الثلاثاء، 22 يونيو، 2010

انا وال( جنون ) وهواك .



كنت عاوز اكتب عن مواضيع كتير قوى
الا الموضوع دة
موضوع خطر فى بالى زمان وفكرت اكتب عنه بوست الا انى تراجعت ونسيت الفكرة من اساسها
مش عارف ايه اللى فكرنى بيها دلوقت .

المهم

انااتعودت انى اعرض فكرة معينه فى البوست
بس المرة دى الموقف هيختلف شويه
انا مش هعرض فكرة
انا مش هقدم فلسفه معينه
لا
بس هفكر بصوت عالى
وعاوزكم تفكروا معايا
يمكن كتير هيزعلوا من كلامى
بس رجاء
فكر فيه الاول
متلفظوش قبل ما تدخله عقلك
اعقله الاول
وبعدين هستنى ردك
او بمعنى ادق
نقاشك
البوست دة دردشه
مش عرض ولا جدال
وماهوش نظريه انا متبنيها
انا بقول من دلوقتى اهو
-----
الحب
ايه الفرق بين الحب والعشق ؟
هل هو زى ما بيقول البعض ان العشق هو الجانب المادى الصرف من الموضوع
ولا لأ ؟؟
طيب
ليه ربنا سبحانه وتعالى لما اتكلم عنه فى القران
من خلال العلاقه بين الزوج والزوجه
اى الحبيب والحبيبه
ليه سماها ( مودة ورحمه )
ليه مقالش وجعلنا بينكم ( حبا )
اكيد فيه سبب ..


انا هعرض عدد من العلاقات اللى ممكن الواحد يصادفها وهحللها لاقصى درجه ممكنه .
نبدا من الصفر
المادة
بمعنى ان الشخص بيحب درجه الرفاهيه اللى بيحققهاله الطرف التانى
يعنى المادة
الفلوس
العربيه
الوجاهه الاجتماعيه
النفوذ
السكن الفخم
الاثاث المريح
القدرة على اشباع نهم الشراء والتسوق
طيب
فرضا ان الطرف الاخر فلس
وسكن فوق السطوح
اكيد التعلق دة هيتلاشى
لان السبب فيه انتهى

حب المتعه
بمعنى
ان الانسان بيحب الاحساس باللذة وتحديدا اللذة الجنسيه ذاتها , ودة بصرف النظر عن الطرف الاخر , فهو او هى بيحبوا المتعه دى وبيسعوا الى كل ما يحققها .
يعنى السعى وراء الاخر متوقف على قدرته على تحقيق اللذة دى وفى اللحظه اللى هيفشل فى تحقيقها هيتم الانفصال عنه .


الجسد
ودة يختلف شويه عن النوع اللى فوق , بمعنى ان الشخص بيحب ( جسد ) الاخر لاجل المتعه ولاسباب اخرى , يعنى هو بيحب الجسد ذاته وبيجسد الحب دة من خلال الجنس , بس الجسد عندة مش مجرد لذة , يعنى عندة كدة حاجه زيادة عن الصنف اللى فوق .
طيب
فرضا ان الجسد دة اتشوة , او تلف , او شاخ وعجز وضاع جماله ورونقه , هل هيظل الحب دة ؟
اعتقد لأ
لان المسبب تلاشى .


الصفات
بمعنى ان الطرف الاول بيحب صفات معينه فى الطرف التانى
اخلاقه مثلا , الصدق والامانه والاخلاص والحاجات دى
او ممكن مثلا لانه رومانسى
طيب
لو فرضنا ان الاخلاق دى تلاشت
واى انسان معرض انه ينقلب طبعه لسبب او لاخر
فى الحاله دى
هل هيفضل الطرف التانى على تعلقه بيه ؟
اكيد لا
لان الحاجه اللى كانت بتشدة فى الطرف الاول اتبدلت بحاجات تانيه مخالفه
والشخص الرومانسى
الطرف التانى بيحب رومانسيته اكيد
مش بيحبه هو
بيحب اللذة النفسيه الناتجه عن رومانسيه الطرف الاول
والتعلق دة هيتلاشى بتلاشى الرومانسيه دى .


