السبت، 13 نوفمبر 2010

خالتى كاميليا ..والزير*


* مع الاعتذار للمسلسل العربى ( السخيف ).



- خالتى كاميليا -
موضوع بقى ماااسخ قوى وسخيف وريحته وحشه
كل فترة تظهر واحدة وتشهر اسلامها وبعدين تختفى بقدرة قادر
تطلع اشاعات انها محبوسه فى مكان ما ويظهر متحدث باسم الكنيسه
او البابا بنفسه يطلع ويقول :
الاخت فلانه بخير وعقلت الحمد لله وموضوع الاسلام دة اشاعات وهى بتقول انها متمسكه بمسيحيتها
طب هى ليه مش بتطلع تقول كدة بنفسها اسكاتا للفتنه ؟!
لا, هى معتكفه ومحتجبه واعلنت رفضها عن التحدث لوسائل الاعلام
!!!!!!!!!!!!!!!!!
وتمر سنين ولا يظهر للاخت اياها حس ولا خبر
طب وبعدين
اى منطق واى عقل يقول كدة
- ايه وجه الذكاء والفطنه فى انك تكرّة الاغلبيه المسلمه فيك وتشكك اهل دينك فى دينهم بالاساليب العبيطه بتاعه العصور الوسطى دى؟؟؟
وانا مستغرب من ناس شعرها شاب فى اللعب على الحبل مع انظمه كتيييييير , ولسه لحد دلوقت مفهموش اللى فيها؟
- وايه الحصافه والعقل فى انك تحرض الناس فى درس الاربعاء على التجمهر الفارغ وتقولهم المسلمين خطفوا امكم !!
- وبعدين تستقوى بالنظام فى انك تعتقل ناس فى اماكن احتجاز غير قانونيه ويغير وجه حق لمجرد ان النظام ادالك الضوء الاخضر, مع انك عارف ان المواضيع دى مبتستخباش وبتثير حفيظه الناس اكتر واكتر...
- وبعدين تطلع تقول تعليقات فى منتهى السخافه كأنك بتقول بالمتغطى :
انا النظام معايا وهعمل اللى على كيفى واخبطوا دماغكم فى الحيط , فلفل شطه..

وتكون النتيجه ان الفتنه الطائفيه تزيد اكتر واكتر وتلاقى ارض خصبه , خصوصا فى مجتمع جاهل ومتعصب زى اللى احنا فيه دلوقتى...
وتضطر بعد كدة تسيب نفسك لقمه طريه للنظام وترضخ لرغباته فى مقابل حمايته ليك , وهو طبعا معندوش اى مانع يصطاد فى الميه العكرة ويوهمك انه بيحميك , طبعا فى مقابل تاييد الاب والابن , وبالتالى بتتقوقع حوالين نفسك اكتر وتكرّة الناس فيك اكتر واكتر والتعصب والكراهيه ليك تكتر , فترتمى فى حضن النظام اكتر واكتر
وترجعى تدورى
وتشترى وتحورى
وتغسلى وتقشرى
وتطبخى وتحمرى ..

بصراحه
انا مشفتش غباء ولا تخلف بالشكل دة......
الاسلام مش هتفرق معاة واحد ولا حتى الف يسلموا ولا هيضرة فى شىء لو مليون مسلم اتنصروا..
العقل والمنطق بيقولوا ان اى حد من حقه يعتنق الدين اللى يعجبه بدون تدخل من الغير

المسلم اللى عاوز يتنصر مع الف سلامه
والنصرانى اللى عاوز يسلم اهلا وسهلا
واللى حتى عاوز يكون هندوسى ولا حتى مجوسى هو حر

انا مش فاهم ايه المشكله فى كدة
وليه التعامل العنيف دة فى اى واحد يعلن تغييرة لدينه
هل من المعقول انك تجبر ناس يلتزموا بدين هما مش عاوزينه بالعنف والقوة ؟!!
لأ طبعا ...

باختصار كدة ومن الاخر
كلمتين هقولهم للاخوة ذوى الشعر والذقون البيضاء والعمائم السوداء:
-طول ما انت بتتعامل مع الخارجين عن دينك بالعنف والغشم دة , طول ما الناس هتتسرسب وتنفض من حواليك اكتر واكتر ...

