الأحد، 15 أغسطس، 2010

انطلاقه نحو ( الاساتوك ) الموحَد




مش عارف اتكلم
مش عارف ابدأ الكلام ازاى الصراحه
مع ان المواضيع اللى عاوز اتكلم فيها كتير قوى , بس كل ما اجى احط ايدى على الكيبورد الاقى الكلام طار

البدايه
اصعب حاجه البدايه
اقصد مقدمه الكلام
مش لاقى مقدمه ابدأ بيها
دخله لذيذة كدة
يعنى ماليش نفس اكتب
مش لاقى

طيب

اولا كل سنه وانتوا طيبين

فيه حاجه حاسس بيها كدة
كنت معتقد فى البدايه انها انعكاس لشعور شخصى
لكن لما لقيت اكتر من واحد مشاركنى نفس الاحساس
قلت لأ
اكيد فيه حاجه غلط
مش عارف
حاسس ان الجو الرمضانى السنه دى
بقى كئيب
كئيب قوى
الناس متيسه
خلاص
تعدت مرحله الشكوى ودخلت مرحله السكوت
كله ماشى فى الشارع متيس
مكشر
مكتئب
سؤال برىء
تفتكروا السبب ايه ؟؟....

-----------------

مشروع الاذان الموحد
عوكل بجد شاطر جدا وعندة مهارة متوفرتش لحد قبله
الا وهى القدرة على انتقاء الشخصيات المخربه
مافيش حاكم فى العالم عندة القدرة على انتقاء اكتر الشخصيات المخربه والمفسدة والمضلله فى بلادة ووضعها فى مراكز صنع القرار زى عمو عوكل ..

الدكطور حمدى صوصو
الهرم الرابع فى الحكومه المصريه
واللى اسمه لا يندرج تحت اى تعديل وزارى
لانه اثبت نفسه فعلا انه اكفأ مخرب فى تاريخ الوزارة
ايه موضوع الاذان الموحد دة ؟؟
يعنى ايه الاذان يتسجل ويتذاع من جامع واحد فى المنطقه
مين قال كدة
وليه
وايه حكم الشرع فى ان الاذان ميكونش حى ؟؟؟
طبعا فضيله الشيخ سيد كفته ( احرق الله ثراة ) لو كان عايش كان قال :
حلالون ...حلالووون .....حلاااااال

طيب ما بالمرة بقى يخلوا الاقامه هى كمان مسجله
وبالمرة مافيش داعى للامام
ممكن نلغى الامام خااااالث
ونوفر مرتبات الائمه الكبيرة اللى بتاكل ميزانيه الدوله
وممكن نعمل تعاقد مع سونى او باناسونيك
لتوريد شاشات عرض بعدد المساجد فى مصر
ودة طبعا هيتم عن طريق مناقصه علانيه شفافه ونزيهه
فى اكتر وزارة نزيهه فى مصر
اللى كل حاجه فيها بتمشى بالرشوة
حتى توريد الحصير والسجاجيد للمساجد
بيتم بالرشوة
وتعيين خادم المسجد
برضه بالرشوة
علشان كدة
هيطلع فى الصفقه دى سبوبه كويسه
تضمن لاكبر عدد من موظفى الوظارة قضاء اقصى وقت ممكن من الصيف القادم فى الساحل الشمالى
.... طبعا من باب الاعتكاف والتفكر فى ملكوت الله

