الخميس، 22 مارس، 2012

عالقهوة ..

البوست دة انا هتكلم فيه عن كذا موضوع , مش هحاول اكتب بشكل احترافى ولا اصيغ البوست بشكل مقال صحفى
مش هتقعر ولا هتكلم بالفصحى , هاتكلم بالبلدى كأنى فى نقاش عالقهوة ....


ازمه الوقود ..
من يوم 11 فبراير 2011 الى الان , مرت بمصر كذا ازمه وقود , ثبت بعد كدة انها ازمات مفتعله وغير مبررة .. وان المتسبب فيها هو النظام نفسه علشان يكرة الناس فى الثورة ويحسسهم انها مرادف للمعاناة المعيشيه والفوضى ..

بس المرة دى الوضع مختلف شويه
لو تلاحظوا ان الازمه عااامه فى الجمهوريه كلها , ومش واخدة حيز اقليمى زى اغلب الازمات اللى فاتت

بالاضافه لان الازمه المرة دى شديدة , شديدة جدا وبشكل اكبر من اى ازمه سابقه..

دا غير ان الناس .. اغلب الناس , هرش القصه وفهم ان الازمات دى مفتعله

دا بالاضافه لان الازمه المرة دى طولت قوى , واخدت منحنى اعمق

طب لو فكرنا بالعقل كدة , ليه النظام هيدبر ازمه بالعمق دة رغم انه عارف انها هتنعكس عليه بالسلب , يعنى مش هيقدر يشتغل الناس علشان يقولوا (منها لله الثورة اللى خربت البلد ), زى كل مرة ؟؟

لو ضيفنا لكدة التوجه العام للاعلام الرسمى هنلاحظ ان فيه ميل لتلبيس المشكله لحكومه الجنزورى , وفيه محاولات احترافيه لاثارة غضب وغيظ الناس اتجاة الحكومه

طيب

لما دة يكون توجه التلفزيون الحكومى , والفضائيات ( اللى هى برضه تحت طوع النظام ) يبقا معنى كدة ايه ؟؟

يبقى معناة كالاتى :
ان النظام بيتعمد تشويه حكومه الجنزورى وحرقها بشكل تام فى الشارع ... ودة معناة ان فيه حكومه تانيه جاهزة ومستعدة تحتل كراسى الوزارة , والنظام مستعجل قوى وعاوز يعينها بسرعه قبل انتخابات الرئاسه ..



معلش ,
نقف لحد هنا ونفتح موضوع تانى , والموضوعين متصلين ببعض :

الازمات المتكررة اللى بين البرلمان وحكومه الجنزورى , لما نعرف ان الاتنين كلاب للنظام وماشيين تحت طوعه وبيأتمروا بأمرة , يبقا ايه معنى الازمات دى ؟

مافيش تفسير الا ان الازمات دى كلها مفتعله .. ودة يبان قوى من حاله الاستخفاف الغير عاديه اللى بتعامل بيها حكومه الجنزورى البرلمان
مش منطقى ان الحكومه تعامل البرلمان كدة , البرلمان دة هو اللى النظام سحب بيه الشرعيه الثوريه من الشارع وهو اللى المجلس العسكرى بيتحامى فى شرعيته وبيحكم من وراة ..

فاكيد مش من مصلحه النظام ان البرلمان يبان ضعيف وطرطور كدة , لان دة هينعكس بالسلب على المجلس العسكرى اكيد وهيسحب الشرعيه من البرلمان تانى ويرجعها للشارع ..

وفى نفس الوقت الحكومه , اى حكومه مصريه عموما , معندهاش الحد الادنى من الكرامه ولا الاستقلاليه اللى يسمحولها تتصرف من دماغها وتفتعل ازمات مع البرلمان بدون داعى بالشكل دة , وخصوصا زى ما قولنا ان دة هيأثر بالسلب على سيد وولى نعمه الحكومه , اللى هو المجلس العسكرى ..

يبقا معنى كدة ان الحكومه مش بتتصرف من دماغها , وان الازمات دى سيناريو وبيتم تنفيذة بعلم المجلس العسكرى وبضوء اخضر منه ..

وفى نفس الوقت معروف ان مجلس الشعب ما هو الا مجلس طراطير منزوع السلطه , فمش من الطبيعى برضه انه يفرد صدرة قوى كدة على حكومه ولى نعمته ...

