الأحد، 4 يوليو، 2010

هى فوضى .



عند اول السطر
وقفت من اكتر من عشر ايام
مش عارف ابدأ منين
ولا ابدأ بأيه
فكرت اتكلم فى الموضوع بشكل منطقى واحاول احلله
لاقيت انه الموضوع برمته اساسا خارج عن المنطق
فكرت اتناوله بشكل ساخر
مقدرتش
قريحتى ماسعفتنيش
ولسانى الطويل خذلنى
قلت وماله
ممكن اتناوله بشكل عكسى
مثلا اتخيل المشهد التالى
واكتب فوقه ( حدث فى مدينه زامبوزيا )
واحكى نفس السيناريو اللى حصل
الا ان منحنى الاحداث هيتغير ابتداء من منتصف القصه
بمعنى :

يرى مواطنى زامبوزيا السائرين فى الشارع
مجموعه من الحرس السلطانى
يتطاولون بالضرب على مواطن زامبوزى
فتحتشد الجماهير
وتنقض على الحرس
تخلص المواطن من ايديهم
وتنهال عليهم ضربا
تجرد الحرس من ملابسهم
تقيدهم بالحبال
تسحلهم على الارض
وتزحف الجماهير الغاضبه
الى القصر السلطانى
حامله رؤوس المعتدين على اسنه الرماح
السلطان يراقب المشهد من نافذة قصرة فى فزع
والجماهير الغاضبه تصيح
يسقط الطاغيه
يغرق السلطان فى خوفه
ولا ينتبه الا بحجر يمر بجوار راسه
ينتهى المشهد به وهو يهرب خارج المدينه من سرداب القصر السرى ....

مش عارف..... حسيتها قصه مبتذله قوى
طب اتكلم فى الموضوع ازاى؟؟
.
.
.
اسمعونى كويس , خير الكلام ماقل ودل
بلاش ماقل ودل دى
لانى ناوى اطوّل

زمان
من حوالى بضع واربعون سنه
كان جيل الاباء لسه فى شبابه
اياميها كان فيه واحد اسمه حمزة البسيونى
وواحد اسمه صلاح نصر
ومعاهم ناس كتييير زيهم
وكان شغال تحت منهم شخص او بمعنى ادق اشخاص سموا اصطلاحا ب ( العسكرى الاسود )
الناس دى كانت مفتريه قوى
قصص وحشيتهم لا يصدقها عقل
ضحاياهم فاقوا الحصر
وتاريخهم قمه فى القتامه
جيل الاباء خاف
وعمل ( بحكمه ) المتخلف الاكبرالقائل :
من خاف سلم
!!
حسبوها
قالوا لو بعدنا عن وش المدفع
هنسلم من الاذى
ودول فى الاول والاخر بشر
مسيرهم الى الفناء
ودولتهم لن تدوم
فلو تجنبناهم
هنسلم من اذاهم
وبكدة
بيوتنا وعائلاتنا هتسلم من الاذى
وهنقدر نربى ولادنا ونأمن مستقبلهم...

هو فعلا دوله الظلم لا تدوم
وفعلا سرعان ما انهار نظامهم الاسود فى ست ايام
الا ان جيل الاباء نسى الوجه الاخر من العمله
هنا فى مصر
اينعم دوله الظلم لا تدوم
والظلمه تنهار دولتهم سريعا
الا ان هذا الانهيار
طالما جاى من تلقاء نفسه
كمتلازمه رياضيه قدريه
فالناتج الطبيعى فى مثل هذة الحاله
هو ان القادم
هيكون نظام قمعى اخر
لا يدوم طويلا برضه
الا انه اشد قتامه
الى ان يخلفه نظام قمعى ثالث اشد واشد
وهكذا
تدور الدائرة
وكل منتظر دورة
الضحايا واقفين صف طوييييل امام ( قرمه ) الجزار ينتظرون مصيرهم فى استسلام ولا مبالاة
والجزار ايضا يقف خلفه صف من الجزارين المبتدئين يتطلعون فى نهم الى اللحظه التى تكل فيها يد الجزار العجوز حتى ينقضوا عليه ويسحبوا السكين من يدة ويمارسوا هوايتهم المفضله فى ذبح اللحم البشرى الطرى .
وفى كل دورة
تزداد الصورة قتامه
وتزداد سرعه السكين
وتزداد قوة ونشاط الجزار