الطبع
يعنى تركيبه الشخصيه فى حد ذاتها
بمعنى
توليفه معينه من الصفات بتجمعها مع بعضها بتشكل لوحه معينه تختلف عن اى شخص اخر
طب ماهو برضه لو حصل خلل فى التركيبه دى ( خلل دائم اقصد ) اكيد هيتلاشى التعلق لان اللوحه الجميله فسدت .

خامسا
كل ماسبق
بمعنى
مثلا يعنى
واحدة بتحب واحد
بتحب اللذة اللى بتحسها معاة
بتعشق كل تفاصيل جسمه
بتحب اخلاقه
ومشدودة بتوليفه طباعه
ومتيمه وتايهه فى بحر رومانسيته
طيب
ادخل فى الجانب الرخم
لو فرضنا
ان الاخ دة
حصل له حروق مثلا من الدرجه التانيه
واصبح غير قادر على ممارسه ( مهامه )
وجسمه اتشوة وبقى منظرة مقزز
واخلاقه بقت واطيه
وطبعه اتنيل بنيله
ورومانسيته اختفت
ومش عاوز حد يقول لى ياساتر عليك , جمعت البلاوى دى كلها مرة واحدة
انا مش بقصد كدة
بس انا بفترض جدلا
فرض رياضى مش اكتر
هل بعد دة كله
هيفضل الطرف التانى على عهدة معاة ؟
ولو فضل بدافع الواجب والاصول والعشرة
والاشفاق احيانا
فدة مش حب
دى ممكن نسميها اخلاق عاليه
واجب
جدعنه
اخلاص


فيه عنصر مشترك بين كل الانواع دى
الا وهو اللذة
سواء كانت ماديه او معنويه
وانا اعتقد
ان اى علاقه محركها ( الاساسى ) هو اللذة
لا ترقى انها تكون حب
وانا بقول الاساسى وحاطط الكلمه بين قوسين
يعنى اقصد انه مش عيب ان اللذة تكون من ضمن القوى الدافعه
علشان كدة ربنا خلقها فينا
واللذة الماديه او المعنويه
الجنسيه او العاطفيه
شىء جميل
مش عيب ولا حاجه غلط
بس انا بتكلم عنها فى حاله لما تكون القوى الدافعه الوحيدة
علشان كدة حطيت الكلمه بين قوسين ..


طيب
فيه حاجه تانيه غريبه
هى مش متداوله دلوقتى
ونادرة جدا
يمكن كانت موجودة ايام جدى وجدك
ونادرا فى جيل الاباء
ونادرة جدا فى عهدنا
الا وهى
انك بتاخد الطرف التانى على بعضه
شروة كدة
بعبله زى ما شخص عزيز عليا قالى مرة
بحلوة ومرة
بطبعه الحلو وطبعه الوحش
كل متكامل
ومهما اتغير
غالبا مشاعرك اتجاهه مبتتغيرش
لانك قبلت بالسلبيات قبل الايجابيات
مش على امل انك تغيرها فى يوم
لا
انما بنيه التعايش السلمى معاها
حاجه كدة خافته قوى
شفافه صعب تتشاف
خيط رفيع
بس قوى جدا

تعرفوا ان النحاس بريقه اجمل واشد من بريق الدهب
بس الدهب جماله فى استمرارة وثباته على مر الزمن
مش عارف ليه كل قصص الحب العنيفه اللى شفتها انتهت واتدمرت بسرعه
بينما القصص اللى مشيت للامام بسرعه السلحفاة وبخطوات بطيئه
واللى كانت هاديه بشكل ينقط
هى دى اللى قاومت واستمرت
دى
اسمها
مودة ورحمه
حاجه كدة
صعب يتوضع لها تعريف
هى بتتحس بس