----

لو ربطنا الكام نقطه دول بالفقرة اللى فوق , هتتشكل صورة عامه اكثر وضوحا , وهتكون كما يلى :

- ان الرئيس القادم شخصيته اتحددت خلاص , ونال موافقه امريكا واسرائيل ودول الخليج والطبقه الحاكمه فى مصر
- وان الرئيس مش اسلامى ولا اخوانجى , وان الاخوان هرشوا الموضوع دة واخدوا بالهم منه , وبالتالى فهم عايزين حقهم ( مشفى ) قبل الانتخابات , لانهم عارفين ان مجلس الشعب تمن رخيص قوى لخيانتهم للبلد , ومالوش لازمه وممكن يتحل ويتنطروا كلهم منه بمنتهى السهوله , وفى نفس الوقت مينفعش يستنوا لما بعد الانتخابات , لان الانتخابات هى الفقرة الاخيرة فى اللعبه , بعدها المولد هينفض ومش هيقدروا يطالبوا بحاجه , خصوصا ان شعبيتهم فى الشارع انضربت , وان بعد الانتخابات , اوراق ضغطهم على النظام هتكون معدومه

يبقا احنا ياعم المجلس كأخوانجيه عاوزين حقنا دلوقت , قبل الانتخابات ..
طب يضمنوا حقهم ازاااى ؟
الاجابه بسيطه جدا,

الوزارة..

حق الاخوان اللى هما عاوزينه يتمثل فى الوزارة
ولو تلاحظوا طمع الاخوان فى الوزارة ظهر اكتر من مرة فى الفترة الاخيرة ..
بس فيه نقطه,
فيه وزارات سياديه بتعتبر نقط قوة حاسمه , مستحيل النظام يتخلى عنها , زى وزارة الداخليه والخارجيه والدفاع والاعلام والماليه , بالاضافه لاجهزة الاستخبارات باختلاف انواعها .. لان ببساطه اللى بيتحكم فى الوزارات دى هو الحاكم الفعلى لمصر , والنظام مش اهبل علشان يسيبهم للاخوان ..

يبقا الصفقه بتتضمن التخلى عن الوزارة للاخوان ( عدا الوزارات السابق ذكرها ) بالاضافه لمجلس الشعب , ودة يحصل قبل الانتخابات .. وبكدة تكون التورته اتقسمت والنظام احتفظ لنفسه بنقاط القوة اللى يضمن بيها تفوقه مستقبلا لو حصل بينه وبين الاخوان اى صراع ..

حاليا غضب الشارع تصاعد ضد البرلمان وبدأت الناس تصرح ( ولو على استحياء ) بندمها على انتخاب الطراطير دول , والقاعدة العريضه من الشعب بدأت تقتنع انه مجلس طراطير وانتهازيين ولا لهم لازمه , فى نفس الوقت اداء حكومه الجنزورى من وجهه نظر رجل الشارع اتضح انه عقيم وباهت , وشعبيه الحكومه بدات تنهار هى كمان ...

كدة يبقا فيه عدة ازمات بتواجه النظام ولازم يتجاوزها كلها فى وقت واحد , وهنا تتجلى براعه النظام فى ضرب الازمات ببعضها واستغلال كل منها للخروج من الاخرى

ازاى ؟

اقولك ازاى ,
النظام لاحظ من عدة سنوات ان اكتر شىء فعال وقادر على التأثير على الحياة العامه للمواطن المصرى هو الوقود
- ارفع سعر الوقود , كل حاجه سعرها هيطلع السما..
- امنع الوقود , البلد كلها تتشل وحالها يقف والمواطن الغلبان يشد فى شعرة ..
فلعبه الوقود لعبه امنيه حكوميه ميه فى الميه , واى لعب فى الوقود اعرف انه خارج من مكتب امنى بدون ادنى شك

النظام يفتعل ازمه وقود طاحنه , ويبدأ يساير الناس ان حكومه الجنزورى هى السبب ( اكيد طبعا هى اللى نفذت الموضوع , بس مش هى اللى خططت له ) , يبدا غضب الشارع يتزايد ضد الحكومه بعيدا عن المجلس العسكرى , وفى نفس الوقت الحكومه تظهر تعالى غير مبرر على البرلمان وتفتعل ازمات معاة , والبرلمان بدورة يرغى ويزبد ويهدد والكتاتنى يعرض صدرة ويجعجع , وطبعا كل الثوريين اللى ضد البرلمان هيبتدوا يهاجموا البرلمان ويقولوا عليه طرطور , والناس هتاخد بالها اكتر من الموضوع دة

دى حاجه بالظبط زى الساحر اللى هيمارس خدعه معينه فلازم ينبه الناس فى اللحظه الحاسمه علشان الكل يبصله ويركز معاة ..

الاعلام : البرلمان طرطور والحكومه بتديله على قفاة
النشطاء : بص ياشعب , البرلمان طرطور والحكومه بتديله على قفاة
الناس بدورها : ايوة البرلمان طرطور والحكومه بتديله على قفاة
كله بيبص وبيركز عالبرلمان
فى نفس التوقيت غضب الشارع من الحكومه يوصل لذروته , لمرحله ما قبل الانفجار..

