السبت، 27 فبراير، 2010

VISION



البوست دة هتكلم فيه عن كذا موضوع حصل خلال غيبوبتى التدوينيه السابقه

خطاب الشيخ نصر الله الاخير :
انا مش هعلق على نص الخطاب ولا هحلله ولا هرد على السادة الناقمين والرافضين , بس عاوز اقول حاجه واحدة ,
عاوز اقول ان اللى حصل وبيحصل فى العالم خلال الاربع سنين اللى فاتوا واللى حصل فى غزة ولبنان واللى حصل فى فنزويلا واللى بيحصل فى تركيا وافغانستان وايران , دا بيعطى صورة جليه جدا للوضع الراهن وللمستقبل الاتى باذن الله :
ان الاخطبوط الامريكى ليس ( كيان غير قابل للهزيمه ) كما يدعى البعض , وان اسرائيل اضعف بكثير مما اعتاد حكامنا الاجلاء اقناعنا به حفظا لماء وجوهم وتبريرا لتخاذلهم , وان فيه ولله الحمد بدل التيار ميه والف بيلطشوا امريكا واسرائيل كل يوم بدل القلم الف قلم .
اعتقد ان الواقع الحالى والتاريخ السابق بيخلوا الوضع مش محتاج لنقاش
ومن هذا المنطلق انا ادعو الاخوة المدونين ممن اغرقوا انفسهم فى بحار الجدل العقيم وطوفان الضغط والقولون العصبى من جراء النقاشات اياها لجماعه المصريين الجدد ( اياهم ) بتوع :
- حسن نصر الله وجهاد شاشات البلازما
- غزة حركه ارهابيه
- الغزاويه هما الى عملوا كدة فى نفسهم واحنا مش ملزومين بالدفاع عنهم
- اوعوا تفتحوا معبر رفح احسن يحتلوا سينا
- فلسطين اولها ( فلس ) واخرها ( طين )
- محدش قد امريكا واحنا منقدرش على اسرائيل.
- كفانا حروب حتى نتفرغ ( للتنميه ) .....

ادعوهم لوضع حد للنقاشات العقيمه دى , لانه وبمنتهى البساطه الانسان اللى يعجز عن قراءة الواقع بالشكل البشع دة ويكون عندة قصور رهيب فى ابسط قواعد الاستدلال والمنطق , اكيد اكيد , عمر الكلام ولا النقاش هيجيب نتيجه معاة ولا هيحوق فى جتته المنحسه .
خلاص , قد تبين الرشد من الغى .
كفاياكم حرق فى دمكم علشان اكياس الدم غاليه اليومين دول ...

-----

( اللوياثان ) العسكرى التركى بدات نهايته , ومازالت نجاحات نظام ( رجب حوش شيمون عنى ) الاسلامى فى تقليم اظافر العسكر تتوالى ...

-----

يبدو ان ( ارليكينو ) العصر الحديث والشهير باوباما لم يجد اى وسيله للضغط على التنين الصينى كى يتوقف عن دعم النظام الايرانى غير استقبال ( الدلاى لاما ) فى الولايات المتحدة , فى اشارة عبيطه للولايات المتحدة الداعمه للحريات ولكهنه التبت ...

-----

قناة الجزيرة , كل يوم تثبت جدارتها وسبقها الاعلامى , وقفت كثيرا امام كليب تمت اذاعته مؤخرا من نيجيريا لجماعه مستلقين على الارض بينما يطلق افراد عسكريون النار على رؤوسهم , حين يصيح احدهم فى زملاؤة : لاتطلق النار على راسه , اضربه فى صدرة فانا اريد هذة القبعه !!!!!

بصرف النظر عن رايى فى جماعه ( هوجو حرام , دانهيل حلال ) الا انه لا يوجد اى مبرر لقتل رجال عزل وعجزة بهذا الشكل ( المستفز ) ولن اقول الحيوانى , فالحيوانات لا تفعل ذلك ..

المشهد دة ذو نكهه امريكيه معروفه , وبصمه لا يُختلف عليها للمخابرات الامريكيه ( القذرة ) , حصل وبيحصل فى اماكن كتير فى العالم ابتداء من جمهوريات امريكا اللاتينيه الى الشرق الاقصى ..

واضح انها سياسه منظمه فعلا مش محض تشابه , وواضح ان الاسلوب الدموى الفج دة , احد ايقونات سينما اراجوزات الساسه الامريكان المفضله .

اعزائى الافارقه :
خليكوا كدة , زى ما انتوا وزى ماكنتوا من الف سنه , وادى دقنى لو فلحتوا .........

-----

واضح جدا ان العقل الجمعى المصرى على حافه انهيار عصبى حاد , تلك حقيقه تؤكدها حاله العته والبله اللى بتظهر فى نقاشات المصريين فى المواصلات وعالقهوة ( ربنا يكون فى عون الجماعه بتوع التقارير ) , والقيم الفحلقيه اللى بيحاولوا يوجدوا لها اى اساس منطقى دون جدوى , وموجه الاهتمام الغريب بفوازير ( كرومبو ) الهايف ابن الهايفه , ومسابقات من نوع ( ايدك فيها كام صباع ؟) , دا غير عته كرة القدم وبطولات الجنرال حسن شحاته على خط الجبهه والزعيم الوطنى المفدى ( جدو ) والشيخ العالم العلامه حجه الدنيا والدين محى السنه وقامع البدعه الشيخ ابو تريكه قدس الله سرة , دا بالاضافه لنظريه : علم مصر + عبوة بيروسول + ولاعه = وطنيه !!!!!!!

على بركه الله , بس متنسوش تسموا وتكبروا قبل ما تدبحوا , واقترح عمل مشروع قومى يتم تمويله بواسطه ( ما تبقى ) من اموال التأمينات والمعاشات لشراء 80 مليون قميص ابيض بدون اكمام يتم ( تلبيسه ) لكل مصرى فى يوم يحدد كعيد قومى , بالاضافه للافتات من نوع ( انا حسحس وحسحس انا ) و ( عايز تورلوب ) و ( التربنوخ ) لزوم المشى على كوبرى 6 اكتوبر ساعه العصريه , واقترح كمان تفصيل كام الف قميص ازرق , للاخوة الاعداء اللى مش هيوافقوا على ارتداء القميص الابيض بالذوق ,,, ولا على ايه , القمصان الزرقا مافيش اكتر منها , ربنا يخليلنا مصنع المهمات ....

-----

بالنسبه لاونكل براد بيت ... اقصد براد عى , مش هتكلم عنه لانى اتكلمت عليه فى تعليق على البوست اللى فات , اقروة لانى مستخسر اكتبه تانى الصراحه ..