طيب

هيتعمل اييييه بقى بشاشات العرض دى
اقولكم
احنا هنلغى القبله خاااااالص
ونحط مكانها شاشه LCD
150 بوصه
وهنجيب كدة إمام شيك وطول بعرض بجبه وكاكوله صنع فى الصين
ودقن شيك ومنتوفه
وشوز باتس بيلمع
ونصورة وهو بيقيم الصلا
الخمس صلوات
ويتوزع ميمورى كارد على كل مسجد مسجل عليه الصلوات الخمس
وميمورى اضافى مسجل عليه صلاة الجمعه والعيدين وصلاة الاستسقاء كمان ,
علشان محدش يكون عندة حجه
وساعه الصلا
بعد مانذيع الاذان الموحد
نشغل الشاشه الموحدة
والناس كلها تصلى وراها بشكل متوحد
طبعا دة شىء مستحب
علشان صلاة الجماعه تعتمد على التوحيد
وكل ما يكون المصلين بيصلوا خلف نفس الامام كل ما هيكون احسن
وثوابه اكبر طبعا
واكيد هنتبع الموضوع دة بفتوى من الشيخ سلطعون الزمبوزى
ماضى عليها اتنين موظفين مرتشين
وممهورة بختم ( الدرج المفتوح ) ..
وبما اننا شعب ناصح وايجابى
فاكيد بعد شويه
هنلاقى المصلين هما كمان
صوروا نفسهم على الموبايل وهما بيصلوا الخمس فروض
وكل ماييجى توقيت الصلا
يذيعوا الكليب بتاعها اللى كان متصلى قبل كدا
وبكدة
الناس هتستريح من الصلا المتعبه اللى بتضيع الوقت دى
ويتفرغوا للانتاج والعمل ..

وكمان كام سنه
الناس هتبطل تبنى جوامع من اصله
وهيكتفوا بصورة كبيييييييييرة لجامع
تتنصب فى المكان المراد
ويترسم عليها سهم
مكتوب فوقه بيت قوسين
( جامع )

كمان عمو صوصو منع تشغيل التكييفات
مش علشان يطفش المصلين فى الحر دة ولا حاجه واليعاذ بالله
لأ طبعا
متبقاش نيتكم وحشه
دا اسمه ترشيد للكهرباء
علشان الجماعه الكسالى اللى بيناموا فى الجوامع
يطلعوا يناموا فى الشوارع
واهو الجوامع هتنضف
من النايمين
ومن المصلين كمان
وبكدة
هنحافظ على الجامع
وننضفه كويس
وبعين نقفله
ونبقى نفتحه فى الزيارات
لما اونكل اوبابا يحب ييجى يتفرج على ( الفولكلور ) الاسلامى .
بمعنى
لما سيادته ييجى الزيارة الجايه لمصر
هنفتح الجامع
ونخلى الامن يجمع ميه وخمسين واحد
ويحشرهم فى الجامع بالعافيه
ويخلوهم يصلوا
ويحطوا وراهم
حواجز من بتاع المتاحف دى
وجنبها لوحه ارشاديه
مكتوب عليها ( in english ) طبعا
حفريات اسلاميه ..

وبالمرة
لابأس
من قطع المياة عن المصلين ساعه الصلاة
لانه من المفروض انهم ييجوا متوضيين من بيوتهم
اصل كدة الثواب اكبر
ووزراة الاصنام حريصه على تنميه صحيفه حسنات كل مسلم
ومن هذا المنتلك
فنحب نبشركم اننا وبأذن الله
هنكفر سيئاتكم جميعا
بحيث الواحد منكم
يدخل تربته
كما ولدته امه
بالظبط زى اللى راجع من الحجاز
وادعو بقى لعمكم صوصو بيه
ابو نضارة كعب كبايه

كدة نبقى عملنا مشروع الاذان الموحد
والامام الموحد
والمسجد الموحد

وكمان نبقى نعمل مشروع المسلم الموحد
نستنسخ مسلم معدل جينيا
سلبى ومطيع ومتخلف وغبى وجبان ومعبأ بالخرافات وجاهل ومتواكل
ونوزع واحد منه على كل دوله
وكفايه بقى هو
اصل الاسلام دة فرض كفايه
يعنى واحد بس مسلم فى البلد يرفع الوزر عن باقى الشعب
يلا
خلى بقى الناس تبرطع وتهيص
بلا اسلام بلا وش

