الأحد، 31 يناير، 2010

لحظه من فضلكوا ياجماعه


اسمعوا التراك وانتوا بتقروا البوست
اللى مش هيسمعه
ميزعلش
همد عالرجلين علطول
واحنا فى الشتا
والضرب على الرجلين بيوجع
انا قلت اهو




انا متضايق جدا
بسبب مواقف بتحصل وبتتكرر كذا مرة
الموضوع النهاردة لاهو سياسى ولا تاريخى
الموضوع من قلبنا احنا
المدونين
وعلشان متفكروش كتير
هجيب من الاخر
الموضوع دة بسبب موقف
الاخت نوران
فى اللقاء الاخير
وبوستها الاخير
اللى هو

( بييييييييييييييييييييض )

على حد وصفها
انا مش بنتقد نوران
ولا بنتقد اشخاص
بقدر ما بنتقد افكار
وقيم ومبادىء
انا شخصيا
شايف انها مغلوطه
بدون اعادة القصه
علشان مطولش اكتر ما انا ناوى اطول
اللى حضر اللقاء
واللى قرا البوست الاخير لنوران
واللى بيتابع مواضيعها
هيفهم اللى هتكلم فيه
نخش فى صلب الموضوع
هل الصراحه المطلقه
شىء مطلوب ؟؟
ولا هل هى شىء جميل يعتز بيه الانسان ؟
انا شخصيا
شايف انه لأ
لان فيه فرق كبيييييييييييير جدا
بين :
- الصراحه المطلقه
- والصراحه ( بدون اطلاق )
- واللباقه والكياسه
- والدبلوماسيه
- والتفاق والتملق

لما اظهر خلاف ما ابطن لشخص معين
بغرض الوصول لمنفعه معينه من وراة
واجى بعد كدة وهو مش موجود
واطعن فيه
ولما اكون انسان جبان
بخاف اطعن حد فى وجودة
وبفضل انى اقوم بالمهمه دى من وراة
ولما اكون متتبع لعورات الناس
وبدور على موضع النقائص فيهم
علشان اظهرها واضخمها
ولو ملقيتش بصنع من عندى وانسبه اليهم
كدة ابقا انسان منافق
ورمه
وزباله

ولما اكون بارع فى التملص من مواضع الزنقات الكلاميه
واقدر اخرج منها ببراعه
بدون ما ازعل حد
وارضى جميع الاطراف
ويكون لسانى حلو
وفيا خصله صغيرة من التملق
كدة ابقا دبلوماسى
ولما اعرف انصح اللى قدامى بدون ما ازعله
واوضحله غلطه بدون ما اجرحه
بينى وبينه
بغرض انه يكون احسن
وبغرض انه له عندى حق النصح
واوضحله عيوب بارزه فيه بشكل مهذب غير جارح
ويكون اسلوبى سلس ومهذب فى الكلام
دى اسمها
لباقه
ولما الاقى قدامى انسان زباله
ورمه وقذر ومتسلط
ولما يكون بيحاول ينال تملق الغير
واجى انا
اقوله انت كذا وكذا وكذا
بدون ما اضخم الموقف
وبدون ما احليه بشويه ورد
لانى وضعت فى موقف كان لازم اتكلم فيه وارد عليه
ومعادش بد من المواجهه
ومافيش قدامى غير انى اما انافقه او اواجهه بعيوبه
واقول اللى فيه النصيب
دى اسمها صراحه
لكن
لما يكون مافيش اى وصلات او بوابات بين عقلى ولسانى
واللى يهفنى الشوق عليه اقوله بدون حتى ما افكر فيه
ولما اجرح ناس بدون اى داعى
دى اسمها صراحه مطلقه
ودى شىء مش كويس
كلنا فينا عيوب
وانا اكتركم
مافيش حد فينا معندوش نقط سودا فى حياته لما بيفتكرها بيبص فى الارض
وانا اول واحد فيكوا
احنا بشر
مش ملايكه
كمان اعتقد مفيناش شياطين
بالمعنى الاصلى للشيطنه
يعنى اكتر الناس وساخه
بتلاقى فيهم ولو مللى خير ونور
قد يخرج احيانا فى ظرف معين
وقد لا يخرج
يبقى ليه نجرح بعض ؟؟

فاكرين قصه الحسن والحسين لما لقوا راجل عجوز بيتوضا غلط
وعملوا نفسهم بيتوضوا قدامه ولفتوا انتباهه بصنعه لطافه
عارفين ليه
علشان ميجرحوش شعورة
ويتضايق لان اطفال صغيرة بيعلموة
مع انهم صح
وهو غلط
انما دى الاخلاق ( العاليه )
نمط راقى منها قليل قوى اللى يعرفوة ايامنا دى
ودى فوق الاخلاق الكويسه اللى احنا نعرفها