-----

وسط المولد والمرستان دة كله , النظام المصرى قابع فى ماء اللفت , متخلل وزى الموميا بالظبط , ممتنع عن ادراك ابسط التغيرات فى العالم من حوله , معتقد انه لاداعى للتفكير طالما ماما امريكا معاة .
طيب , باذن الله زى مانوارة قالت , الجيلوتين فى انتظاركم , قد نختلف على رؤيه المستقبل , ان كانت الجيلوتين اياها دى ستنصب على يد امريكا , او ثورة شعبيه تحت سيطرة امريكيه , او شله اراجوزات برضه تبع امريكا , او فوضى غير مدبرة وغير محسوبه وليست تحت اى سيطرة , او ثورة شعبيه خالصه , او انقلاب وطنى او بالتبعيه ,,,, ايا كان , الا ان الجلوتين قادمه , اما بالنسبه لموضوع الدعم السياسى فلا يوجد نظام امريكى على درجه من الغباء تؤهله لمجرد الظن بان النظام المصرى الحالى او ( التالى ) قادر على دعم مصالحها فى المنطقه وعلى ( تلجيم ) شعب المحروسه ..
انصح باخلاء مكان تمثال رمسيس القديم , ونزع الاسوار المعدنيه اياها , حتى لا تعيق الرؤيه امام جماهير الثورة الفر...الوطنيه , كما انصح باستيراد ( كام قفه وسبت ) خوص , لزوم الرؤوس الكريمه , ويجعله عامر ...

-----

موضوع المدون اللى راح النيابه واللى نوارة اتكلمت عنه ,
قبل اى كلام , الموضوع فيه كذا نقطه , فالرجاء عدم الخلط ,,

اول حاجه بالنسبه للاخ المدون انا اتعاطف معاة قلبا وقالبا , وفكرة ان مواضيع معينه تكون غير قابله للنقاش الاعلامى , دى فكرة انا مش مقتنع بيها , وان كانت ليها مبرراتها وقت الحرب , الا اننا مش فى حرب دلوقت , والحاجات اللى كانت بتعتبر اسرار زمان , الدنيا اتغيرت دلوقت وبقت بتذاع على الملأ وفى المجلات المتخصصه كمان ..

تانى حاجه , من الناحيه القانونيه اعتقد ان الاخ المدون مدان ميه فى الميه بحكم القانون ( اللى انا مش مقتنع بيه )

تالت حاجه بالنسبه للاخ الطالب موضوع البوست المشكله
السيناريو اللى بيتحكى دة مش منطقى ومش معقول ومبيحصلش اصلا
لعدة اسباب:

اولا ادارة الكليه لديها صلاحيات مطلقه فى رفد الطالب او انزاله سنه دراسيه او اكتر , ولاسباب تافهه ممكن يقع فيها اى طالب , ليس منها انه ضرب زميله , فمن باب اولى لو عاوزين يرفدوة كانوا نقوا سبب قانونى , على الاقل تبقى مسبوكه اكتر , مش سبب خايب زى دة , يدينوا نفسهم بيه , الناس دى مش هبله , الناس دول فاهمين صلاحياتهم كويس .

ثانيا مش منطقى تصرف الاب , وقصه انه خايف من البهدله ومش عارف ايه دا كلام مش صح , اسلوب امن الدوله والداخليه دة مش هتعمله ادارة الكليه , وملهاش اى ورقه تضغط بيها على الاب , علشان تجبرة انه يقدم استقاله ابنه , فتصرف الاب مريب وغير منطقى .

ثالثا الكليه غير ملزمه بعدد ثابت من الطلبه كل سنه علشان تقبلهم , يعنى اعتقد انه لو الشخص ( الواصل ) المزعوم دة حقيقه فعلا , اعتقد انه مش هيغلب فى انه يدخل ابنه زيادة , مش هتيجى على واحد يعنى , كما ان الشخص الواصل دة , ليه استنى بعد ما الدراسه بدأت باربع شهور علشان يدخل الولد ؟؟ وكدة فيه سنه دراسيه فاتته , هيعوضوهاله ازاى دى ؟ والكوسه هتقدر تعمل ايه فيها ؟؟؟
قصه ان الكليه ترفد طالب فى تانى سنه دراسيه له علشان تحط واحد مكانه , معلش , الكلام دة مبيحصلش , الا بقى لو كان ابن رئيس الجمهوريه , وهو على حد علمى معندوش اولاد فى سن 17 ...

رابعا موضوع زى دة كان حله بسيط جدا , حيث ان الطالب لو اترفد وشايف ان فيه تعسف بيقدم طعن على القرار وبيتعرض لجنه عليا , ولو اتعرض واترفض طعنه او متعرضش خلال 60 يوم فدة بيعتبر رفض برضه وساعتها بيحق له انه يرفع قضيه على الوزارة امام مجلس الدوله , ومجلس الدوله انتوا عارفينه , كما انه بيتعاطف مع الطرف الضعيف فى الحالات اللى زى دى , وبيجيبله حقه , وقرارة بيمشى والوزارة بتنفذة ومش بتماطل فيه , دة شىء معروف وبيحصل بشكل يومى , انت بقى كأب , ايه خلاك تتنازل عن حقوقك دى كلها وتجيب الموضوع من عندك وتمشيها استقاله وتضيع حقك ؟, مع العلم ان الكلام عن البهدله والتهديد غير متحقق فى حالتك وحاله ابنك .

..السيناريو اللى اتحكى دة مش بيتم الا فى حاله وموقف واحد بس مالوش تانى, هو اللى بيتم فيه استدعاء ولى الامر واقناعه بتقديم استقاله لابنه تحت اى مسمى , وعادة الاب بيوافق لاعتبارات كتير ....

اخيرا , ياجماعه بصرف النظر عن اتجاهاتكم وانتقادكم لاى جهه , انتم تعتبروا اعلاميين , اى شخص يملك اداة تمكنه من توصيل رايه لشخص اخر او اكثر , فهو اعلامى , والاداة دى سلاح , فمن الواجب انه يتحرى الدقه فى اى كلام بيقوله ويتاكد من صحته الاول , بدل ما يعمل بلبله على الفاضى , وخصوصا اننا بسم الله ماشاء الله , بنفهم فى كل حاجه وحاطين قناعات مسبقه عن حاجات منعرفهاش وبنقيم على اساسها اى احداث بتحصل ...