طيب
انا الحب اللى انا عاوزة
اللى اؤمن فعلا بان اطلق عليه ( حب )
حاجه زى الدهب
مستحيل تتغير مهما حصل
ومستحيل تتفاعل مع عناصر تانيه مهما حصل
عنصر ثااااااااااااابت
المشاعر اللى تكون كدة
واللى مستحيل تتلاشى فى يوم

انا اسف انى مقدرتش اعبر كويس عن اللى عاوز اقوله
ولانى منمتش من يومين
وماكلتش من امبارح
ومكسل انزل اجيب اكل
واحب اوضح
ان كلمه ( حب ) اللى قلتها فى البوست دة
وضعتها كمصطلح مؤقت لانواع المشاعر المتعددة اللى اتكلمت عنها
ولا اعنى بالضرورة انها الحب اللى اقصدة..

انتوا بقى
ايه رايكم
عاوز رايكم فى التعليقات
يعنى
عاوز اخليه بوست تفاعلى على غير العادة
وعاوز البوست دة يكون مجرد فتح كلام
ويكون الموضوع الرئيسى فى التعليقات

عارف ان فيه كلام قلته هيستفز ناس كتير
ودة مع سبق الاصرار الترصد
علشان تعرفوا تنفجروا كويس فى التعليقات
:D
ونقوووووول ...الو

الجمعة، 4 يونيو، 2010

فاضل عالحلو دقه



اخر يوم فى شهر مايو , كنت بكلم حد عزيز عليا فى التليفون واستغرب قوى لما قلت له انى بطلت اقرا جرايد من حوالى سنه وامتنعت عن مشاهدة نشرات الاخبار باستثناء مرة او مرتين , اما البرامج بتاع الاعلاميين اللامعين واللامعات الالمعيون منهم والالمعيات , دى ربنا تاب عليا منها تماما والحمد لله.

ولما استغرب من كلامى شرحت له وجهه نظرى وانى مش بطلع من الحاجات دى غير بحرقه الدم والاكتئاب والاحباط الشديد , وفى المقابل مفيش اى جديد يذكر , الاحداث مختلفه وخط السير واحد , لذلك انا مش عاوز اتهزم من قبل ما احارب .

ولما سألنى ان كنت هفضل كدة علطول قلت له لأ , لان فيه احداث استثنائيه خارج الخط اياة , دى لازم اتابعها كويس.
قالى طب وهتعرفها ازاى اذا كنت مش متابع الاخبار اساسا
رديت وقلت انها هتوصلنى لحد عندى ...

وبالفعل ممرش يوم الا وحصل اللى اتكلمت عنه
موضوع قافله الحريه
من ايام حرب غزة وانا بسمع عن قوافل الاغاثه
وبما انى امتنعت عن ( تعاطى ) الاخبار فى السنه اللى عدت فمعلوماتى ان الموضوع دة مستمر.
سمعت ( طشاش ) عن القافله دى وانها اكبر من المعتاد , بصراحه الخبر عدى عليا زى اى خبر عادى وعلى الرغم انى معرفش اى معلومات عن القافله دى غير انها (اكبر من المعتاد ) , الا انى توقعت ان الصهاينه مش هيسكتوا على الموضوع دة وتوقعت انهم يمارسوا ضغوط سياسيه على الدول اللى خارجه منها السفينه او اللى هتمر عليها بغرض ايقافها ومنعها قبل ما توصل غزة , وبكدة هيكون الصهاينه خارج الموضوع وميصيبهمش اى حرج اعلامى .
اما ان فشلوا فى كدة فبستخدموا اسلوب الترهيب الاعلامى ودة عملوة فعلا فى شويه الكلام الخايب اللى سربوة للاعلام انهم مجهزين غرف اعتقال ومش عارف ايه .
طبعا اسلوب خااااايب جدا وعبيط وغير عقلانى بالمرة , لان اللى هيطلع على السفينه للمهمه دى مش هيخاف من الخيابه اللى بيقولوا عليها البهوات .

