الاثنين، 21 مايو 2012

الرئيس القادم ..








فيه موضوعين صغيرين مش عايز افرد لهم بوستين منفصلين , فاهتكلم فيهم باختصار قبل ما ادخل فى الموضوع الرئيسى ...
_______

اعلاميين مصر :

للمرة المليون عايزكم تفهموا ان مافيش حاجه حاليا فى مصر اسمها اعلامى شريف , مرحله ان فيه اعلاميين يوصلوا للشاشه عن طريق الخطأ ويتجاوزوا الخطوط الحمراء ( الحقيقيه ) فدى مرحله انتهت من التسعينيات ...
فلما تلاقوا حد دلوقت بيجعجع وعامل نفسه بيهاجم النظام , فدة بس علشان يشتغل ويعمل شعبيه .. وكدة كدة هو فى الاخر بيلتزم بالتعليمات ومش بيتجاوز الخطوط الحمراء ( الحقيقيه )

- اي حد بيظهر علي شاشه التلفزيون هدفه شئ من اتنين , اما يرضي النظام ... واما يرضي النظام (بشكل تاني) , ويرفع نسبه المشاهده علشان يزود اجره..

ـ دليل الاعلامي( النزيــــــــــه ) : اشتم النظام من غير ما تتجاوز الخطوط الحمراء , اخدم النظام بأنك تشتت الناس في فرعيات وتوافه , هتبقى بطل وشعبيتك تزيد , نسبه مشاهده برامجك ترتفع , الاعلانات تكتر وسعرها يعلا , مرتبك يبقا اكبر والطلب عليك في الفضائيات يزيد..

وماتنسوش ان كل الاعلاميين بينتموا لنفس الطبقه الاجتماعيه الوسخه اللي بتحارب الثوره بشكل غير مباشر وعايزه تحولها لمجرد حركه اصلاحيه..

باختصار .. فى الوقت الحالى .. الاعلامى الشريف والنزيه الذى لا يخاف واللى معندوش خطوط حمراء مكانه فى حاجه من 3 :
- اما فى السجن
- اما فى القبر
- اما منفى خارج مصر...

--------------


المسلسل السورى :

الجيش الحر قعد سنتين مش فادر علي بشار وفجاه موقفه اتحول للنقيض في يومين اتنين ؟!! وتحديدا في نفس توقيت الانتخابات المصريه!! تمثيليه مقنعه :)

- المسأله باختصار ياسادة وكل ما فى الموضوع ان امريكا كانت عايزه بشار يستمر في فشخ شعبه علشان الشعب السورى يتعمل عبره للمصريين. لو فكروا يصطدموا بجيشهم ,
ولما حان موعد الانتخابات اللي هتخلي العسكر يحكموا من خلف الستار فى مصر , اصبح لاداعي لاستمرار مسلسل البوبع وابو رجل مسلوخه في سوريا ..

خلاص يابيشو كفايه كده , روح بقا .. خلاص العسكر في مصر داخل علي مرحله جديده هيحكم فيها من غير مايظهر في الصوره ,
فمعادش فيه احتمال للصدام مع الشعب (من وجهه نظرهم) , وبكده حان الوقت لاسدال الستار علي فيلم الجيش السوري ابو رجل مسلوخه اللي بيفشخ الشعب ,

فينزل الستار بقا وعدة الشغل تتلم , وتخش سوريا في مرحله المجلس العسكرى السورى ( الحر) اللي حمي الثوره , والعسكر الشرفاء اللي حموا ثورة الشعب السورى ,
وساعتها اللي هيشكك في نزاهه المجلس العسكري ( السوري) ( الحر ) الشعب السوري هيفشخه علي اعتبار انه من فلول بشار ,
وتبدا سوريا تدخل المسلسل اللي احنا دخلنا فيه يوم 11 فبراير .. وسمعني سلام هات لنا ريري هات لنا ريري..

 صعبان عليا ان السوريين دفعوا الدم ده كله علشان يقعوا في نفس الحفره اللي وقعنا فيها بعد التمنتاشر يوم :((

يبقا كده ولله الحمد كل الثورات العربيه فشلت عدا ثوره البحرين اللي لسه مستمره ..

--------

مسلسل مصر وسوريا وتونس امريكا معرفتش تطبقه فى ليبيا علشان معمر غبي وعنيد ورفضه , فغيروا المسلسل شويه :

في ليبيا حاليا المجلس الانتقالي بيقوم بنفس دور المجلس العسكري في مصر ,
ليبيا زيها زينا , كل الفرق ان الشعب الليبى انتهز الفرصه وقتل طاغيته ..
انما الليبيين بيحكمهم مجلس خونه زينا بالظبط .. بس عندهم مجلس الخونه لابس لبس مدني

- حاليا مافيش ولا نظام عربي واحد سقط .. كلهم مازالوا موجودين , بس بوجوه مختلفه

----------


كدة انا قلت وجهه نظرى باختصار فى الموضوعين دول .. ندخل بقا عالموضوع الرئيسى الا وهو الانتخابات ,
 
انت نازل تنتخب ليه ؟

- علشان الفلول ماتنجحش
- علشان ادعم مرشح ثورى يبقى ريس ويكمل الثورة
- علشان العسكر يسيبوا السلطه
- علشان مابقاش سلبى ويكون ليا دور فى مستقبل مصر
- علشان الاسلاميين مايمسكوش السلطه ويخربوا البلد
- علشان شرع الله يحكم ومصر تبقا جنه
- لأن مافيش قدامنا خيار غير كدة ومينفعش نسيب الساحه فاضيه للعسكر يلعبوا فيها براحتهم
- بكمل الثورة عبر صندوق الانتخابات
- علشان عايزحالتى الاقتصاديه تتحسن والاقى اكل لعيالى
- علشان ازازة الزيت وكيس السكر
- علشان انا متوسم خير فى مرشح بعينه وشايف ان هو دة اللى هيصلح حال البلد

اعتقد لو سألت اى حد السؤال اللى فوق اجابته مش هتخرج عن الاجابات السابق ذكرها ..

