الثلاثاء، 1 مارس 2011

حول الوضع الراهن

اسف لانى هاتكلم فى البوست دة عن اكثر من موضوع , هحاول اختصر على قد ما اقدر ( وان كنت بفشل دايما فى كدة ) .
على اى حال ارجو انكم تركزوا فى المواضيع اللى جايه لان كل موضوع ممكن يتقال فيه كلام كتير قوى .




مباحث امن الدوله


جهاز مباحث امن الدوله فى الاساس دورة هو حمايه الامن القومى المصرى من الاخطار التى تهددة داخليا , يعنى هو بيكمل بشكل ما عمل جهاز المخابرات العامه .
بشكل ابسط هو مرحله وسط بين جهاز الاستخبارات وجهاز الشرطه العادى , يعنى حاجه كدة زى المباحث الفيدراليه فى الولايات المتحدة (اف بى اى ) مع اختلافات بسيطه , يعنى مثلا هو مسئول عن الجرائم والحوادث الكبيرة اللى بتهدد امن مصر , يعنى هو مختص ( بمكافحه ) احداث زى بنى مزار , قطار الصعيد , العبارة , المبيدات المسرطنه , باختصار , الانشطه التخريبيه اللى بتتم على نطاق واسع والجرائم الضخمه اللى بتهدد الاستقرار فى البلد , واللى ميقدرش عليها جهاز المباحث الجنائيه

الواقع ان جهاز امن الدوله انحرف عن اداء مهمته الاصليه ( بشكل كااااامل ) , واصبحت كل مهمته هى تامين النظام القائم , ومع الاسف , دة حال كل المؤسسات الامنيه ( المدنيه والعسكريه ) فى عهد مبارك , وكلامى دة لا يستثنى احد .
المصيبه ان جهاز امن الدوله تورط فى احداث المفروض انه اصلا بيكافحها, فبدل ما يقضى على العله اصبح هو سببها , الكلام دة ظهر بشكل واضح فى تورطه فى تفجيرات القديسين , والفتنه الطائفيه , والله اعلم , اكيد كتير من الحوادث الغامضه اللى حصلت فى عهد مبارك كان له دور كبير فيها , وكل دة علشان يخلق حاله من الهلع داخل المجتمع المصرى , ويفتعل تبريرات لاجرائات لاحقه هو ناوى عليها , بالاضافه الى انه بيعمل على خلق اعداء وهميين , ودة بيساعدهم على تضخيم دورة وتغوله داخل الدوله , ويساعدهم على اكتساب المزيد من الصلاحيات واستنزاف قدر اكبر من المخصصات الماليه والتقنيه .

يعنى بالمختصر , جهاز امن الدوله اصبح جرثومه وورم سرطانى فى جسم البلد , واجزم ان حل الجهاز دة لن يضر بالامن العام مطلقا ولا بالامن القومى , لان الجهاز اصلا انصرف عنهم , بل بالعكس , هينتج عنه مزيد من الاستقرار فى البلد ...

السؤال الان , لماذا يماطل المجلس الاعلى فى حل امن الدوله , وعندما يزيد الضغط عليه , يرد بردود مطاطه غير ذات معنى من نوعيه , نحن نفكر فى حله , سنحله مستقبلا , سنعيد هيكلته , سيتم عرض الفاسدين على القضاء , تطهير الجهاز ....

الاجابه ان هناك تنسيق امنى كامل بين الجيش وامن الدوله .
اقولها بشكل رسمى واكثر دقه : هناك تحرير لمحاضر تنسيق تعاون مفتوحه بين جهاز امن الدوله وجهاز المخابرات الحربيه وادارة الشرطه العسكريه والتحريات العسكريه , الا ان دور امن الدوله يمثل الجانب الادارى والتوجيهى , يعنى يعمل فى الظل تقريبا , نظرا لخبرته ورصيدة المعلوماتى الضخم , بينما النشاط الفعلى على الارض بتقوم به الاجهزة الامنيه للجيش ..

