الجمعة، 23 أبريل، 2010

منتهى العداله



مذيع ومذيع ومذيع
مذيعه ومذيعه ومذيعه
صحفى وصحفيه
الاعلامى اللامع والاعلاميه اللامعه
خنقتونى
قرفتونى
كل ليله
وكل يوم
مش وراكم سيرة غير الغلابه والمساكين
والفقراء المعدمين
والناس المساكين
يااااااااااااااااااااااااااة
قد كدة قلوبكم رحيمه ؟؟؟
طيب
سؤال غير برىء
ليكم كلكم
بلا استثناء
انت
انتى
بتقبضوا كام فى الشهر
وفلوسكم دى بتروح فين
فى اعمال البر والاحسان ؟؟؟
ولا فين؟
بتصيفوا وسط عامه الشعب
ولا بتصيفوا فين ؟
عايشين وسط الغلابه اللى واخدينهم لبانه فى بقكوا
ولا عايشين فين ؟
يا اعلامى يا مناضل
يا اعلاميه يا شجاعه
ياللى مش بتخافوا فى الحق لومه لائم
اشمعنى
بتيجوا على مواضيع معينه كانت حديث الساعه
وبتسكتوا كلكم مرة واحدة
هل دة توارد خواطر مثلا
ولا فيرس بيسبب فقدان ذاكرة ( جزئى ) للاعلاميين المناضلين امثالكم
ولما بتجيلكم تعليمات ( عليا ) بشكل غير مباشر( انتوا طبعا عارفين كويس هى بتيجى ازاى )
بيكون رد فعلكم ايه ؟؟
حد فيكم فكر يتبرع بنص مرتبه اللى يفتح شارع بحاله ؟
حد فيكم فكر يقول ( لأ ) بجد وبصوت عالى ؟
اةةةةةةةةةةةةةةةةةةةةةةة
ياحراميه
يانصابين
يامنافقين
اتفوووووووووووووو

------------

الاعتصام اللى بعض الاخوة ناويين عليه , بتاع الحد الادنى للاجور
بذمتكوا
اسالكم سؤال
غير برىء برضه
المفترض انكوا عارفين الاجابه كويس
بحكم انكم يعنى متابعين الساحه وفاهمين البلد ماشيه ازاى ( افترض كدة )
نظامكم
اللى معادش عندة موارد غير طوابع الدمغه والرسوم والضرايب ومخالفات المرور
طبعا مش هقول القناة لان الكل عارف ايرادها بيروح فين
نظام بالشكل دة
بيقترض كل اسبوع مليارات من البنوك ( اللى هى فلوسكم ) علشان يحطها على ما سبق ذكرة ويقدر يعيشكم فى مستوى اقل من المستوى الحيوانى
حلوة يقترض دى مش كدة ؟
بلاش يقترض
لان القرض بيرد
وطبعا المليارات دى منحه لا ترد
نظام بالشكل دة
بيصرف مرتبات بالملاليم
هل ممكن فعلا يحقق الحد الادنى اللى حضراتكم بتقولوا عليه دة ؟

حتى وان اراد ؟
وان فرضنا ان عندة الامكانيه على كدة
هل اعتصامكم يعد دافع كافى يجبرة على الخطوة دى ؟؟
وهل سيادة اللوا اللى هيسيب عليكم ك....اقصد رجالته فى اليوم الموعود
واللى مرتبه ربع مليون جنيه فى الشهر غير الحاجات التانيه
هل هيربع ايدية ويمصمص شفايفه وانتوا عاوزين ترجعوة للفقر اللى لحس بلاط الباب العالى سنين عمرة علشان يهرب منه هوة وعياله ؟؟؟؟
هيتفرج عليكم مش كدة ؟
رد فعله هيكون اقل بكتير من امكانيات اعتصامكم المهيب , صح ؟