وبما اننا فى عصر التكنولوجيا
فقد اصبحنا فى عصر السلخانه
اى الجزر الجماعى
بعد عصرالجزار الواحد والقرمه الواحدة
بل
ولما لا نزداد تطورا
وندخل عصر المجزر الالى
اله شرسه ذات حد صلب
تقصف الاف الرؤوس فى ثوانى
ثم يتم تعليق الضحايا اوتوماتيكيا
على خطاطيف الكترونيه
تمهيدا لدخولها مرحله السلخ
ثم التعبئه .
___

المشكله
ان الواقف فى منتصف الطابور
يعتقد ان الدور لن يصيبه
وان حكم الزمان سيقع على الجزار قبل ان يدركه الدور
ونسى تماما
ان مصر ( ولادة )
وان هناك عشرات من الجزارين الشبان منتظرين دورهم
وان دورة كضحيه قادم لا محاله
ونسى ايضا
ان اولادة واقفين خلفه فى نفس الطابور
جيل الاباء
اللى مشى منهم ( تحت ) الحيط
اينعم سلم
وحدث ما توقعه
وانهارت دوله العسكرى الاسود
وربوا اولادهم فى سلام
واعتقدوا كدة ان القصه الكئيبه انتهت
الا انهم استيقظوا
بعد عشرات السنين
على حقيقه
بان يد الجزار مازالت حيه
والسكين مازال حادا
حين ينال فجاة من ابنائهم
اللى مشوا هما تحت الحيط من اجل سلامتهم
فلا هما سلموا
ولا ابنائهم
علشان الجزار مازال يمارس عمله ببراعه فى ذبح الابناء
فمنهم من يقع فريسه الاحباط
علشان مش لاقى شغلانه محترمه
لان ابن الجزار فاز بيها
لمجرد انه ابن البيه (الجزار)
ومنهم اللى اختصر الطريق وأخد النيل بالحضن
ومنهم اللى حب يضع نهايه دراميه بتدليه من حبل على كوبرى رابض فوق صفحه النيل بينما ينزل عليه ستار المسرح وسط تصفيق حار من الجماهير المنتحبه.
ومنهم من تمسك بالامل قاذفا بنفسه فى احضان البحر املا فى النجاة فاذا به يجد نفسه امام قرمه الجزار مرة اخرى .
وهكذا
تتلاشى احلام الاباء
ويتضح امامهم فجاة ان نظريتهم فى منتهى الغباء
حين يشاهدوا احلام عشرات السنين نتهار فى لحظه
وبرضه تستمر سكين الجزار فى العمل ..

وبما ان العرق دساس
فان جيل الابناء يتبنى نظريه الاباء بالضرورة
فينظرون لواقعهم الاليم بلا مبالاة
ويعيشوا حياتهم بشكل عادى جدا
كان ما يحدث لا يعنيهم
ويحبوا
ويتجوزا
املا فى بناء ( الاسرة السعيدة )
معتقدين ان فلسفه ( المشى تحت الحيط )
هتحافظ على كيان الاسرة دى
وهتخليهم يربوا عيالهم فى سلام
ونسوا ياخدوا العبرة من السابقين
ونسوا انهم هما وابنائهم هياخدوا دورهم فى طابور الضحايا
مع احتماليه تغيير الجزار الواهن العجوز
باخرشاب يحمل سكينه ممتطيا ظهر دبابه M1A3
الا ان الاخر دة
هيفضل القيام بعمله مستخدما جنزير دبابته
لانه اكثر نجاحا بكثير من السكين
وههتتلاشى احلام جيل الابناء برضه
لما يسمعوا اصوات ( طقطقه ) عظام ابنائهم

فياترى
هل جيل الابناء هيتعلم
ويفتح لاول مرة الدائرة الكهربائيه الكئيبه دى ؟
ولا هتستمر العجله فى المسير ؟
ونرجع نندم حين لا ينفع الندم
ونقول :
اُكِلت يوم اُكِل الثور الابيض ..

