الجمعة، 27 أغسطس، 2010

تخاريف صيام



مش عارف اصلى الجمعه
بقالى فترة طويله بدخل المسجد على اقامه الصلا
مش كسل
بس بجد
مش قادر استحمل الخطب ( الفذة ) بتاع مشايخ الاوقاف ( المحترمين )
بجد
بحس انى عاوز ارجع
اعتقد لو سجلنا خطبه من دول واذعناها فى مسلسل تاريخى من ايام المماليك مثلا هتكون الخطبه متوافقه تماما
مش هتفرق الا فى حاجه واحدة بس
الا وهى الدعاء لمولانا السلطان

هو دة الإسلام ؟!
هى دى الخطبه ؟!
الله يرحم الشيخ كشك
والشيخ المحلاوى
وغيرهم كتير
اللى كانت الناس بتتسابق علشان تلحق مكان فى المسجد من قبل ما يطلعوا المنبر بساعات
دلوقتى مافيش اى تفاعل من اى نوع بين الخطيب والمصلين
نفسى اجيب كاميرا فيديو واصور المصلين من غير مايعرفوا
هتلاقى اللى بيتاوب
واللى بينام
واللى بيلعب فى سلسله المفاتيح من الملل
واللى بيلعب فى صوابع رجليه من النتانه

السادة المبجلين المشايخ حافظين اكلشيهات خطب
بمعنى
ذكرى الاسراء والمعراج
هى هي نفس الخطبه اللى بتتعاد كل سنه
ونفس الكلام
غرة رمضان
شرحه
المولد النبوى
شرحه
وهكذا فى جميع المناسبات الدينيه

عزيزى الخطيب
لو تصادف عدم وجود مناسبه دينيه
فلا تقلق
فهناك خطب ( المنوعات )
دا طبعا غير الخطب ( المتخصصه )اللى اتكلمنا عليها فى الاول
خطب المنوعات دى بقى بتكون مثلا عن الصدق والامانه
والششششششششششرف
دة جوة الجامع
برة الجامع انتخابات بتتزور وبلد بتتخرب وتوريث بيتحضر وناس بتموت وناس بتتسرق ومووووووووولد
كل دة
والبيه قاعد جوة
بيتكلم نفس الكلام اياة
كان اللى بيحصل دة بيحصل فى تنزانيا مثلا

طيب
انا بقدم اقتراح للسيد الدكتور حمدى صوصو
مندوب مفاحت امل الدوله فى وظارة الاوكاف
انه يحقق نوع من التنوع لدفع الملل عن المصلين
يعنى زى مافيه خطب ( متخصصه ) وخطب ( منوعات )
مافيش مانع كمان نعمل خطب ( اريبيا ) وخطب ( تونز )
الاولى للجاليه المصريه فى مصر
والتانيه للسادة السكان الاجانب
وكمان نعمل خطب ( تريكس )
من باب نشر الوعى الثقافى الدينى
وكل مصلى فايز ياخد جبه وكاكوله هديه
او عروسه حلاوة صغيرة على شكل الدكتور صوصو ابو نضارة

الله يرحمه الشيخ كشك
كان بيقول لو عاوز تعرف الخطيب كويس ولا لأ
اسمع كلام الناس وهما خارجين
لو لاقيتهم بيتكلموا فى موضوع الخطبه
ايه رايك فى حال البلد
طب النظام العالمى
مثلا
تعرف ان الخطبه صح وفيه تواصل بين الخطيب والناس
ولو لاقيتهم بيتكلموا عن اسعار اللمون والطماطم
تعرف ان الخطيب دة
هوبا لالا
فشتك يعنى
ياسااااااااااااااااااااادة
خطبه الجمعه معموله لمناقشه احوال المسلمين
يعنى اشبه بمؤتمر اسبوعى
الكلام التانى دة مكانه فى دروس وحلقات العلم
مش فى خطبه الجمعه

اما انا
لغايه لما الاقى فى مصر
خطيب واحد يفتح نفسى
مش هحضر الخطبه
علشان انا مش ناقص اسهال
والذنب اللى هاخدة احسن عندى من وشوش حبايبنا اياهم ودقنهم المنتوفه
حسبى الله ونعم الوكيل

