الاثنين، 9 مايو، 2011

ماريونيت


بدايه وقبل كل شىء احب اوضح نقطتين ,
اولا , انا كنت ناوى على موضوع مختلف تماما لهذا البوست لولا الاحداث المقرفه اللى حصلت امبارح واجبرتنى على تغيير مسار هذا البوست ..
ثانيا وقبل ما ابدا كلامى , عاوز افرق بين مصطلحين , مصطلح ( السلفيين ) بمعناة الحرفى وهم الناس اللى اتبعوا نفس منهاج السلف الصالح رضوان الله عليهم وساروا على نفس الخط القيمى والسلوكى ,, وبين الكلمه بمعناها المجازى المستخدم حاليا وهو كل من اطلق لحيته وارتدى جلباب او بمعنى ادق ( مينى جلباب ) واطلق لسانه بمصطلحات على غرار : قال الله وقال الرسول , بصرف النظر عن مدى تطابقهم القيمى والسلوكى مع السلف الصالح ..

بدون الدخول فى تفاصيل ومقدمات اكتر من كدة , اللى حصل امبارح لا يدل على شىء الا على استمرار نفس اللعبه القذرة اللى كان مبارك هو الاضيشه الامنجيه بيمارسوها , بس الجديد المرة دى انها بتحصل بدعم وغطاء عسكرى , واللى كان فى امبابه امبارح شاف بعنيه ويشهد .

ودة ان دل فانما يدل على ان نظام مبارك مازال قاااااائم بكامل اركانه بعكس ما يروج له الخونه والعملاء وما يعتقده السذج عديمى الذكاء ..

انا عايزكوا كدة تعملوا فلاش باك لورا , ايام لما كنا فى التحرير قبل سقوط مبارك , افتكروا كدة كنا ايد واحدة ازاى , وكنا عايشين فى مجتمع فاضل ازاى ..
يعنى احنا بطبعنا مش متعصبين ولا عنصريين , مش بنحب العنف ولا الدم والا النار , مش بنبغض الاخر ولا بنكرهه .
كل دى اخلاقيات زرعتها فينا انظمه فاسدة على مدى عقود , ولما جه الوقت اللى سلطان الانظمه دى اترفع من علينا ظهرت فطرتنا على حقيقتها ....
ولما رجع سلطان الفساد دة تانى بشكل ابشع , عادت اخلاقيات الغابه للظهور مرة تانيه ...

ايه دة , استنى ياعمنا , اللى حرقوا الكنيسه مش سلفيين , دول بلطجيه , والنظام هو اللى بيحاول يشوه صورتنا .

كلام جميل قوى , طب واحدة واحدة كدة ومن الاول :
انا متفق معاكم ان الاعلام الموجه عسكريا بيشوة صورتكم قدر استطاعته , انما , هل كان الاعلام لينجح بهذا الشكل لولا دعمكم لهذة الصورة ؟؟؟؟
وياريت بلاش كلام من نوعيه احنا مضطهدين والناس متحفزة ضدنا , الكلام دة مش مظبوط , الناس معندهاش مشكله من الجلباب والدقن , الناس تحفزها ضد سلوكيات , ضد صلف وتعالى وتسفيه الاخر , ضد غش وفساد تاجر ملتحى , ضد فظاظه سلفى فى تعامله معاهم , ضد تكشيرة وش بيقرف الناس بيها من اول اليوم لاخرة , والدليل على كلامى دة ان لما سلفييى اسكندريه شاركوا فى اقتحام مبنى امن الدوله الناس كانوا طايرين بيهم من الفرح , صح ولا غلط ؟؟
يعنى المشكله مش فى الجلباب والدقن , المشكله فيكم انتم ...

طيب , لما العسكر يستغلوا ( ذكائكم الحاد ) فى ضرب تيارات تانيه بواسطتكم , وفى نفس الوقت يحرضكم على افعال تثير المجتمع ضدكم , وبعدين يضيف اكاذيب وشويه بهارات على افعالكم دى ويضخمها ويقدمها للاعلام بكثافه شديدة , دة معناة ايه يا اذكيا ياناصحين ؟؟؟

معناة ان العسكر بيستغلكم لضرب تيارات وطنيه اخرى وتحقيق مكاسب لنفسه , وفى نفس الوقت بيحفز المجتمع ضدكم وبيحرقكم فى الشارع , ودة معناة انه ناويلكم على مذبحه فى القريب العاجل , صح كدة ولا انا غلطان ؟؟

ومعناة انكم فى منتهى الذكاء علشان تقعوا فى فخ واضح بالشكل دة , لأ ومش كدة وبس , دا انتوا مصرين على تكرار نفس الخطأ بشكل يومى ...

طيب , طالما اللى بيروجوا للفتنه كلهم مش منكم ومافيش حد فيكم بيشارك فى المهزله دى , مش بتواجهوهم ليه , ليه مبتتصدروش فى الصورة وتحسنوا صورتكم قدام المجتمع , ليه مرحتوش كدة بالالاف تدافعوا عن الكنايس , ليه سيبتوا مهزله اطفيح وعملتوا ودن من طين وودن من عجين , واخرتها محمد حسان يروح هناك ويظهر فى صورة البطل المنقذ !!!

صفته ايه محمد حسان علشان كل مشكله يروح يحلها , كينونته ايه فى الدوله يعنى ؟ هل احنا فى مجتمع عشائرى قبلى تتحل مشاكله بقعدة رجاله وشيخ يطلع يقول كلمتين ناعمين للناس ؟؟ مش هو دة اللى كان بيحصل ايام مبارك برضه ولا انا متهيألى ؟؟

وهل فيه شيخ فاضل وجليل وهمه الاصلاح واطفاء نار الفتنه بجد , يفضل يحرض الناس ضد الطوائف الاخرى بشكل مستتر ومتغطى عادة , ومكشوف احيانا , ولما تقع الكارثه يفضل ساكت لحد ما النار تشعلل اكتر وبعدين يتدخل بصفته مطفىء نيران الفتنه ؟! اسميه ايه دة ؟؟

طيب
امسحوا كل السوفت وير اللى فى عقولكم كدة وابدأوا معايا من اول السطر :
- هو رجل الدين لازمته ايه فى الحياة ؟
انه يوجه المجتمع فى الاتجاة الصح
انه يعرف الناس بدينهم ويدعم روح الدين جواهم
انه يتصدى للحاكم الظالم ويكون فى طليعه الصفوف اللى بتنادى بحياة كريمه

صح ولا انا غلطان ؟؟

طيب
تقولوا ايه على رجل الدين اللى موارهوش شغلانه غير انه يشغل الناس فى فرعيات وتوافه , كأن الدين مافيهوش حاجه غير عذاب القبر والطول المناسب للجلباب , وادله تحريم المعازف , والمناكفه عمال على بطال فى الشيعه شويه وفى الصوفيه شويه وفى الاقباط شويه , بينما عمرنا ما شفناة بيناكف فى الصهاينه ولا فى امن الدوله ولا فى الحاكم الظالم الطاغيه ؟؟

تقولوا ايه على رجل دين كل همه انه يعيش الناس فى عالم منفصل عن الواقع كانهم رهبان فى دير بينما مجتمعهم بيغرق حواليهم وهما ولا فى البطيخ ؟؟؟

لما كل مشايخ السلفيه بيدعوا اتباعهم للاخاء واحترام الاخر ,
امال الناس اللى حاصرت الكاتدرائيه فى العباسيه جايين منين ؟
واللى حرقوا الكنايس جايين منين ؟
واللى نازلين ليل نهار سب فى النصارى عباد الصليب جايين منين ؟
واللى قرفونا بسيرة ست كاميليا , واول لما كبستهم عملوا فرقعه علشان يداروا على خيبتهم , دول جايين منين ؟؟
واللى عمالين يكفروا فى خلق الله من ميكروفانات المساجد عمال على بطال دول جايين منين ؟؟
واللى فاضل لهم شويه ويعلنوا الحرب على الناس علشان بتسمع مزيكا , بينما عنيهم مبتترفعش فى بتوع امن الدوله اللى اذلوا شعب بحاله , دول جايين منين ؟؟
اللى طلع بالصوت والصورة يتهكم من الاخرين ويقول اللى مش عاجبه يشوف بلد تانيه والبلد بلدنا , ولما العيار تقل عليه كذب وقال دى كانت مزحه , دا جاى منين ؟؟

جايين من المريخ , صح ؟؟ اكيد , حتى انا سمعت ناس منهم كانت بتتكلم اينجلش لانجودج كويس قوى ..

ولما كل دول انتوا مالكمش علاقه بيهم , امال انتوا فين ؟ ايه دوركم فى الحياة بالظبط يعنى ؟؟

عايزكم تسألوا نفسكم سؤال , ايه الفرق بين واحد زى الشيخ عبد الحميد كشك , وناس زى حسان ويعقوب والحوينى ؟؟ عايزكم تردوا على نفسكم ..

رجل الدين اللى يخاف يرفع عينه على حاكم ظالم ويتعمد يشغل الناس بخلافيات تفرق ومتوحدش , وبيخدم اجندات النظام سواء بسوء نيه او بحسن نيه , دة مش رجل دين ولا شيخ , دا ابليس نفسه يرتدى زى ادمى ..

مسمعتش يعنى عن شريط لحسان بيحرض فيه الامه على الجهاد ضد مبارك عدو الله , ولا رفع طغيان داخليه العادلى عن الشعب , فيه ؟ لو فيه وروهولى ؟؟؟

طيب , الانسان اللى يحرض ضد ثورة ويقول انها فتنه , ويأمر اتباعه بعدم الخروج على الحاكم الظالم , ولما تنجح الثورة يدخل تحت عبايتها ويستغلها اسوأ استغلال ويركب موجتها اكتر من اللى قاموا بيها نفسهم , تسموة ايه غير انه انسان نتن وانتهازى ومالوش مبدأ ؟؟

مسلمين ايه دول اللى يقعدوا ينهنهوا ويعيطوا ويصرخوا فى التراويح وبعد الصلا يمسكوا فى بعض , وبرة الجامع تلاقيهم مثال نموذجى للفظاظه وغلظه القلب ؟؟

ومنين شيخ يشبع الناس خطب عن حلاوة الفقر وجمال الفقر ( على غرار الافلام الابيض واسود ) ويقنع الناس بان الفقر مكرمه وميزة وفى نفس الوقت هو عايش فى قصر وعندة عربيه اخر موديل ؟؟

ايه ياعم ؟ هى الكحكه فى ايد اليتيم عجبه ؟ قل من حرم زينه الله التى اخرج لعبادة , هو عيب ان ربنا يكرمه بالمال ؟؟

لأ مش عيب , ومش عيب ان رجل دين يصبر الفقرا على فقرهم , بس اللى بيحصل دلوقت مش كدة .
اللى بيحصل فى مصر الان ان فيه فئه امتصت دم الشعب وعيشته فى احط درجات الفقر , يعنى الفقر هنا مش ظرف معيشى عام وطبيعى , لأ , دة وضع شاذ فرضه ظلم اجتماعى بين , فواجب رجل الدين ساعتها انه يحرض الناس على دفع الظلم والاطاحه بالظالمين واسترداد حقوقهم المنهوبه , انما لما يعيش الناس فى الوهم انهم كدة ميت فل وعشرة , ويحرضهم على الهدوء والاستكانه , وفى نفس الوقت يتملق اللصوص ويفخمهم , ويا اهل الخير , وانتم من قال فيهم رسول الله كذا وكذا , ويفشخ ضبه بابتسامه عريضه , ويغير كلامه ميه وتمانين درجه قدامهم الى كلام عن ان الله غفور رحيم , وانهم اهل فضل واهل كرم وجود , يبقا نصاب وشيخ منصر كمان ...

الا هو صحيح , ودة سؤال غايه فى البراءة , هو الشرايط ام جنيه ونص ممكن تجيب لواحد مُعدم قصر وعربيه اخر موديل ؟؟؟
خليها فى سرك

ازاى رجل دين ينيم الناس ويامرهم بطاعه حاكم ظالم بيخرب البلد تخريب , لو الكفار نفسهم احتلوها مش هيقدروا يخربوا ربعه ؟! اى عقل يقول كدة ؟ وفتنه ايه اللى خايف منها , اذا كان السكوت نفسه تمنه افدح عشرات الاضعاف من تمن الفتنه ( المحتمله ) ..

ياسادة يامحترمين , الم يقل رسول الله صلى الله عليه وسلم : لا يكونن احدكم إمعه ؟ عارفين يعنى ايه امعه ؟ يعنى طرطور , يعنى شرابه خرج , ماشى فى الهيصه وسط الناس بدون تفكير , يعنى عجل جاموس ضمن قطيع بهايم ...

طيب , فيه احسن من ربنا عز وجل ؟
اذا كان ربنا نفسه لما خاطبنا فى القران وامرنا بشىء كان بيوضح ويقول ليه , ولما خاطبنا خاطب عقولنا , وكرر عشرات المرات كلمه ( افلا تعقلون ) ( افلا تذكرون ) .
مقلناش هو كدة وخلاص , صح ولا غلط؟

يعنى ربنا امرنا نشغل عقلنا , علشان كدة ربنا اعطى كل واحد فينا عقل , ولو مكانش كدة كان ربنا ميز رجل الدين لوحدة بالعقل ولغاة من باقى الناس وقال لهم امشوا ورا دة وخلاص ؟ صح ؟
يعنى اللى اتبعوا مفسد لن يعفيهم من العذاب انهم انساقوا وراة
يعنى لما الذين اتبعوا يقولوا للذين إتُبعوا هل انتم مغنون عنا نصيبا من العذاب , هيتبروا منهم .
يعنى ربنا مداش توكيل لحد يتكلم باسمه بحيث ان اى شخص اخر يرد على الموكل اليه يبقى فاسق وخارج من المله .
يعنى الشيخ اللى يتعامل مع الناس على انه وكيل الله على الارض وهو لوحدة هو واقرانه اللى بيفهموا فى الدين وباقى الناس ( عوام ) كما يطلقون عليهم , وواجبهم اتباع سيادته عميانى , دة يبقا نصاب ومدعى وغاوى مريسه .

اقروا تاريخ العالم كله , وهاتوا اكبر كوارث فى التاريخ البشرى , هتلاقوا ان كلها , كلها , كلها , سببها شىء واحد بس ,
ان الناس انساقت واراء شخص ما ولغت عقولها وتحركوا خلفه كالغنم , صح ؟ ولا انا غلطان ؟؟

ياعم ما نت عارف , رجل الدين اللى بيخبط فى الحلل بيتعلق من رجليه ومحدش بينفعه .

اة , معاك فى دى , بس فيه مواضع بتفرض على الانسان تبعات كبيرة طالما هو قبل يكون فيها , فلو حاسس انه مش قد التبعات دى , يبقا ينسحب بكرامته وله جزيل الشكر ووافر الاحترام , احنا بشر , وواجبنا اننا نقدر ونحترم الضعف البشرى , انما يتبت فيها بغرا وياخد وش الفته وساعه الدفع يقول مش لاعب , لأ , ميلزمنيش

احنا عندنا نموذجين , فيه نموذج قام بدورة كما ينبغى وله كل حب وتقدير واجلال , زى الشيخ كشك رحمه الله ( رغم اختلافى معاة فى نقط ) .
وفيه نموذج اثر السلامه وانسحب من اللعبه , لا مع النظام ولا ضدة , زى الشيخ الشعرواى , ودة برضه له كل الاحترام والتقدير ..

رجل دين تقوم بدورك الحقيقى افديك برقبتى , تتحلى بالشجاعه الادبيه وتعترف بضعفك احترمك واقدرك , انما متشاركش فى لعبه قذرة ولو بالتستر والتشتيت



نرجع مرجوعنا تانى للى بيحصل فى البلد دلوقت ,
انا فى يوم من الايام كنت ملتحى وعشت داخل التيار السلفى خمس سنين , يعنى عارف كويس انا بتكلم عن ايه , مش بلوش ..

ومن خلال ادراكى للتاريخ انا مقتنع تماما ان لا يمكن باى حال من الاحوال فصل الدين عن السياسه , فاما ان يسيطر الدين على السياسه واما ان تستغل السياسه الدين فى خدمه اهدافها القذرة .
ونا شايف ان الدين متحكمش فى السياسه الا فى عهد الرسول صلى الله عليه وسلم وعهدى ابا بكر وعمر رضوان الله عليهما , بعد كدة السياسه هيا اللى سيطرت على الدين ...
يعنى انا اختلف مع اللى شايف ان الدين بيفسد السياسه , بالعكس , الدين بيرتقى بالسياسه , السياسه هى اللى بتشد الدين لتحت لو سيطرت عليه ..

والاسلام بطبعه دين اتى كنظام لحياة شامله , مش مجرد شعائر تعبديه محبوسه داخل جدران المساجد .

بما ان الغرب والصهاينه ودلاديلهم الفاسدين فى الوطن العربى موقنين انه من المستحيل القضاء على الاسلام , فاتجهوا للحل الاضمن وهو تفريغ الاسلام من محتواة , اللى بيشكل خطر عليهم , وتحويله لمعول هدم يعنى حولوة لسلاح بلا ذخيرة , سلاح فاسد كمان ..

- اصبح التيار الصوفى عبارة عن مجرد اوراد واذكار + حلقات ذكر وتطويح + طاعه عمياء لمشايخ طرق ماهم الا مخبرين وامنجيه , بيستغلهم النظام فى حشد ملايين الاتباع لخدمه اهدافه الشخصيه , لانهم قرروا يلغوا عقلهم عملا بنظريه ( الشيخ والمريد ) ..

- حولوا التيار السلفى لعبوة خاليه من المحتوى , مجرد جلابيه ودقن كريهه المنظر غير مهذبه , مقترنه بجهل مطبق وتغطرس ومخ مصدى ومنفصل عن الواقع لاقصى درجه , بالاضافه لتبعيه كامله لمشايخ ( ماريونيت ) تحركهم خيوط الامن ودعم بعض الدول المادى والفكرى ,فى المقابل , لا يرتفع صوتهم ضد ظلم او فساد حاكم , متبنيين سلبيه شديدة فى الحياة , وهو دة اللى هما عاوزينه ...

مش السعوديه اكبر راعى للسلفيين ؟ مسألتوش نفسكم هما سمن على عسل مع الامريكان ليه ؟؟؟؟؟

السعوديه هى اللى انشأت التيار دة , علشان تستغله لدعم موقف الاسرة الحاكمه سياسيا قصاد اعدائها الداخليين , وامريكا بدورها تلقفت الفكرة وساهمت فى دعمها و واخيرا الحكام العرب استشعروا ان التيار المفرغ دة هيشكل صمام امان لحكمهم وفى نفس الوقت فزاعه للغرب , فساقوا فيها هما كمان ..

انا مش قصدى اهاجم الاسلام , وانا وعزة جلال الله موقن ومؤمن ان عز الامه دى هيكون بالاسلام , وان فتيل القنبله اللى هتنفجر فى وش الصهاينه وشله اللصوص اللى بتحكم امريكا هو الاسلام , بس مش الاسلام دة , مش الخواء والسفه دة , دة ماسموش اسلام ..

