الأحد، 27 مارس، 2011

نحو مشرق الشمس ...

وجدت نفسى فى وضع غريب منذ الخامس والعشرين يناير .
للمرة الاولى اتعامل فعليا مع مصطلح ( البسترة النفسيه )
هل يمكنك ان تتخيل وضعيه انسان يبكى وينتحب بحرقه من الالم نتيجه لحدث ما ثم ينفجر فى الضحك بعدها بثوان بمجرد حدوث حدث اخر ؟؟
ضغط بشع على نفسيه اى انسان,
تخيل ان يستمر هذا الوضع لاكثر من شهر,
ليل نهار,
لقد بذلت مجهودا بشع فى البوستات الماضيه لاحتفظ بالموضوعيه والعقلانيه فى كلامى , كثيرا ما عدلته , خذفت منه الكثير , استبدلت كلاما باخر اقل حدة , استأصلت بعض الالفاظ النابيه التى لم اتمكن من كبحها
كثيرا ما كنت انتظر توقيت مناسب اتمتع فيه بالحد الادنى من الهدوء النفسى لاقتنصه ببوست جديد ...

الا اننى منذ عدة ايام اثرت الابتعاد النسبى عن كل مسببات التوتر مما اثر على بالايجاب , ومن حسن الحظ اننى تمكنت من الفوز ببعض الساعات الليليه فى الهواء الطلق وبعيدا عن البشر , ووسط حاله من السلام النفسى غير العادى .

استرجعت شريط الاحداث , احداث الثورة المصريه , منذ بدايتها ..
هنا باغتنى هذا السؤال
لماذا يقتصر التفكير دائما على الوضع الحالى , واحتماليات اجهاض الثورة ورجوع النظام ( الذى لم يغادر مواقعه اصلا ) ومدى سوداويه الاوضاع فى تلك الحاله ( البعض يختلف حول مدى اقترابنا من نقطه الصفر ) وهل اذا عاد سنتمكن من الاحتفاظ ببعض من مكاسبنا المتواضعه ام ان الامر سيصبح اسوأ مما كان عليه سلفا !
اكتشفت اننا ننظر للامور نظرة محدودة وقاصرة بشكل مؤسف

نظرت للوراء , للتاريخ , تاريخ هذا الوطن , لا اقصد تلك النظرات الجزئيه , اتكلم عن صيرورة التاريخ المصرى بحد ذاتها , استقطعت القرنين الماضيين , ببساطه , لاحظت ( كما لاحظ غيرى ) ان مصر تنتابها من حين لاخر صحوات اسطوريه وقويه وغير متوقعه , اشبه ماتكون بالملاحم .... الا انه فى اللحظات الاخيرة , وقبل اقتناص النصر , تنقلب الامور بشكل مأسوى الى النقيض , ليدخل الشعب فى نفق من الاحباط والالم والهزيمه , تمر معه البلاد بمرحله سقوط مدو , يستمر لعشرات السنوات , سقوط يدمر جيلا بأكمله , ويخصى رجولته بالكامل , فصبح مفقود الامل فى نخوته ازاء الصحوة القادمه .
وبعد فترة ,, وعند ظهور جيل جديد , تبدأ بوادر صحوة جديدة , تسطع انوارها رويدا رويدا , الى ان تعم افق التاريخ , ثم فجأة ....... يحدث السقوط التالى ..

شاهدت المصرى حينما عانى من فراغ فكرى وثقافى بشع , يرافقه تعصب دينى لا يتخطى مرحله الجهل التام , اقترن بنفسيه مشوهه وخضوع واستسلام لحاله من الاستعباد , من قبل فئه محاربه قايضته مقابل توفير الامن , وقبل المصرى تلك الصفقه الخاسرة

وفجاة انتفض الجسد الهزيل ذى الجلباب المهترىء المصبوغ بالنيله ليعلن عن خروج مارد لا قبل لقوة به , تصدى لاقوى جيوش الارض حينها , وواحد من اعظم القادة العسكريين على مر التاريخ .
تصدى بكل مقوماته السلبيه , لكيان اخر يناقضه تماما فى كل شىء , فى معادله غير متوازنه على الاطلاق
الموضوع اشبه بكونك تشاهد فيلم رومانسى للغايه ثم اذ به ينقلب فجأة لفيلم رعب او خيال علمى ...

ان اى متمعن فى التاريخ توقف لساعات امام تلك الورقات فى ذهول , فهو اعتاد على منظومه اجتماعيه وسياسيه وفكريه معينه لهذا الوطن طوال 540 عاما خلت , بنى عليها حقائق ومسلمات تاريخيه , ثم .... اذا كل هذا يتم نسفه فى لحظات

تخطى ذلك المواطن البائس ضعفه وعجزة وفوضويته وكل اصنامه وتابوهاته الفكريه
تخطى سيطرة مطلقه لرجال دين جثموا فوقه بقوة بالغه لعشرات السنين
تخطى اسطورة عسكريه كان لا يجرؤ على رفع عينه اليها
تخطى الحرب النفسيه والدعايا المضادة لجيش الفرنسيس
سطر ملحمه تاريخيه بمعنى الكلمه فى بولاق والازهر ورشيد وقنا وابنود وجهينه وغيرهم ..

وصل المواطن المصرى بعد خروج الحمله الفرنسيه من مصر لوضعيه تاريخيه غريبه
انه اصبح فعليا سيد قرارة على ارضه ووطنه
نجدة فجأة طرد كل المماليك من بر ( القاهرة ) خلال ساعه عندما شرعوا فى فرض ضرائب مجحفه
وهم من ساموة سوء العذاب لمئات السنين
نجدة يمضى كلمته فيمن يحكم مصر , بل ويتحدى سلطان المسلمين صراحه , ذلك البعبع والمسلمه الفكريه التى لم يكن يجرؤ احد ان يرد لها كلمه
وضع غريب , لكن للاسف , ونتيجه للخيارات الخاطئه هوى المصرى من جديد بداخل الجب , واستمر فى هذة الوضعيه لبضع وسبعون سنه تاليه .

ثم كانت صحوة عرابى
ثم كان السقوط الثانى بسبب السلبيه والطيبه الزائدة والقرارات المتاخرة
سقوط دمر جيلا باكمله فتحول اغلبه الى كلاب للاحتلال ساموا شعب مصر سوء العذاب لسنوات تاليه ومن بقى , فقد قامت السجون والمنافى بالواجب اللازم مع امثاله .

ثم اتت صحوة اخرى و استشعرناها فى سنوات الخمسينات , وما لبثنا ان دخلنا مرة اخرى فى نفق الذل والمهانه .. والهزيمه .


التاريخ المصرى ياخذ شكل دورات تستمر الواحدة منها لعشرات السنين , حركه اشبه بغليان الماء , اعلى , ثم اسفل , ثم اعلى من جديد ...

عندما انظر لواقعنا الحالى فى ضوء الماضى , اخرج بشيئان :
الاول ( وهو الجانب المظلم ) ان هناك ما يشبه اللعنه المقترنه بتاريخ هذا الوطن , فلا تقوم له قومه الا تبعها سقوط بشع , لاسباب مختلفه , تعددت الاسباب والنحس واحد ..
الثانى ( وهو الجانب المشرق ) هو الطبيعه الغريبه والمتفردة لذاك الكائن الغريب المدعو ( مصرى )
عقليه متناقضه بمعنى الكلمه وتصرفات غير متوقعه وشخصيات متداخله لا تعلم ايها سيظهر بين لحظه واخرى

كثيرا ما كنت اشعر فى قرارة نفسى بانه غبى بفطرته ( من خلال مشاهداتى للتاريخ ) الا انه صدمنى بردود فعل تتنافى تماما مع تلك الشخصيه .
اذن ما تفسير هذا الوضع ؟
التفسير ان ما يعانيه المواطن المصرى فى اوقات سقوطه التاريخيه , هى حاله من الغفله المتعمدة او الاستغباء المقصود , فالمصرى امهر من يتحايل على نفسه وشخصيته ويلتف عليها ليتجنب مواجهه الحقائق ويحافظ على قدر من السلام النفسى الذى يمكنه من استئناف حياته بدون ضغوط نفسيه
يعنى من الاخر , بيشتغل نفسه بمزاجه ... بس بيقتنع بكدة لدرجه انه مش بيكون عارف انه بيشتغل نفسه ...

لكن فيه اوقات بتكون الحقائق على درجه من القوة والسطوع انها تجبرة على النظر فى المرآة , ان يواجه نفسه ॥ يواجه الحقيقه , حينها ... يخرج الاخر

ازدواجيه غريبه وشيزوفرينيا شديدة التباين , انه اشبه بمستر هايد , ذلك الرجل الدمث الهادىء نهارا , والوحش الكاسر ليلا ...
اذن لنقل ان المصرى ليس غبيا بطبعه بل يتصنع الغباء ليتلافى الصدام مع نفسه , فالضغوط النفسيه تدفعك لاتخاذ مواقف على ارض الواقع حتى تتخلص منها , وتلك المواقف الايجابيه لها ثمن باهظ , والمصرى بطبعه يفضل الراحه والهدوء , فالافضل قطع المياة من المنبع والالتفاف حول النفس بذلك الشكل الغريب

والمعضله التاريخيه لطاوغيت مصر انهم غير قادرون على فهم تلك النقطه واستيعابها , فهم مقتنعون دائما ان المصرى انسان غبى وجبان , مما يسبب لهم صدمه بالغه عندما يواجهون ( الاخر )

وقد تكون تلك الصدمه نقطه قوة للمواطن المصرى , فلا يخفى عليكم ما يترتب عليها من شلل وفوضويه فى اتخاذ القرارات , وحاله عامه من الهلع والرعب فى دوائر السلطه ... كل ذلك يدفعها لاتخاذ قرارات جذريه وسريعه ومتهورة , الا ان تلك الاجرائات فى الحقيقه لا تكون الا محطه البنزين التى تمنح ثورة المصريين ما يكفيها من وقود ليمكنها من سحق طغاتها
لذلك نراهم لا يتعلمون من اخطائهم ابدا , لانهم ببساطه ( لا يفهمون )

عندما نستخدم تلك القواعد والمفاتيح لقراءة وضعنا الحالى بشكل اكثر شمولا , نجدة كما يلى :

- شعب يمارس قدرته على خداع نفسه بشكل بارع للغايه امام واقع مؤسف بكل ما تعنيه الكلمه

- يكسر القاعدة مجموعه من الشباب ويدخلون فى مواجهه غير متكافئه مع السلطه ,,, اغلبهم ليس له جدول او مخطط ولا سقف ولا مطالب , فقط فعلوا ما فعلوة غريزيا ..

- وجدت الكتله الصامته نفسها امام خشبه مسرح , مجبرة على مشاهدة ذلك الفيلم ,, شباب مغلوب على امرة يواجه دب مفترس لا قبل له به , المفترض حسم المعركه خلال ساعات , الا ان الخصم الضعيف لجأ غريزيا الى المناورة ونجح فيها ومارسها ببراعه , خصوصا مع الاخذ فى الاعتبار ضخامه ذلك الدب وثقل حركته وقدرته على الرد السريع والحركه المباغته والحشد المتكرر فى اماكن مختلفه ...

- كل هذا منح الخصم الضعيف نفسا اطول للمعركه , فوجدت الكتله الصامته نفسها مجبرة على مواجهه واقعها الاليم من خلال فيلم سينمائى ثلاثى الابعاد طوييييييل المدة يحدث امامهم فى كل احياء القاهرة والاسكندريه والسويس ...

- هنا اجبرت الكتله الصامته على مواجهه نفسها , مواجهه الحقيقه , الاستسلام لذلك الضغط النفسى البشع , من احساس بالمهانه والذل وانعدام الكرامه والاستخفاف , وهو ضغط لا قبل للجموع باحتمالها।

- وحسمت الكتله الصامته خيارتها سريعا خلال يومين , فلا يمكنها تحمل مواجهه الذات اكثر من ذلك , اذن , فليخرج الاخر الان , ولا مانع من التضحيه , فلينتهى ذلك الامر, ولنسدل الستار على تلك المهزله ...

- وقد كان , سحق اكبر جهاز امنى فى الشرق الاوسط واكثر اقرانه قوة وبشطا وتنظيما وخبرة , سقط فى ساعات
وهنا وجد الانسان المصرى نفسه فى مواجهه تابو فكرى اخر, انه بطبعه لا يحب الانتقام ولا سفك الدماء , كما ان النظام فى عقول العامه تمثله دائما الشرطه , فالشرطه هى ما يعرفونه من النظام وما يتعاملون معه ولا علم لهم بسواها , لذا تجدهم يطلقون عليها ( الحكومه ) , فذلك البسيط اختصر كل نظريات الدول الامنيه فاطلق على الشرطى لفظ الحكومه , بمنتهى البساطه ..

- افرغت الكتله الصامته جزء كبير من غضبها الكامن والمخزن على مدى سنين فى وجه الداخليه , كثير من البخار بداخل الحله قد تم نفثه من خلال ثقب ( الداخليه )

- وجدت الاغلبيه نفسها امام خيارين , الاول اكمال الطريق واسقاط منظومه الفساد بقوة الجماهير , والاخر هو الحشد والتلويح بقبضتها الغليظه للغايه فى وجه النظام , تماما كما تفعل الغوريلا عندما يدخل شخص ما فى منطقه نفوذها

-----

لا اود الدخول فى مزيد من التفاصيل , فما حدث قد تحدثت عنه اكثر من مرة بالبوستات السابقه , ما اودة الان هو ذكر عدد من النقاط التى قد تخفى على البعض :

اللى يعرف المصرى كويس , يعرف قد ايه هو قوى , مش مواضيع انشا والله , الموضوع فعلا زى ما بقول كدة , يمكن انتوا حسيتوا بيها فى الفترة من يوم 30 يناير الى 11 فبراير , اللى كان بيتابع وكالات الانباء الغربيه وتغطيتها للحدث هيحس قد ايه البلد دى تقيله وقد ايه شعبها قوى ومؤثر لما يقرر يتحرك , وهيشوف مدى الهلع اللى كانت فيه دوائر صنع القرار فى اسرائيل والولايات المتحدة .

المصرى مش غبى , مش كل الناس مضحوك عليها ومخدوعه فى المجلس الاعلى , بس كل ما فى الموضوع ان الجيش يتمتع بمكانه خاصه فى قلوب المصريين , المكانه دى اتحفرت جوا قلوبهم على مدى مئات السنين تجاة الجماعه الوظيفيه اللى بتتولى مهمه الدفاع عنهم , كبرت قوى المكانه دى بفعل التجربه الناصريه ...
فالموضوع اشبه بشخص كان ابوة بيمثل له قدوة ومثل اعلى وعندة دة افضل انسان فى العالم ..
اكتشف ان ابوة حرامى ونصاب وشيخ منصر وقواد وفيه كل العبر , الطبيعى انه هيحاول يتجاهل الحقائق دى ويعتبر نفسه معرفهاش , ولو فشل هيبدأ ينكرها بشكل هستيرى وبدون منطق , ثم هيحاول يخترع مبررات , واخيرا لن يجد بدا من الاعتراف بالحقيقه , مما سيدفعه لاتخاذ موقف مغاير ضد ابوة ...
فاللى حصل ان الانسان المصرى استغل قدرته التاريخيه على مراوغه الذات وتقمص شخصيه الغبى علشان ميشوفش قدوته وهى بتنهار ...
بس اللذيذ فى الموضوع ان رتم الاحداث اصبح سريع جدا والالوان بقت فاقعه قوى , يعنى مسأله فشل المواطن المصرى فى خطه مراوغه الذات دى , مسأله محتومه وستاتى سريعا باذن الله .