----------------

مصر بتمر بحاله خنوع وسكون غريبه
المفروض ان دة ينمى روح اليأس والقنوط عند المتابع للشارع المصرى
يعنى
مصر فى السنين الاخيرة شافت حراك ما على مستوى الشارع والنقابات والطلبه وغيرهم كتير
لكنها دلوقت بتمر بحاله سكون غامضه
مع ان الضغط زاد بشكل بشع
بالاضافه لبدايه انهيار البنيه التحتيه وشبكه المرافق اللى بتتجلى دلوقتى فى شكل انقطاع الميه والكهربا واللى هتزيد كمان وكمان باذن الله
هل دة يأس
لأ
انا بقول ان دة لا يدل الا على مسمى واحد
التاريخ بيقول كدة
والاستشعار عن بعد بيقول كدة
انا بقول كدة
بقول ان دة اسمه
( الهدوء الذى يسبق العاصفه )

فى مارس 2008 كنت ماشى فى ميدان فى المحله
نفس الميدان اللى بدات منه شرارة انتفاضه المحله
كان معايا واحد صاحبى ( اخوانى ) كان بيتكلم عن المظاهرات اللى عملوها فى الميدان دة والانتخابات وحاجات زى كدة
جه فى عقلى كلمه واحدة
كلمه جت لى بدون اى تفكير وقلتها بمنتهى التلقائيه
قلت له
البلد دى هيحصل فيها ثورة جياع
وبعدها بتلاتين يوم بالظبط
وفى نفس موضع قدمى
من قلب الميدان دة
ارتكب ظابط ناصح جرم لا يغتفر
اعتدى على ست مسنه فى نفس المكان امام الالاف من الجماهير المترقبه
دى
كانت شرارة البدايه
فى احداث المحله 2008
واللى كانت فعلا ادق تسميه ليها
انتفاضه جياع

فيا ترى
ياهل ترى
هيييجى يوم قريب
تنفجر فيه المعمعه
وتقولو لى
انت كنت بتتكلم صح ؟
ولا لأ ؟
هنشوف ....

--------------

مسلسل شيخ العرب
انا لما شفت الاعلانات قبل رمضان مجاش فى بالى انه هو همام اللى قريت عنه فى عجائب الاثار
قلت اكيد تشابه تانى ودة اى همام من شخصيات عمنا الابنودى وهيكون كله مسلسل على الربابه زى مسلسلات الابنودى اللى مش بطيق اشوفها
وبالصدفه شفت حلقه منه
طلع فعلا هو
شيخ العرب همام ابن يوسف
وهى احداث القرن الثامن عشر
وادى كمان على بك الكبير
او جن على
او على بلوط قبان
وكمااااااااااااان محمد ابو الدهب
وابراهيم القازدغلى شيخ البلد وشريك رضوان الجلفى فى حكم مصر
يبقى هو فعلا همام اللى فى بالى

بس انا ليا كام تعليق
شيخ قبيله الهوارة فى صعيد مصر
هل من المنطقى ان يقوم بدورة ممثل وزنه 200 كيلو ولون بشرته ابيض من الحليب وكمان عنيه ملونه ؟؟؟
لاحظ ان دة زعيم وفارس ومحارب
ينفع كدة ؟؟؟؟

شخصيه على بك
اااااااااخر واحد ممكن يقوم بيها هو الممثل المسخه اللى انتو شايفينه دة
على بك المع مماليك مصر
داهيه سياسيه وحربيه
مهيب الشكل والطلعه وكان الكل بيخافوا منه
واثناء ممارستهم ( للرماحه ) كان الكل بيتحاشى ضرباته المميته مع ان اللعبه بتتم بالجريد فقط وليس فيها سلاح فعلى
على بك ضخم الجسد ذو النظارات بالغه الحدة
الوحيد فى تاريخ مصر اللى كانت الناس بتموت من الرعب من مجرد رؤيته
بقول بتموت يعنى بتموت فعلا مش صيغه مبالغه
على بك اللى قضى على جيل كامل من امراء المماليك وكنسهم كنس لغايه لما مبقاش غيرة هو , الى ان انقلب عليه محمد ابو الدهب واستولى على الحكم من بعدة وبدات صفحه جديدة تزعمها اخيب مماليك مصر مراد وابراهيم اللى جت عليهم حمله نابليون ...
ينفع يقوم بدورة شخص اهطل زى دة ؟؟؟؟