ولو هجومى على المنتسبين للسلفيه يعد هجوما على الاسلام فانا مضطر اكرر جملتى الخالدة :
لو هجومى على المتأسلفين يعد هجوما على الاسلام , فهجومى على المجلس العسكرى يعتبر هجوما على الجيش , وهجومى على مبارك يعتبر هجوما على مصر ....

وانا ضد الحرب على السلفيين بوجه عام ’ لان دة هبل وهطل , وكلام مش واقعى , سلفيين مصر جزء من النسيج الوطنى واغلبهم حسنى النيه بصرف النظر عن تصرفاتهم اللى فى منتهى الغباء, وبصرف النظر عن فئه المخبرين والامنجيه اللى وسطهم , وبصرف النظر عن مشايخ السلطان اللى بيتحكموا فيهم ويوجهوهم مع الاسف

هما بس محتاجين يشغلوا دماغهم ويزيتوا تروسها شويه ,

مشايخهم ماركبوش ودلدلوا الا لما النظام فرغ الازهر من الناس التقيله وحط مكانهم شويه طراطير وكلاب للسلطه . فالسلفيين بالتالى ملقيوش قيادة دينيه محترمه , فتوجهوا للقيادات العرة اللى احنا شايفنها دى ...

يعنى السلفيين هيبقوا ميه فل وعشرة , بس عاوزين قيادات نضيفه , تفهم الدين صح وتخاف عالبلد بجد , واهم حاجه هما محتاجين يتعلموا ميسلموش دماغهم لحد ايا كان ...



من ناحيه الكنيسه , انا مقتنع ان فيه قيادات كتير متعصبه فى الكنيسه مع الاسف , ومع احترامى للاقباط الا انى شايف ان البابا له سقطات كتير , عارف انه خايف على شعب الكنيسه , بس سقطاته استغلها النظام ضدة , زى ما استغل سقطات السلفيين بالظبط

النظام استغل سقطات القيادات الكنسيه فى حشد السلفيين ضدهم وتحويلهم لفزاعه يضغط بها النظام على الكنيسه من حين لاخر , والهدف هو ابتزاز القيادات الكنسيه واجبارها على حشد شعبها لتاييد النظام , وغالبا كانت القيادات بتستجيب للضغوط دى , وبالتالى الكنيسه بتعزل نفسها اكتر عن الاغلبيه المسلمه وبتثير حنقهم وبتقدم نفسها فى صورة عملاء النظام , ودة بيسهل مهمه النظام انه يحشد اكتر ويضغط اكتر , وفى نفس الوقت بيظهر قدام الغرب على انه صمام الامان ضد الانفجار الاسلامى , وبيرضى الكنيسه احيانا هى والغرب بتنفيذ اجرائات قمعيه ضد السلفيين ...

بعنى النظام بيلعب على كل الحبال وبيستفيد من الجميع , دا طبعا غير فكرة الهاء الشعب عن بلاويه من خلال تدبير سيناريوهات فتنه طائفيه زى مابيحصل دلوقت ....

اقروا كدة تاريخ مصر فى الالف سنه اللى فاتت
اقروا البدايه والنهايه , اقروا عقد الجمان , اقروا النجوم الزاهرة , اقروا تاريخ المقريزى , حوليات الجبرتى , هاتوا كل احداث الفتن الطائفيه اللى شهدتها مصر عبر التاريخ , وكثير ماهى , هتلاقوا انها كلها , كلها مشتركه فى نقاط محددة :
- انها كلها جت فى توقيتات كان فيها ضغوط كبيرة على الحاكم ,
- وان اسبابها غير منطقيه وتبدوا مفتعله بفعل مجهول
- وان النظام تغاضى عنها لغايه لما ولعت وشعللت ,
- وان النظام فى النهايه بيتلكك بيها ويعمل حمله دمويه مبررة وفى النهايه الناس بتقعد تسقفله ,
- وان الحاكم بيقمع الاقباط ويظهر قدام الاغلبيه على انه حامى حما الاسلام , وبعد فترة بيراضى الاقباط بشويه مناصب اداريه علشان يضمن ولائهم....

يعنى اللعبه قدييييييمه قوى ومن زمان , بس مع الاسف احنا اللى مش عاوزين نفهم .

اللعبه دى وبال على الكنيسه ووبال على المسلمين , والاتنين غلطانين ( وان كان غلط التيار السلفى مؤخرا اصبح افدح بكثير )

وعلشان المهزله دى تقف لازم نستاصل النظام المباركى من جذورة وفى اسرع وقت , ساعتها مروجى الفتنه هيختفوا وظباط امن الدوله اياهم هيتعدموا , والنفوس هتصفى , وساعتها القله المتعصبه اللى هتتبقى فى الطرفين مش هتجرؤ تتكلم , ولو اتكلمت فاقرب ناس لها هما اللى هيتصدوا لهم .

اللى بيحصل فى البلد دة تدبير المجلس بالتعاون مع امن الدوله وبلطجيه مبارك ... الموضوع دة مش عفوى , واعتقد ان النقطه دى واضحه قوى ...

مليونيه الجمعه الجايه ... لازم يكون شعارها اسقاط مجلس الانس واعدام القتله ..

اسقطوا المجلس , اعدموا الخونه , اعدموا القتله , طهروا الجيش والشرطه والمخابرات , صفوا فلول الحزب الوطنى وبلطجيته , اقصموا ظهر رجال الاعمال اللصوص , هتلاقوا بلدكم زى الفل ومافيهاش مشاكل ..


واخيرا ,
ياسلفيين يابتوع قال الله وقال الرسول , مش عاوزين ناس بدقون متعاصه طبيخ وكروش مدلدله قدامها مترين وعقول متربسه .
عاوزين ناس زى ابا ايوب الانصارى ومحمد الفاتح , زى العز بن عبد السلام , زى اق شمس الدين وخير الدين بربروسا , زى بديع الزمان النورسى وزى عمر المختار ...
عندكوا من دول ولا نستوردلكم من برة ؟
عندكوا ولا سوق الرجاله عندكم خلاص جبر يا.......يارجاله ؟؟

نصيحه لوجه الله
الحقوا نفسكم قبل الطوفان ما يبلعكم
الا قد بلغت
اللهم فاشهد ....


* المقال دة كان تجميع لاغلب الحوارات اللى دارت بينى وبين الناس النهاردة عالتويتر , واسف لتفكك الحوار ।


________


تحديث ,

ياريت اللى دخل مدونتى للمرة الاولى وعاوز يقيمنى يبقى يقرا البوستات دى الاول قبل ما يحكم على البوست دة ------>


عندما يصبح الدين افيونا


مذكرات متصوف بالمعاش


خالتى كاميليا والزير


بورتريه


حبايبى مشايخ الطرق والكبارى

الثلاثاء، 3 مايو، 2011

نحن لانزرع المكرونه ..


فجر التاسع من ابريل الماضى
اللى حصل فى الليله دى مهزله بكل المقاييس
بعد الليله دى مكانش ممكن انى اتكلم تانى
لانه ببساطه وباختصار
معادش فيه كلام ممكن يتقال
نتكلم ليه وندافع عن مين
عن ناس مش عارفه مصلحتها
عن حفنه انتهازيين كل اللى يهمهم ينولوا الرضا السامى ولو من خلال خوض بحر من الدم
عن قطيع ماشى ورا راعى بدون ادنى نظر هو موديهم على فين
طب دا حتى القطيع لو اتساق للهاويه هيقف ومش هيكمل
يعنى الغنم عندها مخ اكتر من بعض بنى ادم .

عموما وعلى اى حال
انا مازلت عند كل كلامى اللى قلته فى البوستات السابقه ولم اتراجع عنه
واللى حصل دة عمرة مكان هيحصل ولا متوقعله يحصل ,
وسبب حدوثه كان التغطيه والتشجيع اللى لاقاة المجلس من بعض الناشطين , مع الاسف بعضهم خونه واغلبهم اقل ما يقال عليه انه ساذج ومازال يمر بمرحله ( الطفوله السياسيه ) مش المراهقه كمان .
والسبب ان الناس دى اخدت اكبر من حجمها
التغطيه والتحريض والتشجيع دة كان فرصه ذهبيه ميحلمش بيها المجلس .

نقطه ومن اول السطر,
حبايب المجلس ومطبلينه كانوا بينكروا اى اتهامات بالفساد او التواطؤ ضدة
وقالوا الكلام دة مش مظبوط , ولو كان مظبوط فليه الظباط ساكته لغايه دلوقت ؟؟

طيب
نرجع لورا
لميدان التحرير ابتداء من مساء يوم 28 يناير
وبالتحديد يوم الاربعاء الدامى
الناس اللى كانت متغاظه وزعلانه قوى ان قوات الجيش واقفه على الحياد ومش بتدخل لصالحهم , وكانوا بيقولوا ان دى خيانه .
, يعنى انتوا معترفين بوجوب تدخل الجيش وانضمامه لجانب الشعب فى الظروف اللى زى دى , حتى وان تعارض دة مع الاوامر اللى جايه لهم من فوق

ودة كلام صح
واى كلام غير كدة يبقا كلام مغلوط
واى كلام عن حياديه القوات المسلحه فى ظروف زى دى , زى الكلام اللى تحفنا بيه السادة الظباط المتقاعدين اللى صدعوا دماغنا عالجزيرة يوم 28 , كل دة كلام غير صحيح
لان باختصار القوات المسلحه خارجه من رحم الشعب
عايشه وسطه وجايه منه وبتعانى معاة وزيه بالظبط
يعنى مش مماليك مجلوبين من خارج الوطن ومنفصلين عن الشعب
يعنى من حقهم يحسوا
من حقهم يتألموا
من حقهم يصرخوا
زى ما انت بالظبط من حقك كدة
القوات المسلحه هدفها هو حمايه مصر من الاخطار الداخليه
ولما يتواجد اخطار داخليه
وتكون الاجهزة المنوط بيها التصدى لهذة الاخطار انحرفت عن هدفها وشكلت خطر فى حد ذاتها
فتدخل القوات المسلحه فى الوقت دة واجب وطنى , بل فرض على كل من ينتمى للمؤسسه , وان تعارض ذلك مع الاوامر العليا
مش كدة ولا ايه ياسيادة اللوا زهران يابتاع جريدة القوات المسلحه , وياسيادة العميد صفوت يابتاع التحليلات العسكريه ؟ , ياللى فلقتوا دماغ ابونا عن حياديه الجيش ..

لأ , مش المفروض يتدخلوا علشان ميحصلش انشقاق فى الجيش ويحصل حمام دم .

اة , افهم من كدة ان وحدة الجيش مقدمه على مصلحه الشعب , اللى هيا فى الاساس مصلحه الوطن .

طيب , قياسا على كدة مكانش المفروض ان اى فرد من الداخليه ينضم للشعب يوم 28
وكل ضابط وعسكرى وصف وقناص التزم بالاوامر والتعليمات , فدة راجل اتصرف صح ويستحق الشكر .
ولما قوة مسلحه تواجه مجموعه من العزل , دة ارحم بكتييير من قوة مسلحه تواجه مجموعه من العزل يدعمهم قوة مسلحه اخرى..

وعلى كدة الجيش السورى جيش رائع لانه تجنب الانشقاق ولو على حساب الشعب
صح؟
ماهو الجيش السورى عمل كدة
حافظ على وحدته على حساب الشعب

يبقا لازم كلنا نسقف للجيش السورى

لا منطق رائع الصراحه

ياعم لأ , الوضع يختلف , المجلس العسكرى مدخلش فى مواجهه شامله مع الشعب زى ما الجيش السورى ولا زى الداخليه المصريه ..

مظبوط
والسؤال اللى عاوزك تساله لنفسك هو , ليييييييييه ؟؟؟
هل لان المجلس عندنا نظيف وطاهر
طيب
هل تعتقد ان مبارك بالغباء , اللى يخليه يزرع عناصرة الفاسدة فى كل مؤسسات الدوله وينسى اهم واخطر مؤسسه ممكن تهدد سلطانه ؟
هل من الممكن ان يتجاوز شخص ما كل دة وكل التقارير الامنيه الدوريه ويحافظ على منصب حساس زى دة ولمدة عشرين سنه كمان فى سابقه لما تحدث فى تاريخ مصر الحديث ؟!
هتقولى الرجل اللى كتم ايمانه من قوم فرعون ؟
اقولك دا كان راجل بركه , مكانش وزير دفاع فرعون .
عمركوا سمعتوا عن ( هامان ) يكتم ايمانه ؟؟

المجلس تجنب ( ولازال ) الصدام الشعبى الشامل لانه عارف ان 99 فى الميه من قواته هتنقلب ضدة , وعارف انه اساسا لن يصمد فى مواجهه شامله مع شعب بالكثافه السكانيه دى وفى مسرح بالكثافه المعماريه اللى فى مدن مصر وبلد طبيعتها الطوبوغرافيه عبارة عن مدن متلاصقه وكثيفه فى اطر من الاراضى الزراعيه الغير صالحه اصلا لتحرك اى قوات منظمه , اكتر من 48 ساعه على الاكثر , دة المجلس العسكرى , اللى مبيعرفش يضرب الا وش الفجر وتحت ستار الظلام , زى الحراميه وقطاع الطرق ..

انا مش هحاول اثبت ادله فساد المجلس , لان الفكرة فى حد ذاتها بتستفزنى , زى ما تقولى مثلا اثبت ان الشمس طالعه , او اثبت ان انا مش انا ..
كلام فارغ وسفسطه عقيمه , اعتقد ان التعامل مع الناس دى ( حبايب سيدى ابو كتّافه ) بمربع ارسطو هيجيب نتيجه اكتر من النقاشات الجدليه

---------

قبل تنحى مبارك
لما الضغط النفسى على القوات المتواجدة فى التحرير بلغ اقصاة
بدأت تحصل حالات تمرد فعليه , وبدأت الظباط تنضم للمتظاهرين بشكل رسمى
وبدأت اعدادهم تتزايد بمتواليه هندسيه

هنا فعلا اسقط فى يد قادة الجيش , وامريكا من وراهم , وايقنوا انهم على حافه الهلاك , وحصل اللى حصل يوم حداشر فبراير ..

ساعتها الظباط دى حملت على الاعناق واتعاملوا كأبطال ..

اللى حصل يوم 8 ابريل هو نفس السيناريو , بس بشكل مصغر
فى الايام السابقه تصاعدت وتيرة الانتقادات لتواطؤ ,( وليس تباطؤ ) المجلس
وبدا الكلام عن فسادة وانتماؤة لنظام مبارك يظهر ويعلا
واتحجج الدلاديل والمطبلاتيه ان الجيش كله ورا المجلس العسكرى , وانه مبينفذش اى اجراء فعلى ضد قيادات النظام المباركى لأنه ياحبه قلبى ضعيف ومش قادر عليهم , وهاجموا كل اللى بينتقد المجلس وان كان من جوة الجيش نفسه ,
شويه يقولوا دول منتحلين شخصيات ظباط جيش ,
لأ دول بينفذوا مخططات خارجيه ,
لأ دول قله حاقدة على المجلس وعاوزة توقع بينه وبين الشعب ,
طب لو رجاله صحيح مبيعلنوش عن نفسهم ليه ,
دول جبنا وخايفين يظهروا ,
طب اظهروا للعلن واحنا هنجيب كام الف من مقاطيعنا ونتعهد بحمايتكم ,
طب اظهروا ما لديكم من مستندات تثبت فساد المجلس او لتصمتوا للابد

صح ؟ مش هو دة اللى اتقال ؟؟

طيب , بدايه كدة انا هرد على جمله استفزتنى قوى , موضوع لو عندك مستندات هاتها , طبعا دى جمله الصحفى الشهير بتاع خالتى فرنسا وحاحا وتفاحه .
انا بقا قياسا على نفس منهجك الفاسد فى الاستدلال هقولك :
لو عند حضرتك مستندات تدين صفوت الشريف فلتعلنها على الملأ او لتصمت الى الابد
ثم ياسيادة الكاتب الشهير
لو كانت فعلا المستندات دى تحت ايدك فى عهد مبارك كنت هتجرؤ تعلنها ؟
اعتقد زملائك فى المهنه عارفين اجابه السؤال دة كويس
دى نقطه اعتراضيه مش اكتر ..

النقطه الاهم
هل حضرتك اصلا عندك مستندات تدينه ؟
الاجابه لأ
طيب بتهاجم الراجل ليه ؟ اصمت للابد اذن , وطالما معندكش مستندات يبقا متتكلمش ,
وبالشكل دة اعتقد انك مش هتلاقى حد تتكلم عنه فى الاخر الا عن الغلابه اللى زينا
صح ؟
مش هو دة منطقك ؟
حد فى مصر كلها عندة شك فى فساد صفوت ؟
طب فيه كام واحد فى مصر عندة مستندات تدين الراجل ؟؟

اظن كدة الصورة وضحت
يعنى كلمه ( لو عندك مستندات ) دى كلمه تعجيزيه من الاساس وتدل على سوء نيه مبيت , دا مدير مباحث امن الدوله ايام حسن الالفى , اللى كانت كلمته تمشى على رقبه الالفى ذاته , يوم ما فكر يسجل مكالمه لصفوت اتخسف بيه الارض والشرايط اختفت بقدرة قادر , وبعدين الكلام دة سمعته قبل كدة فيييييييييين ؟؟ اة , واعتقد برضه ان كهنه نظام مبارك كانوا بيتبجحوا بنفس الكلام دة على كل من ينتقدهم , وبيقاضوة كمان , دا على ما اذكر يعنى ,
مش كدة ولا ايه ياثورجى ؟

وافهم منها انك عارف انى صح , وانك غلط , وبتدور على اى سفسطه فارغه تسكتنى بيها وانت نفسك عارف انها غلط

وبعدين اتهمك بالعماله لجنرالات مبارك , تقوم محور الكلام فى الجورنال وتظهرة على انى باتهمك بالعماله للجيش , وترد وتقول : وهل العماله لجيش بلادى الوطنى جريمه ؟! , وتتبعها بتلميح ذو مغزى : اليس افضل من العماله لجيش الدفاع الاسرائيلى ...

لا ياسيد يا محترم
انا بقول المجلس العسكرى الفاسد اللى مبارك عينه , مقلتش الجيش المصرى يانصاب .
فلما سيادتك تحور كلامى مستغلا ان اغلبيه اللى بيقروا مقالك التافه فى الجريدة المشبوهه اياها عمرهم ما دخلوا مدونتى ولا يعرفوها اصلا
يبقا دا ايييييييييييه ؟
كخ

ولما تتهمنى بالعماله لاسرائيل من غير ماتعرفنى حتى ,
يبقا عيب , ومش عاوز اقول كلمتك الخايبه بتاع طلع مستنداتك , ومدونتى بقالها اكتر من سنتين , وتشهد على ميولى وانتمائاتى

ولما اتهامك ييجى فى صورة تلميح , لانك اجبن من انك تقوله صراحه ,
اقولك اهو دة شغل نسوان على اصله , ونسوان لئيمه ووسخه كمان , لان النسوان الصح نفسها متخافش من كدة , ياراجل يامناضل ياثورجى

وبعدين كل شويه تفلق دماغنا بجزيرة القرصايه , والجيش وقف جنب اهل القرصايه و والجيش تحدى رجال الاعمال ودعم اهل القرصايه , والمشير طبطب على اهل القرصايه وجاب لكل واحد فيهم جاموسه عُشر ...