ومعنى ذلك ان جهاز امن الدوله ضمن وزارة الداخليه , متعاونا مع هيئه قيادة الجيش والاجهزة الامنيه التابعه لها, بالاضافه لحكومه احمد شفيق ومن حالفهم من اللصوص ورجال الاعمال والمنتفعين من فنانين واعلاميين وخلافه , كل هؤلاء يتعاونون الان لافشال الثورة بشكل تام , او على الاقل ضمان ان يكون النظام الجديد مجرد امتداد للنظام القديم ...

طب والحل ؟

الحل هو حل جهاز امن الدوله بشكل تااااام , وفتح التحقيق العلنى مع كافه العاملين به ( لانه لايوجد به شخص واحد شريف )وطلب شهادة الشهود ممن تعرضوا للبطش والتنكيل , واجراء محاكمه سريعه وعلنيه للمتورطين , وذلك بالتوازى مع فرض الحراسه على كافه مقراته فى جميع محافظات الجمهوريه والتحفظ على كل مابداخلها من اوراق ومستندات وتوثيقها , ومنع الدخول اليها بعد اخلائها , وسحب كافه الصلاحيات التى منحت للجهاز بموجب القوانين الاستثنائيه , وايقاف كااااافه المخصصات الماليه للجهاز بشكل فورى , والاعتقال الادارى الفورى لمدير الجهاز وجميع وكلاؤة ومديرى الادارات ومديرى الانشطه المختلفه ومديرى المكاتب فى المحافظات والمدن, باعتبارهم خطراً جسيما ً يهدد امن وسلامه الوطن ويزعزع استقرارة , وذلك بموجب قانون الطوارىء :)
ومش مهم الأمناء والمخبرين والعملاء , دول هيبقوا زى ديل البرص , وهيتحركوا بشكل عشوائى وخايب هيعود بالسلب على الجهاز وهيفضحه اكتر وهيبرر الاجرائات دى , نسيبهم يلعبوا اسبوع ولا حاجه بدون قياداتهم وبعدين نلمهم .

دة الاسلوب الوحيد اللى يضمن شل الجهاز وتعجيزة بشكل تام
اللى يعرف امن الدوله كويس يعرف ان حله اهم بمراحل من اقاله نظام شفيق .
امن الدوله هو عين النظام واذنه ولسانه ويدة , وبالتخلص منه سيصبح النظام اعمى واصم واخرس وعاجز ...
كما ان كل الانشطه السلبيه اللى بتمارسها الاجهزة الامنيه العسكريه بتتم بالتعاون مع امن الدوله , وبالتخلص من امن الدوله , هنقلل من الممارسات دى بشكل كبير ( ان لما يكن انهاء تام ) وبدون الدخول فى مواجهه مع الجيش ..

الكلام عن التفكير فى حله , او حله مستقبلا , لا جدوى من خلفه وهو مجرد تسويف لا اكثر , من باب المراهنه على الوقت , وخصوصا ان حله الفورى لن يؤثر سلبا على امن مصر بأى حال من الاحوال .

كما ان الكلام عن اعادة الهيكله هو التفاف على المطالب , لاحظوا ان الجهاز دة موجود من ايام الاحتلال الى الان , اتغير اسمه وتركيبه التنظيمى بشكل كامل اكتر من مرة ابتداء من قسم المخصوص ومرورا بالقلم السياسى ثم المباحث العامه , الى هيئته الحاليه , الا ان دورة واحد فى كل العصور .
لذا الكلام عن اعادة الهيكله هو محاوله تنويم واعادة اخراج للجهاز فى شكل جديد , بدون ادنى اختلاف فى العقائد والاهداف ..

عاوزين نحل امن الدوله يبقى مطلبنا يكون موحد وحاسم وجامع ومانع بالشكل دة , غير كدة .... انسوا.