بس كدة
تصبحوا على خير
خخخخخخخخخخخخخخخخخخخ

الاثنين، 15 فبراير، 2010

connection



التاسعه من مساء الاثنين الخامس عشر من فبراير 2010
ليله ربيعيه لطيفه
سماء صافيه لا تعوق الاتصال
السادة مالكى روابط الاتصال
برجاء تصفيه الاذهان
والتوجه لمكان مناسب
والضغط على زر التشغيل
فمنذ قليل
تم فتح باب الاتصال
وتشغيل اجهزة الارسال
وهى تعمل الان بشكل مثالى
برجاء عدم اضاعه الفرصه
واتخاذ الاوضاع المناسبه
واستقطاب اكبر قدر ممكن من الموجات
وجذب اكبر عدد ممكن من الفراشات
كى تحط على رؤوسكم الكريمه من تلقاء نفسها
لانها كما تعلمون
متى حاولت امساكها بالجهد تفشل .


هذا اخطار اخير

التوقيع :
احمد سعيد
واحد مجنون


البوست تحت مسمى ( هرتلات )

الجمعة، 12 فبراير، 2010

إخوان على ماتُفرج



خبر اصبح معتاد
كل يوم
او كل اسبوع
او على اقصى تقدير كل شهر
( حمله اعتقالات يشنها النظام على كوادر الاخوان فى محافظات كذا وكذا وكذا )
وسرعان ما ياتى الرد :
( نحن صامدون وعلى العهد باقون ولن نستسلم , جمعاء , جمعااااااااء , جمعااااااااااااااااااااااااااء )

ايون يعنى حضرتك مش هتستسلم , هتعمل ايه يعنى ؟؟!!

تخيلوا معايا واحد واقف فى الشارع وواحد تانى نازل ضرب على قفاة
واللى بينضرب مستسلم خالص
وكل اللى بيعمله
لن استسلم
طااااااااخ
لن اتزحزح عن موقفى
طاااااااااااااااااااااخ
لن أ..
طاااااااااااااااااااخ

طب حرام
والله حرام
حرام عليكوا نفسكم
انا مش اخوانى
بس بامانه
والله بتصعبوا عليا
ايام الملك كانت الساحه مفتوحه قدامكم وبتلعبوا براحتكم
جميل قوى
جه عبناصر
قلنا محنه وربنا يعديكوا منها على خير
ماهو مش معقول يعنى واحد بيطلع ميتينه فى المعتقل وحكايات تعذيبه بتتناقلها الاجيال بعد منه
اكيد مش هينطلب منه يعمل حاجه
ربنا يصبرة ويطلع منها على خير
جميل خالص
جه السادات
خرجكوا
ساب لكم الحبل على الغارب ( لغرض فى نفسه )
وهنا لنا وقفه

كوادر الاخوان فى الوقت دة مروا بتلات مراحل مختلفه ومتناقضه
من الملك الى عبناصر الى السادات
ومنهم اللى حضر فؤاد كمان
المفترض فى شخصيه خاضت المعترك السياسى لاكثر من اربعين سنه
المفترض انها اصبحت على درجه من الوعى والادراك يمكنها من استيعاب اى تيار جديد
ومن المؤكد انه من رابع المستحيلات ان يتم تطويع عقول كتلك لخدمه اغراض سياسيه المفترض انهم ضدها ( تطويعهم بشكل غير مباشر اقصد )
ومش وارد ان يستطيع شخص مهما بلغ الدهاء السياسى عندة من الضحك على دقون كتلك الدقون ناصعه البياض
امال ايه اللى حصل دة
عمر التلمسانى شخصيه انا احبها واحترمها
بس بصراحه
بيستفزنى جدا منظر السادات وهو بيلعب بيها يمين وشمال وبيحركها كمجرد قطعه على لوح شطرنج
وبيغيظنى وبيستفزنى اكتر انه الله يرحمه ( التلمسانى طبعا ) كان مصدق اللى بيحصل , وقال ايه : اشكوك الى الله ياريس , والالعوبان التانى يتمسكن ويقول له اسحبها ياتلمسانى , قال يعنى خايف قوى من غضب ربنا ودعوة المظلوم
بصراحه كل ما افتكر المشهد دة ميجيش على لسانى غير كلمه واحدة :

احا
( وهى اسلوب تعجب سماعى , وليست لفظ بذىء حتى لا يعترض البعض )

ايه السذاجه المستفزة دى
ماهو اصل ساعات كدة الواحد بتنقلب مشاعرة تجاة الضحيه من الاشفاق الى الغضب لما يشوف فيها سذاجه مبالغ فيها ..
وعمل السادات اللى فى دماغه
واستغل الاخوان احسن استغلال
وقضى بيهم على اعداء لم يكن يحلم بالقضاء عليهم بدون معاونه الاخوان
مع ان تعبان زى السادات جدير بانى اتحالف مع الد اعدائى للقضاء على داهيه زيه , لان الد اعدائى دة لن يكون اخطر عليا منه
خلص المولد
وخد السادات غرضه
وانتم وقفتوا محلك سر
وجه العهد العوكلى ( المبارك )
واهو
من سنه سبعين الى الان
كنتم فين وبقيتم فين ؟؟؟
اللى النظام اداهولكم اخد قصادة منكم اضعاف مضاعفه
ومع الزمن
بتخسروا شعبيه
بتخسروا مصداقيه
بتخسروا تعاطف الناس
ومع الاسف النظام مستمر فى التلميح ببراعه عن صفقات مشبوهه بينه وبينكم امعانا فى الدس بينكم وبين الشارع المصرى
وانتم مع الاسف بتساعدوة على اظاهركم بالصورة دى ( بخيابه منقطعه النظير )

وقفه مع نفسكم
شوفوا دلوقتى انتم فين
التلطيش نازل عليكم من كل ناحيه
وانتوا حتى مش بتحموا قفاكم من الضرب ( مش هقول بتردوا الضربه طبعا )
هتقولوا النظام متغول ومتوحش واحنا مش قادرين عليه
طيب جميل , لا يكلف الله نفسا الا وسعها
كدة انتم قدام خيارين كلاهما مشرف

الاول : عليا وعلى اعدائى وتعملوا زى النحله اللى بتقدم حياتها مقابل انها تكون مجرد لسعه وعكننه والم فى يد من يعتدى على مجتمعها .

التانى: انكم تاخدوا جنب وتنسحبوا ,على الاقل هتفوتوا على النظام فرصه استخدامكم ( كفزاعه ) للغرب كلما حاول الغرب ابتزاز النظام بدعوات الاصلاح ..

