السبت، 10 يوليو، 2010

السلطنيه



يقف جناب عمدة الكفر فى شرفه الدوار مرتديا عباءته السوداء بارما شاربه بيدة , يتامل ماحوله قليلا ثم يصيح فى احد اتباعه قائلا :
واد يابو زيد .
- نعامين ياجناب العمدة
اقفل محبس الميه ياوله
- اوامرك ياحضرة العمدة
يتجه ابو زيد الى محبس مياة عملاق ويقوم بغلقه بينما يراقبه الاف الفلاحين فى صمت وعجز ..

قفلت ياوله ؟
- تمام ياجنابو
ايون كدة
حاكم الميه انقطعت عن البت بكيزة وعطيات وهما بيصيفوا على شط الريّاح البحرى .
ايون كدة
بلا فلاحين بلا ارض بلا هم
الترعه ترعه ابونا والفلاحين يطردونا !
يصدق ابو زيد على كلام سيدة قائلا :
- تمام ياجنابو مظبوط كلامك
بجانب العمدة يجلس امام المسجد ويبتسم فى رضا وهو يقول :
- واطيعوا الله والرسول واولى الامر منكم ..
وعلى الجانب الاخر يجلس الباشكاتب فيتابع قائلا
- وماله يعنى ياجناب العمدة لما نقطع عنهم الميه
البلد بلدنا والدفاتر دفاترنا ...
ويهز الجميع رؤوسهم مبتسمين فى رضا ...

خبر فى تلفزيون الكفر :
ابناااااء العزبه الكرام
انجطعت اليوم المياة عن ترعه بلدنا لاسباب مجهوله وجارى البحث عن الماس الكهروبائى والمختل عقليا المتسببان فى الحادث الاليم .
ويظهر فى الخلفيه كثير من الاطفال يلهون بالطين فى قاع الترعه الجافه ....

وتمر الايام بينما تظل الترعه جافه , وتكثر الاحاديث على مقهى القريه , فالبعض يزعم ان ( فؤادة ) كبرت وعجزت ومعادتش تقدر تفتح الهويس , والبعض الاخر ادعى انها خايفه من ( عتريس ) خصوصا بعد ما كسر عينها واتجوزها , بينما اتجهت اشد الاراء تطرفا الى ان فؤادة ( اكلها الوبا ) ....

ينساب الغفر فى طرقات البلدة مسربين اخبار عن ان ( محصول الرز السنادى هيكون قليل علشان مافيش ميه )

بعدها بايام يتم تسريب خبر اخر يتم نشرة على استحياء بخط صغير فى الركن الجنوبى الغربى من صحيفه الحائط بتاع القريه المعلقه على جدار الزريبه يقول :
توجعات بارتفاع اسعار الرز السنه دى لان المحصول جليل لان الميه مجطوعه عن الترعه لاسباب مجهوله .
ويستمر اهالى القريه فى الجلوس على المقهى ضاربين اخماس فى اسداس منتظرين عودة ( فؤادة ) .

شيخ البلد والعمدة مجتمعين باصحاب الشون فى الدوار
اصحاب الشون :
ياجنابو الرز بقى غالى نار واحنا بنشتريه بالشىء الفلانى فياريت تزودنا شويه فى الاسعار
جنابو :
اسمع ياض ياجعر منك له , الرز بيتباع برة بعشرة فضه , انا هشتريه منكم بتلاته بس , وكله علشان الفلاحين الغلابه , مانتوا عارفين انى بوزعه عليهم برخص التراب فى الجمعيه .
اصحاب الشون :
ماهو برضه حضرتك ياعمدة عندك شىء وشويات وممكن تدى الفلاحين الرز ببلاش خالص , يعنى مش هتخسر حاجه لما تتحمل انت فرق السعر , والطيبات لله , ويجعله عامر
يصيح العمدة غاضبا :
ااااااااااااااااااااخرس ياجعر منك له , هو انا هبجشش على شعب الكفر , هى كلمه ومش هتنيها , الرز بنص فضه ولو مش عاجبكم متدونيش حاجه , ومن الاخر كدة , هو دة اللى انا عاوزة , لان هلبت الجمعيه دى خنجتنى وعاوز اجفلها واخلص منها خالص وابنى مكانها كوفى شوب وصاله بلياردو ..