------------------


النائب العام

اولا هتكلم على شخص النائب العام المصرى فى عهد مبارك وخصوصا فى العشر سنوات الاخيرة ..
وظيفه النائب العام وظيفه حيويه وحساسه , وان كانت تخضع لوزارة العدل اداريا , الا انها ذات صلاحيات اوسع بكثير, يعنى فعليا سلطه النائب العام تمثل قمه الهرم ...
من الطبيعى ان مكتب النائب العام يكون هوالمصب الذى تنتهى اليه كل قضايا الفساد فى البلد .
وبما انه من سلطه رئيس الجمهوريه تعيين واقاله النائب العام .
فبالتالى يبقى من المنطقى جدا ان الشرط الاول لتعيين النائب العام هو ان يكون موالى ومتحيز للنظام ( خصوصا فى ظل نظام كنظام مبارك ) .
ودة اللى النائب العام عمله , بس بشكل مستتر ودبلوماسى , علشان ريحته متطلعش , ويحافظ على سمعته قدر الامكان , واعتقد اننا لاحظنا دة كويس فى الكام سنه اللى فاتت ...

بالنسبه للنائب الحالى , فانا شخصيا اجزم بفسادة من خلال العديد من المواقف السابقه , واعتبرة جزئا من نظام مبارك , ولا ائتمنه على تطهير البلد من رموز الفساد, لانه شخصيا واحد منها , وان كان من المؤكد انه ستتم ادانه عدد من رموز النظام , الا ان ذلك ليس من باب العداله , وانما من باب تخفيف الاحمال على السفينه الغارقه ..

لما النائب العام يطلع بقرار بمنع مبارك واسرته من السفر , اقول هأو....

اساسا مين قال ان مبارك عاوز يطلع من مصر ؟ ويطلع ليه طالما هو بالوضع المنفرد تاريخيا اللى هو عليه دلوقت , لو كان عاوز يطلع كان طلع من الاول , ومبارك بطبعه جبااااان جدا وشكاك , ولو كان عندة ادنى شك فى وجود خطر فى بقاؤة مكانش قعد فى مصر لحظه واحدة , وحبايبه برة كتير ...
فلما تطلع اخبار بمنع سوزان من ركوب طائرة خاصه , تبقى كدة الطبخه مسخت قوى ورحيتها طلعت
مين من الشعب المصرى يقدر يتاكد فعلا من صحه الكلام دة باستثناء رجال النظام ؟؟
الاجابه , مافيش
يعنى كل الكلام دة الهدف منه تهدئه الرأى العام وتصفيه الحشد الجماهيرى من الثورة قبل يوم الجمعه الجايه ..

عاوزنى اصدق

هاتولى مبارك فى التلفزيون هو وابنه وهما بيتشدوا من قفاهم فى عربيه الترحيلات وبيتحطوا داخل قفص الاتهام بالبدله البيضا فى محاكمه علنيه ...

ومحدش يقولى انت متطرف وخليك واقعى
مبارك فاسد ولا مش فاسد ؟
اللى اتعملت دى ثورة ولا استغمايه ؟
خلاص يبقى كلامى واقعى وعقلانى جدا

عز وجرانه وابو العنين عايشين بهوات فى طرة , فى اى بى , والناس هناك متضيق عليها بسببهم , والصورة مش زى مابتظهر لنا فى الاعلام على انهم ممسوح بيهم الارض
اذا كان دة حال الناس اللى اختار النظام التضحيه بيهم , فما بالك بالراس الكبيرة ؟؟


----------------------


البرادعى وتفتيت المطالب

انا ملاحظ ان مطالبنا مع الزمن بتكتر وفى نفس الوقت بتكون فعاليتها اقل
بمعنى
فيه ناس بدأت تتكلم عن مطالب باصلاحات بعينها فى الداخليه ومؤسسات اخرى
بالشكل دة هنقدم للمجلس الاعلى على اخر الاسبوع الفين طلب , وطبعا ساعتها هيقول ادونا فرصه اصل طلباتكم كتير قوى , وبعد شهر هيحقق منها خمسه سته , ومش هيكون لهم تأثير مهم , دا لو حققهم بدون التفاف كمان ..