ممكن انا لو متجوز
وعلى فرض انى كنت مقطع السمكه وديلها قبل الجواز
واعرف بدل الواحدة 34454 واحدة
وجيت فى ليله جميله
وانا حاطط راسى فى حجر مراتى اللى بحبها
واحنا فى قمه الحب والرومانسيه
تخيلوا معايا المشهد دة :
- حبيبتى
- ايوة ياحبيبى
- عاوز اقولك على حاجه
- قول
- بصى انا صريح , ومحبش اخبى عليكى حاجه فهقولك ومش عاوزك تزعلى
- قول ياحبيبى ومتخافش
- بصى ياستى,
انا كنت اعرف قبل منك,
فلانه وعلانه وتنتانه
وعملت مع الاولانيه كذا
والتانيه كذا
والتالته كذا
واتجوزت الرابعه عرفى
والخامسه مشيت معاها اربع سنين
وكانت بتجيلى الشقه من ورا اهلها
وووووو......................
شفتى بقى انا صريح ازاى
ومش بخبى عليكى حاجه

هل انتوا شايفين ان مراته بعد ما تسمع الكلام دة هتكون هى نفس الانسانه اللى كانت قبل ما تسمعه ؟؟
-مستحيل
هل ضرر الكتمان هيكون كان هيبقى اشد من الضرر والالم اللى اصاب مراته لما سمعت الكلام دة ؟؟
-لأ .

حبيبتى
امبارح شفت فلانه جارتنا وكانت لابسه طقم ,, انما ايه , وللللللللللعه
بصراحه كانت جامدة موت وكانت عنيا هتطلع عليها , بس بعد ما روحنا زعلت انى خنتك فى خيالى وحبيت اصارحك بالموضوع ...

هل الزوجه هتفرح وتنبسط وتقول ياحلاوتك ياجمالك يازوجوجى ياللى مبتخبيش حاجه عنى ؟
ولا هتزعل وتفقد الثقه بيه بعد كدة وتتابع حركه عينيه طول ما هما ماشيين فى الشارع ..
طبيعى جدا ووارد ان الزوجه فى يوم ونتيجه ظروف معينه تكون مش طايقه نفسها وحاسه بالقرف من كل الناس وعلى وجه الخصوص جوزها
دا طبيعى ودى ظروف بتيجى وبتروح ومش شرط يكون وراها سبب معين من الزوج
تخيلوا الزوجه فى الظروف دى قالت له لما دخلوا يناموا بالليل :
- يافلان ياجوزى
- نعم ياحياتى
- متنامش جنبى فى السرير النهاردة علشان انا قرفانه منك ومش طايقاك
تخيلوا انطباع الزوج هيكون ايه ؟

- فلان ياحبيبى
- ايوة ياروحى
- انت كرشك كبر قوى وبقى منظرك بجد مقرررررررررررررففففف , فلازم تخس
دى اسمها صراحه مطلقه
وهى ان اللى احس بيه اقوله علطول بدون اى فلترة وبدون موقف يحتم عليا ويضطرنى اقوله اصلا ...
ايه رأيكم ؟
كويسه ؟؟؟
اظن اللى عاوز اقوله وضح ومش محتاج تفصيل اكتر من كدة

ياجماعه
احنا ليه ربنا خلقنا مش بنشوف افكار بعض زى باقى الحاجات الماديه ؟
اقولكم ليه
علشان كلنا
حتى افضل الناس فينا
جوا عقولنا
ثقوب سودا
وصناديق زباله
رحيتها وحشه
دا فى كل انسان
واحنا بنحاول على قد ما نقدر نزيلها ونقللها
او نكبرها وننميها
وكل ما ننجح فى القضاء على اكبر كم منها
بنكون اطهر وانقى
بس محدش بيقضى عليها ولا بيتخلص منها بشكل كامل
فمن رحمه ربنا
انه ادانا القدرة على اخفاء العورات العقليه والطبائعيه دى
علشان منكونش وحشين ( قوى ) قدام بعض

- من رحمه ربنا انه خلانا منسمعش الا ترددات بسيطه جدا
لا تعادل جزء صغير من الاصوات الموجودة حوالينا
لان لو سمعنا كل حاجه
هننطرش
ونتجنن

- ومن رحمه ربنا برضه
اننا مش بنشوف كل حاجه حوالينا
علشان لو شفنا
هنتعمى
ونتجنن
ونموت من الرعب والفزع من اللى هنشوفه