تعالى كدة نشغل عقلنا شويه ونمسكهم اجابه اجابه ونفكر فيهم :

- علشان الفلول ماتنجحش ...
طب لو سمحت فكر شويه فى مصطلح ( فلول ) دة ..
بذمتك انت شايف ان نظام مبارك بقا مجرد فلول ؟
مين بالظبط اللى فلول ؟

- الداخليه اللى ميزانيتها وتسليحها زاد عن الاول ورجعت لعادتها القديمه تانى وكل يومين نسمع عن ظابط ولا امين ضرب مواطن بالرصاص , ولم يحاسب ولا كأن اللى اتقتل دة كلب ضال ؟

- ولا الامن المركزى اللى يوم ما كان بيعمل عاهه لمتظاهر الدنيا بتتقلب ودلوقت فى كل مظاهرة يقتلوا عشرة عشرين ويصفوا عين خمسين ستين تانيين ولا كأنهم بيصطادوا دبان ؟

- ولا المخابرات وامن الدوله اللى نشاطهم زاد اكتر من الاول ودخلت معاهم فى اللعبه كمان اجهزة امنيه جديدة مكانش لها دعوة زمان بالحياة المدنيه ؟

دول فلول ؟؟؟!!!

- رجال الاعمال والرأسماليين اللى كابسين على نفس البلد وكل واحد فيهم زى ماهو من بعد ( الثورة المباركه ) ولا اتمست فيه شعرة .. دول فلول ؟

- اللى بيحكموا بلدك حاليا ولهم سلطات مطلقه فى كل حاجه ولهم حق اصدار القوانين او الاعتراض عليها بجرة قلم .. دول فلول ؟

- اللى فى اللحظه دى متحكمين فى كل وزارات وهيئات وكل مفاصل البلد , دول فلول ؟

دول اللى فلول ولا انت اللى فلول ؟

اة .. متستغربش , انت فلول
انت فلول ثورة فاشله , اتولدت واندفنت بالحيا بعد ولادتها بسبع ساعات ...

- اللى بقوا مستضعفين والكل بيستغلهم وبينهش فى لحمهم , فلول ولا مش فلول ؟

- اللى بينزلوا كل مظاهرة يتنفخوا ويتقتل منهم ويتصاب عشرات ويعتقل منهم مئات ... فلول ولا مش فلول ؟

- اللى النظام والعامه اتفقوا ضدهم وبيقولوا عليهم بيخربوا البلد ... فلول ولا مش فلول ؟؟

ياسيدى الفاضل اللى انت بتتكلم عنهم دول مش فلول ... دة نظام ولسه موجود زى ماهو ماتهزتش فيه شعرة .. وحاكم قبضته على البلد زى الاول تمام بس انت اللى مش واخد بالك ...

انتم اللى فلول , فلول ثورة فاشله تم احباطها فى ايام , ومازلتم عايشين حلاوة الروح الى الآن ومش مدركين انكم ماشيين فى سيناريو تصفيه بطيئه بدأ من سنه ونص ولسه مستمر

فبلاش كلمه فلول ونظام سابق والكلام الخايب دة , لانه مع الاسف كلام منافى للواقع ...

------

- برضه لا داعى عن الكلام عن حكم الشرع , الخلافه الاسلاميه اللى انت بتتمناها يا اسلامى ياحالم يابرىء فيه ستين الف قوة جوة وبرة هتمنع انها تحكم بلد حيويى وحساس زى مصر , 
فلو عاوز تحققها مش هتقدر الا بالقوة ... عمرك ما هتحققها بصندوق انتخابات ..

انا بس باكلمك بلغتك مش اكتر ...

------

- علشان مبقاش سلبى ويكون ليا دور فى مستقبل مصر..

طيب احب حضرتك تبص فى المرايه وتسأل نفسك ايجابيتك فى انتخابات مجلس الشعب عملت ايه ؟

وجاوب على نفسك ..

هتقول لأ , ما هو خلاص الاسلاميين اتكشفوا والناس مش هتتخدع فيهم تانى؟
ومين قالك ان المشكله فى الاسلاميين لوحدهم ؟
الا تعلم ان كل التيارات السياسيه على الساحه بلا استثناء تيارات فاسدة ولا تصلح ؟
يعنى لو كانت الاغلبيه انتخبت التيار الليبرالى مثلا او غيرة مكانتش حاجه هتتغير..
كل ما هنالك انك كنت هتشوف الاخوان والسلفيين هما اللى جايبين فوارغ الخرطوش بتاع محمد محمود فى مجلس الشعب والليبراليين هما اللى بيفرشولهم الملايه ويلغوشوا عليهم ...

هو مجلس الشعب دة اصلا اتعمل ليه ؟
الخديوى اسماعيل الله يحرقه لما بناة بناة ليه ؟
هاتلى يوم واحد خلال الميه واربعين سنه اللى فاتوا كان فيه مجلس الشعب دة بيعبر عن نبض الشارع والارادة الحقيقيه للشعب ...

مع الاسف طول عمر البرلمان مصنع للتعريص ( وآسف فى اختيار اللفظ )  بصرف النظر عن الشخصيات اللى موجودة تحت قبته ..
اينعم كان تعريصهم متذبذب ومستواة يرتفع احيانا وينخفض احيانا اخرى ,
الا انه كان مستمر ودائم , وارتفاع مستواة او انخفاضه مرجعه هو المصلحه الشخصيه للبرلمانيين ومدى اتفاقهم او اختلافهم مع النظام ( على مصالح شخصيه برضه ) مش اكتر من كدة ..

دا غير نقطه تانيه كمان ,
انت لو انتخبت الصحابه وجبت ابو بكر وعمر فى البرلمان مافيش حاجه هتتغير ...
لان ببساطه الانتخابات بتغير وشوش , تسقط وزارات , انما عمر ما الانتخابات اسقطت نظام ...