الناس عارفه
عارفه والله وفاهمه كل حاجه , بس هما بيحبوا يشتغلوا نفسهم , ومتنسوش ان الناس البسيطه دى اغلبها كان مجند فى يوم من الايام وعارفين اللى فيها , طبعا اكيد فيه ناس مخدوعه فعلا ومش فاهمه , بس انا بتكلم عن الاغلبيه , الاغلبيه فاهمه كويس قوى , وان اظهروا خلاف ذلك

اكتشفت ان الوعى لا علاقه له بالخبرة ولا بالدراسه ولا الثقافه ولا الذكاء
فحين اصيب كثيرا من اهل النخبه السياسيه والناشطين المخضرمين بحاله من للسعان والجنون المؤقت الذى طاش بصوابهم , اندهش من وعى كثير من الناس ( الاميين تماما ) وقدرتهم الرائعه على قراءة الواقع ....
الوعى منبته الفطرة البشريه النقيه , وليس المكتسبات العقليه .

وزارة الداخليه المصريه كانت بتحمل بداخلها عاملين , عامل قوة وعامل ضعف , عامل الضعف هو الفساد , الفساد فيرس ومرض بينخر جسد اى مؤسسه , حتى لو كانت مؤسسه بتحمى الفساد , فافضل وسيله لحمايه الفساد , ان تقوم على حمايته مؤسسه خاليه من الفساد ....

فساد الشرطه كان عامل انهيارها

عامل القوة هو التجانس الفكرى والنفعى , اللى ظهر بشكل اكثر وضوحا فى عهد العادلى , التجانس دة اللى كان موجود بين قادة المؤسسه ومرؤسيهم من ضباط ودرجات اخرى , التجانس دة حقق تماسك نسبى للمؤسسه الامنيه امام عاصفه الثورة , اينعم لم يصمد , نظرا لتضافر عوامل هدامه اخرى , بس هو كان عامل قوة

التجانس دة مش موجود فى الجيش ( من حسن الحظ ) لان القيادة الفاسدة عملت خندق واسع بينها وبين من دونها وضمت الى جوارها اجهزة امنيه بحيث تحسب عليها مقابل دفاعها عن اشخاص هيئه القيادة .
انعدام التجانس دة خلق فجوة رهيبه بداخل الجيش , الفجوة دى مازالت غير مرئيه , وستظل , الا انها بمجرد تعرض المؤسسه لاقل عاصفه ترابيه , ستظهر تلك الفجوة بشكل واضح , وتقسم الجيش لجزيرتين منعزلتين لا صله لكل منهما بالاخر

الموضوع ليس كارثى , بالعكس , هو اكثر من جيد , لان القوة الفعليه للجيش ستتجمع على الجزيرة الاخرى ... الاكبر , بينما تمكث هيئه القيادة واجهزتها الامنيه عاريه من اى قوة على الجزيرة الاولى ..

فساد الداخليه الضارب فى كل قطاعاتها والتجانس النفعى فيها سبب معضله عند التفكير فى محاوله تقويم اداء المؤسسه واصلاحه , فاصبحت كيان اجرب مشوة يصعب مجرد التفكير جديا فى تقويمها
كما ان حاله النقمه الشعبيه عمت الجهاز ككل بدون ادنى تفرقه نظرا لما سبق ذكرة

احد فوائد الخندق فى المؤسسه العسكريه انه احتفظ بالفساد ( بنسبه كبيرة ) فى الجزء الذى تقبع فيه الطبقه الحاكمه داخل الجيش , وقلل هذا الخندق كثيرا من تسرب الفساد للطبقات الادنى

فبالتالى عند سقوط الغطاء الشرعى , لن يسقط عن المؤسسه العسكريه ككل , بل سيسقط عن ذلك الجزء المريض
وهنا تجد نفسك بدلا من الحيرة والتفكير فى التخلص من الجسد المتعفن للداخليه , تجد نفسك امام عمليه استئصال جراحيه دقيقه فى جسد الجيش , عمليه فذة بما تعنيه الكلمه , لا تسىء للمؤسسه ولا تنتقص من شرفها , هى فقط مجرد عمليه استئصال لعضو مسرطن داخل جسد مازل يمكنه استئناف الحياة .

هل لاحظتم ما اصاب الداخليه من مذله وهوان فى الايام الحاليه
بعض المواطنين يعاملون افراد الداخليه معامله العبد او اسير الحرب , منتهى الثقه بالنفس , مقابل رعب وهلع الاخر
وضع متناقض تماما عما كان قبل يوم 28 يناير
ما السر ؟
السر هو ..... الشرعيه

نعم

لقد فشلت فكرة الاستعمار الاجنبى للوطن العربى , فشلت على مدى الف عام , حينها لجأ الغرب لحيله بديله , استبدال الاستعمار الغربى الفج بحكومات وطنيه تنفذ نفس مخططات الاستعمار وتعمل كمندوب له ..
ونجح المخطط مؤقتا.
لماذا
لماذا لم تتصدى الشعوب العربيه لحكامها كما تصدت لمستعمريها

الاجابه هى .. الشرعيه

ذلك الاجلال والتوقير الداخلى فى القلب , الاحساس بشرعيه النظام او المؤسسه , وهو احساس لا يمكن ازالته من القلب بسهوله , فوزارة العادلى حتى فترة قريبه كانت تتمتع ببقايا ذرات من تلك الشرعيه
واتنكرون ان كثيرا من افراد الشعب تمنوا ان يروا اولادهم ضباط شرطه ؟
وهم من يمارس رياضه لعن الداخليه ليل نهار ويقسم ايمانا مغلظه انه لن يزوج ابنته لضابط شرطه ؟
نعم اعلم ان هناك فئه جديه فى مشاعرها تلك , لكنى اتكلم عن الفئه الاخرى , وهم كثيرين
فبحر الكراهيه , مازال مقترنا بقترات من التوقير والشرعيه

نظرا لصدمه النظام من هجمه المارد ( كما ذكرت سلفا ) , اتخذ اجرائات فى منتهى الغباء , وكشف كل اقنعته وقرر التعامل مع شعبه بنظريه الكلاب الضاله ..
هنا تلاشت بقايا ذرات الشرعيه لتلك المؤسسه من صدور المصريين , فتعاملوا معها كما رأينا جميعا , وبما ان وزارة الداخليه كانت متصدرة للمشهد , فقد نابها الحظ الاكبر من ذلك .

ان قدرة المجلس العسكرى على اجهاض الثورة واستمرارة ككيان حاكم , كل ذلك قائم على فكرتين محوريتين :
الاولى هى الشرعيه
الثانيه هو الوهم الذى ادخل المصريون نفسهم فيه ( طواعيه ) بأن الجيش هو حامى الثورة

هنا نجد انفسنا امام توافق غريب
مما ذكرته سابقا
تعتقد ... كيف يمكن , او ماهى الاشياء الكفيله بهدم هذين العمودين ؟
ستجد ان الاجابه واحدة ... شىء واحد

ان يرتكب المجلس العسكرى حماقه ما فيجبر جموع الشعب على مواجهه الحقيقه وتتوالى باقى السلسله الانفجاريه المعتادة, وبما ان القيادات المعنيه نالها نصيبها من لعنه غباء الانظمه العربيه بان الشعب غبى وجبان , وستتاكد لديهم تلك النظريه من خلال ما حققوة من نجاحات على ارض الواقع الى الان , تلك النجاحات وذلك التشرزم لقوى الثورة , سيسببان حاله من التخمه الانتفاخ فى غدة الغرور والنرجسيه لدى هؤلاء القوم , وبالاخذ فى الاعتبار ثقافتهم الضحله ووعيهم التاريخى المعدوم , كل ذلك سيدفعهم لارتكاب عددا من الحماقات الضخمه تدفع الشعب للاستيقاظ رغما عنه , وطبعا ستكون الصدمه هائله ( للمجلس اقصد ) , ونظرا لما لديهم من سلطات مطلقه وقوة عسكريه غاشمه , سيتخذون قرارات فى منتهى الغباء , وهنا...... تسقط الشرعيه , وهنا..... تنتهى المعركه

وسقوط الشرعيه لن ينال الا الطبقه العليا كما ذكرت , نظرا لحاله التباين البشع داخل الجيش , فلا اعتقد ان يتكرر سيناريو ليبيا فى مصر لعشرات الاسباب السياسيه والاجتماعيه والسكانيه والطوبوغرافيه .

المفترض فى شخص المشير بعد امساكه بزمام الحكم فى البلد ان يحاول تقليص تلك الفجوة وردم ذلك الخندق الذى صنعه بينه وبين ضباطه نظرا لظروف سياسيه معينه , حتى يحقق التجانس المطلوب الذى يضمن عدم انقسام الجيش فى حال اضطرارة لاستخدامه فعليا فى قمع الشعب

الا ان الغباء الحتمى والغرور المزمن دفعه لزيادة تلك الفجوة , فبعد اعطاء بعض المنح الماليه للضباط من باب جبر الخواطر , استحدث عددا من اللوائح المقرفه امعانا فى خنق العاملين بالمؤسسه , يعنى ان ما اعطاة باليمين اخذة بالشمال , بالاضافه لكونه مقتر بشكل بشع تجاة ضباطه , فمع الاسف , لا يستطيع ان يكون سخيا وان اراد

وبدأت النرجسيه فى العمل , خصوصا بعد الاستفتاء , كشر عن انيابه لضباطه وبدات موجات التنكيل والاقصاء فى العمل , استدعائات , تحقيقات , اهانات متواصله , معامله غير ادميه لقطاعات ورتب باكملها ....

هم يعتقدون انهم بذلك يحكمون سيطرتهم على الجيش ( من باب العين الحمرا ) الا انهم فى الحقيقه يصلون بضباطهم لمرحله تكوين ( كتله حرجه ) اخرى داخل القوات المسلحه , اعتقد ان الكثيرين بدأوا يستشعرون وجودها هذة الايام ..

فرجال الجيش ليسوا معزولين عن العالم عما يظن البعض وليسوا ( قادمون من اعماق الصحراء ) كما قال اخرون .
فالرجل العسكرى ليس بتلك الصورة الكاريكاتوريه التى يتخيلها البعض ممثله فى شخص اشعث اغبر يعيش فى اعماق الصحراء القاحله ومنقطع الصله تماما بالعلم الخارجى ,كلا , اينعم الصورة فيها كثير من الحقيقه , ولكن نسبه كبيرة من هؤلاء الرجال على صله تامه بواقع بلادهم من خلال الجرائد والفضائيات الاخباريه , ولا تنسوا ان لديهم اسرا وعائلات بالمدن , ولا تنسوا انهم يعانون نفس معاناة المواطن العادى امام بيروقراطيه النظام وعمليات النهب والافقار المنظمه ...

واذا قرنّا ذلك بما يعانيه هؤلاء داخل وحداتهم من تعنت وفساد قيادى , يشكل معاناة اضافيه فوق رؤسهم تضاف لمعاناتهم كمواطنين مصريين , واذا اضفنا معاينتهم لما يحدث من اجهاض لاروع ملحمه شعبيه شهدتها مصر .....
اعتقد ان الصورة وضحت ولا تحتاج الى تكمله ....

سؤال جديد من نوعه :
وماذا بعد؟
ماذا لو نجحوا فعلا فى تحقيق اهدافهم واجهاض الثورة , ولم يحدث ايا من التوقعات السابق ذكرها ؟ ...
ايا كان شكل النظام القادم حينها
من البديهى والمنطقى والمسلم به , ان اى نظام , ايا كانت براعته وقدرته السياسيه , لن يستطيع باى حال من الاحول ان يمسك العصا من المنتصف .
بمعنى انه لن يستطيع الحفاظ على المصالح الامريكيه والاسرائيليه فى مصر وفى نفس الوقت يحافظ على حد ادنى معيشى يكفل للمصريين الحياة دون ضجر

معادله غير قابله للتحقيق
سيميل جزء من العصا
سيميل جزء مصلحه الغرب على الجزء الاخر

وهنا لن يجد الشعب بدا من الانتفاض ثانيه
حتى من لا علاقه له بالسياسه

ولن يكون انتفاضا ( مهذبا ) كسابقه , كلا , سيكون خاطفا وحاسما ...

ولا اعتقد ان الوضع سيطول ليصل الشعب لتلك المرحله
لا اعتقد انه سياخذ اشهرا , اوعام على اقصى تقدير
لان الوضع اصبح حرج
والاحداث تسير بمتواليه هندسيه
وما كان يمكن ان يمر بدورة تستغرق اعواما فيما مضى , لن يستغرق سوى اسابيع الان

لذلك اقول ان نظريه الدورات التارخيه غير قابله للتحقق بنفس اطارها الزمنى
فى عصرنا الحالى نظرا لوجود مدخلات مؤثرة وفعاله على المعادله

يعنى بكل الاحوال بأذن الله , سيسقط نظام الفساد فى مصر عاجلا اواجلا
واجلا دى على المدى القريب مش البعيد

----------

سعات بسال نفسى لو كانت الثورة انتهت يوم حداشر والجيش وقف مع الشعب فعلا , كنا هنبدا عهد جديد وجوانا اعضاء فاسدة تماما من قيادات عسكريه ورموز اعلاميه وفنيه ودينيه , احنا مخدوعين فيهم .

من حكمه ربنا انه اراد ان تسقط كلللللللللل الاقنعه , وهو ما يحدث خلال الايام الحاليه فعلا
اقنعه رموز دينيه , سياسيين واعلاميين وخلافه

علشان كدة حاسس ان ربنا عاوزنا نبدأ على نضافه , نبدأ صح , مستحيل بعد دة كله نرجع لنقطه الصفر ’ ايه الحكمه من كدا ؟
قراءة الاحداث لا تؤكد الا فكرة واحدة : هى ان الله قد اراد الخير لهذا الوطن ...


نظرة تانيه

مشكلتنا اننا بنقرا واقعنا من خلال حدودنا الضيقه , كأن العالم مافيهوش غير مصر وامريكا واسرائيل , ودة خطأ كبير , لان لو نظرنا للصورة من خلال واقعنا الاقليمى هنجد انها تغيرت تماما...

احنا بنتكلم عن عالم عربى بينتفض بالكامل , مش دوله بتثور وسط دول وشعوب محيطه خانعه , فاهمين معنى دة ايه ؟؟؟

اللى بيحصل دة حاله مد عربى شامله , لو حصل قصور فى اتجاة ما هتجبرة باقى الاتجاهات , مش شرط ماديا , لو كان الجبر ( شرعيا ) فقط لكفى ..

رأس الحربه فى المد دة بلدين , مصر وسوريا , لذا سنرى ان الحشد الغربى والاقليمى المضاد سيكون عندهما اضخم وما ستلاقيه الدولتان من محاولات اجهاض للثورة سيكون اكبر بمراحل من سواهما ...
لانه لو نجح القطران فى الوقوف الفعلى على اقدامهم , ستكون اللعبه تقريبا قد حسمت ...

