب فى ريح عاصف
ولم يبقى منها الا بضع كلمات فى كتاب ما
او اطلال حجارة فى موقع ما
فكما نجا فرعون بجسدة كى يكون عبرة لمن ياتى بعدة
كذلك ابقى الله تلك الاطلال
وهذة الكلمات
كى تكون ايه
ايه لمن كان له قلب او القى السمع
ايه لمثلى من ضعاف النفوس
وسيله مساعدة لاجتياز الضعف البشرى المعهود
فماكيتات اليوم
سرعان ما ستكون غدا
هباء منثورا
ولا يبقى منها الا الشاهد
نقاط حبر
واطلال
وكذلك انا
ساكون كلمه فى كتاب ضخم
او لا اكون على الاطلاق

شخوص واشكال...

تلك المعضله والقصه الطويله التى حار ذوى العقول فى تدوينها وافنوا اعمارهم وانطفأت شعله اذهانهم فى تدوين المجلدات الضخمه عنها
صيغت فى كلمتان
تسع حروف:

شخوص,,,
واشكال..
.

فمرحبا بجحر الافعى
ومرحبا بالتغيير
فامرى ليس بيدى
انما مفوض لرب الافاعى , وقاصم ( الاجنحه ) .

----

اعتذر لمن وعدتهم بحضور لقاء الجمعه
فالموقف الان لا يسمح
فلى لقاء ( حميم ) مع الافعى المُجَنّحَه صباح السبت .

قد يكون هذا اخر بوست لى فى هذة المدونه ,
قد يكون اخر عهدى بمنزلى وقد لايكن ,
وقد اصعد للقمه
كما قد اهوى للقاع ...

لا اعلم بالظبط ,
الا اننى اعلم
او( اظن ) بمعنى ادق
ان اسوأ الاحتمالات هو بقاء الوضع على ماهو عليه ...
فقد دب الملل الى نفسى
وتقت الى الرياح العاصفه ...

----

انتهى
( المدعو : احمد سعيد )
الثانيه عشرة والنصف من ظهر يوم الخميس الموافق الثامن والعشرون من يناير 2010
......

الأربعاء، 27 يناير، 2010

العيش


من الاخر
موضوع العيش علشان منطولش كتير فى البوست
اللى دفعنى اكتب البوست دة هو الاعتقاد العبيط اللى الحكومه بتروج له واللى مع الاسف ناس كتير صدقته
الا وهو :
ان سبب ازمه العيش هو جشع اصحاب الافران
ودة مش صح
لانه بمنتهى البساطه
من اول الدهر واصحاب المخابز بيسرقوا نسبه من الدقيق وبيبيعوها
ودة شىء مش جديد
واغلبهم ان متواطىء مع المفتشين وبيأكلوهم
الا من رحم ربك
السرقه شىء مش جديد

طب

ليه بقى مكانش فيه ازمه زمان والازمه ظهرت من كام سنه وتقريبا اختفت ( نسبيا ) دلوقت ؟؟

اقولكم

طبعا الحكومه المحترمه بتاعتنا بتاع ( البيزنس والسبوبه ) صعب عليها تسيب مجال القمح من غير افساد
- طب ليه يا اكسلنس منطلّعلناش سبوبه كويسه من العيش ؟؟
- وماله مومبيه اشتغل واكسب , احنا بنشجع الاستثمار الحر ( بس ظبط بقى مع الواد نف نف )

اول حاجه المزارعين بيتواجهوا بحمله بشعه علشان ميزرعوش قمح
والحكومه بتضيق عليهم بشكل غير مباشر علشان ميزرعوهوش
وفى المقابل بيشجعوهم يزرعوا محاصيل استهلاكيه عبيطه زى الفاكهه ( المباركيه ) اياها .
ولما المزارعين انتاجهم للقمح يقل
بالتالى هيكون فيه مبرر واضح للنظام انه يستورد قمح من جهات جديدة , دا طبعا جنب المعونه اللى هتكون مبرر كويس للنظام انه يطاطى اكتر للامريكان ( اصل احنا محتاجينلهم ياجماعه , غصب عننا والله لااااازم نسمع كلامهم )
ولغايه هنا الطبخه استوت
نستورد قمح مضروب فى الاستخوبس كدة ونوزعه فى مناطق شعبيه وغلبانه ( كبدايه ) علشان هما غلابه وهياكلوا من غير مايتكلموا .
لو التجربه حصلت من غير قلق هنعممها وناكل الشعب كله ( علف ) .
ولما كانت حكومتنا بتحب تلحس العسل كله , قاموا الجهابزة قالوا طب ليه منستفيدش بالقمح النضيف اللى عندنا ونصرفه والبحر يحب الزيادة يااكسلنس .

ومع التصرف الغبى دة حصلت الازمه بتاع العيش , دا طبعا غير ان التصرف دة مطلوب ( خارجيا ) من زمان ( هتلاحظوا دايما ان فيه عناصر فى مناصب قياديه حساسه فى البلد مجندة وبتعمل لصالح الامريكان وبتسعى دايما لاثارة الشعب وتهييجه علشان يمكنوهم من الضغط اكتر على النظام . وهو بضورة بيبتز الامريكان بوسيله اخرى مش موضوعنا دلوقت )
ومنه برضه هيبقى تمهيد لالغاء الدعم والتامين الصحى تماما , وخلينا بقى نفضى للبيزنس يا اكسلنس , واهو بالمرة علشان امريكا والبنك الدولى ينبسطوا مننا ويدوا الوله نوفل كرسى السواق .
ولما حصلت الازمه بتاع العيش وحصلت احداث المحله
وبما ان الزعيم بتاعنا خواف ومش تقيل
- قال ايه دة , دا كدة خطر , يا واد يا زيكو ... اجمع مجلس العصابه فورا
بص بقى ياواد منك له , مش هييجوا شويه اراجوزات زيكم على اخر الزمن ويطلعونى منها بزفه
- طب نعمل ايه يابرنس ؟
يقوم مثلا يقولهم نرجع للوضع القديم ؟؟؟؟
لاااااااااااااااااااااااا
امال هوة منحاز للفقراء طول عمرة ازاااااااااى !!!
قالك امشى زى ما انت
بس اتبع سياسه شركات المنتجات الغذائيه الحاليه
اوعى ترفع السعر
لو عاوز تكسب اكتر
قلل الكميه
والجودة
وثبت السعر
والناس كدة كدة بتاكل وهيا ساكته
وسع نشاط القمح المضروب ياجدع
انشالله تحطوا فيه رمل
المصرى مش هيتكلم طول ما قدامه رغيف
دى القاعدة
ان شالله يكون رغيف رمل
ثبته برغيف ايا كان نوعه
المهم يكون فيه عيش
وعيش كتير
وبكدة بدأت تجارب القمح المنيل والمخلوط والعيش اللى بيولع .
بالظبط زى صفقه البنزين المخلوط اللى نزل مصر 2006
وامعانا فى النصاحه
نعمل للتوزيع خريطه
بمعنى
المناطق الراقيه والمناطق اللى فيها قلق وصوتها عالى
ابعت لها عيش نضيف
ما الغلابه اللى مش بيتكلموا
ارميلهم الزباله
وبكدة هنلاقى فيه حتت فى مصر
العيش فيها زى العسل
اما لاهميتها او خوفا من اهلها .
وحتت
فيها ..............
ومافيش مانع نطلع شويه اراجوزات زى ( موس طفا بقرى ) يفرقع بمبه صفقه فاسدة من دول علشان نغطى بيها على باقى الشغل التقيل
تصوروا بيدوا العرب ( البدو يعنى ) عيش يتاكل حاف من حلاوته ؟!
اة
اماااااااااااااااااال
الجبن سيد الاخلاق
والله سياسه البدو هى الوحيدة اللى تمشى مع الحكومه دى