والحل ؟

الحل ان فيه طلبات محوريه , لو اتنفذت , كل المطالب التانيه هتتنفذ تلقائيا .
يعنى
انا بطالب ائتلاف الشباب , واى حد يقدر يوصل لهم صوتى يوصله , انهم يوحدوا مطالبهم فى مطلبين اتنين بس ويطلبوا تنفيذهم فى على وجه السرعه فى وقت محدد :

تسليم صلاحيات الرئاسه لمجلس رئاسى مدنى من شخصيات متعارف عليها بالشروط اللى اتذكرت قبل كدة
انتوا خايفين تواجهوا المجلس الاعلى بالكلام دة ليه , وليه لما بيقولوة بتقولوة على استحياء ؟
انتوا بتمثلوا ثورة , والثورة شرعيتها فوق الدستور وفوق المجلس الاعلى , يعنى انتوا بتدوا اوامر للمجلس الاعلى , مش بتستسمحوة , ولا هو وصى عليكم زى ماهو باين دلوقت .
هما مش قالوا لسنا طالبى سلطه , وان دة مش انقلاب , وانهم بيحموا ثورة الشعب , وان الحمل كبير عليهم ومشاغل البلد كبيرة ؟
طيب
تاهت ولقيناها
اتفضلوا مشكورين سلموا صلاحيات الرئاسه لمجلس مدنى , ادينا بنريحكم اهوا , والتفتوا انتوا بقى لشغلكم بجانب استمراركم فى تامين الشارع المصرى لحين حل معضله الداخليه دى ..
اى رفض او تسويف معناه حاجه واحدة
اما انكم بتمهدوا لعودة النظام القديم
واما انكم قفزتم على السلطه وان دة انقلاب عسكرى
ملهاش حل تانى

ولو انتم كدة
يبقى فكرة المفاوضات وكل يوم طلوع ونزول وبيانات , كل دة مسخرة ومسرحيه كبيرة ..

وحّدوا مطالبكم فى مطلبين يتم تنفيذهم خلال الاسبوع الحالى
- المجلس الرئاسى
- وحل امن الدوله بالكيفيه اللى قلنا عليها

كدة نقدر فعلا نثق ونحط فى بطننا بطيخه صيفى اننا دوسنا الثورة المضادة زى الصرصار , وقطعنا الطريق على محاولات النظام السابق .
وكل المطالب التانيه هتتحقق تلقائيا طالما فيه مجلس مدنى شريف من وسطنا ..
الشخص اللى برشحه حاليا
هو الدكتور البرادعى
انا كنت معترض عليه قبل كدة , ولكن نظرا لتغير الاوضاع واختلاف الظروف , ونظرا لمواقف الرجل الحاليه واراؤة اللى انا شايفها اكثر الاراء مواكبه لروح الثورة , فبالتالى انا بأعلن عن تغيير نظرتى له , وانى اول واحد ادعمه كمواطن مصرى لان يقود الفترة دى طالما هيفضل بالشكل دة , دا بالاضافه لان علاقاته الخارجيه كويسه وهيعرف يتعامل مع الغرب كويس ويقلل مخاوفه ويحيدة قدر الامكان فى الفترة الحرجه دى .

واخدين بالكم , انا مش باتكسف اغير رأيى لما اكتشف ان الظروف اتغيرت , لأ , بغيرة , وبعلنها صراحه , لاننا لازم يكون عندنا الشجاعه نواجه نفسنا ونعيد النظر فى قراراتنا طالما ان المعطيات اتغيرت ...

يعنى المقصود:
- مجلس رئاسى مدنى
- البرادعى
- حل امن الدوله

وياريت حل امن الدوله يكون اولا علشان ميقرفناش بعد كدة


--------------


الاخوان

فيه شباب عاملين انشقاق داخل الاخوان
الشباب دول انا معرفهمش ولا اجزم ان كانوا صادقين فى نيه الاصلاح ولا دى محاوله لتحييد الاخوان حاليا وهما بيقوموا بيها سواء بنيه حسنه او نيه سيئه .