ولما احس ( جنابو) من شعب الكفر الخضوع والاستسلام تشجع واصدر اوامرة بنشر خبر اخر ولكن هذة المرة بالبنط العريض وفى الصفحه الاولى يقول :
الموردين واصحاب الشون الاشرار امتنعوا عن توريد الرز لجنابوا رغبه منهم فى المكسب الحرام وبيع الرز فى السوق السودا , وجنابو ياعينى قاعد فى الدوار بيعيط على الفلاحين المساكين بس مش قادر يعمل لاصحاب الشون الشريرين حاجه لاننا فى ( كفر القانون وسيادة القانون ) ..

بعد عدة ايام ينشر خبر اخر عن استبدال الرز بالمكرونه فى الجمعيه الاستهلاكيه !!!!

يعقد جنابو مؤتمر حاشد فى حوش الدوار ويصيح قائلا لجمهور الكفر :
- حاكم الجماعه اصحاب الشون دول ناس مستغلين ولاد كلب , قوووووووم ااااااانى اييييييييييييييييييه ؟
يصيح الفلاحين فى نفس واحد :
- ايييييييييييييه ؟؟؟؟
- قلت ياواد ياجنابو , بلاهم خالص وسيبهم يرنو , ومتاخدش منهم حاجه , وخلى بقى الرز ينفعهم لما ياكله السوس فى الشون .
بس برضووووة انا منساش ولاد بلدى ,
قوم قلت للواد مفتش الجمعيه , اجرى ياوله على الكفر اللى جنبنا هات شيكارتين مكرونه , وكمان بعت اشترى من عزبه ولاد اسماعيل كام اردب رز , هما يعنى اينعم معفنين ومليانين سوس وعفن ونتانه , واينعم يعنى ولاد ابو اسماعيل كانوا هيرموهم فى الترعه , بس ااااانى قلت ولاد بلدى أولى , كان نفسى تشوفوا منظر ولاد ابو اسماعيل وهما مدلدلين بقهم من الاستغراب علي ونا بشترى منهم الرز دة , وادينا برضه هيطلعلنا من البيعه دى قرشين حلوين , وانتوا برضه متكرهوش ليا المكسب ههههههههههع هع هع ...
ياولاد بلدى
كلو مكرووووووونه , علشان تتخنوا كدة وتبقلظوا وتملوا العين , ووعد منى , وعد مننننننى ياولاد بلدى , ووعد العمدة دين عليه
فى عاشورا
وطلعه رجب
والعيد الكبير
واول لما مراتى تفيدة تولد كدة وتقوم بالسلامه وتربعن ,
وعد منى هوزع عليكم كمان كاتشاب الخواجه هاينز ومايونيزالحاج جوبر هديه ...
يصيح الفلاحون فى فرحه عارمه
- هيييييييييييييييييييييييييييييييه
يهتف شيخ الغفر قائلا :
- ادعوله ياولاد ادعوله
يضج اهل القريه بالدعاء فى نفس واحد
- يعمر بيت ابووووووة ......

______

تظهر على الشاشه ساعه ضخمه بينما تتراجع عقاربها للوراء بسرعه جنونيه .

فى بهو القصر
يجلس سعيد باشا والى مصر منتشيا بعد ان اصدر اوامرة بحفر القناة وجمع الفلاحين الملاعين من القرى لاستغلالهم فى المشروع الحضارى العظيم .
يرمقه الخواجه الجالس بجوارة فى رضا بينما يجلس سعيد على مقعد فاخر فاردا ساقيه كى يسمح لكرشه الضخم بالتدلى لاسفل بسلاسه , وياكل المكرونه ( طويله التيله ) بنهم منقطع النظير من ( طشت ) ذهبى ضخم وضع امامه .
يصيح جناب افندينا ولى النعم بينما تلوث فمه وشاربه بالصلصه ووتتعلق بعض خيوط الكرونه الساقطه من فمه باطراف لحيته الكثه :

شىىىىى جوزاااااال , عفااااااااارم افاااااااانظييييييم , ماااقااارووونه دى شى لاظيييييييييظ ...