-
طول ما انت مرمى فى حضن نظام فاسد , طول ما هتكرة الجانب الاخر فيك وهتكون ضعيف اكتر وهتضطر تتنازل اكتر واكتر ....
عمرك ما هتقوملك قومه فى البلد دى طول ما انت منغلق على نفسك ومبتهتمش غير بقضاياك الطائفيه بس وسايب حال البلد يضرب يقلب ولا همك .....

-سيب الناس براحتها , حسسهم بالحريه , صدقنى هتكسب كتير .

-انزع نفسك من حضن النظام وبطل التصريحات المستفزة واهتم بقضايا بلدكوخلى ليك دور ايجابى وخليك على جانب الحق ,
صدقنى
الكل هيحترمك ويقدرك سواء كان مسلم او مسيحى او حتى ملحد
ومركزك وقوتك هتكون اكبر بكتيييييييييير , والنظام اللى انت بتلاعبه دة هيعمل لك الف حساب ...

النظام القمعى داخل الكنيسه كان مُجدى قبل كدة
والحق يقال انه حما الكنيسه من عواصف وفتن كتير على مر التاريخ , بس دلوقتى , خلاص الزمن اتغير , واللى ينفع زمان مينفعش دلوقتى , والايام بيننا .....

------

موضوع تدخل جهه قضائيه ايا كانت فى حكم شرعى ( بصرف النظر عن الاعتقاد فى مصداقيته من عدمه ) ..
محض هبل وعبط وتخلف ..
ليه ؟
-لان الناس عندها حكم الشرع اقوى من حكم القانون , لانه ببساطه الشرع دة عند الناس هو حكم الهى بينما القانون حكم شخص , وبالتاكيد مافيش اى شخص مؤمن هيقدم التانى على الاولانى ..

فكرة انه مافيش طلاق , فكرة مرفوضه ومنافيه للعقل والمنطق وغير مستساغه
وانا شخصيا مش مقتنع بيها خالص .
بس مش دى قضيتنا
تخيل انه فيه شخص ما , الناس موقنه ان كلامه دة حكم شرعى واجب النفاذ , يعنى حكم الهى , ( بصرف النظر عن صحه دة من عدمه ), هل ينفع نيجى نقول لأ الكلام دة مش هيتنفذ لأن القاضى فلان قال لأ ؟؟؟
اكيد مينفعش
وحركه زى دى كانت تصرف غير حكيم من المحكمه هزت هيبتها وخلت قراراتها يتمسح بيها البلاط ( وان كانوا اتعودوا على كدة من 2005 ) ....

وعلشان اقرب الصورة
تخيل مثلا واحد ( مثقف ) من اياهم او واحدة ( فنانه ) منهن , قرر رفع قضيه ضد فكرة ان الراجل يتجوز اربعه ودفعت باى اسباب ايا كانت والقاضى حكم ببطلان الزواج باكتر من واحدة
انت يا مسلم هيكون رد فعلك ايه ؟؟؟؟
اهو دة بالظبط نفس رد فعل المسيحى على اللى حصل
من حقهم برفضوا ومن حقهم يثاروا لان الحكم اساسا مستفز ...

كانت الحكمه تقتضى من المحكمه الدفع ورفض القضيه لعدم الاختصاص ..
الاصول بتقول ان القضاء ميتدخلش فى اى حكم شرعى ايا كان مدى مصداقيته ...
الحكم القضائى لا يبطل حكم شرعى ياسادة
الحكم الشرعى يبطله حكم شرعى اخر

والله البابا شايف انه مافيش طلاق
اللى عاوزة تطلق
تعمل زى طنط هاله صدقى
هى حرة
وطالما انت ارتضيت لنفسك انك تلتزم بدين معين
يبقى واجب عليك انك تلتزم باحكامه
مش عاجبك
خلاص , سيبه
الموضوع بسييييييط خالص

وباب الدير مفتوح للجميع :D

بس خلاص

----------------------












هذا الرجل
هذا الرجل انسان انتهازى
فاسد
وصولى ومنافق
ولايفقه شىء فى اى شىء
عميل وكلب للنظام وله ماضى مشرف للغايه فى كتابه التقارير والطواف فى ميدان لاظوغلى
( اسالوا طلبه عين شمس )
العرق دساس وهذا الشبل من ذاك ال......