الأحد، 24 يناير، 2010

نحن نختلف عن الاخرون

دراسه تحليليه كهربيه عن :
( الغسيل بين الماضى والحاضر )

زمان قبل الغسيل :

يسقط الخونه
يسقط الاحتلال
بعد الغسيل:

يعيش جلاله الملك جورج
يعيش جلاله الملك المحبوب
يعيش اللورد كرومر
وعلى محمود
وزيور واسماعيل صدقى
يسقط الشعب
يسقط الشعب .....
------

وبما اننا نختلف عن الاخرون
و ( المساحيق ) زمان تختلف عن ( المساحيق ) دلوقت
فهنوريكم نضافه مسحوق ( ابوللو ) بالحبيبات الذريه ,,,

ما قبل ( ابوللو ) :

يسقط الصهاينه
يسقط النظام الفاسد
يسقط الخونه
انصروا غزة
الى الامام يا نصر الله

- ON
- وررررررررررررررررررررررررررررررررررررررررر ....
- OFF
ما بعد ( ابوللو ) :
ياعوكل ياحبيب , دمر دمر تل ابيب
ياعوكل يابلاش , واحد غيرة مينفعناش
نعم لعوكل ونعم لنوفل
نعم للزعيم الاولانى ومن بعدة الزعيم التانى
وانا الملوانى
ودة مؤتمر الهنود الحمر
ياعوكل انت احق ومافيش غيرك هههَق هَق هَق ....
----

جمييييييل جميييييييييييل
مش خسارة اللى اندفع فيه والله
شىء راااااائع الصراحه
الله يخخخرب بيتك ياساركوزى...
الله اكفنا شر ( الغسيل ) و ( المكوا )
اللهم اكفنا شر ابوللو ومن يقف بجوار ابوللو
ومن يشغل ابوللو ومن يصين ابوللو
اللهم خلى الزعيم
اللهم خلله
وكتر فيتاميناته
واديله سلطات على اد نيته
وجرجير
اللهم جرجرة
اللهم جرجر الزعيم
واديله طحييييييينه
اللهم أطحِن الزعيم
وطرشى
اللهم اطرش فيه
واديله بطيخ
من غير بذر
لسه الزعيم هيطلع بذر ؟
الزعيم يلهط علطوووووووووووووول .

ناس طيبين والله


اولا , التراك دة مرتبط بموضوع البوست
اللى هيفتكرة وهيفتكر هو بتاع ايه والموقف اللى كان فيه , هيعرف سر الترابط ( او سر البقبق ) ...


كلمه سمعتها كتير
فى كل مراحل عمرى
كل شهر كنت بسمعها على الاقل مرة او مرتين
الكلمه دى بتقول
ان البلد دى فيها خير كتير
بس خيرها للغريب
مش لاهلها !!!!
طب ليه ؟
- هل اهلها كرماء زيادة عن اللزوم ومضيافين لدرجه انهم بيفضلوا يختصوا الغريب الوافد بالخير ويحرموا نفسهم منه ؟
- ولا لان الشعب المصرى شعب زاهد ومتقشف بطبعه ؟
- ام لانه اجتمع فيه حاجتين بيكونوا مصيبه لما بيجتمعوا مع بعض ,,
الحاجه الاولانيه وهى صفه يختص بها الشعب الا وهى الجبن والتخاذل
والحاجه التانيه ان الارض المتواجد عليها هذا الشعب مع الاسف تكون ارض مليانه بالخير
يمكن لو مصر دى بلد قفر زى بلاد تانيه او عبارة عن سلسله جبال زى بلاد تالته , اعتقد هتكون ظروفها احسن من كدة بكتير

بالظبط زى واحد رعديد شايل على ضهرة كنز من الذهب وماشى بيه فى ميدان عام , تخيلوا ايه اللى هيحصل فيه ...
يمكن لو كان الشخص دة قوى شويه او بمعنى ادق جرىء وشجاع ومقدام , اعتقد كانوا اللصوص هيخافوا منه
وبرضه اعتقد انه لو كان فقير مدقع وهدومه مهلهله وريحته جايبه شارعين قدام , اعتقد برضه كان وضعه هيكون احسن ..
العجيبه بقى
تخيل الشخص دة بقاله الاف السنين بيتسرق ويتنهب من كل اتجاة , من القريب والغريب والقرِّيب والبعيد , وكل دة , والكنز اللى على ضهرة لسه مخلصش !!!!
فتحت مكتبتى
مدة لاتزيد عن عشر دقائق
قلبت فيها كام كتاب
طلعت المادة اللى هقدمهالكوا دلوقت باذن الله
يعنى دى قطرة من بحر
ممكن اقعد اسبوع اكتب كتاب من الفين صفحه عن الموضوع دة بس
اسمعوا,
الوضع فى مصر فى عهد الفاطميين والمماليك على وجه الخصوص كان مضطرب جدا
بمعنى ان اغلبيه رجال السلطه كانوا بيتقتلوا وبيغتالوا واقل من واحد فى الميه اللى كان بيموت على سريرة
وغالبا كان بيرافق القتل دة غضب من السلطان , وكان العرف ايامها بيجعل كل ما يملكه المملوك يؤول لقاتله , ابتداء من المال والملابس والبيوت وحتى زوجته واولادة
وان مات ميته طبيعيه فلا يرثه اولادة وانما يرثه اكبر تلاميذة
وبما انه زمان مكانش فيه بنوك ولا سندات
وبما ان الاوضاع كانت على كف عفريت زى ماوضحت
فاصبحت السمه السائدة ان كل شخص ربنا بيفتح عليه بقرشين بيجمعهم فى شكل ذهب ومجوهرات ويعبيها فى صرر وصناديق ويخفيها فى حيط او فى حفرة تحت الارض علشان لما ينقتل اعداؤة ميعرفوش طريقها .
وبما ان دى اصبحت عادة , فكان رد الفعل ان الشخص المغضوب عليه كان بيمر قبل قتله بعمليه تعذيب بشعه تسمى ( التقرير ) علشان يعترف على الاماكن اللى اخفى فيها ثروته .