الخلاصه

انا معاكم ان قيادات الجماعه تفكيرها جامد وغير مواكب للعصر , وان كنت لا اشكك ابدا فى اخلاصها ووطنيتها , ودة ناتج عن ظروف تاريخيه لا الومهم عليها , وربنا يكون فى عونهم لما شافوا المجلس العسكرى والشرطه العسكريه , اكيد كوابيس حمزة البيسونى وشمس بدران رجعت لهم تانى .
ما علينا
مش وقت الكلام دة خالص دلوقت , لان المحاولات دى هتخلى القيادات ينشغلوا بمحاوله امتصاصكم ومنع الانقسام فى صفوف الجماعه , ودة هيسحبهم من الشارع وهيحيدهم فى الظرف الحرج دة , ودة اقصى ما يتمناة النظام , لان محدش يقدر ينكر دور الاخوان فى الثورة ولا قدرتهم الرائعه على الحشد والتواصل مع الجماهير البسيطه .

ابوس اديكم
بلاش دلوقت
ننزل الشارع ونوحد صفوفنا , ولما البلد تنضف , ابقوا اعملوا اللى انتوا عاوزينه
مش وقته خااااااالص دلوقت

ياريت لو تعرفوا ناس منهم تبلغوهم بالكلام دة .


-------------------


الدعايه والحرب النفسيه

اصبح من الملاحظ حاليا انتشار اشخاص فى الاماكن العامه ووسائل المواصلات على وجه الخصوص , الناس دى بتعمل حاله من البلبله وتثبيط الهمم والشحن المضاد للثورة ولاستمرارها ...
اكيد فيهم ناس كتير عبيطه ومش فاهمه , بس اللى لاحظته ان فيه وشوش معينه ( كتير ) ملامحها بتثير الريبه ( انا عندى رادار للناس دى ) وبيصروا على فتح باب الحديث بشكل مستميت , كأنهم بيركبوا المواصلات مخصوص علشان يطرشوا الكلام دة فى ودان الناس , وبعدين ينزلوا ويركبوا مواصله تانيه ويعيدوا نفس الكلام .
الناس دى مزقوقه , هتلاقوهم اما من شباب الحزب الوطنى او من اجهزة امنيه .
اللى اكد لى كدة هو اصرارهم على قلب المواصلات لندوات للرأى , حتى لو كانت الناس عاوزة تنام او مش عاوزة تتكلم , ناقص يلطش لهم بالاقلام على صداغهم ويقولهم هتسمعونى بالعافيه , الناس دى بيبان من كلامها انها مثقفه جدا ومتابعه وعندها حشد كبير من الادله اللى بتدعم افكارها , بس الغريبه انك لما بتمسك فى تفصيله معينه وتتوسع معاة فيها وبتحول سياق الكلام لمجرى اخر هو مكانش عامل حسابه بتلاقيه حمااااااااار جدا ولا فاهم حاجه .
التناقض دة , بالاضافه لاشكالهم السمجه , ان دل على شىء فانما يدل على انهم عملااااااء .
ياريت لو شفتوا حد فيهم اجبروة انه يطلع بطاقته , او قلبوة هتلاقوا معاة كارنيه حزب وطنى , فى الحاله دة انا بنصحكم تشيلوا معاكم مطوة قرن وتعملوا معاة زى ما مختار رشاد عمل مع رجالته بالظبط ...


دى نقطه , بالنسبه لنا احنا بقى :

- اول حاجه , شغل التشرذم والتذبذب وتغيير الاراء كل شويه دة اكبر غلط
- واتخاذ قرارات بحشد الجماهير فى وقت ضيق وبدون تخطيط مسبق ودعايه كافيه اكبر غلط
- العدد فى ميدان التحرير ايام الجمع هيقل , لما يكون الميدان فاضى طول الاسبوع , وهيتصور الوضع على انه مظاهرة احتفاليه , زى مولد سيدى ابو المراجيح بالظبط , وهو دة فعلا اللى الاعلام بيصورة لقطاع عريض من الشعب والناس بتصدق
وهو دة اللى المجلس الاعلى عايزة , اعملوا شويه هيصه وبالليل هنخوفكوا ونسرب لكم اشاعات غلط علشان الناس اللى ناويه تبات تاخدها من قاصرها وتروح ..
وبكدة مش هيبقى فيه اساسا اى نوع من انواع الضغط .