طبعا ما انتم معاكم حكم محكمه
واحنا فى دوله القانون
اللى كل احكام القضاء فيها بتتنفذ
وسيفها مسلط على رقبه السلطه التنفيذيه
صح ؟
حلوة الورقة دى
بتنفع جامد
خصوصا لما تكون البكرة فاضيه
:)

فعلا
ناصحين قوى
شاطرين جدا
فاهمين البلد
صح الصح
ودايما
فى تقدم مستمر

تخيلوا معايا كدة
واحد قاعد فى بيته وعياله فى امان الله
دخل عليه ناس
ابتدوا يفكوا عفش البيت ويبيعوة
واغتصبوا مراته
وسرقوا اعضاء ابنه
وجابوا شويه رعاع سكنوهم فى بيته
تفتكروا
اى انسان عندة ذرة عقل
خردله كرامه
قيراط نخوة
هيعمل ايه
حتى وان كان اضعف
حتى وان كان اعزل
هيشجب ويحتج ؟
هيندد ؟
هيعتصم على سلم البيت ويضرب عن الطعام لغايه ما يرجعوله بيته ؟
صح ؟
هيشتكيهم ويرفع عليهم قضيه ؟
هيشيل يافطه ويقف بيها على ناصيه الشارع ؟
اكيد ,
ماهو دة ( منتهى العقل ) ...

صباح الفل ......

----------

حبايبى الحلوين
فخر الامه
علماء الاسلام
مشايخنا
ذوى الذقون الطويله
والوشوش الكميله
والغطرة والعقال
والجبه والقفطان
والهدى النبوى
والسنه العطرة
حبايبى ياحلوين
ياللى شيلتوا على عاتقكم مهمه اصلاح الامه
يا بتوع حنفيات الفتاوى
ومواسير الاحكام
يابتوع الفضائيات
والابتسامه العريضه
والموعظه الحسنه
ما قولكم فى إمام
عاش فى بغداد
ايام المغول
جه وهما على ابواب المدينه
صعد المنبر
وخطب خطبه عصماء
عن فوائد الصدق
او عن ذكرى الاسراء والمعراج ؟؟؟

وما قولكم فى شيخ القريه
فى فيلم الزوجه التانيه
لما حث شكرى سرحان
يطلق مراته علشان العمدة يتجوزها قبل ما عدتها تنتهى
وقال له
واطيعوا الله والرسول واولى الامر منكم
وحرض العمدة على عملته
ومهد قدامه الطريق
وقال له
البلد بلدنا والدفاتر دفاترنا

فما قولكم , لا ادام الله فضلكم ؟؟؟؟

طول عمرى كنت بستغرب من الناس اللى هتتحاش عن حوض النبى يوم القيامه
وهيزعل علشانهم ويقول انهم من امتى
ولما يعرف حقيقتهم
هيقول بعدا بعدا
سحقا سحقا
اكيد هيكون مظهرهم كويس
اكيد هتكون زبيبه الصلا واضحه فى وجوههم ( المضيئه )
اكيد دقنهم هتكون نص متر
والا مكانش الرسول زعل عليهم فى الاول
عرفتم دول مين ؟؟؟
ولا لسه ؟

--------------------

انا زى غيرى كتير
فرحان قوى بالاضرابات العماليه فى انحاء البلد
شايفها شىء جميل
يدل على ان الناس ابتدت تفوق
لذلك
هسأل نفسى سؤال فى منتهى البراءة
السؤال دة لنفسى طبعا , مش لكم
هل الاضرابات والاعتصامات دى
علشان مطالب عامه
ولا فئويه
؟؟؟؟
هل عمرنا سمعنا عن اضراب عمال شركه احتجاجا على كامب ديفيد
او على التوريث
او على تجاوزات الداخليه ؟؟؟؟؟؟؟؟
ولا الفيلم دة كله علشان المرتبات والحوافز والمعاشات والوظيفه ؟؟؟؟
ولو
بلاش لو
نقول لما
لما طلباتهم بتجاب
بيكفوا على الخبر ماجور
ولا بيكملوا علشان المطالب العامه اللى قلتها فى الاول ؟؟؟