----------

الكهربا بقت بتنقطع بشكل دورى
بمعنى
كل حى الكهربا يتنقطع عنه عدة ساعات يوميا
بزعم ترشيد الاستهلاك
طبعا الموضوع مش كدا
الموضوع بمنتهى البساطه
ان شبكه الكهربا قدييييمه وعتيقه
واصبحت غير صالحه
علشان ابسط الموضوع اكتر
هضرب مثل صغير
مثلا
اى شارع صغنون
هنلاقى فى اوله كشك كهربا كبير
دة اسمه محول
ودة مسئول عن تغذيه الشارع دة
فى اغلب الاماكن هنلاقى ان المحول دة زى ماهو من عشرين تلاتين اربعين سنه
انا عن نفسى
المحول اللى على ناصيه شارعنا من قبل ما اتولد
يعنى وعيت على الدنيا لقيته
مافيش فيه اى حاجه بتتغير
باستثناء الورق بتاع الدعايه الانتخابيه اللى بيتلزق عليه كل شويه
المهم
من عشرين تلاتين سنه
اياميها
كان اعلى عمارة فى الشارع خمس او ست ادوار
واغلب السكان كانوا مسافرين برة
فمعدل الاستهلاك كان قليل
فلما عملوا المحول
عملوة على المعدل دة
طبعا فى التسعينيات
اللى كان مسافر رجع
والبيت الدورين اتهد
واتبنى مكانه برج خمستاشر دور
كل دور فيه شقتين وتلاته واربعه
وطبعا نظرا لموجه الحر
الكل مركب تكييف
ودة مكانش موجود زمان
دا غير سخان الكهربا
وغيروغير
باختصار
الحمل تضاعف بشكل ضخم
المفترض فى اى مكان
( محترم )
ان المسؤلين يواكبوا التطور دة
وتتعمل خطه بحيث ان المحولات دى تستبدل باخرى تتحمل الاحمال العاليه دى
دا غير رفع كفاءة محطات الكهربا الكبيرة طبعا
وصيانه الكابلات العموميه
واستبدالها بكابلات تانيه اقوى واتخن
لكن
بما ان وزراتنا المحترمه متخصخصه
ومش فاضيين للكلام الفارغ دة
ومشغولين لشوشتهم بمص دم الناس بفواتير كهربا هزليه
ومشغولين ببنا مبانى جديدة
علشان البيه المدير والبيه الوكيل
وطظ فى ميتين ام الناس
خلى بقى المحول زى ماهو
لما الحمل يكتر عليه
وكمان شمس الصيف تضرب فى امه
وهو اساسا مش معمول له اى نظام تهويه
( كأنهم كانوا مصممينه للعمل فى الاسكيمو )
يقوم المحول فجأتاً
بوووووووووووووووم
يضرب
وحلنى بقى على ما البهوات ييجوا
بعد اربع خمس ساعات
ويوهموك انهم هيعملوا اصلاحات عويصه وخطرة
وهما كل اللى بيعملوة انهم بيرفعوا السكينه
وبعدين يقولوا
اصل المحول لسه سخن
واستنى بقى كمان 3 ساعات
على مايبرد
وبعد ما البهوات يعملوا الاصلاحات العويصه
اللى هيا رفع السكينه
يلزقولك زى الدبان
وهات حق الشاى بقى يابيه
علشان ...... هى كمان تبرد
ومش مشكله بقى
فريزر يتحرق تلاجه تبوظ كومبيوتر يضرب
عادى يعنى
خدوا الشر وراحوا ...
وسلملى على جوزك ياسماعيل بيه
ال ترشيد استهلاك قال

طب ما احسن نعمل ترشيد فساد
او ترشيد سرقه
او ترشيد طغيان
ولا هو الترشيد فى الحاجه اللى بناخدها بس ؟
واللى بنديه
عالبحرى
يعنى :
ناخد بالترشيد
وندى بالعبيط
( حكمه العدد )