قبل كل حاجه لازم نقسم الشعب المصرى الى 3 فئات:

- الفئه الاولى اللى هى الشباب الناشط اللى فجر فتيل الثورة وباقى التيارت السياسيه ( النضيفه )

- الفئه التانيه هى الناس البسيطه اللى وقفت وراهم واللى بيرجع لهم الفضل فى دحر الداخليه وفى تنحى مبارك وكل اللى بعد كدة , ودول اللعب كله عليهم لانهم كتله الحديد اللى هترجح اى كفه تنضم لها , النظام بيلعب على دول , واحنا كمان لازم ناخد بالنا ان دول هما اللى حركوا الثورة فعليا , مش احنا

- الفئه التالته هى عواجيز الفرح اللى مش عاجبهم حاجه واللى هما اساسا من اول يوم سايبين نفسهم للنظام يسوقهم زى البهايم , هاجموا الثورة فى الاول وبيهاجموها دلوقت , ودول صفر على الشمال وكم مهمل , لان دورهم السلبى بيكون نفسى فقط , للى يسمعهم , وغالبا بيكون زيهم , انما هما مالهمش وجود اصلا على الساحه , محدش منهم عندة استعداد يتظاهر للنظام او ضدة , هما يتكلموا وبس ...

علشان كدة بطالب اللى يقدر على الاعتصام يوميا يعتصم , دة غير الجمعات المليونيه , يعتصم , الاعتصام اليومى هو اللى هيخلى الفتيل مشتعل , اما اخلاء الميدان والاكتفاء بيوم الجمعه , يبقى نجيبها من قاصرها ونقعد فى بيوتنا , النظام كدة كدة هيستحمل , ايه يعنى , يوم وهيعدى , وفى الاخر الناس هتروح , ومع الوقت العدد هيقل كل جمعه عن اللى قبلها , ووسائل الاعلام هتشوة التظاهرة المليونيه وتخترع لها اهداف غير حقيقيه , مرة اصل الناس بتحتفل , مرة اصل دول بيطالبوا بمحاكمه مبارك , لأ دول اخوان , لأ دول عندهم مطالب فئويه ...

اعتصموا يوميا مع مراعاة حاجتين مهمين قوى :

اولا بلاش بيات البنات فى الميدان , لان المنظر دة بيستفز الناس جدااااااااااااااا , ودة الوتر الاساسى اللى النظام بيعزف عليه حاليا , كما انهم مش هيكون لهم دور فعال ساعه الخطر , مافيش مشكله , انزلوا اليوم كله بس ياريت بالليل تتفضلوا تروحوا وتسيبوا الشباب ..

تانى حاجه حاولوا تعلقوا يفط كبيرة توضحوا بشكل مبسط انتوا معتصمين ليه , وخلوا كلامكم مقنع , علشان الناس البسيطه تفهم وتقتنع , وبلاش كلكعه ولا تقعر فى الالفاظ , علشان تقطعوا الطريق على الاشاعات والتأليب اللى النظام بيعمله ضدكم , وياريييييييييييت تتجنبوا تماما اعاقه الحركه المروريه , علشان الناس متتخنقش ويحسوا انكم واقفين حالهم ...

وعلشان ننهى حاله التشرزم دى ممكن نتفق على حل وسط
النهاردة التلات , مافيش مانع نستغل اليومين اللى جايين فى حشد الناس ليوم الجمعه ونفهمهم ان النيه على بيات , ونبدأ اعتصام مفتوح اعتبارا من يوم الجمعه بأكبر عدد ممكن ..

ولو العدد قليل برضه مصلحه , خلوا المجلس الاعلى يتغابى , ودة فى صفنا مش فى صفه
اللى حصل يوم الجمعه مكانش فى صالح المجلس الاعلى , والا مكانش اعتذر وبعدين حاول يشوة الصورة ويقول بلطجيه واختراق حظر تجول.
ناس كتير متضايقه من اللى حصل وناقمه على المجلس الاعلى وليس العكس .
اللى مقتنع بان اللى حصل دة صح , دول الفئه التالته اللى اتكلمت عليها واللى مش عاوزكم تركزوا معاها كتير .

