السبت، 12 مارس، 2011

اخر ماعندى

تانى وتالت ورابع علشان الناس اللى مقرتش البوستات اللى قبل كدة , وعلشان الناس اللى قرت ومفهمتش , وعلشان الناس اللى قرت ونسيت , وعلشان الناس اللى مش عاوزة تقرا ولا عاوزة تفهم

وزير الدفاع ورئيس اركانه وهيئه قيادته مكونه من قادة قواته وقادة الجيوش والمناطق ومديرى الادارات والهيئات وادارة المخابرات الحربيه وجميع العاملين بها والمنتمين اليها , وجميع العاملين بادارة الشرطه العسكريه والتحريات العسكريه , وبهيئه القضاء العسكرى
كل الفئات دى تدين بولاء كاااااااااااااامل لمبارك ولنظامه السابق , ومن اكبرالمنتفعين بنظامه , ومن اقوى اركان نظام مبارك , وغير ممكن ولا وارد ان تتنازل عن ولائها دة للحظه , لانه بكل بساطه معناة الكشف عن فسادهم ودخولهم دائرة الحساب مع النظام ورحيلهم عن مراكزهم ...

هل من المعقول ان يضرب مبارك مصر بكل هذا الفساد طوال ثلاثين سنه ولا ينال الجيش منه شىء ؟
مع العلم ان الجيش اكبر مستهدف , اولا من مبارك لأنه كان يحسب ان الجيش هو القوة الوحيدة التى يمكنها الانقلاب عليه , ثانيا من امريكا واسرائيل ( آلهه مبارك ونظامه ) وانتوا عارفين ليه كويس .
ياسادة
الجيش ليس المدينه الفاضله
ولا حتى محصور الفساد
الفساد منتشر فيه زى اى مؤسسه اخرى ويمكن اكتر كمان
ومحدش يقول لى لأ اصله له طبيعه خاصه واصل دى مؤسسه حساسه
كلا ياسيدى الفاضل
قاعدة
فى عهد مبارك
كلما زادت اهميه المؤسسه كلما زادت نسبه الفساد فيها
واديكم شفتوا مخابرات عمر سليمان , ومش هقول مخابرات مصر
لأن اللى حصل خلال التلاته وتلاتين سنه اللى فاتت لم يكن مجرد حمله سرقه ونهب
لأ
دا كان مخطط تخريبى على اوسع مستوى , برعايه امريكيه واسرائيليه وبايدى مصريه
وكل مرشح لمنصب قيادى كان لابد عليه اولا ان يثبت ولائه وكفائته التخريبيه , وإلا........

ومع الاسف , الجيش اكبر مستهدف من المخطط دة مع فارق بسيط
التخريب فى اى مكان تانى يتم على عينك ياتاجر , وبشكل مفضوح , وبعض الجهات بيكون عندها من الجرأة قدر كافى ولو لمجرد التلميح عن التخريب دة , وان كان بينظر اليه خطأ على انه مجرد عمليه نهب وسرقه ..
اما المؤسسات المهمه , فكان الموضوع بيتم بشكل اسرع واكثر فعاليه وفى نفس الوقت خبيث ومستتر للغايه , لدرجه انه قد يغيب عن فهم نسبه كبيرة من العاملين بالمؤسسه نفسها ।
امثله :
- زكريا عزمى فى مؤسسه الرئاسه
- عمر سليمان فى المخابرات
- طنطاوى وعنان فى الجيش

وبالمناسبه
زكريا عزمى على صله وثيقه جدا بطنطاوى وكثيرا ماتدخل فى شئون الجيش , يعنى ممكن تسموة وزير دفاع مبارك رقم 2
باختصار
الجيش عبارة عن صورة مصغرة من مصر
بس الوانها فاقعه قوى
فيه ناس متحكمه فى كل حاجه ولها سلطات مطلقه , وطغيان بشع , سلطه , ونهب , وسرقه
بيحميهم اجهزة امنيه بالغه القسوة والشراسه , اكثر بمراحل من امن الدوله ,
وفيه فئات مغلوبه على امرها ومستضعفه من ضباط وصف وجنود , دول القاعدة العريضه , منهم اللى بيفتح مخه ويبوس الايادى علشان ينوبه من الحب جانب , ويمكن يوصل فى يوم , وفيهم اللى بيقاوم وبيقول لأ ودول بيروحوا ورا المجرة كلها ( ورا الشمس محفوظه لبتوع امن الدوله ) , وفيه اللى فى حاله وبيقول ياحيطه دارينى .

اللى حصل ايام مبارك انه صدرت اوامر اكتر من مرة بضرب وسحق المتظاهرين وفض التجمع فى التحرير
مرة صدرت اوامر للطيران بدك التحرير
مرة صدر نفس الامر للدبابات
مرة حاولوا يسدوا المداخل وفشلوا
مرة حاولوا يمشوا بنظام الاعتقالات الفرديه للنشطاء , ومحاوله منع الناس من دخول الميدان بترويج الاشاعات والترخيم على الناس اللى داخله , ومقدروش لان كثافه وضغط المتظاهرين كانت اكبر .

بس ربنا سبحانه وتعالى من رحمته انه جعل تدمير مبارك فى تدبيرة
مبارك جاب وزير دفاع مكروة على مستوى الجيش , وسام جيشه سوء العذاب على مدى عشرين سنه .
مبارك عمل كدة علشان ميكونش لوزير دفاعه شعبيه تمكنه من الانقلاب عليه مستقبلا , والوزير قبل بالدور , لأنه معندوش طموح فى الحكم , وراضى جدا بمنصب وزير الدفاع والرجل الاول ( القابع وراء الستار )

وكانت النتيجه ان طنطاوى لما اعطى اوامرة بالتصدى للثورة كانت النتيجه ان ضباطه اللى كارهينه اصلا ابتدوا يتمردوا عليه
ولما الطيارتين اياهم طلعوا التحرير علشان يضربوا المتظاهرين , بدات حاله من الجنون تنتاب القوات الارضيه : ايه الهبل دة , هما المجانين دول هيعملوا ايه ؟ دول هيضربوا البلد , يانهار اسود , هيضربوا البلد , دول مجانين رسمى .