وفى اللحظه دى,

هووووووووووووووووووووووب

جلا جلا , لا سحر ولا شعوذة

- البرلمان سحب الثقه من الحكومه والحكومه ( اقيلت )
- وفى نفس التوقيت ازمات الوقود والبوتجاز تنتهى مرة واحدة وتعود الاوضاع لطبيعتها
- ويبدا الاعلام الوسخ فى عزف سيمفونيه جماعيه , هتكون النوته بتاعتها كالاتى :

- البرلمان اقال الحكومه فى اول سابقه من نوعها
- البرلمان دكر
- البرلمان مؤثر وقوى والكل بيخاف منه
- برلمان الشعب له الكلمه الاولى والاخيرة
- الشعب لم يخطىء الاختيار

وهنا طبعا كل اللى هاجم البرلمان وقال عليه طرطور هيفقد مصداقيته وهيحط جزمه فى بقه ويسكت , وشعبيه البرلمان هترتفع فى السما والناس هتتعلق بيه كأمل ليهم بعيد عن الثورة والكلام الفاضى دة ...

ساعتها محدش هيبص للمجلس ولا هيفكر فيه , الناس كلها هتبص للبرلمان على انه بابا وانه ماما وانه كل شىء فى حياتها ..
وبكدة هيقدر النظام يلعب لوحدة بعيد عن الاضواء ووجع الدماغ ..

طيب , الحكومه اقيلت , تظهر بقا فى الصورة الحكومه الاخوانيه , وتبدأ عهدها بشويه جعجعه فارغه تخدع بيها الناس , والنظام هيدعمها بشويه انجازات شكليه ترفع رصيدها فى الشارع ..

وبكدة المواطن البسيط اصبح معتقد ان عندة برلمان قوى يمثله ويجيبله حقه
وعندة وزارة نضيفه بتشتغل وبتحقق انجازات ( ولو متواضعه )

يفضل منصب الرئيس

طبعا ( شو ) الحكومه والبرلمان دة هيبط الشارع كله وهيخلى مسلسل الانتخابات يتم بمنتهى الهدوء , بدون اى تهديد لاحداث دمويه زى محمد محمود كدة ..
ودى نقطه تانيه ( بجانب مطامع الاخوان ) توضح ليه النظام من مصلحته يغير الحكومه قبل الانتخابات

وبعد التمثيليه

هيكون الشعب معتقد ان عندة رئيس منتخب , مش مهم هو مين , لان الشعب هيرضى باى حد , مش هيتذمر ولا هيشتكى , خصوصا لما يتنفذ السيناريو الاتى :

بعد الانتخابات هيبدأ المجلس العسكرى يظهر ( تلكؤ ) فى تسليم السلطه , هتبدأ الناس تخاف وتحس بالفزع , ساعتها هيدخل الرئيس الهمام شجيع السيما ابو شنب بريمه ويصرخ فى السبع صرخه ( اللى هو المجلس ) يقوم السبع يتكهرب ويبقا فرخه ( الجيش يرجع ثكناته ) ..

وهنا الناس هتهلل للرئيس الشجاع البطل اللى انهى حكم العسكر اللى الناس كلها قرفانه منه ..
بالاضافه لشويه بروبجندا ودعايه فارغه , مع شويه اصلاحات خايبه , بالاضافه لحملات اعلاميه , بالاضافه لاستغلال رضا الشعب باى حد يبقا ريس والسلام

من دة كله هيبقا الريس الطرطور الجديد بطل قومى ..

وهنا فيه نقطه لازم اوضحها لمن لا يعلم
اللى بيحكم مصر مش بالضرورة يكون جالس على كرسى الرئاسه

يعنى ايه ؟

- يعنى ببساطه انت عندك منظومه امنيه متطورة جدا ومتشعبه وليها دراع فى كل شارع وحارة , كل جامعه ومدرسه , كل مسجد وكنيسه , كل اذاعه وتلفزيون و كل جورنال , كل مؤسه حكوميه وكل شركه خاصه ..
المنظومه الامنيه دى بتتحكم فى كل كبيرة وصغيرة فى كل حاجه فى مصر ( ودة بالمناسبه مش شرط يكون ملحوظ وظاهر )
فبالتالى اللى بيتحكم فى المنظومه الامنيه دى هو اللى بيحكم مصر

- عندك جهاز مالى بيأثر على اقتصاد البلد , ممكن بقرار ينيم الشارع فى العسل , وبقرار تانى ممكن يولع الشارع ويخلى الناس تفجر البلد باللى فيها ..
اللى بيتحكم فى الجهاز المالى دة بيتحكم فى الشعب , وبالتالى بيتحكم فى مصر

- عندك هرم كهنوتى من رجال الدين ( سواء مسلمين او مسيحيين ) مسيطرين سيطرة تامه على ملايين الاتباع اللى بيطيعوهم طاعه عمياء , وممكن يوجهوهم فى اى اتجاة..
الهرم الكهنوتى دة خاضع بالاساس لسلطه الاجهزة الامنيه , يعنى الاجهزة دى يتتحكم فى الهرم دة وبالتالى فهى بتتحكم فى ملايين من الاتباع , الملايين دول ثقل جماهيرى بيشكل القاعدة العريضه من الشعب المصرى, ( وبيحصل فعلا ) ان الاجهزة الامنيه توجه الهرم الكهنوتى ده لتوجيه الثقل الجماهيرى دة فى اى اتجاة , وبالتالى توجه البلد كلها معاة ..