بس كثفوا نشاطكم اعلاميا , وسط الناس البسيطه , ووضحوا اهدافكم على يفط كبيرة , وبلاش الاعاقات المروريه وبلاااااااااااش بيات البنات فى الميدان طالما ان العدد قليل ( والله لو وصلنا للاعداد الكبيرة اللى كانت موجودة قبل التنحى يبقى ساعتها بيات البنات مش هيشكل حساسيه للناس زى ماهو عامل دلوقت )..

لو حققنا الحاجات دى وقدرنا نكسب الشارع ونسحب البساط من تحت النظام , يبقى اى اعتصام هيكون مؤثر ولو فيه 10 بس .

الناس اللى مش بتنزل , مش صحيح انكم ملكوش دور , بالعكس , دوركم زى اللى فى الميدان بالظبط , كلموا الناس وانزلوا الشارع وفهموهم , اتكلموا فى المواصلات والمواقف والمترو والشغل , اتكلموا فى كل حته , اعملوا حرب مضادة لدعايا النظام اللى مغرقه البلد دلوقت ...

وكلمه لوجه الله
بلاش الدعايا المباشرة , خلينا ناصحين , لما تدخل لواحد فكرة بشكل مجرد ومباشر هيتحفز ضدها وهيحاول ينتقدها بصرف النظر عن اقتناعه بيها , لأنه هيحس انك عاوز تسيطر عليه فكريا , ودة هيستفزة , ويحفزة ضد اى كلام هتقوله مسبقا , لأ , وصل فكرتك بشكل غير مباشر ..

مثال :
متقولش مثلا , احنا لازم نحل امن الدوله ..
هتلاقى ناس طلعت تقول مينفعش , واصل , وفصل , وابصر , ومدرك ..
لأ
اتكلم بشكل تلقائى , كأن كلامك جه عفوى ومش معد له سلفا ( مش زى البهايم اللى قلت عليهم قبل كدة )
كلمه مثلا عن خالد سعيد
قول ان المحاكمه اتاجلت
الجناة بيفلتوا من العداله
كلمه عن سيد بلال وقصص الناس اللى ماتت يوم 28 , وعن احداث التعذيب اللى حصلت بعدها , واتكلم فى مواضيع كتير , عن ناس شفتها , عن حد مات فى شارعكم , اتكلم عن امهات الشهدا وحرقه قلبهم على ولادهم , اتكلم عن الالف اللى فقدوا نعمه البصر
هتلاقى اللى انت بتكلمهم من نفسهم قالوا فى نفس واحد :
لااااااااازم نحل امن الدوله ونصفى الامن المركزى ..

كدة النصاحه
كدة شغل جوبلز على ميه بيضا
الدعايه المباشرة اسلوب عقيم , حتى لو كنت بتتكلم عن حقائق ..
اشحن الناس فى الاتجاة اللى انت عاوزة بس بشكل غير مباشر
صدقنى
هتلاقى نتايج هايله ..

الاربع والخميس لعبتنا , شغلنا الشاغل الدعايا , مش بس على النت , لأ , الاهم , فى الشارع , وسط الناس , الناس الغلابه اللى سحقوا الداخليه يوم 28 , واللى لو اتحدوا , عمر ما اى حد , ولا اى جهه , هتقدر تقف قصادهم ..
ارجوكم
ارجوكم
يوم الجمعه الجاى هيتوقف عليه حاجات كتير
والجزيرة معادتش فاضيه لنا , مشغولين بليبيا
معندناش غير لسانا والكيبورد بعد ربنا
نشتغل بهمه فى كل مكان اليومين دول ونوصل صوتنا للناس , علشان املنا ميخيبش يوم الجمعه ..
دقت ساعه العمل
دقت ساعه الصفر
الى الامام
الى الامام
زنجا زنجا

----------

مافيش فايدة
برضه طولت ( كالعادة )
عموما
لو اقتنعت بالمقال دة وشايف ان اللى فيه كلام مظبوط , فانا بطالبك باسم مصر , انك توصل الافكار دى للناس , وتنشر الكلام دة على اوسع نطاق , دا بالاضافه لمساهمتك فى الحرب الدعائيه اليومين دول , واعتصامك اعتبارا من يوم الجمعه .