وفى نفس الوقت القيادة الامريكيه جالها حاله من الجنون , والتليفونات اشتغلت , يامبارك , ياطنطاوى , بطلوا هبل , انتوا عاوزين تضربوا ملايين , قدام العالم كله , وبالطيران , وكمان بطياراتنا اللى اديناهالكوا معونه ؟! انتوا عاوزين تفضحونا قدام شعبنا , الشعب الامريكى متابع ومتعاطف بشدة مع الثورة المصريه , واعلامنا مقدرش يعتم عليها , اللى بتعمله دة يامبارك معناة الاطاحه بالحكومه الامريكيه , واحنا مش هنسمح بكدة , انتوا بكدة بتحرجونا وبتجبرونا نتدخل عسكريا , لو كررتوا الموضوع دة احنا هنتدخل عسكريا وبشكل فورى , احنا الثورة دى مش من مصلحتنا , ولا من مصلحه اسرائيل , بس المارد المصرى تخطى مرحله القمع , معنى انكم تعملوا كدة اننا هنكون قدام ايران جديدة , واحنا مش عاوزين نخسر مصر من جيبنا , اقمعوا الثورة , ولكن بالسياسه وبالمكر والخداع , انما بالدبابات والمدافع , احنا مش هنسكت , واديكم شايفين اغلبيه قوات جيشكم مع الشعب , بكدة الجيش لو خرج عن طاعه مبارك وطنطاوى واعوانه , تبقى مصر ضاعت من ايدينا وايديكم بشكل رسمى ....

والطيارتين فضلوا مستنيين اوامر الضرب والاوامر مجتش , لان الاتصالات شغاله , وتقارير التمرد نازله زى الرز عليهم , فقالوا خلاص , بلاش نضرب , نخلى الطيارتين تنزل لإرتفاع منخفض وتلف كام لفه , والشعب المصرى جبان , وهيطلعوا يجروا زى الفيران

بس بردة من رحمه ربنا ان الناس اصابها شىء من عدم الفهم , وظنوا أن دة اعلان تأييد من قوات المسلحه , لأن الناس مهما كان خيالها سوداوى مكنتش ممكن تتخيل ان مبارك ممكن يدى اوامر للطيران بضرب التحرير
بس دى الحقيقه
مبارك وطنطاوى واعوانهم داخل الجيش , لو كانوا يقدروا يبيدوا المتظاهرين مكانوش هيتاخروا للحظه عن كدة .
ولما الموضوع اتفضح , ادعوا زورا وبهتانا بأن فعلا مبارك اعطالهم الاوامر دى ولكنهم رفضوا واجبروة على التنحى لاحقا
الشطر الاول صح والشطر التانى كذب .

تانى حاجه
برضه ربنا خلا تدميرهم فى تدبيرهم
خطه التخريب والاضعاف اللى كان مبارك وطنطاوى بينفذوها خلال العشرين سنه اللى فاتت فى الجيش اضعفت قدرات الجيش التدريبيه والعسكريه بشكل كبير
فيه عساكر طول مدة خدمتها ممسكتش سلاح
وفيه اللى عمرة ماضرب نار
ودول نسب كبيرة
فما بالك لما تمسك عسكرى بندقيه وتقول له اقتل دة ؟
حتى لو عاوز يقتله مش هيقدر
لأنه مش مؤهل نفسيا ولافنيا لكدة
بالاضافه لانه مش دغف زى عسكرى الامن المركزى
بالاضافه لأن نسبه كبيرة منهم بتتخض اساسا من صوت الرصاص

لما طنطاوى بدأ يمد الامن المركزى بالذخيرة الحيه قبل انهيارة , والناس اكتشفت النقطه دى فى لحظات حرقوا عدة مدرعات وعربات جيش , هنا طنطاوى اقتنع ان الجيش مش هيقدر يتصدى للملايين دى
بالله عليكم
الدبابه تقدر تعمل ايه غير انها تخوف الناس
كتله حديد وزنها عشرات الاطنان
هتضرب الناس بالمدافع يعنى ؟؟
طيب , بالظبط كانك عاوز تصطاد مليون دبانه بشاكوش , تخيل الصورة هتكون عامله ازاى .
دا غير قدرة الدبابات المنعدمه على المناورة فى الشوارع والحارات الضيقه । , وامكانيه اعطابها بسهوله , لان دة ببساطه مش دورها , دى اله معدة لانتاج كميه عاليه من النيران بشكل متحرك وبتكتيك قتالى معين فى الاماكن المفتوحه ( الصحرا ).

ايه دا ياعم , انت عاوزنا نحارب االجيش , انت عاوز تخرب البلد

لأ ياسيدى مش عاوز , انا بس بوضح السيناريو اللى كان هيحصل لو كانوا استمروا فى مخططهم الاهبل اياة

---------

من هنا تحول المخطط ( بتعاون امريكى واسرائيلى ) الى محاوله نزع فتيل الاحتقان بإخفاء مبارك من الصورة
وفعلا
الناس فرحت وهيصت وهللت واللى زغرت زغرت واللى فرقع بمب و..............
والناس روحت
روحت ونسيت ان شعارها كان الشعب يريد اسقاط النظام .. مع الاسف
وتحكمت هيئه قيادة الجيش فى البلد بشكل تام , وبدأت سلسله من الاجرائات الاصلاحيه العقيمه ببطء شديد , لاقناع الشعب انهم مع الثورة , اما الاجرائات المهمه فمكانوش بياخدوها الا مضطرين , لما يحسوا ان الضغط الشعبى زاد , وسمعتهم بقت على المحك ومخططهم اصبح مهدد بالفشل .