نجيبها من زاويه تانيه
فى صيغه سؤال اكثر براءة
ليا طبعا
مش ليكم
لو العامل فى مصر مرتبه محترم
ومعاشة ووظيفته مضمونه
وحوافزة مستقرة
بينما باقى المخططات ( اياها ) مستمرة
هل هيتحرك ( ايجابيا ) لمقاومه التطبيع او التوريث مثلا ؟؟؟؟؟
ولا لأ ؟؟؟؟
:D

وهل الكل متضامن مع بعضه
ولا محدش مهتم الا بنفسه ؟؟
يعنى مثلا هل سمعنا ان سواقين النقل اضربوا تضامنا مع عمال الكتان
او بتوع الضرائب العقاريه اعتصموا تضامنا مع عمال المحله ؟؟؟؟؟

فعلا احنا بدأنا نفوق
نفوق قوى
وتحركاتنا كلها علشان خاطر البلد
البلد بس
مش حاجه تانيه

----------------

اللى بيحصل فى مصر دة
منتهى العداله

واحد طغى وتجبر وبغى
هيشوف احلامه كلها بتنهار قدامه
واللى بيحاول يعمله لعياله هينقلب عليهم
وسيرته هتزكم الانوف فى كتب التاريخ بعد كدة
واللى حوشه هيطير فى الهوا شاشى
وعياله هتكون اخرتهم اسود من البلك

واحد لحس الاعتاب
علشان ينوبه من الحب جانب
مسك الكرباج
علشان ياخد بالمقابل
هييجى عليه يوم
على احسن الاحوال
هيترمى فى بيته
ملعون
معدم
بغيض
مستنى لحظه حسابه
بالظبط زى صلاح
اللى صورته اسفل المدونه عندى
دة لو متعدمش
او انقتل
او
او

واحد ربنا اداله عقل
اداله دراع
سكت
بلم
تنح
بعبع
اتكتم
خاف
انزوى
تقوقع
استسلم
يستحق كل اللى يجراله


هى دى منتهى العداله
ربنا مبيظلمش حد
احنا اللى بنظلم روحنا

------------------------

فاكرين الرؤيا بتاع الطوفان اللى حكيت عنها السنه اللى فاتت ؟؟؟
الرؤيا اتكررت تانى
بس المرة دى كان الطوفان اشد
وكانت الدنيا كلها سواااااااااااااااااد
وكله خايف وبيجرى ومرعوب
يلا
شدوا الاحزمه
ولو انها مش هتنفع

الوضع دة زايل
متقدرش تقف على رجل واحدة الى الابد
مسيرك تتعب وتنهار وتقع
حتى لو محدش زقك
سواء يايدك او بايد غيرك او من غير ايد
الرك على اللى جاى
لو بايدك
هيكون احسن
لو الاتنين التانيين
استعد
للشوط الرابع
واكتم نفسك كويس
للغطس اللى جاى دة
علشان هيكون طوييييييييييييييييييييييييل

حد فيكم شاف فيلم ( ابوكاليبتو ) بتاع ميل جيبسون ؟؟؟
حد اخد باله من الكام كلمه اللى فى اول الفيلم ؟؟؟
حد اخد باله من الفكرة اللى بيعرضها ؟؟؟؟
مش بتفكركم بحاجه ؟؟؟
شعب (المايا) اياة دة
مش بيفكركم بحد ؟؟؟؟


تصبح على خير
تصبحى على خير
تصبحوا على خيييييييييييييير

الخميس، 22 أبريل، 2010

بوست صادم

اسف جدا
لان كل اللى هيقرا العنوان هتخطر فى باله اى حاجه غير مضمون البوست دة
ولان كتير متوقعين فى البوست دة حاجات ابعد ما تكون عن مضمونه
ولان البوست دة لا يعرض فكرة من اساسه وما هو الا ( استغلال ) منى للمدونه بغرض الوصول لمنفعه شخصيه
ولان ناس كتير هتقول ايه الهايف دة , احنا فى ايه ولا فى ايه .