---------

لو نظرنا بشكل اعم واشمل
على الواقع العالمى ككل

الوضع العالمى اصبح لا يسمح
بفكرة اننا ندخل تانى فى دورة واننا تتحط علينا انظمه جديدة بسياسات جديدة خاضعه للغرب
مافيش وقت خلاص
اللى يشوف العالم يدرك انه فعلا اصبح على حافه الانفجار
والوضع لن ينتظرنا عشرات السنين كمان
خلاص احنا مقبلين على مرحله تكتلات عالميه
ولينا فيها دور مهم
غصب عننا مش بمزاجنا
بحكم تاريخنا وثقلنا السكانى ووضعنا عالخريطه ومواردنا

الوضع عالميا فعلا اصبح لا يسمح بمزيد من العبث الامريكى , خصوصا على مستوى اقليمى واسع بهذا الشكل
مستحيل

خلاص احنا فى الوقت بدل الضايع

وعلى اى حال متقلقوش
اى ثورة فيها موجات مد وجذر
بس احنا اللى معندناش ثقافه ثوريه لاننها مجربنهاش
عادى جدا ممكن ثورة تستمر عشرات السنوات تقع فيها وتقوم
فرنسا قامت بثورة عنيفه جدا
بعدها ربنا بلاهم بحفنه من المعاتيه والسيكوباتيين اللى خربوا البلد زى روبسبير وامثاله
وبعد ماخلصوا منهم ابتلوا بمجموعه من طامعى السلطه زى نابليون
ووصلت الدرجه ان الملكيه تم اعلانها من تانى فى القرن التاسع عشر
واستمرت الثورة
ومحققتش اهدافها الا بعد اكتر من ستين سنه من اندلاعها

يعنى ايه ؟ احنا ممكن نقعد ستين سنه كمان ؟
لأ
لان زى ماقلت الوضع لن يسمح , ظروفنا الحاليه وظروف العصر غير ظروف القرن التاسع عشر
لو
لو مرينا بحالات المد والجذر للثورة دى , معتقدش
انها هتاخد اشهر معدودة

اهم حاجه

اوعوا اليأس ينال منكم
طول ما عندكم امل وعزيمه وايمان بالله وبالذات
ثقوا ان النهايه محتومه سلفا بأذن الله كما ذكرت


كلمه اخيرة

الزمن مش ترابيزة ولا كرسى , الزمن عجله بتدور , حضارات بتطلع لسابع سما وحضارات بيتخسف بيها الارض والايه بتتعكس تانى , الدورة الواحدة بتاخد مئات السنين , ممكن الف , بس حتميه , لان العجله لا تتوقف عن الدوران وكل من تسول له نفسه اعتراضها ستدهسه , لانها ببساطه .... القدر , من يمكنه تحدى القدر ؟!

احنا مرينا بفترة الهبوط والانحطاط , ومن حسن حظنا اننا من الجيل اللى هيشهد بزوغ الشمس العربيه والاسلاميه من جديد ( وان كنت اعتقد انها هتخرج من اطار العروبه والاسلام وستاخذ اطار اكبر واعم ).

الفجر مش متناغم دايما , ممكن تلاقى اجزاء فى الافق تسيطر عليها فلول العتمه اكتر من غيرها , ممكن بعد تبدد الظلمه نفاجأ بشبورة كثيفه يضل فيها الجميع , الا انه فى النهايه , هتشرق الشمس برضه ....

ان كان بامكان امريكا اعادة الشمس اسفل الافق , فبامكانها التحكم فى الثورات العربيه وادخالها المعمل وتقييدها على منضدة الجراحه الامريكيه والغربيه ...

الموضوع اكبر من ذلك ياسادة
انها صيرورة
حتميه تارخيه
فى التراث الاسلامى اسمها : سنه كونيه
ومن نعمرة ننكسه فى الارض

حاجه كدة ربنا عز وجل قضاها على نفسه والزم ذاته بها




وحق من رفع السماء بغير عمد

وعزة الله

وجلال الله

لتشرقن شمسنا من جديد

اليوم او غدا

لكن قريبا

وقريبا جدا

ولن يستطيع كائنا من كان ايقافها

حينها فقط

حينها........

يمكننا ان ننظر مبتسمين الى مشرق الشمس
وينظر اهل الشمال مبتسمين نحو الجنوب




-------------------------------------

كان لدى الكثير لاقوله
الا اننى مع السف , عندما تمكنت من التواجد بمنزلى لاكتب هذا المقال , اصبت بحاله من التشوش الذهنى , جعل افكارى غير مرتبه وكلامى مرسل احيانا , نظرا لصعوبه فى التركيز , لم اتمكن من اخراج المقال بالشكل الذى ترائى فى مخيلتى مساء امس الاول وامس , فالتمس المعذرة , واعتذر ايضا على تاخر النشر و .............. وسلامى وتحياتى لابطال غزة :)

السبت، 12 مارس، 2011

اخر ماعندى

تانى وتالت ورابع علشان الناس اللى مقرتش البوستات اللى قبل كدة , وعلشان الناس اللى قرت ومفهمتش , وعلشان الناس اللى قرت ونسيت , وعلشان الناس اللى مش عاوزة تقرا ولا عاوزة تفهم

وزير الدفاع ورئيس اركانه وهيئه قيادته مكونه من قادة قواته وقادة الجيوش والمناطق ومديرى الادارات والهيئات وادارة المخابرات الحربيه وجميع العاملين بها والمنتمين اليها , وجميع العاملين بادارة الشرطه العسكريه والتحريات العسكريه , وبهيئه القضاء العسكرى
كل الفئات دى تدين بولاء كاااااااااااااامل لمبارك ولنظامه السابق , ومن اكبرالمنتفعين بنظامه , ومن اقوى اركان نظام مبارك , وغير ممكن ولا وارد ان تتنازل عن ولائها دة للحظه , لانه بكل بساطه معناة الكشف عن فسادهم ودخولهم دائرة الحساب مع النظام ورحيلهم عن مراكزهم ...

هل من المعقول ان يضرب مبارك مصر بكل هذا الفساد طوال ثلاثين سنه ولا ينال الجيش منه شىء ؟
مع العلم ان الجيش اكبر مستهدف , اولا من مبارك لأنه كان يحسب ان الجيش هو القوة الوحيدة التى يمكنها الانقلاب عليه , ثانيا من امريكا واسرائيل ( آلهه مبارك ونظامه ) وانتوا عارفين ليه كويس .
ياسادة
الجيش ليس المدينه الفاضله
ولا حتى محصور الفساد
الفساد منتشر فيه زى اى مؤسسه اخرى ويمكن اكتر كمان
ومحدش يقول لى لأ اصله له طبيعه خاصه واصل دى مؤسسه حساسه
كلا ياسيدى الفاضل
قاعدة
فى عهد مبارك
كلما زادت اهميه المؤسسه كلما زادت نسبه الفساد فيها
واديكم شفتوا مخابرات عمر سليمان , ومش هقول مخابرات مصر
لأن اللى حصل خلال التلاته وتلاتين سنه اللى فاتت لم يكن مجرد حمله سرقه ونهب
لأ
دا كان مخطط تخريبى على اوسع مستوى , برعايه امريكيه واسرائيليه وبايدى مصريه
وكل مرشح لمنصب قيادى كان لابد عليه اولا ان يثبت ولائه وكفائته التخريبيه , وإلا........

ومع الاسف , الجيش اكبر مستهدف من المخطط دة مع فارق بسيط
التخريب فى اى مكان تانى يتم على عينك ياتاجر , وبشكل مفضوح , وبعض الجهات بيكون عندها من الجرأة قدر كافى ولو لمجرد التلميح عن التخريب دة , وان كان بينظر اليه خطأ على انه مجرد عمليه نهب وسرقه ..
اما المؤسسات المهمه , فكان الموضوع بيتم بشكل اسرع واكثر فعاليه وفى نفس الوقت خبيث ومستتر للغايه , لدرجه انه قد يغيب عن فهم نسبه كبيرة من العاملين بالمؤسسه نفسها ।
امثله :
- زكريا عزمى فى مؤسسه الرئاسه
- عمر سليمان فى المخابرات
- طنطاوى وعنان فى الجيش

وبالمناسبه
زكريا عزمى على صله وثيقه جدا بطنطاوى وكثيرا ماتدخل فى شئون الجيش , يعنى ممكن تسموة وزير دفاع مبارك رقم 2
باختصار
الجيش عبارة عن صورة مصغرة من مصر
بس الوانها فاقعه قوى
فيه ناس متحكمه فى كل حاجه ولها سلطات مطلقه , وطغيان بشع , سلطه , ونهب , وسرقه
بيحميهم اجهزة امنيه بالغه القسوة والشراسه , اكثر بمراحل من امن الدوله ,
وفيه فئات مغلوبه على امرها ومستضعفه من ضباط وصف وجنود , دول القاعدة العريضه , منهم اللى بيفتح مخه ويبوس الايادى علشان ينوبه من الحب جانب , ويمكن يوصل فى يوم , وفيهم اللى بيقاوم وبيقول لأ ودول بيروحوا ورا المجرة كلها ( ورا الشمس محفوظه لبتوع امن الدوله ) , وفيه اللى فى حاله وبيقول ياحيطه دارينى .

اللى حصل ايام مبارك انه صدرت اوامر اكتر من مرة بضرب وسحق المتظاهرين وفض التجمع فى التحرير
مرة صدرت اوامر للطيران بدك التحرير
مرة صدر نفس الامر للدبابات
مرة حاولوا يسدوا المداخل وفشلوا
مرة حاولوا يمشوا بنظام الاعتقالات الفرديه للنشطاء , ومحاوله منع الناس من دخول الميدان بترويج الاشاعات والترخيم على الناس اللى داخله , ومقدروش لان كثافه وضغط المتظاهرين كانت اكبر .

بس ربنا سبحانه وتعالى من رحمته انه جعل تدمير مبارك فى تدبيرة
مبارك جاب وزير دفاع مكروة على مستوى الجيش , وسام جيشه سوء العذاب على مدى عشرين سنه .
مبارك عمل كدة علشان ميكونش لوزير دفاعه شعبيه تمكنه من الانقلاب عليه مستقبلا , والوزير قبل بالدور , لأنه معندوش طموح فى الحكم , وراضى جدا بمنصب وزير الدفاع والرجل الاول ( القابع وراء الستار )

وكانت النتيجه ان طنطاوى لما اعطى اوامرة بالتصدى للثورة كانت النتيجه ان ضباطه اللى كارهينه اصلا ابتدوا يتمردوا عليه
ولما الطيارتين اياهم طلعوا التحرير علشان يضربوا المتظاهرين , بدات حاله من الجنون تنتاب القوات الارضيه : ايه الهبل دة , هما المجانين دول هيعملوا ايه ؟ دول هيضربوا البلد , يانهار اسود , هيضربوا البلد , دول مجانين رسمى .

وفى نفس الوقت القيادة الامريكيه جالها حاله من الجنون , والتليفونات اشتغلت , يامبارك , ياطنطاوى , بطلوا هبل , انتوا عاوزين تضربوا ملايين , قدام العالم كله , وبالطيران , وكمان بطياراتنا اللى اديناهالكوا معونه ؟! انتوا عاوزين تفضحونا قدام شعبنا , الشعب الامريكى متابع ومتعاطف بشدة مع الثورة المصريه , واعلامنا مقدرش يعتم عليها , اللى بتعمله دة يامبارك معناة الاطاحه بالحكومه الامريكيه , واحنا مش هنسمح بكدة , انتوا بكدة بتحرجونا وبتجبرونا نتدخل عسكريا , لو كررتوا الموضوع دة احنا هنتدخل عسكريا وبشكل فورى , احنا الثورة دى مش من مصلحتنا , ولا من مصلحه اسرائيل , بس المارد المصرى تخطى مرحله القمع , معنى انكم تعملوا كدة اننا هنكون قدام ايران جديدة , واحنا مش عاوزين نخسر مصر من جيبنا , اقمعوا الثورة , ولكن بالسياسه وبالمكر والخداع , انما بالدبابات والمدافع , احنا مش هنسكت , واديكم شايفين اغلبيه قوات جيشكم مع الشعب , بكدة الجيش لو خرج عن طاعه مبارك وطنطاوى واعوانه , تبقى مصر ضاعت من ايدينا وايديكم بشكل رسمى ....

والطيارتين فضلوا مستنيين اوامر الضرب والاوامر مجتش , لان الاتصالات شغاله , وتقارير التمرد نازله زى الرز عليهم , فقالوا خلاص , بلاش نضرب , نخلى الطيارتين تنزل لإرتفاع منخفض وتلف كام لفه , والشعب المصرى جبان , وهيطلعوا يجروا زى الفيران

بس بردة من رحمه ربنا ان الناس اصابها شىء من عدم الفهم , وظنوا أن دة اعلان تأييد من قوات المسلحه , لأن الناس مهما كان خيالها سوداوى مكنتش ممكن تتخيل ان مبارك ممكن يدى اوامر للطيران بضرب التحرير
بس دى الحقيقه
مبارك وطنطاوى واعوانهم داخل الجيش , لو كانوا يقدروا يبيدوا المتظاهرين مكانوش هيتاخروا للحظه عن كدة .
ولما الموضوع اتفضح , ادعوا زورا وبهتانا بأن فعلا مبارك اعطالهم الاوامر دى ولكنهم رفضوا واجبروة على التنحى لاحقا
الشطر الاول صح والشطر التانى كذب .

تانى حاجه
برضه ربنا خلا تدميرهم فى تدبيرهم
خطه التخريب والاضعاف اللى كان مبارك وطنطاوى بينفذوها خلال العشرين سنه اللى فاتت فى الجيش اضعفت قدرات الجيش التدريبيه والعسكريه بشكل كبير
فيه عساكر طول مدة خدمتها ممسكتش سلاح
وفيه اللى عمرة ماضرب نار
ودول نسب كبيرة
فما بالك لما تمسك عسكرى بندقيه وتقول له اقتل دة ؟
حتى لو عاوز يقتله مش هيقدر
لأنه مش مؤهل نفسيا ولافنيا لكدة
بالاضافه لانه مش دغف زى عسكرى الامن المركزى
بالاضافه لأن نسبه كبيرة منهم بتتخض اساسا من صوت الرصاص

لما طنطاوى بدأ يمد الامن المركزى بالذخيرة الحيه قبل انهيارة , والناس اكتشفت النقطه دى فى لحظات حرقوا عدة مدرعات وعربات جيش , هنا طنطاوى اقتنع ان الجيش مش هيقدر يتصدى للملايين دى
بالله عليكم
الدبابه تقدر تعمل ايه غير انها تخوف الناس
كتله حديد وزنها عشرات الاطنان
هتضرب الناس بالمدافع يعنى ؟؟
طيب , بالظبط كانك عاوز تصطاد مليون دبانه بشاكوش , تخيل الصورة هتكون عامله ازاى .
دا غير قدرة الدبابات المنعدمه على المناورة فى الشوارع والحارات الضيقه । , وامكانيه اعطابها بسهوله , لان دة ببساطه مش دورها , دى اله معدة لانتاج كميه عاليه من النيران بشكل متحرك وبتكتيك قتالى معين فى الاماكن المفتوحه ( الصحرا ).

ايه دا ياعم , انت عاوزنا نحارب االجيش , انت عاوز تخرب البلد

لأ ياسيدى مش عاوز , انا بس بوضح السيناريو اللى كان هيحصل لو كانوا استمروا فى مخططهم الاهبل اياة

---------

من هنا تحول المخطط ( بتعاون امريكى واسرائيلى ) الى محاوله نزع فتيل الاحتقان بإخفاء مبارك من الصورة
وفعلا
الناس فرحت وهيصت وهللت واللى زغرت زغرت واللى فرقع بمب و..............
والناس روحت
روحت ونسيت ان شعارها كان الشعب يريد اسقاط النظام .. مع الاسف
وتحكمت هيئه قيادة الجيش فى البلد بشكل تام , وبدأت سلسله من الاجرائات الاصلاحيه العقيمه ببطء شديد , لاقناع الشعب انهم مع الثورة , اما الاجرائات المهمه فمكانوش بياخدوها الا مضطرين , لما يحسوا ان الضغط الشعبى زاد , وسمعتهم بقت على المحك ومخططهم اصبح مهدد بالفشل .