- البعض كان بيعترف
- البعض كان بيعترف بنسبه قليله ويسكت عن الباقى
- والبعض مكانش بيعترف
الا ان الكل فى النهايه كان مصيرة القتل ..

نتج عن كدة ان اماكن زى مصر القديمه ومدن زى المحله الكبرى وسمنود والمنصورة وغيرهم , اللى كانوا حواضر مصر فى عهد المماليك , الاماكن دى اصبحت اشبه بمزرعه كنوز ...
اعتقد ان منكم اللى عايش فى المناطق دى هيكون سمع مرة على الاقل عن شخص مبخت اغتنى بين يوم وليله لما هد حيط قديم بالصدفه لاقاة بينزل عليه دهب , انا شخصيا اعرف شخص ما فى قريه ما , كان عندة قطعه ارض زراعيه , ولما كان بيحفر فيها علشان غرض معين اكتشف ان تحت ارضه شبكه هائله من مواسير المياة , المواسير دى ياحضرات من اييييييييه ؟
من الفضه الخالصه
طبعا اتفككت واتباعت وصاحبنا اصبح مليونير فى ليله
وغيرة كتير بيلاقوا كميات مهوله من الدهب
وطبعا عادة بيكون الاجراء المتبع فى الحالات اللى زى دى معروف
لان السيناريو دة بيحصل كتير
رئيس مباحث القسم اللى تبعه المكان دة بياخد نسبه مقابل سكوته والباقى بيتباع لتجار دهب متخصصين فى النوع دة وهما بيتولوا طمس اى كتابات او علامات على الدهب دة تمهيدا لبيعه ...

وعمار يامصر

نرجع لموضوعنا
هذكر مجرد امثله بسيطه جدا عن مواقف من دى , مع العلم ان ما اقوله ليس الا قطرة فى بحر مما ذكرة التاريخ واللى هو نفسه بدورة اقل بكتير من اللى مازال مدفون فى باطن الارض واللى اتوزع واتباع لصاحب النصيب فى الاستخوبس ...

طبعا حضراتكم عارفين كويس جوهر الصقلى
الراجل دة لما مات
لقوا عندة ايييييييييييه ؟؟؟
اسمعوا الكلام اللى قيل على لسان المؤرخين المعاصرين :
- فلما مات وجد له من الاموال مالا يحصى , فمن جمله ذلك من الذهب العين ستمائه الف الف دينار ( يعنى 600 مليون دينار ) واربعه الاف الف درهم ( اربعه مليون يعنى ) ومن اللؤلؤ الكبار واليواقيت اربع صناديق مجلدة !
- ومن الزمرد الف قصبه زمرد!
- ومن الثياب الديباج خمسه وسبعين الف قطعه !
- ووجد عندة دواة من الذهب طولها ذراع وهى مرصعه بالدر والياقوت , قُّوِم ما عليها من الجوهر باثنى عشر الف دينار !
- ووجد عندة لعبه ( تمثال ) من المسك والعنبر الخام اذا نزع ثيابه البسها عليها !
- ومائه مسمار من الذهب على كل منها عمامه ( المسمار المقصود فى حجم الازميل المعروف حاليا )!
- ومن المعالق الذهب والفضه 3000 ملعقه !
- وعشرة الاف طبق صينى وبلور وفضه !
- ووجد عندة اربعه قدور ( جمع قِدرة ) من الذهب الخالص وزن الواحدة 100 رطل !!
- 700 خاتم بفصوص ياقوت وزمرد والماس !
- وهذا كله خارج عن البغال والجمال والخيل والعبيد والجوارى والاملاك والضياع وغيرة !!!

طيب
انا مش هفصص كل اللى انقال فوق
مع العلم انه مافيش مجال للمبالغه , لان الكلام دة كان بيتسجل فى احصائيات الدوله الرسميه
انا همسك نقطه واحدة بس
اللى هي الدينار والدرهم
مع العلم ان الدينار ايامها كان وزنه حوالى 4,25 جرام من الذهب الخالص عيار 24
وبحسبه بسيطه على اسعار الدهب النهاردة فى بورصه نيويورك ,
وتحديدا دلوقت
هنلاقى ان الوقيه عامله 1091 ونص دولار
يعنى الجرام عامل حوالى35 دولار , يعنى تقريبا 190 جنيه و 19 قرش مصرى ,
يعنى الدينار المذكور يساوى 808 جنيه وشويه فكه
يعنى قيمه الدنانير الذهبيه اللى لقيوها عن افندينا تعادل حاليا مبلغ وقدرة :

484800000000 جنيه مصرى فقط لا غير !!!!!!

راجعوا معايا تانى كدة احسن اكون غلطت فى عد الاصفار
يعنى 484مليار وربعميه وتمانين مليون جنيه
يعنى تقريبا نص ترليون جنيه
( الترليون الف مليار )

:D

ها
نكمل كمان الدراهم الفضه
والصناديق المجوهرات والحرير ودوايه الحبر الدهب اللى طولها اكتر من نص متر والاربع قدر دهب اللى وزنهم 400رطل ؟؟؟
ولا كفايه كدة
اعتقد كدة كفايه ....