فى ركن القصر يجلس مغنى مرتديا طربوش قصير وخلفه تخت شرقى قديم يعزف على مقام النهاوند بينما يغنى المطرب متملقا ومتلاعبا بالالفاظ :
حبذااااا عهدٌ ( سعيد ) ....
برالالالالالالالم


مبروك علينا السلطنيه ..
اقصد
المكرونه ......

الجمعة، 9 يوليو، 2010

خلف الاسوار


المشهد الاول

يظهر على الشاشه مبنى الاذاعه , حجرة البث المباشر

بقف رجل خلف ميكروفون ضخم حاملا ورقه فى يدة , ثم يقول وهو ينتحب :

بنى وطنى

فقد حزب الرداله الاحرار

رجلا,,,,

من اعززززز الرجال

رجلا

من اغغغغغغغلى الرجال


بينما يظهر فى خلفيه المشهد صوت امين عام الحزب وهو يبكى بوضوح
ثم تظهر صورة مهندس مصرى وهو يرتدى البيجامه الزرق... اقصد الحرير قابعا خلف قضبان ذهبيه ضخمه .....
_____





والله اتجوزت يامحمد


الف مبروك ياعم


بس بجد بجد


فرحان فيك جدااااااااا


بما انى انسان سادى


اتلذذ بتعذيب الاخرين


فاكيد يعنى


ومن المنتكى


انك لما تتجوز


هفرح فيك


وابوس ايدى شعر ودقن


واحمد ربنا على النعمه اللى انا فيها



---


معلش


انا عارف انى رخم وغلس ورزل


حاجه مش جديدة عليه


واسسسف جداااا انى محضرتش الفرح


بس بجد كان عندى شغل ومكانش ينفع اخد اجازة او حتى ازوغ


الدنيا متدربكه على الاخر


دا بالاضافه انى فى الكام يوم اللى فاتوا دول بتخانق بمعدل من خناقتين الى تلاته يوميا


دا طبعا ان دل فانما يدل على معدل الاسترخاء العالى اللى انا فيه


اخرهم واحد مستفز لدرجه ان ايدى نزعت غطاء الطاعه لعقلى ونقضت البيعه لجهازى العصبى وتكورت واندفعت فى اتجاة مناخير البيه دة


الا ان قوات الامن المركزى الخاصه بالجهاز العصبى نجحت فى السيطرة على الموقف فى اخر لحظه وتغيير مسارها لتصطدم بجسم صلب بدلا من مناخير الافندى اياة


اينعم انا اتعورت بس مش مشكله





انا ايه اللى دخلنى فى القصص دى


اة


المهم


بقولك انا اسف ومتزعلش منى وانت عارف يعنى انى واخد شهادة معامله اتفال وليس على المجنون حرج


كما انى حاصل على فتوى شرعيه ماضى عليها اتنين سباكين وكهربائى سلسيون انى مرفوع عنى التكليف وفاقد للاهليه ...





خلاص موش زعلان ؟


ياسلااااااااام انا برضه قلت كدة





اجى للطلبات بقى


مش هوصيك اول ولد


طبعا عارف هتسميه ايه


شاااااطر


احمد سعيد طبعا


ومش هوصيك


عاوزة مجنون زيى كدة


وانا مجهزله كافه الشهادات من دلوقت





ايوة طبعا


عارف ردك كويس


هو نفس رد كل اصحابى الاناتيخ لما اتجوزوا وطلبت منهم نفس الطلب دة


واللى مش هقوله طبعا ( الرد ) علشان الرقابه


D:








بس ملحوقه


مسيرى ازورك فى يوم


واجيبلك معايا ( الزيارة ) والمكونه من


- عدد واحد سبت خوص يحتوى على كلا مما يلى :


عدد اتنين دكر بط رجله مربوطه بقماشه


عدد تسع بيضات مدفونين فى الردة


عدد 12رغيف عيش مرحرح


عدد واحد زلعه مش من العيار التقيل مرفق معها قناع واقى من الغازات السامه


عيش وحيلاوة من بتاع ( الواد عان عندة حق )





ومعلش يابنى


كلنا لها

مبروك يامعلم





:)

الأحد، 4 يوليو، 2010

هى فوضى .