طب الخطوط العريضه ايه ؟
اولا هحاول صرف جموع الشعب من البسطاء والعامه , بكدة اكون حيدت القوى الضاربه والفعليه للثورة المصريه
وبكدة اللى هيفضل على الساحه النشطاء والشباب , اللى هم وقود الثورة , وفتيل اشعالها .
على المستوى الاعلامى هاحسس الناس بان البلد بتغرق فى بحر من الفوضى , مع انك انا المتسبب فيه , بس هلمح ضمنيا وبشكل غير صريح , وسأوحى للجماهير بأن استمرار الثورة والتظاهر هما السبب
ايه عاوزين ايه تانى , الثورة خلصت خلاص , روحوا بيوتكم بقى

ولمن لاحظ , ان النظام كشف عن نفسه بغباء شديد تانى يوم تنحى مبارك بالمانشيت العريض اياة بتاع ( الشعب اسقط النظام )

هتبتدى شعبيه المجلس الاعلى ترتفع , مستغله تهذيب واحترام اغلبيه ظباط الجيش , اللى هما اصلا مقموعين داخليا , بس بما ان الناس مش هتقدر تفرز تركيبه الجيش من الداخل و فبالتالى الناس هتسقط اى تصرف نبيل من فئات شريفه داخل الجيش على الجيش ككل , وبالتالى على قائدة الشريف اللى هيفسروا مواقفه فى عهد مبارك بأنه كان رجل من قوم فرعون يكتم ايمانه

وهتبدأ شعبيه شباب الثورة فى الانخفاض , اولا امام الشعب , نظرا للحمله الدعائيه اياها , ثانيا امام الناشطين نفسهم بسبب مواقفهم المايعه والمتضاربه وانشقاقهم وطمع بعضهم للوصول لأى منصب مستقبلا , وطبعا دة سببه غسيل المخ والوسوسه اللى كانت بتحصل ايام لقائهم للمجلس بالساعات , مستغلين جهلهم وقله خبرتهم وعدم ادراكهم لتركيبه الجيش , وتقديم حسن الظن بقادة المجلس على الحذر .

اما داخل المؤسسه العسكريه , صغار ضباط الجيش بيتعرضوا حاليا لعمليه غسيل مخ بشعه اقوى بمراحل من الحمله الاعلاميه الموجودة على الصعيد المدنى والشعبى ,
ودى غرضها عمل حاله من الرفض والاستياء داخل صفوف القاعدة العريضه للجيش , بل وتصل لمرحله الكراهيه للثوار , واظن دة اصبح واضح جدا الاسبوع اللى فات ( الزناة والحشاشين )
والغرض من غسيل المخ دة ضمان ولاء قاعدة الجيش لقادتها اثناء تنفيذهم لخطه التصفيه الثوريه المرحليه اللى بتتم دلوقت بشكل ممنهج ومدروس وليس عشوائى
علشان الضباط تشارك وتتعاون , ومترفضش ومتتمردش زى ما حصل قبل مبارك ما يمشى

وبكدة هتكون الصورة كالتالى:
- شعب ناقم على شباب الثورة ومنفض عنهم , او على الاقل فاقد الثقه فيهم نظرا لمواقفهم المخزيه
- قيادة جيش شعبيتها فى السما
- شباب ناشط مضحوك عليه ومبلبل ومذبذب الرؤيه وبيخدم مخطط النظام من غير ما يحس

اما البند الاخير فهم اصحاب العقول الحجريه , اللى مبيتضحكش عليهم ولا بيتاكل بعقلهم حلاوة
منهم شباب ناشط
ومنهم ناس عاديه
ومنهم ناس كبيرة من القله اللى فشلت السياسه انها تلوثهم
ومنهم ظباط فى الجيش برضه

دول كلهم على بعض مش عدد كبير , ساعتها هتقدر الشرطه العسكريه والمخابرات الحربيه تتعامل معاهم وتمتصهم وتصفيهم بشكل تدريجى وفى غفله من الشعب وتواطؤ من الاعلام ( ودة اللى بيحصل دلوقت )

------------

موضوع ضرب الجيش للمتظاهرين واطلاق النار عليهم مش بالسهوله اللى الناس متصوراها
لان فيه منهم كتير متعاطفين مع الثورة , وحتى اللى مش متعاطف , فقله قليله هى التى يمكنها قتل ابرياء بدم بارد , وحتى لو وجد هؤلاء الخونه المنتمين للنظام والمتمتعين باعصاب فولاذيه , امامهم عقبه كبيرة جدا , الا وهى الخوف من المسؤليه , هتقولولى مش واخد اوامر , لأ ياسيدى الفاضل , الموضوع اكبر بكتير من كدة , اسمعوا مايلى :

الجيش عندة خطط للعمليات الحربيه , وخطط تانيه لادوار اخرى بيكلف بها الجيش على الجبهه الداخليه
مثلا فيه خطه للكوارث الطبيعيه الكبيرة واللى مش هتقدر مرافق الدوله تتعامل معاها وترفع اثرها عن المتضررين , ساعتها الجيش بيتدخل وبيساعد وله خطه بكدة ومحفوظه ولها اسم كمان وكل وحدة فى الجيش عارفه دورها ساعتها هيكون ايه

مش موضوعنا

موضوعنا بقى هو الخطه التالته , والمنوط بها ( التصدى لاعمال العنف والفوضى وحمايه الشرعيه الدستوريه وتأمين المرافق الحيويه الهامه )
دة هدف الخطه , اما باقى الخطه فكله عبارة عن اماكن تمركز وتحركات للقوات , مافيهاش اى حاجه تانيه

مش غريبه دى ؟!!

طيب الجمله اللى بين قوسين اللى هي هدف الخطه مش ملاحظين فيها شىء غريب ؟

طيب
المعنى الحرفى للكلام المكتوب هو ان فيه فئات معينه بتخرب البلد وبتحدث فوضى لخدمه اطراف خارجيه , واحنا كجيش دورنا نتصدى لهم ( معرفش ازاى لأنه مش متوضح فى الخطه ) ونأمن الشرعيه الدستوريه ( اللى هو الدستور والهيئات القضائيه وما شابه ) ونأمن المرافق الحيويه ( زى التلفزيون والمخابرات والوزارات ومحطات المياة والكهرباء ومحطات القطار وغيرهم ) من ان حد يحاول يخربهم , لأن دى املاك دوله

دة المعنى المباشر من الكلام
انما بقى اللى صاغ الكلام دة ثعبان وداهيه لغويه , لأنه وضع مصطلحات ممكن تتفسر بمعنى وبنقيضه فى نفس الوقت

مثال بسيط
الكلام دة اللى هقوله دة حصل سنه الفين وخمسه ايام المظاهرات الكبيرة اللى حصلت , واللى النظام كان مشلول جزئيا امامها بسبب الدعم الامريكى الجزئى لتيار الاصلاح
ايامها كان الامن المركزى لم يفشل ولا حاجه , بس فيه تقارير من جهات سياديه طلعت للرئاسه بتقول ان هناك احتماليه لأتساع دائرة المظاهرات المعاديه للنظام لتشمل قطاعات عريضه من الشعب ومن المحتمل عجز وزارة الداخليه حينها عن التصدى لها