- عندك شبكه من الطرق الصوفيه فيها ما لا يقل عن عشرة مليون مريد , مبدأهم الاساسى طاعه شيخ الطريقه والالتزام باوامرة , ولما نعرف ان مشيخه الطرق الصوفيه اصلا تحت السيطرة التامه لجهاز امن الدوله ( اللى مازال موجود وزى ما هو ) يبقا بالتالى برضه المنظومه الامنيه بتتحكم فى ملايين الاتباع دول ...

هيطلع حد يقولى الطرق الصوفيه محترمه وشفنا منها عكس اللى بتقوله فى اعتصامات الميدان خلال السنه اللى فاتت ..

هقولك ببساطه النظام كان عندة عدد كافى من الكروت اللى بيلعب بيها وبيسيطر بيها على الشارع .. فمن العقل انه يحتفظ بكارت الطرق الصوفيه لوقت عوزة وميحرقوش بدون داعى ...
يعنى النظام ادى مشيخه الطرق ضوء اخضر للنشاط اللى عملوة خلال السنه اللى فاتت علشان يلفت نظر الثوار لهم ويرفع رصيدهم , بعد كدة امرهم يرجعوا للبقعه المظلمه تانى , استعدادا لانه قد يحتاج اليهم فى اى ازمه قادمه , وخصوصا ان كارت الاخوان والسلفيين هيكون اتحرق ومش هينفعه ساعتها ..


- شرحه قبائل البدو , مشايخ القبائل دى مسيطرين بشكل شبه تام على البدو , والافراد بدورهم بيطيعوهم ॥ المشايخ دول الامن حاططهم فى جيبه وبيتحكم فيهم , بالترغيب حينا وبالترهيب حينا اخر.

هتقولى طب ما احنا شفنا ان البدو خرجوا عن السيطرة اكتر من مرة

هقولك حالات فرديه , ومش تمرد عام , لان التركيب القبلى للبدو معقد وفيه قبائل كبيرة بتخضع قبائل اصغر بالاجبار , غير ان فيه بدو اساسا متمردين وخارجين من مظله القبيله ( تشميس ) ودة بيدى الفرصه بعض الاحيان لحركات زى دى , بالاضافه لان مشايخ القبائل لازم يتغاضوا فى بعض الاحيان عن سلوكيات افراد قبيلتهم فى الاوقات اللى بيكونوا فيها غاضبين بشدة , علشان مايتمردوش عليهم .. وطبعا نفس الموضوع بالنسبه للجهاز الامنى ..

- ضيف لكدة منظومه اعلاميه من تلفزيون وفضائيات وسينما ومسرح وصحافه وكتب واذاعه ونخب وكتاب وادباء ومفكرين صوتهم عالى , فيه ناس كتير بتقتنع بكلامهم وبتمشى وراهم
دول كلهم تحت سيطرة النظام بدرجات متفاوته , بس المؤكد ان محدش فيهم متحرر بشكل كامل من سلطه النظام , لانه فى الحاله دى هيكون اما منفى او سجين او مقتول لا محاله ..

- عندكم قوة مسلحه متمثله فى الامن المركزى والجيش , القوة دى بتضمن حسم اى نزاع بين اجنحه السلطه , انا لو فى ايدى سلاح الجيش والداخليه والاعلام ,, رئيس الدوله عندة ايه يقف بيه قصادى ؟؟؟
ولا حاجه ...

يبقا احنا كدة وضحنا اهميه الداخليه والجيش والاجهزة الامنيه والاستخباريه اياها , وطبعا الاعلام , والماليه , بقيت الخارجيه

- الخارجيه هى لسان النظام , اللسان اللى النظام بيكلم بيه الغرب الوسخ , الغرب اللى بيدعمه بكل قوة وبيساندة وبيسلحه وبيغطى عمايله الوسخه.
- الخارجيه هى اللى بتتمحلس لدول الخليج اللى مدلعه نظامنا الوسخ اخر دلع
- الخارجيه اللى بتعقد صفقات وسخه من كل نوع بتضخ دم جديد للنظام كل يوم


يبقى ببساطه ياسادة اللى مسيطر على الوزارات والاجهزة دى هو اللى بيحكم مصر

مش مشكله لما نصدر رئيس طرطور نلمعه قدام الناس ويبان هو الكل فى الكل على خشبه المسرح , لان الناس كدة كدة مش متقبلانا كعسكر وعندها حساسيه من الميرى , واحنا كدة كدة عارفين ان ايامنا فى الحكم مهما طالت معدودة ...

بقا الشعب عندة برلمان وطنى قوى زى الفل , وحكومه زى العسل , ورئيس دكر وشريف ..
ونام فى العسل يا عزيزى المواطن

وبكدة كل واحد اخد نصيبه من التورته واتراضى .
والعسكر هيقفوا فوق المسرح يحركوا كل الماريونيت دول بخيوط شفافه غير مرئيه ,
بدون اثارة حساسيه او سخط الشعب
ويستمر النظام زى ما هو عاوز..