نخش على افندينا تانى غير افندينا الاولانى ,,,
الامير سلار
نائب السلطان محمد ابن قلاون
بدون الدخول فى قصص , السلطان قتل الراجل دة وصادر امواله
واتقيد كل ما وجد بالسحتوت على يد القاضى (جمال الدين ابن الغويرة )
وكان التسجيل بشكل يومى وبالشكل الاتى :

اليوم الاول :
16 جمادى الاولى سنه 710 هجريه ,,,
- صناديق بها فصوص كهرمان وياقوت احمر رطلان
- فصوص زمرد عشرون رطلا
- فصوص الماس وعين الهر 300قطعه
- لؤلؤ كبير مدور وزن الحبه مثقال , 150 حبه
- صناديق بها 200000دينار ذهب عين
- 471الف درهم فضه

خلاص ؟؟؟
لأ لسسسسسسسسسه
دا اول يوم بس

خدوا اليوم التانى :
الاثنين 17 منه
- 55الف دينار ذهب
- الف الف درهم فضه
- رطلان من الفصوص المختلفه
- اربع ( قناطير ) مصوغات ذهبيه !!!!
- 6 قناطير من الاطباق والاهوان ( جمع هون , اللى بيندق بيه الكفته ) الذهبيه
!!!!

يوم الثلاثاء 18 منه
- 45الف دينار ذهب
- 330000درهم فضه
- 3 قناطير فضه

- يوم الاربعاء19 منه
- الف الف دينار ذهب
- 300000درهم فضه
- 400 قباء من الحرير
- 100 سرج من الذهب الخالص
- 8 صناديق لم يُعلم ما فيها !!
- الف قطعه من الحرير
- 100000دينار ذهب
- 400000درهم فضه
- 300 حصان اصيل
- 120 بغل
- 120 جمل
- وهذا كله خارج عن الاملاك والضياع والمعاصر والشون والقصوروالمراكب والعبيد والخدم والجوارى وغير ذلك , ووجد عندة من الاغنام والابقار ما لا يحصى عددة ووجد عندة من الغلال 300000 اردب , وبعد هذا بايام وجدت فى دارة اكياس ذهب لا يعلم لها عدد , كما وجد بالقرب من بيت الخلاء مخبأ ذهب عين مسبوك بدون اكياس لا يعلم عددة
!

ها , ايه رايكم ؟
انا مش هحسبها زى المرة اللى فاتت
احسبوها انتوا وقولولى , دا طبعا غير الصناديق اللى راحت فى السكرته ومحدش عرف جواها ايه ..

كفايه ؟

لأ موش كفايه
خدوا كمان

افندينا تالت غير افانديناتنا الاولانيين
السلطان قانصوة الغورى
اللى هزمه العثمانيين فى مرج دابق
الاخ قنصوة زى مايكون قلبه حاسس انه هيتهزم
وبما انه ايامها مكانتش بنوك سويسرا لسه فتحت علشان الزعيم يحوش فيها ( مكافأة نهايه الخدمه ) فكان هناك اساليب اخرى لتامين حياة ما بعد المعاش عند المماليك
قانصوة بيه اخد كوووول اللى يقدر عليه وخباة فى قلعه حلب
علشان لما سليم يهزمه ويدخل مصر , يقوم يفلسع هوة ويجرى على حلب عند فلوسه هناك .
الا ان حظ قانصوة افندى كان قطران واتهزم هزيمه ساحقه وهرب كل الجنود اللى كانوا فى قلعه حلب حتى ان سليم بعت راجل عجوز اعرج ومعاه هصايه علشان يقتحم القلعه والراجل لقى الابواب مفتحه ومحدش جوة
نيجى بقى لموضوع الكنز والعكمه التقيله قوى اللى السلطان سليم نفسه اقوى سلاطين الارض حينها اتصدم من منظرة ومستحملش .

لقى ايه سليم جوة القلعه ؟
- ميه مليون دينار دهب فقط لا غير
دا طبعا غير الادوات الفضيه والذهبيه والمجوهرات والاطباق والقدر والسروج , وكووووووول دة طبعا عارفين مصنوع من ايه ....

- الدهب والفضه بالقنطار !!!
- والمجوهرات بالرطل !!!
- والكفته بالمتر

وبعدين بتقولوا خير البلد دى بيروح فين ؟؟!!
مش بقولكم شعب كريم ......

الخميس، 21 يناير، 2010

اااةةةة

جميله قوى مصر
مش بيرخص فيها غير 3 حاجات
البنى ادم
الحشيش
كروت الشحن

وعجبى........

الأحد، 17 يناير، 2010

اساس المُلك ..



اكتوبر - مصر
مساء الاحد الموافق 17 يناير 2010
..


ابا بكر محمد الاخشيد ابن طغج ابن جف
طاغيه من طغاة مصر
واحد من عشرات الحكام الذين ساموا مصر العذاب على مر السنين
اتحدث اليوم عن مفارقه عجيبه حدثت فى اواخر عهد هذا الطاغيه
توفى بعدها
تلا ذلك انهيار سريع لدولته التى لم تعمر طويلا والتى تسمت ب ( الدوله الاخشيديه )
اعقب ذلك الاحتلال الفاطمى لمصر
لنتفتح صفحه سوداء جديدة من كتاب الطغيان الاسود والذى لم تنفذ صفحاته حتى الان ...

قبل وفاته وفى صباح احد الايام وجد ذلك الطاغيه رقعه تحتوى على رساله مجهوله المصدر بداخل بيته
وكان نص الرساله كالتالى :

قدرتم فأسأتم , وملكتم فبخلتم , ووُسِّع عليكم فضيقتم , واُدِرّت لكم الارزاق فقنطتم ارزاق العباد , واغتررتم بصفو ايامكم ولم تفكروا فى عواقبكم , واشتغلتم بالشهوات واغتنام اللذات , وتهاونتم بسهام الاسحار وهن صائبات , ولاسيما إن خرجت من قلوب قرحتموها واكباد اجعتموها واجساد اعريتموها , ولو تأملتم فى هذا حق التأمل لانتبهتم , اوما علمتم ان الدنيا لو بقيت للعاقل ما وصل اليها الجاهل ؟! , ولو دامت لمن مضى مانالها من بقى , فكفى بصحبه ملك يكون فى زوال ملكه فرح العالم , ومن المحال ان يموت المُنتَظِرون كلهم حتى لا يبقى منهم واحد ويبقى المُنتَظَر به , افعلوا ما شئتم فإنا صابرون , وجوروا فإنا بالله مستجيرون , وثقوا بقدرتكم وسلطانكم فإنا بالله واثقون , وهو حسبنا ونعم الوكيل .....