طب الخطوط العريضه ايه ؟
اولا هحاول صرف جموع الشعب من البسطاء والعامه , بكدة اكون حيدت القوى الضاربه والفعليه للثورة المصريه
وبكدة اللى هيفضل على الساحه النشطاء والشباب , اللى هم وقود الثورة , وفتيل اشعالها .
على المستوى الاعلامى هاحسس الناس بان البلد بتغرق فى بحر من الفوضى , مع انك انا المتسبب فيه , بس هلمح ضمنيا وبشكل غير صريح , وسأوحى للجماهير بأن استمرار الثورة والتظاهر هما السبب
ايه عاوزين ايه تانى , الثورة خلصت خلاص , روحوا بيوتكم بقى

ولمن لاحظ , ان النظام كشف عن نفسه بغباء شديد تانى يوم تنحى مبارك بالمانشيت العريض اياة بتاع ( الشعب اسقط النظام )

هتبتدى شعبيه المجلس الاعلى ترتفع , مستغله تهذيب واحترام اغلبيه ظباط الجيش , اللى هما اصلا مقموعين داخليا , بس بما ان الناس مش هتقدر تفرز تركيبه الجيش من الداخل و فبالتالى الناس هتسقط اى تصرف نبيل من فئات شريفه داخل الجيش على الجيش ككل , وبالتالى على قائدة الشريف اللى هيفسروا مواقفه فى عهد مبارك بأنه كان رجل من قوم فرعون يكتم ايمانه

وهتبدأ شعبيه شباب الثورة فى الانخفاض , اولا امام الشعب , نظرا للحمله الدعائيه اياها , ثانيا امام الناشطين نفسهم بسبب مواقفهم المايعه والمتضاربه وانشقاقهم وطمع بعضهم للوصول لأى منصب مستقبلا , وطبعا دة سببه غسيل المخ والوسوسه اللى كانت بتحصل ايام لقائهم للمجلس بالساعات , مستغلين جهلهم وقله خبرتهم وعدم ادراكهم لتركيبه الجيش , وتقديم حسن الظن بقادة المجلس على الحذر .

اما داخل المؤسسه العسكريه , صغار ضباط الجيش بيتعرضوا حاليا لعمليه غسيل مخ بشعه اقوى بمراحل من الحمله الاعلاميه الموجودة على الصعيد المدنى والشعبى ,
ودى غرضها عمل حاله من الرفض والاستياء داخل صفوف القاعدة العريضه للجيش , بل وتصل لمرحله الكراهيه للثوار , واظن دة اصبح واضح جدا الاسبوع اللى فات ( الزناة والحشاشين )
والغرض من غسيل المخ دة ضمان ولاء قاعدة الجيش لقادتها اثناء تنفيذهم لخطه التصفيه الثوريه المرحليه اللى بتتم دلوقت بشكل ممنهج ومدروس وليس عشوائى
علشان الضباط تشارك وتتعاون , ومترفضش ومتتمردش زى ما حصل قبل مبارك ما يمشى

وبكدة هتكون الصورة كالتالى:
- شعب ناقم على شباب الثورة ومنفض عنهم , او على الاقل فاقد الثقه فيهم نظرا لمواقفهم المخزيه
- قيادة جيش شعبيتها فى السما
- شباب ناشط مضحوك عليه ومبلبل ومذبذب الرؤيه وبيخدم مخطط النظام من غير ما يحس

اما البند الاخير فهم اصحاب العقول الحجريه , اللى مبيتضحكش عليهم ولا بيتاكل بعقلهم حلاوة
منهم شباب ناشط
ومنهم ناس عاديه
ومنهم ناس كبيرة من القله اللى فشلت السياسه انها تلوثهم
ومنهم ظباط فى الجيش برضه

دول كلهم على بعض مش عدد كبير , ساعتها هتقدر الشرطه العسكريه والمخابرات الحربيه تتعامل معاهم وتمتصهم وتصفيهم بشكل تدريجى وفى غفله من الشعب وتواطؤ من الاعلام ( ودة اللى بيحصل دلوقت )

------------

موضوع ضرب الجيش للمتظاهرين واطلاق النار عليهم مش بالسهوله اللى الناس متصوراها
لان فيه منهم كتير متعاطفين مع الثورة , وحتى اللى مش متعاطف , فقله قليله هى التى يمكنها قتل ابرياء بدم بارد , وحتى لو وجد هؤلاء الخونه المنتمين للنظام والمتمتعين باعصاب فولاذيه , امامهم عقبه كبيرة جدا , الا وهى الخوف من المسؤليه , هتقولولى مش واخد اوامر , لأ ياسيدى الفاضل , الموضوع اكبر بكتير من كدة , اسمعوا مايلى :

الجيش عندة خطط للعمليات الحربيه , وخطط تانيه لادوار اخرى بيكلف بها الجيش على الجبهه الداخليه
مثلا فيه خطه للكوارث الطبيعيه الكبيرة واللى مش هتقدر مرافق الدوله تتعامل معاها وترفع اثرها عن المتضررين , ساعتها الجيش بيتدخل وبيساعد وله خطه بكدة ومحفوظه ولها اسم كمان وكل وحدة فى الجيش عارفه دورها ساعتها هيكون ايه

مش موضوعنا

موضوعنا بقى هو الخطه التالته , والمنوط بها ( التصدى لاعمال العنف والفوضى وحمايه الشرعيه الدستوريه وتأمين المرافق الحيويه الهامه )
دة هدف الخطه , اما باقى الخطه فكله عبارة عن اماكن تمركز وتحركات للقوات , مافيهاش اى حاجه تانيه

مش غريبه دى ؟!!

طيب الجمله اللى بين قوسين اللى هي هدف الخطه مش ملاحظين فيها شىء غريب ؟

طيب
المعنى الحرفى للكلام المكتوب هو ان فيه فئات معينه بتخرب البلد وبتحدث فوضى لخدمه اطراف خارجيه , واحنا كجيش دورنا نتصدى لهم ( معرفش ازاى لأنه مش متوضح فى الخطه ) ونأمن الشرعيه الدستوريه ( اللى هو الدستور والهيئات القضائيه وما شابه ) ونأمن المرافق الحيويه ( زى التلفزيون والمخابرات والوزارات ومحطات المياة والكهرباء ومحطات القطار وغيرهم ) من ان حد يحاول يخربهم , لأن دى املاك دوله

دة المعنى المباشر من الكلام
انما بقى اللى صاغ الكلام دة ثعبان وداهيه لغويه , لأنه وضع مصطلحات ممكن تتفسر بمعنى وبنقيضه فى نفس الوقت

مثال بسيط
الكلام دة اللى هقوله دة حصل سنه الفين وخمسه ايام المظاهرات الكبيرة اللى حصلت , واللى النظام كان مشلول جزئيا امامها بسبب الدعم الامريكى الجزئى لتيار الاصلاح
ايامها كان الامن المركزى لم يفشل ولا حاجه , بس فيه تقارير من جهات سياديه طلعت للرئاسه بتقول ان هناك احتماليه لأتساع دائرة المظاهرات المعاديه للنظام لتشمل قطاعات عريضه من الشعب ومن المحتمل عجز وزارة الداخليه حينها عن التصدى لها

كخطوة استباقيه , اجتمع مبارك مع وزير دفاعه واصدر تعليماته باعلان حاله الطوارىء فى بعض وحدات الجيش القريبه من القاهرة , ورفع درجه الاستعداد للخطه ..... وبالفعل اترفعت حاله الاستعداد والوحدات دى استعدت فعليا للتحرك بمجرد صدور الامر ( وكانت وحدات مدرعه بالمناسبه , دبابات يعنى )

طبعا ضباط الوحدات والقيادات الوسطى كانت بتتعامل مع الخطه بمعناها الحرفى , الطبيعى , الى ان حدث الموقف الاتى :
- فى صباح احد الايام صدرت تنبيهات متكررة من عدة جهات قياديه للوحدات دى بالتأهب واظهار اعلى مستوى من الاستعداد نظرا لقدوم لجنه من قيادات هيئه عمليات القوات المسلحه للتفتيش على تلك الوحدات

- بالفعل بعد حوالى نصف ساعه من الانتظار , ظهرت تلك اللجان وهى مشكله من قيادات ورتب كبيرة بالهيئه وتحركت بناء على تعليمات مباشرة من مدير الهيئه بتعليمات من وزير الدفاع نفسه

دخلت اللجنه وقامت بالتفتيش الفنى على القوات ومدى استعدادها للتحرك وبعد فترة , تم سؤال احد الجنود :

- ايه دورك فى الخطه كذا ... ؟
- اجاب الجندى بما هو مدون فى الاوراق : حمايه الشرعيه الدستوريه يافندم
- ايوة يعنى هتحمى الشرعيه اللى هى مين ؟
- ...........
- انت ياحضابط الشرعيه الدستوريه اللى هى مين ؟
- حمايه الدستور والمؤسسات القوميه .
- لأ , الشرعيه الدستوريه متمثله فى سيادة القائد الاعلى للقوات المسلحه , واحنا اقسمنا يمين الولاء له ( حقيقه , جميع خريجى الكليات العسكريه يقسمون يمين الولاء لشخص مبارك بلفظ : مخلصا لرئيس الجمهوريه ) .
- ...........
- اسمع يابنى منك له , احنا دورنا نحمى البلد من اى اعمال فوضى وتخريب , علشان كدة , لو الامن المركزى فشل فى السيطرة على الاوضاع , هتبتدى قوات من المشاة تنزل , لو فشلت هتبدأ الوحدات المدرعه تتحرك , هنبدأ نطلق قنابل دخان , ثم طلقات فشنك , وبعدين رصاص حى فى الهوا , بعدين هنبدأ نرمى قنابل صوت , لو فشلنا ساعتها هتبدأ الدبابات تسيطر على الميادين واماكن التجمعات الكبيرة وفى نفس التوقيت فيه وحدات من المشاة هتعتلى الاماكن العاليه حول اماكن التجمعات وهتبدأ تصطاد المحرضين على التظاهر , اللى هما مين ؟ اللى هما الناس اللى بيحرضوا المتظاهرين , ودول هتلاقوهم عادة هما اللى بيقولوا الهتافات والناس بتردد وراهم , او هتلاقوهم محمولين على الاعناق فى مقدمه التظاهرات , هنصيبهم بأعيرة ناريه فى الكتف او الساق كمرحله اولى , بعد كدة التصويب هيكون على الجبهه , فهمتم ؟
- ...........
- ( يلتفت للقادة ) ياحضرات لقنوا قواتكم , علشان يعرفوا ايه اللى هيعملوة بالظبط , احتمال قبل التحرك سيادة القائد العام يمر عليكم , لو سال حد ومعرفش هتكون مصيبه , اظن انتوا فاهمين كويس .
- يلتفت قادة الوحدات وعلى وجوههم ملامح التجهم الشديد ويشرعون فى تكرار ما قاله اعضاء اللجنه , بينما ينظر الضباط لبعضهم باستياء , وقد اصيب الجنود بحاله من التناحه وعدم التصديق ...

وعلى فكرة , الكلام دة انا مسمعتوش ولا حد حكاة ليا , انا شاهد عيان عليه....

ومن حسن الحظ ان الامور اتلمت سريعا ونجح مبارك عن طريق علاقته باسرائيل وبمناوراته السياسيه مع الغرب عن طريق تفريغ عدد كبير من مقاعد المجلس للاخوان , وبلجانه المتوافدة للولايات المتحدة باستمرار لرشوة اعضاء فاسدين من الكونجرس , نجح مبارك بكدة فى اجبار الولايات المتحدة على تركه وشأنه واطلاق يدة ليقمع التحركات الاصلاحيه بشكل كامل
وسيطرت وزارة الداخليه على الاوضاع , ولم تتسع رقعه التظاهرات , ولم تتحرك الوحدات المنتخبه من الجيش

وهنا السؤال
موضوع اقحام قوات الجيش فى الصراعات المدنيه كان امر مطروح بشكل متكرر منذ يوليو 52 والى الان
من هنا التفتت القيادة السياسيه والعسكريه لعمل خطه رسميه شأنها قمع التمردات الشعبيه فى حال فشلت قوات الداخليه فى السيطرة عليها , الا ان صياغه الخطه تمت بشكل مستتر بحيث الا تلاقى معارضه والا تظهر بشكل يدين النظام او يبدو منه انه يورط الجيش فى عمل ليس من اختصاصه

وهنا احب اقول سؤال بسيط
- لو حصلت احداث تمرد شعبيه بلغت درجه من الاتساع بحيث ان قوات الداخليه ( الاكبر عالميا ) فشلت فى السيطرة عليها , هل من المعقول ان يكون كل هؤلاء مخربين او عملاء للخارج ؟
- هل ممكن باى حال من الاحوال تكون الملايين من الجماهير غلط وحفنه من الاشخاص هما اللى صح ؟

اذن الخطه لا معنى لها بالاساس الا قمع الثورات الشعبيه وتأمين بقاء النظام , وهنا بتتحول معانى الكلام لتصبح كما يلى :
- الشرعيه الدستوريه = نظام الحكم القائم
- اعمال العنف = الثورة
- المخربين = الشعب
- المرافق الحيويه = مؤسسات انحرفت عن دورها والتفتت بشكل كامل لدعم النظام القائم زى ماسبيرو والمخابرات العامه وغيرهم

طيب
احتمال كبير ان حدوث مواجهات شامله بين قوات الجيش والشعب هينتج عنها ضحايا كتير , وبعد كدة احتمال اما ان الشعب ينتصر واما ان يبقى النظام , وفى كلا الحالتين هيكون المتورط فى اجرائات القمع مدان

ازاى؟

فى حال بقاء النظام هيكون مضطر لخفض الاحتقان الشعبى , علشان يتفرغ لحملاته الامنيه لتمشيط جيوب المعارضه بدون حدوث استياء شعبى قد يعيد المواجهات مرة اخرى.
هنا بقى مربط الفرس ,
النظام هيدعى انه برىء من قتل الجيش للمتظاهرين , وهيدعى ان نزول الجيش للشارع كان بغرض حفظ الامن وحمايه مرافق الشعب من التخريب , وانه لا علاقه له بأى اوامر صدرت بقتل المتظاهرين وان كلها تصرفات فرديه من بعض الخونه داخل الجيش اللى ارادوا قمع الشعب بغرض استغلال الفوضى الموجودة والانقلاب على الشعب وعلى النظام على حد سواء والاستيلاء عن الحكم .

وساعتها النظام هيستشهد بالخطه المذكورة وبنصوصها التى لا يأتيها الباطل من بين يديها ولا من خلفها , وهيقدم كبش فدا , وبكدة هيضرب عصفورين بحجر ,
اولا هيبرىء نفسه مما حدث ,
ثانيا هينزع فتيل الغضب ,
لأن العقل الجمعى عادة مبيفكرش بذكاء , حيث ان غضب الجماهير ضد من رفع عليهم السلاح هيكون اكبر من غضبهم ضد من اعطاة الامر بذلك ( خصوصا لو كان غير واضح فى الصورة ) , فبمجرد محاكمه او حتى اعدام عدد من صغار الضباط وبعض الجنود , الناس غضبها هيتلاشى وهينسى اغلبهم الهدف الرئيسى للثورة ويكتفوا بأن القاتل اخد جزاؤة .

فى حال طلع الشعب اكثر نصاحه , التضحيه هتكون اكبر , وهيبدأ النظام بالتضحيه ببعض القادة من الصف الاوسط , وقد يضحى ببعض كبار القادة , وممكن يضحى بالوزير نفسه بسهوله , لانه فى الحاله دى هيكون منبوذ على المستوى المدنى والعسكرى

النقاط دى محدش فاهمها غير ضابط الجيش الكبير , اللى عندة خبرة , العقر , اللى بيقرا كتير , واللى حضر وسمع عن قادته القدامى , وممكن الخبرات دى تنتقل لبعض قيادات الصف التانى الواعيين .