- ومن رحمه ربنا
انه خلق لالسنتنا باب
علشان وقت اللزوم
يتقفل ويسكتها
ودة لان الانسان الاصل فيه انه صامت
ومش بيتكلم الا عند الضرورة والحاجه
وليس العكس

احنا طبعنا معقد جدا
والمشكله مش فى الصفات الوحشه اللى جوانا
دى امرها سهل
المشكله فى الصفات الكويسه
اللى اساسا بتنحسب من الفضائل
زى:
- الصراحه
- الكبرياء
وغيرهم
لما بيتوضعوا فى غير موضعهم
بيجيبوا لنا مشاكل
وبنخسر كتييييييييييير قوى

انا مثلا
بصفتى ميزانى صرف
والميزانيين هيفهموا كويس اللى اقصدة
انا ليا صديق
بمعنى ادق اعز اصدقائى
مفترقناش عن بعض من سنه 1988
عمل كام حركه نص كم معايا فى الفترة الاخيرة
فكان رد فعلى انى قاطعته
مش لانى كرهته
لأ
لانى مقموص منه
بقول مقموص مش زعلان
وبقاطعه ( مؤقتا )
علشان اشد ودنه
واقوله متعملش كدة تانى
وهو حاول يكلمنى كذا مرة وانا خلعت منه
لغايه لما بطل يتصل بيا
انا شخصيا
هموت ويكلمنى
وكل ساعه ببص فى الموبايل اشوف اتصل ولا لأ
ونفسى اروح اصالحه انا
لانى بصراحه
زودت العيار معاة حبتين
كان نفسى يحسسنى انى غالى عندة
ويستحمل رخامتى
وييجى يصالحنى
بس العيار تقل منى قوى
لغايه لما اتخنق
دلوقت انا اللى عاوز الم الدور
بس كبريائى بيمنعنى من كدة
ودة غلط
لانى غلطت انى متكلمتش معاة من الاول وصارحته بسبب زعلى
جايز يكون مش واخد باله اصلا
وغلطات لانى زودت الموضوع عن حدودة
فى ظرف زى دة
انا على وشك انى اخسر صداقه عمرها 22سنه
واخسر شخص انا اغلى عندة من بيته وعياله بدون مبالغه
تفتكروا صداقه زى دى
فى الزمن دة
تسوى كام
وممكن تتعوض ولا لأ ؟؟؟؟
هل كبريائى يستحق التمن الباهظ دة ؟
وخصوصا انه مش فى محله ؟؟؟
وحطوا تحت كلمه ( مش فى محلّه ) دى عشر خطوط
وصلت ؟

انا كنت ناوى اخلى الكلام دة عبر الايميل
بس السبب اللى خلانى اكتبه على الملأ
ان دة مش تصرف فردى
لأ
دا فيه تيار داخل الوسط التدوينى متبنى المبدأ دة
هسميه ( تيار الصراحه راحه ياعينى )
او( حزب الصراحه الوحدوى) ,
او الجناح العسكرى للحزب المسمى ( انا عاوزك تصارحنى حتى ولو تجرحنى )
علشان كدة فضلت ان بوستى يكون على الملأ
وارجو انه ميزعلش حد
وخصوصا نوران
لانى بجد مقصدش ان حد يزعل منى
وكنت براجع كل كلمه بقولها وغيرت كلام كتير علشان ميطلعش البوست بشكل جارح
فلو خانتنى بعض الالفاظ
فانا اعتذر عنها لان مقدرتى اللغويه مقدرتش تستبدلها بالفاظ احسن
ودة عيب من عندى انا .

نقطه قبل اخيرة
معروف ان الوسط التدوينى فى الفترة الاخيرة لَمْ
بسبب انتشار النت دخل قطاعات كبيرة من المصريين
انا مش بهاجم فئه معينه
ولا بتعامل مع الموضوع بطبقيه
لأ
اقصد ان زيادة العدد
جه معاها بشكل منطقى زيادة فى الناس الوحشه
زى ما الناس الحلوة زادت
وبما ان الحلو قليل
والوحش اكتر
فطبيعى ان الوحشين يظهروا بشكل كبير
احنا كلنا
او اغلبنا
بنحاول نعرف ناس قريبين من تفكيرنا
ونكون صداقات
انا شخصيا كدة
والا مكنتش عملت المدونه دى
كنت كتبتها فى كشكول وسجلته فى الشهر العقارى ودمتم .
واظن محدش ينكر انه كون صداقات رائعه من التدوين
وعرف ناس كان عمرة ما هيعرفهم لو مكانش دون
وانا شخصيا كدة
وبعترف
الفايدة كبيرة جدا
وتستاهل
اننا نخاطر
بصدام مع ناس وحشه
وباننا نتخدع فى ناس مش كويسه كنا معتقدين فيها الخير
لان العائد مغرى
والموضوع يستاهل
وشىء طبيعى اننا قصاد كل انسان كويس نعرفه هنتخدع فى عشرين واحد مش كويس
دا طبيعى
المهم نستحمل
ونكمل
ونقدر نفهم الناس كويس
ونلحق نفسنا قبل ما نندب فوق دماغنا
وادينا بنتعلم