الانظمه ياسادة لا تسقط الا لما تواجه ثورة شعبيه مسلحه وتفشل فى قمعها او احتوائها .. او لما يقوم ضدها انقلاب عسكرى وينجح فى نزع السلطه منها , وبعد كدة بقا هو ومزاجه , يمشى على نفس الخط القديم , يعمل نظام جديد , يطعم حبه من دة على شويه من دة .. هو حر.

الانتخابات مش هتغير حاجه بصرف النظر عن نتيجتها , لان باختصار مش هى موطن الداء

موطن الداء فى النظام نفسه , اللى مسيطر عالاجهزة الامنيه المتحكمه فى كل شىء فى مصر, اللى معاة السلاح , اللى متحكم فى منظومه اعلاميه كامله ومسيطر على كل كلمه وكل حرف بيتقال عبر الاثير , اللى متحكم فى لقمه عيش الناس ومسيطر على بطونهم وعقولهم ..

انت بمشاركتك فى المسلسل الانتخابى عامل بالظبط زى اللى وهو ماشى فى الشارع حس بطراوة جاياله من ورا ,
راح غير ياقه القميص .. بس لسه الطراوة موجودة,
غير جاكيت البدله , بس لسه فيه سقعه,
راح لبس زعبوط .. بس البرد من ورا لسه مستمر,

وهيفضل مستمر مهما عمل ومهما غير , طالما لسه لم يكتشف ان بنطلون جنابه مفتووووق من ورا وانه محتاج يغيرة , وطالما مغيروش عمر الاحساس دة ما هيزول مهما عمل ...

-------

رايح تنتخب علشان العسكر يسيبوا السلطه ؟
وهو انت معتقد انهم هبل لدرجه انهم يحددوا انتخابات ويحرضوا الناس تشارك فيها علشان تجيبلهم واحد يرميهم فى السجن ؟؟

العسكر لو كانوا شاكين فى الانتخابات لحظه واحدة انها ضدهم مكانوش عملوها اصلا
هتقول دول عملوها مجبرين تحت الضغط الشعبى ومكانش قدامهم حل تانى؟

هرجع واقولك العسكر عندهم ما يكفيهم من الحيل انهم يأجلوا الانتخابات سنه واتنين لو عايزين

بس كل ما فى الموضوع ان الناس اتخنقت منهم وهما عارفين دة كويس ,
وعارفين ان ظهورهم فى الصورة بيستفز الشعب وبيعرضهم لخطر قيام ثورة جديدة ضدهم بشكل خاص ,
وانهم مهما أجلوا الانتخابات فوجودهم فى الصورة لازم ينتهى ..

يبقى ليه احنا كعسكر ناجل الانتخابات ؟
ما احنا كعسكر ممكن نلعب ونهندس ونتكتك ونجيب طرطور مدنى نحطه فى الواجهه ونختفى ظاهريا من الصورة ونبطل نطلع فى التلفزيون وفى برامج التوك شو , ونبطل ندى تصريحات للجرايد ....

 والناس تفرح وتهلل بالثورة اللى انتصرت والعسكر اللى رجعوا ثكناتهم .. بينما الحقيقه اننا مازلنا بنتحكم فى الرئيس الطرطور وماسكين كل خيوط اللعبه ...

ضيف على كدة كمان شرعيه هنستمدها من شرعيه الرئيس الطرطور اللى الشعب منتخبه .

ولو عدد من الناس اكتشف اللعبه وقرروا يتحركوا فى الشارع الشعب هو اللى هيعتبرهم اعداء الشرعيه ,, وساعتها مش هيبقوا بيحاربوا النظام ..
 لأ , هيكونوا بيحاربوا الشرعيه اللى ارتضاها الشعب عبر صندوق الانتخابات ...

وبلاش تقول كلام من نوعيه لو فلول ولا طرطور مسك الناس مش هتسكت , او احتمال الرئيس يتقلب على العسكر وساعتها الناس هتقف معاة , او هيحصل صراع بينه وبينهم واحنا هنزيط فى الزيطه ...
كل دة مش هيحصل

لان العسكر قبل ما يقدم على خطوة زى دى فهو مظبط موازين القوى كويس قوى وعامل حسابه لكل الاحتمالات , واى انفجار هيحصل ( دا لو حصل جدلا ) فهو محكوم ومسيطر عليه داخل المعمل

واعتقد انتوا مجربين العسكر سنه ونص وعارفين هما بيعرفوا يتكتكوا ازاى ...

-------

- و أوعى تفتكر ان فيه حاجه اسمها مرشح ثورى او محترم , كل المرشحين بلا استثناء فاهمين اللعبه كويس وفاهمين ان اللى هينجح فيهم هيكون طرطور ..
هما عارفين كدة كويس ومتقبلينه وموافقين عليه..

مرشحينكم مهما ادعوا الثوريه او تشدقوا بشويه كلام عنترى قالوة ايام نظام مبارك بعد ان اضاءت لهم الاجهزة الامنيه الضوء الاخضر , فهما فى الحقيقه لا ثوار ولا حتى اصلاحيين ..

كلهم مجرد انتهازيين بيجروا ورا مكاسب شخصيه مستغلين الثورة ودم الشهداء..

كلهم وجوة مختلفه لعمله واحدة , كل الفرق ان فيه شخص صريح بيجاهر برايه المعادى للثورة زى شفيق وشخص كاذب ومدعى زى خالد  ...

كل الفرق انهم واحد كان موجود فى السلطه سلفا والناس جربت فسادة زى شفيق , وشخص اخر فاسد بس الناس لم تكتشفه بعد لانه لم يجد الفرصه انه يمسك سلطه او يقعد على كرسى , زى صباحى ..

-------

انا عارف ان المقاطعه مش عمل ايجابى , لان المقاطعين كدة كدة اقليه ...
وحتى لو المقاطعين اغلبيه فالمقاطعه ( على نطاق واسع ) مش هتسقط النظام فعليا , وان كانت هتزعزعه جامد وهاتمهد لتصعيد اكبر ...

المقاطعه فى حالتنا مالهاش علاقه بالايجابيه او السلبيه , المقاطعه مجرد إثبات موقف .. لو انا مش قادر اسقط النظام حاليا , يبقى من باب اولى لا اشارك فى تدعيمه وترسيخه اكتر بغطاء شرعى اسمه انتخابات ..