بالنسبه للفئه الاولى والتانيه والتالته
انا ااااااااااااااسف جدا

وبالنسبه للفئه الرابعه
طظظظظظظظظظظظظظظظظظظظظظ
وانا مش اسف

--------------------------

mp6

حد سمع عنه
افتكاسه جديدة
مش جديدة قوى ولا حاجه
بس منتشرتش كتير
جهاز صغنون
بيعرض صور
ملفات فيديو
ملفات صوت
فيه كاميرا نقائها عالى ( عن كاميرا الموبايل )
فيه سماعه خارجيه
يعنى من الاخر عبارة عن موبايل بس مش بيتصل

بما ان ال ( mp3) بتاعى كتر خيرة قوى كدة
خدمنى فوق 6 سنين
فيهم سنين غلب وبهدله
وياما قاسى معايا برد وحر وجفاف ورطوبه لا يطاقوا
لدرجه انه سماعاته سلكها اتفرفت من كتر التقلبات الجويه
وكتير غيرها
لذلك
تكريما لجنابه
ولخدمته المحترمه معايا
قررت
انى احيله للتقاعد
وهو سليم
واحفظه فى الدرج المخصوص بتاع الحاجات اللى بعزها واللى خدمتنى كتير
واللى اكراما لها
بحفظها وهى سليمه وبرفعها من الخدمه قبل ما تبوظ
وبمتنع عن استخدامها
مش بستعملها لغايه ما تبوظ وبعدين ارميها زى اى شىء عادى
ودة اكراما لها
هحطه جنب النظارة اللى وقعت منى ستين مرة ولا اتكسرتش
وضاعت 8 مرات ورجعتلى تانى
وجنب عدة الموبايل اللى كانت الصله الوحيدة بينى وبين العالم لفترة ليست بالقصيرة
وجنب المفكرة الالكترونيه اللى صاحبتنى اجمل ايام حياتى .

علشان كدة
عاوز اجيب الاختراع اللى فوق دة
بعتبارى اتنفس الموسيقى
وباعتبار انى عاشق للتصوير
ومعنديش كاميرا مع الاسف
ولا حتى موبايل بكاميرا

القضيه بقى :
الشىء دة اجيبه منين
بمعنى
انا عاوز حاجه نضيفه
امكانياتها عاليه
صوت بالغ النقاء
كاميرا فوق 5 ميجا بيكسل ( ان امكن )
جهاز
يعمر ويعيش
ويرضينى
( مع ملاحظه انى غتت جدا فيما يتعلق بالالكترونيات ودقيق الملاحظه لاى عيب ولو بسيط )
ومتكونش صينى
بكرر تانى
مش صيييييييييييييييييينى

اللى يعرف معلومات مؤكدة ياريت يفيدنى
محدش يقولى العجيل او راديو شاك
الا اذا كات شافه هناك فعلا بالمواصفات اللى قولت عليها
علشان مش عاوز ادب مشوار على الفاضى

مستنى رد اللى يعرف
وياريت كمان يقول العنوان بالتفصيل الممل
ويستحسن يكون فى القاهرة
او الاسكندريه
او طنطا
او المنصورة
او اسوان
هههههههههههه
بلاش اسوان
بعيدة شويه


بس كدة

الجمعة، 9 أبريل، 2010

الأحد، 4 أبريل، 2010

يوميات شاب مباركى



استمورننج :