- اعيد بث هذة الرساله بعد الف واربعين عاما من بثها للمرة الاولى
فقد اوشكت صفحه سوداء اخرى على الانطواء ...

الاثنين، 11 يناير، 2010

بانوراما مصريه .



تحديث : ياريت تقروا تعليق sal على البوست دة ياجماعه ..

بسم الله الرحمن الرحيم
مصر
8:14 من مساء يوم الاثنين 11 يناير 2010


ملحوظتين :

1- التراك جزء لا يتجزأ من البوست
2- الصورة اعلاة ملتقطه فى صعيد مصر , اكتوبر 1947


بدايه
كنت اود الحديث عن غزة وذاك الجدار الذى سيصم جيلنا بالعار الى الابد
ولكننى لم اكد اشرع فى الحديث عن هذا الموضوع الا وفوجئت بما حدث فى صعيد مصر...
الواقع اننى احترت فى اى الموضوعين ابدأ اولا
الا اننى اكتشفت ان كلاهما يربط بينهما خيط واحد
خيط رفيع وشفاف الا انه غايه فى القوة .
ووجدت اننى استطيع تناول كلا من الموضوعين فى بوست واحد
اذا ما تحدثت عن مصر
مصر نفسها وما يحدث فيها
وما كنا عليه وما صرنا اليه الان وما سنصبح عليه مستقبلا ...

لا اعرف من اين ابدأ , فالنقاط كثيرة ومتشعبه للغايه وكل منها لا يكفيه كتاب
ولذلك
ارجو معذرتكم جميعا , حيث انى لن استطيع ( اسفا ) ان احقق فى ذلك البوست اى نوع من انواع الترابط
نعم ساختار الطريق الاسهل ( كعادتى )
ساتحدث عما يجول بخاطرى
نعم , بمنتهى البساطه وبدون الالتزام باى قيود

ولذا
ارجو منكم جميعا
:
:
:
انك تصحصحلى كدة ياخويا منك له وانتى ياختى منك لها الله لا يسيئكوا , واللى عاوز ينام يروح يجيب شفشق قهوة ويترزع قدام المدعوق الكومبيوتر
مانتوا بتقعدوا بالساعتين قدام ماتش الكورة ومش بتزهقوا
مش خسارة فيا بقى لما تقعدوا ساعتين زيهم قدام الكلام دة
خصوصا انه اهم بكتير من ماتشات الكورة ( دا ان كان للكورة اهميه اصلا )

اتفقنا ؟
يلا , عم حزمبل جاى يحكيلكم حكايه البلبل

مصر
فضوا دماغكم ارجوكم من اى معتقدات وقناعات ومسلمات مسبقه بخصوص البلد دى وتعالوا نبدأ من جديد وعلى ميه بيضا
اى نعجه تبص على البلد دى فى الخريطه هتكتشف بمنتهى السهوله ان البلد دى عندها كل مقومات الامبراطوريه
بدايه من الموقع المتميز , الى الثروات الهايله ..... ايه ؟؟ اة بقول الثروات الهايله , ماله كلامى , مش بقولكم فضوا دماغكم من اى قناعات مسبقه ؟؟
بصوا
هضربلكم مثل بسيط
الساحل الشمالى
عارفينه ؟
بصوا عليه , هتلاقوا ارضه صخريه تقرف الكلب الاعور واللى يشوفها ميتخيلش انها ممكن تطرح حاجه ( غير البانجو طبعا ) ..
الا ان الواقع ان الارض دى فى يوم من الايام كانت بتاكل امبراطوريه بتحكم نص العالم
سامعين
شريط الارض دة كان بياكل نص العالم فى يوم
مع العلم ان التكنولوجيا ايامها معدومه
وعلى فكرة
مازالت ارض الساحل الشمالى خصبه للغايه ومازالت قادرة على اطعام بلدان باكملها ...
يعنى عندك ارض خصبه
موقعها متميز ومحصن بشكل كبير
فيها نهر ولا اروع
ارض سهله ومواردها بالهبل
مساحتها كبيرة
عدد السكان فيها بسم الله ماشاء الله
جنودها قال عنهم الرسول ( ص) انهم خير اجناد الارض ...
عاوزين ايه تانى ؟؟

طيب
البلد دى كان بيحكمها الفراعنه
وبعيدا عن هرتله الفرعون الاله والهبل دة
انا شخصيا شايف انه لا الميراث الثقافى ولا الوجدانى الحالى للشعب المصرى فيه اى شىء من الفراعنه
لسبب بسيط ,,,
عدة الاف من السنين كفيله بمحو اى موروث عن حضارة سابقه ( باستثناء الموروث الدينى طبعا لانه بيستمر وبينمو عبر الزمن )

العصفورة
لو صوبت اتجاهها ماسورة بندقيه
بتطير
مع العلم انها مشافتش الماسورة قبل كدة ولا تعرف دى ايه
وبالطبع مانضربتش قبل كدة
امال عرفت منين
اقولكم
دى حاجه وراثيه
فيه صفات وخبرات معينه بتورث من جيل للتانى
ترسبات عبر الاجيال
الوضع دة مش متحقق بالنسبه للفراعنه
لانه مع دخول الفرس والبطالمه والرومان والفتح الاسلامى من بعدهم مرورا ببنى اميه ونزوح قبائل العرب الى عهد الفاطميين الشيعه وظهور فئات كالمغاربه والبربر وغيرهم الكثيرون , ثم اكراد العراق فى عهد صلاح الدين ثم بعدهم المماليك من تركمانستان وجورجيا وارمينيا وشتى بقاع الارض فى اعجب توليفه شهدها التاريخ..
كل دة
كفيل بتدمير اى مبدأ للحديث عن وهم يدعى النقاء العرقى .
يعنى احنا (جينيا) مالناش اى علاقه بالفراعنه
وثقافيا كذلك نظرا لبعد الفاصل الزمنى

وعليه
انا غير مقتنع باى تحليل لقراءة واقع الشخصيه المصريه على انه ( شعب تربيه الفرعون ) ..
لا احنا فراعنه ولا نمت لهم بصله من اى نوع ..
دى حاجه

