الاثنين، 28 فبراير، 2011

حول البيان الاخير لشباب الثورة





بناء علي لقاء مجموعة من الائتلاف بالمجلس الأعلى للقوات المسلحة اليوم نرجو أن يرد علينا المجلس بتحديد جدول زمني في تنفيذ أول ثلاث مطالب خلال يومين


1 إقالة حكومة الفريق أحمد شفيق، وإعادة تشكيل حكومة تكنوقراط من غير الحزبيين، يترأسها شخصية وطنية متوافق عليها، في حد أقصاه شهر من الآن.


2 الإفراج عن كافة المعتقلين السياسيين، قبل وبعد 25 يناير، في مدي زمني أقصاه شهر من الآن، والنظر في العفو عن المسجونين السياسيين في غضون شهرين من الآن.


3 تقديم كل المسئولين الحقيقيين عن قتل الشهداء بإطلاق النار، أو بإصدار الأوامر للمحاكمة العادلة، بتهم واضحة، في أمر أقصاه شهر من الآن.


في حالة عدم تحديد جدول زمني للاستجابة للمطالب المذكورة أعلاه سوف يتوقف الائتلاف عن التفاوض ويعمل مع جموع ثوار مصر علي الضغط من أجل تحقيقها كي يثبت أن هذه هي مطالب جموع المصريين الذين اعتصموا في التحرير وسائر مدن مصر ولم يرحلوا الا عندما اعتقدوا أنها قيد التحقق
في حالة موافقة المجلس علي مطالب الثورة المصرية سننتقل الي التفاوض في بقية المطالب المتمثلة في التالي:


4 إعادة هيكلة وزارة الداخلية، بما يسمح بالإشراف القضائي الكامل عليها، والمراقبة الشعبية الحقيقية على أدائها، على أن يتولى رئاستها وزير مدني سياسي، في غضون الستة أشهر المحددة للفترة الانتقالية.


5 حل جهاز مباحث أمن الدولة في مدي زمني شهرين من الآن، وإلغاء توجيه المجندين لقطاع الأمن المركزي في غضون الستة أشهر المحددة للفترة الانتقالية.


6 الإسراع في تشكيل مجلس رئاسي مدني يضم شخصية عسكرية في مدي زمني شهرين من الآن ، مع تحديد صلاحيات المجلس ، ويتولي بنفسه مع الحكومة الانتقالية الإشراف علي تحقيق المطالب الثورية وإجراء الانتخابات التشريعية والرئاسية .


7 تقديم موعد انتخابات المحليات في حد أقصاه الستة شهور المحددة للفترة الانتقالية، وإعادة النظر في قانون الحكم المحلي .


8 ملاحقة بقايا النظام من الفاسدين ، والمتربحين من دماء هذا الشعب ، وتقديمهم للمحاكمة العادلة ، ومصادرة أموالهم وممتلكاتهم .


9 الشكر والتقدير للجنة التي تم تشكيلها لتعديل الدستور برئاسة المستشار طارق البشري علي المجهود القيم الذي قامت به ، ونؤكد علي أننا في سبيل إعداد ورقة دستورية وقانونية للمشاركة بها في الحوار المجتمعي الدائر حول التعديلات والقوانين المكملة لها ، ولكننا نطالب المجلس العسكري بمطالبة اللجنة بإضافة قانون الأحزاب إلي القوانين المكملة للدستور والتي تعتزم اللجنة تعديلها أو تغييرها .


بيان ائتلاف شباب الثورة
27 فبراير




طيب

البيان جميل قوى بس ليا عليه انتقادين

اعتقد اننا لازم نرتب المطالب حسب اولويتها

بمعنى انه فيه مطلب ممكن يحقق مطالب تانيه كتير

يبقى نمسك فى المطلب دة ولا نسيبه ونتشعبط فى المطالب التانيه ؟؟

انا شايف ان الاولويه دلوقت فى الاتى :

تشكيل مجلس رئاسى مدنى يسحب كااااااااااافه سلطات المجلس الاعلى اللى تخلى عنها مبارك وسلمها له

حل مباحث امن الدوله خلال ايام

اعتقد دول لو اتحققوا هيكون الموضوع شبه منتهى

لان المجلس الاعلى مش هيعرف يتحرك ويعمل الارف اللى هو بيعمله دة بدون دعم ومعاونه وتنسيق مع امن الدوله