كخطوة استباقيه , اجتمع مبارك مع وزير دفاعه واصدر تعليماته باعلان حاله الطوارىء فى بعض وحدات الجيش القريبه من القاهرة , ورفع درجه الاستعداد للخطه ..... وبالفعل اترفعت حاله الاستعداد والوحدات دى استعدت فعليا للتحرك بمجرد صدور الامر ( وكانت وحدات مدرعه بالمناسبه , دبابات يعنى )

طبعا ضباط الوحدات والقيادات الوسطى كانت بتتعامل مع الخطه بمعناها الحرفى , الطبيعى , الى ان حدث الموقف الاتى :
- فى صباح احد الايام صدرت تنبيهات متكررة من عدة جهات قياديه للوحدات دى بالتأهب واظهار اعلى مستوى من الاستعداد نظرا لقدوم لجنه من قيادات هيئه عمليات القوات المسلحه للتفتيش على تلك الوحدات

- بالفعل بعد حوالى نصف ساعه من الانتظار , ظهرت تلك اللجان وهى مشكله من قيادات ورتب كبيرة بالهيئه وتحركت بناء على تعليمات مباشرة من مدير الهيئه بتعليمات من وزير الدفاع نفسه

دخلت اللجنه وقامت بالتفتيش الفنى على القوات ومدى استعدادها للتحرك وبعد فترة , تم سؤال احد الجنود :

- ايه دورك فى الخطه كذا ... ؟
- اجاب الجندى بما هو مدون فى الاوراق : حمايه الشرعيه الدستوريه يافندم
- ايوة يعنى هتحمى الشرعيه اللى هى مين ؟
- ...........
- انت ياحضابط الشرعيه الدستوريه اللى هى مين ؟
- حمايه الدستور والمؤسسات القوميه .
- لأ , الشرعيه الدستوريه متمثله فى سيادة القائد الاعلى للقوات المسلحه , واحنا اقسمنا يمين الولاء له ( حقيقه , جميع خريجى الكليات العسكريه يقسمون يمين الولاء لشخص مبارك بلفظ : مخلصا لرئيس الجمهوريه ) .
- ...........
- اسمع يابنى منك له , احنا دورنا نحمى البلد من اى اعمال فوضى وتخريب , علشان كدة , لو الامن المركزى فشل فى السيطرة على الاوضاع , هتبتدى قوات من المشاة تنزل , لو فشلت هتبدأ الوحدات المدرعه تتحرك , هنبدأ نطلق قنابل دخان , ثم طلقات فشنك , وبعدين رصاص حى فى الهوا , بعدين هنبدأ نرمى قنابل صوت , لو فشلنا ساعتها هتبدأ الدبابات تسيطر على الميادين واماكن التجمعات الكبيرة وفى نفس التوقيت فيه وحدات من المشاة هتعتلى الاماكن العاليه حول اماكن التجمعات وهتبدأ تصطاد المحرضين على التظاهر , اللى هما مين ؟ اللى هما الناس اللى بيحرضوا المتظاهرين , ودول هتلاقوهم عادة هما اللى بيقولوا الهتافات والناس بتردد وراهم , او هتلاقوهم محمولين على الاعناق فى مقدمه التظاهرات , هنصيبهم بأعيرة ناريه فى الكتف او الساق كمرحله اولى , بعد كدة التصويب هيكون على الجبهه , فهمتم ؟
- ...........
- ( يلتفت للقادة ) ياحضرات لقنوا قواتكم , علشان يعرفوا ايه اللى هيعملوة بالظبط , احتمال قبل التحرك سيادة القائد العام يمر عليكم , لو سال حد ومعرفش هتكون مصيبه , اظن انتوا فاهمين كويس .
- يلتفت قادة الوحدات وعلى وجوههم ملامح التجهم الشديد ويشرعون فى تكرار ما قاله اعضاء اللجنه , بينما ينظر الضباط لبعضهم باستياء , وقد اصيب الجنود بحاله من التناحه وعدم التصديق ...

وعلى فكرة , الكلام دة انا مسمعتوش ولا حد حكاة ليا , انا شاهد عيان عليه....

ومن حسن الحظ ان الامور اتلمت سريعا ونجح مبارك عن طريق علاقته باسرائيل وبمناوراته السياسيه مع الغرب عن طريق تفريغ عدد كبير من مقاعد المجلس للاخوان , وبلجانه المتوافدة للولايات المتحدة باستمرار لرشوة اعضاء فاسدين من الكونجرس , نجح مبارك بكدة فى اجبار الولايات المتحدة على تركه وشأنه واطلاق يدة ليقمع التحركات الاصلاحيه بشكل كامل
وسيطرت وزارة الداخليه على الاوضاع , ولم تتسع رقعه التظاهرات , ولم تتحرك الوحدات المنتخبه من الجيش

وهنا السؤال
موضوع اقحام قوات الجيش فى الصراعات المدنيه كان امر مطروح بشكل متكرر منذ يوليو 52 والى الان
من هنا التفتت القيادة السياسيه والعسكريه لعمل خطه رسميه شأنها قمع التمردات الشعبيه فى حال فشلت قوات الداخليه فى السيطرة عليها , الا ان صياغه الخطه تمت بشكل مستتر بحيث الا تلاقى معارضه والا تظهر بشكل يدين النظام او يبدو منه انه يورط الجيش فى عمل ليس من اختصاصه

وهنا احب اقول سؤال بسيط
- لو حصلت احداث تمرد شعبيه بلغت درجه من الاتساع بحيث ان قوات الداخليه ( الاكبر عالميا ) فشلت فى السيطرة عليها , هل من المعقول ان يكون كل هؤلاء مخربين او عملاء للخارج ؟
- هل ممكن باى حال من الاحوال تكون الملايين من الجماهير غلط وحفنه من الاشخاص هما اللى صح ؟