بدأ يومه كما اعتاد
خرج للتنزة فى ذلك المكان المحبب لقلبه نوعا ما
لا يعرف لماذا خطر على باله فى تلك اللحظه الاقتراب من شاطىء البحر لاقصى حد
فهو قد اعتاد البعد عنه دائما
اقرب مسافه مسموح بها للاقتراب منه 100 متر
من طفولته وهو يخشاة
فى لحظات المساء كثيرا ما كان يشعر بانه يناديه للارتماء فى احضانه
واحيانا كان يوشك على ذلك
هو لا يكرهه
لكنه يهابه
دائما كان يعتقد ان البحر ينام بالنهار ويستيقظ بالليل
البحر بالنهار
جميل
واضح
بسيط
تماما كالطفل النائم
ولانه فى الصباح الباكر
فلم يجد بأسا من مداعبه ذلك الطفل
اقترب اكثر واكثر
وضع تلك الاشياء الصغيرة السوداء فى اذنه
انسابت داخله انغام لشخص يعرفه جيدا
وغير كثيرا من المفاهيم بداخله
يدعى :
عمر فاروق
توالت الالحان
- سحر المساء
- طوروس
- جاردنر
وغيرهم

ظبط نفسه متلبسا بالرغبه فى الاقتراب اكثر
اقترب حتى توغل الماء داخل حذائه
تخلص منه
استمر فى السير فوق الرمال
لا يدرى كم مضى من الوقت
حتى تنبه لتوهج قرص الشمس فوق راسه
استجمع نفسه
واستدار عائدا

لملم حقيبته
وصعد للاتوبيس
عائدا لمدينته التى نشأ فيها وقضى بها جزء من حياته
مدينته
التى هام بها حبا فى يوم من الايام
وسرعان ما كرهها بعد ذلك
واصبح لا يطيق الاقامه بها
الان عليه ارتياد وسيلتى مواصلات او اكثر
فالطريق نوعا ما طويل
واحكاما لتخطيط الموقف
سرعان ما غط فى نوم عميق بمجرد صعودة للاتوبيس
افاق منه بعد ثوان
ليجد نفسه فى نهايه الخط
الان عليه ان ينزل
ليستقل وسيله اخرى
تقودة الى ( بلدة المحبوب )
لحسن حظه ( كالعادة )
لم يجد مكانا سوى ذلك المكان البائس
فى مؤخرة العربه
مكان نموذجى
لوح زجاجى مغلق لا ينفتح ابدا
موازى تماما لاشعه الشمس الحارقه فى عز الضهر والتى لا تغيب مطلقا عن ذلك المقعد طوال الطريق
كرسى مريح للغايه يساعد على تقصير عضمه الفخذ بالتدليك ( الضاغط )
اكبر رد فعل ممكن للمطبات
بالذمه
فيه احسن من كدة ؟؟!!!

امامه تجلس سيدة كبيرة فى السن
تصر بشكل بشع على اغلاق النافذة بجوارها
تحمل ( كرنب وخضار ) !!!!
تسافر ما يوازى 140 كيلو ومتفتكرش تجيب حاجه معاها وهى راجعه الا ....... الكرنب !!!
السائق واضح ان مزاجه رايق
حوار سخيف كالعادة بدأ فى ادارته اخونا السواق مع الحاجّه اياها
- شفت يا اخويا اللحمه المدودة اللى جابوهالنا ؟؟؟
- والله بقت حاجه تقرف
اندفع ثالث فى الحوار :
- بس دى قله مندسه , احنا عندنا شرفا كتير فى البلد
وقال رابع :
- هو الريس ساكت ليه مش يشوف لنا حل بقى
- ياعم دا خلاص
- ربنا يتوب علينا بقى
دخل خامس
- ماهو لو كلنا نتفق ونبطل ناكل لحمه , اكيد هترخص
- ايوة وناكل فراخ او سمك
- الوليه مراتى سمعت ان الانابيب غليت راحت اخدت تاكس وغيرت الانبوبه بعشرة جنيه , رجعت من الشغل لاقيتها مش طابخه , قلتلها ينعل ابو الطبيخ لابو الانابيب لابوكى انتى كمان .
هع هع هع هع .......