اسوا الاحتمالات اللى توقعتها واللى هتكون الحل الاخير عند اليهود انهم هيطلعوا قوة بحريه تعترض السفينه بمجرد دخولها فى المياة الاقليميه وتسحبها لاقرب ميناء اسرائيلى وتحتجز اللى فيها وبعدين ترحلهم لدولهم فى ظل موجه اعلاميه من الكلاب اياهم عن انتهاك السيادة الاسرائيليه وانهم كانوا بيهربوا اسلحه ومعاهم برطمان فيه جمرة خبيثه علشان يرموها على شعب اسرائيل المسالم وان عندهم معلومات استخباراتيه ان فيه مجموعه منهم كانت بتعد لتنفيذ عمليات انتحاريه , وميضرش برضه لما نجيب سيرة ايران فى الموضوع ..
اللى مكنتش اتوقعه ابدا ان اليهود يكونوا بالغباء البالغ اللى يخليهم يعملوا عمله منيله زى اللى عملوها دى .
البهوات مفكرين انهم كدة هيقطعوا رجل اى حد يفكر يساعد غزة عن طريق البحر وان الناس هتخاف
ودة ان دل على شىء يدل على انهم عمرهم ما فهموا ولا هيفهموا شخصيه انسان عندة مبادىء ( لان الاختراع دة لسه موصلش لهم للاسف )

باختصار
انا سعييييييييييد جدااااااااا بالحدث دة وفرحان وبقيمه كحدث يخرج عن الخط الكئيب اللى اتعودت عليه من زمان
ليه
اقولكم ليه

اولا
الحدث هيسبب حرج باااااااااالغ لاسرائيل على المستوى الدولى هيكون من الصعب عليهم بل من المستحيل انهم يغطوا عملتهم دى بغطاء شرعى

ثانيا
بما ان وسائل الاعلام العالميه اياها اللى ماسكها كلها يهود اكيد هتدخل المعركه الاعلاميه( حصل فعلا ) وهتحاول تطلع مبررات للعمله دى , فبالتالى اى انسان عندة ذرة فهم واحدة هيفقد الاحساس بالمصداقيه فى وكالات الانباء دى وهيعرف انهم ولاد كلب نصابين ( دة ان كان لسه معرفش ) اما اللى يفضل مخدوع فيهم بعد دة كله , دا بقى ميلزمش ومافيش منه اى رجا واحسن حل له انه ينحط جنب الحيط زى اللقمه الناشفه تمام .

ثالثا الموضوع دة فى صالح القضيه الفلسطينيه بوجه عام وقضيه غزة بوجه خاص على كافه النواحى

رابعا الموضوع دة هيترتب عليه مزيد من الرغبه فى خروج سفن تانيه ولو كانت بتخرج سفينه كل كام شهر هتطلع سفينه كل اسبوع وبدل ما كانت بتطلع من دولتين تلاته هتطلع من خمسين دوله وورونى بقى ساعتها هتعملوا ايه ياولاد ال....بن جوريون .

خامسا بهنيكم بجد ياشعب صهيون على خيابتكم منقطعه النظير فى اتخاذ اى اجراء يفيد مصلحتكم , وعلى شطارتكم فى اكتساب مزيد من الاعداء يوم عن يوم ..

سادسا اشكركم بشدة على انكم احرجتم موقف الجنرالات الاتراك حبايبكم اولاد اتاتورك الشرموط وقلبتم عليهم الراى العام التركى ( دا ان كان فيه حد معاهم اصلا ) واشكركم بشدة انكم فى المقابل رفعتم شعبيه رجب اردوغان والتيار الاسلامى فى تركيا لسابع سما , ومهدتوا الطريق له علشان يعمل حاجات كتير مكانش يقدر يعملها قبل كدة