المتأمل فى الواقع المصرى بدايه من عهد البطالمه
هيلاحظ ان البلد دى فى الاغلبيه الساحقه من عصورها كانت تحت حكم الحديد والنار
من اول البطالمه
للرومان والبهدله اللى بهدلوها للاقباط
الى الفتح الاسلامى اللى بدأ بمبدأ العداله المطلقه ثم انهارت دوله العداله تلك فى اواخر عهد بنى اميه وبنى العباس , ورجعت ريما لعادتها القديمه ,, الخ .
المعروف تاريخيا ان كل شعب له شخصيه مميزة
فى شعوب تلاحظ انها طول عمرها خانعه مستسلمه ( باستثناء فترات بسيطه )
وشعوب تانيه متمردة باسله .
والملاحظ ان الفئه الاولى بتكون من سكان السهول ( دا غالبا ) , والتانيه بتكون ملاحظه بشدة فى سكان المناطق الجبليه ( لاحظ شعوب الافغان والاتراك واليونان وغيرهم )
طيب
الشعب المصرى فى الاصل شعب طيب وهادىء ( وليس مستكين وخانع ) الفرق كبير بين الكلمتين .
والدليل على كدة انه شهد ثورات فى منتهى العنف فى عصور الفراعنه ومن بعدهم
حتى فى العصر العباسى , شهدت مصر واحدة من اعنف الثورات فى التاريخ , حتى انها اضطرت الخليفه المأمون انه يغادر دار الخلافه وينزل مصر بنفسه علشان يقمعها !!
ومن يقرأ تاريخ الطولونيون وبنى الاخشيد , يلاحظ انه على الرغم من قسوة وبطش هؤلاء الحكام الا انهم تحولوا بقدرة قادر الى مسخه , تعرفوا سيبويه المصرى ؟؟؟
الراجل دة كان معاصر واحد من دول , مش فاكر بالظبط , بس اغلب الظن انه محمد ابن طغج الاخشيد , سيبويه كان لما بيعرف انه خارج من قصرة , كان بيجرى يستناة فى الطريق ويمطرة بوابل من الشتائم والسخريه اللاذعه , حتى ان الحاكم دة كان لما بيعرف ان سيبويه مستنيه كان بيغير طريقه فورا علشان ميعديش قدامه وميعملوش مسخه .
طبعا دا موقف على سبيل المثال
عندكوا كمان الحاكم بامر الله اللى اتكلمت عنه من كام بوست , شفتوا جبروته كان قد ايه ؟؟؟
الا انه برضه كان بيتهزأ ويتشتم عينى عينك .
الخلاصه ان الشعب المصرى كان حتى فترة معينه شعب سوى ( نسبيا )
بمعنى
اينعم هادىء ومسالم
الا انه لا يتردد عن الثورة اذا لم يجد امامه سبيلا غيرها ...

الوضع دة فضل الى ان دُق فى نعشه ثلاث مسامير على ثلاث عصور منفصله
بسببها تحول الشعب المصرى ل( مسخ ) او (مومياء شعب ) ..
المسمار الاول تمثل فى حكم الفاطميين وما فعلوة من افساد للعقليه المصريه بكثير من الترهات والخرافات والتفاهات مصحوبه بحاله قهر شديدة وإذلال بشع و ( كسرة نفس ) ...
ومن هنا بدأ الشعب المصرى يميل للخنوع والاستكانه .

المسمار التانى دقه المماليك عبر 600 سنه متصله والمسمار دة بالذات كان سرة باتع , اللى يعرف الناس دى كويس ويعرف قد ايه كانوا جبابرة وقلوبهم ميته , كان هيعذر الشعب المصرى فى اللى حصل له بسببهم ..
اللى يعرف مصر مشت ازاى فى عهد المماليك هيفهم كويس قوى مصر دلوقت ماشيه ازاى
انتوا مش هتصدقوا مهما قلت عن مدى الترسيب الهائل اللى حصل فى الوجدان المصرى بسبب العهد دة واللى بيحتل اغلب الوجدان المصرى الى الان من اول ردود الافعال والتصرفات الى القصص والامثال , الى المصطلحات واللغه الدارجه نفسها .

المسمار الاخير دقه محمد على افندى .....
بس محمد على عمل مصانع
وعمل جيش قوى
وعمل
وعمل
...
ثوانى ياحبيبى
هسألك سؤال واحد
كل عامل اشتغل فى مصنع من مصانع الباشا
وكل جندى حارب ورا ابراهيم باشا
تفتكر كانت دوافعه ايه ؟؟؟
لو قلت الوطنيه
هنصحك تقرا كتاب اسمه ( كل رجال الباشا ) وثق تماما انك هتغير رأيك دة ..

ودلوقت هسألك سؤال
ايه احسن
لو انت فقير
وعندك علم
وكرامه
وعزة نفس
وايمان
وعلاقه تكافل اجتماعيه رائعه

ولا لو كنت غنى وقوى
الا انك جاهل
وتافه
وسطحى
وذليل
ومجتمعك فاسد كله بينهش فى بعضه ؟؟؟؟

باختصار دة سؤال موازى للمثل الشهير :
ماذا يفيدك لو انك ربحت العالم كله وخسرت نفسك فى النهايه ؟؟؟
محمد على عمل جيش قوى ودوله حديثه
الا انه فى المقابل دمر حجر الاساس فى الدوله دى
الا وهو الانسان
( راجع يوميات ادوارد لين الذى زار مصر مرة فى بدايه حكم محمد على ومرتين فى اواخر عهدة )

دة طبعا بصرف النظر عن ان كل ما فعله محمد على قد ذهب ادراج الرياح بعد عام 1840 ...

ولمن يقول ان المصرى كان قد اصيب ب ( المسخنه ) من قبل محمد على
اقول له لأ
الواقع ان الحمله الفرنسيه تسببت فى صحوة غير مقصودة ( رب ضارة نافعه ) فى وجدان الشعب المصرى , قفزت به مئات السنين للامام , ودفعته للتفكير فى قيم كالحريه والعداله , ومكنته من اذلال اقوى جيش فى ذلك العصر , والغريب انه بعد خروج الفرنسيين من مصر , حينما اراد المماليك ان يعودوا سيرتهم الاولى فى قمع المصريين , عارفين ايه اللى حصل ؟
فى ساعه زمن
قام المصرين على المماليك وكرشوهم الى الصعيد
حتى ان البرديسى بك خرج من القاهرة وهو بيلعن ابو اليوم اللى جه مصر فيه ...
شفتوا
ستميه سنه ظلم
انهاها المصريين فى ساعه زمن !!!
بس , لانهم ارادوا واتحركوا ( بعد توفيق الله طبعا )
اونكل محمد على بدهائه قضى على تلك الصحوة
ودة بسبب الذكاء والسياسه ليس الا .
حيث ان من يعرف الشعب المصرى جيدا يدرك انه لم يكن امام محمد على اى سبيل للسيطرة على الشعب المصرى باستخدام القوة وحدها ...