فهمتوها دى ولا لسه ؟؟

-------

تانى حاجه

فكرة الشهر والشهرين دى انا شايفها مدة طويله قوى

وعلى النظام دة انا واثق ان المجلس الاعلى هيماطل وهيلتف على الطلبات حتى لو اعلن استجابته لها

وخلال اسبوع او اسبوعين على الاكتر النظام هيكون نازل بمظاهرة مليونيه تنادى بالاستقرار

والمجلس الاعلى هيعلن الموافقه على طلباتها ( نزولا على ارادة الشعب )

كتيييييييييييير قوى الفترة دى

احنا كل يوم بنخسر ارض مش بنكسب

مش عارف ليه محدش واخد باله من النقطه دى

--------------------

الناس اللى عماله تفطس وتهبط فى المعتصمين

اللى الجيش عمله منقصش من رصيدنا , دة نقص من رصيد المجلس الاعلى

والكلام عن ان الناس اللى متضايقه من المعتصمين كلام مالوش لازمه

لان الناس دى هيا هيا الناس اللى كانت بتنادى بوقف المظاهرات علشان خاطر يرجعوا اشغالهم

دول عواجيز الفرح اللى مبيعجبهمش العجب , ودول اساسا عمرهم ما مشيوا فى مظاهرة ولا عمرهم ما قالوا لأ

ودة كله بسبب الاعلام المصرى الوسخ بتاع منى الشاذلى وعمرو ازيط

فكرة المظاهرات من الجمعه للجمعه انا مش مقتنع بيها

هو دة بالظبط اللى الجيش عايزة

تتقلب مولد سيدى ابو المراجيح بعد الصلا , وعلى الساعه عشرة كله يروح بيته

بذمتكم الضغط كدا له اى لازمه ؟

سيبوا الناس تعتصم

ولو الجيش عاوز يضرب يضرب

اعتقد ان الشعب كله متحركش يوم 28 الا لما لقا الشباب بينضرب وبيموت فى الشوارع

انا عارف ان كلامى بايخ , بس هى دى الحقيقه

الغضب بيقل مع الزمن وعمرة ما بيزيد

خلو المجلس الاعلى يضرب الناس

والناس بعد ما بدأت تتشكك فيه هتكرهه وضباطه هيكرهوة اكتر ماهما كارهينه اصلا

مافيش وجود لكلمه ان الناس هتفضل تحبهم علطول دى

بامارة ايه يعنى !

فى كل بلد فى مصر فى ناس تم اعتقالها بدون وجه حق

والناس بدات تاخد بالها , ومتضايقه جدا من الموضوع دة


---------------

حرام عليكم , بطلوا تهبطوا فى الناس , وبطلوا ام المواقف المتذبذبه دى

حاسين نفسكم مشوشين ومش عارفين تفكروا يبقى تسكتوا احسن بدل ما تضللوا الناس معاكم

لانى عارف انها وقت ماتخرب كله هيرمى المسؤليه بعيد عنه ويقول ماليش دعوة , إن اردت الا الاصلاح ما استطعت , واللى بيتفاوضوا هما اللى ضيعوا الثورة مش احنا

-----------

احنا كأننا بنلعب ماتش

وحاليا احنا فى الوقت الاضافى

خلاص , الليله بتخلص

فبلاش الكلام بالشكل دة

احنا كمان شهر مش هنقدر نحشد ناس تانى

وهترجعوا لوقفات سلم النقابه المتكردنه , دا لو قدرتوا تعملوها اصلا

المجلس الاعلى عارف كدة كويس وبيماطل علشان يوصل للوضع دة , وبعدين الصورة تتقلب ويصبح شباب الثورة هما المخربين والبلطجيه , زى ماحصل يوم الجمعه , وزى مبارك ما قال فى خطابه بالظبط

فوقوا بقى حرام عليكم , ضيعتوا دين ام الثورة


-----


كل ما اتمناة ان طبخه المجلس الاعلى تبوظ على اخر لحظه من حيث لا يحتسبوا

انا عشمى فى غبائهم وغطرستهم كبير

وعشمى فى ربنا اكبر

يااااااااااااااااااااارب ....

------

لو اقتنعت بكلامى ارجو منك انك تنشرة على اوسع نطاق ...