علشان كدة الناس دى حتى لو مواليين للنظام , وحتى لو عندهم استعداد لقتل المتظاهرين , بيصروا فى حال تلقيهم لمثل هذة التعليمات على ان تكون فى صورة امر كتابى محرر تفصيليا فى اوراق معتمدة وممضيه ومختومه من القائد الآمر , علشان وقت الحساب يقدر يدافع عن نفسه ويقول ماليش دعوة دى كانت تعليمات عليا

وبما ان هيكون فيه حساب , سواء بقى النظام او سقط , يعنى فى كلا الحالتين هيتحاكموا , فبالتالى مافيش قائد كبير عندة استعداد يحرر على نفسه ورقه زى دى توديه فى داهيه , فبيرفض , والظابط المتلقى بدورة بيمتنع لأن مافيش امر فعلى وصله , يعنى لو تم محاسبته بتهمه عصيان الاوامر , اول كلمه هيقولها ( بصياعه ) : هى فين الاوامر دى ؟ محدش قال لى حاجه
وبكدة هيمسك العصايه من النص وهيحمى نفسه من العقوبه الرادعه لعصيان الاوامر وفى نفس الوقت مش هيتورط فى مصيبه هيدفع تمنها غالى .
اتفهمت النقطه دى ؟

النقطه التانيه , امريكا لن تسمح بحدوث سيناريو ليبيا فى مصر , لان التركيبه الداخليه للجيش المصرى تختلف عن التركيبه القبليه للجيش الليبى , والشعب المصرى مختلف كما ونوعا وتركيبا عن الشعب الليبى , فاى مواجهه شامله بين الجيش والشعب ( كفرضيه ) هتنتهى فى ساعات بانضمام كافه قوات الجيش للشعب وانتصارة وتبقى فلول قيادات الجيش واجهزته الامنيه , ولو دة حصل مشروعيه الثورة وسقف مطالبها هيكون مالوش حدود , وبكدة مصر هتخرج تماما خارج دائرة السيطرة الامريكيه , وهتكون ايران جديدة , لكن ايران اقوى واخطر بكثير من ايران المشرق ....

------------

قيادة الجيش حاولت اكتر من مرة وبطرق مختلفه وفشلت للاسباب الموضحه
وفى كل مرة كانوا بيحاولوا يغطوا على نفسهم سريعا

- يوم الطيران نزل طنطاوى جرى على ماسبيرو وقعد يسلم على الناس والعساكر بشكل عبيط وبدون داعى , علشان يشتت انتباة الناس ويلفت نظرهم عن المصيبه اللى كانت هتحصل , وعلشان يمتص غضب القوات المسلحه , ويروج لشائعه ان الطيران دة كان مظاهرة جويه لتاييد الثورة ( دا على اساس ان مبارك كان فى مركز عمليات القوات الجويه ساعتها علشان كان عندة اسهال ومكانش لاقى دورة ميه ودخلوة مركز العمليات يفك زنقته )

ومحدش يقولى : اصلهم رفضوا الامر , طب طالما رفضوا الامر , دخلوة المركز ليه , كون ان رئيس دوله يعطى امر مباشر لجيشه بدك ملايين من افراد الشعب بالطيران , الا يكفى ذلك للقبض الفورى عليه واعلان عزله من منصب القائد الاعلى للجيش ؟
مش قاعدين بيضحكوا ويقهقهوا وجنبه حبيب العادلى بيزغزغ عنان , لا بلاش ياعداديلوا احسن انا بغير من الحته دى , وطنطاوى بيشاور لمبارك على المونيتور وبيحقق له اتصال مباشر صوت وصورة مع الطيارين

ولما اتفضحوا قالوا اصل بصوا .....هوة يعنى ... هو الكلام مظبوط بس احنا بحسنا الوطنى رفضنا واجبرناه على التنحى ( بعدها باتناشر يوم تقريبا )

وغيرة وغيرة مواقف تانيه كتير

------------

احنا فى الاول كنا مش فاهمين , بعدين بقينا بنسأل , وصلنا دلوقت لمرحله التبريرات ,
اة فيه ناس محسوبه على الثورة وبتبرر اخطاء المجلس العسكرى ,

اللى يقول اصله غشيم , لأ دا سمعه تقيل , اصله عندة الديسك , لأ دا عرق النسا بينقح عليه فى السقعه , اصله مبيسمعش اقل من مليون , اصله غلط ولازم يعتذر ويجيبلنا مصاصه , لأ دا هو بيقف فى صف الجانب الاقوى

ايه الهبل دة!!
جانب اقوى ايه اللى يقف فى صفه؟
طب طالما مبيسمعوش اقل من مليون , مسمعوش 12 مليون وهما بيقولوا الشعب يريد اسقاط النظام ليه ؟
ولما انتوا بتتحايلوا عالمجلس علشان يعتذر عن قتل وتعذيب وسجن متعمد لمتظاهرين , طب ليه مش قابلين الاعتذار من الوزارة الوسخه التانيه ,
ايه ام الشيزوفرينيا دى ؟
ولا لازم يتقتل اكتر من الف واحد علشان تبتدوا تتقمصوا وتاخدوا على خاطركم ؟
بالذمه دا كلام ناس عاقله او عندها ذرة إدراك؟

وصلنا لمرحله اننا اصبحنا بنبرر الاعتدائات على الثوار !!!!
واللى يرفض ويقول لأ نقمعه فكريا ونتهمه بالخيانه وبعدم الفهم وعدم القدرة على قراءة الوضع الحالى !!!

دا عته رسمى
دا كلام ناس مغيبه تماما , مش عاوز اقول مصطلح تانى


اكيد المجلس الاعلى سحرلهم , انا شفت ورق السحر بنفسى مع الشيخ حسان لما دخلنا مقر المجلس الاعلى وبصينا جوة السيفون



--------------


بالنسبه لاخوانا السلفيين
اللى انا شخصيا انتميت اليهم فى يوم من الايام وانتقلت من اقصى اجنحتهم تطرفا لاكثرها اعتدالا , ومن اكثرها جمودا لأوعاها تعقلاً وادراكاً

المجلس العسكرى ( ممثل نظام مبارك حاليا ) ترك لهم الحبل على الغارب وافرد لهم الساحه واخرج معتقليهم .
والناس فرحانه
مش قادرين يفهموا انه بيلعب معاهم نفس اللعبه الوسخه اللى السادات لعبها فى السبعينيات
بس على نطاق اوسع
داخليا عاوزين يستغلوهم علشان يقشوا كل الكروت فى الشارع , ويستغلوا شعبيتهم فى اخراس ومحو اى اثر للثوار
وخارجيا عاوزين يوصلوا للغرب رساله معينه ( اعتقد انتوا عارفينها كويس )

الا بالمناسبه , هو دة اسلوب مين ؟؟؟

ما علينا
الواضح ان اغلبيه الاخوة السلفيين منقادين وراء زعماؤهم الدينيين بدون ادنى تفكير
والسادة رجال الدين السلفيين , نصهم مخدوع وسرقاة السكينه , والنص التانى ( فاهم شغله كويس , وعارف مصلحته مع مين ) وغطس امن الدوله , يبقى خلينا مع المجلس العسكرى , وبلاها ناديه خد سوسو

اما بقى اللى عندة بقيه من ماء الوجه او شىء من الشرف مقرون بشىء من الوعى , فدول ملهمش مكان فى الساحه ولا على التلفزيون المصرى
مش عارف ليه الناس دى مش بتتعلم من اخطائها
مش عارف ليه مش عاوزين يفهموا قواعد اللعبه
ولا شكلهم هيفهموا ولاهيتعلموا


------------------


انا لا ادعوا للدخول فى مواجهات مع الجيش

ولا اهاجم الجيش

انا لا اهاجم الجيش

تالت مرة انا لا اهاجم الجيش ولا اطعن فى نزاهته كمؤسسه

انا بفرق بين قيادات فاسدة بتدعمها اجهزة امنيه وبين قاعدة عريضه واغلبيه شريفه

اللى كان بيقول على اللى بيهاجموا مبارك ونظامه انهم كدة بيهاجموا وبيشوهوا صورة مصر
يبقى يقول للى بيهاجم طنطاوى واعوانه واجهزته الامنيه انهم بيهاجموا وبيشوهوا صورة الجيش

مش كدا برضه ؟

ولا احنا بنفكر ازاى ؟؟


---------


انا لا ادعوا للدخول فى مواجهات مباشرة مع الجيش ولا بتنطط عليه , لانه ببساطه ...... ابويا

الفوارق شاسعه بين قاعدة الجيش المصرى واهل قمته هم ومن يعاونهم من اجهزة امنيه عسكريه , وان مواجهه هؤلاء لا تعنى الدخول فى مواجهه مع اهل القاعدة , لانهم ببساطه متضررين من هؤلاء الفاسدين زيهم زى الشعب ماكان متضرر من امن الدوله ومبارك واكتركمان .

وكلمه اخيرة هقولها
الثورة دى عمرها ما هتنجح فى تحقيق اهدافها بشكل فعلى وكامل , ولا هتتخلص من محاولات الاجهاض والالتفاف , طول ما الناس دى فى السلطه وطول ما اجهزتهم الامنيه فعاله .


------------


فياريت محدش يطلع يقول طب ما احنا اخدنا حاجات كتير ولسه هناخد , مافيش مانع من بعض التنازلات , ونص العما ولا العما كله
لهؤلاء اقول :
مش من حقك تطلب حاجه زى كدة

لما الشهيد اللى اتهرس تحت عربيه

ولما اللى اندفن فى مناطق مجهوله
ولما اللى اندفن بالحيا فى سجن لسنوات
ولما اللى اتعذب واتهان
ولما اللى اصيب بعاهه
ولما اللى عندة ابن او اخ شهيد او مصاب

لما كل دول يرضوا بكدة ويقولوا ماشى
ساعتها ابقى تعالى اتكلم
واعتقد ان كل اللى ماتوا يوم 28 وقبلها وبعدها مكانش عندهم استعداد يتنازلوا عن جرام واحد من مطالبهم , معتقدش ان روحهم كانت رخيصه عندهم بالشكل دة .

اللى غيرك اشتراة اشتراة بدمه وبروحه , فمش من حق سيادتك ان تبيع مالاتملك لمن لا يستحق


----------------


وياريت بلاش الدعوات التثبيطيه بان الشعب بيعتبر المشير مثل اعلى
مافيش واحد دخل الجيش واعتبر المشير مثل اعلى , اللهم عدا الاخوة جنود الشرطه العسكريه والمخابرات اللى شافوا فى عهدة عز مشافوهوش قبل كدة , بالظبط زى ما امن الدوله بتقدس مبارك والعادلى , اللى شافوا فى عهدهم عز مشافوهوش قبل كدة , وعدا الاخوة اللى مدخلوش جيش اصلا , طبعا وعدا الاخوة المغفلين اللى مفهموش حاجه ولا عمرهم هيفهموا , ودول هتلاقوا اغلبيتهم من حزب الكنبه .


------------


اعتقد ان اللى عملناها دى ثورة تاريخيه بكل المقاييس وغير مسبوقه
معتقدش ان التجمعات دى حصلت بالشكل دة قبل كدة
احنا فعليا صدمنا العالم كله بمشهد ملايين من المواطنين العزل اللى اجتمعوا فى التحرير
امال لو نزل معاهم المتعاطفين اللى قاعدين فى بيوتهم يتفرجوا عالجزيرة هيحصل ايه ؟

حرام عليكم

تخلصوا بقى من روح سلم النقابه دى


انتوا خلاص


مش عارفين تتخلصوا من ام روح العبوديه دى ؟


دى ثورة ياحاج منك له مش وقفه احتجاجيه


دا انتوا ايام جمع مبارك المليونيه لو كنتوا دبدبتوا على الارض فى خبطه واحدة والله العظيم كنتوا عملتوا زلزال


لما العالم كله يحس بقيمه وبحجم وقوة الثورة المصريه عدا المصريين نفسهم , دة يبقى اما غباء او خيانه


دى مسخرة


------------


الف باء ثورة:
اللى بينزل الشارع علشان يعمل ثورة
بيعمل حسابه على حاجتين
اما انه يحقق كافه مطالبه
او يموت
مافيش ثورة بتساوم
مافيش ثورة بتفاوض
دة اول الضعف
اول الفشل
اول الانهيار

اللى بينزل دة عارف هيواجه ايه
وعارف انه ممكن يواجه حاجات مكانش متوقعها
بس فى النهايه
اسوأ ما يمكن ان يحدث له هو ان يموت
وبالتالى فهو مستعد لمواجهه اى شىء قى سبيل حريته
مينفعش ييجى عند مرحله يقول لأ خلاص
كفايه كدا
مايقدر عالقدرة الا ربنا
يلا نروح
ونبدأ مفاوضات
ووقفات احتجاجيه
وجمع توقيعات

اهالى المحله عملوا كدة سنه2008
بعد مادوخوا قوات امن مركزى من خمس محافظات
والنتيجه ان اتنكل بيهم شر تنكيل
ولسه فيه منهم لغايه دلوقت ناس فى السجن
وكل اللى كسبوة
ان مدخل المدينه اتسفلت واندهن
وعملولهم جونينه كبيرة برة البلد
ورموا ماسورة صرف جديدة فى الشارع الرئيسى

انتوا بقى
عاوزين كدة ؟
عاوزين مصر تبقى كدة

محدش يقول لى السياسه بتقول
احنا لو كنا بنحسبها بالسياسه
مكناش نزلنا وحنا عزل يوم 28 ووقفنا قصاد اكبر قوة امنيه فى العالم

لو حسبناها بالسياسه مكناش دخلنا فى صدام مباشر مع واحد من اقوى الانظمه الدكتاتوريه فى العالم واقواها على الاطلاق فى الشرق الاوسط كله

الناس اللى ماتت دى اغلبها مالوش فى السياسه ومشى وراكم علشان صدقكم وكان حاسس بالقهر والذل
مكانش عندهم سقف ولا حدود
وثق فيكم ومات وهو مستريح لانه واثق ان فيه ناس وراة هتكمل مشوارة وهتجيبله حقه

تيجوا دلوقت تطلعوا لسانكم لارواحهم !
تيجوا دلوقت وتقولوا كفايه كدة , ميقدر عالقدرة الا ربنا !
خلاص محناش لاعبين!
اصل المجلس العسكرى مفترى وايدة طارشه !

عاوزين تعرفوا انتوا بقيتم فين , وايه الصح من الغلط , بصوا لتونس , وبصوا لليبيا , وانتوا تعرفوا انتم بقيتم فين

هاتولى واحد محترم فى تاريخ مصر نادى وقت الغليان الجماهيرى بالهدوء واعلاء صوت العقل والحكمه ( بتوعهم مش بتوعنا ) وترك السياسه تاخد مجراها

عمر السياسيين ماقاموا بثورات
الثورات بيقوم بيها المناضلين , والمناضلين المجانين اللى احلامهم ملهاش سقف
وشتان بين السياسى والمناضل
واديكوا شفتوا السياسيين المحترمين , اللى مضموش على الشعب الا بعد ما تحققوا ان الغلبه له

ياسادة ياشباب يامناضل ياللى نزلتوا يوم 28
مينفعش دلوقتى تبقوا سياسيين
مافيش مناضل تحول الى سياسى وفلح فى السياسه
فى الاخر بيتسك على قفاة
ويلاقى نفسه من غير ما يحس بقى عميل فعلى للنظام
ولما بيفكر يرجع تانى لصفوف المناضلين مبيعرفش
لأنه بيكون منبوذ
منبوذ وفاقد للمصداقيه
وبيبقى زى اللى رقصوا عالسلم
لا اللى فوق شافوهم
ولا اللى تحت سمعوهم
وساعتها
مبيبقاش قدامه الا حاجه واحدة
انه يتحول الى كلب
كلب للنظام .

فياريت السادة ( المتسيسين ) يفكروا شويه , ولو حسوا انهم مش فاهمين يبقى السكوت نعمه , بدل ما يخربوها ويقعدوا على تلّها .