اذن الخطه لا معنى لها بالاساس الا قمع الثورات الشعبيه وتأمين بقاء النظام , وهنا بتتحول معانى الكلام لتصبح كما يلى :
- الشرعيه الدستوريه = نظام الحكم القائم
- اعمال العنف = الثورة
- المخربين = الشعب
- المرافق الحيويه = مؤسسات انحرفت عن دورها والتفتت بشكل كامل لدعم النظام القائم زى ماسبيرو والمخابرات العامه وغيرهم

طيب
احتمال كبير ان حدوث مواجهات شامله بين قوات الجيش والشعب هينتج عنها ضحايا كتير , وبعد كدة احتمال اما ان الشعب ينتصر واما ان يبقى النظام , وفى كلا الحالتين هيكون المتورط فى اجرائات القمع مدان

ازاى؟

فى حال بقاء النظام هيكون مضطر لخفض الاحتقان الشعبى , علشان يتفرغ لحملاته الامنيه لتمشيط جيوب المعارضه بدون حدوث استياء شعبى قد يعيد المواجهات مرة اخرى.
هنا بقى مربط الفرس ,
النظام هيدعى انه برىء من قتل الجيش للمتظاهرين , وهيدعى ان نزول الجيش للشارع كان بغرض حفظ الامن وحمايه مرافق الشعب من التخريب , وانه لا علاقه له بأى اوامر صدرت بقتل المتظاهرين وان كلها تصرفات فرديه من بعض الخونه داخل الجيش اللى ارادوا قمع الشعب بغرض استغلال الفوضى الموجودة والانقلاب على الشعب وعلى النظام على حد سواء والاستيلاء عن الحكم .

وساعتها النظام هيستشهد بالخطه المذكورة وبنصوصها التى لا يأتيها الباطل من بين يديها ولا من خلفها , وهيقدم كبش فدا , وبكدة هيضرب عصفورين بحجر ,
اولا هيبرىء نفسه مما حدث ,
ثانيا هينزع فتيل الغضب ,
لأن العقل الجمعى عادة مبيفكرش بذكاء , حيث ان غضب الجماهير ضد من رفع عليهم السلاح هيكون اكبر من غضبهم ضد من اعطاة الامر بذلك ( خصوصا لو كان غير واضح فى الصورة ) , فبمجرد محاكمه او حتى اعدام عدد من صغار الضباط وبعض الجنود , الناس غضبها هيتلاشى وهينسى اغلبهم الهدف الرئيسى للثورة ويكتفوا بأن القاتل اخد جزاؤة .

فى حال طلع الشعب اكثر نصاحه , التضحيه هتكون اكبر , وهيبدأ النظام بالتضحيه ببعض القادة من الصف الاوسط , وقد يضحى ببعض كبار القادة , وممكن يضحى بالوزير نفسه بسهوله , لانه فى الحاله دى هيكون منبوذ على المستوى المدنى والعسكرى

النقاط دى محدش فاهمها غير ضابط الجيش الكبير , اللى عندة خبرة , العقر , اللى بيقرا كتير , واللى حضر وسمع عن قادته القدامى , وممكن الخبرات دى تنتقل لبعض قيادات الصف التانى الواعيين .

علشان كدة الناس دى حتى لو مواليين للنظام , وحتى لو عندهم استعداد لقتل المتظاهرين , بيصروا فى حال تلقيهم لمثل هذة التعليمات على ان تكون فى صورة امر كتابى محرر تفصيليا فى اوراق معتمدة وممضيه ومختومه من القائد الآمر , علشان وقت الحساب يقدر يدافع عن نفسه ويقول ماليش دعوة دى كانت تعليمات عليا

وبما ان هيكون فيه حساب , سواء بقى النظام او سقط , يعنى فى كلا الحالتين هيتحاكموا , فبالتالى مافيش قائد كبير عندة استعداد يحرر على نفسه ورقه زى دى توديه فى داهيه , فبيرفض , والظابط المتلقى بدورة بيمتنع لأن مافيش امر فعلى وصله , يعنى لو تم محاسبته بتهمه عصيان الاوامر , اول كلمه هيقولها ( بصياعه ) : هى فين الاوامر دى ؟ محدش قال لى حاجه
وبكدة هيمسك العصايه من النص وهيحمى نفسه من العقوبه الرادعه لعصيان الاوامر وفى نفس الوقت مش هيتورط فى مصيبه هيدفع تمنها غالى .
اتفهمت النقطه دى ؟

النقطه التانيه , امريكا لن تسمح بحدوث سيناريو ليبيا فى مصر , لان التركيبه الداخليه للجيش المصرى تختلف عن التركيبه القبليه للجيش الليبى , والشعب المصرى مختلف كما ونوعا وتركيبا عن الشعب الليبى , فاى مواجهه شامله بين الجيش والشعب ( كفرضيه ) هتنتهى فى ساعات بانضمام كافه قوات الجيش للشعب وانتصارة وتبقى فلول قيادات الجيش واجهزته الامنيه , ولو دة حصل مشروعيه الثورة وسقف مطالبها هيكون مالوش حدود , وبكدة مصر هتخرج تماما خارج دائرة السيطرة الامريكيه , وهتكون ايران جديدة , لكن ايران اقوى واخطر بكثير من ايران المشرق ....

------------

قيادة الجيش حاولت اكتر من مرة وبطرق مختلفه وفشلت للاسباب الموضحه
وفى كل مرة كانوا بيحاولوا يغطوا على نفسهم سريعا

- يوم الطيران نزل طنطاوى جرى على ماسبيرو وقعد يسلم على الناس والعساكر بشكل عبيط وبدون داعى , علشان يشتت انتباة الناس ويلفت نظرهم عن المصيبه اللى كانت هتحصل , وعلشان يمتص غضب القوات المسلحه , ويروج لشائعه ان الطيران دة كان مظاهرة جويه لتاييد الثورة ( دا على اساس ان مبارك كان فى مركز عمليات القوات الجويه ساعتها علشان كان عندة اسهال ومكانش لاقى دورة ميه ودخلوة مركز العمليات يفك زنقته )