واشكركم كمان على مجهودكم البناء فى فضح واحراج كلابكم فى الوطن العربى واثارة شعوبهم ضدهم , وارجوا منكم مزيد من المجهود دة لغايه لما يحصلوا شاة ايران باذن واحد احد ( وساعتها بقى هيبقالكم الحلاوة , وانتوا عارفين الحلاوة دى هتكون ايه :D )
كمان ميرسى كتييييير على انكم فضحتوا الاراجوز اللى اسمه اوباما ( ولو انه مفضوح من زمان ) بس يلا الشكر واجب برضه .
بجد والله مش عارف اقولكم ايه بس اللى اتخذ القرار دة اثبت لى فعلا ان السياسى الاسرائيلى عبارة عن جسد انسان برأس برص , بجد ميرسى قوى

ميرسى بترتر ...

اما بالنسبه للناس اللى اتوفت
انا مش فاهم انتوا زعلانين على ايه !
دول شهدا
حد يزعل على شهيد
الف مبروك
الف الف مبروك
وعقبالنا جميعا يااااااااااارب
فى القدس كدة باذن الله .
والعاقبه فى المسرات .
:)
____

عزيزى رجب اردوغان
انا طلعت بمبدأ عام من فترة طويله ملخصه ان السياسه هى اقذر مهنه فى التاريخ وخصوصا فى الزمن دة وان السياسيين العن خلق الله فى عهدنا , لكن انت كسرت القاعدة دى ,
بجد مش عارف اقولك ايه ,
ربنا يوفقك .
____

الشعب التركى
جزيل احترامى وتقديرى لشعب محترم وعظيم اثبت انه لسه مماتش بعد محاوله اغتيال استمرت تمانين سنه ..
____

عزيزى عوكل الاب
ارجوك
اوعى تتنحى لابنك
انا عاوزك على الكرسى كدة لغايه لما ينقلب بيك باذن الله
ارجوك
اوعى تغير الوزارة
علشان دى انسب وزارة توديك فى ستين داهيه وهى الوزارة الملائمه اللى تليق تكون فى الخلفيه والستارة بتتقفل عليك

ارجوك
اوعى تغير سياستك الخارجيه
علشان تكرة شعبك فيك اكتر واكتر وتحرج دلاديلك ودجالينك اللى انت مسرحهم فى وسط شعبك وتكشفهم وعلشان تفوّق اللى لسه مفاقش وعلشان تدى الجبان دافع قوى , دافع اقوى من جبنه علشان يتحرك .

ارجوك
اوعى تشيل ابنك من الصورة
علشان المكنسه بدل ما تشيل واحد تشيل اتنين فى شروة واحدة
ارجوك
اوعى تفرج عن مجدى احمد حسين
اصل العيله دى سرها باتع ووشها حلو على اللى بيحبسها
علشان يارب كدة يحصل معاة زى ما حصل مع ابوة لما اتحبس ايام فاروق
:))

ارجوك
اوعى تشغل مخك
علشان خلاص
فاضل عالحلو دقه ....

______

عزيزى شعب مصر
انت عامل زى الفيل
قوة رهيبه تكتسح كل ما امامها
بس مع الاسف
مقترنه بجبن ومسالمه زايدة عن الحد
بس الفيل لما بيغضب مافيش حاجه تقف قدامه
ارجوا ان ربنا يسبب المبرر اللى يغضبك دة ويخلق القشه اللى هتقسم ظهر البعير.
عيب عليك
ياللى طردت المماليك فى يوم
ياللى قضيت على جيش نابليون
ياللى صديت المغول
بص فى المرايه وشوف نفسك
يمكن تكون مش واخد بالك منك !
ولا مش عارفك !
تفتكر هتقدر ؟
هتقدر تشوف نفسك؟
ولا هتفضل فى وادى والدنيا كلها فى وادى ؟؟!
واقعد جنب الحيط
ابكى عليك
واقول :
يامُرك يا مُهجه , يامُرك يامُهجه