طيب
طنطاوى نزل الجيش القرصايه علشان يرهب الناس ويخوفهم ويخلوا الجزيرة , علشان الحراميه حبايب قلبه وشركاته ينبسطوا ..

انا كداب مش كدة ؟
طيب
بينى وبينك ملفات الفيديو
ادخلوا ياحضرات وشوفوا اهل القرصايه وهما بيودعوا جنرالات طنطاوى بالورود , بعد ما اعلنوا ( دعم ) الجيش لحقوقهم :

http://www.youtube.com/watch?v=LV6Ilvcy-YE

http://www.youtube.com/watch?v=38EXk57sJ6w&feature=related
( كملوة للاخر )


يامراوغ
يانصاب




يعنى عموما كدة
الموضوع مش مجرد نقاش , ومش انك مضحوك عليك ومغرر بيك زى ما ناس فاهمه ..

يعنى انت عارف كويس انت بتعمل ايه , وبتنتخب مناطق الضعف فى منطقك علشان تغطيها بجدليات فارغه تلف للابد فى حلقات مفرغه ..

يعنى انت بتحور كلام غيرك بحيث تظهرة بمنطق الضعف , مستغلا ان قرائك مسمعوش الكلام من مصدرة الاصلى

يعنى انت بتحرض اسيادك فى المجلس العسكرى وبتلوح امامهم بكلامنا مع ضوء اخضر وتصريح مبطن بقبولك انت ودلاديلك اى انتهاكات يقوم بيها المجلس ضدنا وضد اى صاحب رأى

يعنى انت متواطىء ,

يعنى انت عميل ,

نتيجه تانيه غير كدة

----------

نرجع تانى لظباط 8 ابريل , والسادة المحترمين اللى هروهم شتيمه وتخوين :
-قولتوا لو رجاله يطلعوا ويورنا نفسهم
واول لما قالوا انهم هيطلعوا ركبكم ميه عفريت ,
-وقلتوا دول سارقين لبس الجيش
ولما وروكم الكارنيهات غيرتوا الموجه
-هما ايه اللى طلعهم
-هو احنا ناقصين قرف
-مش وقتهم دلوقت
-ما يخفوا يتظاهروا فى ثكناتهم
-اى ظابط جيش ابن..... هنبلغ عنه الشرطه العسكريه ( اللى بهدلت الثوار من اول الثورة الى الان )
-دى مؤامرة والجيش اللى زاققهم علشان يوجد مبرر لفض المظاهرة
-اصلهم هينضربوا بالنار واحنا هنتاخد فى الرجلين ..


طيب
انا هحاول اجمد شحنه الغضب اللى جوايا واتكلم بشكل عقلانى قدر الامكان
اولا
لو المجلس اللى زاققهم عشان يفض المظاهرة
يبقا المجلس مش وطنى ومش بيدافع عن الثورة وبيلتف عليها
صح ولا انا غلطان
مش انتوا اللى بتقولوا المجلس اللى عامل مخطط نزول الظباط للتحرير عشان يوجد مبرر لفض المظاهرة ؟
معناة ايه غير كدة ؟

طيب
موقف الظباط دى يختلف فى ايه عن موقف شومان اللى شلتوة على اكتافكم ؟
شومان ورفاقه انضموا لكم احتجاجا على فساد موجود , والظباط دى كررت نفس الموقف احتجاجا على فساد مازال موجود.
هو انتوا لما كنتوا فى التحرير ايام مبارك كانت مطالبكم ايه ؟
الشعب يريد اسقاط النظام
يعنى النظام , مش مبارك بس

لو كنتوا بتطالبوا باسقاط مبارك فقط يبقا الظباط دى غلطانه لان مبارك يوم 8 ابريل كان مشى خلاص
انما المطلب كان اسقاط نظام مبارك
-ومجلس مبارك العسكرى هو من يحكم مصر الان
-وهو المروج الاول للفتنه بين المسلمين والاقباط
-وهو اللى استقطب الاخوان واستعبطهم واستغلهم ككتله حديد يسحق بها من يشاء من اعداؤة
-وهو اللى اعطى الضوء الاخضر لكثير من السلفيين حسنى النيه , وشجع مشايخ امن الدوله على تحريض جماهير السلفيين لصيد كام عصفور فى وقت واحد
-وهو اللى سخن وحرض السلفيين ضد الكنيسه علشان يبتزها ويستغلها فى دعم النظام الجديد وألا هيعطى لمشايخ امن الدوله الضوء الاخضر ضدها ( لاحظ ما يجرى فى العباسيه حاليا ) ودة نفس اسلوب مبارك القذر .

مش هتكلم عن التعذيب والقتل ولا القبض على الثوار ولا محاكمه الاف المدنيين عسكريا ولا التعريص اللى بيتم ومازل
ولا عن بكابورت العتريص والوساخه الاعلاميه اللى فتحه علينا المجلس , وماسورة المجارى اللى طفحت فوق دماغنا من اعلاميين تافهين وجهله وعملا عاملين شبورة وغبار اعلامى حوالين عنينا بشكل متعمد علشان ندوخ ونتوة عن الطريق ومنحسش باللى بيحصل حوالينا , وننشغل بالفرعيات والتوافه والاشاعات عن الحقايق المهمه , وعشان نصاب بحاله من البله والتشتت الفكرى ومنفهمش حاجه , واللى لسه فاهم صوته يضيع فى النص وسط بركه الخرا دى .

انا خلاص معادش فيا اعصاب اتكلم تانى عن ادله فساد المجلس , والبوستات اللى فاتت فيها الكفايه , واللى مفهمش منها حاجه عمرة ما هيفهم حاجه بعد كدة

-------

الظباط دى نزلت , ووافقت على التضحيه بمستقبلها الوظيفى , وحياتها , وعلى محاكمتها وسجنها , وعلى دخولها فى نفق مظلم يشبه انفاق لاظوغلى ومدينه نصر , ياعالم كانوا حيخرجوا منه امتى , واحياء ولا محمولين ...
وافقوا على كل دة
مش مقابل ان النظام يتغير , لأ , مقابل انهم .. فقط ... يوصلوا لكم صورة .. يوضحوا لكم حاجه انتوا مش واخدين بالكم منها , حاجه انتوا مختلفين عليها ...

متخيل يعنى ايه انسان يضحى بكل شىء لمجرد انه يصحح لك فكرة مغلوطه ؟؟
مقدر كم التضحيه والبطوله دى ؟؟

يبقا منتظر ايه لما ناس زى دى تتعامل بالشكل القذر دة وتتهاجم وتتشتم من ناس كان المفروض انهم اول من يقف جنبهم ؟؟

لو مش عارفين الناس دى عملت ايه , شوفوا التغير الملحوظ فى سياسات المجلس بعد 9 ابريل
, واعرفوا ان كل دة بفضل الناس دى , بجانب المظاهرات الشعبيه الضخمه , بالظبط زى ما مبارك تنحى لما بدأ الجيش رسميا يعصى اوامر قادته وياخد صف الشعب يوم تسعه وعشرة فبراير.

الناس دى متفرقش حاجه عن شومان ورفاقه , بل هما اكثر شجاعه و لانهم خاطروا وضحوا فى ظروف اصعب من شومان بكتير .
الفرق ان شومان اتحمل على الاعناق , وان دول اتشتموا وتلعنوا واترموا فى المزبله.

حاسس يعنى ايه انت تضحى علشان انسان , وفى الاخر الطعنه تجيلك من اللى ضحيت علشانه ..
حاسس بيها دى ؟
تعرف انها مؤلمه اكتر من الطعنه نفسها بمراحل؟
يمكن الطعنه ألمها لا يذكر جنب الم الخيانه
والطعنه مش شرط تقتلك , انما خيانه بالشكل دة , تاثيرها قاتل ومضمون ..

المجلس لعبها صح , وضرب المعارضه داخل الجيش فى مقتل , ضربه قاتله , مكانتش هتقدر عليها كل اسلحته , واجهزته الامنيه مجتمعه .
المجلس وصل الرساله لظباطه , اهو , مش دول اللى بتضحوا عشانهم , اهم , باعوكم فى اقرب محطه , اشبعوا بيهم بقا , عشان تعرفوا ان اللى يقف فى صف الشعب عمرة ما يكسب ابدا ...

بعد كدة بقا , لما المجلس يقلب عليكم ويكشر عن انيابه , والضرب ينزل فوق دماغكم وبلا رحمه , متزعلوش , متقولوش حرام , دا انتوا اخواتنا , اقفوا جنبنا .....
عارفين ليه ؟
عشان هما جربكوكم قبل كدة , وخذلتوهم اشر خذلان , وعلشان قلتوا لهم بصريح العبارة ان اللى يتسند عليكم مسنود على حيطه مايله ...
متلوموهمش ساعتها
لوموا انفسكم , مش حد تانى ...

الشعب المصرى غلط اكبر غلطتين فى حياته ,
الاولى لما الميدان اتقلب كرنفال يوم حداشر والناس مشيت منه ونست ان هتافها كان اسقاط النظام مش اسقاط مبارك بس ...

الثانيه وهى لا تقل خطرا عن الاولى , هى الموقف المشين اللى حصل من ناس كتير يوم 8 ابريل ..

الغلطه الاولى ضيعت فرصه لم تتكرر لشعب فى التاريخ البشرى كله , الشعب المصرى يوم حداشر كان عندة من القوة ما يمكنه من قلب كل الموازين , الا انه ( مع الاسف ) اكتفى بخطاب ( تخلى ) هزيل من الحاكم , مش كدة وبس , لأ وكمان مقرون بحكم عسكرى بواسطه اهم رموز عصر مبارك العسكريه ...

فهمتوا معنى كلمه هيكل , ان المصريين عاملين زى اللى طلعوا القمر وطلبوا كيلو كباب ؟؟

الغلطه دى احنا بندفع تمنها من يوم حداشر الى الان , ولسه ...


الغلطه التانيه , ضربت الحس الوطنى لكل الشرفاء اللى فاضلين فى اجهزة الدوله الحيويه والهامه فى مقتل ( وهما مش قليلين على فكرة , ومتابعين كويس بس مترددين يتدخلوا ), الناس دى تدخلها الفعلى كان هيفرق كتير قوى , وهيرجح كفه الشارع على الفور , وبدون دماء , بس احنا , وللاسف , وصلنا رساله قويه للناس دى , وعلى لسان الشعب , بتقول النظام هو الابقى لكم , دعونا وشأننا , احنا اغبيا وهنفضل كدة , واللى هيحاول يساعدنا هنشدة معانا لتحت

انتقل السادة المطبلاتيه للتردد التانى وقالوا دول مش ظباط ,
طيب يعنى لو ظباط فعلا هتصدقوهم , اعتقد اة , دة المفهوم من كلامكم

طيب ادى الكارنيهات اهى
الكلام اتغير تاااااااااااانى واسلوب الهجوم اختلف

ننتقل بقا لسيل من السفاله والبذائه والشرمطه وقله الادب
انا شخصيا لو تصادفت مع حد من الناس دى فى الشارع وقال عليا الكلام دة انا هطلع ميتين اهله
فما بالك لما ييجى من شخص انا كنت متوسم فيه الخير وبتضحى عشانه ومنتظر دعمه ؟!!

الظباط دى مش خونه ولا عملا , واعتقد يعنى انه محدش هيضحى بسمعته وبحياته وبمستقبله وببيته علشان مؤامرة ..

الظباط دى مش كلاب ضاله , تنضرب بالرصاص فى الشارع واحنا ولا فى دماغنا , وكل اللى يهمنا اننا منتاخدش وسطهم
دى سفاله وقله ادب ونداله
اعتقد يعنى انه لو انسان فى قلبه ذرة رحمه وشاف طفل بيقتل كلب ضال فى الشارع مش هيسكت
ودول مش كلاب , دول بشر , وناس شريفه , ومثال للوطنيه والتضحيه ..

ايه ؟
بتقول ايه ؟
الظباط دى ابرياء وسذج واتصرفوا تصرف فى توقيت خطأ وهما مش عارفين عواقبه ؟
اة
هما فعلا ابرياء وسذج
انهم امنوا بفئه من الناس زى حضرتك ياسيد , وزى حضرتك يامدام , فعلا هما غلطانين , كان المفروض يكفروا بالشعب على طول الخط ....

وفعلا , الجيش مضربش رصاص حى خالص يومها , بامارة مكالمه الجزيرة اللى عالهوا وفضلت اكتر من ساعه وسمعتوا فيها صوت الصراخ والرصاص اللى زى المطر

والرصاص كان فشنك
فعلا بامارة الاخرام اللى موجودة فى الحواجز الحديد اللى عالارصفه .

وفعلا
ابراهيم كامل هو اللى ضرب نار وهو اللى طلع المدرعات من مخازنه وهو اللى جاب السلك الشايك , وهو اللى لزق بادج الشرطه العسكريه على عربياته الكاكى وهو اللى لبس بلطجيته لبس جيش وخلاهم يضربوا الناس , وهو اللى لبس كتافات لوا ودخل يقل ادبه عالمتظاهرين علشان يقبض عالظباط من وسطهم .

صح فعلا , كل دة كلام مظبوط ميه الميه ............

--------

وبعدين يعنى ايه ما يروحوا يتنيلوا يتظاهروا فى ثكناتهم !!
ازاى يعنى
هما عساكر امن مركزى هيتظاهروا فى المعسكر علشان يزودوا لهم رغيف جرايه فى الغدا ويدوهم ساعتين راحه العصر ؟!

وبعدين هو ايه معنى كلمه ( مظاهرة ) لغويا ؟؟؟
مظاهرة دى من الظهور , يعنى اعلان , فكرة التظاهر فى اساسها معناها اعلان فئه معينه قلت ام كثرت , عن رأى , واظهار ذلك على الملأ ...

الناس دى لو كانت اتظاهرت فى وحداتها مكانش حد فى مصر هيسمع عنها حاجه , وكنتوا انتم نفسكم ياللى بتقولوا ما يخفوا يتظاهروا فى وحداتهم , كنتم برضه هتهاجموهم , وتقولوا دول اغبيا وعبط وعاوزين رغيف جرايه زيادة ..

الناس دى قدمت نفسها كبش فدا عشانكم , افهموا يرحمكم الله ..

وبعدين ميدان التحرير مش حكر على حد , ومش ملك لفئه فى مصر دون غيرها , ومش من حق اى كلب يقول مين اللى يدخل التحرير ومين لأ .

اهو مظاهرات الظباط بقت من اجل مطالب فئويه
والعمال برضه مطالب فئويه
وكل فئه فى المجتمع يبقا اعتصامها وتظاهرها مطالب فئويه
وعلى كدة بقا يبقى المصرى اللى بيتظاهر عشان جعان دة عندة مطالب فئويه
واللى زعلان علشان انضرب فى القسم برضه مطالب فئويه
واللى عندة مشكله برضه مطالبه فئويه ...

وبكدة تبقا الثورة كلها ثورة فئويه
والمطالب الفئويه تضر بالثورة
اذن الثورة ضارة جدا بالثورة

ياسلام

لو بصيتوا فى الناس اللى نزلت الشارع يوم 28 هتلاقوهم كل دول
الثورة اصلا ما هى الا تجمع شامل لكل فئات المجتمع وتوحدها حول مطالب عامه تحقق لهم مطالبهم الفئويه ..

خطورة المطالب الفئويه فى شىء واحد بس
هو انها تكتفى بالالتفاف حوالين مطالبها وتنفض بمجرد تحقيقها او الوعد بتحقيقها , ودة فى حد ذاته خطر على الفئات التانيه لأنه بيشكل تخلى عنها فى وقت حرج ...

دة خطر المطالب الفئويه , ان انا اقول عايز رغيف وانت تقول عاوز قميص ونقول نتحامى فى بعض لغايه لما انت تاخد قميصك ونا اخد رغيفى , واتنين احسن من واحد , وبعدين اجى انا بعد ما اخد رغيفى اتخلى عنك واقول لك باى باى , انا اخدت اللى عاوزة , اولع انت بجاز ... ( زى ماحبايبنا الثوار عملوا مع ضباط 8 ابريل )

دى المشكله

انما لما كل عمال مصر , وكل فئات البلد , تطالب فى وقت واحد بمطالب ( تخصهم ), دة بيشكل ارباك للنظام , وهدم للنظام من القاعدة , يعنى النظام كله هينزل كوم تراب , ودى فى حد ذاتها ثورة , وتكفل تقويض النظام بشكل تام , بعكس الاسلوب الخايب بتاع احنا نشيل الراس وكفايه على كدة ...

علشان كدة المجلس بيركبه ميه عفريت من اعتصامات العمال وطلبه الجامعه , مع ان مطالبهم فئويه , بس لما نحط المطالب دى جنب دى جنب دى , نلاقى الصورة فى النهايه هو تغيير جذرى فى مصر ..

ماهو مافيش جهه ولامؤسسه مهما كانت قوتها ولا حرفيتها هتقدر تتوصل لموطن الداء فى كل شركه او مصنع او كليه او وزارة وتشيله بمهارة ( دا لو افترضنا نزاهتها ) , انما اهل الشركه او المصنع او الكليه او الوزارة دى هما ادرى بموطن الداء والاسلوب الامثل للعلاج ,, دا على فرض ان المؤسسه دى شريفه وغرضها الاصلاح فعلا , مش بتصطاد فى الميه العكرة ...

اسقاط مبارك كان مجرد بدايه و باب اتفتح علشان نصلح كل حاجه بايظه , باب قدامنا بعدة طريق لازم نمشيه , فلما ييجى حد يقول لنا لأ , بلاش تمشى , كفايه انك فتحت الباب , انت كدة وصلت خلاص , يبقا كداب , لان طول ما انا واقف عالباب ومش راضى ادخل , ممكن فى اى لحظه الباب يتقفل تانى فى وشى بسهوله ...

واعتقد يعنى ان مطالب الظباط الى نزلت التحرير هى هى نفس المطالب اللى الناس طالبت بيها فى الاول , يعنى مش مطالب فئويه , يعنى محدش منهم طلع وقال انا عاوز ازود مرتبى او عاوز شقه وعربيه ...., وكمان اعتقد برضه ان محدش عندة استعداد يموت علشان زيادة فى المرتب او شقه وعربيه .. مش كدة ؟

سؤال تانى , هو الموقف القانونى لهشام طلعت مصطفى فى قضيه الوليه اللى اندبحت دى ايه ؟
شريك فى الجريمه صح ؟
فاعل ومتهم اساسى , صح ؟
محرض صح ؟
اخد اعدام زيه زى القاتل , صح ؟

يعنى انا لما احرضك على جريمه اذن فانا شريكك .
يعنى لما احرض المجلس العسكرى على عملته المنيله يوم 8 ابريل واديله غطاء , وادعمه , وخصوصا مع مراعاة ان فيه قطيع من البقر ماشى ورايا بدون وعى , ونا بستغل ثقل القطيع دة وبحشدة بدورة ورا المجلس ..