عند اول السطر
وقفت من اكتر من عشر ايام
مش عارف ابدأ منين
ولا ابدأ بأيه
فكرت اتكلم فى الموضوع بشكل منطقى واحاول احلله
لاقيت انه الموضوع برمته اساسا خارج عن المنطق
فكرت اتناوله بشكل ساخر
مقدرتش
قريحتى ماسعفتنيش
ولسانى الطويل خذلنى
قلت وماله
ممكن اتناوله بشكل عكسى
مثلا اتخيل المشهد التالى
واكتب فوقه ( حدث فى مدينه زامبوزيا )
واحكى نفس السيناريو اللى حصل
الا ان منحنى الاحداث هيتغير ابتداء من منتصف القصه
بمعنى :

يرى مواطنى زامبوزيا السائرين فى الشارع
مجموعه من الحرس السلطانى
يتطاولون بالضرب على مواطن زامبوزى
فتحتشد الجماهير
وتنقض على الحرس
تخلص المواطن من ايديهم
وتنهال عليهم ضربا
تجرد الحرس من ملابسهم
تقيدهم بالحبال
تسحلهم على الارض
وتزحف الجماهير الغاضبه
الى القصر السلطانى
حامله رؤوس المعتدين على اسنه الرماح
السلطان يراقب المشهد من نافذة قصرة فى فزع
والجماهير الغاضبه تصيح
يسقط الطاغيه
يغرق السلطان فى خوفه
ولا ينتبه الا بحجر يمر بجوار راسه
ينتهى المشهد به وهو يهرب خارج المدينه من سرداب القصر السرى ....

مش عارف..... حسيتها قصه مبتذله قوى
طب اتكلم فى الموضوع ازاى؟؟
.
.
.
اسمعونى كويس , خير الكلام ماقل ودل
بلاش ماقل ودل دى
لانى ناوى اطوّل

زمان
من حوالى بضع واربعون سنه
كان جيل الاباء لسه فى شبابه
اياميها كان فيه واحد اسمه حمزة البسيونى
وواحد اسمه صلاح نصر
ومعاهم ناس كتييير زيهم
وكان شغال تحت منهم شخص او بمعنى ادق اشخاص سموا اصطلاحا ب ( العسكرى الاسود )
الناس دى كانت مفتريه قوى
قصص وحشيتهم لا يصدقها عقل
ضحاياهم فاقوا الحصر
وتاريخهم قمه فى القتامه
جيل الاباء خاف
وعمل ( بحكمه ) المتخلف الاكبرالقائل :
من خاف سلم
!!
حسبوها
قالوا لو بعدنا عن وش المدفع
هنسلم من الاذى
ودول فى الاول والاخر بشر
مسيرهم الى الفناء
ودولتهم لن تدوم
فلو تجنبناهم
هنسلم من اذاهم
وبكدة
بيوتنا وعائلاتنا هتسلم من الاذى
وهنقدر نربى ولادنا ونأمن مستقبلهم...

هو فعلا دوله الظلم لا تدوم
وفعلا سرعان ما انهار نظامهم الاسود فى ست ايام
الا ان جيل الاباء نسى الوجه الاخر من العمله
هنا فى مصر
اينعم دوله الظلم لا تدوم
والظلمه تنهار دولتهم سريعا
الا ان هذا الانهيار
طالما جاى من تلقاء نفسه
كمتلازمه رياضيه قدريه
فالناتج الطبيعى فى مثل هذة الحاله
هو ان القادم
هيكون نظام قمعى اخر
لا يدوم طويلا برضه
الا انه اشد قتامه
الى ان يخلفه نظام قمعى ثالث اشد واشد
وهكذا
تدور الدائرة
وكل منتظر دورة
الضحايا واقفين صف طوييييل امام ( قرمه ) الجزار ينتظرون مصيرهم فى استسلام ولا مبالاة
والجزار ايضا يقف خلفه صف من الجزارين المبتدئين يتطلعون فى نهم الى اللحظه التى تكل فيها يد الجزار العجوز حتى ينقضوا عليه ويسحبوا السكين من يدة ويمارسوا هوايتهم المفضله فى ذبح اللحم البشرى الطرى .
وفى كل دورة
تزداد الصورة قتامه
وتزداد سرعه السكين
وتزداد قوة ونشاط الجزار