نقطه تانيه
لو حد قالنا عن انسان انه مش كويس
يارايت مناخدش الكلام دة على انه مُصدق
لان الشخص اللى اتكلم عنه ممكن يكون هو اللى مش كويس
او ممكن يكون كويس بس مبيفهمش فى معادن البشر
او ممكن يكون بيفهم بس فلتت منه المرة دى
احنا بشر
ولينا مشاعر
ومشاعرنا بتأثر على تصنيفاتنا للناس
دا شىء طبيعى
يبقى انا بدورى
اخد الكلام
اوزنه
واحطه فى اعتبارى وانا بتعامل مع الشخص دة
بس مكونش مكون رأى مسبق عنه
يعنى احرص
ولا اخونش
اما اتاكد من صدق الكلام
او اعرف انه مش فى محله
دا موضوع بديهى

النقطه الاخيرة
بالنسبه للاجتماعات التدوينيه
انا حضرت منها واحد بس
بتاع اسكندريه
بصراحه انا كنت واخد فكرة
لقيتها عكس اللى شفته تماما
يعنى كنت فاكر ان الناس كلها بتتكلم مع بعضها وكدة
لقيت العكس
نظام الشلل
كل اتنين تلاته يعرفوا بعض واخدين جنب وهاتك ياكلام
واللى جاى
بس علشان يشوف فلان وفلانه اللى يعرفهم
طيب
اللى ميعرفش حد
يعمل ايه ؟؟
هل دا ذوق
هل دى اخلاق ؟
انا شخصيا على حظى مكنتش اعرف حد من الحضور
باستثناء بدرواى
اللى كتير كان ساكت
ولا حتى دخلت فى مدونات حد منهم ولا اعرفها
على لاقل كان هيبقى عندى خلفيه عن الشخصيه اللى بتعامل معاها
لقيت انى على نص اللقاء وقاعد زى الطربوش
قلت لأ
مبدهاش
وبدات احشر نفسى مع اى حد
واتكلم
والحمد لله
عرفت ناس كويسين
الرك والباقى على ناس تانيه
خجوله
قعدت من الصبح لغايه بعد العشا ساكته ومنكمشه
لانهم ميقدروش يتواصلوا مع حد بدون تشجيع من الحد دة
انا واثق
ان الناس دى كل مدى كانت بتتخنق اكتر وتزعل .
من فضلكوا
راعوا بعض
مش هقول ان دى قله ذوق
لا
بس احنا بنتكلم على مستوى راقى من الذوق
بيكون الذوق العادى قصادة قله ذوق
الناس اللى بتقول ان لقاء المدونين وحش
بسبب الشلل
معاهم حق
ودة مش لان الناس وحشه
انما لان النظام هو اللى غلط
الغريب ان الناس دى نفسها اول من يطبق النظام دة
وبعدين بترجع تشتكى منه
انا شخصيا اتضايقت من النقطه دى فى لقاء اسكندريه
مش لنفسى بقدر ما اتضايقت لناس تانيه كانت موجودة وفضلوا مع نفسهم طول اللقاء
مع العلم ان العدد كان صغير نسبيا
والظاهرة دى مكانتش واضحه قوى
فمن باب اولى المشكله هتكون اكبر مع عدد ضخم زى اللقاء اللى فات

الرسول عليه الصلاة والسلام
نهى عن ان اتنين يوشوشوا بعض فى حضور شخص تالت
لان دة بيضايقه
لازم نحترم بعض اكتر من كدة

اللى عاوز يقابل اصدقاء التدوين القدامى
يقابلهم منفرد
اكيد معاة ارقامهم وعارفهم كويس
كلموا بعض
وانزلوا اتقابلوا فى اى حته

انما اللقاء
ارجو انه يكون عام
ويكون النقاش فيه عام
بدون تحزب وشلل
علشان تدوا الناس ( الدخلاء ) اللى زيي
الفرصه انهم يتعرفوا على ناس كويسين زيكوا .....