- تخيل ان فيه بلطجى قوى ماسك شخص ضعيف ونازل فيه ضرب , وانت مقتنع انك ضعيف ومش هتقدر تساعدة , ولو تدخلت البلطجى هيطحنك انت كمان ..
ساعتها التصرف الامثل يكون ايه ؟ تجمع الناس يساعدوا , او تسكت وتمشى فى حالك ؟ ولا تروح تساعد البلطجى وتضرب الضعيف معاة ؟؟!!

- انت بمشاركتك مش بتشارك فى عمليه ديموقراطيه , انت بتشارك فى توليد جنين مسخ من رحم نفس النظام الوسخ اللى لم يسقط اصلا , الجنين دة مجرد امتداد للنظام .. بس مش عجوز , لسه قدامه حياة طويله , بيدى نفس اطول وعمر اكبر للنظام العجوز مش اكتر ..

- انت بمشاركتك بتعطى النظام شرعيه بصرف النظر عن كونك هتصوت لمين , او حتى هتبطل صوتك ..

النظام كل اللى عاوزة منك انك تحتشد قدام اللجنه فى صف طويــــــل وتتزاحم مع الناس على الصندوق , والاعلام يصورك بهذا الشكل ..
بس .. النظام مش عايز منك اكتر من كدة ..

صوتك اللى هتبطله مش هيفرق معاة , لانه ببساطه هيفعله تانى غصب عنك ومحدش هيقدر يكتشف دة ...

مش هيهتم انت هترشح مين لانه عارف ان كل المرشحين كلاب مستنيينه يرمى لهم عضمه , وعارف كويس انه يقدر يرجح كفه واحد عن التانى باساليب كتير هاتكلم عنها بعدين ..

احشدوا بقا واتنططوا عالحيط واعملوا قرود واخترعوا دعايا لمرشحينكم الثوريين , فى النهايه كل دة بيصب فى شرعيه الانتخابات وبيعملّها زخم , وفى النهايه مرشح النظام هو اللى هيفوز ...

وساعتها انصحك تخبى صور صباعك الفسفورى عن اولادك لما يكبروا , لانهم لو شافوها .. ثق تماما انهم هيتفوا فى وشك وهايحتقروك ..

-----------

- التزوير :

نزولك الانتخابات فى حد ذاته مش هيمنع التزوير , بالعكس دة هايغطيه ,
لان ببساطه تزوير العسكر غير تزوير مبارك ,
مبارك كان تزويرة بجح لانه مطمئن انه مسيطرعالشعب بعصا الداخليه , فكان بيقفل اللجان عينى عينك ويظبطوا الصناديق قدام الناس عادى ..

العسكر مش بيعملوا كدة , العسكر بيسيبوا الناس تنتخب زى ماهى عايزة , واللعب بيبقا فى المراحل اللى بعد كدة واللى قبل كدة ...

دا غير انه لعب نسبى مش شامل زى مبارك , لان العسكر عن طريق الاعلام بيقدروا كويس قوى يتحكموا فى توجهات الكتله الاكبر من الشعب , ودة تلاحظوة قوى فى ارتفاع اسهم شفيق اليومين اللى فاتوا دول  هو وصباحى ..

فالعسكر بكل بساطه بيقدروا يحشدوا نسبه كبيرة من الناس فى اتجاة المرشح اللى هما عايزينه , إما عن طريق الاعلام واما عن طريق لعبه التوازنات بين المرشحين زى ما حصل مع نزول سليمان مؤخرا , وزى ما بيحصل مع شفيق دلوقت ..

يعنى فى النهايه نقدر نقول ان العدد اللى هيختار مرشح النظام هيكون اقل من الحد الادنى للفوز باعداد بسيطه , ودة هيحصل بدون تزوير , التزوير بقا هيحصل على نطاق ضيق نسبيا عن طريق اللعب فى الاعداد البسيطه اللى هترجح كفه مرشح النظام عن مرشح آخر بعينه ... ودى عمر ماحد هيقدر يكتشفها , ولو حد قال للناس عليها محدش هيصدقه ..

لان ببساطه منظر الحشود الجماهيريه اللى واقفه برة اللجان وقدام الصناديق هو اللى هيغطى على التزوير دة..

اللعبه دى اتلعبت بحرفيه فى الاستفتاء وانتخابات البرلمان , وهاتتلعب بحرفيه اكتر فى انتخابات الرئاسه , وساعتها الاصوات اللى هتصيح وتهلل بحدوث تزويرهتكون اضعف من ان تُسمَع او يكون لها صدى , وخصوصا ان اصحابها هيكونوا من انصار المرشحين الخاسرين , بالاضافه لانهم نفسهم هيكونوا شاركوا من غير ما يحسوا فى التغطيه على التزوير دة ...

ماهو الاستفتاء اتزور , وانتخابات مجلس الشعب اتزورت , مع ان الناس نزلت افواجا الى اللجان..

 دلوقت .. كام مواطن مصرى مقتنع بحدوث التزوير دة ؟؟؟؟

-----------

- توازنات القوى :

زى ماقلت , العسكر بيظبط الانتخابات لصالحه عن طريق استخدام 3 اساليب فى نفس الوقت :
الاعلام - توازنات المرشحين - التزوير المستتر والنسبى..

الاعلام انتوا عارفين دورة كويس , والتزوير اتكلمت عليه

اما لعبه التوازنات بقا دى لعبه مسليه جدا:

- العسكر نزل سليمان لمجرد انه يكون بعبع للاسلاميين وللمواطنين فى وقت واحد , علشان الناس تخاف وتقتنع ان النظام القديم ( اللى هما فاكرينه قديم ) مازال موجود وممكن يرجع ببساطه لو تقاعسوا عن الادلاء بأصواتهم ..
فهو فى نفس الوقت بيربى الاخوان على تجاوزات فكروا يعملوها وفى نفس الوقت بيخوف الشعب ..
ولما دور سليمان انتهى .. سحبوة بمنتهى البساطه من الساحه تانى ...
____

- النظام عارف كويس ان الاخوان ومشايخ الوهابيين مش مسيطرين على كامل الأسلاميين فى مصر , وان فيه اسلاميين ثوريين مشغلين عقولهم نسبيا وخارجين عن مظله النظام عن طريق عدم خضوعهم نسبيا لسيطرة المشايخ اياهم .