بدل ما انتوا عمالين تخبطوا حبه شمال وحبه يمين وحبه فوق وحبه تحت , وزحمه يادنيا زحمه , ومش راسيين لكم على بر ودماغكم صرمه قديمه ومش عاوزين تواجهوا الحقيقه يبقى تسكتوا

اسكتوا يرحمكم الله

اسكتوا الله يرحمكم

لو فضلتوا كدة
ولو الثورة دى فشلت لاقدر الله
ساعتها متعملوش عبط وتقولوا ملناش دعوة
مش احنا السبب
اصل بتوع الائتلاف هما اللى خربوها
اصل الحكومه
اصل الموضوع كان اكبر مننا واحنا اتسندنا على حيطه مايله
لأ دا احنا انضحك علينا
اصل المجلس سقانا حاجه اصفرا فى كبايه اخضرا وقال لنا تعالوا لما اركبكم الاوتوبيس

لأ
ياسيدى الناشط
يا اختى الناشطه
انتوا السبب
انتوا السبب
واتمنى ان يكون عندك الشجاعه الكافيه لمواجهه الحقيقه دى لو الثورة فشلت لاقدر الله , وتصحا كل يوم الصبح تبص فى المرايه وتقول فى سرك :
انا خيبت امل شعب
انا دمرت ثورة
انا ضيعت دم مئات الشهدا فى اقرب بلاعه
انا اهدرت حقوق الالاف
انا السبب فى خراب بيت وتضييع مستقبل الاف من زهرة شباب مصر
انا ولادى وولاد ولادى وولادهم من بعدهم هيتفوا عليا

هتقدر تتعايش مع كدة ؟؟؟


------


اخر كلام
سيبكم من عمرو مشتاق ولا البرادعى فى انتخابات الرئاسه, مش وقته دلوقت
المجلس العسكرى لازم يسلم السلطه كامله لمجلس مدنى فى اسرع وقت
لازم الاجهزة الامنيه العسكريه تنسحب من الشارع فورا
لازم كافه المعتقلين السياسيين يخرجوا فورا
لازم اللى اتورط فى المسخرة اللى بتحصل للناشطين دى يتحاسب علنا ايا كان
لازم الدستور القديم يتلغى فورا , والتعديلات دى شربه خروع وطبخه حمضانه
ومتيخيرنيش بين انى اكل طبخه حمضانه او اموت من الجوع , انا عامل ثورة , انا اللى ادى الاوامر مش طنطاوى .
امن الدوله يتحل رسمي وتماما بالشكل اللى قلت عليه فى بوستات فاتت
قتله الداخليه يتحاسبوا فورا ....كلهم .

محدش يقولى احنا معدناش بالقوة اننا نجبر المجلس على تلبيه الطلبات دى حاليا
والله انتوا اللى اضعفتوا نفسكم وفضيتم الناس عنكم بسبب غبائكم
وانتوا اللى تتحملوا مسئوليه الوضع دة
وانتوا اللى ملزمين تغيروة


---------------------


انا مش عميل ولا منتفع
واظن يعنى انى مش طالب شهرة , واعتقد انى مظهرتش علنا ولا حد يعرفنى ولا اسمى اصلا احمد زفت سعيد ولا بطلع على التلفزيون ولا بدى تصريحات لوكالات الانباء ولا عمال اهندس فى تيارات وائتلافات وحركات ما انزل الله بها من سلطان

واظن ان مش من مصلحتى اقول كلام زى دة فى توقيت طنطاوى مكلبش فيه عالبلد واحتمال فشل الثورة او على الاقل الالتفاف عليها اكبر بكتير من احتمال نجاحها

واعتقد ان مش هيكون عندى استعداد اعرض نفسى للخطر فى الوقت المنيل دة , ونا عارف كويس ان محدش هيسمى عليا ولا حد هيسأل فيا ولا يدافع عنى , واخرتها هيتقال عليا مخبر امن دوله , او بلطجى
الا لو كان عندى هدف اهم , وكنت خايف بجد على البلد دى ويهمنى امرها

وعارف انه مش من العقل ولا من الفطنه ولا من الكياسه انى اقول الكلام دة دلوقت ,
وعارف برضه انى كان ممكن اوصل وجهه نظرى بشكل اسرع واقوى لو كانت صيغه كلامى اقل حدة وتطرفا واكثر التفافا ودبلوماسيه

بس تقولوا ايه بقى فى واحد مجنون
دا بالاضافه لانى مش فارقه معايا , لانى اساسا ميت من حداشر سنه
يعنى مجنون وكمان ميت

وعلى اى حال
اى مكروة بيحصل او هيحصل للى بيقول كلمه حق , هتكون مسئوليته وذنبه فى رقبه كل من تخاذل وخدع الناس وروج للنظام وخدمه من غير ما يحس وثبط الناس وفطس الثورة , وشتتها بأراؤة اللوذعيه , ووصل الثورة للوضع المقرف دة ووصلنى انا شخصيا انى اقول كلام زى دة , ونا بحمله مسئوليه كل دة امام الله وامام ضميرة

واهلا بكم فى اجواء 1954


واحب اقول ان كان نفسى

نفسى
اغير خلفيه المدونه
مش عارف ان كان هييجى عليا اليوم اللى اغيرها فيه ولا لأ .




بسم الله الرحمن الرحيم
قل هل ننبئكم بالاخسرين اعمالا *الذين ضل سعيهم فى الحياه الدنيا وهم يحسبون انهم يحسنون صنعا*
صدق الله العظيم



خلاص انا معنديش كلام تانى اقوله

الا قد اُعذرت
الا قد بلغت
الا قد بلغت
الا قد بلغت
اللهم فاشهد

الأحد، 6 مارس، 2011

قمل الدوله واللهو الخفى واشياء اخرى



اسف على الصياغه ( الركيكه ) للبوست , لانى مسافر دلوقت ومستعجل




قمل الدوله

للمرة المليون هقولها , امن الدوله جهاز سرطانى اخطبوطى كامل الفساد وشديد الخطورة على الامن القومى ,
جهاز بالخطورة دى مينفعش معاة اعادة هيكله ولا تحديد نشاط ولا اعادة تأهيل ولا اى حاجه من الكلام الفاضى دة
, شخصيه من يعمل بامن الدوله ( ايا كانت رتبته او درجته ) وصلت لدرجه مينفعش معاها الاصلاح , هما كدة وميقدروش يبقوا حاجه تانيه غير كدة , يعنى حتى فى حال وجودهم مطلقى السراح ( حتى لو تم حل الجهاز وتسريحهم ) برضوهيشكلوا خطر على مصر ومش هيبطلوا لعب

لذلك

لو عاوزين نخلص من امن الدوله , مافيش حل غير الخطوات اللى قلتها فى البوست اللى فات , لو اجراء واحد منها متنفذش , يبقى كأننا معملناش حاجه
ومحدش يقول امن الدوله سقط , امن الدوله ماسقطش , ولا حتى تلقى ضربه موجعه , كل اللى حصل انه اخد قلم على قفاة , ومش على سهوة , هو كان منتظرة وعامل حسابه كويس .
وضعيه امن الدوله انا قلتها فى البوست اللى فات ومش عايز اكرر الكلام

بالنسبه للوثائق
المفترض فى اى جهاز امنى ( دى حاجه طبيعيه ) ان كل مستنداته ووثائقه بيكون فيه منها نسخه سريه محفوظه , لانه ببساطه بيكون فيه خطه كوارث , يعنى الناس دى بتقعد مع بعضها تحط فرضيات معينه , وبتعمل خطط للتصدى للفرضيات دى , كل خطه بيكون لها اسم معين , وكل واحد عارف دورة ايه فى كل خطه كويس.
يعنى مثلا فى فرضيه حدوث كوارث طبيعيه او حرائق ضخمه , فرضيه حدوث ثورة ومحاولات اقتحام للمبنى , وهكذا .
طبعا بند فى الخطه بيشمل اسلوب الحفاظ على المستندات .
ومن هذا المنطلق اقدر اقول ان كل وثائق امن الدوله المهمه سلييييييمه ومحفوظه فى مكان ما .

نقطه تانيه
انا لو ظابط امن دوله وفيه تجمعات برة المبنى وهتقتحمه خلال فترة بسيطه ومطلوب منى اتلف المستندات اللى مش عايزها تقع فى ايديهم , من الطبيعى انى هرتبهم باولويات وباسبقيات وليس بشكل عشوائى
يعنى الاهم افرمه الاول , والاقل اهميه بعدين
بالاضافه لانى هسيب بعض الاوراق غير ذات اهميه تذكر , علشان أشتت بيها انتباة المقتحمين .

طيب
ثبت ان الخطه دى بدأت من كذا يوم , وفيه حاجات خرجت فى كراتين , وحاجات تانيه اتفرمت , وحاجات تالته اتسابت.
وحسب ماشفت ان كل الوثائق السليمه او النصف محروقه اغلبها نماذج تحريات ومكاتبات عاديه وتقارير نشاط , الكلام دة وان كان مثير للفضول ولافت لانتباة الناس الا انه تقريبا مالوش لازمه .
لو خايفين على الوثائق الخطيرة فعلا , احب اطمنكم , متخافوش , هى سليمه ومتجمعه فى مكان ما , هتعرفوة كويس من مدى الاصرار على منعكم من دخوله .
ومكان حفظ المستندات دى قيادة الجيش عارفاة .
وكلمه لوجه الله , اللى معاة اى ورقه بلاش يديها للجيش , نام عليها دلوقت علشان هتنفع قدام .
امن الدوله لن يسقط باقتحام مقراته , الناس دى عندها مواقع تبادليه وخطط للظروف اللى زى دى , وهيقدروا يستأنفوا نشاطهم ولو تم اخلاء كل مقارتهم .

حاجه كمان
مكاتب امن الدوله ( خصوصا الفروع الكبيرة ) بيكون فيها غرف سريه ومخفيه بشكل تام ولا يعلم بها الا عدد قليل من العاملين بالمبنى , لذلك انا واثق انه فيه غرف حتى الان محدش دخلها ولا يعرف عنها حاجه .
تانى مرة لو حد شاف عربيه خارجه من مبنى امن دوله وفيها كراتين او حاويات بلاستيك , ياريت يتابعها ويعرف هيا رايحه فين .
بالنسبه لموقف الجيش انا مش هتكلم عليه كتير علشان انا وضحته قبل كدة , لذلك بقول ياريت منعتمدش على حد , لو عاوزين حاجه , نعملها بنفسنا , لان حاليا الشعب لوحدة فى الساحه وكل ماهو دونه فهو ضدة , والحدق يفهم .

الكلام عن استلام النيابه للمقار وتشميعها كلام فارغ , النائب العام نفسه ريحته وحشه , لذلك , لاتثقوا فى اى شخص او جهه الا بأنفسكم بعد الله عز وجل .

معركه امن الدوله دى اهم بكتير من معركه شفيق والدستور والمحاكمات , دى محطه فاصله هتأثر على مجرى الثورة بعد كدة , لان لو فعلا امن الدوله سقط بشكل فعلى وتام , هنكون بكدة وجهنا ضربه قااااتله للنظام اللى مازال بيلعب فى الخفاء.

محتمل ان يحصل خلال الفترة اللى جايه اى حادثه كبيرة او تفجير , ودة طبعا معروف مين اللى هيكون وراة , ايوة , تمام كدة , علشان يزرعوا الخوف فى قلوب الناس ويحسسوهم ان جهاز امن الدوله ساب مكانه فراغ امنى كبير .

اسقطوا ام امن الدوله يرحمكم الله , ومش عارف انا بلال فضل ماله بيخيب كدة ليه .


--------

اللهو الخفى

من البدايه وانا غير مهتم بمسأله حل حكومه شفيق , لسبب بسيط , اللى يتابع الراجل دة كويس , يدرك قد ايه هو فاضى من جوة وسطحى لدرجه العبط , راجل بالشكل دة مستحيل انه يمثل ثورة مضادة او يكون راس حربه النظام فى معركته الاخيرة .

انا شايف انه كان مجرد واجهه الغرض منها صرف نظر الشعب عن القوى الحقيقيه المحركه للنظام , وبكدة الشعب يدخل فى معركه مع شفيق , ديل البرص اللى عمال يلعب ويتنطط , والناس تنشغل بسحق الديل , وفى نفس الوقت البرص يلاقى فرصه يدارى نفسه بيها , شفيق كان مجرد ديل برص , ومسأله اقاله حكومته كانت مقررة من فترة , بس تأجل الاعلان عنها علشان الناس ريقها ينشف ويتم إنهاكها فى معارك فرعيه .

اللى يشوف التنظيم فى حرق ملفات امن الدوله ونقل المهم منها , فى كل فروع الجمهوريه تقريبا فى وقت واحد , يدرك كويس ان دى تعليمات عليا مش تصرف فردى عفوى من العاملين بمقر معين .

اللى يشوف اعضاء الحزب الوطنى وهم بيوزعوا فلوس على البلطجيه ويحرضوهم ضد المتظاهرين , بالتنظيم دة , وبالدقه الزمنيه والمكانيه دة , فى كل مرة يقدم فيها المتظاهرين على اتخاذ اجراء حيوى , يدرك كويس جدا ان النواب ورجال الاعمال دول مش بيتصرفوا من نفسهم او من باب الجدعنه , لأ , دول بياخدوا تعليمات وبينفذوها بدقه .

اللى يشوف الخطه الدعائيه للنظام , واللى بدأت بتشويه صورة الثوار , ثم انتقلت للتهديد بالغزو الخارجى , ثم اثارة الرعب من الفوضى , ثم الايهام بأت الثورة حققت اهدافها ( بتخلى ) مبارك , ثم التحريض ضد الاعتصامات العماليه , والان يتم التركيز بشكل كامل على محورين : الاول هو تلميع صورة عمرو موسى فى الاوساط الشعبيه , والثانى هو اقناع الناس بأن حل امن الدوله هيترك فراغ امنى وانه مينفعش , وانه من الافضل ان تعاد هيكلته .

اللى يشوف الدعايه الضخمه دى وتنظيمها الرائع فى كل انحاء الجمهوريه , يقول ان دة مش مجرد تصرفات من اعضاء حزب وطنى او اجهزة امنيه , لأ, دا فيه جهه ما , او شخص ما , او مجموعه اشخاص بيدوا تعليمات لكل الجهات دى وبيسيطروا عليها وبينسقوا مابينها .

اللى يتابع تصرفات المجلس الاعلى يدرك جيدا ان هناك شبح خفى يتم الرجوع اليه , وان المجلس ليس سيد قرارة , هو ملتزم يتنفيذ خطوط عامه معينه , ومسموح له بالارتجال فى نطاق محدود يمكنه من امساك العصا من المنتصف والحفاظ على هدوء الشارع وعدم الدخول فى مواجهه مفتوحه مع الثوار ( حاليا ) , ودة يفسر حاله الرفض التام الغير مبررة لفكرة المجلس الرئاسى المدنى .


----------------------


البيضه ولا الفرخه

فكرة اجراء انتخابات رئاسيه قبل البرلمانيه ليها اخطارها الكبيرة , لانها اولا فى مصلحه اشخاص يفرضهم النظام ( عمرو موسى ) كما انها بتعيد الحاله السياسيه لفكرة الفرعون مرة تانيه , وخصوصا بالتعديلات الدستوريه المشوهه اللى موجودة دلوقت

اجراء انتخابات برلمانيه قبل الرئاسيه برضه لها خطرها , لانه ببساطه نواب الوطنى لهم ثقل فى الشارع , الناس فى الاحياء الشعبيه والقرى ( ودول قطاع كبير من المواطنين ) لا يهمهم سوى المنفعه الضيقه من النائب , كإدخال المرافق او توظيف بعض الافراد , او حتى المقابل المادى , دة فيه ناس بتنتخب مرشح الوطنى , لمجرد انه راجل غنى ( بيعتبروة كبير الحته ) .