اذن فانا شريك اساسى فى الجريمه اللى حصلت , وايدى متعاصه دم , زيى بالظبط زى الكلاب اللى نزلت تنهش فى لحم المعتصمين ..

يعنى اللى حرض الشرطه العسكريه والمجلس ضد ضباط الجيش شريك فى الجريمه ويدة ملطخه بالدماء .
يعنى مكتب الارشاد اللى كان راس حربه فى التشويش على الظباط وتخوينهم يوميها يدة ملطخه بالدماء .
يعنى لاعقى البيادات اللى غطوا موقف المجلس عن طريق مقالاتهم فى الايام التاليه وخففوا من وقعه وموعوة , ايديهم ملطخه بالدماء ..

ولو نظرنا لكل اللف والدوران اللى فى كلام الناس دى , هنلاقى انهم بيدوروا على اى حاجه يدينوا بيها الظباط ويدافعوا عن المجلس وخلاص , وكل ما يفشلوا فى نقطه يحولوا على نقطه تانيه ...

يعنى الناس دى لن تخرج عن نوعين
اما خونه واما بلهاء لدرجه خطيرة ..
انا بالنسبه لى الوضع مش هيفرق
لان الصديق الابله اخطر من العدو
هما الاتنين فى خانه واحدة
هما الاتنين بيشكلوا خطر داهم على البلد دى
هما الاتنين ايديهم ملطخه بالدماء
هما الاتنين مش عاوزين يفهموا ورافضين يفهموا و بيجادلوا من باب العناد وخلاص
والنوعين دول هيترموا فى مزبله التاريخ قريب ان شاء الله

بس كدة
انا معنديش كلام اقوله تانى فى الموضوع دة , ومش ناوى اكرر كلام فيه تانى , ولا ناوى اعلق على تصرفات الاشكال الوسخه دى فى بوستات بعد كدة .. لان الكلام معاهم وعنهم بلا طائل , وسفسطه فارغه , وشغل مناورات , ماهو متقنعنيش مثلا اروح اتناقش مع واحد عايز يزرع مكرونه ومصر على انها هتطرح شجرة غطيان حلل .
الرحمه حلوة برضه , والعقل نعمه , ربنا امرنا نحافظ عليها ونصونها , مش نحرقها مع دول ..

------

اسف على ان الموضوع والافكار مفككه , بس انتوا مش متخيلين حجم الغضب اللى بينتابنى لما افكر فى الموضوع دة , فارجوا المعذرة .
وارجو المعذرة تانى على حدة كلامى , انا مبعرفش اذوق الكلام , خصوصا عندما يتعلق الامر بارواح وتضحيات ناس شرفاء ...


على اى حال الصورة مش سودة , وضربات المجلس المتتاليه مقتلتش الفئات الكويسه والحمد لله , لكنها اذتها جامد , وعلى اى حال انا شايف المستقبل القريب ضبابى , انما المستقبل الابعد احسن بكتير باذن الله .

انا قسمت الناس ل3 فئات حسب نظرتهم للموضوع:

الفئه الاولى :
الفئه البلهاء قصيرة النظر اللى فرحانه بالمجلس ومتخيله ان الامور ماشيه فل الفل ولا احسن من كدة

الفئه التانيه :
الفئه بعيدة النظر اللى بتنظر فيما وراء الاحداث , ومدركه كويس الوضع اللى احنا فيه دلوقت , وبناء على استقرائها للواقع فهى مش متفائله من المستقبل .

الفئه التالته :
الفئه الابعد نظرا , واللى بتتخطى استقراء الاحداث الجزئيه وبتنظر للتاريخ البشرى ككل , كوحدة واحدة , صيرورة ثابته ومعروفه , ودول متفائلين , متفائلين جدا , متفائلين اكتر مما تتخيلوا .

الفئه الثالثه اصح فى رؤيتها , والفئه الثانيه اصح فى تشاؤمها , لاننا مع الاسف بشر , وبنعمل للعامل الزمنى الف حساب , وتفاعلنا معاة وتأثرنا بيه كبير جدا , كما اننا مع الاسف , لا نملك سوى جسد واحد ..

انا اعتقد ان دوله الظلم فى البلد دى لن تستمر , وان نجحت فى امتصاص الثورة تماما , وقامت من جديد , فقيامها دة لن يستمر طويلا , مش هيلحق يقوم اصلا باذن الله , لان الموجه الجايه هتكون طفرة متقدمه كما ونوعا عن موجه 25 يناير ..

انا متشائم لانى بشر , لانى ضعيف الايمان , لانى اشعر كثيرا بالالم , لانى عجول , لانى هلوع .
بس الجزء اللى لم يتلوث فيا , متفائل
متفائل جدا
وعمرة ماشك فى عداله ورحمه ربنا....


واسف مرة تانيه على البوست الضعيف المخيب للامال دة
انا عارف انه دون المستوى
بس اعتبروة فضفضه
مجرد فضفضه ..

الخميس، 7 أبريل، 2011

سويتش مجلس ( امناء الثورة ) العسكرى




البوست دة يعتبر امتداد للبوست السابق , ياريت اللى مقراهوش يقراة الاول قبل ما يقرا البوست دة ...


يبدو ان السادة حبايب المجلس قد اُسقط فى ايديهم وقاموس السب والالفاظ البذيئه اللى عندهم خلص , فلجأوا لنقل الساحه من الفضاء السيبرى الى صفحات الجرائد , مستغلين إنتشار الصحافه الورقيه فى اوساط البسطاء , وهو ما يعبر فى حد ذاته عن ضعف وقله حيله

الاخ بلال فضل المتحدث الرسمى للمجلس واللى هرانا وفلق دماغنا بخصوص المعلومات الخطييييييييرة والمؤكدة عن خطه ( إجهاد ) الثورة , المخططات السريه لعمليات الاغتيال , وصدعنا بمصادرة السريه ومعلوماته المؤكدة

طيب

للعلم
المجلس العسكرى مانع نشر اى شىء يمس الجيش الا بعد الرجوع لادارة الشئون المعنويه , علشان ينشروا الكلام اللى على مزاجهم بس , طيب , لما هما معندهومش حاجه يخبوها , ولو مش على راسهم بطحه , بيعملوا كدة لييييييه ؟

طبعا واضح قوى ان بلال فضل داخل مزاجهم , وكل ربع ساعه يكلموة بالتليفون

طيب

راجعوا مقالات بلال فضل اعتبارا من يوم حداشر فبراير الى الان
وشوفوا ردود فعله تجاة كل المستجدات و بدايه من اول الكلام عن المجلس العسكرى , ثم تعذيب الناشطين , وخلافه .
هتلاقوا ان كلامه مذبذب ومتضارب بشكل كبير , هو نفسه مش ثابت على حال ولا كلمه
طيب
دة لا يدل إلا على .......... قولوا انتوا بقا .

بدايه الاخ ظرفنا فى مقاله الاخير بكدبه من العيار التقيل , ادعى ان الفيديوهات عاليوتيوب بتقول ان شومان محتجز فى مستشفى وبيتعذب , وان شومان اتصل بنوارة نجم وقال لها ان الكلام دة لا اساس له من الصحه ..

طيب
بدايه , محدش جاب سيرة شومان ولا قال انه بياخد حبوب هلوسه فى الفيديو , كما زعم الاخ بلال , الكلام كان عام ومحددش اسم معين , كما ان الكلام دة اساسا كان اتقال فى البدايه على صفحات فى الفيس بوك عن مقدم مخابرات حربيه محتجز بمستشفى المعادى من اكتر من اربع شهور

تانى حاجه الكلام عن احمد شومان جه عالتويتر من شخص يطلق على نفسه ظابط جيش هو اللى قال الكلام دة عن احمد شومان , واتقال ان ناس تعرفه هى اللى كلمت مراته وانها نفت الكلام دة , والناس دى بلغت الكلام دة لنوارة , يعنى مش شومان اللى اتصل بنوارة , على اى حال انا شخصيا معنديش اى معلومات عن شومان ولا ادعم او انفى اى كلام اتقال , انا بس بشغل عقلى..
والاخ ظابط جيش دة هو وحدة المسئول عن كلامه , ولا داعى لخلط الأوراق , كما انه شخصيا قال انه مالوش اى علاقه ولا صله بعمر عفيفى

لما الاخ بلال يكدب علشان يفند كلام اتقال ويطعن فى مصداقيته , دة يبقا اسمه ايه ؟
ليه بتكدب يابلال ؟
هتقولى انك مشفتش الفيديوهات ؟

طب يصح ؟
ينفع راجل واعى وثقف زيك , يحكم على حاجه هو مشافهاش ؟ وبمجرد السمع ؟ مش كدة وبس , لأ وكمان ينشر عنها مقال فى جرنال ؟
اسمى دا ايه ؟
انعدام مسئوليه ؟

طيب
انا ,
بتاع التعليم المباركى , عرفت موضوع الفيديوهات دى من اول ما نزلت , بس متكلمتش عليها الا امبارح بس لانى فعلا مقدرتش اشوفها الا امبارح , ولما نزل فيديو تالت , نزلت تحديث بخصوصه
ومش بتكلم على حاجه الا لما بشوفها
ولما بتسئل عن شىء اجهله , مبتكسفش انى اقول ( معرفش )

شفت بقا انا جاهل وعقلى على قدى ازاى ؟؟


بلال بيقول ان عصام شرف قال له ان ملف التعذيب ( اللى سبق نفي حدوثه من قبل الكثيرين ) بيتحقق فيه بجديه شديدة
طيب
مش من باب اولى انكم تعلنوا التحقيق دة وتغطوة اعلاميا , خصوصا علشان خاطر الشارع اللى اصبح مليان بلبله وبوجه عام غير متعاطف مع المجلس الاعلى ؟
مبتعملوش كدة ليه ؟
وبعدين مش طلع ستين الف واحد صدعوا دماغ ابونا ان مافيش تعذيب حصل , منها تصريحات رسميه لقادة فى الجيش , وقالوا ان الفيديوهات دى متفبركه , وان الناس دى بتوع الثورة المضادة ..
رجعتوا لحستوا كلامكم تانى ليه ؟
ولما انسان بيكدّب حاجات حصلت فعلا عن عمد , دة يبقا اسمه ايه ؟؟

ما علينا

كمان ممدوح شاهين بيتصل ببلال ( واضح ان بلال اصبح مصب اخبارى عند قادة المجلس العسكرى ) ممدوح شاهين ياعينى , بيلعن سوء الفهم اللى عند البعض وان الناس فهمت مداخلته غلط , وقال فى مقال بلال الاخير :
طبعا لم يخطر فى بالى ولو للحظة إنى أقارن الجيش المصرى بأى جيش تانى.. أنا عارف كويس جدا إن ده جيش الشعب.. الشعب هو اللى من ضرايبه بيدفع مرتباتنا وبيشترى معداتنا وإحنا أقسمنا على الولاء للشعب وحمايته..

طيب قارنوا بين كلام ممدوح شاهين دة وبين مداخلته التليفونيه مع بلال , مداخلته فى البرنامج ايام ماكان الشارع نايم , وتغييرة لموقفه و(لحسه ) لكلامه تانى دلوقت لما الناس بدأت تفوق , نفاق دة ولا مش نفاق؟ كذب ولا مش كذب ؟ نصب ولا مش نصب ؟؟

احكموا انتوا عليه , وعلى الاخ بلال اللى تحول ( لبوق اعلامى ) لمثل هذا الهراء ..

ممدوح شاهين بيقول انهم شغالين فى مباحثات مع القانونيين اساتذة الجامعه ( رجاله مبارك اللى طلبه الجامعه عامله مظاهرات علشان تشيلهم )
طيب ياسيادة اللوا , انت سايب شباب الثورة وماسح بيهم الارض فى السجون والمحاكم ورايح تكلم نفسك وتقولى انا بعمل مباحثات مع اساتذة الجامعه !!

برر موقفه للاعلان الدستورى ( القذر ) بانه مش عاوز يسيب البلد فى فراغ دستورى .

الكلمه دى انا سمعتها فيييييييين قبل كدة ؟؟

بيعاتب الشعب وبيقول انه كان بيتكلم معاة بعشم وبقلوب مفتوحه , ياسلام , تطعن وتغلط فى ناس محترمه ولها تاريخها وتتحدى شعب وتهددة بمصير ليبيا وبعدين تقول اصلى كنت بتكلم بعشم وقلب مفتوح ؟!!
امال لو كنت بتتكلم بغل وبقلب مقفول كنت قلت ايه ؟؟؟

انا مش بغلّط ممدوح شاهين بس
بلال فضل يحمل ما يحمله ايضا من إثم , لانه نشر فى مقاله كلام سفيه ومستفز زى دة

ممدوح شاهين بيقول ان سبب تأخر المحاكمات , انهم مش عاوزين يعملوا محاكمات عاجله واستثنائيه علشان المجتمع الدولى ممكن ميعترفش بشرعيتها ونفقد اموالنا اللى برة

طيب ياسيادة اللوا
لما انت خايف تعمل محاكمه استثنائيه وعاجله لهذا السبب , طب ليه ما حبستش مبارك وباقى شلته بالكامل من يوم حداشرفبراير , على ذمه تحقيق مفصل ومحاكمه مطوله ؟
علشان تبقا شرعيه زى مابتقول
يعنى لو انت فعلا عاوز كدة تقوم تطلقهم لغايه دلوقت ؟؟
طب انت لو كنت قبضت عليهم من يوم حداشر كان زمان المحاكمه ( المطوله ) شغاله بقالها شهرين , وهتديك الشرعيه اللى انت عاوزها , طب معملتش كدة ليه ؟؟
وهل انت على درجه من السذاجه انك تعتقد ان الناس دى لما تكون طليقه لمدة شهرين مش هتهرب فلوسها لاماكن آمنه وتدمر اى مستند يدينها ؟
ياشيييييييييييييخ , دا الموظف المختلس اللى سارق الفين جنيه بيحتجز بتعليمات النيابه من اول التحقيق لاخرة , والسبب بيكون ( حتى لا يعبث فى الادله او يؤثر على الشهود ) دا الموظف الغلبان , فما بالك بمبارك وبطانته ؟؟

دا كلام عبيط واستخفاف بعقول الناس , واستفزاز لعقلياتهم , واللى ينشر كلام زى دة ويروجه , اما عبيط واهبل واما متامر , ملهاش خيار تالت على فكرة ..

اللوا شاهين بيقول على لسان الاخ بلال :
عمرنا ما هنتوقف عن احترام الآراء المختلفة معانا طالما بتعبر عن رأيها فى ظل الالتزام بآداب الحوار

اة , ماهو باين فعلا من الحجر على الصحافه ومحاكمات الناشطين ...

انا دلوقتى بس عرفت اشمعنى بلال فضل اللى المجلس العسكرى مبيحجرش على مقالاته , واشمعنى بلال فضل بالذات اللى كل قادة المجلس نازلين مكالمات وحوارات صحفيه معاه هو بالذات , واحكموا انتوا .


بلال فضل لما اتكلم عن الفيديوهات قال :

تلك النغمة الكريهة التى يرددها البعض بحماس به حسن نية دون أن يُعمِلوا فيها عقولهم قليلا، أعنى نغمة أن الجيش يقوم بعمل تمثيلية بالاتفاق مع مبارك، ولا أدرى كيف يصدق إنسان عاقل ومنصف مثل هذا الكلام بل ينشره على الآخرين دون أن يفكر فيه أولا. ستسألنى: وليه لأ؟، سأجيبك: هل تقرأ الصحف هذه الأيام؟،

اة صحيح يابلال , ليه لأ ؟؟ جاوب عليا وقولى ليه لأ ؟؟

إذا كنت تقرؤها وتصمم على ترديد هذا الكلام فلا أظن أننى أحب إضاعة وقتى معك

ايه ياعم , ماجاوبتش وقلت ليه لأ ليه ؟؟؟ ايه معنى السطر السابق دة ؟ وقفلت الموضوع قبل ماتفتحه ليه ؟
هههههههههههههههه

موضوع بدلات الولاء اللى بلال ونوارة محموقين عليها قوى , حقيقه واقعه مؤكدة , يعرفها كل ظابط جيش زى مايعرف بالظبط معلومه ان رتبه العقيد تعلو رتبه المقدم , ولو حد نفاها هيكون اما خايف او مكسوف او ضايع او متواطىء ..

بلال بيشير الى ( الاصابع الخارجيه ) نفس المصطلح اللى مبارك قرفنا بيه طول عمرة . لا تعليق .

بلال بيقول ان اسرائيل مش سعيدة بالثورة , دا صحيح .
بيقول ان عدوها الاول هو الجيش المصرى , دا برضه صحيح
ولكن ....
الجيش المصرى , مش المجلس العسكرى , تفرق كتير

ولما اسرائيل يااخ بلال مش عاجبها المجلس العسكرى ومش عاجبها طنطاوى وعنان , ليه مسألتش نفسك ايه السبب اللى خلا مبارك الغير وطنى والعميل لاسرائيل يحافظ على وزير الدفاع دة لمدة عشرين سنه فى منصبه , وكمااااان يسلمه سلطاته بعد تنحيه ؟؟؟؟

رد؟


موضوع الاخ ( ظابط جيش عالتويتر ) محدش يعرف عنه حاجه , انا شخصيا حاولت اتداخل معاة اكتر من مرة ووجهت له اكثر من سؤال وهو تجاهل ورفض الرد ..
كونه فعلا ظابط جيش او مدعى , فدا ميغيرش حاجه من كلامنا , وكل انسان مسئول عن كلامه وتصريحاته , ومش عشان شخص ما قال كلام اتضح انه غير صحيح , اما بدافع الخطأ والتسرع او بنيه اخرى سيئه , فمش من المنطقى انه يبقا كل المحسوبين عليه كدابين
مش كدا ولا ايه ياعم بلال يامتعلم يامتنور يابتاع المدارس والمنطق ؟؟

عمر عفيفى
عمر عفيفى
الراجل دة اتعمل فزاعه زى الاخوان والسلفيين بالظبط
كل ماحد يقول حاجه والطرف المقابل ميعرفش يرد , يقوم ناطق كلمه السر , ( عمر عفيفى ) زى كلمه ( جزر ) بالظبط ..

قررررررب قرب قرب ,
بعد فزاعه الاخوان والسلفيين ,
حاليا بالاسواق ,
فزاعه.....
.... عمر عفيييييييييفىىىىى

اشترى فزاعتيييييييين واربح عليهم فزاعه تالته هديه
اسعار خاصه لناشطى الانترنت وعشاق المجلس العسكرى
سعر المنتج ثابت
سعر الشحن ثابت اينما كنت ...
..