ومحدش يقولى : اصلهم رفضوا الامر , طب طالما رفضوا الامر , دخلوة المركز ليه , كون ان رئيس دوله يعطى امر مباشر لجيشه بدك ملايين من افراد الشعب بالطيران , الا يكفى ذلك للقبض الفورى عليه واعلان عزله من منصب القائد الاعلى للجيش ؟
مش قاعدين بيضحكوا ويقهقهوا وجنبه حبيب العادلى بيزغزغ عنان , لا بلاش ياعداديلوا احسن انا بغير من الحته دى , وطنطاوى بيشاور لمبارك على المونيتور وبيحقق له اتصال مباشر صوت وصورة مع الطيارين

ولما اتفضحوا قالوا اصل بصوا .....هوة يعنى ... هو الكلام مظبوط بس احنا بحسنا الوطنى رفضنا واجبرناه على التنحى ( بعدها باتناشر يوم تقريبا )

وغيرة وغيرة مواقف تانيه كتير

------------

احنا فى الاول كنا مش فاهمين , بعدين بقينا بنسأل , وصلنا دلوقت لمرحله التبريرات ,
اة فيه ناس محسوبه على الثورة وبتبرر اخطاء المجلس العسكرى ,

اللى يقول اصله غشيم , لأ دا سمعه تقيل , اصله عندة الديسك , لأ دا عرق النسا بينقح عليه فى السقعه , اصله مبيسمعش اقل من مليون , اصله غلط ولازم يعتذر ويجيبلنا مصاصه , لأ دا هو بيقف فى صف الجانب الاقوى

ايه الهبل دة!!
جانب اقوى ايه اللى يقف فى صفه؟
طب طالما مبيسمعوش اقل من مليون , مسمعوش 12 مليون وهما بيقولوا الشعب يريد اسقاط النظام ليه ؟
ولما انتوا بتتحايلوا عالمجلس علشان يعتذر عن قتل وتعذيب وسجن متعمد لمتظاهرين , طب ليه مش قابلين الاعتذار من الوزارة الوسخه التانيه ,
ايه ام الشيزوفرينيا دى ؟
ولا لازم يتقتل اكتر من الف واحد علشان تبتدوا تتقمصوا وتاخدوا على خاطركم ؟
بالذمه دا كلام ناس عاقله او عندها ذرة إدراك؟

وصلنا لمرحله اننا اصبحنا بنبرر الاعتدائات على الثوار !!!!
واللى يرفض ويقول لأ نقمعه فكريا ونتهمه بالخيانه وبعدم الفهم وعدم القدرة على قراءة الوضع الحالى !!!

دا عته رسمى
دا كلام ناس مغيبه تماما , مش عاوز اقول مصطلح تانى


اكيد المجلس الاعلى سحرلهم , انا شفت ورق السحر بنفسى مع الشيخ حسان لما دخلنا مقر المجلس الاعلى وبصينا جوة السيفون



--------------


بالنسبه لاخوانا السلفيين
اللى انا شخصيا انتميت اليهم فى يوم من الايام وانتقلت من اقصى اجنحتهم تطرفا لاكثرها اعتدالا , ومن اكثرها جمودا لأوعاها تعقلاً وادراكاً

المجلس العسكرى ( ممثل نظام مبارك حاليا ) ترك لهم الحبل على الغارب وافرد لهم الساحه واخرج معتقليهم .
والناس فرحانه
مش قادرين يفهموا انه بيلعب معاهم نفس اللعبه الوسخه اللى السادات لعبها فى السبعينيات
بس على نطاق اوسع
داخليا عاوزين يستغلوهم علشان يقشوا كل الكروت فى الشارع , ويستغلوا شعبيتهم فى اخراس ومحو اى اثر للثوار
وخارجيا عاوزين يوصلوا للغرب رساله معينه ( اعتقد انتوا عارفينها كويس )

الا بالمناسبه , هو دة اسلوب مين ؟؟؟

ما علينا
الواضح ان اغلبيه الاخوة السلفيين منقادين وراء زعماؤهم الدينيين بدون ادنى تفكير
والسادة رجال الدين السلفيين , نصهم مخدوع وسرقاة السكينه , والنص التانى ( فاهم شغله كويس , وعارف مصلحته مع مين ) وغطس امن الدوله , يبقى خلينا مع المجلس العسكرى , وبلاها ناديه خد سوسو

اما بقى اللى عندة بقيه من ماء الوجه او شىء من الشرف مقرون بشىء من الوعى , فدول ملهمش مكان فى الساحه ولا على التلفزيون المصرى
مش عارف ليه الناس دى مش بتتعلم من اخطائها
مش عارف ليه مش عاوزين يفهموا قواعد اللعبه
ولا شكلهم هيفهموا ولاهيتعلموا


------------------


انا لا ادعوا للدخول فى مواجهات مع الجيش

ولا اهاجم الجيش

انا لا اهاجم الجيش

تالت مرة انا لا اهاجم الجيش ولا اطعن فى نزاهته كمؤسسه

انا بفرق بين قيادات فاسدة بتدعمها اجهزة امنيه وبين قاعدة عريضه واغلبيه شريفه

اللى كان بيقول على اللى بيهاجموا مبارك ونظامه انهم كدة بيهاجموا وبيشوهوا صورة مصر
يبقى يقول للى بيهاجم طنطاوى واعوانه واجهزته الامنيه انهم بيهاجموا وبيشوهوا صورة الجيش

مش كدا برضه ؟

ولا احنا بنفكر ازاى ؟؟


---------


انا لا ادعوا للدخول فى مواجهات مباشرة مع الجيش ولا بتنطط عليه , لانه ببساطه ...... ابويا

الفوارق شاسعه بين قاعدة الجيش المصرى واهل قمته هم ومن يعاونهم من اجهزة امنيه عسكريه , وان مواجهه هؤلاء لا تعنى الدخول فى مواجهه مع اهل القاعدة , لانهم ببساطه متضررين من هؤلاء الفاسدين زيهم زى الشعب ماكان متضرر من امن الدوله ومبارك واكتركمان .

وكلمه اخيرة هقولها
الثورة دى عمرها ما هتنجح فى تحقيق اهدافها بشكل فعلى وكامل , ولا هتتخلص من محاولات الاجهاض والالتفاف , طول ما الناس دى فى السلطه وطول ما اجهزتهم الامنيه فعاله .