فكان الحل الامثل انهم يدخّلوا الاسلاميين دول ويحشدوهم داخل حظيرة بطل ثورى اسلامى يكون صنيعه للنظام نفسه , يلاقوا فيه المثل اللى هما عايزينها وينساقوا وراة ..
الراجل دة كان حازم ابو اسماعيل ,

ولما وصل الحشد دة لأتم صورة , وفى نفس التوقيت بدأ ابو اسماعيل يتجرأ ويلمح انه هيتجاوز حدودة مستغلا الحشد دة ..
ببساطه العسكر شالوة من الصورة بفضيحه بسيطه ورط نفسه فيها , وهو بعد موقعه العباسيه عرف حجمه كويس والتزم الصمت ...

فضل كدة عندنا حظيرة فيها الاف الاسلاميين بدون صاحب ..
من الطبيعى ان الاسلاميين دول مش هاينفضُّوا ويسيبوا امل أتعلقوا بيه , الطبيعى انهم هايدوروا على اى شخص تانى يحسوا فيه بالامل دة ولو جزئيا , كل مجموعه فيهم هتتعلق بشخص معين وتجرى تدخل فى حظيرته , وهو دة المطلوب ..

لان الاسلاميين دول بتوجههم الثورى القديم كانوا خطر على النظام , لانهم ببساطه رافضين يدخلوا تحت مظلته ويشاركوا فى اللعبه اللى هو حط قواعدها وسيطر عليها , فالنظام جابلهم ابو اسماعيل كقطعه من الجاتوة يغيرهم بيها ويحركهم ويسحبهم تحت مظلته وجوة لعبته من غير مايحسوا وبعدين رمى الجاتوة بعيد بعد ما دخلوا تحت المظله وجوة قفص اللعبه خلاص ...

دا غير ان القطاع الاكبر من الاسلاميين اصلا كانوا تحت المظله
فالوضع دلوقت اصبح ان الاسلاميين ككل مشاركين فى اللعبه ومتضامنين اما مع ابو الفتوح او مرسى ...
______

- النظام عقد صفقه مع الاخوان تنص على انه يتنازل لهم عن الوزارة متمثله فى كام وزارة خايبه من اللى مالهمش لازمه دول ( بعيدا عن الوزارات السياديه ) مقابل انهم لا ينازعوة فى منصب رئيس الجمهوريه ..
الطبيعى ان الاخوان يرفضوا , انما النظام كان عارف كويس انهم هيوافقوا لانه عارف كويس طمعهم وعينهم الفارغه , وانهم هيوافقوا خصوصا بعد تراجع شعبيتهم بشدة فى الشارع ..
بالاضافه لسبب اخر هقوله بعدين..

الكلام دة انا قولته من شهرين تقريبا لو تفتكروا .. وحصل بعدها زى ماقلت.

طب ازاى الاخوان يتنازلوا عن منصب الرئيس ؟ قيادات الجماعه معندهاش مشكله فى دة لانهم متعودين على الصفقات الوسخه , انما هيعملوا ايه فى جحافل شباب الجماعه المتحمس اللى مش هيقبل بحاجه زى دى ؟
بالاضافه لان شباب الجماعه دول هما عمادها ومركز قوتها , وقرار زى دة كفيل باحداث انقسامات عميقه فى صفوف الجماعه وانشقاق عدد ضخم من الشباب عنها , وكدة الجماعه هتغرق.

الحل كان بسيط جدا,

الشخص ذو الشعبيه الاوفر فى الجماعه واللى الشباب ( اغلبهم ) على استعداد انهم ينساقوا وراة , واللى هو ( ابو الفتوح ) هيعمل تمثيليه مع مكتب الارشاد انه خرج من الجماعه , وبعدين يرشح نفسه ,  وفى المقابل الجماعه هترشح شعبيا شخص معدوم الكاريزما ( مرسى ) وهتلزم افراد الجماعه بانتخابه ..

وبكدة هيحصل انشقاق وتفتيت طبيعى فى اصوات الجماعه , بين قطاع اغلبه من الشباب اللى تحمسه هيغلب التزامه بالسمع والطاعه , هايرفضوا الاوامر وهاينتخبوا ابو الفتوح , وبين قطاع اخر من اقليه الشباب الملتزم بالاوامر واغلبيه الاكبر سناً , هايسمعوا الكلام وهينتخبوا مرسى ..

وبكدة هيكون مكتب الارشاد عمل انقسام طبيعى فى اصوات اعضاء الجماعه , وفتت الحشد الاخوانى بين ابو الفتوح وبين مرسى , بين الحماس وبين الالتزام .. وهتكون النتيجه طبعا فى صالح مرشح النظام الغير اسلامى..

لكن اعضاء مكتب الارشاد بطبعهم غدارين فحاولوا يخرجوا عن الدور المرسوم بترشيحهم الشاطر , بس النظام ضربهم بنزول كارت سليمان , وفرض عليهم حل وحيد للازمه دى , عن طريق حرق الكارتين مع بعض ..
 وفى نفس الوقت قلش ابو اسماعيل زى ماقلت , ففرض توازن مثالى يقدر يلعب معاة براحته ...

بس الاخوان طماعين برضه , وبما انهم فهموا كويس انهم اضعف من الاصطدام بالنظام , فقرروا يلعبوا لعبه تانيه .. هيلتزموا ظاهريا بالاتفاق مع العسكر , وفى اللحظات الاخيرة ( اللى هى دلوقتى ) هيحاولولوا يلعبوا( جديا ) فى الحشد الاخوانى من تحت لتحت فى اتجاة المرشح الاكثر ثقلا ( ابو الفتوح او مرسى ) على امل ان حد منهم يفوز والعسكر يبقوا قدام الامر الواقع .. ودة طبعا مش هيحصل ...
_________

- الكتله الاسلاميه فى حد ذاتها متمثله فى مرسى وابو الفتوح النظام بيستخدمها كبعبع وكلب مسعور بيطلقه خلف الكنيسه وخلف قطاعات اجتماعيه كتيرة تانيه بتخاف من وصول الاسلاميين للحكم ..