وبما اننا فى عصر التكنولوجيا
فقد اصبحنا فى عصر السلخانه
اى الجزر الجماعى
بعد عصرالجزار الواحد والقرمه الواحدة
بل
ولما لا نزداد تطورا
وندخل عصر المجزر الالى
اله شرسه ذات حد صلب
تقصف الاف الرؤوس فى ثوانى
ثم يتم تعليق الضحايا اوتوماتيكيا
على خطاطيف الكترونيه
تمهيدا لدخولها مرحله السلخ
ثم التعبئه .
___

المشكله
ان الواقف فى منتصف الطابور
يعتقد ان الدور لن يصيبه
وان حكم الزمان سيقع على الجزار قبل ان يدركه الدور
ونسى تماما
ان مصر ( ولادة )
وان هناك عشرات من الجزارين الشبان منتظرين دورهم
وان دورة كضحيه قادم لا محاله
ونسى ايضا
ان اولادة واقفين خلفه فى نفس الطابور
جيل الاباء
اللى مشى منهم ( تحت ) الحيط
اينعم سلم
وحدث ما توقعه
وانهارت دوله العسكرى الاسود
وربوا اولادهم فى سلام
واعتقدوا كدة ان القصه الكئيبه انتهت
الا انهم استيقظوا
بعد عشرات السنين
على حقيقه
بان يد الجزار مازالت حيه
والسكين مازال حادا
حين ينال فجاة من ابنائهم
اللى مشوا هما تحت الحيط من اجل سلامتهم
فلا هما سلموا
ولا ابنائهم
علشان الجزار مازال يمارس عمله ببراعه فى ذبح الابناء
فمنهم من يقع فريسه الاحباط
علشان مش لاقى شغلانه محترمه
لان ابن الجزار فاز بيها
لمجرد انه ابن البيه (الجزار)
ومنهم اللى اختصر الطريق وأخد النيل بالحضن
ومنهم اللى حب يضع نهايه دراميه بتدليه من حبل على كوبرى رابض فوق صفحه النيل بينما ينزل عليه ستار المسرح وسط تصفيق حار من الجماهير المنتحبه.
ومنهم من تمسك بالامل قاذفا بنفسه فى احضان البحر املا فى النجاة فاذا به يجد نفسه امام قرمه الجزار مرة اخرى .
وهكذا
تتلاشى احلام الاباء
ويتضح امامهم فجاة ان نظريتهم فى منتهى الغباء
حين يشاهدوا احلام عشرات السنين نتهار فى لحظه
وبرضه تستمر سكين الجزار فى العمل ..

وبما ان العرق دساس
فان جيل الابناء يتبنى نظريه الاباء بالضرورة
فينظرون لواقعهم الاليم بلا مبالاة
ويعيشوا حياتهم بشكل عادى جدا
كان ما يحدث لا يعنيهم
ويحبوا
ويتجوزا
املا فى بناء ( الاسرة السعيدة )
معتقدين ان فلسفه ( المشى تحت الحيط )
هتحافظ على كيان الاسرة دى
وهتخليهم يربوا عيالهم فى سلام
ونسوا ياخدوا العبرة من السابقين
ونسوا انهم هما وابنائهم هياخدوا دورهم فى طابور الضحايا
مع احتماليه تغيير الجزار الواهن العجوز
باخرشاب يحمل سكينه ممتطيا ظهر دبابه M1A3
الا ان الاخر دة
هيفضل القيام بعمله مستخدما جنزير دبابته
لانه اكثر نجاحا بكثير من السكين
وههتتلاشى احلام جيل الابناء برضه
لما يسمعوا اصوات ( طقطقه ) عظام ابنائهم

فياترى
هل جيل الابناء هيتعلم
ويفتح لاول مرة الدائرة الكهربائيه الكئيبه دى ؟
ولا هتستمر العجله فى المسير ؟
ونرجع نندم حين لا ينفع الندم
ونقول :
اُكِلت يوم اُكِل الثور الابيض ..