( يعنى من الاخر المجلس العسكرى بيعمل نفس اللى عمله السلطان سليم الاول فى الشهور الثمانيه اللى قعدهم فى مصر بعد ما جيشه هزم المماليك واحتلها ) ..

ولو حصل والنظام تهاوى تانى , ساعتها كل التهم هيتم الصاقها بشخص الرئيس والحكومات , وهنا يتدخل المجلس العسكرى كبطل منقذ ويظهر فى الصورة ويخلص الشعب من الحكم الفاسد , ونعيد الكرة من اول وجديد ( طبعا الامور مش هتمشى كدة , بس العسكر معتقدين انها هتمشى كدة )

يبقا العسكر حافظوا على النظام وحافظوا على مصالحهم ومصالح الغرب , وهدوا الاوضاع فى البلد , واحتفظوا بقوته , وامنوا نفسهم مستقبلا , واحتفظوا بقدرتهم على التدخل فى الوقت اللازم لو الاخوان فكروا يغدروا , مع ضمان ان الشعب هيقف ساعتها على الحياد ( على الاقل ) .

بعد الرئيس الطرطور ما يمسك والشعب ينام فى العسل هتبدأ مدبحه شامله لكل الثوار واى حد شكل خطر على النظام خلال السنه اللى فاتت , كل دة هايتم وسط تعتيم اعلامى , ووسط طرمخه كامله من الشعب اللى نايم فى العسل , وبدون ادنى احتماليه خطر من حدوث غليان شعبى ..

ومافيش مانع وسط الهيصه دى مبارك يطلع براءة , او على الاقل يتم اسقاط التهم عنه مقابل انه يرد الفلوس للدوله ( وسط تطبيل اعلامى بالملايين اللى هتنعنش الشعب )
وتطلعلك الحكومه تقولك : اة رد الفلوس خلاص..
وانت بقا يا مواطن ابقى روح خزينه الدوله اتاكد اذا كانت الفلوس اتردت فعلا ولا لأ .. هههههههع هع هع

ويطلع مبارك زى الشعرة من العجين ويعيش هو وولادة فى تبات ونبات ويستمتع بالمليارات اللى نهبها من البلد , وسط طرمخه شعبيه وطناش وبدون اى ردود افعال ...

ايه رأيكم فى السيناريو دة ؟؟؟


____________________


تانى حاجه هتكلم عليها هو شخصيه الطرطور اللى هيسمى مجازا ( رئيس لدوله مصر )
انا مش بضرب الودع ولا بحضر مؤامرات النظام علشان اقولكم هما هيختاروا فلان,
بس اقدر استبعد ناس بعينها وازكى ناس بعينها ,

من خلال رؤيتى لطريقه تفكير النظام ومصالحه اقدر اقول ما يلى :

اولا كدة ياسادة فيه حاجه العسكر بيعملوها فى الفترة دى , او بمعنى ادق النظام ومن وراة الغرب بيعملها عن طريق العسكر..
الحاجه دى اسمها اعادة ترتيب اوراق السلطه فى مصر , او تكوين توازنات جديدة للقوى تضمن الحفاظ على استمراريه النظام وعلى استقرار الاوضاع الفاسدة فى مصر ..

جزء من مخطط التوازن دة انا ذكرته فى الفقرة اللى فوق لما اتكلمت عن ان مجلس الشعب هو والنقابات وبعض الاماكن فى اجهزة الدوله , بالاضافه للوزارات والمؤسسات غير السياديه .. كل دة هيكون للاخوان , ونسبه من مجلس الشعب للسلفيين مع عدم التضييق عليهم فى المجال الاعلامى ومجالات البيزنس . ( عاملكوا كلمه البيزنس باللون الاحمر والحدق يفهم )

وان العسكر هيحتفظوا لنفسهم بكل نقاط القوة اللى تضمنلهم التفوق ..

طيب

لو العسكر جابوا رئيس اخوانجى او اسلامى عموما , موازين القوى دى هتختل..
اينعم هو هيبقى طرطور ومافيش سلطات فعليه فى ايدة,
بس محدش ضامن , ممكن يطلع ناصح ويبدأ يستقطع سلطات لنفسه , وممكن شعبيته تزيد فى الشارع زيادة عن الحد المسموح ويبقى تهديد لمعادله القوة دى ..
دة طبعا صعب يحصل , بس ليه العسكر يدخلوا نفسهم فى الموال دة من الاول ؟!

العسكر ببساطه هيجيب رئيس بعيد عن التيار السلفى للاسباب السابق ذكرها , بالاضافه لانه لو جه سلفى , فغالبا هيكون حمار وغبى , وهيخسر الشارع ويغرق ويغرق النظام والحكومه والبرلمان معاة ..

كدة نستبعد ابو اسماعيل والعوا وغيرهم من الاسلاميين ..