________

الاخوة اصحاب المزاج العالى من شبابنا اللذيذ
طبعا كلكم متابعين ازمه الحشيش الغريبه والغير منطقيه فى البلد
انا سخسيا فى البدايه مستغربتش
بس لما الموضوع طال عن حدة اصبح مريب , خصوصا ان الازمه عمرها ماكانت بالحدة دى قبل كدة ولا بالانتشار فى كل انحاء الجمهوريه بالشكل دة
واللى خلاة مريب اكتر انه اقترن بانتشار فجائى وملحوظ لكل اصناف البودرة والبرشام والكميا كما ان اسعارها نزلت بشكل مريب برضه

اعتقد الصورة كدة بقت واضحه
الموضوع مدبر
ومن جهات عليا
فيه ناس فى البلد شافت ان الظروف الحاليه اصبح الحشيش فيها غير كافى لتغييب الشعب المصرى
الفكرة دى ابتكرها السادات الله يحرقه ومصر غرقت حشيش فى عهدة علشان الشعب يتكيف وميفكرش فى حاجه ويعرف هو يلعب براحته .
بالظبط زى الجمل اللى صاحبه بياكله بانجو فى الصحرا علشان يمشى اكتر وميحسش بالتعب وميطلبش اكل و ( يفضل مركوب علطول )
حبايبنا الحلوين معجبهمش ان اغلب شباب ورجاله مصر بقوا بيتعاطوا الحشيش وشافوا ( بفكرهم الثاقب ) انه اصبح مش كفايه فى العهد دة واصبح اداة غير كافيه للتغييب وخصوصا بعد ( الضرب ما تقل على الدماغ ) , فتفتق ذهنهم اللوذعى عن احلال البودرة والبرشام محل الحشيش , بحيث بدل ما نبقى شعب صاحب كاس وصاحب انفاس , نكون كلنا شعب سرنجاتى , وتنضاف دى فى لوحه الشرف للعهد السعيد ...

جتكم ستين الف خيبه
طب غطوا نفسكم شويه
اعملوا الموضوع بالتدريج وعلى المدى الطويل
وبالراحه شويه عن كدة علشان الناس متحسش
مش تكشفوا نفسكم بالشكل الخايب دة
عموما
اهنيكم بشدة على خيابتكم ( اللى اتعودت عليها من جنابكم من زمااااااان )
واحب اقول لكم
ان الفئه اللى انتوا خايفين منها وبتعملوا لها الف حساب
مش هتقدر على فلوس البرشام والحقن والبودرة
وبما انكم قطعتم عنها الكيف الرخيص اللى كان مسكتها عنكم
هيفوقوا عليكم
لانكم مش قادرين تفهموا ببساطه
ان الحشيش اصبح فى الزمن دة
سلعه امن قومى
زيه بالظبط زى السيجارة
وبكدة
ان شاء الله هينقلب السحر على الساحر
وهنحط وداننا على الحيطه ونسمع الظيطه .
يلا مبروك
ونعيما مقدما .....
____

اما شباب مصر اللى يقدروا عليهم
بقولكم ايه
الحشيش وقلنا اضرارة محدودة ومبيسببش ادمان ولا انسحاب
وبتاخدوا وقتكم معاة وتبطلوة
قلنا كدة زمان
خلص الحشيش
بقولكم ايه
فككم بقى
كفايه كدة
مش طالبه سطل اكتر من كدة
الوقت اللى جاى عاوز ناس فايقه
شكلكم هيكون بايخ اوى وانتوا مساطيل
يلا يابابا منك له
وانتى ياماما منك لها
كفايه كدة
الفسحه خلصت
ووقت النوم بح
والمنبه ضرب
كويس انها جت منهم
اوعوا تنولوهم غرضهم
واقلبوا الترابيزة عليهم
وبطلوا خالص
وطلعوا لهم لسانكم
ولعبوا لهم حواجبكم كمان
وقولوا لهم :
خلاص
انتهى الدرس ياغبى

بحححححححح