------------


فياريت محدش يطلع يقول طب ما احنا اخدنا حاجات كتير ولسه هناخد , مافيش مانع من بعض التنازلات , ونص العما ولا العما كله
لهؤلاء اقول :
مش من حقك تطلب حاجه زى كدة

لما الشهيد اللى اتهرس تحت عربيه

ولما اللى اندفن فى مناطق مجهوله
ولما اللى اندفن بالحيا فى سجن لسنوات
ولما اللى اتعذب واتهان
ولما اللى اصيب بعاهه
ولما اللى عندة ابن او اخ شهيد او مصاب

لما كل دول يرضوا بكدة ويقولوا ماشى
ساعتها ابقى تعالى اتكلم
واعتقد ان كل اللى ماتوا يوم 28 وقبلها وبعدها مكانش عندهم استعداد يتنازلوا عن جرام واحد من مطالبهم , معتقدش ان روحهم كانت رخيصه عندهم بالشكل دة .

اللى غيرك اشتراة اشتراة بدمه وبروحه , فمش من حق سيادتك ان تبيع مالاتملك لمن لا يستحق


----------------


وياريت بلاش الدعوات التثبيطيه بان الشعب بيعتبر المشير مثل اعلى
مافيش واحد دخل الجيش واعتبر المشير مثل اعلى , اللهم عدا الاخوة جنود الشرطه العسكريه والمخابرات اللى شافوا فى عهدة عز مشافوهوش قبل كدة , بالظبط زى ما امن الدوله بتقدس مبارك والعادلى , اللى شافوا فى عهدهم عز مشافوهوش قبل كدة , وعدا الاخوة اللى مدخلوش جيش اصلا , طبعا وعدا الاخوة المغفلين اللى مفهموش حاجه ولا عمرهم هيفهموا , ودول هتلاقوا اغلبيتهم من حزب الكنبه .


------------


اعتقد ان اللى عملناها دى ثورة تاريخيه بكل المقاييس وغير مسبوقه
معتقدش ان التجمعات دى حصلت بالشكل دة قبل كدة
احنا فعليا صدمنا العالم كله بمشهد ملايين من المواطنين العزل اللى اجتمعوا فى التحرير
امال لو نزل معاهم المتعاطفين اللى قاعدين فى بيوتهم يتفرجوا عالجزيرة هيحصل ايه ؟

حرام عليكم

تخلصوا بقى من روح سلم النقابه دى


انتوا خلاص


مش عارفين تتخلصوا من ام روح العبوديه دى ؟


دى ثورة ياحاج منك له مش وقفه احتجاجيه


دا انتوا ايام جمع مبارك المليونيه لو كنتوا دبدبتوا على الارض فى خبطه واحدة والله العظيم كنتوا عملتوا زلزال


لما العالم كله يحس بقيمه وبحجم وقوة الثورة المصريه عدا المصريين نفسهم , دة يبقى اما غباء او خيانه


دى مسخرة


------------


الف باء ثورة:
اللى بينزل الشارع علشان يعمل ثورة
بيعمل حسابه على حاجتين
اما انه يحقق كافه مطالبه
او يموت
مافيش ثورة بتساوم
مافيش ثورة بتفاوض
دة اول الضعف
اول الفشل
اول الانهيار

اللى بينزل دة عارف هيواجه ايه
وعارف انه ممكن يواجه حاجات مكانش متوقعها
بس فى النهايه
اسوأ ما يمكن ان يحدث له هو ان يموت
وبالتالى فهو مستعد لمواجهه اى شىء قى سبيل حريته
مينفعش ييجى عند مرحله يقول لأ خلاص
كفايه كدا
مايقدر عالقدرة الا ربنا
يلا نروح
ونبدأ مفاوضات
ووقفات احتجاجيه
وجمع توقيعات

اهالى المحله عملوا كدة سنه2008
بعد مادوخوا قوات امن مركزى من خمس محافظات
والنتيجه ان اتنكل بيهم شر تنكيل
ولسه فيه منهم لغايه دلوقت ناس فى السجن
وكل اللى كسبوة
ان مدخل المدينه اتسفلت واندهن
وعملولهم جونينه كبيرة برة البلد
ورموا ماسورة صرف جديدة فى الشارع الرئيسى

انتوا بقى
عاوزين كدة ؟
عاوزين مصر تبقى كدة

محدش يقول لى السياسه بتقول
احنا لو كنا بنحسبها بالسياسه
مكناش نزلنا وحنا عزل يوم 28 ووقفنا قصاد اكبر قوة امنيه فى العالم

لو حسبناها بالسياسه مكناش دخلنا فى صدام مباشر مع واحد من اقوى الانظمه الدكتاتوريه فى العالم واقواها على الاطلاق فى الشرق الاوسط كله

الناس اللى ماتت دى اغلبها مالوش فى السياسه ومشى وراكم علشان صدقكم وكان حاسس بالقهر والذل
مكانش عندهم سقف ولا حدود
وثق فيكم ومات وهو مستريح لانه واثق ان فيه ناس وراة هتكمل مشوارة وهتجيبله حقه

تيجوا دلوقت تطلعوا لسانكم لارواحهم !
تيجوا دلوقت وتقولوا كفايه كدة , ميقدر عالقدرة الا ربنا !
خلاص محناش لاعبين!
اصل المجلس العسكرى مفترى وايدة طارشه !

عاوزين تعرفوا انتوا بقيتم فين , وايه الصح من الغلط , بصوا لتونس , وبصوا لليبيا , وانتوا تعرفوا انتم بقيتم فين

هاتولى واحد محترم فى تاريخ مصر نادى وقت الغليان الجماهيرى بالهدوء واعلاء صوت العقل والحكمه ( بتوعهم مش بتوعنا ) وترك السياسه تاخد مجراها

عمر السياسيين ماقاموا بثورات
الثورات بيقوم بيها المناضلين , والمناضلين المجانين اللى احلامهم ملهاش سقف
وشتان بين السياسى والمناضل
واديكوا شفتوا السياسيين المحترمين , اللى مضموش على الشعب الا بعد ما تحققوا ان الغلبه له

ياسادة ياشباب يامناضل ياللى نزلتوا يوم 28
مينفعش دلوقتى تبقوا سياسيين
مافيش مناضل تحول الى سياسى وفلح فى السياسه
فى الاخر بيتسك على قفاة
ويلاقى نفسه من غير ما يحس بقى عميل فعلى للنظام
ولما بيفكر يرجع تانى لصفوف المناضلين مبيعرفش
لأنه بيكون منبوذ
منبوذ وفاقد للمصداقيه
وبيبقى زى اللى رقصوا عالسلم
لا اللى فوق شافوهم
ولا اللى تحت سمعوهم
وساعتها
مبيبقاش قدامه الا حاجه واحدة
انه يتحول الى كلب
كلب للنظام .