وطبعا ومن باب اولى مش هيجيبوا ريس اخوانى , وخصوصا ان الاخوان اكثر ذكاء ودبلوماسيه من السلفيين
كدة نستبعد ابو الفتوح وخيرت الشاطر ...

يتبقى عندنا مين ؟

- احمد شفيق
- عمرو موسى
- عمر سليمان
- طنطاوى

طبعا عمر سليمان وطنطاوى مرفوضين غربيا , لانهم معندهمش كاريزما , ولا اى قبول شعبى , ولا بيعرفوا يتكلموا اصلا , دا غير ان عندهم متاعب صحيه كتير تعرض حياتهم للخطر..
الغرب عاوز واحد يعمر فى الكرسى , مش واحد يقعد سنتين ويموت والبلد تولع تانى ..
دا غير ان طنطاوى مش هيحقق للعسكر نظريه الانسحاب الصورى اللى هما عاوزينها , وعمر سيلمان مكروة جدا ومستفز للجماهير بشكل زايد

يتبقى مين ؟

- احمد شفيق
- عمرو موسى

طبعا من خلال حمله شفيق , هنكتشف بسهوله انه بيتعمد استفزاز الناس وتكريههم فيه , بمعنى ادق بيحرق نفسه اكتر ماهو محروق ..
ودة نستنتج منه ان ترشيح شفيق اصلا مجرد غطاء , علشان يغطى على مرشح تانى .. حيله نفسيه كدة , ازاى يعنى ؟

اقولك ازاى ,,

انت لما تكون عاوز تفرض (س) على (ص) و (ص) دة ممتعض من ( س) ومش مستريحله قوى ..
فتقوم سيادتك تجيب ( ع) وتعرضه على ( ص) كبديل ل (س) ..
ويكون ( ع ) دة شخصيه زباااااااله و(ص) مش طايقه ...

ساعتها هتلاقى ( ص) راح اترمى فى احضان ( س) علطول ...

(س) هو عمرو موسى
(ص)هو الشعب المصرى
(ع) هو احمد شفيق

وبالهنا والشفا ...

يبقا عمرو موسي هو المرشح الاقوى

- له خلفيه دبلوماسيه هتكمنه من التواصل مع العالم ,
- سنه وصحته مقبولين نوعا ما,
- له كاريزما يضحك بيها على دقن الغلابه ,
- الشعب ميعرفش له خلفيات فاسدة,
- نوعا ما له قبول وسط الاوساط الشعبيه,
- هيقبل بقواعد اللعبه وهيسمع الكلام,
- واحد من النظام وماشى فى ركابه,
- هيحافظ على القدر الكافى من التوازن المطلوب للقوى ...

وان لم يكن عمرو موسى فغالبا هيكون شخص غير معروف من الجهاز الادارى للدوله
ممكن مثلا, يكون محافظ ما , اكتسب شعبيه خلال الفترة الحاليه , وهيبدأ يتلمع اعلاميا قبل الانتخابات بفترة قليله , او شخص تانى فى السلطه التنفيذيه مثلا ..

وبرضه البرادعى فرصته كبيرة , بس بشرط انه يقبل بقواعد اللعبه , ساعتها دة هيتضمن حمله اعلاميه مكثفه لتلميع البرادعى , لان الاعلام بيحاربه من كذا سنه وشوة صورته لاقصى درجه , فمن الطبيعى انه يعمل حمله مضادة علشان يلمعه تانى ...

واحد يقولى انت بتتكلم فى ايه ياعم ؟ مش فيه انتخابات وصناديق ؟!! وفين رأى الشعب؟!!

اقولك ياحبيبى الشعب هو الوحيد اللى مش هيكونله رأى فى اللعبه دى

العالم كله هيدب بوزة فى شخصيه الرئيس القادم , والكل هيعرض رأيه , الا صاحب الشأن الوحيد , المواطن المصرى ..

اقولك الانتخابات دى والصناديق دى تبلها وتشرب ميتها

الشعب هيتسلسل ويتوجع عن طريق الاعلام يروح يصوت لمين

واللى الاعلام مش هيقنعه , التزوير كفيل بتعديل صوته ..

واهى مش اول مرة يعنى , ما الاستفتا اتزور , وانتخابات البرلمان اتزورت , هتيجى على انتخابات الرياصه ؟!!!



كفايه كدة ...

الاثنين، 5 مارس، 2012

كلمتين ورد غطاهم ..



فيه موضوع محدد عايز اتكلم فيه , الموضوع دة يخص فئات معينه , لان فيه حاجه لاحظتها مؤخرا بدأت تنتشر والفئات دى مش بتبص فيها لقدام , بيبصوا تحت رجلهم بس , وعلى المدى البعيد الموضوع دة هيضرهم ضرر جسيم , هيضرهم وهيأثر بالسلب على نشر افكارهم ومبادئهم

حد فهم حاجه ؟؟
لأ

طيب..
اللعبه اللى عملها النظام مؤخرا واللى احد اوراقها بتشمل صعود الاسلاميين الى ( واجهه ) السلطه , بقول واجهه السلطه مش السلطه ( تفرق كتير ) .. الحركه دى ترتب عنها ان الوجه القبيح للاسلاميين بدأ يظهر وريحه عفنهم بدأت تفوح بعنف , اعتقد انها هتتزايد بشكل مطرد مع الزمن ..