بالمنظر دة هتلاقوا البرلمان اغلبه نواب وطنى ( من فئه المنافقين , مش الناس المستفزة اللى وشهم مكشوف ) ونسبه من الاخوان .
اللى يقول نص العما ولا العما كله , وكدة معقول , اقول له لأ , احنا مضحيناش بكل دة علشان فى الاخر نوصل لكدة , مينفعش ادفع 100 جنيه وفى الاخر تدينى علبه لبان , اقوم انا اخدها وابوس ايدى وش وضهر واقول احسن من مافيش !

لأ
البرلمانيه قبل الرئاسيه لأ
الرئاسيه قبل البرلمانيه لأ
الاستفتاء على التعديلات الشهر دة لأ ( انا شخصيا ناوى ارفضها كلها )

الحل
- مجلس رئاسى مدنى ( ومافيش حاجه اسمها الجيش مش راضى )
- دستور جديد مؤقت
- فترة معقوله لتفكيك الوطنى وتجميد نشاط كل من يمت اليه بصله , واحلال وجوة وطنيه جديدة فى الشارع تخاف على مصلحه البلد
- بعد كدة نعمل الانتخابات البرلمانيه وبعدها بفترة الرئاسيه
انما شغل الكروته وسلق البيض دة ميلزمناش


---------------


الداخليه

مش عارف ليه لما بتأمل فى حل الوزارة دى بقتنع انها وصلت لدرجه من الفساد والمرض المزمن , بيخلى فكرة اعادة بناء عقيدتها وتنظيمها من جديد بشكل يخليها تعود لدورها الطبيعى امر بالغ الصعوبه .
الوزارة دى عاوزة شخص شريف للغايه , حكيم للغايه , ذكى للغايه , ذو قبضه فولاذيه وعزيمه لا تلين , مدرك جيدا لطبيعه المؤسسه ومفاصل الفساد فيها .

اما بالنسبه لقمل الدوله , فاعتقد انه هيكون من الانسب الاخذ بنظريه السلطان العثمانى محمود الثانى وإدخالها فى حيز التطبيق :)


-------------------


فقرة صغير الجوبلز

توجد حكمه عسكريه قديمه تقول ان الهجوم هو خير وسيله للدفاع
والحكمه دى مش للمعارك الحربيه وبس , لأ , دى صالحه لمختلف الظروف والمواقف , تقدروا تسموها مبدأ عام .
بالنسبه للحرب الدعائيه الموجودة حاليا
انا اقترح اننا نشن حرب مضادة , بس مش فى موقف الرد او الدفاع
لأ
احنا عاوزين نلعب على عدة محاور
- تكتيكيا او على المدى القريب عاوزين نعمل حشد جماهيرى لفكرة الحل التام لأمن الدوله
- استراتيجيا او على المدى الابعد , عايزين نحشد الناس لفكرة تاجيل الانتخابات والمجلس الرئاسى المدنى
-الحاجه الاخيرة , عاوزين نفضح عمرو موسى ونحرقه شعبيا , كخطوة استباقيه لما يخطط له الان , واعتقد ان موقفه ( المخزى كالعادة ) من ليبيا , يعد احد العناصر المناسبه للحمله دى , دا بالاضافه لتاريخه القديم و ( كليب انا هنتخب مبارك )


--------------


حكمه العدد

كلما طالعت وجوة اعضاء المجلس
اخِر جاثيا على ركبتى
وارفع اكف الضراعه
وتغرورق عيناى بالدموع
وابتهل الى الله
قائلا :
اللهم انى اعوذ بك ان اكون من المعرصين.
آآآآآميييييييييين

اقول قولى هذا واستغفر الله لى ولكم و......... انزلوا عالشارع

الثلاثاء، 1 مارس، 2011

حول الوضع الراهن

اسف لانى هاتكلم فى البوست دة عن اكثر من موضوع , هحاول اختصر على قد ما اقدر ( وان كنت بفشل دايما فى كدة ) .
على اى حال ارجو انكم تركزوا فى المواضيع اللى جايه لان كل موضوع ممكن يتقال فيه كلام كتير قوى .




مباحث امن الدوله


جهاز مباحث امن الدوله فى الاساس دورة هو حمايه الامن القومى المصرى من الاخطار التى تهددة داخليا , يعنى هو بيكمل بشكل ما عمل جهاز المخابرات العامه .
بشكل ابسط هو مرحله وسط بين جهاز الاستخبارات وجهاز الشرطه العادى , يعنى حاجه كدة زى المباحث الفيدراليه فى الولايات المتحدة (اف بى اى ) مع اختلافات بسيطه , يعنى مثلا هو مسئول عن الجرائم والحوادث الكبيرة اللى بتهدد امن مصر , يعنى هو مختص ( بمكافحه ) احداث زى بنى مزار , قطار الصعيد , العبارة , المبيدات المسرطنه , باختصار , الانشطه التخريبيه اللى بتتم على نطاق واسع والجرائم الضخمه اللى بتهدد الاستقرار فى البلد , واللى ميقدرش عليها جهاز المباحث الجنائيه

الواقع ان جهاز امن الدوله انحرف عن اداء مهمته الاصليه ( بشكل كااااامل ) , واصبحت كل مهمته هى تامين النظام القائم , ومع الاسف , دة حال كل المؤسسات الامنيه ( المدنيه والعسكريه ) فى عهد مبارك , وكلامى دة لا يستثنى احد .
المصيبه ان جهاز امن الدوله تورط فى احداث المفروض انه اصلا بيكافحها, فبدل ما يقضى على العله اصبح هو سببها , الكلام دة ظهر بشكل واضح فى تورطه فى تفجيرات القديسين , والفتنه الطائفيه , والله اعلم , اكيد كتير من الحوادث الغامضه اللى حصلت فى عهد مبارك كان له دور كبير فيها , وكل دة علشان يخلق حاله من الهلع داخل المجتمع المصرى , ويفتعل تبريرات لاجرائات لاحقه هو ناوى عليها , بالاضافه الى انه بيعمل على خلق اعداء وهميين , ودة بيساعدهم على تضخيم دورة وتغوله داخل الدوله , ويساعدهم على اكتساب المزيد من الصلاحيات واستنزاف قدر اكبر من المخصصات الماليه والتقنيه .

يعنى بالمختصر , جهاز امن الدوله اصبح جرثومه وورم سرطانى فى جسم البلد , واجزم ان حل الجهاز دة لن يضر بالامن العام مطلقا ولا بالامن القومى , لان الجهاز اصلا انصرف عنهم , بل بالعكس , هينتج عنه مزيد من الاستقرار فى البلد ...

السؤال الان , لماذا يماطل المجلس الاعلى فى حل امن الدوله , وعندما يزيد الضغط عليه , يرد بردود مطاطه غير ذات معنى من نوعيه , نحن نفكر فى حله , سنحله مستقبلا , سنعيد هيكلته , سيتم عرض الفاسدين على القضاء , تطهير الجهاز ....

الاجابه ان هناك تنسيق امنى كامل بين الجيش وامن الدوله .
اقولها بشكل رسمى واكثر دقه : هناك تحرير لمحاضر تنسيق تعاون مفتوحه بين جهاز امن الدوله وجهاز المخابرات الحربيه وادارة الشرطه العسكريه والتحريات العسكريه , الا ان دور امن الدوله يمثل الجانب الادارى والتوجيهى , يعنى يعمل فى الظل تقريبا , نظرا لخبرته ورصيدة المعلوماتى الضخم , بينما النشاط الفعلى على الارض بتقوم به الاجهزة الامنيه للجيش ..

ومعنى ذلك ان جهاز امن الدوله ضمن وزارة الداخليه , متعاونا مع هيئه قيادة الجيش والاجهزة الامنيه التابعه لها, بالاضافه لحكومه احمد شفيق ومن حالفهم من اللصوص ورجال الاعمال والمنتفعين من فنانين واعلاميين وخلافه , كل هؤلاء يتعاونون الان لافشال الثورة بشكل تام , او على الاقل ضمان ان يكون النظام الجديد مجرد امتداد للنظام القديم ...

طب والحل ؟

الحل هو حل جهاز امن الدوله بشكل تااااام , وفتح التحقيق العلنى مع كافه العاملين به ( لانه لايوجد به شخص واحد شريف )وطلب شهادة الشهود ممن تعرضوا للبطش والتنكيل , واجراء محاكمه سريعه وعلنيه للمتورطين , وذلك بالتوازى مع فرض الحراسه على كافه مقراته فى جميع محافظات الجمهوريه والتحفظ على كل مابداخلها من اوراق ومستندات وتوثيقها , ومنع الدخول اليها بعد اخلائها , وسحب كافه الصلاحيات التى منحت للجهاز بموجب القوانين الاستثنائيه , وايقاف كااااافه المخصصات الماليه للجهاز بشكل فورى , والاعتقال الادارى الفورى لمدير الجهاز وجميع وكلاؤة ومديرى الادارات ومديرى الانشطه المختلفه ومديرى المكاتب فى المحافظات والمدن, باعتبارهم خطراً جسيما ً يهدد امن وسلامه الوطن ويزعزع استقرارة , وذلك بموجب قانون الطوارىء :)
ومش مهم الأمناء والمخبرين والعملاء , دول هيبقوا زى ديل البرص , وهيتحركوا بشكل عشوائى وخايب هيعود بالسلب على الجهاز وهيفضحه اكتر وهيبرر الاجرائات دى , نسيبهم يلعبوا اسبوع ولا حاجه بدون قياداتهم وبعدين نلمهم .

دة الاسلوب الوحيد اللى يضمن شل الجهاز وتعجيزة بشكل تام
اللى يعرف امن الدوله كويس يعرف ان حله اهم بمراحل من اقاله نظام شفيق .
امن الدوله هو عين النظام واذنه ولسانه ويدة , وبالتخلص منه سيصبح النظام اعمى واصم واخرس وعاجز ...
كما ان كل الانشطه السلبيه اللى بتمارسها الاجهزة الامنيه العسكريه بتتم بالتعاون مع امن الدوله , وبالتخلص من امن الدوله , هنقلل من الممارسات دى بشكل كبير ( ان لما يكن انهاء تام ) وبدون الدخول فى مواجهه مع الجيش ..

الكلام عن التفكير فى حله , او حله مستقبلا , لا جدوى من خلفه وهو مجرد تسويف لا اكثر , من باب المراهنه على الوقت , وخصوصا ان حله الفورى لن يؤثر سلبا على امن مصر بأى حال من الاحوال .

كما ان الكلام عن اعادة الهيكله هو التفاف على المطالب , لاحظوا ان الجهاز دة موجود من ايام الاحتلال الى الان , اتغير اسمه وتركيبه التنظيمى بشكل كامل اكتر من مرة ابتداء من قسم المخصوص ومرورا بالقلم السياسى ثم المباحث العامه , الى هيئته الحاليه , الا ان دورة واحد فى كل العصور .
لذا الكلام عن اعادة الهيكله هو محاوله تنويم واعادة اخراج للجهاز فى شكل جديد , بدون ادنى اختلاف فى العقائد والاهداف ..

عاوزين نحل امن الدوله يبقى مطلبنا يكون موحد وحاسم وجامع ومانع بالشكل دة , غير كدة .... انسوا.

------------------


النائب العام

اولا هتكلم على شخص النائب العام المصرى فى عهد مبارك وخصوصا فى العشر سنوات الاخيرة ..
وظيفه النائب العام وظيفه حيويه وحساسه , وان كانت تخضع لوزارة العدل اداريا , الا انها ذات صلاحيات اوسع بكثير, يعنى فعليا سلطه النائب العام تمثل قمه الهرم ...
من الطبيعى ان مكتب النائب العام يكون هوالمصب الذى تنتهى اليه كل قضايا الفساد فى البلد .
وبما انه من سلطه رئيس الجمهوريه تعيين واقاله النائب العام .
فبالتالى يبقى من المنطقى جدا ان الشرط الاول لتعيين النائب العام هو ان يكون موالى ومتحيز للنظام ( خصوصا فى ظل نظام كنظام مبارك ) .
ودة اللى النائب العام عمله , بس بشكل مستتر ودبلوماسى , علشان ريحته متطلعش , ويحافظ على سمعته قدر الامكان , واعتقد اننا لاحظنا دة كويس فى الكام سنه اللى فاتت ...

بالنسبه للنائب الحالى , فانا شخصيا اجزم بفسادة من خلال العديد من المواقف السابقه , واعتبرة جزئا من نظام مبارك , ولا ائتمنه على تطهير البلد من رموز الفساد, لانه شخصيا واحد منها , وان كان من المؤكد انه ستتم ادانه عدد من رموز النظام , الا ان ذلك ليس من باب العداله , وانما من باب تخفيف الاحمال على السفينه الغارقه ..

لما النائب العام يطلع بقرار بمنع مبارك واسرته من السفر , اقول هأو....

اساسا مين قال ان مبارك عاوز يطلع من مصر ؟ ويطلع ليه طالما هو بالوضع المنفرد تاريخيا اللى هو عليه دلوقت , لو كان عاوز يطلع كان طلع من الاول , ومبارك بطبعه جبااااان جدا وشكاك , ولو كان عندة ادنى شك فى وجود خطر فى بقاؤة مكانش قعد فى مصر لحظه واحدة , وحبايبه برة كتير ...
فلما تطلع اخبار بمنع سوزان من ركوب طائرة خاصه , تبقى كدة الطبخه مسخت قوى ورحيتها طلعت
مين من الشعب المصرى يقدر يتاكد فعلا من صحه الكلام دة باستثناء رجال النظام ؟؟
الاجابه , مافيش
يعنى كل الكلام دة الهدف منه تهدئه الرأى العام وتصفيه الحشد الجماهيرى من الثورة قبل يوم الجمعه الجايه ..

عاوزنى اصدق

هاتولى مبارك فى التلفزيون هو وابنه وهما بيتشدوا من قفاهم فى عربيه الترحيلات وبيتحطوا داخل قفص الاتهام بالبدله البيضا فى محاكمه علنيه ...

ومحدش يقولى انت متطرف وخليك واقعى
مبارك فاسد ولا مش فاسد ؟
اللى اتعملت دى ثورة ولا استغمايه ؟
خلاص يبقى كلامى واقعى وعقلانى جدا

عز وجرانه وابو العنين عايشين بهوات فى طرة , فى اى بى , والناس هناك متضيق عليها بسببهم , والصورة مش زى مابتظهر لنا فى الاعلام على انهم ممسوح بيهم الارض
اذا كان دة حال الناس اللى اختار النظام التضحيه بيهم , فما بالك بالراس الكبيرة ؟؟


----------------------


البرادعى وتفتيت المطالب

انا ملاحظ ان مطالبنا مع الزمن بتكتر وفى نفس الوقت بتكون فعاليتها اقل
بمعنى
فيه ناس بدأت تتكلم عن مطالب باصلاحات بعينها فى الداخليه ومؤسسات اخرى
بالشكل دة هنقدم للمجلس الاعلى على اخر الاسبوع الفين طلب , وطبعا ساعتها هيقول ادونا فرصه اصل طلباتكم كتير قوى , وبعد شهر هيحقق منها خمسه سته , ومش هيكون لهم تأثير مهم , دا لو حققهم بدون التفاف كمان ..