ياعم بلال الله يهديك , مالنا احنا بميتين ام عمر عفيفى , مال عمر عفيفى بالفيديو , عمر عفيفى مسئول عن نفسه وعن كلامه وعن مواقفه , ولو هحاسبه هحاسبه على دة , مش علشان شخصه , وحتى لو عمر عفيفى اتكلم , هو انا بقيم الكلام ولا بقيم اللى بيقوله ؟
لو الموضوع كدة يبقا المفروض نرفض من الاول اى كلام يتقال من جنرالات مبارك , مش دول اللى مبارك عينهم والتقارير الامنيه اياها اشادت بيهم ؟

صح ولا غلط يابلبل ؟


بلال بيدعوا الناس المعارضه للمجلس برة مصر انهم يرجعوا مصر وانه هوا واصدقائه الناشطين هيحموهم
ياشيخ
كنت حميت ثورتك اللى انت عمال تبطط فى امها من شهرين ,
كنت حميت دماغك من غسيل المخ اللى شغال جواها اللى ينور بواسطه المجلس


بلال فضل غلب حمارة فى اخر المقال ووصف معارضيه فى الرأى بانهم ( ضحايا التعليم المباركى ) ودة فى حد ذاته يعتبر سب وقذف ضمنى وغير مباشر

طيب ياعم بلال
هو سيادتك خريج هارفرد؟
طب ما انا ممكن اقول على سيادتك برضه ( ضحيه التعليم الساداتى ) اللى ميتخيرش عن المباركى, دا على فرض انك ملحقتش مدارس مبارك .. مش كدة ولا ايه ؟؟

وبالمناسبه ,
اقترح عليك تغيير اسم عامودك من ( اصطباحه ) الى ( سويتش المجلس الاعلى )
صدقنى , هيكون متناسب اكتر مع المضمون .


مالك يا بلال , قول , كلمنى , افتحلى باب قلبك يا اخى , هو فيه ( ضغوط ) خارجيه عليك ؟
ولا فيه ( ضغوط داخليه ) من عفاريت العلبه واشاكيف النظام وانت مش قادر تتكلم ؟
رد ؟
دا انا انسان
زعلان
زعلان

ياصحفى يامتعلم
يامتنور يابتاع المدارس
يابتاع الافلام الهادفه ام مضمون

------------


انا مش فاضى كل ما يطلع واحد بكلمتين أعمل له بوست ارد عليه , الحق بيّن والباطل بيّن , اوزنوا الكلام بعقولكم واوعوا تنساقوا لسياسه القطيع اللى المجلس بيروج لها اليومين دول , عن طريق استغلال اسماء مشهورة ولامعه بغرض خداعها واستغفالها , علشان يسوقوا كل معجبيهم وراهم كالاغنام بعد كدة

والله الموفق والمستعان ..

هااااااااااى ..... إنت


شوفتوا .. مش قلنالكوا ... علشان بس تصدقونا , وتعرفوا اننا صح , اهم , الكلاب والعملا كلهم سكتوا , والحق ظهر وبان , علشان لما نقولكم انهم بيحاولوا يعملوا فرقعه علشان يحموا الثلاثى المرح ويحبطوا المليونيه , علشان بس تسمعوا كلامنا .....

الاخوة الغارقين فى حب المجلس الاعلى بينتظروا يوم الجمعه بفارغ الصبر علشان يدخلوا عالنت بالليل ويرزعوا المقطع اللى فوق دة ...

الفيديوهين اللى قالبين بيه الدنيا ومصدعين دماغ خلق الله عليهم من كام يوم , واللى اشتعلت بسببهم حرب البسوس الالكترونيه , انا شفتهم , لسه شايفهم دلوقت حالا , لاول مرة , ودة حكمى عليهم :

اقسم بالله العظيم
اقسم بالله العظيم
اقسم بالله العظيم
ان الكلام اللى اتقال فى الكليبين دول مافيهوش حرف واحد غلط او منافى للواقع , وانا اشهد امام الناس وامام الله على ذلك , شهادة يحاسبنى عليها ربى يوم القيامه ...

وشهادتى دى من باب ان الساكت على الحق شيطان اخرس , ونا معنديش استعداد اتحمل مسؤليه كتمان الشهادة امام الله وامام ضميرى , خصوصا فى الظرف الخطير اللى احنا عايشين فيه دلوقتى

عدا .........

عدا كذا نقطه
النقط دى انا مش بنفيها او بأكدها , فقط ومن باب الامانه اود ابداء بعض الملاحظات عليها :

اولا : كينونه او ماهيه الشخصين اللى ظهروا فى الكليب دة , انا لا اجزم انهم ظباط جيش .. ولا انفى ايضا , بس لو نظرنا للأمور بعقلانيه , فهل من المنطقى ان يظهر شخص مدنى فى كليب على الملأ وينتحل شخصيه ضابط جيش , ويعلن عن اسمه وبياناته , لانه فى الحاله دى من السهل جدا التعرف عليه بواسطه زملائه , يعنى لو هو منتحل فعلا مكانش ذكر اسم او بيانات او حتى سلاح , لو مدنى ميوقعش نفسه فى المطب دة ..

ازاى ياعم ! دا العكس هو المنطق , هو فيه ظابط جيش يفضح نفسه كدة ويظهر بصورته واسمه ؟! مش خايف ؟!

وكونه قال بياناته مش مشكله , لان الوضع مش هيختلف معاة , مجرد ان صورته ظهرت , هيكون من السهل القبض عليه , بصرف النظر عن كونه ذكر اسمه او بياناته من عدمه

علشان الناس اللى مستفزة قوى من انه قال بياناته

عموما

اقول انه فيه فى ذهنى احتمالين , الاول انهم مقيمين فعلا حاليا خارج مصر , والثانى انهم عندهم جرأة تصل الى حد الجنون , او ثقه مطلقه بنجاح التحرك اللى بيدعوا الضباط اليه .... وقد يكون فيه سبب ثالث بعيد عن ذهنى

وكلا الاحتمالين لا يسىء اليهما ولا ينتقص من مصداقيه كلامهما
لان فيه ناس بتبنى نقدها على محور انهم برة مصر !!!
يعنى هو اى حد برة مصر لازم يكون خاين وعميل لامريكا وابن كلب متآمر ؟!!!!

الا هو الاتهام دة احنا كنا بنسمعه من مييييييييين قبل كدة ؟؟؟؟؟؟؟؟

وعلى اى حال , العقل والمنطق يلزمنا بفحص المادة نفسها بدلا من الجدل العقيم حول الاشخاص , وكل واحد بيفكر على قد عقله .

ثانيا : الكلام عن ان احمد شومان محتجز فى مستشفى عسكرى
الكلام دة الله اعلم بيه
انا مقدرش اقوله او انفيه
لانى معنديش علم بيه الصراحه
فيه شخص على التويتر بيقول انه ظابط جيش
وقال نفس المعلومه دى
ساعتها انا كتبت تويته بتقول : فين شومان ياطنطاوى ؟
ولما الناس سألت قلت انه فيه فلان بيقول كذا
تانى يوم الصبح حد بعت لى وقال انه شافه قريب فى مطار شرق
سالته امتى بالتحديد
فقال انه قريب ( مش فاكر بالظبط قال امتى )
بعدها ناس قالت انها كلمت مراته وقالت انه بخير
قمت كتبت تانى تويته ان ناس قالت انها كلمت مراته اللى قالتلهم انه بخير

اكتر من كدة معنديش علم , ولا عندى ( مصادر مؤكدة )

غير كدة انا اشهد ان كل اللى اتقال صح

----------

انا مش هحلل مضمون الكلام لانى حللته قبل كدة فى كذا بوست على مدى الشهرين تلاته اللى فاتوا , الناس اللى بتزور المدونه لاول مرة تقدر ترجعلهم , وصدقونى , لو قريتوهم , هتوصلوا لقرار , وهتخرجوا من حاله الحيرة والارتباك اللى انتوا فيها , اما مع كلامى , واما ضدة ..
وفى كل الاحوال انا بعرض امامكم ادله عقليه ومنطقيه بخاطب بيها عقل القارىء وبحترمه , بدلا من لغه السب والتشليق وطوله اللسان اللى انتشرت عالنت اليومين دول , وفى النهايه , لكل شخص مطلق الحريه فيما يعتنق من قناعات ...

المضمون هتلاقوة متوافق بشكل رهيب مع بوستاتى السابقه , ومع كلام كثير من العسكريين والسياسيين , ومع شهادات الناشطين والشباب اللى وقعهم حظهم العاثر فى براثن الشرطه العسكريه .
اللى اعرفه ان تطابق الشهادات من مصادر ملهاش علاقه ببعضها معناة حاجه واحدة بس ,, ان الكلام مظبوط

مش معقول مثلا انى متفق مع الاتنين اصحاب الكليبات دول انى اقول الكلام دة من شهر ويعيدوة هما دلوقت , وغيرنا يعيدة , وغيرنا يؤكدة , وكلنا ملناش علاقه ببعض لا زمنيا ولا مكانيا...

لاااااااااااااا انت اكيد عميل ومروج للفتنه

والله ياسيدى الفاضل من الجائز ان يكون كلامك صحيحا اذا كانت هذة المدونه عمرها لا يتجاوز الثلاث اشهر ..

سيدى الفاضل .. المدونه عمرها سنتين وشهر , ممكن لو عند حضرتك فسحه من الوقت , تراجعها من الاول , وتشوف وجهه نظرى فى مختلف القضايا اللى ناقشتها على مدى عامين , صدقنى , هتتأكد ساعتها من مصداقيتى , واذا كنت انا فعلا خاين وعميل ام لا ......

----------------

سؤال منطقى :
يعنى ايه دعوى تظاهر الظباط دى معموله علشان تضرب مليونيه الجمعه ؟!! اى عقل واى منطق يقول كدة ؟ يعنى انا لو عاوز احبط مظاهرة , اقوم اقول للناس ظباط الجيش هتتظاهر معاكوا ؟؟!!!

طب بالعقل كدة , خبر زى دة , وفى الظروف دى , يحبط المظاهرة ؟ ولا يخلى اللى مكانش نازل ينزل ؟ على الاقل عشان يتفرج ....
لا عقل ولا منطق ولا وعى يقولوا انى لما احب احبط مظاهرة اقوم اقول للناس ان ظباط الجيش هتتظاهر معاكوا .

وللعلم , هوفعلا مش مسموح لظابط جيش انه يتظاهر ,,, بالظبط زى ماهو مش مسموح للمواطن المصرى انه يتظاهر ... بس لو حصل وتظاهر ظابط الجيش , تفتكروا ايه هيكون رد الفعل ؟؟

هل فعلا الشرطه العسكريه هتضرب الضباط بالرصاص ؟؟
الغريبه ان الناس بتتداول المعلومه دى بدون استنكار , كأن ظباط الجيش دول كلاب ضاله مثلا , وان ضربهم بالنار لا يعنينا , بس نخاف نتاخد فى وسطهم مش اكتر , هو دة اللى مضايقهم !!! ..
بالذمه دة اسمه كلام ؟؟؟
طيب
المجلس العسكرى اللى ياخد قرار بضرب ضباطه بالنار , من باب اولى كان ضرب المدنيين بالنار , صح ؟؟

لاااااا , دا المجلس مع الثورة , هو بس فكرة ضرب الضباط بالنار دى علشان الحفاظ على الانضباط وكدة

طيب
ليه مضربوش الضباط اللى انضمت للثوار قبل رحيل مبارك بالنار ؟؟؟

ياسادة الموضوع لا علاقه له بالوطنيه , او بالتقاليد العسكريه , اذا كان عالوطنيه فدى معندهمش منها مثقال حبه من خردل , واذا كان عالتقاليد والقوانين العسكريه , فهما مسحوا بيها البلاط وخلوها استك , يمطوة ويرخوة حسب مزاجهم , وانا واثق انهم لو بمقدورهم فعل شىء كهذا لما ترددوا للحظه , الموضوع ببساطه , انه عندما ظهر اتجاة قبل رحيل مبارك يدعو للصدام مع الثوار , قوبل برفض شديد وتمرد من قبل كثير من الضباط الاصاغر والجنود اللى انحازوا للشعب , فهل من المعقول ان يصمت هؤلاء عن ضرب زملائهم بالنار ؟؟؟

الكلام عن ضرب الشرطه العسكريه للضباط بالنار لا يخلو من سوء نيه مبيت , غرضه ( افتكاس ) اى سيناريو لاحقاق فكرة باطله , بصرف النظر عن مدى قابليته للتصديق .
بالظبط زى سوء نيه مماثل , ظهر فى كلمه اتقالت قبل الجمعه الماضيه من بعض الناشطين , انهم ملهمش دعوة ومش مسئولين لو الجيش رد بعنف فى حال صدور هتافات عدائيه للمجلس الاعلى من المتظاهرين .
بالذمه برضه , مش دة يعتبر تهديد ضمنى للمتظاهرين , ودفعهم بخباثه فى اتجاة معين ؟؟؟

المشكله ان البعض يصر على ان يتخابث ويختلق فزاعات وهميه للجماهير بغرض توجيهها فى اتجاة معين يريدة هو ويحددة .

بجاحه
انى احدد للناس مقدما ايه الهتاف اللى يتقال وايه اللى ميتقالش

غباء
انى اتكلم على لسان الشعب واقول ( احنا ) اجمالا كدة وبدون تحديد , كأن الشعب كله اعطانى تفويض رسمى وتوكيل بالشهر العقارى بخصوص التظاهر انى اتكلم بأسمه .

سفاله
انى اهدد اللى هيهتف هتاف انا مش عاوزة بانى هقطع ايدة ولسانه وخلافه

قله ادب ونقصان تربيه
انى اتهم كل من يخالفنى الرأى بانه خاين وعميل ومدسوس ومروج للفتن
( الا الاتهامات دى , كنتوا بتسمعوها على لسان مين زمان ؟ )

الكلام دة ان دل على شىء فإنما يدل على العجز عن الرد وانعدام القدرة على الدفاع عن المبدأ بالعقل والمنطق , فيلجأ الشخص للاسلوب دة علشان يدارى على خيبته القويه

محدش وصى على الناس
محدش وصى على الشعب

دى مظاهرة مش فصل فى روضه اطفال

ولا يجوز لاى شخص ايا كان قدرة ان يفكر حتى فى ذلك ....

واظن انكوا شفتوا مظاهرات الجمعه اللى فاتت مشيت ازاى ...


------------------------------

اللى قال ان دول مش ضباط جيش وان دى معلومه مؤكدة ؟؟ طب عرفت وتأكدت منين ؟ ياريت تقولنا على مصدرك علشان نقتنع بكلامك , مع العلم ان ضباط الجيش انفسهم لا يستطيعون الجزم بذلك ...

اللى بيقول ان الكليبات دى مش متصورة فى مصر , وانها متصورة برة ,,, طيب , لو بتقول كدة كترجيح ممكن اتفق معاك مع العلم بوجود احتمالات تانيه , انما لما تجزم برضه بكدة , هنا اسألك , هات دليلك ؟

فاكرين لما كان نظام مبارك بيروج لنفسه بدعايا بجحه وبيتهم المعارضين بانهم يريدون خداع الشعب وان الشعب ناصح ولن يتأثر بخداعهم ؟
نفس السيناريو بيتعاد دلوقت بعبارات اخرى , ان اى كلام معارض للمجلس العسكرى كلام مغلوط ولا اساس له من الصحه وان الناس الغلابه كلهم دخلوا الجيش وعارفين كدة كويس قد ايه قادة المجلس دول ناس وطنيين .

نفس التبجح

والله الواقع ان الناس الغلابه والبسطاء دول هما اللى سبوا ولعنوا قادة الجيش اللى شغلوهم بالسخرة فى مشاريع الخدمه الوطنيه ومزارع الخيار والبطاطا وعاملوهم معامله اسوأ من الحيوانات ,,, بعكس السادة قرناء القاعات واجهزة التكييف وحملات التوقيعات اللى عمرهم مشافوا الجيش غير فى فيلم الرصاصه لاتزال فى جيبى , والحياة عندهم عبارة عن فيلم كارتون لتوم وجيرى .

مش كدة برضه ولا ايه ؟؟


وبعدين مش عيب نقول ان المجلس العسكرى اعطانا الضوء الاخضر للتظاهر , بالذمه فيه واحد محترم المفترض انه لسه عامل ثورة من شهر يقول انه استلم الضوء الاخضر بالتظاهر ؟!! طيب لو كان الضوء احمر , هتعمل ايه ؟؟

فكرة ان فيه ضغوط على حكومه شرف , دا امر جائز ومنطقى ,, انما فكرة وجود ضغوط على المجلس العسكرى نفسه , هل يعقل دة ؟؟
ضغوط من مين ؟
من مبارك وصفوت وزكريا ؟؟
طب بامارة ايه

عاملين للمجلس كنترول وماسكين عليه شرايط فيديو مثلا ؟؟

الاراء الخزعبليه دى بتحسسنى ان المجلس دة وليه مكسورة الجناح عايشه فى حارة قوادين واللى رايح واللى جاى بيلطش فيها , مع ان اللى بنشوفه فى فض الاعتصامات المتكرر وفى المتحف وفى السريه 28 نيابات وفى السجن الحربى وغيرهم , لا يوحوا بذلك اطلاقا ..

امريكا ؟
طب ليه
لما يكون جيش ومعاة شعب , امريكا هتقدر تعمل له ايه . اذا كانت تراجعت عن مواقفها وجرجرت ناعم لما لقت حشود الجماهير المليونيه ضد مبارك , يبقى هل من العقل انهم يرجعوا بعد كدة يكشروا عن انيابهم بعد ما ينضم للملايين دول الجيش كمان ؟؟

اى حد يفهم الف باء سياسه يعرف اهميه مصر بالنسبه لامريكا وانها لا تجرؤ على تحدى شعب مصر , فما بالك بالشعب والجيش معا؟؟ ( دا على فرض انهم ايد واحدة زى ما بتقولوا )
واديكوا شفتوا دة كويس فى الفترة من 30 يناير الى 11فبراير ...

الواقع ان امريكا راضيه جداااااااا عن المجلس العسكرى , ونازله مدح فى التجربه المصريه وبتتمنى ان كل الدول العربيه تحذوا حذوها .. تفهموا من كدة ايه ؟؟


الناس اللى بتقول طالما ضباط الجيش محتقنين , ليه متحركوش الى الان ؟
اولا بسبب القمع الرهيب اللى انتوا شوفتوا عينه بسيطه جدا منه فى المتحف وفى الحربى , ثانيا ودة الاهم لأن فيه ناس بتروج للمجلس العسكرى على انه الفارس المنقذ على القادم على صهوة حصانه الابيض .