الدور على ترشيد الميه
بما ان اغلب شبكات المياة عندنا من ايام جلاله الملك
فهتحصل نفس المشكله قريب
او مش هتحصل
هيا فعلا حاصله
هتلاقيهم قطعوا عنك الميه خمس ايام فى الاسبوع
والحجه جاهزة
ترشيد الميه
علشان الافريكيين الاشرار عاوزين يشربوا مننا ميه النيل بالشاليمو
علشان الاسرائيليين الاوغاد ضحكوا عليهم واكلوهم زلعه مش
وبعدين كسروا زير الميه بتاعهم ...
استعدوا بقى ياجماعه
وابقوا اتوضوا واستحموا
( باثر رجعى )

ونداء لمعشر الرجاله
بلاش الحاجات الوحشه اللى بتعملوها يوم الخميس بالليل بعد ما تنيموا العيال دى
بعدين تدخل الحمام متلاقيش نقطه ميه ويبقى شكلك وحشششششش
لاحظ كمان ان تانى يوم هيكون فيه صلاة جمعه
ياريت تعملوا ترشيد فى الموضوع دة كمان
وبالمرة نقلل النسل

اةةةةةةةةةةةة
ياحكومه يابنت اللذين
شوفتوا الحداقه
لقوا اعلانات ( الرادل مش بس بكلمته ) مش جايبه نتيجه
قالوا اقطعوا الميه عن الشعب مساء يوم الخميس
طب الجماعه العزاب اللى زى حلاتى ذنبهم ايه طيب
اعتقد انى من حقى الدستورى كمواطن مصرى انى اخد دش ( برىء ) مساء الخميس .
مش كدة برضه ولا ايه ؟؟

------

رجب اوردغان دة شاطر قوى
عمال يلطش الجيش كل قلم والتانى
وكل شلوت واخوة
بجد والله
عفارم عليك
اول مرة اشوف الهيئه السياسيه بتلجم المؤسسه العسكريه فى تركيا
الخطوة الجايه هى هتحدد نهايه المعركه
الا وهى
القضاء
الراجل دة لو نجح ان تعيين القضاة بتوع المحكمه الدستوريه يكون عن طريق الحكومه
هيكون بكدة سيطرعلى السلطه القضائيه
وبالتالى
هيكون دة اكبر شلوت للجيش التركى
وهتلاقوا بعد شويه الجنرالات بتوع الانقلابات اياهم بيتحاكموا امام محكمه مدنيه
وعند الخطوة دى
هتكون المعركه تقريبا اتحسمت
ربنا يوفقه
ويوعدنا ...
معبرة قوى الصورة دى
دى صورة اونكل رجب وهو خارج من اجتماع مع قادة الجيش قدر فيه انه يمنع ترقيه الظباط اللى شاركوا فى الانقلاب الفاشل اللى فات
ودة انجاز محصلش قبل كدة
اييييييييييييييييييييييون كدة
اتدلع ياكايدهم
( مع الاسف , مش لاقى الصورة على النت )
D:
------------------

المسلسل السخيف بتاع الواد وحيد حامض
بالظبط طلع زى ماتوقعته
برغم كل الدعايا من السنه اللى فاتت انه هيكون حيادى ومش عارف ايه
والناس مع الاسف صدقت
ياجماعه
ديل الكلب عمرة ما يتعدل
بالذمه حد ينتظر حياديه تجاة الاخوان من سخس زى حامض دة ؟!!!!
انتوا نسيتوا افلام ( عادل امام ) ولا ايه
باختصار
الراجل دة انا بكرهه
ولما شفته بيتكلم عن العبّارة السنه اللى فاتت فى برنامج المسلمانى بتاع الطبخه الاولى لما قعد يعيط
اقتنعت فعلا انه نصاب ومنافق
بس منافق من الطراز الاول
شخص زى دة
عمرك ما هتاخد من وراة اراء حياديه او فكر سوى
لذلك
اللى عاوز يشوف مسلسل الجماعه
انصحه انه يشوفه على انه عمل هزلى
زى ( افلام كوم ) كدة
والا ميشوفوش خالص
بلا هم
مبقاش الا وحيد حااامض كمان