والحل ؟

الحل ان فيه طلبات محوريه , لو اتنفذت , كل المطالب التانيه هتتنفذ تلقائيا .
يعنى
انا بطالب ائتلاف الشباب , واى حد يقدر يوصل لهم صوتى يوصله , انهم يوحدوا مطالبهم فى مطلبين اتنين بس ويطلبوا تنفيذهم فى على وجه السرعه فى وقت محدد :

تسليم صلاحيات الرئاسه لمجلس رئاسى مدنى من شخصيات متعارف عليها بالشروط اللى اتذكرت قبل كدة
انتوا خايفين تواجهوا المجلس الاعلى بالكلام دة ليه , وليه لما بيقولوة بتقولوة على استحياء ؟
انتوا بتمثلوا ثورة , والثورة شرعيتها فوق الدستور وفوق المجلس الاعلى , يعنى انتوا بتدوا اوامر للمجلس الاعلى , مش بتستسمحوة , ولا هو وصى عليكم زى ماهو باين دلوقت .
هما مش قالوا لسنا طالبى سلطه , وان دة مش انقلاب , وانهم بيحموا ثورة الشعب , وان الحمل كبير عليهم ومشاغل البلد كبيرة ؟
طيب
تاهت ولقيناها
اتفضلوا مشكورين سلموا صلاحيات الرئاسه لمجلس مدنى , ادينا بنريحكم اهوا , والتفتوا انتوا بقى لشغلكم بجانب استمراركم فى تامين الشارع المصرى لحين حل معضله الداخليه دى ..
اى رفض او تسويف معناه حاجه واحدة
اما انكم بتمهدوا لعودة النظام القديم
واما انكم قفزتم على السلطه وان دة انقلاب عسكرى
ملهاش حل تانى

ولو انتم كدة
يبقى فكرة المفاوضات وكل يوم طلوع ونزول وبيانات , كل دة مسخرة ومسرحيه كبيرة ..

وحّدوا مطالبكم فى مطلبين يتم تنفيذهم خلال الاسبوع الحالى
- المجلس الرئاسى
- وحل امن الدوله بالكيفيه اللى قلنا عليها

كدة نقدر فعلا نثق ونحط فى بطننا بطيخه صيفى اننا دوسنا الثورة المضادة زى الصرصار , وقطعنا الطريق على محاولات النظام السابق .
وكل المطالب التانيه هتتحقق تلقائيا طالما فيه مجلس مدنى شريف من وسطنا ..
الشخص اللى برشحه حاليا
هو الدكتور البرادعى
انا كنت معترض عليه قبل كدة , ولكن نظرا لتغير الاوضاع واختلاف الظروف , ونظرا لمواقف الرجل الحاليه واراؤة اللى انا شايفها اكثر الاراء مواكبه لروح الثورة , فبالتالى انا بأعلن عن تغيير نظرتى له , وانى اول واحد ادعمه كمواطن مصرى لان يقود الفترة دى طالما هيفضل بالشكل دة , دا بالاضافه لان علاقاته الخارجيه كويسه وهيعرف يتعامل مع الغرب كويس ويقلل مخاوفه ويحيدة قدر الامكان فى الفترة الحرجه دى .

واخدين بالكم , انا مش باتكسف اغير رأيى لما اكتشف ان الظروف اتغيرت , لأ , بغيرة , وبعلنها صراحه , لاننا لازم يكون عندنا الشجاعه نواجه نفسنا ونعيد النظر فى قراراتنا طالما ان المعطيات اتغيرت ...

يعنى المقصود:
- مجلس رئاسى مدنى
- البرادعى
- حل امن الدوله

وياريت حل امن الدوله يكون اولا علشان ميقرفناش بعد كدة


--------------


الاخوان

فيه شباب عاملين انشقاق داخل الاخوان
الشباب دول انا معرفهمش ولا اجزم ان كانوا صادقين فى نيه الاصلاح ولا دى محاوله لتحييد الاخوان حاليا وهما بيقوموا بيها سواء بنيه حسنه او نيه سيئه .

الخلاصه

انا معاكم ان قيادات الجماعه تفكيرها جامد وغير مواكب للعصر , وان كنت لا اشكك ابدا فى اخلاصها ووطنيتها , ودة ناتج عن ظروف تاريخيه لا الومهم عليها , وربنا يكون فى عونهم لما شافوا المجلس العسكرى والشرطه العسكريه , اكيد كوابيس حمزة البيسونى وشمس بدران رجعت لهم تانى .
ما علينا
مش وقت الكلام دة خالص دلوقت , لان المحاولات دى هتخلى القيادات ينشغلوا بمحاوله امتصاصكم ومنع الانقسام فى صفوف الجماعه , ودة هيسحبهم من الشارع وهيحيدهم فى الظرف الحرج دة , ودة اقصى ما يتمناة النظام , لان محدش يقدر ينكر دور الاخوان فى الثورة ولا قدرتهم الرائعه على الحشد والتواصل مع الجماهير البسيطه .

ابوس اديكم
بلاش دلوقت
ننزل الشارع ونوحد صفوفنا , ولما البلد تنضف , ابقوا اعملوا اللى انتوا عاوزينه
مش وقته خااااااالص دلوقت

ياريت لو تعرفوا ناس منهم تبلغوهم بالكلام دة .


-------------------


الدعايه والحرب النفسيه

اصبح من الملاحظ حاليا انتشار اشخاص فى الاماكن العامه ووسائل المواصلات على وجه الخصوص , الناس دى بتعمل حاله من البلبله وتثبيط الهمم والشحن المضاد للثورة ولاستمرارها ...
اكيد فيهم ناس كتير عبيطه ومش فاهمه , بس اللى لاحظته ان فيه وشوش معينه ( كتير ) ملامحها بتثير الريبه ( انا عندى رادار للناس دى ) وبيصروا على فتح باب الحديث بشكل مستميت , كأنهم بيركبوا المواصلات مخصوص علشان يطرشوا الكلام دة فى ودان الناس , وبعدين ينزلوا ويركبوا مواصله تانيه ويعيدوا نفس الكلام .
الناس دى مزقوقه , هتلاقوهم اما من شباب الحزب الوطنى او من اجهزة امنيه .
اللى اكد لى كدة هو اصرارهم على قلب المواصلات لندوات للرأى , حتى لو كانت الناس عاوزة تنام او مش عاوزة تتكلم , ناقص يلطش لهم بالاقلام على صداغهم ويقولهم هتسمعونى بالعافيه , الناس دى بيبان من كلامها انها مثقفه جدا ومتابعه وعندها حشد كبير من الادله اللى بتدعم افكارها , بس الغريبه انك لما بتمسك فى تفصيله معينه وتتوسع معاة فيها وبتحول سياق الكلام لمجرى اخر هو مكانش عامل حسابه بتلاقيه حمااااااااار جدا ولا فاهم حاجه .
التناقض دة , بالاضافه لاشكالهم السمجه , ان دل على شىء فانما يدل على انهم عملااااااء .
ياريت لو شفتوا حد فيهم اجبروة انه يطلع بطاقته , او قلبوة هتلاقوا معاة كارنيه حزب وطنى , فى الحاله دة انا بنصحكم تشيلوا معاكم مطوة قرن وتعملوا معاة زى ما مختار رشاد عمل مع رجالته بالظبط ...


دى نقطه , بالنسبه لنا احنا بقى :

- اول حاجه , شغل التشرذم والتذبذب وتغيير الاراء كل شويه دة اكبر غلط
- واتخاذ قرارات بحشد الجماهير فى وقت ضيق وبدون تخطيط مسبق ودعايه كافيه اكبر غلط
- العدد فى ميدان التحرير ايام الجمع هيقل , لما يكون الميدان فاضى طول الاسبوع , وهيتصور الوضع على انه مظاهرة احتفاليه , زى مولد سيدى ابو المراجيح بالظبط , وهو دة فعلا اللى الاعلام بيصورة لقطاع عريض من الشعب والناس بتصدق
وهو دة اللى المجلس الاعلى عايزة , اعملوا شويه هيصه وبالليل هنخوفكوا ونسرب لكم اشاعات غلط علشان الناس اللى ناويه تبات تاخدها من قاصرها وتروح ..
وبكدة مش هيبقى فيه اساسا اى نوع من انواع الضغط .

قبل كل حاجه لازم نقسم الشعب المصرى الى 3 فئات:

- الفئه الاولى اللى هى الشباب الناشط اللى فجر فتيل الثورة وباقى التيارت السياسيه ( النضيفه )

- الفئه التانيه هى الناس البسيطه اللى وقفت وراهم واللى بيرجع لهم الفضل فى دحر الداخليه وفى تنحى مبارك وكل اللى بعد كدة , ودول اللعب كله عليهم لانهم كتله الحديد اللى هترجح اى كفه تنضم لها , النظام بيلعب على دول , واحنا كمان لازم ناخد بالنا ان دول هما اللى حركوا الثورة فعليا , مش احنا

- الفئه التالته هى عواجيز الفرح اللى مش عاجبهم حاجه واللى هما اساسا من اول يوم سايبين نفسهم للنظام يسوقهم زى البهايم , هاجموا الثورة فى الاول وبيهاجموها دلوقت , ودول صفر على الشمال وكم مهمل , لان دورهم السلبى بيكون نفسى فقط , للى يسمعهم , وغالبا بيكون زيهم , انما هما مالهمش وجود اصلا على الساحه , محدش منهم عندة استعداد يتظاهر للنظام او ضدة , هما يتكلموا وبس ...

علشان كدة بطالب اللى يقدر على الاعتصام يوميا يعتصم , دة غير الجمعات المليونيه , يعتصم , الاعتصام اليومى هو اللى هيخلى الفتيل مشتعل , اما اخلاء الميدان والاكتفاء بيوم الجمعه , يبقى نجيبها من قاصرها ونقعد فى بيوتنا , النظام كدة كدة هيستحمل , ايه يعنى , يوم وهيعدى , وفى الاخر الناس هتروح , ومع الوقت العدد هيقل كل جمعه عن اللى قبلها , ووسائل الاعلام هتشوة التظاهرة المليونيه وتخترع لها اهداف غير حقيقيه , مرة اصل الناس بتحتفل , مرة اصل دول بيطالبوا بمحاكمه مبارك , لأ دول اخوان , لأ دول عندهم مطالب فئويه ...

اعتصموا يوميا مع مراعاة حاجتين مهمين قوى :

اولا بلاش بيات البنات فى الميدان , لان المنظر دة بيستفز الناس جدااااااااااااااا , ودة الوتر الاساسى اللى النظام بيعزف عليه حاليا , كما انهم مش هيكون لهم دور فعال ساعه الخطر , مافيش مشكله , انزلوا اليوم كله بس ياريت بالليل تتفضلوا تروحوا وتسيبوا الشباب ..

تانى حاجه حاولوا تعلقوا يفط كبيرة توضحوا بشكل مبسط انتوا معتصمين ليه , وخلوا كلامكم مقنع , علشان الناس البسيطه تفهم وتقتنع , وبلاش كلكعه ولا تقعر فى الالفاظ , علشان تقطعوا الطريق على الاشاعات والتأليب اللى النظام بيعمله ضدكم , وياريييييييييييت تتجنبوا تماما اعاقه الحركه المروريه , علشان الناس متتخنقش ويحسوا انكم واقفين حالهم ...

وعلشان ننهى حاله التشرزم دى ممكن نتفق على حل وسط
النهاردة التلات , مافيش مانع نستغل اليومين اللى جايين فى حشد الناس ليوم الجمعه ونفهمهم ان النيه على بيات , ونبدأ اعتصام مفتوح اعتبارا من يوم الجمعه بأكبر عدد ممكن ..

ولو العدد قليل برضه مصلحه , خلوا المجلس الاعلى يتغابى , ودة فى صفنا مش فى صفه
اللى حصل يوم الجمعه مكانش فى صالح المجلس الاعلى , والا مكانش اعتذر وبعدين حاول يشوة الصورة ويقول بلطجيه واختراق حظر تجول.
ناس كتير متضايقه من اللى حصل وناقمه على المجلس الاعلى وليس العكس .
اللى مقتنع بان اللى حصل دة صح , دول الفئه التالته اللى اتكلمت عليها واللى مش عاوزكم تركزوا معاها كتير .

بس كثفوا نشاطكم اعلاميا , وسط الناس البسيطه , ووضحوا اهدافكم على يفط كبيرة , وبلاش الاعاقات المروريه وبلاااااااااااش بيات البنات فى الميدان طالما ان العدد قليل ( والله لو وصلنا للاعداد الكبيرة اللى كانت موجودة قبل التنحى يبقى ساعتها بيات البنات مش هيشكل حساسيه للناس زى ماهو عامل دلوقت )..

لو حققنا الحاجات دى وقدرنا نكسب الشارع ونسحب البساط من تحت النظام , يبقى اى اعتصام هيكون مؤثر ولو فيه 10 بس .

الناس اللى مش بتنزل , مش صحيح انكم ملكوش دور , بالعكس , دوركم زى اللى فى الميدان بالظبط , كلموا الناس وانزلوا الشارع وفهموهم , اتكلموا فى المواصلات والمواقف والمترو والشغل , اتكلموا فى كل حته , اعملوا حرب مضادة لدعايا النظام اللى مغرقه البلد دلوقت ...

وكلمه لوجه الله
بلاش الدعايا المباشرة , خلينا ناصحين , لما تدخل لواحد فكرة بشكل مجرد ومباشر هيتحفز ضدها وهيحاول ينتقدها بصرف النظر عن اقتناعه بيها , لأنه هيحس انك عاوز تسيطر عليه فكريا , ودة هيستفزة , ويحفزة ضد اى كلام هتقوله مسبقا , لأ , وصل فكرتك بشكل غير مباشر ..

مثال :
متقولش مثلا , احنا لازم نحل امن الدوله ..
هتلاقى ناس طلعت تقول مينفعش , واصل , وفصل , وابصر , ومدرك ..
لأ
اتكلم بشكل تلقائى , كأن كلامك جه عفوى ومش معد له سلفا ( مش زى البهايم اللى قلت عليهم قبل كدة )
كلمه مثلا عن خالد سعيد
قول ان المحاكمه اتاجلت
الجناة بيفلتوا من العداله
كلمه عن سيد بلال وقصص الناس اللى ماتت يوم 28 , وعن احداث التعذيب اللى حصلت بعدها , واتكلم فى مواضيع كتير , عن ناس شفتها , عن حد مات فى شارعكم , اتكلم عن امهات الشهدا وحرقه قلبهم على ولادهم , اتكلم عن الالف اللى فقدوا نعمه البصر
هتلاقى اللى انت بتكلمهم من نفسهم قالوا فى نفس واحد :
لااااااااازم نحل امن الدوله ونصفى الامن المركزى ..

كدة النصاحه
كدة شغل جوبلز على ميه بيضا
الدعايه المباشرة اسلوب عقيم , حتى لو كنت بتتكلم عن حقائق ..
اشحن الناس فى الاتجاة اللى انت عاوزة بس بشكل غير مباشر
صدقنى
هتلاقى نتايج هايله ..

الاربع والخميس لعبتنا , شغلنا الشاغل الدعايا , مش بس على النت , لأ , الاهم , فى الشارع , وسط الناس , الناس الغلابه اللى سحقوا الداخليه يوم 28 , واللى لو اتحدوا , عمر ما اى حد , ولا اى جهه , هتقدر تقف قصادهم ..
ارجوكم
ارجوكم
يوم الجمعه الجاى هيتوقف عليه حاجات كتير
والجزيرة معادتش فاضيه لنا , مشغولين بليبيا
معندناش غير لسانا والكيبورد بعد ربنا
نشتغل بهمه فى كل مكان اليومين دول ونوصل صوتنا للناس , علشان املنا ميخيبش يوم الجمعه ..
دقت ساعه العمل
دقت ساعه الصفر
الى الامام
الى الامام
زنجا زنجا

----------

مافيش فايدة
برضه طولت ( كالعادة )
عموما
لو اقتنعت بالمقال دة وشايف ان اللى فيه كلام مظبوط , فانا بطالبك باسم مصر , انك توصل الافكار دى للناس , وتنشر الكلام دة على اوسع نطاق , دا بالاضافه لمساهمتك فى الحرب الدعائيه اليومين دول , واعتصامك اعتبارا من يوم الجمعه .