طيب بالله عليك
انت لو راجل قررت تضحى بمستقبلك المهنى والوظيفى , وتعرض حياتك للخطر , فى سبيل انك تدافع عن شخص انت شايف انه وقع عليه ظلم من جهه متسلطه وجبارة , ثم تفاجأ بالشخص دة يهتف بحياة الجهه دى ويرد بعنف على اى حد ينتقدها , بس وتصل به الدرجه انه يهددك بتسليمك للشرطه العسكريه لو فكرت تدافع عن حقه وحقك .
بالله عليك , هتقول ايه فى نفسك ؟ ورد فعلك هيكون ايه ؟؟ ومعنوياتك هتبقى عامله ازاى ؟

وصلت ؟؟


هل من حق حد انه يمنع ضباط الجيش من التظاهر فى نفس المكان ؟ , ولو من حقه , بالتالى دة يشكل اعتراف ضمنى باحقيه اى جهه اخرى فى فض تظاهرات المدنيين , ولا هو خيار وفقوس ؟

هو ميدان التحرير دة مكتوب ملك باسم حد , يتظاهر فيه وغيرة لأ ؟؟

طيب
لما اقول انى هعرض حياتى ومستقبلى المهنى والوظيفى للخطر فى سبيل انى اتضامن معاك , فيكون ردك : انت جاى تقرفنا وتدخلنا فى معركه مش بتاعتنا ليه ؟ روح فى حته تانيه ؟؟
تسمى دة ايه ؟
ولما دى مش معركتك , امال انت نازل تتظاهر ليه ؟ ايه معركتك ؟ نازل تلم توقيعات ؟
هاتلى ثورة فى التاريخ جمعت توقيعات علشان تحاكم الاشخاص الذين قامت ضدهم ..

مش بقول فيلم كارتون ...


سؤال
هو ضابط الجيش المفترض انه يكون هلف ودرفه وفى وشه شنب يقف عليه الصقر , وغير كدة يبقى نصاب ؟؟
ليه
هو داخل ضابط جيش ولا مصارع فى دبليو سى دبليو ؟

هو ضابط الجيش دة دورة قيادى وتكتيكى ولا داخل خناقه بلطجيه فى حارة ضلمه ؟

طيب
اقولكم حاجه
اكتر ناس فى الجيش بيحتاجوا اللياقه البدنيه فى شغلهم واشتباكهم بالعدو بيكون غالبا مباشر ووجها لوجه , قوات الصاعقه , ها ؟ فيه مثل احسن من كدة ؟

هل حتما ولابد ان المنضم لقوات الصاعقه يكون بغل ودرفه ؟
لأ
لو ليكوا حد قديم فى الصاعقه , اسألوة عن ( الصواف ) , اسطورة مدرسه الصاعقه , لا يشاق له غبار , وهو كله على بعضه مايجيبش ستين كيلو ومتر ونص طول .

هنروح بعيد ليه

بصوا فى الصور اللى فى الجنب , هتلاقوا صورة مكتوب عليها ابراهيم الرفاعى ,
بصوله كويس ,
بصوا قوى ,
الراجل دة اسطورة تاريخيه لا مثيل لها فى الصاعقه المصريه ولا ابالغ ان قلت انه ابرز دور فى حرب 73 كان له , وان قصصه اشبه بالاساطير ولا يكاد يصدقها عقل , ارجعوا للمقالات اللى اتقالت عنه واقروها لو مكنتوش تعرفوة .

لو طبقنا مقياس الضخامه , يبقى من باب اولى ابراهيم الرفاعى ماهو الا سنكوح وسيس ومزة وكتكوت , مش كدة ولا ايه ؟؟

واضح ان مروجى الافكار دى مبهورين بشخصيه ضباط المتحف المصرى والسجن الحربى , اة , عادى , نوع من المازوخيه , مش لاقيلها تفسير تانى الصراحه , بالظبط زى الشرطه العسكريه اللى واقعين فى غرامها وعاوزين يسلمولها الظباط لو نزلت تتظاهر , بتوع المتحف المصرى والشرطه العسكريه دول رجاااااااله , هما دول الضباط ومن على هيئتهم , اى حد تانى يبقى مدعى

مع ان المروجين للكلام دة بيوصفوا شخص ما انه ( مجانص ) وبيقول انه ظابط جيش , وهما بيقولوا انه نصاب

طيب المسأله مش مسأله طول وعرض بقا ..

دى مساله كلام

اللى يقول اللى على كيفى يبقا ظابط جيش
واللى يقول كلام يضايقنى يبقا نصاب
ولو لابس ميرى ؟
يبقا اكيد سارق اللبس
ولو معاة كارنيه ؟
يبقا اكيد مزورة
هو كدة وخلاص

:)

ماشى

---------


الجيل اللى حارب فى 73

اةةةةةةةةةةةةةةةةةةةة
انا سمعت الكلام دة فيييييييييييين قبل كدة
مش مبارك كان كل ما تحصل مصيبه فى البلد يطلع يتباهى بانه حارب فى 73 وانه صاحب الضربه الجويه ؟
مش شفيق برضه عمل نفس الموضوع ؟
دا كمان طاطا , بيتفاخر بوكسته القويه وفضيحته فى حرب 73
بالظبط زى القذافى لما تفاخر بنفسه انه قائد ثورة ..

طيب لما الكلام دة يطلع من ناس زى دى وعن نفسهم , ممكن نفوته , نعتبرة محاولات تبريريه , انما لما يطلع من اخرين غيرهم المفترض انهم داقوا على ايديهم المر, ويطلع لنا اكلشيه ( اياكم تتكلموا عن الجيل اللى حارب فى اكتوبر )
تفهموا من كدة ايه ؟؟

وعلى فرض اننا بنتكلم عن شخص كان له دور مشرف فى الحرب , ما علاقه ذلك بانتقاد تواطؤة ضد شعبه بعد 38 سنه , هل معنى كدة ان اى شخص يخدم الوطن ياخد ضوء اخضر انه يسرقه ويخربه الى الابد ومحدش يفتح بقه ؟؟؟
اى منطق دة ؟

دااااااااا ... على فرض ان دورة كان مشرف فعلا , مش اباد كتيبته وهرب هو .

-------


انا معرفش اذا كان فيه ضباط هتنزل فعلا يوم الجمعه ولا لأ , وان كنت شايف انه صعب , لان معنى انهم ينزلوا يعنى مش هيرجعوا الا لما يسقطوا المجلس الاعلى , ملهاش حل تانى , لان انسحابهم دون تحقيق الهدف دة , معناة اعدامهم , والظروف والوضع الحالى ميشجعوش حد انه يقدم على شىء زى دة , خصوصا مع موجه التخوين وتكسير المجاديف دى

بس لو حصل فعلا , يبقى الناس دى شجاعه لدرجه الجنون والتهور ....

على اى حال و نزلوا او منزلوش , مش مشكله , والناس ملهاش دعوة , والله نزلوا خير وبركه , منزلوش , احنا مش مستنيين حد ...


وبرضه مش عارف ايه موجه الترويج للكليب على ان المتحدثين فيه قالوا ان الضباط قررت تنزل يوم الجمعه , مع ان الواضح من كلامهم فى الكليب ان قرار النزول دة قرار الشخص اللى بيتكلم نفسه , بينما بيدعوا باقى ضباط الجيش للنزول , يعنى هما كمان ينزلوا
واخدين بالكم
بيدعووووووووووووووووووو
يدعوووووووو

يعنى لو عدا يوم الجمعه ومحدش نزل ميرى , مش عاوز بقا فرح من نوعيه , شفتواااا , مش قلنالكم , كدة بقا الناس دى نصابه , وبالتالى , اى حد يقول نفس كلامها يبقا نصاب برضه ..

ههههههههههه

مش دة الكلام اللى بيتحضر عشان يتقال ؟

هو لو حد قال نفس الكلام اللى انا قلته وبعدين اكتشفتوا انه نص كم , هل معنى كدة انى انا كداب ؟؟؟

لو شفت واحد ملتحى وحرامى

هل معنى كدة ان كل الملتحين حراميه ؟؟؟؟

قياس فاسد

وهنا

ارجع واقولكم

لاتعرف الحق بالرجال .. ولكن اعرف الحق تعرف الرجال


-------------------

ودة يقودنا لموضوع تانى

ظهر مؤخرا على الفيس بوك جروبات عديدة تزعم انها لضباط جيش ...

انا مش هحقق فيها او اقول ايه منها الصح وايه الغلط

لا شك طبعا انه فيها لضباط جيش حقيقيين

بس اللى لاحظته خصوصا فى الفترة اللى فاتت , ان فيه جروبات كتيييييييييير جدا ظهرت بنفس الشكل , منها جروب ( مفتوح ) بيقول ان عضويته محصورة على ضباط الجيش فقط ( وهو مفتوح ) وبيطلبوا من العضو اللى عاوز ينضم لهم , انه يجاوب على اربع اسئله لا يعلم اجابتها الا ضابط جيش خريج كليه عسكريه , ويبعتها للادمن فى ميل ويكتب عنوانه ( انا ظابط )

:D

الجروب بيزعم انه بيناقش مشاكل الجيش بغرض ايجاد حلول وعرضها على القادة علشان يكافحوا الفساد اللى جوا الجيش .

يعنى هيدوا القادة الفاسدين .. حلول .. علشان يكافحوا نفسهم , شىء جميل

مضمون الصفحه مافيهوش اى مشاكل ولا اى حلول , كله كلام فاضى , والحاجه الغريبه , انى لاحظت انهم بييجوا عند شخص المشير وبيفرملوا , بعكس الصورة اللى قدموا نفسهم بيها تماما

تقريبا لسانهم مش مطاوعهم

:D

وحكايه الايميل دى

طيب ما بالمرة يكتب اسمه وعنوانه ورقم وحدته وسلاحه ورقم اقدميته ورقم كارنيهه ورقم دفعته ؟
ولا على ايه
ما يجهز شنطته بالمرة ويروح لهم فى ال..........
ولا على ايه
يروح من غير شنطه
ومن غير هدوم اساسا طالما مش هيحتاج الهدوم هناك

الاجهزة الامنيه العسكريه بتفبرك صفحات وجروبات عالفيس بوك لغرضين اساسيين

الاول : انهم يستخدموها كمصيدة يصطادوا بيها الضباط الناشطين عالنت ويلموهم باسرع وقت ممكن بدل اللبش اللى هما عاملينه للمجلس العسكرى دة

دة الشق العسكرى


الثانى : انهم يروجوا من خلال الصفحات دى لاخبار كاذبه وغير منطقيه وغير معقوله بالمرة , بغرض هز الثقه فى اى جروبات مشابهه , وتثبيت صورة فى ذهن المدنيين ان اى حد يعارض او ينتقد المجلس لاااااااااااااااااازم يكون نصاب زى الجروبات دى بالظبط ..
نوع من البرمجه الذهنيه

ودة الشق المدنى

اطلعوا فوق شويه كدة , هتلاقوا نفس الاسلوب دة اتكرر من ناس تانيه .
:)


وهنا برضه هرش قزازة فليت فكريه تموت كل الحشرات والافات اللى بتعيث فسادا فى العقل :

لا تعرف الحق بالرجال ولكن اعرف الحق تعرف الرجال

------------


انا عارف ان كتير من الناس وصلت لمرحله متقدمه من البلبله والتشوش , وبتحاول تدور على اى شىء يوصلها لبر امان او مبدأ ثابت ومقنع ..
لهؤلاء اقول :

طول ما انت ماشى ومنساق وراء شخص ما بدون تفكير , عمرك ما هترسى على بر , وعمرك ما هتلاقى الحقيقه وهتفضل تلوش طول عمرك ..

ربنا الرحيم العادل اعطى اغبى البشر الحد الادنى من العقل والادراك والفطرة النقيه اللى تمكنه من التمييز بين الحق والباطل , امال , ربنا هيحاسبه ازاى ؟؟!!

يعنى مافيش حد يتحجج بان ثقافته محدودة او ان عقله على قدة , انا بشوف ناس اميه لا تقرأ ولا تكتب , بشوف ناس من اقصى اركان مصر , ناس انا واثق ان اغلبكم عمرة ما هيقابلهم فى حياته , بحكم شغلى , وبنبهر وبأصاب بحاله من الإنبهار بمقدار الوعى ونفاذ البصيرة اللى بيتمتعوا بيها ..

ابسط حاجه النهاردة , قابلت راجل فاتح كشك بقاله صغير فى ايتاى البارود , فلاح وامى ولا يعرف شىء غير ارضه ودكانه , حتى التلفزيون مش بيشوفه , علق فوق محله صورة عبد الناصر مكتوب عليها ( لقد انتهى عصر الاقتاع )

:)

محدش اهبل , ومحدش بيكون اهبل الا لو اختار انه يكون كدة .

عاوز تعرف الحقيقه ؟ شغل دماغك , وافتح عقلك , وانفض عنه التعصب لفكرة بعينها , اقرا , وميز , واحكم ..
الجأ لمن تثق به من اهل الخبرة , من باب الاستعانه بالرأى , مش من باب استيراد رأى جاهز ..

وفى النهايه لك مطلق الحريه فى ان تعتنق ما تراة صوابا وتلفظ ما تراة باطلا ,, بدون التعدى على حريه الاخرين

ولو فى يوم اكتشفت انك كنت غلطان .. متكابرش , واجه نفسك واعترف بخطأك , قوم طريقك وارمى الافكار الغلط ودور عالصح من جديد , متعاندش نفسك ...
صدقنى لو عملت دة .... لازم هتوصل فى يوم للحقيقه , ربنا اكرم من انه يضيع بحثك المخلص هباء ..



-------------

كلمه للاخوه , ابناء المجلس العسكرى المتيمين والولهانين على روحهم ...

انا مش هناقشكم , لانه من الخطأ مناقشه شخص شاف الحقيقه قدامه ودفن راسه فى الرمل واصر على الخطأ وضل وضلل الناس اللى وراة متعمد .. بس من باب تبليغ الامانه , ارجوكم , راجعوا حساباتكم تانى , لان الاوان اوشك انه يفوت , وصدقونى , لو فات , ساعتها محدش هيرحمكم , لا اللى عارضوكم ( وانا اولهم ) ولا حتى الناس اللى مشيوا وراكم , مش هيرحموكم , وهتكونوا فى موقف اسوأ من السوء نفسه ,, ادركوا انفسكم يرحمكم الله .

بس ساعتها , اتمنى انكم متتنصلوش من المسؤليه وتبرروا موقفكم بتبريرات غبيه , لان لو كان عندكم ساعتها مثقال ذرة من المسئوليه او الكبرياء , صدقونى , هتحرقوا نفسكوا بجاز ...

-------------

اعزائى نخبجيه الانترنت , اعتقد انه كفايه كدة خناق وشد فى شعور بعض , الشارع سابنا وسبقنا بمراحل , احنا بقينا فى وادى والناس فى وادى تانى خاااااااااالص ... اذكر يوم 29 يناير , انى كنت راكب مع سواق تاكسى وعدينا جنب دبابه قدام بنك , والراجل استرسل معايا فى امكانيه التصدى للدبابه او الاستيلاء عليها , استغربت من كلامه وانتقدته , وفهمته ان الدبابه دى تمنها حاجه وعشرين مليون جنيه , فلوسها من جيب سعادته , الراجل رد بتلقائيه انه يقصد المبدأ ليس إلا , لانه عارف المجلس الاعلى كويس وعارف انه عاوز يستغفل الشعب , فهو بيتكلم يعنى فى حال تطور الامور وحدوث صدام ....

بصرف النظر عن الاتفاق او الاختلاف مع الرجل , اللى عاوز اظهرة هنا , ان الناس البسيطه معندهاش استعداد تساوم او تقبل انصاف الحلول , قيموا الوضع وحطوا اسوأ الاحتمالات واهلوا نفسهم للتعامل معاها , ودة اسلوب التفكير الصح ,

بعكس البهوات اللى عمالين يترعشوا ويدفنوا راسهم فى الرمل كل ما تيجى سيرة صدام مع المجلس الاعلى , ويحاولوا يضحكوا على نفسهم ويلتفوا التفافات غريبه ما انزل الله بها من سلطان , تقودهم برضه فى النهايه لنفس النقطه ....

المشكله انكم مش عارفين الوضع كويس
انتوا عاوزين تساوموا المجلس على ايه ؟
انتوا بتساوموة على بقاؤة وحياته

لان معنى تحقيق مطالبكم كامله , معناة انه تانى يوم الناس دى هتكون بتتحاكم , هما عارفين النقطه دى كويس , علشان كدة كل ماتيجى سيرة المجلس الرئاسى المدنى يركبهم 100عفريت , مينفعش تساوموهم , المساومه دى بتكون انك تعرض على حد بقاء حاجه او منحه حاجه فى مقابل تنازله عن حاجه اخرى , وبتضغط عليه عشان يوافق , انما ينفع تساوم حد انك تقتله ؟؟

ياسااااااااااادة , دا صراااااااااااع بقاء
ومهما لفيتوا ودورتوا وراوغتوا الحقيقه هتلاقوا نفسكم برضه فى النهايه امام خيارين :
- اما الرضوخ والاستسلام للامر الواقع ( حسبما يريد السادة )
- اما الصدام

والله نسبه كبيرة من الناس اللى انتوا عمالين تتريقوا على جلاليبها وعلى جهلها حسمت خياراتها من زمان ,
الرك والباقى عليكم انتوا ...

وعلى فكرة
مافيش ثورة بتحط لنفسها سقف تضحيات
ولو دة حصل
بتكون ثورة فاشله قبل ان تبدأ

اعتقد انكم لو كنتم متوقعين حدوث ما حدث يوم 28 بمستواة الضخم
لآثرتم الجلوس فى بيوتكم
من باب ( حقن الدماء ) وتفادى حمامات الدم
مش كدة برضه ؟

وبلاش موضه التخوين والخباثه دى
على فكرة
مبارك والقذافى وباقى الحكام العرب ايام شبابهم كانوا زيكم كدا بالظبط
نفس الاسلوب ونفس العقليات

اتمنى من الله الا يجعل مصائر العباد بايديكم يوما ..


عموما

لو فضلتوا كدة
الناس هتتجاوزكم , ومش هيكون لكم مكان فى بكرة ...

--------

انا مش بدعو للصدام مع المجلس العسكرى ,
بس بقول ان ثورتنا لها طلبات
ولازم تتحقق
ولو متحققتش بالضغط ( ودة مش هيحصل على حد تقديرى )
يبقى الصدام شر لابد منه , وهو اللى هيتفرض علينا ساعتها , مش احنا اللى هنختارة .

لو حصل
الموضوع مش هيكون بالسوء اللى انتوا متوقعينه خاااااااالص
والاسباب ذكرتها فى البوستات السابقه .....

وكلمه اقولها للتاريخ
البلد دى مش هتنضف طول ما الناس دى فى السلطه .

والايام بيننا

---------------

ملحوظه اخيرة
للاغبياء فقط

انا لست ضد الجيش المصرى ولا اشكك فى شرفه ونزاهته
وهناك فرق شااااااسع بين الجيش المصرى , وبين قياداته واجهزتهم الامنيه
وانتقاد القادة والاجهزة الامنيه لا يعنى الاساءة للجيش
والا قياسا على هذا
لكان انتقاد مبارك اساءة لسمعه مصر

صح ؟

ولا انا غلطاااااااااان ؟


الكلام دة قلته اكتر من 3 مرات قبل كدة
ومع الاسف
الاخوة العميان بيتجاهلوة تماما ولا كأنهم قروة اصلا
ويرجعوا يقولوا
دة بيشتم الجيش
وهيقروا البوست دة
ويبرطعوا برضه ويقولوا نفس الكلام
دة بيشتم الجيش
ايه الهبل اللى بيقوله دة
دا اكيد مجنون
دا ابو رجل مسلوخه ...