عموما الصورة واضحه
وربنا مبيظلمش حد
اسكت
وخاف
وسيب الجزار يجز رقبه اخوك
بس ثق
ان نفس السكين دى
هتحز رقبه عيالك قبل منك ....
بشعه النظريه دى , مش كدة ؟؟
بس مع الاسف
صح ....

-------

سياسه النظام دلوقتى بتستدعى الوضع دة
بتعمل على تحفيز وتوكيد نظريه معينه وترسيخها فى اذهان الشعب المصرى
انه مجموعه من الخرفان
وانه مهدور دمه وملوش تمن
واجعص جعر فى الداخليه قادر على اهدارة بدون اى تبعات
عارفين ليه ؟
علشان الناس تخاف اكتر من الداخليه
وخوفهم يتحول لرعب وفزع
علشان لما تيجى ساعه الصفر
ويحين الوقت الحاسم
اللى ممكن نحدد فيه مصيرنا
اما الى مستقبل افضل
واما الى قاع الهاويه
علشان لما تيجى اللحظه دى
والعسكرى ابو افرول اسود وخوزة وعصايه
والمدرعه الزيتى
يملوا الشوارع والميادين
ويحاولوا يحكموا قبضتهم على البلد
علشان يمرروا المصير الاسود بسهوله
نيجى احنا ساعتها بقى نخاف
ونقعد فى بيوتنا
ونقول لا ياعم
دول جبابرة
وسفك الدم عندهم اسهل من دلق الميه
ومن خاف سلم
وساعتها
يقدروا ينفذوا اجندتهم بسلام
بدون اى مقاومه
لانهم عارفين كويس
ان المليون ونص عسكرى اسود بتوعهم
والكام الف ظابط
وغازات الاعصاب اللى امريكا بتهادي القمل المركزى بيها كل كام يوم
عارفين ان دة كله
مش هيقدر يواجه تمانين مليون
لو غضبوا وقالوا بصوت واحد :
لأ

انما اللى هيقدر يلجّمهم
هو شىء واحد بس
اسمه :
الخوف .