فياريت السادة ( المتسيسين ) يفكروا شويه , ولو حسوا انهم مش فاهمين يبقى السكوت نعمه , بدل ما يخربوها ويقعدوا على تلّها .

بدل ما انتوا عمالين تخبطوا حبه شمال وحبه يمين وحبه فوق وحبه تحت , وزحمه يادنيا زحمه , ومش راسيين لكم على بر ودماغكم صرمه قديمه ومش عاوزين تواجهوا الحقيقه يبقى تسكتوا

اسكتوا يرحمكم الله

اسكتوا الله يرحمكم

لو فضلتوا كدة
ولو الثورة دى فشلت لاقدر الله
ساعتها متعملوش عبط وتقولوا ملناش دعوة
مش احنا السبب
اصل بتوع الائتلاف هما اللى خربوها
اصل الحكومه
اصل الموضوع كان اكبر مننا واحنا اتسندنا على حيطه مايله
لأ دا احنا انضحك علينا
اصل المجلس سقانا حاجه اصفرا فى كبايه اخضرا وقال لنا تعالوا لما اركبكم الاوتوبيس

لأ
ياسيدى الناشط
يا اختى الناشطه
انتوا السبب
انتوا السبب
واتمنى ان يكون عندك الشجاعه الكافيه لمواجهه الحقيقه دى لو الثورة فشلت لاقدر الله , وتصحا كل يوم الصبح تبص فى المرايه وتقول فى سرك :
انا خيبت امل شعب
انا دمرت ثورة
انا ضيعت دم مئات الشهدا فى اقرب بلاعه
انا اهدرت حقوق الالاف
انا السبب فى خراب بيت وتضييع مستقبل الاف من زهرة شباب مصر
انا ولادى وولاد ولادى وولادهم من بعدهم هيتفوا عليا

هتقدر تتعايش مع كدة ؟؟؟


------


اخر كلام
سيبكم من عمرو مشتاق ولا البرادعى فى انتخابات الرئاسه, مش وقته دلوقت
المجلس العسكرى لازم يسلم السلطه كامله لمجلس مدنى فى اسرع وقت
لازم الاجهزة الامنيه العسكريه تنسحب من الشارع فورا
لازم كافه المعتقلين السياسيين يخرجوا فورا
لازم اللى اتورط فى المسخرة اللى بتحصل للناشطين دى يتحاسب علنا ايا كان
لازم الدستور القديم يتلغى فورا , والتعديلات دى شربه خروع وطبخه حمضانه
ومتيخيرنيش بين انى اكل طبخه حمضانه او اموت من الجوع , انا عامل ثورة , انا اللى ادى الاوامر مش طنطاوى .
امن الدوله يتحل رسمي وتماما بالشكل اللى قلت عليه فى بوستات فاتت
قتله الداخليه يتحاسبوا فورا ....كلهم .

محدش يقولى احنا معدناش بالقوة اننا نجبر المجلس على تلبيه الطلبات دى حاليا
والله انتوا اللى اضعفتوا نفسكم وفضيتم الناس عنكم بسبب غبائكم
وانتوا اللى تتحملوا مسئوليه الوضع دة
وانتوا اللى ملزمين تغيروة


---------------------


انا مش عميل ولا منتفع
واظن يعنى انى مش طالب شهرة , واعتقد انى مظهرتش علنا ولا حد يعرفنى ولا اسمى اصلا احمد زفت سعيد ولا بطلع على التلفزيون ولا بدى تصريحات لوكالات الانباء ولا عمال اهندس فى تيارات وائتلافات وحركات ما انزل الله بها من سلطان

واظن ان مش من مصلحتى اقول كلام زى دة فى توقيت طنطاوى مكلبش فيه عالبلد واحتمال فشل الثورة او على الاقل الالتفاف عليها اكبر بكتير من احتمال نجاحها

واعتقد ان مش هيكون عندى استعداد اعرض نفسى للخطر فى الوقت المنيل دة , ونا عارف كويس ان محدش هيسمى عليا ولا حد هيسأل فيا ولا يدافع عنى , واخرتها هيتقال عليا مخبر امن دوله , او بلطجى
الا لو كان عندى هدف اهم , وكنت خايف بجد على البلد دى ويهمنى امرها

وعارف انه مش من العقل ولا من الفطنه ولا من الكياسه انى اقول الكلام دة دلوقت ,
وعارف برضه انى كان ممكن اوصل وجهه نظرى بشكل اسرع واقوى لو كانت صيغه كلامى اقل حدة وتطرفا واكثر التفافا ودبلوماسيه

بس تقولوا ايه بقى فى واحد مجنون
دا بالاضافه لانى مش فارقه معايا , لانى اساسا ميت من حداشر سنه
يعنى مجنون وكمان ميت

وعلى اى حال
اى مكروة بيحصل او هيحصل للى بيقول كلمه حق , هتكون مسئوليته وذنبه فى رقبه كل من تخاذل وخدع الناس وروج للنظام وخدمه من غير ما يحس وثبط الناس وفطس الثورة , وشتتها بأراؤة اللوذعيه , ووصل الثورة للوضع المقرف دة ووصلنى انا شخصيا انى اقول كلام زى دة , ونا بحمله مسئوليه كل دة امام الله وامام ضميرة

واهلا بكم فى اجواء 1954


واحب اقول ان كان نفسى

نفسى
اغير خلفيه المدونه
مش عارف ان كان هييجى عليا اليوم اللى اغيرها فيه ولا لأ .




بسم الله الرحمن الرحيم
قل هل ننبئكم بالاخسرين اعمالا *الذين ضل سعيهم فى الحياه الدنيا وهم يحسبون انهم يحسنون صنعا*
صدق الله العظيم



خلاص انا معنديش كلام تانى اقوله

الا قد اُعذرت
الا قد بلغت
الا قد بلغت
الا قد بلغت
اللهم فاشهد