طيب

ربنا يهديهم

--------

اسف على ان موضوع البوست كان اشبه بمناظرة
كنت ناوى اخلى البوست دة على شكل خطابات
خطاب للسلفيين وخطاب للاخوان وخطاب للنشطاء وخطاب للنظام و و و
بس مع الاسف
وجدت ان الوضع اتقلب لحرب وتشليق ولسان طويل وقله ادب عالفاضى بدون اى محاوله جادة للإقناع ( من باب العجز و قصر الديل )
فاضطريت انى اخلى البوست دة رد على مايقال
كان نفسى انشر البوست التانى قبل يوم الجمعه
كان نفسى الناس ترجع تتلم تانى زى ايام ما قبل ( تخلى ) مبارك .
بس الاستفزاز كان اقوى منى...

واسف لانى متناولتش موضوع الكليبين , على اى حال , لو كنت زائر جديد , ممكن ترجع للبوستات القديمه خلال الاشهر الثلاث الماضيه
هتلاقى فيهم كثيرا من التفاصيل , اللى هتوصلك لبر الامان ان شاء الله , اما مؤيدا لها , واما رافضا .

والله الموفق
والمستعان


تحديث :
انا لسه شايف الفيديو التالت دة دلوقت :
http://www.youtube.com/watch?v=6LMYNNiIo-8&feature=youtu.be
الراجل دة ظابط جيش
فيه نقط كتير قالها ميعرفهاش الا ظباط الجيش
ومش كلهم كمان
والحاجات دى اساسا مش بتطلع برة

فيه واحد نبهنى لنقطه مكنتش واخد بالى منها
ان الناس دى بتحاول تحقق اتصال مع تنظيمات غير مرئيه داخل الجيش
بس انا برضه بعقليتى المتشككه ممكن افترض العكس
انها مصيدة
بس الافتراض دة هيتلاشى
لان الكلام دة فعلا هيحرك ناس كتير جوة الجيش
مش شرط انه يحركهم يعنى مظاهرة
بس هيثير المياة الراكدة جامد
ومجلس الغربان دة خلقه ضيق ومفتقد للحكمه وطول البال
اكيد هيرتكبوا فعل احمق هيحرك العجله اسرع
الفيديو دة اقوى من الاتنين التانيين بمراااااحل
وان كنت برضه لا استطيع تخيل رد فعل الضباط
يعنى احتمال محدش ينزل وتطلع بمبه
احتمال شويه صغيرين
احتمال نلاقى مفاجأة
كل شىء جايز

الأحد، 27 مارس، 2011

نحو مشرق الشمس ...

وجدت نفسى فى وضع غريب منذ الخامس والعشرين يناير .
للمرة الاولى اتعامل فعليا مع مصطلح ( البسترة النفسيه )
هل يمكنك ان تتخيل وضعيه انسان يبكى وينتحب بحرقه من الالم نتيجه لحدث ما ثم ينفجر فى الضحك بعدها بثوان بمجرد حدوث حدث اخر ؟؟
ضغط بشع على نفسيه اى انسان,
تخيل ان يستمر هذا الوضع لاكثر من شهر,
ليل نهار,
لقد بذلت مجهودا بشع فى البوستات الماضيه لاحتفظ بالموضوعيه والعقلانيه فى كلامى , كثيرا ما عدلته , خذفت منه الكثير , استبدلت كلاما باخر اقل حدة , استأصلت بعض الالفاظ النابيه التى لم اتمكن من كبحها
كثيرا ما كنت انتظر توقيت مناسب اتمتع فيه بالحد الادنى من الهدوء النفسى لاقتنصه ببوست جديد ...

الا اننى منذ عدة ايام اثرت الابتعاد النسبى عن كل مسببات التوتر مما اثر على بالايجاب , ومن حسن الحظ اننى تمكنت من الفوز ببعض الساعات الليليه فى الهواء الطلق وبعيدا عن البشر , ووسط حاله من السلام النفسى غير العادى .

استرجعت شريط الاحداث , احداث الثورة المصريه , منذ بدايتها ..
هنا باغتنى هذا السؤال
لماذا يقتصر التفكير دائما على الوضع الحالى , واحتماليات اجهاض الثورة ورجوع النظام ( الذى لم يغادر مواقعه اصلا ) ومدى سوداويه الاوضاع فى تلك الحاله ( البعض يختلف حول مدى اقترابنا من نقطه الصفر ) وهل اذا عاد سنتمكن من الاحتفاظ ببعض من مكاسبنا المتواضعه ام ان الامر سيصبح اسوأ مما كان عليه سلفا !
اكتشفت اننا ننظر للامور نظرة محدودة وقاصرة بشكل مؤسف

نظرت للوراء , للتاريخ , تاريخ هذا الوطن , لا اقصد تلك النظرات الجزئيه , اتكلم عن صيرورة التاريخ المصرى بحد ذاتها , استقطعت القرنين الماضيين , ببساطه , لاحظت ( كما لاحظ غيرى ) ان مصر تنتابها من حين لاخر صحوات اسطوريه وقويه وغير متوقعه , اشبه ماتكون بالملاحم .... الا انه فى اللحظات الاخيرة , وقبل اقتناص النصر , تنقلب الامور بشكل مأسوى الى النقيض , ليدخل الشعب فى نفق من الاحباط والالم والهزيمه , تمر معه البلاد بمرحله سقوط مدو , يستمر لعشرات السنوات , سقوط يدمر جيلا بأكمله , ويخصى رجولته بالكامل , فصبح مفقود الامل فى نخوته ازاء الصحوة القادمه .
وبعد فترة ,, وعند ظهور جيل جديد , تبدأ بوادر صحوة جديدة , تسطع انوارها رويدا رويدا , الى ان تعم افق التاريخ , ثم فجأة ....... يحدث السقوط التالى ..

شاهدت المصرى حينما عانى من فراغ فكرى وثقافى بشع , يرافقه تعصب دينى لا يتخطى مرحله الجهل التام , اقترن بنفسيه مشوهه وخضوع واستسلام لحاله من الاستعباد , من قبل فئه محاربه قايضته مقابل توفير الامن , وقبل المصرى تلك الصفقه الخاسرة

وفجاة انتفض الجسد الهزيل ذى الجلباب المهترىء المصبوغ بالنيله ليعلن عن خروج مارد لا قبل لقوة به , تصدى لاقوى جيوش الارض حينها , وواحد من اعظم القادة العسكريين على مر التاريخ .
تصدى بكل مقوماته السلبيه , لكيان اخر يناقضه تماما فى كل شىء , فى معادله غير متوازنه على الاطلاق
الموضوع اشبه بكونك تشاهد فيلم رومانسى للغايه ثم اذ به ينقلب فجأة لفيلم رعب او خيال علمى ...

ان اى متمعن فى التاريخ توقف لساعات امام تلك الورقات فى ذهول , فهو اعتاد على منظومه اجتماعيه وسياسيه وفكريه معينه لهذا الوطن طوال 540 عاما خلت , بنى عليها حقائق ومسلمات تاريخيه , ثم .... اذا كل هذا يتم نسفه فى لحظات

تخطى ذلك المواطن البائس ضعفه وعجزة وفوضويته وكل اصنامه وتابوهاته الفكريه
تخطى سيطرة مطلقه لرجال دين جثموا فوقه بقوة بالغه لعشرات السنين
تخطى اسطورة عسكريه كان لا يجرؤ على رفع عينه اليها
تخطى الحرب النفسيه والدعايا المضادة لجيش الفرنسيس
سطر ملحمه تاريخيه بمعنى الكلمه فى بولاق والازهر ورشيد وقنا وابنود وجهينه وغيرهم ..

وصل المواطن المصرى بعد خروج الحمله الفرنسيه من مصر لوضعيه تاريخيه غريبه
انه اصبح فعليا سيد قرارة على ارضه ووطنه
نجدة فجأة طرد كل المماليك من بر ( القاهرة ) خلال ساعه عندما شرعوا فى فرض ضرائب مجحفه
وهم من ساموة سوء العذاب لمئات السنين
نجدة يمضى كلمته فيمن يحكم مصر , بل ويتحدى سلطان المسلمين صراحه , ذلك البعبع والمسلمه الفكريه التى لم يكن يجرؤ احد ان يرد لها كلمه
وضع غريب , لكن للاسف , ونتيجه للخيارات الخاطئه هوى المصرى من جديد بداخل الجب , واستمر فى هذة الوضعيه لبضع وسبعون سنه تاليه .

ثم كانت صحوة عرابى
ثم كان السقوط الثانى بسبب السلبيه والطيبه الزائدة والقرارات المتاخرة
سقوط دمر جيلا باكمله فتحول اغلبه الى كلاب للاحتلال ساموا شعب مصر سوء العذاب لسنوات تاليه ومن بقى , فقد قامت السجون والمنافى بالواجب اللازم مع امثاله .

ثم اتت صحوة اخرى و استشعرناها فى سنوات الخمسينات , وما لبثنا ان دخلنا مرة اخرى فى نفق الذل والمهانه .. والهزيمه .


التاريخ المصرى ياخذ شكل دورات تستمر الواحدة منها لعشرات السنين , حركه اشبه بغليان الماء , اعلى , ثم اسفل , ثم اعلى من جديد ...

عندما انظر لواقعنا الحالى فى ضوء الماضى , اخرج بشيئان :
الاول ( وهو الجانب المظلم ) ان هناك ما يشبه اللعنه المقترنه بتاريخ هذا الوطن , فلا تقوم له قومه الا تبعها سقوط بشع , لاسباب مختلفه , تعددت الاسباب والنحس واحد ..
الثانى ( وهو الجانب المشرق ) هو الطبيعه الغريبه والمتفردة لذاك الكائن الغريب المدعو ( مصرى )
عقليه متناقضه بمعنى الكلمه وتصرفات غير متوقعه وشخصيات متداخله لا تعلم ايها سيظهر بين لحظه واخرى

كثيرا ما كنت اشعر فى قرارة نفسى بانه غبى بفطرته ( من خلال مشاهداتى للتاريخ ) الا انه صدمنى بردود فعل تتنافى تماما مع تلك الشخصيه .
اذن ما تفسير هذا الوضع ؟
التفسير ان ما يعانيه المواطن المصرى فى اوقات سقوطه التاريخيه , هى حاله من الغفله المتعمدة او الاستغباء المقصود , فالمصرى امهر من يتحايل على نفسه وشخصيته ويلتف عليها ليتجنب مواجهه الحقائق ويحافظ على قدر من السلام النفسى الذى يمكنه من استئناف حياته بدون ضغوط نفسيه
يعنى من الاخر , بيشتغل نفسه بمزاجه ... بس بيقتنع بكدة لدرجه انه مش بيكون عارف انه بيشتغل نفسه ...

لكن فيه اوقات بتكون الحقائق على درجه من القوة والسطوع انها تجبرة على النظر فى المرآة , ان يواجه نفسه ॥ يواجه الحقيقه , حينها ... يخرج الاخر

ازدواجيه غريبه وشيزوفرينيا شديدة التباين , انه اشبه بمستر هايد , ذلك الرجل الدمث الهادىء نهارا , والوحش الكاسر ليلا ...
اذن لنقل ان المصرى ليس غبيا بطبعه بل يتصنع الغباء ليتلافى الصدام مع نفسه , فالضغوط النفسيه تدفعك لاتخاذ مواقف على ارض الواقع حتى تتخلص منها , وتلك المواقف الايجابيه لها ثمن باهظ , والمصرى بطبعه يفضل الراحه والهدوء , فالافضل قطع المياة من المنبع والالتفاف حول النفس بذلك الشكل الغريب

والمعضله التاريخيه لطاوغيت مصر انهم غير قادرون على فهم تلك النقطه واستيعابها , فهم مقتنعون دائما ان المصرى انسان غبى وجبان , مما يسبب لهم صدمه بالغه عندما يواجهون ( الاخر )

وقد تكون تلك الصدمه نقطه قوة للمواطن المصرى , فلا يخفى عليكم ما يترتب عليها من شلل وفوضويه فى اتخاذ القرارات , وحاله عامه من الهلع والرعب فى دوائر السلطه ... كل ذلك يدفعها لاتخاذ قرارات جذريه وسريعه ومتهورة , الا ان تلك الاجرائات فى الحقيقه لا تكون الا محطه البنزين التى تمنح ثورة المصريين ما يكفيها من وقود ليمكنها من سحق طغاتها
لذلك نراهم لا يتعلمون من اخطائهم ابدا , لانهم ببساطه ( لا يفهمون )

عندما نستخدم تلك القواعد والمفاتيح لقراءة وضعنا الحالى بشكل اكثر شمولا , نجدة كما يلى :

- شعب يمارس قدرته على خداع نفسه بشكل بارع للغايه امام واقع مؤسف بكل ما تعنيه الكلمه

- يكسر القاعدة مجموعه من الشباب ويدخلون فى مواجهه غير متكافئه مع السلطه ,,, اغلبهم ليس له جدول او مخطط ولا سقف ولا مطالب , فقط فعلوا ما فعلوة غريزيا ..

- وجدت الكتله الصامته نفسها امام خشبه مسرح , مجبرة على مشاهدة ذلك الفيلم ,, شباب مغلوب على امرة يواجه دب مفترس لا قبل له به , المفترض حسم المعركه خلال ساعات , الا ان الخصم الضعيف لجأ غريزيا الى المناورة ونجح فيها ومارسها ببراعه , خصوصا مع الاخذ فى الاعتبار ضخامه ذلك الدب وثقل حركته وقدرته على الرد السريع والحركه المباغته والحشد المتكرر فى اماكن مختلفه ...

- كل هذا منح الخصم الضعيف نفسا اطول للمعركه , فوجدت الكتله الصامته نفسها مجبرة على مواجهه واقعها الاليم من خلال فيلم سينمائى ثلاثى الابعاد طوييييييل المدة يحدث امامهم فى كل احياء القاهرة والاسكندريه والسويس ...

- هنا اجبرت الكتله الصامته على مواجهه نفسها , مواجهه الحقيقه , الاستسلام لذلك الضغط النفسى البشع , من احساس بالمهانه والذل وانعدام الكرامه والاستخفاف , وهو ضغط لا قبل للجموع باحتمالها।

- وحسمت الكتله الصامته خيارتها سريعا خلال يومين , فلا يمكنها تحمل مواجهه الذات اكثر من ذلك , اذن , فليخرج الاخر الان , ولا مانع من التضحيه , فلينتهى ذلك الامر, ولنسدل الستار على تلك المهزله ...

- وقد كان , سحق اكبر جهاز امنى فى الشرق الاوسط واكثر اقرانه قوة وبشطا وتنظيما وخبرة , سقط فى ساعات
وهنا وجد الانسان المصرى نفسه فى مواجهه تابو فكرى اخر, انه بطبعه لا يحب الانتقام ولا سفك الدماء , كما ان النظام فى عقول العامه تمثله دائما الشرطه , فالشرطه هى ما يعرفونه من النظام وما يتعاملون معه ولا علم لهم بسواها , لذا تجدهم يطلقون عليها ( الحكومه ) , فذلك البسيط اختصر كل نظريات الدول الامنيه فاطلق على الشرطى لفظ الحكومه , بمنتهى البساطه ..

- افرغت الكتله الصامته جزء كبير من غضبها الكامن والمخزن على مدى سنين فى وجه الداخليه , كثير من البخار بداخل الحله قد تم نفثه من خلال ثقب ( الداخليه )

- وجدت الاغلبيه نفسها امام خيارين , الاول اكمال الطريق واسقاط منظومه الفساد بقوة الجماهير , والاخر هو الحشد والتلويح بقبضتها الغليظه للغايه فى وجه النظام , تماما كما تفعل الغوريلا عندما يدخل شخص ما فى منطقه نفوذها

-----

لا اود الدخول فى مزيد من التفاصيل , فما حدث قد تحدثت عنه اكثر من مرة بالبوستات السابقه , ما اودة الان هو ذكر عدد من النقاط التى قد تخفى على البعض :

اللى يعرف المصرى كويس , يعرف قد ايه هو قوى , مش مواضيع انشا والله , الموضوع فعلا زى ما بقول كدة , يمكن انتوا حسيتوا بيها فى الفترة من يوم 30 يناير الى 11 فبراير , اللى كان بيتابع وكالات الانباء الغربيه وتغطيتها للحدث هيحس قد ايه البلد دى تقيله وقد ايه شعبها قوى ومؤثر لما يقرر يتحرك , وهيشوف مدى الهلع اللى كانت فيه دوائر صنع القرار فى اسرائيل والولايات المتحدة .

المصرى مش غبى , مش كل الناس مضحوك عليها ومخدوعه فى المجلس الاعلى , بس كل ما فى الموضوع ان الجيش يتمتع بمكانه خاصه فى قلوب المصريين , المكانه دى اتحفرت جوا قلوبهم على مدى مئات السنين تجاة الجماعه الوظيفيه اللى بتتولى مهمه الدفاع عنهم , كبرت قوى المكانه دى بفعل التجربه الناصريه ...
فالموضوع اشبه بشخص كان ابوة بيمثل له قدوة ومثل اعلى وعندة دة افضل انسان فى العالم ..
اكتشف ان ابوة حرامى ونصاب وشيخ منصر وقواد وفيه كل العبر , الطبيعى انه هيحاول يتجاهل الحقائق دى ويعتبر نفسه معرفهاش , ولو فشل هيبدأ ينكرها بشكل هستيرى وبدون منطق , ثم هيحاول يخترع مبررات , واخيرا لن يجد بدا من الاعتراف بالحقيقه , مما سيدفعه لاتخاذ موقف مغاير ضد ابوة ...
فاللى حصل ان الانسان المصرى استغل قدرته التاريخيه على مراوغه الذات وتقمص شخصيه الغبى علشان ميشوفش قدوته وهى بتنهار ...
بس اللذيذ فى الموضوع ان رتم الاحداث اصبح سريع جدا والالوان بقت فاقعه قوى , يعنى مسأله فشل المواطن المصرى فى خطه مراوغه الذات دى , مسأله محتومه وستاتى سريعا باذن الله .

الناس عارفه
عارفه والله وفاهمه كل حاجه , بس هما بيحبوا يشتغلوا نفسهم , ومتنسوش ان الناس البسيطه دى اغلبها كان مجند فى يوم من الايام وعارفين اللى فيها , طبعا اكيد فيه ناس مخدوعه فعلا ومش فاهمه , بس انا بتكلم عن الاغلبيه , الاغلبيه فاهمه كويس قوى , وان اظهروا خلاف ذلك

اكتشفت ان الوعى لا علاقه له بالخبرة ولا بالدراسه ولا الثقافه ولا الذكاء
فحين اصيب كثيرا من اهل النخبه السياسيه والناشطين المخضرمين بحاله من للسعان والجنون المؤقت الذى طاش بصوابهم , اندهش من وعى كثير من الناس ( الاميين تماما ) وقدرتهم الرائعه على قراءة الواقع ....
الوعى منبته الفطرة البشريه النقيه , وليس المكتسبات العقليه .