كل الافلام اللى بيعملها دى الغرض منها شىء واحد فقط
انه يلمع اسمه قدام القيادة السياسيه علشان يمهد لنفسه الطريق لمنصب حزبى كبير , لان الوزير فى البلد دى غلبان ومكسور الجناح وقاعد على كف عفريت ...
وليس الغرض منها بالمرة اصلاح حال التعليم
ومش هتوصل لاى حاجه الا لمزيد من الفساد وبوظان التعليم ....

اللى استفزنى اكتب الكلام دة مش الشخص فى حد ذاته
لا
اللى نرفزنى هو ان فيه ناس مبهووورة ومعجبه جدا بيه وبتستبشر بيه خير على انه هو اللى هيصلح الحال ...
عارفين عاملين زى مين ؟
زى الجماعه اللى معتقدين ان حل مشكله السرقه هو قطع يد السارق
لخصوا المشكله فى اسلوب عقاب ..
احنا عندنا تخلف رهيب فى تقييم ابعاد اى مشكله
وبنريح نفسنا بمجرد الاعتقاد بان العقاب هو الحل .
فاكرين ايام الهوجه الاعلاميه اللى اتعملت على موضوع الاغتصاب
طلع اللى يقول لك احنا لازم نشدد العقوبه
وتبقى اعدام
وفعلا قد كان

السؤال
هل الاغتصاب قل ؟؟
ابدا
ولسه هيزيد كمان وكمان
وطلع اللى يقولك ( يلا نخصى الرجاله )
طبعا عارفينهم كويس
وطلع واحد فى الاهرام يقول احنا نبتر الاعضاء التناسليه للمغتصب ونحبسه فى مكان قذر وسط الحشرات والبراغيث لغايه لما يتعفن ( اة بجد مش هزار) ...

احنا لو مشينا ورا التيار دة هنلاقى بكرة الصبح الشعب المصرى كله ماشى بايد واحدة , واللى ماشى بايد ورجل , واللى ضهرة متقطع من الكرابيج , وبرضه هيبقى الوضع كما هو عليه .

وعلشان افرق فى الكلام بين حد شرعى وبين هبل الناس بتخترعه من عندها
الحدود اتعملت علشان مجتمع مسلم مثالى وصحى , اولا عداله , ثانيا تطهير من الذنب , ثالثا تقويم , واخر حاجه هى فكرة العقاب ....
علشان كدة هتلاقوا ان عدد الاحكام الشرعيه اللى تم تنفيذها فى عهد الرسول كانت قليله جدا , كما ان الشرع ضيق جدا فى شروط تنفيذ الحكم , يعنى بيحاول يشوف اى ثغرة يطلع منها المتهم وبيشدد جدا فى موجبات تنفيذ الحكم
مثلا
حكم الزنا
مطلوب اربع شهود
عدول ( وخدوا بالكم من كلمه عدول دى )
وشرط يشوفوا بعينهم ( المرود فى المكحله )
طب بالله عليكم فرصه ان دة يحصل كام فى المليون ؟؟
دى احكام الشرع
ولو المجتمع اختل ميزانه بيكون فيه كلام تانى

كل دة على الحكم الشرعى , فما بالك بالاحكام ( القراقوشيه ) اياها
يعنى ايه تدخل مدرسه تنقل المدرسين وتنفيهم وترفد فى خلق الله عمال على بطال وتشتم وتسب وتقل ادبك ؟؟؟
التعليم هينصلح كدة ؟؟
والله ابدا
ياسادة
احنا عايزين قادة
ناس شاطرة وعندها نظر وخبرة
تعرف موطن الداء وابعاد المشكله وتحط خطط للحل وتنفذها
ودى حاجه مش فى يوم وليله

مشكله مصر عمرها ماكانت فى القسوة والتنكيل
لا
مشكلتنا اننا معندناش قيادات واعيه ومخلصه وبعيدة النظر
احنا محتاجين قادة مش جلادين
لان عندنا وفر فى الصنف التانى ولا حول ولا قوة الا بالله .

بصراحه
بضحك على حالنا واحنا عاوزين حال البلد ينصلح
مش كفايه اننا عاوزين دة يحصل لوحدة بدون اى مجهود مننا
لا وكمان مش عارفين حتى ايه الاسلوب الصح
ومش قادين نميز الغث من السمين
وبنسقف لواحد نصاب عامل شو اعلامى علشان يلمع اسمه

لا برافو
شعب ناصح والله
عمار يامصر