دمويه الداخليه ممنهجه ومنظمه
والنظام بيتعمد يثيرها ويذيعهاويعلنها للناس
مش يداريها ويتستر عليها زى ماناس معتقدة وزى ماهو بيحاول يفهمهم
عارفين ليه ؟
علشان الكل يعرف بيها
وتنتشر فى اوسع نطاق
كارت ارهاب للشعب
بالظبط كدة زى فلسفه الخوزقه والتسمير والتوسيط والتثليم عند المماليك
وبعدين برضه زى ما اذاعوها
يوروا الناس ازى الموضوع اتمرر واتعالج
والكل يعرف ان الجانى يعيش فى سلام
بالظبط كدة زى اسلام بيه نبيه
اللى بيصيف فى الساحل الشمالى دلوقت
علشان تعرفوا كويس ياشعب مصر
ان دمكوا مالوش تمن
علشان خوفكم مننا يزيد ويزيد
وبدل ماكنتم معتقدين ان البيه الظابط عصاة فى مؤخرة الجميع
لأ
دا كمان المخبر الجعر
الجاهل
اللى اصله حرامى
الكبنش الطربش
اللى ميعرفش الالف من كوز الدرة
ابو بدله صيفى غزل المحله مقلعهاش من عشرين سنه
الجبان
اللى بييجى ساعه حمله البيه رئيس المباحث
بيقف خلف الصفوف
وبيتدارى
وبياكل الرعب قلبه
اول لما يخش الاحياء اياها
عند الجماعه اياهم اللى مبيتفاهموش
الا بقرن الغزال وسن القرش والسيف والسنجه والمقروطه والامواس وميه النار والمولتوف
ساعتها بيستخبى
واول لما يقع تحت ايد طفل صغير منهم
يعيط زى ال....
ويطلب الرحمه
حتى دة
حتى الكلب دة
قادر على اهدار دمكم
هو كمان
بدون محاسبه
مش الظابط بس
والكلب دة
الوزارة هتأمنه
وتحميه
وتنقله من مكانه بعد لما يقتل خالد
وتوديه لحته محدش يعرفها
علشان محدش يعرف طريقه ولا سكته
علشان احنا ياوزارة
نطلعلكوا لساننا
وواحنا بنقولكم :
الوزارة لا تتستر على المخطئين
بينما لسان حالنا بيقول :
ايوة
حتى المخبر كمان
واجروا بقى ورا القانون النزيه
الاعمى
اللى مبيعرفش الا الغلابه
اللى اخرة معاكم
لو انتصرتوا
حكم عقيم
وتصنيف عقيم للجريمه
اسمه
ضرب افضى الى موت
ينتهى بسجن بضعه اشهر
او على اسوأ الاحتمالات
سنوات
ودة اللى هيحصل
بعد ما تشبعوا مظاهرات ورفص وتشليت
وحسكوا يتنبح
فى الاخر
احنا بعقلنا الفذ
هنقدم جوز البقر دول للمحاكمه
اللى هتحكم عليهم بحكم من 3 الى سبع سنوات على الاكثر
بينما هيتنسى تماما
الراس الكبيرة اللى كان مع الاتنين دول
كانهم كانوا بيتصرفوا من دماغهم يعنى
وانتوا حسكم يتنبح تانى من التهليل
للقضاء العاااااااااااااااادل
اللى انصف المظلوم
وانتقم لدماء ضحيه نظام
بكام سنه حبس
لجوز تيران
وتقولوا هييييييييييييييييييييييييييييييييييييه ....

احنا معشر كهنه المعبد
شاطرين وناصحين قوى
مش كدة ؟؟؟

وقال ايه
الخارجيه الامريكيه ( قلقه ) بشان الحادث
وبتطالب الحكومه المصريه بمحاسبه المسئولين !!!!
ياسيييييييييييييييييييييييييدى
اقول لكم على حاجه حلوة
بعد اى مظاهرة
بصو على فوارغ قنابل الغاز
خصوصا بتاع الاعصاب
زى
اللى رموة على الطلبه فى عين شمس من كام شهر
وباقى السلاح ( المتطور ) اللى مع القمل المركزى
المتطور مش العادى بتاع زمان
بصوا كدة شوفوا مكتوب عليه ايه
ولا اريحكم
قبل ما تبصوا
هتلاقوا مكتوب عليه :
MADE IN USA

بذمتكم فيه استغفال كدة ؟؟؟
عارفين ليه
-علشان مصممين منخرجش من دائرة ( المفعول به ) الى دائرة ( الفاعل )
-علشان نجحنا وبمهارة اننا نفهم ( الاخر ) اننا كشعب , دااااائما برة المعادله
معادله القوة
-علشان نجحنا فى اقناع ( الاخر ) اننا قطيع من الخرفان يسهل تسييسه والضحك عليه بالدبلوماسيه القذرة مرة وبالعصا مرات .

دلوقت محدش بياخد حقه بالكلام
الحق يسترد بالدراع
بالدراع وبس
عارفين ليه
ايوة
شطار
علشان هى فوضى .
هى فوضى , وبعدها نقطه
مش علامه استفهام
يعنى جمله اقراريه
مش استفهاميه ......

ايه رايكم فى البوست ؟
بيوجع
مش كدة ؟؟
هو دة المطلوب
معلش
هى الحقن دايما كدة
بتوجعععع قوى
والا متبقاش حقن
ياترى بنفهم ؟
ولا عايشين فى مدينه النحاس
تماثيل على شكل بشر , مصنوعه نحاس , مجوفه , منصوبه فى مدينه مهجورة
يمر الهواء عبرها مصدرا صوت عالى ومخيف
الا انه مجرد صوت

جعجعه بلا طحن.

طق ... حنك.

؟؟؟؟؟؟؟