وزارة الداخليه المصريه كانت بتحمل بداخلها عاملين , عامل قوة وعامل ضعف , عامل الضعف هو الفساد , الفساد فيرس ومرض بينخر جسد اى مؤسسه , حتى لو كانت مؤسسه بتحمى الفساد , فافضل وسيله لحمايه الفساد , ان تقوم على حمايته مؤسسه خاليه من الفساد ....

فساد الشرطه كان عامل انهيارها

عامل القوة هو التجانس الفكرى والنفعى , اللى ظهر بشكل اكثر وضوحا فى عهد العادلى , التجانس دة اللى كان موجود بين قادة المؤسسه ومرؤسيهم من ضباط ودرجات اخرى , التجانس دة حقق تماسك نسبى للمؤسسه الامنيه امام عاصفه الثورة , اينعم لم يصمد , نظرا لتضافر عوامل هدامه اخرى , بس هو كان عامل قوة

التجانس دة مش موجود فى الجيش ( من حسن الحظ ) لان القيادة الفاسدة عملت خندق واسع بينها وبين من دونها وضمت الى جوارها اجهزة امنيه بحيث تحسب عليها مقابل دفاعها عن اشخاص هيئه القيادة .
انعدام التجانس دة خلق فجوة رهيبه بداخل الجيش , الفجوة دى مازالت غير مرئيه , وستظل , الا انها بمجرد تعرض المؤسسه لاقل عاصفه ترابيه , ستظهر تلك الفجوة بشكل واضح , وتقسم الجيش لجزيرتين منعزلتين لا صله لكل منهما بالاخر

الموضوع ليس كارثى , بالعكس , هو اكثر من جيد , لان القوة الفعليه للجيش ستتجمع على الجزيرة الاخرى ... الاكبر , بينما تمكث هيئه القيادة واجهزتها الامنيه عاريه من اى قوة على الجزيرة الاولى ..

فساد الداخليه الضارب فى كل قطاعاتها والتجانس النفعى فيها سبب معضله عند التفكير فى محاوله تقويم اداء المؤسسه واصلاحه , فاصبحت كيان اجرب مشوة يصعب مجرد التفكير جديا فى تقويمها
كما ان حاله النقمه الشعبيه عمت الجهاز ككل بدون ادنى تفرقه نظرا لما سبق ذكرة

احد فوائد الخندق فى المؤسسه العسكريه انه احتفظ بالفساد ( بنسبه كبيرة ) فى الجزء الذى تقبع فيه الطبقه الحاكمه داخل الجيش , وقلل هذا الخندق كثيرا من تسرب الفساد للطبقات الادنى

فبالتالى عند سقوط الغطاء الشرعى , لن يسقط عن المؤسسه العسكريه ككل , بل سيسقط عن ذلك الجزء المريض
وهنا تجد نفسك بدلا من الحيرة والتفكير فى التخلص من الجسد المتعفن للداخليه , تجد نفسك امام عمليه استئصال جراحيه دقيقه فى جسد الجيش , عمليه فذة بما تعنيه الكلمه , لا تسىء للمؤسسه ولا تنتقص من شرفها , هى فقط مجرد عمليه استئصال لعضو مسرطن داخل جسد مازل يمكنه استئناف الحياة .

هل لاحظتم ما اصاب الداخليه من مذله وهوان فى الايام الحاليه
بعض المواطنين يعاملون افراد الداخليه معامله العبد او اسير الحرب , منتهى الثقه بالنفس , مقابل رعب وهلع الاخر
وضع متناقض تماما عما كان قبل يوم 28 يناير
ما السر ؟
السر هو ..... الشرعيه

نعم

لقد فشلت فكرة الاستعمار الاجنبى للوطن العربى , فشلت على مدى الف عام , حينها لجأ الغرب لحيله بديله , استبدال الاستعمار الغربى الفج بحكومات وطنيه تنفذ نفس مخططات الاستعمار وتعمل كمندوب له ..
ونجح المخطط مؤقتا.
لماذا
لماذا لم تتصدى الشعوب العربيه لحكامها كما تصدت لمستعمريها

الاجابه هى .. الشرعيه

ذلك الاجلال والتوقير الداخلى فى القلب , الاحساس بشرعيه النظام او المؤسسه , وهو احساس لا يمكن ازالته من القلب بسهوله , فوزارة العادلى حتى فترة قريبه كانت تتمتع ببقايا ذرات من تلك الشرعيه
واتنكرون ان كثيرا من افراد الشعب تمنوا ان يروا اولادهم ضباط شرطه ؟
وهم من يمارس رياضه لعن الداخليه ليل نهار ويقسم ايمانا مغلظه انه لن يزوج ابنته لضابط شرطه ؟
نعم اعلم ان هناك فئه جديه فى مشاعرها تلك , لكنى اتكلم عن الفئه الاخرى , وهم كثيرين
فبحر الكراهيه , مازال مقترنا بقترات من التوقير والشرعيه

نظرا لصدمه النظام من هجمه المارد ( كما ذكرت سلفا ) , اتخذ اجرائات فى منتهى الغباء , وكشف كل اقنعته وقرر التعامل مع شعبه بنظريه الكلاب الضاله ..
هنا تلاشت بقايا ذرات الشرعيه لتلك المؤسسه من صدور المصريين , فتعاملوا معها كما رأينا جميعا , وبما ان وزارة الداخليه كانت متصدرة للمشهد , فقد نابها الحظ الاكبر من ذلك .

ان قدرة المجلس العسكرى على اجهاض الثورة واستمرارة ككيان حاكم , كل ذلك قائم على فكرتين محوريتين :
الاولى هى الشرعيه
الثانيه هو الوهم الذى ادخل المصريون نفسهم فيه ( طواعيه ) بأن الجيش هو حامى الثورة

هنا نجد انفسنا امام توافق غريب
مما ذكرته سابقا
تعتقد ... كيف يمكن , او ماهى الاشياء الكفيله بهدم هذين العمودين ؟
ستجد ان الاجابه واحدة ... شىء واحد

ان يرتكب المجلس العسكرى حماقه ما فيجبر جموع الشعب على مواجهه الحقيقه وتتوالى باقى السلسله الانفجاريه المعتادة, وبما ان القيادات المعنيه نالها نصيبها من لعنه غباء الانظمه العربيه بان الشعب غبى وجبان , وستتاكد لديهم تلك النظريه من خلال ما حققوة من نجاحات على ارض الواقع الى الان , تلك النجاحات وذلك التشرزم لقوى الثورة , سيسببان حاله من التخمه الانتفاخ فى غدة الغرور والنرجسيه لدى هؤلاء القوم , وبالاخذ فى الاعتبار ثقافتهم الضحله ووعيهم التاريخى المعدوم , كل ذلك سيدفعهم لارتكاب عددا من الحماقات الضخمه تدفع الشعب للاستيقاظ رغما عنه , وطبعا ستكون الصدمه هائله ( للمجلس اقصد ) , ونظرا لما لديهم من سلطات مطلقه وقوة عسكريه غاشمه , سيتخذون قرارات فى منتهى الغباء , وهنا...... تسقط الشرعيه , وهنا..... تنتهى المعركه

وسقوط الشرعيه لن ينال الا الطبقه العليا كما ذكرت , نظرا لحاله التباين البشع داخل الجيش , فلا اعتقد ان يتكرر سيناريو ليبيا فى مصر لعشرات الاسباب السياسيه والاجتماعيه والسكانيه والطوبوغرافيه .

المفترض فى شخص المشير بعد امساكه بزمام الحكم فى البلد ان يحاول تقليص تلك الفجوة وردم ذلك الخندق الذى صنعه بينه وبين ضباطه نظرا لظروف سياسيه معينه , حتى يحقق التجانس المطلوب الذى يضمن عدم انقسام الجيش فى حال اضطرارة لاستخدامه فعليا فى قمع الشعب

الا ان الغباء الحتمى والغرور المزمن دفعه لزيادة تلك الفجوة , فبعد اعطاء بعض المنح الماليه للضباط من باب جبر الخواطر , استحدث عددا من اللوائح المقرفه امعانا فى خنق العاملين بالمؤسسه , يعنى ان ما اعطاة باليمين اخذة بالشمال , بالاضافه لكونه مقتر بشكل بشع تجاة ضباطه , فمع الاسف , لا يستطيع ان يكون سخيا وان اراد

وبدأت النرجسيه فى العمل , خصوصا بعد الاستفتاء , كشر عن انيابه لضباطه وبدات موجات التنكيل والاقصاء فى العمل , استدعائات , تحقيقات , اهانات متواصله , معامله غير ادميه لقطاعات ورتب باكملها ....

هم يعتقدون انهم بذلك يحكمون سيطرتهم على الجيش ( من باب العين الحمرا ) الا انهم فى الحقيقه يصلون بضباطهم لمرحله تكوين ( كتله حرجه ) اخرى داخل القوات المسلحه , اعتقد ان الكثيرين بدأوا يستشعرون وجودها هذة الايام ..

فرجال الجيش ليسوا معزولين عن العالم عما يظن البعض وليسوا ( قادمون من اعماق الصحراء ) كما قال اخرون .
فالرجل العسكرى ليس بتلك الصورة الكاريكاتوريه التى يتخيلها البعض ممثله فى شخص اشعث اغبر يعيش فى اعماق الصحراء القاحله ومنقطع الصله تماما بالعلم الخارجى ,كلا , اينعم الصورة فيها كثير من الحقيقه , ولكن نسبه كبيرة من هؤلاء الرجال على صله تامه بواقع بلادهم من خلال الجرائد والفضائيات الاخباريه , ولا تنسوا ان لديهم اسرا وعائلات بالمدن , ولا تنسوا انهم يعانون نفس معاناة المواطن العادى امام بيروقراطيه النظام وعمليات النهب والافقار المنظمه ...

واذا قرنّا ذلك بما يعانيه هؤلاء داخل وحداتهم من تعنت وفساد قيادى , يشكل معاناة اضافيه فوق رؤسهم تضاف لمعاناتهم كمواطنين مصريين , واذا اضفنا معاينتهم لما يحدث من اجهاض لاروع ملحمه شعبيه شهدتها مصر .....
اعتقد ان الصورة وضحت ولا تحتاج الى تكمله ....

سؤال جديد من نوعه :
وماذا بعد؟
ماذا لو نجحوا فعلا فى تحقيق اهدافهم واجهاض الثورة , ولم يحدث ايا من التوقعات السابق ذكرها ؟ ...
ايا كان شكل النظام القادم حينها
من البديهى والمنطقى والمسلم به , ان اى نظام , ايا كانت براعته وقدرته السياسيه , لن يستطيع باى حال من الاحول ان يمسك العصا من المنتصف .
بمعنى انه لن يستطيع الحفاظ على المصالح الامريكيه والاسرائيليه فى مصر وفى نفس الوقت يحافظ على حد ادنى معيشى يكفل للمصريين الحياة دون ضجر

معادله غير قابله للتحقيق
سيميل جزء من العصا
سيميل جزء مصلحه الغرب على الجزء الاخر

وهنا لن يجد الشعب بدا من الانتفاض ثانيه
حتى من لا علاقه له بالسياسه

ولن يكون انتفاضا ( مهذبا ) كسابقه , كلا , سيكون خاطفا وحاسما ...

ولا اعتقد ان الوضع سيطول ليصل الشعب لتلك المرحله
لا اعتقد انه سياخذ اشهرا , اوعام على اقصى تقدير
لان الوضع اصبح حرج
والاحداث تسير بمتواليه هندسيه
وما كان يمكن ان يمر بدورة تستغرق اعواما فيما مضى , لن يستغرق سوى اسابيع الان

لذلك اقول ان نظريه الدورات التارخيه غير قابله للتحقق بنفس اطارها الزمنى
فى عصرنا الحالى نظرا لوجود مدخلات مؤثرة وفعاله على المعادله

يعنى بكل الاحوال بأذن الله , سيسقط نظام الفساد فى مصر عاجلا اواجلا
واجلا دى على المدى القريب مش البعيد

----------

سعات بسال نفسى لو كانت الثورة انتهت يوم حداشر والجيش وقف مع الشعب فعلا , كنا هنبدا عهد جديد وجوانا اعضاء فاسدة تماما من قيادات عسكريه ورموز اعلاميه وفنيه ودينيه , احنا مخدوعين فيهم .

من حكمه ربنا انه اراد ان تسقط كلللللللللل الاقنعه , وهو ما يحدث خلال الايام الحاليه فعلا
اقنعه رموز دينيه , سياسيين واعلاميين وخلافه

علشان كدة حاسس ان ربنا عاوزنا نبدأ على نضافه , نبدأ صح , مستحيل بعد دة كله نرجع لنقطه الصفر ’ ايه الحكمه من كدا ؟
قراءة الاحداث لا تؤكد الا فكرة واحدة : هى ان الله قد اراد الخير لهذا الوطن ...


نظرة تانيه

مشكلتنا اننا بنقرا واقعنا من خلال حدودنا الضيقه , كأن العالم مافيهوش غير مصر وامريكا واسرائيل , ودة خطأ كبير , لان لو نظرنا للصورة من خلال واقعنا الاقليمى هنجد انها تغيرت تماما...

احنا بنتكلم عن عالم عربى بينتفض بالكامل , مش دوله بتثور وسط دول وشعوب محيطه خانعه , فاهمين معنى دة ايه ؟؟؟

اللى بيحصل دة حاله مد عربى شامله , لو حصل قصور فى اتجاة ما هتجبرة باقى الاتجاهات , مش شرط ماديا , لو كان الجبر ( شرعيا ) فقط لكفى ..

رأس الحربه فى المد دة بلدين , مصر وسوريا , لذا سنرى ان الحشد الغربى والاقليمى المضاد سيكون عندهما اضخم وما ستلاقيه الدولتان من محاولات اجهاض للثورة سيكون اكبر بمراحل من سواهما ...
لانه لو نجح القطران فى الوقوف الفعلى على اقدامهم , ستكون اللعبه تقريبا قد حسمت ...

---------

لو نظرنا بشكل اعم واشمل
على الواقع العالمى ككل

الوضع العالمى اصبح لا يسمح
بفكرة اننا ندخل تانى فى دورة واننا تتحط علينا انظمه جديدة بسياسات جديدة خاضعه للغرب
مافيش وقت خلاص
اللى يشوف العالم يدرك انه فعلا اصبح على حافه الانفجار
والوضع لن ينتظرنا عشرات السنين كمان
خلاص احنا مقبلين على مرحله تكتلات عالميه
ولينا فيها دور مهم
غصب عننا مش بمزاجنا
بحكم تاريخنا وثقلنا السكانى ووضعنا عالخريطه ومواردنا

الوضع عالميا فعلا اصبح لا يسمح بمزيد من العبث الامريكى , خصوصا على مستوى اقليمى واسع بهذا الشكل
مستحيل

خلاص احنا فى الوقت بدل الضايع

وعلى اى حال متقلقوش
اى ثورة فيها موجات مد وجذر
بس احنا اللى معندناش ثقافه ثوريه لاننها مجربنهاش
عادى جدا ممكن ثورة تستمر عشرات السنوات تقع فيها وتقوم
فرنسا قامت بثورة عنيفه جدا
بعدها ربنا بلاهم بحفنه من المعاتيه والسيكوباتيين اللى خربوا البلد زى روبسبير وامثاله
وبعد ماخلصوا منهم ابتلوا بمجموعه من طامعى السلطه زى نابليون
ووصلت الدرجه ان الملكيه تم اعلانها من تانى فى القرن التاسع عشر
واستمرت الثورة
ومحققتش اهدافها الا بعد اكتر من ستين سنه من اندلاعها

يعنى ايه ؟ احنا ممكن نقعد ستين سنه كمان ؟
لأ
لان زى ماقلت الوضع لن يسمح , ظروفنا الحاليه وظروف العصر غير ظروف القرن التاسع عشر
لو
لو مرينا بحالات المد والجذر للثورة دى , معتقدش
انها هتاخد اشهر معدودة

اهم حاجه

اوعوا اليأس ينال منكم
طول ما عندكم امل وعزيمه وايمان بالله وبالذات
ثقوا ان النهايه محتومه سلفا بأذن الله كما ذكرت


كلمه اخيرة

الزمن مش ترابيزة ولا كرسى , الزمن عجله بتدور , حضارات بتطلع لسابع سما وحضارات بيتخسف بيها الارض والايه بتتعكس تانى , الدورة الواحدة بتاخد مئات السنين , ممكن الف , بس حتميه , لان العجله لا تتوقف عن الدوران وكل من تسول له نفسه اعتراضها ستدهسه , لانها ببساطه .... القدر , من يمكنه تحدى القدر ؟!

احنا مرينا بفترة الهبوط والانحطاط , ومن حسن حظنا اننا من الجيل اللى هيشهد بزوغ الشمس العربيه والاسلاميه من جديد ( وان كنت اعتقد انها هتخرج من اطار العروبه والاسلام وستاخذ اطار اكبر واعم ).

الفجر مش متناغم دايما , ممكن تلاقى اجزاء فى الافق تسيطر عليها فلول العتمه اكتر من غيرها , ممكن بعد تبدد الظلمه نفاجأ بشبورة كثيفه يضل فيها الجميع , الا انه فى النهايه , هتشرق الشمس برضه ....

ان كان بامكان امريكا اعادة الشمس اسفل الافق , فبامكانها التحكم فى الثورات العربيه وادخالها المعمل وتقييدها على منضدة الجراحه الامريكيه والغربيه ...

الموضوع اكبر من ذلك ياسادة
انها صيرورة
حتميه تارخيه
فى التراث الاسلامى اسمها : سنه كونيه
ومن نعمرة ننكسه فى الارض

حاجه كدة ربنا عز وجل قضاها على نفسه والزم ذاته بها




وحق من رفع السماء بغير عمد

وعزة الله

وجلال الله

لتشرقن شمسنا من جديد

اليوم او غدا

لكن قريبا

وقريبا جدا

ولن يستطيع كائنا من كان ايقافها

حينها فقط

حينها........

يمكننا ان ننظر مبتسمين الى مشرق الشمس
وينظر اهل الشمال مبتسمين نحو الجنوب




-------------------------------------

كان لدى الكثير لاقوله
الا اننى مع السف , عندما تمكنت من التواجد بمنزلى لاكتب هذا المقال , اصبت بحاله من التشوش الذهنى , جعل افكارى غير مرتبه وكلامى مرسل احيانا , نظرا لصعوبه فى التركيز , لم اتمكن من اخراج المقال بالشكل الذى ترائى فى مخيلتى مساء امس الاول وامس , فالتمس المعذرة , واعتذر ايضا على تاخر النشر و .............. وسلامى وتحياتى لابطال غزة :)