اولا كدة دعنا نتفق على ان مصطلح ( سلفيين ) و ( اسلاميين ) مصطلح عام فيه ظلم واجحاف لفئه صالحه بس مهمشه وصوتها مش عالى ملهاش علاقه بالناس دول , وبيحطهم معاهم فى بند واحد , علشان كدة انا هطلق عليهم اسم خاص , وليكن مثلا ( المتسعودين ) او ( المتأسلفين )

باختصار, المتسعودين او المتأسلفين دول انهيارهم وسقوطهم امر محتوم , واعتقد انه هيكون قريب وهيكون مدوى ,
الناس دى بتتمتع بقدر عالى جدا من الفساد والانتهازيه والتلون والنفاق , لما نزود عليهم كمان الجمود الفكرى البشع والتعالى واحتقار الاخر والغباء البالغ ..
فأكيد اكيد الناس دى مش هتطول كتير ..

كل ما فى الموضوع ان الشعب ( نتيجه لمتلازمه نفسيه مش وقت شرحها ) قرر يخدع نفسه ( بإرادته ) ويمشى ورا الناس دى , لعل وعسى يجتازوا بيه الازمه , لان الشعب مش مؤهل نفسيا فى الوقت الحالى للخيار البديل .

انا على يقين ان اى شخص او فصيل يصعد لواجهه السلطه فى الوقت الحالى يبقا حكم على نفسه بالاعدام , طالما مفيش فى ايدة السلطه الفعليه , او قدرة حقيقيه على احداث تغيير حقيقى شاااامل

فلما يطلعوا الجماعه المتأسلفين ويقبلوا على نفسهم انهم يكونوا واجهه شكليه لسلطه خفيه ماشيه على نفس خط السير القديم فدة مالوش غير نتيجه واحدة ومعروفه

----------

طيب , نسيب النظرة المستقبليه ونتكلم فى الحاضر شويه ,

شىء طبيعى جدا ومنطقى انه فى ظل بروز تيار العفن المتسعود دة , لازم يطلع تيار مضاد , دة شىء طبيعى ومقبول , التيار المضاد دة بدأ يظهر وينتشر بشكل كبير فى العالم الافتراضى , وبدأ يظهر على استحياء فى الواقع , واعتقد انه مرشح للانتشار فعليا بشكل اكبر مع الزمن..

المشكله بقا ان التيار المضاد دة بلغ درجه من التطرف انه اصبح بيهاجم الدين نفسه , ممكن يكون بيتجنب التصريح المباشر بكدة اغلب الاوقات , بس دة لاينفى ان دة ظاهر الامر اللى بيبان للجمهور فعلا , او التوجه اللى بيُستشَف بسهوله من كلامهم .

ودة خطأ جسيم , لسبب بسيط جدا ,
انا لما بتكلم وبعرض توجهى فدة مش بيكون لمجرد الرغى و الدردشه , لأ , دة بيكون لانى عندى افكار ومبادىء معينه عايز انشرها وسط الاخرين , ونجاحى متمثل فى اقتناع الناس بافكارى وتبنيهم لها..

فالموضوع دلوقت اشبه بان فيه جمهور عريــــــض جدا واقف فى النص , وعلى الاجناب واقف فريقين متضادين , كل واحد منهم عايز يجذب اكبر قدر من الجمهور دة فى صفه هو ..

الجمهور دة دلوقت فى مرحله ضغط , لانه بعد ما توجه لجانب ( المتأسلفين ) على انهم الجانب الافضل , بدأ يلاحظ انه كان غلطان , وبدأ يصاب بحاله هلع وكرة لهم ( بدأت ملامحه تظهر حاليا وهتتزايد مع الزمن ) ..

فالوضع هيوصل لان الناس هتحاول تدور على بديل افضل , لان جمهورنا مع الاسف متعودش يصنع البديل بنفسه , هو عايز بديل جاهز يمشى وراة .

هيبدأ الجمهور دة يلتفت للاتجاة الاخر , هيفاجأ بتيار بيهاجم الدين اصلا وبيحاول ينسفه من اساسه( او هكذا سيعتقد الجمهور ) .