ياراجل
دا انتوا دلوقت بقيتوا صمام امان للنظام
ومفهم اسياده انه لو اتزحزح من مكانه مش هيكون فيه بديل غيركوا !!!
فيه خيبه ووكسه بالشكل دة ؟
لما مبارك يستغلكوا وقت ما بوش ضغط عليه , ويسمحلكم بنسبه ( امنه ) فى مجلس الشعب , اللى هوا ساسا مالوش اى لازمه حتى لو كان كله اخوان ومعارضه , وانتوا بمنتهى البلاهه تبلعوا الطعم , ولسان حال عوكل بيقول لبوش :

- شوفت , اهو , سيبت الحبل شويه , الاسلاميين اكتسحوا البلد , شوف بقى لو عملت اللى انت عاوزة هتلاقيهم فى كل المراكز السياديه فى مصر , وشوف بقى يا بشبوش , ساعتها هيكون موقفهم من اسرائيل اللى وصلتك للرئاسه ايه ؟
دا قليل ان مااعلنوش مصر خلافه اسلاميه واعلنوا الحرب على اسرائيل وعملوا وحدة عربيه ورموها فى البحر
وشوف انت بقى
انا والله ياببش ياخويا مش متاخر
ونفسى اعمل اصلاحات زى اللى بتقول عليها دى
بس اعمل ايه
شعبى وسخ ومعفن وولائه للقوى الرجعيه الارهابيه
ولازم احكمه بالحديد والنار والا هيتنمرد واول ناس هينقلب عليهم هيكونوا انتوا
انا اهو
تحت امرك
قولى يمين يمين , شمال شمال
ها
اكمل اصلاحات ؟
ولا انت رايك ايه ياشارونى ياحبيب قلبى
شوف
بوش الراجل بتاعكوا عاوز يخربها على دماغكم
لا والخاين كمان عاوز يشيلنى من مركزى
مع انى وانت عارف ياليشع ياصاحبى
انا الراجل بتاعكم وصمام امان لدوله صهيون اللى بحبها واحترمها من كل قلبى
اهو
روح انت بقى اصطفى معاة وانا تحت امركم فى اللى تتفقوا عليه
----
يروح شارون لبوش ,,,,
ازاى ياض يابوش انت ياض انت ياض تعمل كدة
انت اتجننت
عوكل دة الراجل بتاعنا
والمخرب الاعظم لمصر
وبيعمل اللى احنا مقدرناش نعمله فى الحروب
وهو اللى هيكون خرابها على ايدة
واخر مسمار فى نعشها
دا الراجل بتاعنا
دا بيحافظ على امن اسرائيل ( اة اتقالت حرفيا كدة )
لالالالا
لم نفسك
وبطل القرف اللى بتشربه
وسيبك من الكلام الفارغ بتاع الديكتاتوريه والاصلاحات السياسيه والهبل دة
المصريين دول شويه غجر مينفعش معاهم الا عوكل ورجالته
ولم الدور يابوش
والا قسما عظما
اطلعك منها بفضيحه
واديك شفت كلينتون اهو
عملناه عبرة وفتله
وانت عارف ياحبيبى
كل المؤسسات الاقتصاديه اللى بتمولك وبتحميك بتاعتنا
وكل الاعلاميين تحت باطنا ورجالتنا
حتى نجوم الفن والرياضه اللى لهم كلمه فى الشارع الامريكى , نجحنا فى استقطابهم لنا
هااااااااااااااااااااااااااااة

بوش : تمام يافندم , ياعوكل , اعمل اللى على كيفك .....
------

انا بوجه الكلام لاى شاب اخوانى
انت دخلت الاخوان وانضميت لهم ليه
ايه الهدف يعنى
لما انت كل يوم بتتبهدل
وياريته بمقابل
كله على الفاضى
وضبط النفس وميتين ام ضبط النفس
طب وبعدين
ماهو مثلا يعنى لما انا انضم لتنظيم من بتوع الجماعات فى الثمانينيات
بصرف النظر عن افكارهم واساليبهم
بس ليهم هدف
عاوز يغير نظام البلد اللى هو ( شايفه ) غلط
حاجه واحد مقتنع بيها وبيسعى لتحقيقها , بصرف النظر عن كون قناعاته دى صح ولا غلط واسلوبه مظبوط ولا لأ

انتوا بقى جماعه سياسيه
ودا مش عيب
انا طول عمرى بقول ان القول بفصل الدين عن السياسه جهل وغباء مطبق او نفاق ولؤم
لان ببساطه مستحيل الاتنين ينفصلوا عن بعض
فاما ان الدين يوجه السياسه واما السياسه تستغل الدين
الاولى بتحصل بس فى عهد الانبياء
التانيه هى السمه السائدة فى كل العصور وعلى كل الديانات بلا استثناء
الدين لما بيتفهم صح بيوجه السياسه فى اتجاة قويم
السياسه اساسا لعبه قذرة ووسخه طول عمرها
فلما السياسه هتستغل الدين .................. , مافيش داعى اكمل , اديكم كلكم شايفين اهو .

بالذمه ونا راضى ذمتكوا
عمركوا سمعتوا عن جماعه او تنظيم فى تاريخ البشريه اسمى اهدافه هو مجرد الحفاظ على بقاؤة ضد بطش عدوة ؟!!!!!
معتقدش
وان كان فيه حاجه بالشكل دة
هل تعتقدوا انها هتصمد ؟
لا
ابسط قواعد الاستراتيجيه العسكريه والسياسيه بتقول كدة
لو انت نازل ضرب فى واحد وهو مستسلم لك
هل المتوقع لنهايه المشهد دة انك تزهق وتسيبه وتمشى ؟؟؟؟
اكيد لأ
الا لو كنت بتضرب فى الهرم نفسه
وانتوا مش هرم ..

انتوا عاملين زى اللى واقف على سور البلكون
لا منه بينزل ويريح قلبنا اللى اتخلع من الخوف عليه
ولا منه بينط ويخلص ويرتاح ويريحنا

انتوا عاوزين ايه بالظبط دلوقت ؟؟
اشك انكم تعرفوا الاجابه..
لانى بصراحه
حاسس انكم ماشيين ( بالقصور الذاتى ) .