فى عهد عرابى بدات مصر تشوف صحوة تانيه
الا ان اقوى دوله فى ذلك العصر ( بريطانيا ) كانت محكومه بطبقه كامله من السياسيين والاقتصاديين اليهود الذين يدينون بالولاء الكامل لفكرة الوطن القومى لليهود ...
اى ان انجلترا ابتداء من اواخر القرن الثامن عشر , تمت السيطرة الكامله عليها وتوظيفها لخدمه الاهداف الصهيونيه .
ومن هنا كان لابد من احتلال مصر عسكريا وسحق ثورتها وكرامتها معا , طبعا دة لا يتناقض مع فكرة السيطرة على القناة ووقف النفوذ الفرنسى , الا انه بالتحليل الاكثر عمقا يتضح وجود اسباب اخرى اهم واخفى ...
كمان ستين سنه كان هيتعمل وطن قومى لليهود
ولازم يتم التمهيد للجو دة
بمعنى
كيان لقيط ضعيف ومرفوض
مستحيل ينمو ويستمر الا بتحقيق شرطين
الاول هو مساندة ودعم مطلق من اقوى دول العالم
الثانى هو اصابه كل دول الجوار بحاله من التفكك والضعف والانهيار , بحيث لاتشكل اى خطر على الكيان الوليد .
وبدأت عمليه تخريب مستترة فى مصر كان ظاهرها باشاوات خونه وسياسيين فاسدين تحركهم اصابع خفيه من خلف الستار .
الا ان مصر فى بدايه القرن العشرين شهدت حاله نهضه وبعث جديد , وبدأ الجرح الكبير للوجدان المصرى فى الالتئام , وهنا ظهر دور المخابرات البريطانيه فى اجهاض ذلك البعث ,,
إخبط الملك فى الحكومه والحكومه فى الملك
مع ان من يدقق النظر يجد ان الاتنين مصلحتهم واحدة
والصدام بين فؤاد وفاروق والوفد لم يكن سببه فساد الاول والثانى ولا صلاح الثالث
ايه يخلى النحاس يصمم انه يتحكم فى المخصصات الملكيه مع انه مكانش فيه اى داعى لكدة , ومافيش اى سياسى عندة ذرة عقل يشترى خناق كدة من الباب للطاق .
( دة مجرد مثل بسيط )

هنلاقى كمان تيارات سياسيه فاسدة اصابت العقليه المصريه بحاله من التخمه والصداع الفكرى نتج عنها الكثير من التشرذم والصراعات الفارغه والسفسطه بلا طائل ..

حسن البنا
اسس منظومه متكامله كانت تشكل خطر داهم على الخطط الموضوعه
كان لازم يموت
ولكن
فى حوادث الاغتيال اللى زى دى
اللى بيحدد مدبر الاغتيال من خلال شخص القاتل يبقى انسان غبى .
بمعنى
لو اللى فجر برج التجارة فعلا شباب مسلم
هل يعنى ذلك بالضرورة ان ورائهم تنظيم اسلامى ؟
راجع فيلم
five fingers
والفيلم الوثائقى اللى حلل موضوع التفجير دة ( مش فاكر اسمه مع الاسف )
يعنى
المدقق فى الاحداث يجد ان المستفيد الوحيد من مقتل البنا
ليس الملك
ولا الحكومه
ولا سعديين ولا غيرة
بس
الانجليز
والصهاينه ...
وعليه
فانا اكاد اجزم ان اغتيال البنا من تدبير المخابرات البريطانيه بصرف النظر عن الواجهه التى طرحت لتمثيل فيلم الاغتيال .

راح البنا
والملك الشاب الذكى والطموح والمحب لوطنه وشعبه , كانت ارادته قد كسرت وتم تقليم اظافرة بعدة اجراءات استمرت تسع سنوات انتهت بمحاصرة قصرة سنه 42 وحادثه القصاصين فيما بعد ..
اصبح هناك حطام ملك
زهد فى الملك ويئس من التغيير والقى ما فى يديه وقلب الترابيزة وقال مش لاعب .
الا ان قوة الاخوان مازالت فى اتجاهها للسيطرة على الساحه
والقارىء لملابسات العصر
كان هيستنتج بمنتهى السهوله انه لولا انقلاب يوليو لحكم الاخوان مصر على سنه 1955 على اقصى تقدير .
واخوان اياميها غير بتوع دلوقت , دول لم يتم ترويضهم واتربوا فى جو حر ومفتوح مفيهوش قيود واغلبهم شارك فى حرب 48 , يعنى باختصار مافيهمش عيوب اخوان اليومين دول , يعنى اسرائيل كانت هتصبح فى خطر داهم , بالاضافه لان مصر كانت فى طريقها للصعود خصوصا ان الاحتلال الانجليزى كان خارج .

ملحوظه : عبناصر مخرجش الانجليز من مصر , الانجليز كانوا خارجين خارجين سواء قام الانقلاب ام لا , اى امبراطوريه بتضعف لااااازم تبدأ فى التخلص من الاقاليم المحتله علشان تحافظ على الدوله الام , لو معملتش كدة هتضيع هيا نفسها , دا بالاضافه لنشاط فدائييى القناة واللى زاد عن احتمال الاله العسكريه الانجليزيه .

هل انقلاب يوليو من تدبير قوى خارجيه ؟؟
لا اجزم بذلك
الا انه من المؤكد ان عيون وايادى كتير من برة ساهمت فيه ( لاحظ ان الصهاينه بمجرد ما لاحظوا اضمحلال الامبراطوريه البريطانيه ادوها بالجزمه ورموا الهلب على الامريكان )

والثابت ان امريكا كانت مهتمه جدا بما يحدث فى مصر اواخر الاربعينيات واوائل الخمسينيات , وكان لها رجالتها فى مجلس قيادة الانقلاب ( طبعا عارفين انا اقصد مين )

اماااال , مش ناسبنا احنا معشر الامريكان الصهاينه خلاص وسيطروا على اقتصاد امريكا , فلازم نقوم احنا الامريكان بنفس الدور الوسخ اللى قامت بيه بريطانيا مسبقا ( دور بلطجى العاهرة ) وبالتالى لازم نمد ايدينا ونتحكم فيما يحدث بمصر , من خلف الستار طبعا , وبيظهر امام الستار ابطال وهميين ما هم فى الحقيقى الا دمى ماريونيت ....