هتقولى لأ دا هما ميقصدوش كدة , هقولك مش مهم يقصدوا ايه , المهم ان دة اللى الجمهور هيشوفه فيهم

المتأسلفين بيحاولوا يرسخوا الفكرة الفكرة دى , والتيار المضاد بيرسخها اكتر من غير ما يحس ( مع الاسف )


فاكرين اللعبه اللى لعبها مبارك سنه الفين وخمسه ؟
لما امريكا بدأت تقلب عليه لعب لعبه جميله جدا ,
طلّع الاخوان فى الصورة وقدمهم للامريكان على انهم هما البديل الوحيد له , والاخوان بغبائهم تجابوا معاة من غير مايدركوا حقيقه نواياة
ظهر الاخوان فى الصورة ونجح مبارك فى توصيل الرساله للامريكان :

- الاخوان هما البديل
- البديل دة بيكرهكم , وهو عدو قديم لاسرائيل
- البديل دة معناة خروج مصر من سيطرتكم
- وفقدانكم القدرة على التحكم فى المنطقه كلها

بصرف النظر عن عدم صحه الكلام دة طبعا , بس مبارك نجح يقنع الامريكان بكدة , وطبعا انتوا عارفين كويس ايه اللى حصل ساعتها :)

لو جردنا الموضوع دة هنشبهه بتيارين مصالحهم مختلفه , ( ثقلين ) بس وزنهم مش تقيل قوى , واحتمالات رجحان احدهم على الاخر واردة اغلب الوقت

ساعتها كل وزن من الاتنين محتاج ثقل اكبر علشان يرجح كفته ,
فى الموقف دة كان التقل هو امريكا , ثقل لانها فعليا متحكمه فى المنطقه وقرارها قادر على حسم والتحكم فى مجريات الامور فى مصر

نفس الموضوع فى قصتنا ( بغض النظر عن بعض الاختلافات )

فى حالتنا الكتله الفاعله والثقل الاكبر هيكون متمثل فى الجمهور , الشعب , الطاقه اللى لو قدرت تتحكم فيها وتسيطر عليها هتقدر ببساطه تقش كل خصومك على الساحه

المتأسلفين بطبعهم الحالى منفرين للجماهير , طبيعى انه خلال فترة بسيطه هيبدأ الجمهور دة يبص فى الاتجاة المقابل , ولما يشوف الاتجاة المقابل دة متطرف للدرجه البشعه دى , فالطبيعى ساعتها ان الجمهور دة هيفضّل نار المتأسلفين ويترمى فى حضنهم ويتمسك بيهم اكتر..

يبقا انتوا بكدة ساهمتم من غير ما تشعروا فى اطاله عمر المتأسلفين , وعملتوا لهم كمان تنفس صناعى ..
وكل ما يواجههم شبح السقوط هيبرزوا للجماهير فزاعه ( الملاحدة الكفاراللى هيخرجوا مصر من حظيرة الاسلام الحنيف )..

انتوا بالظبط عاملين زى اللى سايق عربيه وهو مبيعرفش يسوق , فعمال يحدف يميــــن وشماااال , شويه يلبس فى شجرة , وشويه يطلع عالرصيف وشويه يدوس واحد غلبان ماشى فى حاله ..

العربيه دى هى دماغكم , عقلكم

مع الاسف نسبه كبيرة منكم مازالوا مراهقين فكريا , مش قادرين ينضجوا شويه , مش عارفين يسوقوا عقلهم صح ..

كلامى بيزعل؟

معلش هى دى الحقيقه , ماهو دة اسلوب المراهقين فعلا ,

لما يحبك يبقا انت ملاك والدنيا جنه , ولما يتقمص منك تبقا شيطان والحياة لا تطاق

عندة عمى الوان فى مخه , مبيشوفش الا بالابيض والاسود

بالظبط كدة زى نشطائنا الحلوين بعد تنحى مبارك , فجأة .. ظباط الجيش ( كلهم ) بقوا ملايكه بأجنحه , وقديسين مبيغلطوش , ولو غلطوا فدة اكيد خطأ غير مقصود , ولو مقصود فلازم نتغاضى عنه ونعمل مش شايفينه .

( كــــل ) ظباط الجيش حلوين خااالث مااالث وزى الفل ( ودى مش حقيقه ) ..

ولما اضطروا يواجهوا الحقيقه مع الزمن , خسفوا الارض بظباط الجيش , وفجاة .. بقا ( كـــــل ) ظباط الجيش شياطين بديول وقرون وولاد وسخه ومافيهمش راجل ( ودى برضه مش حقيقه )

ظباط الجيش اللى كانوا فى الاول هما هما اللى فى الاخر , متغيروش ,

ومتعملهمش إحلال بكائنات بديله من المريخ , ومش حلوين على طول الخط ومش وحشين على طول الخط ,

وفيه كتير منهم واقف فى منطقه رماديه فيها كلام كتير عايز يتقال


يعنى باختصار اسلوب التفكير دة مغلوط ومنافى للواقع ويدل على عقليات مراهقه وطفوليه كمان وعلى شخصيات غير متزنه ..

فهمتوا الفكرة اللى عايز اوصلها ؟؟

اكبروا بقا , وعيب لما شويه بهايم زى دول يشتغلوكم ويلموا مكاسب على قفاكم

علشان تتحرك لقدام يبقا لازم تمشى فى نص الطريق , مش تحدف يمين تلبس فى الحيط وتحدف شمال تلبس فى شجرة ..

صحصحوا شويه الله يكرمكم