الاثنين، 8 فبراير، 2010

خروج عن النص 2



الاكل والشرب فى ايد اللومنجيه
والطماعين اللى غلّو الملح والميه
والغششاشين اللى فاقوا عالحراميه
الشاى بالمفتشر مخلوط ملوخيه
والبن فيه الشعير تسعين فى الميه
والعيش برمله وطينته يامناخليه
واللحم معروض بدون اختام رسميه
والميه هى اللبن ولا اللبن هيه
افاعى متسيّبه من غير رفاعيه
ودنيا مترتبه ترتيب فلاتيه
------

شوف لما يغضب ربنا
يخلى اللى فوقنا تحتنا
وفى كل نايبه يدبنا
من بعد مايصيبنا العمى
ندور نلطش فى الظلام
واللى ورا يصبح امام
ونحلل الشىء الحرام
بتشريعات ومُحكمه
ولما تتهز الخصور
والكاس على النسوان يدور
يانور تخاف منك يانور
كل النفوس المُظلمه
وكل ماالنور ينطفى
ويكتر اللهو الخفى
القوت جميعه يختفى
تحت الايادى المجرمه
قليل علينا دى الغلا
ياتارك الصوم والصلا
لسه المصايب والبلا
متحضرة ومتكومه
الدودة كان مين قال لها
كُلى المحاصيل كلها
من قطنها لفجلها
قايل لها رب السما
والنيل ياعُباد الصنم
نقص السنه دى كام قدم
ويادوب عشان يسقى الغنم
الطيبه المستسلمه
وكمان بقينا مسخرة
من لندرة لانقرة
اُمه , لاهى متحضرة - قالوا - ولاهى مسلمه

-------

تسرق رغيف ياحرامى وتتحبس شهرين
لو كنت قاضى المدينه احبسك سنتين
لأن ذنبك يامجرم يعتبر ذنبين
المهنه رخّصتها لما سرقت رغيف
وكمان بتسرق من قبل ماتصبح وجيه وشريف
لا انت حرامى تشرفنا ولا انت وجيه
وياويله , ما اتعسه الواقف مابين بينين
تهجم على السرقه ليه يااجهل الجهال
رئيس قلم حضرتك ولا وكيل اعمال
السرقه يابن الحلال صنعه , وعايزة رجال
لهم فى فض المشاكل والامور تصريف
ومن وراهم ضهور جامدة وجنس لطيف
يهونوا اللى جرا ويلطفوة تلطيف
وفين تروح بالرغيف جنب الاكابر فين
اصبر على نعمتك يمكن هتبقى وجيه
وجيه بمكتب وساعى بالجرس تناديه
وسكرتير زى حالى لما تشخط فيه
تتزلزل الارض والعالم يقول يالطيف
والبنكنوت يتحشى لك حشو فى المظاريف
تلقاها بالصدفه فى جيبك بدون تكليف
وتقول عجيبه , يارب الظرف دة جالى منين !
------

اربع عساكر جبابرة يفتحوا برلين
ساحبين بتاعه حلاوة جايه من شربين
شايله على كتفها عيل عنيه وارمين
والصاج على مخها يرقص شمال ويمين
ايه الحكايه يابيه ؟ جال خالفت الجوانين
اشمعنى مليون حرامى فى البلد سارحين
اسأل وزير الشئون ولا اكلم مين !

---------

قاعد على مكتبه
يهف فى مرتبه
واللى خرج يشتمه
واللى دخل يضربه
نايم على مرْتبه
لها زرار كهربا
ويقول لصاحب العمل
ياتلتميت مرحبا
خمسين سنه تنقضى
على جواب يتمضى
واهل البلد تشكرة
وتقول علينا رضى
وياخزينه ادفعى
وانتى ياأُمّه ارجعى
ميت الف قرن لورا
ومستحيل تنفعى
---------

لو كنت عبود باشا , مشتريش سيارة
واردم عليها ولو تجينى هديه
مش قصر ديل منى ولاهى امارة
انت اللى عارف ياللى لك عربيه
فى كل طلعه شمس عاوزة عمارة
او يسرقوها كلها الحراميه
وياما تعصلج معاك فى حارة
لا فيها بنزين , وعاوزة كوز ميه
خسارة تبدى وتنتهى بخسارة
يارب ماتحرمنى من رجليا
-------

شوف الجاموس لما بيشرب من شطوط النيل
الواحدة جنب اختها واقفين فى صف جميل
شوف لما الغنم تطلع للمراعى رعيل
لا الكبش يطغى ولا ينطح بقرنه فصيل
شوف الطيور لما بتروح فى كل اصيل
اسراب ومتنظمه راجعى الحمى بدليل
وانظر وشوف بنى ادم من بتوع دى الجيل
كل الامور عندهم بالزغد والتشضيل
قالوا اللى ميكونش فى الاول دايبقى عويل
ومن كدة بالقليل فى كل زحمه قتيل
والله البهايم ولا اولاد قابيل وهابيل

---------

يا اهل ودى فلقتونى
يامسلمين غلبتونى
وان عبت فيكم تلومونى
وتجعلونى مع المجانين
قلتولى دا احنا اذكيه
وعندنا حسن النيه
والمصرى يتعد بميه
م الناس اخص الشرقيين
امال دا ايه اللى بيحصل
دى حاله عايزة تتفصل
داء السخافه متأصل
فينا وماسك فى الشرايين
بشوف يوماتى بعنيه
فى السكه ساعه العصريه
موكب وفيه ميه عربيه
راكبين عليها عيال حافيين
تعدى قبله الجمّاله
والطبله فوقها شغاله
والنقرزان والرجاله
من الفتوات الصايعين
وبعد منها جمل ازعر
وفوقه عبله مرات عنتر
قدامها شيبوب يتمختر
وفى وسطه طزينه سكاكين
بعدين تفوت الرفاعيه
والمجلوبين والصطليّه
والنشالين والحراميه
وبتوع ابو زعبل رخرين
وبشوف بقى اخر الزفه
حنطور عليه كشمير لفه
وعربجى ومملوك خفه
عليه زواق ورد وياسمين
وفيه ولد جربان اعور
قاعد يمخط ويبربر
وزر طربوشه ازعر
وكل حاله زى الطين
ابو الولد شايل الرايه
وامه شايله الدفايه
والملح شايلاة الدايه
تطسّه فى عيون الماشيين
يبقى الولد زى النسناس
وتخاف عليه من عين الناس
تعال ساعدنى بمداس
ورِن اصحابنا تسعين
وبعد يوم من دى الغارة
تلقى المطاهر فى الحارة
يعجو وسخ فى الفخارة
واديه على الوحله لازقين
والخنفسه فى ايدة بتلعب
اما الدمامل شىء اعجب
القرد ان شافه يهرب
ويفتخر عالبنى ادمين