محمد نجيب
خرج عن الخط , كونه اعتنق مبدأ بضرورة عودة العسكريين للثكنات ورجوع الحياة المدنيه , المبدأ دة كان كفيل بتدمير المخطط بالكامل , حيث ان نظام الادارة العسكرى لا يصلح مطلقا خارج الثكنات العسكريه وهذا النظام كفيل بتدمير اى مؤسسه او وزارة او دوله او حتى اسرة تدار عن طريق ذلك النظام .

- ظابط الجيش اللى يطلع معاش المفروض يترمى يقعد فى بيته والدوله تكرمه وتعطيله دخل ثابت يضمن له حياة رغدة وكريمه ومناسبه .
انما يمسك محافظه او وزارة او دوله
هتخرب
دا ظابط الجيش اللى بيطلع معاش اهله بيزهقوا منه فى البيت وبيلعنوا ابو اليوم اللى خرج فيه , شوفوا بوظ اسرة , تخيلوا بقى هيعمل ايه فى بلد ؟؟

كان لازم محمد نجيب ينزاح عن الطريق
علشان المخطط التخريبى يستمر
فى الوقت اللى راهن نجيب فيه على الشعب ودخل فى موال المؤتمرات الجماهيريه الحاشدة
فى نفس الوقت كان عبناصر بيراهن على الجيش ومش بيبطل حركه
ومع الاسف
فاز عبناصر برَهَانه بينما خذل الشعب نجيب وتخلى عنه .
وبكدة اصبح الطريق ممهد

اينعم كان عبناصر السبب فى ان الشعب التف حول قضيه واهداف ومبادىء
اينعم عمل نوع من العداله الاجتماعيه وانشأ صناعه مصريه
اينعم كان شخصيه محوريه فى المجتمع الدولى وكاريزميه على حد سواء

الا ان :
الفساد,
والطغيان,
والكفر بالله,
وقتل الانفس البريئه,
والاهمال,
والصلف والغرور,
والكبت,
والجمود,
والفُجر....
كلمه من دول
كلمه واحدة
كفيله بالقضاء على امبراطوريه وليست دوله وليدة
فما بالكم بكل تلك التشكيله وقد اجتمعت فى عصر واحد ؟؟

كان طيبعى جدا ومنطقى ما حدث فى سبعه وستين
وانتهت دوله عبناصر فى خمسه يونيو
وصارت بعدها مجرد جسد تحمله منسأة خشبيه ياكلها السوس , ينتظر ان يهوى فى الارض بين لحظه واخرى ...
لسبب بسيط جدا
الا وهو
ان :
العدل اساس الملك ....

الا ان حسابات الجماعه اياهم كانت غلط , فهم ليسوا بالضرورة اذكياء على طول الخط كما نعتقد او كما اوهمونا هم .
اعتقد الصهاينه ومن خلفهم ان السحق العسكرى للجيش المصرى كفيل باغلاق القضيه
ولكن يبدو انهم لا يستوعبون التاريخ جيدا
الجيوش تهزم
وتسحق
وتباد

اما الشعوب

فمن المستحيل هزيمتها او سحقها
والباحث فى التاريخ يجد ان وراء كل دوله عظيمه هزيمه ساحقه ( غالبا )
شوفوا المانيا بعد الحرب العالميه الاولى وصلت لأيه ؟
اقروا كتاب كفاحى بتاع هتلر
حد يتخيل ان دوله وصلت للانحطاط دة تتحول لاقوى دوله فى العالم وتحارب اعتى القوى خلال خمس سنين بس ؟؟
المانيا بعد الحرب العالميه التانيه , شرحه
اليابان , شرحه
ايران , اديكوا شايفين .....

مبدأ مهم للباحث فى الشان المصرى
فساد مصر مرتبط بفساد النخبه الوطنيه
ايا كانت
سواء كانت نخبه حاكمه
او نخبه اقتصاديه
او حتى نخبه ثقافيه او روحانيه ودينيه
ودة كان المفتاح الذهبى
مصر مينفعش معاها الاحتلال
لولا فساد النخبه الدينيه والسياسيه فى مصر , مكانش نابليون كمل فيها شهر واحد ...
وعليه
طبق القاعدة الذهبيه دى
ابعد عن التدخل العسكرى المباشر
وفى المقابل
ادعم نخب فاسدة
مسكهم مقاليد الامور
فى كل المجالات
سياسيا واقتصاديا وفنيا ودينيا
وسيبهم هما
هيقوموا باللازم وزيادة
هيمشوا المخطط صح
بدون اى استفزاز للمواطن الساذج
اهو
مافيش احتلال
ولا عدوان صليبى
ولا حرب دينيه مقدسه
منكم فيكم
وتمشى العجله
هى دى مصر
مصر اللى مرمغت التراب بانوف اقوى قوى العالم
هيمرمغ بانفها التراب مجرد حفنه من الانتهازيين ....
ودخلنا فى المرحله قبل الاخيرة
ودى هناقشها فى البوست القادم باذن الله .

اسف على الاطاله
الا انى اوجزت باقصى ما يمكننى
كل سطر قلته هنا
محتاج يتفصل فى كتاب
انا بس كنت بقدم نظرة بانوراميه كامله لوضع غريب وشاذ ..
ارجو انكم تثروا النقاش فى التعليقات
علشان اقول فيها اللى مقولتوش فى البوست

بس كدة

مصر المحروسه
فى تمام الساعه 10:08 من يوم الاثنين 11 يناير 2010

الأربعاء، 6 يناير، 2010

اىىىىىىىىىىى


حد شاف الفيلم دة ؟؟؟


اهو دة بالظبط اللى هيحصل لكوا لو اتطعمتوا

هما عاوزينكم تبقوا كدة


ولو اننا حاليا بقينا كدة من غير ما نحس

( وش واحد مهرج مجنون )

الاثنين، 4 يناير، 2010

طعّمنى طعّم


من حكمدار القاهرة الى يسرى الجمل القاطن بدير النحاس

لا تاخذ التطعيم الذى ارسلت ابنتك فى طلبه

التطعيم ضار جدا بالصحه

وبالوزارة كمان .....


قال وبيقولك مالوش اضرار !!

ادى اخر الاعراض الجانبيه

وش فقر ....


مكانش قادر ياخد الحكومه والحزب كلهم معاة يتطعموا بالمرة


D:


مبروك عليك اللقب يا ( يويو )