الكنيسه كانت مع الثورة ( مش باتكلم عن القيادات الكنسيه الكبيرة ) لانها بطبعها اتضررت كتير من لعب مبارك بيها فى فترة ما قبل الثورة , وهما بدورهم خايفين من وصول اسلاميين متعصبين بيدعوا الوسطيه للسلطه , لانهم ببساطه هيتعرضوا لاضطهاد وظلم ابشع بكتير من اللى هما فيه ..

وبالتالى فالنظام وضع الكنيسه امام خيارين كلاهما سىء , واحد سىء متمثل فى التراجع عن الميل للتيار الثورى والتخلى رسميا وفعليا عن الثورة مقابل ضمان رجوعهم للوضع القديم ( السىء ) اللى كانوا عليه قبل الثورة , ودة عن طريق قبولهم بواحد من اتنين , موسى او شفيق ...
واما يعاندوا وفى الحاله دى هيفوز بالسلطه مرشح اسلامى هيدخلهم فى وضع اسوأ من كدة كمان...

فما كان من الكنيسه الا انها بلعت الطعم ( كالعادة ) وقبلت تدخل لعبه النظام .. نفس اللعبه اللى كانت السبب فى كل البلاوى اللى حصلت للكنيسه فى الكام سنه اللى فاتوا ...
الكنيسه دخلت اللعبه وحشدت اصوات المسيحيين لشفيق , وبكدة يبقا النظام قدر يستغل اصوات كام مليون قبطى لصالحه مع انهم المفروض يكونوا ضدة , ودة عن طريق فزاعه الاسلاميين .

شرحه القطاعات الاجتماعيه المسلمه الواسعه اللى فاهمه كويس ان المرشحين الاسلاميين دول لو حد منهم فاز هيدخل بالبلد فى نفق مظلم , فيضطروا هما كمان يرشحوا احد مرشحى النظام , اللى كانوا بيقولوا عليه قبل كدة فلول , او يرشحوا حد ممن يطلق عليهم ( ثوريين ) زى صباحى او خالد على ..

_______

 - تبقى عندنا التيار الاصلاحى والشريحه البرجوازيه اللى مقتنعين انهم ثوار ( بينما هم فى الحقيقه اصلاحيين ) ..
 دول بطبعهم بيخافوا من الثوارات الشعيه الحقيقيه لانها هتضر مصالحهم الضيقه ,  بالاضافه لانهم عندهم فوبيا تاريخيه من تمرد ( الرعاع ) ,
لذلك يحاولوا يحققوا اى اصلاحات شكليه تلطف الوضع نسبيا وتحافظلهم على اوضاع معينه هما معندهمش استعداد يضحوا بيها ...

القطاع دة النظام خوفهم بفزاعتين , الفزاعه الاسلاميه والفزاعه ( الفلوليه ) وفى نفس الوقت رمالهم جزرة متمثله فى شخصيتين بيدعوا الثوريه وهما خالد على وحمدين صباحى ...

عن طريق الترغيب والترهيب دة النظام نجح انه يدخل الفئه دى هى كمان تحت مظلته ويخليها تشارك فى التمثيليه على امل ان حد من مرشحينهم يكسب ...

طبعا دة برضه مش هيحصل ..
________

- احمد شفيق شخصيه معدومه الكاريزما ولا يجيد الكلام , ومتغطرس بشكل مستفز , النظام منزله ( يشوش ) على موسى , مش يشوش من التشويش , لأ , اقصد يشوش زى شاويش الافراح الشعبيه ..

سيبكم بقا من استطلاعات الرأى والتخاريف دى , استطلاعات الرأى مجرد بالونه مخابراتيه الغرض منها حاجتين :
- قياس رد الفعل ,
- جذب كميه اكبر من المؤيدين ,
 لان مع الاسف فيه نسبه لا بأس بها من المصريين عبارة عن ( إمّعات ) بيشوفوا التكتل الاكبر فى اى اتجاة , وبيروحوا معاة بشكل تلقائى

شفيق نازل يقوم بدور مغناطيس , يجذب النقد والكرة بعيد عن موسى , لان كدة كدة كان لابد من ادخال شخصيات من النظام للعبه الانتخابات علشان تدى ايحاء بالواقعيه وتستفز الناس انها تنزل وتشارك ..

 وطبعا موسى مينفعش يكون هو الشخصيه دى لانه بالشكل دة هيتحرق , فكان الخيار ان شفيق يقوم بالدور دة ..

 وكمان هايجمل صورة موسى نسبيا , لان موسى لوحدة هينال قدر من الكراهيه , انما لما ينزل مرشح اسوأ منه وبينتمى لنفس التوجه , ساعتها موسى هايظهر بشكل اجمل والطف ( دا شىء نفسى )

بالاضافه لان شفيق بيسُتخدَم كوعاء للاصوات , يعنى لو فيه الف واحد هينتخبوا موسى ... ليه منزلش شفيق يلم لوحدة هو كمان الف صوت ؟ وبعدين نصب الالف صوت دول عند موسى , فيبقى موسى جمع الفين صوت بدل الف واحدة ...

____

- اما باقى المرشحين المغمورين , فدول انا بعتبرهم ( فكّه ) النظام بيناور بيهم وبيستخدم اصواتهم فى ترجيح كفه على اخرى , وفى تغطيه عمليه التزوير ..

ايه رأيكم فى لعبه التوازنات دى ؟؟


--------



الفترة القادمه :

مالم يجد فى الاحداث ظرف طارىء على درجه من القوة انه يغير الاوضاع او يجبر النظام يغير مخططه , فاللى هيحصل هيكون كالاتى :

- الاخوان بيحاولوا يلعبوا من ورا النظام بانهم يحشدوا جديا لمرسى على عكس الاتفاق , ودة بان كويس فى حشد اصوات العاملين بالخليج ..