الى هذا الحد اصبح الامر غير محتمل خصوصا مع العوامل السابق ذكرها
وجد الحل الامثل فى ذلك الشىء الصغير الذى لا يغادر جيبه
للمرة المليون اخرجه , مد منه الشيئان الصغيران ووضعهما على اذنيه
بالطبع لن يسمع عمر فاروق فى تلك الظروف
فهو لا يرغب ان يكرهه
امممممممممممم
اها
البلبل الصداح
عبد الحى افندى حلمى
ذلك الرجل الذى عاش حياته بالطول والعرض والارتفاع
يشدو على اسطوانه متهالكه
يرجع تاريخها لاكثر من 105 سنه
يتصدرها صوت جهورى لشخص اجنبى اللكنه :
اوديو ريكورد
ابد الهى افندى هلمى
كثيرا من الوش والخشخشه تتخللها اصوات تخت موسيقى قديم
كالعادة , قانون + عود+ رق+ كمنجه + ناى + اتنين مذهبجيه ( كورس يعنى )
تتسلل لاذنه بعض كلمات من ذلك الحديث الدائر فى العربه مختلطه بغناء عبد الحى افندى
الكلمه الوحيدة الواضحه فى ذلك الحوار كلمه ( لو )
لو لو لو لو
لوك لوك لوك
لاب لاب لاب بلاب .

لا يعلم لماذا شعر بتناسب كلمات الاغنيه مع الحوار الدائر
المطرب يصف ليله غير بريئه قضاها مع محبوبه
حلالى بلالى وفانى الحبيب
سقانى بايدة شراب الزبيب
ولما صبح الكاس يدور
لقيته مهاود فى كل الامور
ههههههههههههههههههههههههههههه

-----------------------------------------------------------

است ايفنينج

وصل لمنزله
اول شىء فعله هو التخلص من اغلب ملابسه والجلوس امام المروحه
الدش التمام
الغدا
قليل من النت واللى انتهى كالعادة بموقف مش كويس
مكالمه من صديقه ( اللدود ) تضع مخطط مقترح للسهرة سرعان ما اشر عليه بكلمه ( تصدق )
قرر تغيير وضع جسمه من الوضع العمودى على سطح الارض الى الوضع الموازى لها
والمكان الانسب لذلك هو السرير
استيقظ على مكالمه اخرى
غسل وجهه سريعا
نط فى ملابسه
نط للمرة التانيه ولكن هذة المرة ( داخل السيارة )
انطلقوا جميعا
فى ظل الازمه الراهنه
والوضع الصعب لاغلب شباب مصر
واللى يشرح القلب الحزين الصراحه

كان بقاله كتيييييير قوى متنيلش على عينه
وبما ان الظروف كانت مواتيه على غير العادة لان ( بتنيل على عينه )
فقد قرر بكل حزم وصرامه ان ( يتنيل على عينه )
عملا بحكمه الفنان العظيم محمود عبد العزيز
الدماغ اللى من غير كيف تستاهل القطع بسيف

مرت الليله
كثيرا من الاحداث
العديد من الاماكن
وقدر عظيم من الكلام
وقدر اعظم من الموسيقى
من عمر فاروق لامينم لبودا بار لغيرهم...................
اختتم ليلته بمكالمه هاتفيه من العيار التقيل
خسر فيها الكثير ( كالعادة )
واكتسب المزيد من السواد والوحدة والكأبه ( كالعادة برضه )
جرح الاخرين ( برضه كالعادة )
وجرح لذاته ( اييييييييوة شطار, كالعادة )

انتهت ليلته قبل الفجر بقليل
قرر العودة لبيته ماشيا
لا يدرى كم من الوقت استغرقة فى السير هائما فى طرقات المدينه الفارغه .
المهم انه وصل فى النهايه لمنزله
خلع ملابسه
شغل الكومبيوتر
لا يتذكر بالضبط المادة
لانه سرعان ما ارتمى فوق السرير
وغط فى نوم عميق
استعدادا ليوم اخر غيرجديد
وسخيف ( غالبا ) ....

انتهى ....