عموما الصورة واضحه
وربنا مبيظلمش حد
اسكت
وخاف
وسيب الجزار يجز رقبه اخوك
بس ثق
ان نفس السكين دى
هتحز رقبه عيالك قبل منك ....
بشعه النظريه دى , مش كدة ؟؟
بس مع الاسف
صح ....

-------

سياسه النظام دلوقتى بتستدعى الوضع دة
بتعمل على تحفيز وتوكيد نظريه معينه وترسيخها فى اذهان الشعب المصرى
انه مجموعه من الخرفان
وانه مهدور دمه وملوش تمن
واجعص جعر فى الداخليه قادر على اهدارة بدون اى تبعات
عارفين ليه ؟
علشان الناس تخاف اكتر من الداخليه
وخوفهم يتحول لرعب وفزع
علشان لما تيجى ساعه الصفر
ويحين الوقت الحاسم
اللى ممكن نحدد فيه مصيرنا
اما الى مستقبل افضل
واما الى قاع الهاويه
علشان لما تيجى اللحظه دى
والعسكرى ابو افرول اسود وخوزة وعصايه
والمدرعه الزيتى
يملوا الشوارع والميادين
ويحاولوا يحكموا قبضتهم على البلد
علشان يمرروا المصير الاسود بسهوله
نيجى احنا ساعتها بقى نخاف
ونقعد فى بيوتنا
ونقول لا ياعم
دول جبابرة
وسفك الدم عندهم اسهل من دلق الميه
ومن خاف سلم
وساعتها
يقدروا ينفذوا اجندتهم بسلام
بدون اى مقاومه
لانهم عارفين كويس
ان المليون ونص عسكرى اسود بتوعهم
والكام الف ظابط
وغازات الاعصاب اللى امريكا بتهادي القمل المركزى بيها كل كام يوم
عارفين ان دة كله
مش هيقدر يواجه تمانين مليون
لو غضبوا وقالوا بصوت واحد :
لأ

انما اللى هيقدر يلجّمهم
هو شىء واحد بس
اسمه :
الخوف .