- عندنا 3 تيارات , واحد اسلامى بيمثله ابو الفتوح ومرسى و واحد ( فلولى ) بيمثله موسى وشفيق , وواحد اصلاحى بيمثله حمدين وخالد..
كدة كدة حمدين وخالد هيورطوا اتباعهم فى المرحله الاولى وهيخلعوا من اللعبه .. بالتالى الاصلاحيين هيلاقوا نفسهم محشورين جوة اللعبه ومافيش قدامهم فى الاعادة غير اما شخص فلولى او شخص اسلامجى , ساعتها اغلبهم هيصوت للفلولى.

- شفيق هيخلع فى المرحله الاولى برضه , واتباعه كلهم هيدخلوا حظيرة موسى وهيدوله حشد اكبر ودفعه اقوى للامام .

- ابو الفتوح هيخلع برضه من المرحله الاولى واتباعه جزء منهم هيضطر يروح لمرسى وجزء مش هيلاقى قدامه غير موسى , او المقاطعه ..

- هيبقى عندنا فى الاعادة اتنين مرشحين مالهمش تالت , عمرو موسى الفلولجى ( الكلمه دى بقولها مجازا )  مقابل مرسى الاخوانجى..

- طب ليه موسى هيعيد مع مرسى ومش مع ابو الفتوح ؟

لان ابو الفتوح له شعبيه اكتر , واحتمال كفته ترجح ..
بالاضافه لان استمرار مرسى للاعادة هيدى الاخوان امل كاذب فى احتماليه نجاحه وهيضمن عدم قيامهم باى ردود فعل عنيفه تفسد الاعادة , لانه بيعتبر مرشحهم ( الرسمى ) ..

نكمل كلامنا ,

 - ساعتها كل التيارات اللى نزلت تنتخب سواء الكنيسه او الاصلاحيين والعامه والاسلاميين مش هيكون قدامهم غير واحد من اتنين , اما مرسى واما عمرو موسى  ..

- ساعتها هيقولوا لقد وقعنا فى الفخ , نعمل ايه ؟ نقاطع الاعادة ؟

قاطعوا براحتكم , كدة كدة النظام اخد منكم اللى هوعايزة فى المرحله الاولى ومعدتوش لازمينه...

شق اخر هيقرر يكمل وهيكون قدامه انه يختار بين مرسى الاسلامجى الاخوانجى معدوم الشخصيه والكاريزما وبين عمرو موسى الفلولجى والسياسى السابق المحنك , الوسطى دينيا , واللى بيتمتع بقبول نسبى فى اوساط العامه ....

تفتكروا ساعتها مين اللى هينجح ؟؟؟؟

-عمرو موسى هو اللى هينجح بمنتهى البساطه -

وكرسى الرئاسه متجهز له من اكتر من سنه , بس كان كل المطلوب ان المخطط دة يتغطى بدعم شعبى متمثل فى مسلسل حمضان اسمه  انتخابات , ودة اللى حضراتكم هتعملوة للعسكر عن طيب خاطر كمان يومين باذن الله.

قد يعتقد البعض ان نجاح موسى هيتبعه موجه احتجاجات جامدة قد تتحول لثورة شعبيه جديدة , ودة توقع خاطىء واللى فكر فيه أبعد ما يكون عن فهم عقليه المواطن المصرى وتحسس نبض الشارع ...

الناس تعبت , اتخنقت , النظام قدر يقنعهم انهم عايشين فى فوضى ودمار وكل دة سببه فراغ سياسى نتج عن الثورة ..

فى المقابل وصلهم بشكل غير مباشر ان وجود شخص على كرسى الرئاسه كفيل بانهاء الحاله دى ورجوعهم للاستقرار ( النسبى ) بتاع زمان , والاحوال هاتتحسن والسما هاتمطر بطيخ ..

لو اضفنا على دة الشعبيه والقبول النسبى اللى بيتمتع بيه موسى وسط اوساط شعبيه وريفيه كتيردلوقتى , بالاضافه للقبول اللى ناله خلال اوساط اخرى ( على مضض باعتبارة احسن الوحشين والخيار الوحيد المتاح )

فبالتالى نجاحه لن يثير اى تحرك جماهيرى ذو وزن , بالعكس .. الناس هتحط جزمه فى بقها وتسكت على امل انه يغير الاوضاع للاحسن ولو نسبيا ...

- ساعتها بقا اللى هيفكروا يعترضوا ويعملوا مظاهرات ضد موسى , مش النظام هو اللى هيقف لهم , دا الشعب هو اللى هيديهم بالجزمه , لانهم بكدة مش بيعترضوا على النظام , دول بيعترضوا على ارادة الشعب اللى عبر عنها من خلال صندوق الانتخابات , واللى هما نفسهم شاركوا فيها ...

- هايبقوا ضد الشرعيه الشعبيه , مش ضد النظام , بالاضافه لانهم هايفكروا الشعب بمرحله حرجه هو عايز ينساها لانه متوقع انه داخل على مرحله تانيه افضل ...
فالنتيجه ان الشعب هو اللى هايقمعهم وهايقفلهم بالمرصاد .. بدون ادنى تدخل من النظام ..

- الاخ عمرو موسى هايفرد قلوعه ويصطنع بعض القرارات العنتريه ويكلم العسكر من طراطيف مناخيرة , والعسكر هيمثلوا انهم خايفين منه ومهزوزين وانه قوى هما ضعاف , وساعتها الشعب هايسقف للرئيس المدنى القوى العنتيل اللى هيرجع العسكر لثكناتهم ..

- والعسكر فعلا ( استكمالا للتمثيليه ) هايختفوا من الصورة وهايرجع السياسيين المدنيين يظهروا عالتلفزيون تانى , والجيش هيختفى من الشوارع وهترجع الداخليه تمسك زمام الامور وسط ترحيب شعبى ...

