الاثنين، 10 مايو، 2010

جيران الهنا



شخص غامض
غريب الاطوار
يفضل دائما اللون الاسود فى ملابسه
النظارة الشمسيه لا تفارق عينيه
متجهم وقليل الظهور ودائم السفر ولا يحتك اطلاقا بجيرانه .

دا يبقى انا
والمواصفات دى تمهيد ممتاز للسيناريو اللى هحكيه دة :

من يومين واثناء سفرى فى مهمه سريه خارج المدينه , جه البيت مندوب من مصلحه البريد وسأل عليا , وبما ان جيرانى متعاونين جدا جدا , فالبيت كله اتلم على الراجل , طبعا مش من باب التطفل ولا حاجه , انما من باب حب المساعدة لا غير ...
وبعد الحاح شديد واسئله كتير , اعترف الراجل اخيرا انى جاى ليا ( طرد ) من بلاد الفرنجه الكفار , لكن مع الاسف لم ينجح الجيران فى انتزاع اى اعترافات اكثر من الراجل المسكين عن كينونه الطرد العجيب دة ولوتحت وطأة التعذيب البشع , لانه بكل بساطه ,,
ميعرفش اكتر من كدة...

وبالطبع استلم احد جيرانى ( الاوفياء ) الوصل علشان يديه لجنابى لما اوصل بالسلامه الى ارض الوطن ( دا غصب عنه طبعا ).
والراجل كأنه محتفظ بحيه او حنش عندة فى البيت , وعمال يبص كل شويه على باب الشقه يشوفنى جيت ولا لسه علشان يرميلى المصيبه دى ويخلص منها ( اللى هيا الوصل )

وبناء على الوصف اللى قلته فى الاول , وبما ان جيرانى بالكامل من الجيل الناصرى الصرف اللى اتربى على تخاريف احمد سعيد ( المذيع , مش انا) ونظرا لتاريخى الاجرامى السابق وخلفياتى المشبوهه وانى راجل رد سجون , وكمان بما ان الوصل مكتوب عليه :
طرد بالبريد السريع ( الدولى )
فبناء على كل ما سبق كان حتما ولابد ان تتجه الانظار الى فكرة واحدة :
هو انى شغال جاسوس وبتعامل مع جهات اجنبيه مشبوهه بتبعت لى حاجات مريبه .....

واشتعلت مؤتمرات ليليه وصباحيه فى بيتنا المبجل حسيت بيها بعد لما وصلت بالسلامه
اطلع البلكونه انشر الغسيل الاقى الانظار كلها بتبص لي بنظرات مليانه توجس وريبه
انزل الشارع الاقى نفس النظرات ( طبعا وكالات الانباء اشتغلت )

ادخل الحمام
اسمع صوت طنط تفيدة بتقول لطنط عطيات :
- ايه ياختى حكايه الطرد دة
- والله منا عارفه ياختى , دا الحاج فلان جاله الوصل على ملا وشه وهو خارج من الجامع
- هو احنا مالنا ومال الحاجات دى , ما احنا قاعدين كافيين خيرنا شرنا وملناش دعوة بحاجه .
- هو دايما جايبلنا وجع الدماغ والمشاكل
- ربنا يستر ياختى ويجيب العواقب سليمه ...

فاض الكيل بجارنا المسكين وانتهز فرصه خروجى من الشقه ( حيث انه كان متربص ورا باب شقته ) وبصلى بقرف ومد ايدة بالوصل وقال لى ( خد... ) .
عملت عبيط وقلت له ايه دة ؟ جواب دة ولا ايه ؟
قال لى : لا دا طرد جايلك من بلاد برة
- طيب هنزل اشوف ايه الموضوع دة
مردش عليا وفضل مبرق لى ونا داخل الشقه
تلاقيه كان بيقول فى عقل باله :
عليا انا الحركات دى , والله ووقعت ياعدو الشعب ...

ومن محاسن الصدف انى رحت بنفسى اجيب الطرد من مكتب البريد وتصادف اثناء دخولى الشارع ان الجيران ( اغلبهم ) كانوا واقفين فى البلكونات يتفرجوا وعنيهم هتقطع الطرد , فتصادف ان الشكل الخارجى له كان شبه دة :
http://www.fas.org/man/dod-101/sys/missile/row/hn-5_2.jpg

وبكدة ثبتت عليا التهمه وتوجه اغلبهم لجارتنا ( ام ظابط الشرطه ) وعملوا اجتماع مغلق لبحث تطورات الموقف وعلشان يوضعوا حد لاعمالى المشينه والمسيئه لسمعه العمارة ....

بامانه والله انا بقالى كتير مضحكتش بالشكل دة
والله اترقيت ياوله وبقيت جاثوث قد الدنيا
بكرة باذن الله اطلع على نقابه الجواثيث علثان اطلع الكارنيه
وابرزه فى اللجنه واحطه فى عين التخين ولا حد يقدر يكلمنى
زى اونكل عزام عزام كدة ....
http://img45.imageshack.us/i/e3n1513844134.jpg/

ووارد جدا بكرة باذن الله اصحى من النوم الاقى الوضع عندنا فى البيت بقى كدة :
http://www.youtube.com/watch?v=wQFbJ-10Uo4


خالتى بتسلم عليكم
شالوم ....