الاثنين، 22 مارس 2010

حزر فزر ...

ردا على بوست ( فايزة العايزة ) للست نوارة اللى مطلعه عنينا وجايبه لنا الكافيه :

اذكر استخدامات الجرائد الحكوميه ( فى دوله موزمبيق الشكيكه )؟؟؟

1- بنلمع بيها الازاز

2- ممكن نلف فيها الموز ابو نقطه بعد مانشتريه من الراجل اللى فى الشارع قبل ما نحطه فى الكيس علشان ميعسولش .

3- بنجرب فيها القلم الجاف علشان نعرف ان كان بيكتب ولا لأ

4- بنفرشها على رفوف الدواليب الايديال الصاج علشان الصدا ميطلعش فى الهدوم .

5 - بنلف فيها البضاعه

6- بنشوف مدى التقدم الرهيب فى فن النقاشه ... اقصد الماكير , دة طبعا بعد مانتامل فى صورة الرئيس الموزمبيقى الشاب بعد ما الاسطى عبدة خبطه خمس وشوش بويه علشان السواد اللى تحت عينيه والتجاعيد اللى فى وشه متبانش ..

7- ممكن تعرف منها اسماء جميع كبار رجال الدوله ( من صفحه الوفيات ) .

8 - ممكن بمنتهى السهوله تكتشف خط سير البيزنس فى الدوائر الحكوميه الموزمبيقيه لما تشوف تاجر او مقاول بيهنى المحافظ الفلانى بمناسبه طهور ابنه شحيبر .

9- تصلح كساتر واقى من الشمس فى ايام الصيف الحارة ( خصوصا الجرائد ذات الاوراق الكبيرة ) .

10 - تصلح ايضا كواقى من المطر فى الشتاء , لغايه ماتوصل لاقرب رصيف .

11- تستخدم كغطاء واقى للموبيليا وارد دمياط من الخدش حتى تصل لبيت العروسه بالسلامه .

12- بنوسخ بيها الشوارع ونرميها فيها بعد مانوصل العفش اللى جاى من دمياط .

13- علاج فعال لمرضى انخفاض ضغط الدم .

14 - احد اساليب الموت الرحيم لمرضى الاكتئاب الميئوس من شفائهم , فيكفى ان يطالع المريض 3 او 4 صفحات من الاعلانات اياها بتاع منتجع الساحل الشمالى الموزمبيقى , او بالم موزمبيقيا ...

15- تستخدم كبديل للصدمات الكهربائيه بمستشفيات الامراض النفسيه والعصبيه .

16 - احد اساليب التنكيل البشعه بالمعتقلين فى محاكم التفتيش الموزمبيقيه .

17 - بنغطى بيها الحثث المرميه على الطريق السريع بعد كل حادثه لغايه ما الاسعاف تيجى تلمها .

18 - وسيله للتخلص من الانتاج الورقى الزائد فى موزمبيق .

19 - ممكن تفرشها على الارض وتقعد عليها وانت مستنى دورك فى احد المستفشيات الحكوميه علشان تاخد العلاج بتاع السرطان .

20 - التجار بيحشو بيها الشنط قبل ما يعرضوها للبيع علشان تبان منفوخه وبشكلها الحقيقى .

21- برضه بتوع الجزم بيحشوا بيها الجزم للغرض نفسه , فالجرنال المناسب فى المكان المناسب .

22- وسيله لايهام باقى الشعوب باتساع مدى التخلف العقلى لدينا ( علشان نتقى قرهم وحسدهم ) .

23- بنعمل بيها اشكال جماليه نفعيه على راى الراجل الغتت بتاع برنامج الاطفال اياة اللى كان بييجى على القناة التانيه يوم التلات الصبح زمااااااان .

24- بتوع الخضار بيفرشوا عليها البضاعه الصبح .

25- بتوع الدوكو بيلزقوها على الازاز قبل الرش علشان الازاز ميتوسخش .

26- نفرشها تحت الاطباق علشان منوسخش الترابيزة .

27 - لما تدخل الحمام وتعمل زى الناس وبعدين متلاقيش ميه , ممكن نستخدمها كبديل( ممتاز) للقط.... اقصد للكلينيكس .