دمويه الداخليه ممنهجه ومنظمه
والنظام بيتعمد يثيرها ويذيعهاويعلنها للناس
مش يداريها ويتستر عليها زى ماناس معتقدة وزى ماهو بيحاول يفهمهم
عارفين ليه ؟
علشان الكل يعرف بيها
وتنتشر فى اوسع نطاق
كارت ارهاب للشعب
بالظبط كدة زى فلسفه الخوزقه والتسمير والتوسيط والتثليم عند المماليك
وبعدين برضه زى ما اذاعوها
يوروا الناس ازى الموضوع اتمرر واتعالج
والكل يعرف ان الجانى يعيش فى سلام
بالظبط كدة زى اسلام بيه نبيه
اللى بيصيف فى الساحل الشمالى دلوقت
علشان تعرفوا كويس ياشعب مصر
ان دمكوا مالوش تمن
علشان خوفكم مننا يزيد ويزيد
وبدل ماكنتم معتقدين ان البيه الظابط عصاة فى مؤخرة الجميع
لأ
دا كمان المخبر الجعر
الجاهل
اللى اصله حرامى
الكبنش الطربش
اللى ميعرفش الالف من كوز الدرة
ابو بدله صيفى غزل المحله مقلعهاش من عشرين سنه
الجبان
اللى بييجى ساعه حمله البيه رئيس المباحث
بيقف خلف الصفوف
وبيتدارى
وبياكل الرعب قلبه
اول لما يخش الاحياء اياها
عند الجماعه اياهم اللى مبيتفاهموش
الا بقرن الغزال وسن القرش والسيف والسنجه والمقروطه والامواس وميه النار والمولتوف
ساعتها بيستخبى
واول لما يقع تحت ايد طفل صغير منهم
يعيط زى ال....
ويطلب الرحمه
حتى دة
حتى الكلب دة
قادر على اهدار دمكم
هو كمان
بدون محاسبه
مش الظابط بس
والكلب دة
الوزارة هتأمنه
وتحميه
وتنقله من مكانه بعد لما يقتل خالد
وتوديه لحته محدش يعرفها
علشان محدش يعرف طريقه ولا سكته
علشان احنا ياوزارة
نطلعلكوا لساننا
وواحنا بنقولكم :
الوزارة لا تتستر على المخطئين
بينما لسان حالنا بيقول :
ايوة
حتى المخبر كمان
واجروا بقى ورا القانون النزيه
الاعمى
اللى مبيعرفش الا الغلابه
اللى اخرة معاكم
لو انتصرتوا
حكم عقيم
وتصنيف عقيم للجريمه
اسمه
ضرب افضى الى موت
ينتهى بسجن بضعه اشهر
او على اسوأ الاحتمالات
سنوات
ودة اللى هيحصل
بعد ما تشبعوا مظاهرات ورفص وتشليت
وحسكوا يتنبح
فى الاخر
احنا بعقلنا الفذ
هنقدم جوز البقر دول للمحاكمه
اللى هتحكم عليهم بحكم من 3 الى سبع سنوات على الاكثر
بينما هيتنسى تماما
الراس الكبيرة اللى كان مع الاتنين دول
كانهم كانوا بيتصرفوا من دماغهم يعنى
وانتوا حسكم يتنبح تانى من التهليل
للقضاء العاااااااااااااااادل
اللى انصف المظلوم
وانتقم لدماء ضحيه نظام
بكام سنه حبس
لجوز تيران
وتقولوا هييييييييييييييييييييييييييييييييييييه ....

احنا معشر كهنه المعبد
شاطرين وناصحين قوى
مش كدة ؟؟؟

وقال ايه
الخارجيه الامريكيه ( قلقه ) بشان الحادث
وبتطالب الحكومه المصريه بمحاسبه المسئولين !!!!
ياسيييييييييييييييييييييييييدى
اقول لكم على حاجه حلوة
بعد اى مظاهرة
بصو على فوارغ قنابل الغاز
خصوصا بتاع الاعصاب
زى
اللى رموة على الطلبه فى عين شمس من كام شهر
وباقى السلاح ( المتطور ) اللى مع القمل المركزى
المتطور مش العادى بتاع زمان
بصوا كدة شوفوا مكتوب عليه ايه
ولا اريحكم
قبل ما تبصوا
هتلاقوا مكتوب عليه :
MADE IN USA

بذمتكم فيه استغفال كدة ؟؟؟
عارفين ليه
-علشان مصممين منخرجش من دائرة ( المفعول به ) الى دائرة ( الفاعل )
-علشان نجحنا وبمهارة اننا نفهم ( الاخر ) اننا كشعب , دااااائما برة المعادله
معادله القوة
-علشان نجحنا فى اقناع ( الاخر ) اننا قطيع من الخرفان يسهل تسييسه والضحك عليه بالدبلوماسيه القذرة مرة وبالعصا مرات .

دلوقت محدش بياخد حقه بالكلام
الحق يسترد بالدراع
بالدراع وبس
عارفين ليه
ايوة
شطار
علشان هى فوضى .
هى فوضى , وبعدها نقطه
مش علامه استفهام
يعنى جمله اقراريه
مش استفهاميه ......

ايه رايكم فى البوست ؟
بيوجع
مش كدة ؟؟
هو دة المطلوب
معلش
هى الحقن دايما كدة
بتوجعععع قوى
والا متبقاش حقن
ياترى بنفهم ؟
ولا عايشين فى مدينه النحاس
تماثيل على شكل بشر , مصنوعه نحاس , مجوفه , منصوبه فى مدينه مهجورة
يمر الهواء عبرها مصدرا صوت عالى ومخيف
الا انه مجرد صوت

جعجعه بلا طحن.

طق ... حنك.

؟؟؟؟؟؟؟