المعارك الحربيه
بحس انها خناقه طلبه صيع قدام مدرسه ثانوى صناعى ولا زخرفى
او سواقبن فى موقف
المعارك قمه فى السوء واقل ما يقال عنها انها
زبااااااااااااااااااااااااااااااااااااااااااااااااااااااااااااااااااااااااااله
شويه عيال مقفعين زى العساكر اللى خارجه من مركز تدريب
دول فرسان مماليك دول
الفارس المملوك مكانش حد يبقرب منه طول ماهو على ضهر فرسه
جنود جيش نابليون المسلحين والمدربين , اللى قلبهم ميت , كانو بيتلقوا قبل كل معركه تحذيرات مكثفه انهم ميدخلوش فى مبارزة مع اى مملوك ولا حتى يقربوا من مرمى سيفه لانه بكل بساطه مش بينزل على حاجه الا بيقطعها نصين
المماليك اللى كانوا بيتسلوا فى الحفلات بانهم يقطعوا بالسيف منديل طاير فى الهوا
وبانهم يقسموا طور من وسطه بضربه سيف واحدة

لا لا
المسلسل مااااااااااااااايع جدا ومش بيسندة غير حاجه واحدة بس
ان الاحداث شيقه وان دى اول مرة التلفزيون يلتفت للفترة التاريخيه دى
يعنى اقول ايه
ياااارب سوريا تعمل مسلسل عن المماليك ؟؟
ماهو الظاهر ان معادش حد بيعرف يعمل مسلسلات عدله الا سوريا دلوقت...
حسبى الله ونعم الوكيل ..تاااااااانى

-------------

مسلسل القعقاع ابن عمرو
شفت منه حلقتين لغايه دلوقتى
المعارك الحربيه احيانا بتكون كويسه جدا
واحيانا بتكون فااااااشله
مش عارف ليه
زى ميكون فيه كذا مصمم للمعارك فى المسلسل
شخصيه البطل قائم بيها شخص مقنع
بيفكرنى بشخصيه زنكى وشيركوة ونور الدين محمود فى مسلسل صلاح الدين السورى
فيه صلابه كدة وقوة
بش مش مضايقنى غير اليونيفورم الكتان الابيض اياة دة
انتوا اتعديتو مننا ولا ايه ؟؟؟
بعدين كل شويه
ياعرب
ياعرب
يابنى تميم
يابنى حبظلم
المسلسل المفروض انه بيتكلم عن عصر صدر الدوله الاسلاميه
يعنى المفروض ان الاسلام يكون مغطى على اى نزعه شعوبيه
خصوصا ان الدوله الامويه والعك اللى فيها مكانش لسه بدأ
مش عارف ليه حاسس ان المسلسل فيه نزعه عنصريه
صح ؟
ولا انا متهيألى ؟؟؟
كفايه بقى
مش ناقصين بعد افتكاسه العرب والفرس تطلعلنا افتكاسه بنى تميم وبنى مخزوم
مش وقته خااااااااالص

--------------------

فى موضوع عاوز اتكلم فيه يخصكم انتم
انا عارف انى مقصر فى حق ناس كتير
ورخم وبااااااايخ جدا مع ناس كتير
وناس كتير بتدخل عندى وتعلق وتتواصل وانا مش بعمل العكس
انا بقول للكل
انا اسف
سامحونى
مش قصدى بجد
ظروف شغلى وسفرى الكتييييير قوى
بيبعدنى بشكل كبير عن النت
ولما بنزل اجازة
صعب انى اتابع
وبالعافيه بكتب بوست ( كوكتيل ) عالماشى زى الكام بوست اللى فاتوا والبوست دة كمان
وبالعافيه اكتر برد على التعليقات

وصلنى ان المدونه بيدخلها ناس اضعاف اضعاف اللى بيعلقوا
وفيه ناس متابعاها من اول ما اتعملت ومعلقتش خالص
مش عارف ليه
زى ما يكونوا خايفين يعلقوا
او مكسوفين
او مش مهتمين مثلا
او مش لاقيين حاجه يقولوها
او مش فاهمين اللى بقوله
انا لو قلت انى ميفرقش معايا بدافع من الكبرياء
ابقى كداب ......

كل سنه وانتم طيبين
:)


ملحوظه : الصورة اعلاة لعلى بك الكبير