-------

سحنتها ياولاد ادم
سحنه شيطان
ولسانها ياسلام سلم
عقرب بزَبان
ورداوة , جنب غباوة
مش على تِعْبان
وجهاله وعقل مزنخ
مش على حيوان
ويجى لها الفرّان نوبه
وقليل ان عاد
ساعه تحاسبه على نكله
كات عندة زمان
على فكرة ياست ام احمد
دى مرات فنّان

----------


فى فصل الصيف يفوت بيته
لراس البر او لبنان
وفى فصل الشتا يرحل
على اسوان
وتتعجب على الانسان
بكتر المال يعيش طهقان
لاهو طايق يكون حران
ولا طايق يكون بردان
تشوف القصر وجنينته
تقول ياجنه الكافر
عليها بواب وطقم كلاب
بتتهارش وتتعافر
تقول ياقصر فين صاحبك
يقول لك من زمان سافر
فى كارلسباد الى فيشى
ومن فيشى الى ايفيان
احب البرد فى طوبه
واحب الحر فى بؤونه
وعندى للشتا اوضه
وليله الحر بلكونه
ولولا الدنيا تتغير
لكانت دنيا ملعونه
لتسقط حكمه الانسان
وتحيا حكمه الرحمن
---------

قيافته تذكر فى كل حارة
وشكله يعجب البيض الامارة
وفيه كل الجمال والحسن لكن
جمال ناقص كمال , ياميت خسارة
يسير فى كل خطوة ويتف بزقه
على الحيط او علينا تطب لازقه
عايز له من رجال الصحه فرقه
تلاحقه بالجرادل والنشارة
وفى البلكون يقف لى المعجبانى
يطوح عالعباد قشر السودانى
ويحدف كل كانى وكل مانى
وفوق خيش التندة يرمى السيجارة
وياحامى الحمى لما يهعهع
على نكته,تقول طلقه مدفع
قزاز الباب والشباك يفرقع
وتتحرك فى جدرانها الحجارة
ويمسك فيك مابين اربع مفارق
يجيب لك م المغارب والمشارق
حكايه عن جدع مجرم وسارق
وقصه خسارته فى التجارة
-------

فى وكر مظلم يعيش الفار بجنب الفار
عيشه سعيدة تجمعهم كبار وصغار
وفى مجارى الهنا الصرصار مع الصرصار
وفى الزريبه المحبه بين حمار وحمار
عاش ابن ادم , واول ما اخترع نبابيت
واتعلم العلم تانى , اخترع كبريت
وفى المعارف تقدم ,واخترع ديناميت
ولسه عايش يسب الجن والعفاريت
اقول لكم كل عام وانتم بخير ياسباع
وانتم كمان كل عام وانتم بخير ياضباع
وعقبال مانوصل لكم فى العقل والاوضاع
ونهنى انفسنا فى الاعياد , كمان وكمان


-------

الرب فى الشام
عبيدة علقوة على عود
وياما ارباب هنا
شبعت ركوع وسجود
رب السبرتو
ومن مثله مافيش موجود
ورب سايق ترام
سلطانه غير محدود
ورب فى حينا
اسمه الشاويش مسعود
والعمدة فى كَفرهم
غيرة مافيش معبود
واحنا لينا رب قدهم وقدود
فى سابق الغيب
خالقهم طعام للدود
ون كنت تفهم
حاتوصل من عامود لعامود

--------

كعب الجزمه المهرى
من سير الاقدام
والكرفته العوجه
قيراطين من قدام
والدقن المحلوقه
من اربع ايام
كل دة اهل زمانّا
بيعتبروة اجرام
لو يطلع من قبرة
عمر ابن الخطاب
بقميصه المترقع
تنسد له الابواب
ونوصى الخدامه
ونوصى البواب
بقى دة اللى فتح فارس والشام
اعمى القلب يشوفك
ويحسبك بالعين
طلبت نص مشكل
ولا طالب رطلين
وسجايرك من لندن
ولا من الخمسه بقرشين
والبدله اللى لابسها
سعر المتر فيها بكام
اعمى القلب يقول لك
على الاخنف كروان
واللى يغنى ويحزق
صاحب الالحان
واللى بيعوج فى بقه
دا اعظم فنان
واللى بصيرته تضلّم
يمسك فى الاوهام

الجمعة، 5 فبراير، 2010

خروج عن النص .



نظرا لمرورى بحاله ( روقان ) مزاجيه مفاجئه
ونظرا لدخولنا فى قلب الشتاء
ونظرا لنزول المطر لاول مرة هذا الشتاء فى مدينتى
قررت الخروج عن النص ( مؤقتا )
والبعد حينا عن مواضيع بعينها
والعودة لمكتبتى الجميله التى علاها شبر من التراب
ونظرا لرغبتى فى مشاركتكم ما اقرأ
فساورد منه طرفا او مختارات

-----

اول ما امر عليه
دواوين بيرم التونسى
والتى تعبر عن مصر فى اوائل ومنتصف القرن العشرين
ومما لفت نظرى واخترته لكم منها مايلى :

- الفن فى الشرق

الفن فى الشرق قلبنا منه ممغوص
من كتر مايجلب الاوخام والاوجاع
اصبح هلاهيل لابسها مُدّعى بلبوص
على المسارح , وعالشاشه , وعالمذياع
كل تيجان ملوك الفن فيها فصوص
اللى سرقها اشتهر , واللى بدعها ضاع
على المسارح تروح تسمع كلام مرصوص
عن الحكم والمواعظ , سقفوا يارعاع
والفيلم توليف معلم من حتت مقصوص
الربع رقصات , وتنكيت التلات ارباع

---

- مجرم ودون

ولما عدمنا بمصر الملوك
جابوك الانجليز يافؤاد قعّدوك
تمثل على العرش دور الملوك
وفين يلقوا مجرم نظيرك دون
خلوك تخالط بنات البلاد
على شرط تقطع رقاب العباد
وتنسى زمان وقفتك يافؤاد
على البنك تشحت شويه زتون
بذلنا ولسه بنبذل نفوس
وقلتا عسى الله يزيل الكابوس
ماشفنا الا عرشك ياتيس التيوس
لا مصر استقلّت ولا يحزنون