- طبعا هتحصل حاله من الاستياء وسط ظباط الجيش ( خصوصا ضباط الهايكستب ودهشور ) لانهم هايرجعوا تانى لوضعهم السىء ايام مبارك بعد ما تذوقوا حلاوة السلطه والسيطرة على المدنيين فى المدن بعيدا عن معسكرات الصحراء الموحشه ..

الموضوع دة بسيط وقيادات الجيش عامله حسابه وهتقدر تتعامل معاة , عن طريق خطه إشغال واسعه للجيش بالكامل , ينهكوة فيها فى تدريبات وهميه وانشطه متعبه وعديمه الجدوى , وهايقرنوا دة بإحكام قبضه الشرطه العسكريه والمخابرات الحربيه على الضباط والصف والجنود بشكل تدريجى زى ماكان قبل الثورة بالظبط ...

- طبعا مافيش داعى اقول ان العسكر مازلوا هم المتحكمين فى السلطه , بس بشكل مستتر من خلف شخصيه الرئيس ..

- هتصدر تعليمات للمحكمه ( الطرطوريه ) العليا بانها تطلع قرار حل البرلمان اللى هى حطاة فى الدرج من فترة انتظارا للتعليمات .. والبرلمان هيتحل ... بالقانون ..

- كمان الوزارة هتتغير , وهتتطعم ببعض الوجوة ذات القبول الجماهيرى , بدون اى تغير فعلى فى السياسات , والكام وزير الاخوانجى هيطلعوا برة الوزارة ويتكسر وراهم قُلّه .

- النظام هيكشف عن عدائه صراحه للاخوان , وهيستدرجهم لارتكاب اى فعل احمق , وخصوصا انهم هيكونوا غاضبين انهم اتخدعوا وطلعوا من المولد بلا حمص ...
هايرتكبوا فعل احمق , ولو ما رتكبوش الفعل دة .. سهل جدا النظام يدبر اى تفجير او اغتيال ( زى ما عمل كتير قبل كدة ) ويلبسه للاخوان ..

- مش هيكون امام الاخوان الا انهم يحركوا التنظيم الخاص دفاعا عن نفسهم , ساعتها طبعا معروف جدا الشعب هيقف فى صف مين ... ومعروف نتيجه المواجهه دى هتكون فى صالح مين...

- المواجهه دى هاتوجد مبرر قوى للنظام انه يشن حمله اعتقالات وتنكيل واسعه بالاخوان , زى حمله 1965 كدة , وبالمرة هياخد فى السكه السلفيين اللى كان خرجهم من السجون , وبالمرة كمان هيشد شله النشطاء اللى كانوا عاملين له وش قبل كدة , وكان بيستغلهم وبيوجههم من غير ما يحسوا .. لان دورهم هيكون انتهى ومعادش لهم لزوم عندة ...

- قيل بعد احداث العباسيه من عدة مصادر ان فيه اوامر ضبط لعدد كبير من النشطاء وبعدين الموضوع اتكتم عليه ومحصلش حاجه ..
تصورى الشخصى ان الاشاعات دى صعب جدا ماتكونش حقيقيه , وصعب برضه ان النظام يكون رجع فى كلامه وقرر يسيبهم .

- لذلك فالاحتمال الارجح انه تجنب بتنفيذ القرارات دى قبل الانتخابات علشان متحصلش شوشرة هو فى غنى عنها خصوصا فى الوقت الحرج دة , وهيأجلها لما بعد فوز موسى .. وهيدخلها فى هوجه نفخ الاخوان .. او هيخليها قبلها بشويه علشان الاتنين ميتضامنوش مع بعض ( دا رأى شخصى ومجرد احتمال , قد يصيب وقد يخطىء )  ...

- الحركات القرعه اللى النظام كان بيدبرها زى ازمات الوقود وارتفاع الاسعار والاضطرابات الامنيه المتعمدة , كل دى النظام هيوقفها بعد فوز موسى , والامور هترجع لطبيعتها تانى , ودة هيصب فى مصلحه موسى طبعا...

ومتعتقدش ان بكدة موسى هايصبح فى وضع قوى يسمحله ينقلب على العسكر , لأ طبعا , لانهم ببساطه مظبطين امورهم كويس ومحجمين سلطات موسى مسبقا ومسيطرين على الاجهزة الامنيه وماسكين عليه حاجات كتير هتضر شعبيته جامد لو اتكشفت , دا بالاضافه لان الامريكان نازلين بكامل ثقلهم فى الصفقه كضامن ان دة ميحصلش , وموسى راجل دبلوماسى وعارف كويس دة معناة ايه ...

- الناس هتاخد فترة فرحانه بالاصلاحات التافهه , بس بعد شهور هيكتشفوا انهم اتخدعوا وان عيشتهم لم تتحسن , وتدريجيا هيبتدوا يستوعبوا اللعبه اللى اتعملت عليهم .. ساعتها النظام هيلاقى نفسه فى مواجهه ثورة تانيه اكبر واقوى ..

- النظام حاطط فى اعتبارة احتماليه حدوث دة , فى الحاله دى العسكر هايظهروا تانى فى الصورة , اما عن طريق انقلاب وهمى مدبر ومتفق عليه ضد موسى , بس غالبا مش هيحظى بقبول لان الشعب مش عايز يعيد الكرة تانى ..

ساعتها سيتم تدبير انقلاب عسكرى وهمى يقوم بيه ظباط من رتب صغيرة ومتوسطه ضد قيادات الجيش وينتزعوا السلطات العسكريه منهم ويتحركوا فى انقلاب وهمى اخر ضد موسى .. بعدين حسب القبول الشعبى ليهم من عدمه سيتم التفكير فى تقديم البرادعى كصمام امان للنظام وكبلاعه لاحتواء الغضب الجماهيرى ...

مدى نجاحهم بقا فى المخطط دة من عدمه مرهون بشىء واحد فقط .. هل الشعب استوعب اللعبه وقرر يفهم ومايقعش فى الفخ تانى ؟ ولا لسه لم يتمكن من استيعاب اللعبه كلها ؟