--------

مسلسل السائرون نياما
جذبنى الاسم لانى كنت سمعت عن الروايه قبل كدة
بس كالعادة
خذلنى تمثيل فردوس عبد الحميد
واخراج جوزها محمد فاضل
ونصاحه البهوات العاملين على الازياء والمراجعه اللغويه
عمل اخر فاشل
ينضم للقائمه الطويله للمسلسلات التاريخيه المصريه ( الفاشله )
انا حاسس ان الناس دى عندها اوضه فيها شويه قفاطين على عمم على جلاليب
بيطلعوها فى اى مسلسل
سواء كان بيتكلم عن الامويين او المماليك او حتى محمد على
مش مهم
هى هيئه اللبس كدة
ياعالم يابهاااااااااااااااااايم
بقى المماليك كانوا بيلبسوا كدة
وبعدين تعالوا هنا
انا اول مرة اعرف ان الشعب المصرى كان بيلبس ( يونيفورم ) جربان كدة ايام المماليك

وبعدين الناس اياميها كانت بتتكلم كدة ؟؟؟
ناقص كمان البت تيجى وتقول :
الواد المملوك دة مُز اخر حاجه !!

وفردوس
مبتعرفش تمثل خاااالص
حاسس انها حاطه شيكارة اسمنت ابيض على وشها
ادائها باللسان بس
مش عارف
حاسس انها من الافضل انها تتجه للاذاعه

بقى هو دة العمل الفنى؟؟
حسبى الله ونعم الوكيل
حسبى الله ونعم الوكيل
فى اللى حولوا تاريخ مصر المبهر لجثه هامدة
فشر المرحوم عبد السلام فى اعلان البلهاريسيا

--------------

احمد زقى بذر
زير الكتاتيب الجديد
مش عارف ايه القرارات الغبيه اللى عمال يطلعها دى
واضح انه بيعمل لخطه طويله المدى
يبداها بانه يلغى الكتب الخارجيه
ثم
يلغى الكتب المدرسيه
ثم
يلغى المدرسين
ثم
الطلبه
ويطفش كل العاملين بالوزارة
وبكدة
يقعد هو فى الوزارة لوحدة
ويسميها وزارة زكروتّه
مش قلنا ان هو دة اللى ( هينضف الوزارة )
مش عارف ليه الراجل دة بيفكرنى بحمدى بتشان
http://www.youtube.com/watch?v=59vV63pD2OM

-----------------

مصر بتعانى من حاله ( انتفاخ ) سياسى حاد ممكن يتفاقم ويقلب ببواسير
شخص جعر عامل جروب على الفيس بوك وعاوز يجمع توقيعات علشان الواد نوفل
وايمن بيه نور بيقول مصر كبيرة عليك
( دا على اساس ان مصر 48 وهو مقاس رجله 42 بس )
والتالت بيقول دا بعيد عن شنبك
!!!!!!!!!!!

ايه المسخرة اللى بتحصل دى
ماهو طبيعى يبقى حالنا كدة طالما كناسه المجتمع هى اللى بتظهر فى الصورة وبتتكلم باسمنا
ايا كان وضعها
سواء كانت حكومه او معارضين ( مع الرصين ) على راى اسامه غريب
علشان محدش يزعل منى انى مش بدخل على الفيس بوك

فعلا
هى كلمه قالها الزعيم الاسبرطى خالد الذكر جاك ابن نيكلسون :
هذة البلاد فى حاجه مااااااااااسه الى ...
.
.
.
.
.
.
.
حقنه شرجيه ...