----

- عم ابراهيم

عم ابراهيم راجع حزين من شغله
ماشى على عكاز ورابط رجله
شايل رغيفه تحت باطه وفجله
يارب تلطف بالغلابه وبيه
عالبيت دخل يلقى المَرة محتاسه
والارض بتشغى من طبيخها كناسه
خطّا الكانون والبرمتين والطاسه
وقال مسا الخير ؟ العشا يابهيه
قالت بهيه لبنتها ناولينى
حُق الكراويه والقزازة وعينى
ممرشه اخوكى واغسليلنا الصينى
ويلا ياختى حضرى الطبليه
ساعتين وفاتوا فى قرف ولكاعه
وعم ابراهيم يصرخ يقول ياجماعه
هى البصارة عاوزة تسعين ساعه
قالت خلاص , فاضله على التقليه
وقت العشا سمعوا خليل بيعيط
جابوة على السفرة بحاله مزروط
وبعدها فاق من بكاة واتزقطط
جنب العشا حطوة على القصريه
الاكل داير والنفوس قرفانه
من سى خليل اللى ملانا عفانه
راح المسخِم هابش الكروانه
اتدقلجت فوقه ونارها قويه
خليل صرخ بالصوت , قامت عليه امه
سمت عليه , واللى اندلق بتلمه
فى الصحن تانى , داقه جوزها وشمّه
قال البصارة اتنجست ياوليه
قالت يابنتى الامر لله ارميها
والحله اهى هاتى اللى فاضل فيها
قالت دى فى المطبخ قومى انتى هاتيها
احسن الفيران تطلع كمانى عليا
البنت قامت بعد كل ترجى
واللمبه فى ايدها اليمين يامنجى
والتانيه فيها الصحن والمتهجى
شيلاة ورايحه تدلقه المرزيه
صرصار من الكبار الحمر اياهم
طلع لها والبنت تخشى اذاهم
الصحن واللمبه راحت حدفاهم
فى العين ودبت صوت يجيب دوريه
قاموا اللى كانوا فى الظلام والخبله
يفوقوا البنت العبيطه الهبله
عم ابراهيم داس فى البصارة الفاضله
واخرتها شالوا البنت مسترخيه
بالفجل واحدة كملوا عشوتهم
واخرتها ناموا وانتهت خوتتهم
وادى اللى فاضل من همهم وغلتهم
فاضل يادوب ساعه على الفجريه
عم ابراهيم بواب قديم فى الصحه
طول عمرة منصاب بالكساح والكحه
شافوة نهارها نص ساعه اتضحّى
العصر يومها سلموة الرفتيه ..

---

- الجرايد

سبع جرايد اقوم الصبح اقراها
طمست بصيرتى وضاع العقل وياها
الاوله حشوها تشليق وسفاهه
والتانيه توضيب وروتوغراف ووجاهه
وجنب دى الزخرفه اخبار سمعناها
والتالته طالعه لنا تلعن سنسفيل ( طه )
والرابعه نتشر مقالاته وتتباهى
والخامسه بتقول على ارتيست , يامحلاها
والسادسه يتحط فيها 600 عاهه
والسابعه ادى الاعلانات مالياها
اهى جرايد من القوت اشتريناها
ولما زاد الورق , بالوّقه بعناها .

---

- الجماهير

من المستحيل انك تخدع طفل صغير
وتلف عقله وتعطيه القليل بكتير
لكن بأهون طريقه تخدع الجماهير
ولو كنت اغبى غبى , تجرى وراك وتسير
النصابين يقولولك : منطق الجمهور
يسمع ويحفظ ويتبع , ايها مشهور
خليل يسقف , يسقف شعب ويا خليل
من غير مايسأل عن الاسباب ولا التفاصيل
وحمار يغنى , وجايب من يقول له , آة
حالا تقول الخلايق كلها وياة
الحق يخفى وفى وسط الزحام ينداس
وناس فى فهم الحقيقه تتكل كلى ناس
ويساعدك الحظ ياللى تحسن التجعير

-----

- الواسطه

الواسطه لسه شغاله
يارجاله
والحاله هياها الحاله
فى كل مكان
الافندى قال والاسطى
هيا الواسطه
فى كل مركز ومحطه
خاتم سليمان
تشغلك وانت فراش
كاتب بمعاش
وتدخلك للسينما بلاش
ويا الاخوان
ايه اللى خلا الملعونه
تصبح فينا
شريعه فوق شرع نبينا
شرع القرآن
طماع وعايز فوق حقُه
واسطه تزقه
لرئيس عمل فاتح بقه
زى التِعبان
والحق بين الاتنين ضايع
واهو دا الشايع
مدير يبلطج على صايع
عاطل كسلان
داء فى الكنانه متمكن
او متوطن
وجرح ضارب ومعفن
زى السرطان

-------------------------

يتبع باذن الله .....

الأربعاء، 3 فبراير، 2010

رقصنى ياجدع



مبروك
الف الف مبروك لمصر
ياااااااااااااااااااااااااااااااااااااة
انا سعيد قوى
بجد
بجد
فرحان
مش قادر اوصف سعادتى يانتصارنا
هذا الانتصار
( الكابوسى )
الفظيع الشنيع الرهيب

ولا الكاس
ياحلاوة الكاس
ياجمال الكاس

فعلا
حقنا
حقنا نفرح
ونجرى فى الشوارع
ونطبل ونزمر ونرقص
ونزعرت
ونقطع هدومنا ونجرى ملط كمان
اة وماله
مش فزنا واخدنا البطوله
دا انتصار ساحق
يوازى انتصار اكتوبر كمان
بل اعظم منه بمراحل

اكتوبر ايه ياجدع بلا كلام فاضى

فرحتنا دى
المفروض منزعلش بعدها ابدا
بجد
اوعوا
اوعوا تزعلوا بعد كدة

لما بلدكم تتنهب وتتباع حته حته جمله وقطاعى
اوعوا تزعلوا

ولما فلوسكم وقوت عيالكم تتهرب على برة ومتطولوش منها مليم
اوعوا
اوعوا تزعلوا
وتزعلوا ليه
مش اخدتوا البطوله!!!

لما تيجوا فى يوم تلاقوا فلوس معاشاتكوا وتحويشه العمر فى البنوك طارت بين يوم وليله واتقالكوا اللى مش عاجبه يخبط دماغه فى الحيط او يرفع قضيه عالحكومه ( دا ان لقيتوا حد منهم جوا البلد ساعتها )
اوعوا تزعلوا
مش اخدتوا البطوله!!!

لما تيجوا فى يوم
تلاقوا لاقدر الله
لاقدر الله
حد من عيالكوا جاله سرطان
بسبب الاكل المنيل اللى بتتعلفوة يوميا
او فيروس سى بسبب اهمال فى مستشفى حكومى
متزعلوش
وايه يعنى
مش اخدتوا البطوله

لما تلاقوا بيوتكوا اللى اتربيتوا فيها
اتسحبت واتباعت من تحت منكوا بحجه قانون جديد وتباتوا فى الشارع
متزعلوش
وايه يعنى
الكاس اهم

لما تلاقوا نفسكوا بتموتوا من الجوع وتلاقوا الناس بتدور فى صناديق الزباله على حاجه تاكلها
متزعلوش
كفايه علينا الكاس

لما تلاقوا ولادكم بيشقوا وبيتمسح بيهم البلاط طول الشهر ذل وبهدله وقله قيمه , علشان شويه ملاليم يترموا فى وشهم اخر الشهر
متزعلوش
مانتوا اخدتوا البطوله بقى

لما ابنك تخبطه عربيه ويضيع قدام عينيك ومتقدرش تاخد حقه علشان اللى موته ابن فلان بيه
متزعلش
وايه يعنى
طظ فيه , المهم الكاس

لما تلاقى ابنك اللى عاوز تفرح بيه مرمى تحت الارض , علشان قال كلمه حق
اوعى تضايق
لانك اخدت قصادة الكاس

لما تدخل مستشفى علشان تتعالج
وتكتشف ان جسمك بيتسرق جوة وبيتباع بالقطاعى
متزعلش
لانك اخدت الكاس

لما واحد ابن كلب مش متربى ولا فيه ذرة ادميه
يبيع ويشترى فيك وفى اهلك ويضربك باللى فى رجله
لمجرد انه معلق ( كتّافه ) عليها شويه نحاس
اوعى تزعل
كرامتك محفوظه
مش اخدت الكاس

لما تلاقى بلدك بقت مراحيض عامه
يترمى فيها زباله الكرة الارضيه
من افاقين ومنافقين وشراميط وحراميه
اوعى تزعل
لان دة مش مهم
مش مهم خالص
دا انت معاك الكاس

لما تلاقى انسان شريف
مرتبه 150 جنيه فى الشهر
وواحد ابن كلب
بياخد نص مليون بس ( دا غير اللى تحت وفوق الترابيزة )
لمجرد انه حرامى ومنافق
وماااااااااااااله
مش بيجيبو لكم الكاس
لما بلدك تبقى ملطشه
ومسخرة ومهزأة العالم الاول والثانى والثالث
ولما تكون كرامتك جوا وبرة مساويه للقيمه ( صفر )
اوعى تاخد على خطرك
اصلك اخدت الكاس
لما تصحى فى يوم وتبص حواليك وتكتشف ان الاغلبيه الساحقه من شعبك اصبحت اسوأ وأوطى
واحقر فئه على وجه الارض
اوعى تصدق
لان دة مش صح
لان شعبك اعظم شعب
عارف ليه ؟
علشان واحد قبلك عاش على الارض اللى انت عايش عليها من 4200 سنه فاتت
بنى كومه حجر باستعباد الناس وسماها هرم
ولمجرد انك مكتوب فى بطاقتك مصرى
وعلشان حاجات عملوها شرفاء وعظماء قلبك وانت مالكش اى فضل فيها , الفضل ليهم هما
ولانك
:
:
اخدت البطوله
بطوله ( الكورة )

لما تمشى فى الشارع وتلاقى راجل ومراته بيلطموا لانهم لقوا ابنهم المخطوف من اسبوع مرمى مقتول وجسمه فاضى من جوا ومحشى قطن واكياس بلاستيك
اوعى تزعل
وقول لهم كمان
انتوا زعلانين ليه ؟؟
انتوا معرفتوش
مدريتوش
مش اخدنا الكاس

لما بضع عشرات من التافهين والاراجوزات ياخدوا ملايين من دمك ودم عيالك علشان كسبوا ماتش
اوعى تزعل ولا تفتح بقك
كتر خيرهم
ماهم جابولك الكاس

لما تقعد تدور سنين على حاجه واحدة حلوة فى بلدك اللى هيا مبقتش بلدك ومتلاقيش
متزعلش
اصلك مااخدتش بالك
مش كسبت الكاس
كفايه عليك كدة

لما تكون عايش وسط كام مليون معتوة
كل واحد فيهم مغيب وجاهل ومتعصب ومنافق ومعدوم الضمير
معلش
مش مهم
ماهم اخدوا الكاس

لما تتورث زى الكنبه والكرسى
ولما تاكل علف مواشى وتشرب بودرة سيراميك
متاخدش فى بالك
المهم الكاس
لما تكون بلدك بؤرة تعصب دينى
سواء مسلم او مسيحى
بسبب شياطين فى زى رجال دين
ولا يهمك
المهم الكاس

لما يكون جنبك ملايين البشر
ارواح
بتتقتل وتتحاصر وتموت من الجوع
لمجرد انهم قالوا للظلم لأ
سيبك منهم
متاخدش فى بالك
دول اولهم فلس واخرهم طين
دول عالم زباله ومتخلفين وتفكيرهم دقه قديمه
وبعدين كمان هما من طينه تقل عننا
نحن العرق المصرى العظيم
وكمان ,,,
احنا معانا الكاس

سيبهم
فى الوقت اللى شيوخهم هتكون بتموت من المرض وقله العلاج
واطفالهم بيموتوا من الجوع
ورجالتهم بيتشووا احياء
وبتندك تحتهم الارض
وبيتدفنوا تحتها
هنكون احنا بنرقص ونزقطط
ولا هيهمنا
امااااااااااااااال
مش اخدنا الكاس

ولما يحل علينا غضب ربنا
بعد ماصبر علينا كتير
ويخسف بينا الارض
عادى
متفرقش
لاننا هننزل تحت
واحنا واخدين فى خضننا الكاس

ولما يحصل فينا اللى حصل فى غيرنا
وتلاقى بيتك مالوش حرمه
وتلاقى نفسك بتتصور ملط فى سجن
وكل وكالات الانباء يتذيع صورك
ولما تلاقى كلب نجس غبى غشيم بيغتصب اختك او مراتك او امك
متخافش
لانك ساعتها هتقدر ترد عليه
هتحدفه بالكور
وهتخبطه فوق دماغه بالكاس

افرحوا
افرحوا علطول
واوعوا تزعلوا
مهما حصل
ومهما جرى
لانكم
فزتوا بالبطوله
واخدتوا اللقب والكاس

يافرحه مصر بيكم
ويافرحه ناس بيكم
ناس ماتوا
وضحوا بكل حاجه حلوة
وداقوا كل حاجه مرة
بس علشانكوا
وعلشان يجى اليوم
اللى تقارنوا فيه بينهم
وبين شويه عيال

مبروك
مبروك علينا
ومبروك على مصر شعب زينا
الف الف مبروك
ورقّصنى ياجدع ......